पुणे-राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनी पोलिसांकडे रवींद्र धंगेकर व सुषमाताई अंधारे व अनिल परब या नेत्यांना पोलिस संरक्षण देण्याची मागणी केली आहे.यांच्या केसालाही धक्का लागला तर सरकार जबाबदार असेल असाही इशारा त्यांनी सरकारला दिला आहे.

राज्यभरात चर्चेस असलेली गुंडांची प्रकरणं अतिशय गंभीर असून या प्रकरणात भूमिका मांडणारे रवींद्र धंगेकर व सुषमाताई अंधारे रवींद्र धंगेकर व सुषमाताई अंधारे यांना सरकारने तत्काळ पोलिस संरक्षण द्यावे. यापैकी कुणाच्या केसाला जरी धक्का लागला तर सरकार जबाबदार असेल. म्होरके जरी अंडरग्राउंड असले तरी त्यांच्या गँग इतर सदस्यांच्या माध्यमातून नेहमीच सक्रिय असतात आणि विशेष म्हणजे काही गँगला तर मोठ्या व्यक्तींचे वरदहस्त आहेत. त्यामुळे अधिक काळजी घेण्याची गरज आहे. ही प्रकरण अतिशय गंभीर असून पोलिसांनी डोळेझाक करू नये.

नेपाळसारख्या बॉर्डर तर देशाबाहेर पळून गेलेल्या गुन्हेगारांसाठी ‘आवो जावो घर तुम्हारा’ असल्यासारख्या झाल्या असून पोलिसांनी अशा बॉर्डर्सवर विशेष लक्ष ठेवायला हवे, असे रोहित पवार यांनी म्हटले आहे.

उल्लेखनीय बाब म्हणजे शिवसेना उद्धव बाळासाहेब ठाकरे पक्षाचे नेते अनिल परब व उपनेत्या सुषमा अंधारे यांनी पुण्यातील कुख्यात गुंड नीलेश घायवळ याचा भाऊ सचिन घायवळ याला शस्त्र परवाना दिल्याप्रकरणी राज्याचे गृहराज्यमंत्री योगेश कदम यांना धारेवर धरले आहे. पुणे पोलिसांचा अहवाल डावलून योगेश कदम यांनी घायवळला शस्त्र परवाना मंजूर केल्याचा आरोप करत या नेत्यांनी कदम यांच्या राजीनाम्याची मागणी केली आहे. या आरोपांना उत्तर देताना योगेश कदम अक्षरशः हतबल झाल्याचे चित्र आहे. विशेषतः त्यांचे वडील रामदास कदम यांनीही केलेला युक्तिवादही या प्रकरणी विरोधकांनी धुडकावून लावला आहे. यामुळे योगेश कदम यांच्यापुढील अडचणी वाढल्या आहेत.

दुसरीकडे, सत्ताधारी महायुतीकडून नीलेश घायवळ व रोहित पवार यांचा एक फोटो व्हायरल केला आहे. तसेच रोहित पवारांच्या मातोश्री यांनी घायवळची प्रशंसा केल्याचा एक व्हिडिओही समोर आणला आहे. रोहित पवारांनी या राजकारणावरही तीव्र संताप व्यक्त केला आहे. माझी आई राजकारणात नाही. समाजकारणात आहे. भाजप आज राजकारण करताना कोणत्या थराला जात आहे? आईला यातील काहीही कळत नाही. ती अतिशय साध्या सरळ स्वभावाची आहे. तिच्या बाजूला कुणी विरोधक येऊन उभा राहिला तरी तिच्या लक्षात येणार नाही अशी ती आहे. पण नीलेश घायवळ समवेतचा माझा फोटो वापरून भाजप अत्यंत गलिच्छ राजकारण करणार असेल तर त्याचा अर्थ भाजप माझा सामना करण्यास घाबरत आहे असाच होतो, असे रोहित पवार यांनी म्हटले आहे.आईला कशाला मध्ये आणता? तुमच्यात ताकद नाही का माझ्याशी लढायची? मी राजकारणात आहे. तुम्हाला काय काढायचे ते काढा, आम्हाला जे काय काढायचे ते काढू. नीलेश घायवळला योगेश कदम यांनी बंदुकीचे लायसन्स कुणाच्या सांगण्यावरून दिले? हे शिवसेना नेते रामदास कदम यांनीच स्पष्ट केले आहे. मी आधीच बोललो होतो सभापती राम शिंदे यांच्या सांगण्यावरून लायसन्स दिले गेले आहे. त्याला रामदास कदम यांनी दुजोरा दिला. पण यावरून भाजपच्या पोटात दुखायचं कारण काय आहे. असा प्रश्नही रोहित पवारांनी यावेळी उपस्थित केला.

पुणे- राष्ट्रवादी काँग्रेस शरदचंद्र पवार पक्षाचे आमदार बापूसाहेब पठारे यांच्यासह नऊ जणांविरुद्ध मारहाण आणि ३ लाख ५० हजार रुपये किमतीच्या सोन्याच्या साखळीची चोरी केल्याप्रकरणी विमानतळ पोलिस ठाण्यात गुन्हा दाखल करण्यात आला आहे.लोहगाव येथील रस्ते कामावरून सुरू असलेल्या वादामुळे हा गुन्हा दाखल झाल्याचे समजते आहे. मारहाणीची ही घटना ४ ऑक्टोबर रोजी रात्री साडेनऊ वाजण्याच्या सुमारास लोहगाव येथील गाथा लॉन्स येथे घडली.

बंडु शहाजी खांदवे (वय ४९) यांनी दिलेल्या तक्रारीवरून आमदार बापूसाहेब पठारे, शकील शेख, महेंद्र आबा पठारे, सुरेंद्र बापूसाहेब पठारे, रवींद्र बापूसाहेब पठारे, किरण बाळासाहेब पठारे, सागर नारायण पठारे, सचिन किसन पठारे आणि रूपेश मोरे यांच्यावर गुन्हा दाखल करण्यात आला आहे. यापूर्वी बापूसाहेब पठारे यांनी दिलेल्या तक्रारीवरून खांदवे यांच्यासह इतरांवर गुन्हा दाखल करण्यात आला होता. आता हा परस्पर विरोधी गुन्हा दाखल करण्यात आला आहे.

लोहगाव भागातील ३१ कोटी ५० लाख रुपये मंजूर होऊनही रस्त्याचे काम थांबले होते. खराब रस्त्यांमुळे शाळकरी मुलगी आणि एका कॉलेज विद्यार्थ्याचा मृत्यू झाल्याने, फिर्यादी खांदवे यांनी ५ ऑक्टोबर रोजी ‘जन आक्रोश आंदोलन’ आयोजित केले होते.

या आंदोलनाची व्हॉट्सअँप पोस्ट वडगाव शेरी मतदारसंघाचे आमदार बापुसाहेब पठारे यांच्याकडे पोहोचल्यानंतर हा वाद सुरू झाला. बापुसाहेब पठारे यांनी घटनास्थळी येऊन फिर्यादी खांदवे यांना शिवीगाळ करत मारहाण केल्याचे आणि यावेळी साडेतीन लाखांची सोनसाखळी चोरी केल्याचे तक्रारीत म्हटले आहे. खांदवे यांनी ९ ऑक्टोबर रोजी रुग्णालयातून जबाब नोंदवला, त्यानंतर आता हा गुन्हा दाखल करण्यात आला आहे.

पुणे- कुख्यात गुंड, राजकारण्यांचा जवळचा मित्र, आणि अनेक गुन्ह्यांमध्ये आरोपी राहिलेला हा नीलेश घायवळची आई, कुसुम घायवळ. यांनी News18लोकमत या वृत्त वाहिनीला दिलेल्या मुलाखतीत असा खळबळजनक दावा केला आहे की, राजकारण्यांनी ठरवून माझ्या मुलाला अडकवले, कारण तो आता गुन्हेगारीच्या बाहेर पडून राजकारणात येण्याच्या तयारीत होता.निवडणुकीत उभे राहू नये,म्हणून राजकीय कट रचला गेला, राजकारणी त्यांना जगू देईनात, पोलीस राजकारणी आणि सारं जग खोटं बोलतंय

कुसुम घायवळ यांनी सांगितले की, नीलेश जिल्हा परिषद निवडणुकीच्या रिंगणात उतरणार होता. मात्र, विरोधकांना हे पटले नाही. त्यांनी ठरवून गेम रचला आणि त्याला अडचणीत आणले. या खुलाशानंतर महाराष्ट्रातील राजकीय वर्तुळात खळबळ उडाली आहे.

कुसुम घायवळ यांनी स्पष्टपणे म्हटले की, माझ्या मुलाला राजकारणात प्रवेश करायचा होता. तो नगर जिल्ह्यातील सोनेगाव जिल्हा परिषद निवडणुकीतून उमेदवारी दाखल करण्याच्या तयारीत होता. मात्र काही प्रभावशाली राजकारण्यांना हे मंजूर नव्हते. त्यांना घायवळ भावांना वर येऊ द्यायचे नव्हते. म्हणून त्यांनी माझ्या मुलाला फसवण्यासाठी ठरवून कारस्थान रचले. कुसुम घायवळ यांनी पुढे सांगितले की, गेल्या काही वर्षांपासून नीलेशने गुन्हेगारीपासून पूर्णपणे दूर जाण्याचा निर्णय घेतला होता. त्याने मला अनेकदा सांगितले होते की, आई, मला आता आयुष्य नवे सुरू करायचे आहे, गुन्हेगारी सोडायची आहे. पण राजकारणी लोक त्याला तसे करू देत नव्हते. त्यांना तो कायम वादात, पोलिसांच्या फाईलमध्ये आणि तुरुंगाच्या भिंतींतच दिसावा, असे वाटत होते.

कुसुम घायवळ यांनी मुलाखतीत सांगितले की, गेल्या चार वर्षांत आमचे आयुष्य शांत झाले होते. नीलेशने व्यवसाय सुरू केला होता, समाजात मिसळायला सुरुवात केली होती. तो रोज मंदिरात जायचा, सामाजिक कामात भाग घ्यायचा. पण हे काहींना खपले नाही. त्याच्या विरोधात पुन्हा कट रचला गेला. राजकारण्यांनी ठरवले की, तो निवडणुकीत उतरू नये. म्हणूनच त्याला गुन्ह्यात अडकवले गेले. हा सगळा खेळ आहे, सत्तेचा आणि मतांचा, असा आरोपही त्यांनी केला.

पुण्यात झालेल्या एका गोळीबाराच्या प्रकरणानंतर नीलेश घायवळ अचानक लंडनला पळून गेला. या घटनेनंतर तो चर्चेत आला आणि पोलिसांवरही प्रश्नचिन्ह उभे राहिले. गुन्हेगारी पार्श्वभूमी असूनसुद्धा त्याला पासपोर्ट कसा मिळाला? आणि पोलिसांच्या देखरेखीखाली असलेला आरोपी देशाबाहेर कसा गेला? असा प्रश्न उभा राहिला. या सर्वावर उत्तर देताना कुसुम घायवळ म्हणाल्या की, माझ्या मुलाने स्वतः काही केले नाही. त्याच्याकडून करवून घेतले गेले. ज्यांनी त्याच्याकडून काम करून घेतले, तेच लोक आता त्याच्याविरुद्ध कारवाई करत आहेत. माझा मुलगा पळून गेला नाही, त्याला पळवण्यात आले. तो निर्दोष होता. न्यायालयाने अनेक गुन्ह्यांत नीलेशला निर्दोष ठरवले होते. जेव्हा तो निर्दोष सुटला, तेव्हा त्याने आयुष्य बदलायचा निर्णय घेतला. पण काहींना हे आवडले नाही. त्यांना घायवळ पुन्हा तुरुंगात हवा होता, असेही त्यांनी सांगितले.

कुसुम घायवळ यांनी थेट राजकारण्यांकडे बोट दाखवले आहे. राजकारणी लोक खूप वाईट आहेत. माझ्या मुलाने चांगले आयुष्य जगावे, असे त्यांना कधीच वाटले नाही. त्यांना तो कायम गुन्हेगारीत राहावा असेच वाटते. त्यांना भीती होती की, नीलेश आणि त्याचा भाऊ जर राजकारणात आले, तर अनेकांचे राजकीय गणित बदलून जाईल, असा त्यांचा आरोप आहे. मी त्याची आई आहे. मी खोटे बोलणार नाही. कोणत्या आईला आपल्या मुलाने गुन्हा करावा असे वाटते? आम्हाला फक्त शांततेने जगायचे होते. पण काही लोकांनी आम्हाला तसे करू दिले नाही. आजही आमच्यावर अन्यायचे सावट असल्याचा दावा त्यांनी केला.

या संपूर्ण प्रकरणात पोलिसांवरही प्रश्नचिन्ह उपस्थित होत आहे. नीलेश घायवळविरुद्ध अनेक गुन्हे दाखल असले तरी त्याच्या मागे राजकीय व्यक्तींचा हात असल्याचे बोलले जाते. त्याच्या परदेशात पळून जाण्याच्या घटनेनंतर अनेकांनी असा आरोप केला होता की, काही नेत्यांच्या दबावाखालीच पोलिसांनी सौम्य कारवाई केली. आता मात्र घायवळ कुटुंबाचा दावा आहे की, ज्यांनी त्याला आधी पळवून नेले, तेच आता त्याच्यावर कारवाई करा असे सांगत आहेत.

पुणे-कुख्यात गुन्हेगार निलेश घायवळ याचा लहान भाऊ सचिन घायवळ याला शस्त्र परवाना देण्यात आल्याच्या प्रकरणावरून गृहराज्यमंत्री योगेश कदम यांच्यावर टीका होत आहे. या वादावर आता उपमुख्यमंत्री अजित पवार यांनी प्रतिक्रिया दिली आहे. त्यांनी स्पष्ट केले की, “योगेश कदम यांनी शिफारस केली तरीही पोलीस आयुक्तांनी त्यांना अद्याप कोणताही शस्त्र परवाना दिलेला नाही, अशी माहिती मला स्वतः पोलिस आयुक्तांनी दिली आहे.” तसेच, चुक असेल त्यावर रितसर कारवाई करावी, कोण कोणत्या गटाचा, पक्षाचा , कुणाबरोबर फोटो असे काहीही बघू नका अशा सूचना दिल्याचेही त्यांनी यावेळी सांगितले.जर या प्रकरणात कोणत्याही राजकारण्यांनी दबाव टाकण्याचा प्रयत्न केला असेल, तर त्यांच्यावरही कारवाई करण्यात येईल. तसेच शस्त्र परवान्यासाठी जर कोणाची शिफारस आली, तर त्याची वस्तुस्थिती तपासून पाहणे आवश्यक आहे. त्यानंतरही एखाद्या राजकारण्याने दबाव टाकून शस्त्र परवाना देण्याची मागणी केली, तर तो नक्कीच दोषी ठरेल. असही पवार यावेळी म्हणाले.

पुण्यात आज झालेल्या राष्ट्रवादी परिवार मिलन कार्यक्रमानंतर अजित पवार माध्यमांशी बोलत होते. पत्रकारांनी नीलेश घायवळ आणि सचिन घायवळ यांच्या संदर्भात विचारले असता त्यांनी स्पष्ट सांगितले की, मी स्वतः पोलिस आयुक्तांना सांगितले आहे, कोण कोणत्या पक्षाचा, कोणाचा कार्यकर्ता, कोणाच्या जवळचा आहे, हे काहीही बघायचे नाही. ज्याने कायदा हातात घेतला असेल, नियम मोडले असतील, त्याच्यावर कठोर कारवाई व्हायला हवी, असे अजित पवार म्हणाले. त्यांनी यावेळी स्पष्ट केले की, कायद्यापुढे सर्व समान आहेत, आणि या प्रकरणात राजकीय हस्तक्षेप सहन केला जाणार नाही.

कोथरूडमधील अलीकडील गोळीबारानंतर घायवळ गँगचा म्होरक्या नीलेश घायवळ आणि त्याच्या टोळीच्या कारवायांमुळे पुणेच नव्हे तर राज्यभरातील राजकारणात खळबळ उडाली आहे. या प्रकरणावरून महायुतीतच एकमेकांवर आरोप-प्रत्यारोप सुरू झाले आहेत. राज्याचे गृहराज्यमंत्री योगेश कदम यांनी नीलेशचा भाऊ सचिन घायवळ याला शस्त्र परवाना दिल्याचा आरोप होत असतानाच, राज्याचे उपमुख्यमंत्री आणि पुण्याचे पालकमंत्री अजित पवार यांनी आज यावर सविस्तर भूमिका मांडली आहे.

कायदा सर्वांसाठी समान आहे. कोणी मंत्री, कार्यकर्ता, किंवा कोणत्याही पक्षाचा असो, गुन्हा केला असेल तर शिक्षा होणारच. पुण्यात गुंडगिरी वाढू देणार नाही. सरकार कोणाचेही असो, कायदा आणि पोलिस त्यांचे काम निष्पक्ष राहिले पाहिजे, असेही अजित पवार यांनी म्हटले आहे.

गृहराज्यमंत्री योगेश कदम यांनी शस्त्र परवान्यासाठी शिफारस केली होती, असा आरोप होत आहे. यावर अजित पवार म्हणाले की, मला सांगितले गेले की काही लोकांनी शिफारस केली होती, पण पोलिस आयुक्तांनी शस्त्र परवाना दिला नाही. आणि मी त्यांचे कौतुकच केले. कारण कायदा आणि सुव्यवस्था टिकवून ठेवणे हे सगळ्यांचे कर्तव्य आहे. पुण्यातील असो, बाहेरच्या महाराष्ट्रातील असो, गुन्हेगाराला वाचवण्याचा प्रयत्न कुणी करू नये. मुख्यमंत्री, उपमुख्यमंत्री आणि पंतप्रधानांच्या उपस्थितीत झालेल्या चर्चेतही हा विषय आला होता, आणि सर्वांची भूमिका एकच होती, दोषींवर कोणतीही माया नाही.

अजित पवारांनी ठाम भूमिका घेत सांगितले की, राजकीय नेत्यांच्या दबावाखाली पोलिसांनी निर्णय घेऊ नयेत. कायदा मोडणाऱ्यांवर कारवाई करायची, एवढेच काम आहे. शिफारस कोणाची आहे हे गौण आहे. ते पुढे म्हणाले की, गेल्या 32 वर्षांच्या राजकीय कारकिर्दीत मी नेहमी सांगतो, एखाद्या फाईलवर माझी शिफारस असली, तरी जर ती वस्तुस्थितीला धरून नसेल, तर सचिव किंवा पोलिसांनी लक्षात आणून द्यावे. जर तरीही चुकीच्या शिफारशीवर निर्णय झाला, तर तो मंत्री दोषी ठरेल. अजित पवारांच्या या वक्तव्यामुळे आता योगेश कदम यांच्या भूमिकेवर नवे प्रश्नचिन्ह निर्माण झाले आहे.

भाजप नेते आणि मंत्री चंद्रकांत पाटील यांच्यावर नीलेश घायवळशी संबंध असल्याचा आरोप शिवसेना नेते रवींद्र धंगेकर यांनी केला होता. या संदर्भात विचारल्यावर अजित पवार म्हणाले की, कोण काय म्हणतो, हा ज्याचा त्याचा प्रश्न आहे. संविधानाने सर्वांना बोलण्याचा अधिकार दिला आहे. पण फोटो आहेत म्हणून संबंध आहेत, असे म्हणता येत नाही. आजच्या काळात प्रत्येकजण मोबाईलने सेल्फी घेतो. पण तपास करताना जर फोन रेकॉर्ड, संभाषण, किंवा आर्थिक व्यवहारांचे पुरावे मिळाले, तर नक्कीच कारवाई होईल.

पिंपरी चिंचवड मधील आझम पानसरे यांच्या सांगण्यावरून पूर्वी चुकीच्या व्यक्तीला पक्षप्रवेश दिला गेला होता. मला कळल्यावर मी त्याला लगेच बाहेर काढले. अन्यायग्रस्तांना न्याय मिळावा यासाठी आम्ही नेहमी उभे राहू, पण ज्यांचे हात बरबटले आहेत त्यांना आम्ही पाठीशी घालणार नाही, असे अजित पवार म्हणाले. पासपोर्ट, परवाना आणि चौकशी सर्व होणार असल्याचे अजित पवार म्हणाले. घायवळला पासपोर्ट कोणी दिला, शिफारस कोणी केली, याचीही चौकशी सुरु आहे. काहींनी शिफारस केली पण परवाना मिळाला नाही, असे मला सांगण्यात आले. तरीही जर प्रतिकूल मत असतानाही परवाना दिला असेल, तर त्या निर्णयावर स्वाक्षरी करणारा अधिकारी किंवा मंत्री दोषी ठरेल. त्या दिशेने चौकशी चालू आहे.

नीलेश घायवळ आणि त्याच्या भावावर अनेक गुन्हे दाखल आहेत. तरीही ते राजकीय पातळीवर सक्रिय असल्याचे आरोप आहेत. यावर अजित पवार म्हणाले, राजकारण हे सेवेसाठी आहे. गुंड प्रवृत्तीच्या लोकांना यात स्थान नाही. कायदा मोडणाऱ्यांना संरक्षण दिले जाणार नाही. महाराष्ट्रात शांतता आणि सुव्यवस्था टिकवण्यासाठी सरकार कटिबद्ध आहे. कोथरूड गोळीबारानंतर घायवळ टोळीविरोधात पोलिसांनी मोहीम सुरू केली आहे. नीलेश घायवळ सध्या परदेशात फरार असून, त्याच्या अटकेसाठी रेड कॉर्नर नोटिस जारी करण्याची मागणी होत आहे. दुसरीकडे सचिन घायवळच्या शस्त्र परवान्याबाबत गृह विभागात तपास सुरू आहे.