महाराष्ट्र नवनिर्माण विद्यार्थी सेनेने केला पर्दाफाश

पुणे- बॉम्बे प्रोहिबीशन अॅक्ट १९४९ मधील कलम ११.३ नुसार व शासन धोरणानुसार रात्री १:३० वाजल्यानंतर कुठल्याही लायसेन्स धारक आस्थापनांमध्ये मद्य विक्री करण्यास मनाई आहे तरीही आज रात्री दीड नंतर ” टॅायरुम ” या पब मध्ये रात्री उशिरा ३.०० पर्यंत उघडपणे मद्य विक्री होत होती, याबाबत मनविसे पदाधिकाऱ्यांनी तत्काळ उत्पादन शुल्क विभागाच्या मा. नम्रता वाघ यांना तक्रार केली व पार्टी सुरू असताना विहित कालावधी नंतर मद्य विक्री होत असल्याचे व्हिडिओज आणि मद्य खरेदी केल्याच्या पावत्या सादर केल्या, तदनंतर उत्पादन शुल्क अधिकाऱ्यांनी या ठिकाणी धाड मारून पब बंद केला. आताही रात्री उशिरापर्यंत त्याठिकाणी कारवाई सुरू होती .

मनविसे सातत्याने पब क्लब च्या गैरप्रकारांबाबत आक्रमकपणे आवाज उठवत आहे, या आधी देखील सदर पब विरोधात उत्पादन शुल्क विभागाने कारवाई केली आहे तरीही आज देखील ह्या “टॅायरुम” मध्ये कायद्याचा भंग करून सुरू असलेल्या मद्य विक्री सर्रास होती ही बाब मनविसेने प्रशासनास निदर्शनास आणून दिली.तरी या टॅायरुम आस्थापनेवर उत्पादन शुल्क विभागाने तत्काळ कठोर कारवाई करून हा पब कायमचाच सिल करावा ही मागणी महाराष्ट्र नवनिर्माण विद्यार्थी सेनेने केली आहे.

यापुढेही मनविसे अशा पब क्लब मधील गैरप्रकाराविरोधात आक्रमकतेने लढा देणार आहे.आज शहर अध्यक्ष धनंजय दळवी यांच्या नेतृत्वाखाली झालेल्या आंदोलन प्रसंगी राज्य कार्यकारिणी सदस्य अभिषेक थिटे,विभाग अध्यक्ष हेमंत बोळगे, आशुतोष माने, केतन डोंगरे, निलेश जोरी, संतोष वरे, विभाग सचिव मयुर शेवाळे, उपाध्यक्ष तेजस उमाप व मोठ्या संख्येने पदाधिकारी व महाराष्ट्र सैनिक उपस्थित होते

पुणे- सायबर फसवणुकीच्या जाळ्यात हळूहळू असंख्य लोक अडकून फसविले जात असून हडपसर येथील एकाला शेअर ट्रेडिंग च्या नावाखाली आमिष दाखवून ऑनलाईन माध्यमाद्वारे तब्बल ३ कोटी ६६ लाख ४४ हजाराला सायबर चोरट्यांनी गंडा घातल्याचा प्रकार उघडकीस आला आहे.

एका ५२ वर्षीय व्यक्तीने या संदर्भात सायबर पोलिसांकडे तक्रार नोंदविली आहे. १५ जुलाई ते ७ ऑक्टोबर दरम्यान हा प्रकार घडला असून वरिष्ठ पोलीस निरीक्षक स्वप्नाली शिंदे (९९२३७९६५८७) या अधिक तपास करत आहेत.

पुणे : कला जोपासण्यासाठी वयाचे बंधन नाही. उद्योग-व्यवसायात राहून अनेकांनी कला जोपासली आहे. जीवनाकडे कसे बघावे याचा वस्तुपाठ कलेतून मिळतो, असे प्रतिपादन कोहिनूर ग्रुपचे अध्यक्ष कृष्णकुमार गोयल यांनी केले. कलाकारांमधील कलेला प्रोत्साहन दिल्याशिवाय समाजात कलाकारांची संख्या वाढणार नाही, असेही त्यांनी नमूद केले.

नवकार आर्ट फाऊंडेशनतर्फे महाराष्ट्रातील 40 चित्रकारांनी रेखाटलेल्या 90 चित्रांचे प्रदर्शन बालगंधर्व कलादालनात आयोजित करण्यात आले आहे. प्रदर्शनाचे उद्घाटन आज (दि. 12) कृष्णकुमार गोयल यांच्या हस्ते झाले. त्या वेळी ते बोलत होते. ज्येष्ठ चित्रकार मुरली लाहोटी, सुरेश लोणकर, सरहद, पुणेचे संस्थापक संजय नहार, आनंद दरबारचे संस्थापक बाळासाहेब धोका, जैन अल्पसंख्याक विकास आणि आर्थिक मंडळाचे संदीप भंडारी, वंचित विकासचे अध्यक्ष विजय मारलेचा, उद्योजिका राजश्री पारख, संयोजक मनसुख छाजेड, प्रेरणा नहार यांची प्रमुख उपस्थिती होती. प्रदर्शन 14 ऑक्टोबर पर्यंत सकाळी 10 ते रात्री 8 या वेळात सर्वांसाठी खुले आहे.

प्रेरणा नहार, कीर्ती ओसवाल, संजय संचेती, प्रतिभा दुगड, रोशनी नहार, सतिश दुगड, मनोज नहार, अनुज नहार यांनी संयोजन केले आहे.

महाराष्ट्रातील 60 चित्रकारांच्या 200 चित्रांमधून 90 चित्रांची प्रदर्शनासाठी निवड करण्यात आली आहे. प्रदर्शनात 23 महिला, 7 पुरुष आणि 10 बाल कलाकारांच्या चित्रांचा समावेश आहे. कलाकारांच्या कलागुणांना वाव देण्यासाठी प्रदर्शन आयोजित करण्यात आले असल्याचे संयोजक मनसुख छाजेड यांनी प्रास्ताविकात सांगितले. कलाकारांसाठी शैक्षणिक संस्था सुरू करण्याचा विचार असल्याचे ते म्हणाले.

प्रदर्शनातील चित्रांची पाहणी केल्यानंतर कृष्णकुमार गोयल पुढे म्हणाले, कलाकारांनी सुंदर चित्रे रेखाटली आहेत. छत्रपती शिवाजी महाराज यांचे चित्र बघितले की मनात शौर्याची, देव-देवतांची चित्रे बघितली की भक्तीची, निसर्गाची चित्रे बघितले की सौंदर्याची अनुभूती येते.

दरवर्षी आयोजित करण्यात येत असलेल्या उपक्रमाचे राजश्री पारख यांनी कौतुक केले.

मुरली लाहोटी म्हणाले, चित्रकाराचे चित्र बोलते, लेखकाचा लेख बोलतो तर कवीची कविता बोलते. यातूनच पुढे इतिहास घडतो. सुरेश लोणकर यांनी चित्रकारांच्या कलेचे कौतुक केले.

कला समाजाला जोडण्याचे काम करते असे सांगून संजय नहार म्हणाले, नवकाराचा उच्चार केला की मांगल्याचे विचार मनात येतात. मांगल्याच्या भावनेतून सुरू असलेले उपक्रम अभिनंदनीय आहेत. बाळासाहेब धोका, राजेंद्र मेहता, संदीप भंडारी, विजय मारलेचा यांनी मनोगत व्यक्त केले.

मान्यवरांचा सत्कार मनसुख छाजेड, पलक देसरडा, मनोज पवार, रोशनी नहार, कीर्ती ओसवाल, अमिता देसाई, अर्चना शहा, सतीश दुगड यांनी केले. कार्यक्रमाचे सूत्रसंचालन प्रतिभा दुगड यांनी केले तर आभार अनुज नहार यांनी मानले.

सेंट तेरेसा स्कूलमध्ये विद्यार्थ्यांकडून पथनाट्य सादर

लोणी-काळभोर : एमआयटी आर्ट, डिझाईन अँड टेक्नॉलॉजी विद्यापीठाच्या स्कूल ऑफ एज्युकेशन अँड रिसर्च येथील विद्यार्थ्यांनी मानसिक आरोग्य दिनानिमित्त सेंट तेरेसा स्कूल, लोणी-काळभोर येथे “मानसिक आरोग्याची संवेदनशीलता” या विषयावर आधारित पथनाट्य सादर केले.

शालेय विद्यार्थ्यांना भेडसावणारा मानसिक ताण, पालकांच्या अपेक्षा, अभ्यासाचा अतिरिक्त तणाव आणि विद्यार्थ्यांच्या मानसिक आरोग्याशी संबंधित समस्यांवरील उपाय तसेच त्यांचे मानसिक आरोग्य चांगले राखण्यासाठी पालक व शिक्षक यांची भूमिका या विषयांवर या पथनाट्यातून महत्त्वपूर्ण संदेश देण्यात आला.

शालेय विद्यार्थ्यांनी मानसिक आरोग्य टिकवण्यासाठी मोबाईलच्या वापरावर नियंत्रण ठेवणे, मानसिक आरोग्य सुधारण्यासाठी उपयुक्त ठरणारे व्यायाम व प्राणायाम आदींची माहितीही या सादरीकरणातून देण्यात आली. विद्यार्थ्यांच्या उत्कृष्ट सादरीकरणामुळे उपस्थित चिमुकल्यांमध्येही प्रचंड उत्सुकता निर्माण झाली.

सेंट तेरेसा स्कूलचे मुख्याध्यापक विनय सुकुल आणि उपमुख्याध्यापिका सॅलविना सुकुल यांचे या कार्यक्रमाच्या यशस्वितेसाठी विशेष सहकार्य लाभले. तसेच शाळेचा शिक्षकवर्ग, विद्यार्थी आणि स्कूल ऑफ एज्युकेशन अँड रिसर्चचे सर्व प्राध्यापक व छात्र-अध्यापक यांनी या कार्यक्रमाच्या यशस्वितेसाठी परिश्रम घेतले.

विद्यापीठाचे कार्यकारी अध्यक्ष तथा प्र-कुलपती डॉ. मंगेश कराड आणि कुलगुरू डॉ. राजेश एस. यांच्या प्रेरणेने या कार्यक्रमाचे आयोजन करण्यात आले. तसेच विद्यापीठाचे कुलसचिव डॉ. महेश चोपडे आणि अधिष्ठाता डॉ. प्रिया सिंग यांच्या मार्गदर्शनाखाली हा कार्यक्रम यशस्वीपणे पार पडला. डॉ. नीता म्हवाण यांनी कार्यक्रमाच्या समन्वयक म्हणून काम पाहिले.

पुणे- अल्पवयीन मुलीचा विनयभंग करणाऱ्या रिक्षाचालकाला पकडून २४ तासांत त्याचेवरील चार्जशीट हडपसर पोलिसांनी कोर्टात दाखल केले .आणि गतिमान तपासाची झलक प्रतीत केली .हडपसर पोलीस स्टेशनचे तपास अधिकारी सहाय्यक पोलीस निरीक्षक हसीना शिकलगार यांनी संबधित गंभीर गुन्ह्यातील साक्षीदारांचे जबाब नोंदवून, सीसीटीव्ही फुटेजसह इतर पुरावे गोळा केले. पुरावे भक्कम करून केवळ २४ तासांच्या आतच आरोपीविरुध्द दोषारोपपत्र न्यायालयात दाखल केले.

दिनांक ०९/१०/२०२५ रोजी यातील फिर्यादी माळवाडी येथून गाडीतळ हडपसर असा प्रवास करीत असताना अग्रवाल स्वीट, सोलापूर रोड, गाडीतळ हडपसर पुणे येथे एका रिक्षामध्ये बसल्या असता रिक्षाचालकाने फिर्यादी यांना घाणेरड्या व अश्लिल पध्दतीने हात लावला. या कृत्यामुळे फिर्यादीच्या मनास तीव्र लज्जा उत्पन्न झाली. सदरबाबत हडपसर पोलीस स्टेशन गु.र. नं ८६६/२०२५ भा. न्या. सं.क. ७४ सह बालकांचे लैंगीक अपराधापासून संरक्षण अधिनियम (POCSO) कलम ८,१२ प्रमाणे गुन्हा दाखल करण्यात आला.
हडपसर पोलीस स्टेशनच्या हद्दीत घडलेल्या गंभीर गुन्ह्याचे गांभिर्य ओळखुन, आरोपी लवकरात लवकर निष्पन्न करण्यासाठी वरिष्ठ पोलीस निरीक्षक संजय मोगले यांच्या मार्गदर्शनाखाली पोलीस निरीक्षक (गुन्हे)निलेश जगदाळे यांच्या देखरेखीखाली तपास पथकाचे प्रभारी अधिकारी पोलीस उप-निरीक्षक हसन मुलाणी, पोलीस उप-निरीक्षक सत्यवान गेड व पोलीस अंमलदार यांचे विशेष पथक नियुक्त करण्यात आले.
तपास पथकाने घटनेच्या परिसरातील सीसीटीव्ही फुटेज मिळवून त्याचे बारकाईने तांत्रिक विश्लेषण केले. त्यानंतर संशयीत आरोपी शैलेश गुंडराव पाटील वय २९ वर्ष रा. मांजरी पुणे याची ओळख पटवून त्यास ताब्यात घेण्यात आले.
सदरची कामगिरी ही अपर पोलीस आयुक्त, पुर्व प्रादेशिक विभाग, मनोज पाटील, पोलीस उप आयुक्त, परिमंडळ ५ पुणे शहर डॉ. राजकुमार शिंदे, मा. सहाय्यक पोलीस आयुक्त, हडपसर विभाग पुणे श्रीमती अनुराधा उदमले यांचे मागदर्शनाखाली वरिष्ठ पोलीस निरीक्षक हडपसर पोलीस स्टेशन श्री. संजय मोगले, पोलीस निरीक्षक (गुन्हे) निलेश जगदाळे यांचे सुचनांप्रमाणे सहाय्यक पोलीस निरीक्षक हसीना शिकलगार, तपास पथकाचे प्रभारी अधिकारी पोलीस उप-निरीक्षक हसन मुलाणी, पोलीस उप-निरीक्षक सत्यवान गेड, पोलीस अंमलदार संदीप राठोड, अमित साखरे, बापु लोणकर, अभिजीत राऊत, कुंडलीक केसकर, तुकाराम झुंजार, विनोद शिर्के, संभाजी म्हांगरे, स्वप्नाली मोरे, मिरा रंदवे, साधना राठोड, पुनम खामकर व अमोल जाधव यांनी केली आहे.

पुणे: विद्यार्थी साहाय्यक समितीच्या वतीने ३३६ मुलींसाठी उभारलेल्या नवीन वसतिगृहाचे उद्घाटन येत्या सोमवारी (दि. १३) सायंकाळी ५ वाजता लजपत विद्यार्थी संकुल, विद्यार्थी साहाय्यक समिती, शिवाजी हौसिंग सोसायटी, सेनापती बापट रस्ता, पुणे येथे होणार आहे. अमेरिकास्थित देणगीदार विभावरी आणि गिरीश गायतोंडे या दाम्पत्याच्या हस्ते हा उद्घाटन सोहळा पार पडणार आहे. यावेळी ज्येष्ठ उद्योजक व समितीचे अध्यक्ष प्रतापराव पवार उपस्थित राहणार आहेत, अशी माहिती समितीचे कार्यकारी विश्वस्त तुषार रंजनकर यांनी पत्रकार परिषदेत दिली. प्रसंगी विश्वस्त मंडळातील तुकाराम गायकवाड, संजय अमृते, रत्नाकर मते, प्रभाकर पाटील, चंद्रकांत कुलकर्णी आदी उपस्थित होते.

तुषार रंजनकर म्हणाले, “ग्रामीण भागातील गरजू मुलामुलींकरिता अल्पदरात निवास-भोजन व व्यक्तिमत्व विकास साधणाऱ्या विद्यार्थी साहाय्यक समितीची आजमितीला आठ वसतिगृहे झाली असून, पुण्यात विद्यार्थ्यांची संख्या १४०० वर गेली आहे. ३३६ मुलींकरिता अत्याधुनिक सोयींनी युक्त असे हे वसतिगृह संस्थेच्या वाटचालीतील महत्वाचा टप्पा आहे. ग्रामीण भागातील विद्यार्थ्यांना पुण्यात उच्च शिक्षण घेताना अल्पदरात निवास, भोजन देताना, त्यांचा व्यक्तिमत्व विकास घडविण्याचे काम गेल्या ७० वर्षांपासून सुरु आहे. अहिल्यानगर येथे मुलांचे एक व मुलींचे एक वसतिगृह यावर्षीपासून सुरू झाले आहे. तसेच महिला सेवा मंडळाच्या सहकार्याने कर्वेनगर येथेही मुलींचे वस्तीगृह सुरू करण्यात आले आहे.”

तुकाराम गायकवाड म्हणाले, “समितीमुळे हजारो विद्यार्थ्यांच्या आयुष्यात परिवर्तन झाले आहे. समितीची वसतिगृहे खऱ्या अर्थाने युवा परिवर्तनाची केंद्रे आहेत. कोणतीही शासकीय मदत न घेता केवळ समाजाच्या आर्थिक मदतीवर इतकी वर्षे हे काम सुरू आहे. निस्पृह भावनेने वेळ देणारे कार्यकर्ते, व्यवस्थापनातील विद्यार्थ्यांचा सहभाग यामुळे हे शक्य होते. स्वच्छता, समता आणि श्रमप्रतिष्ठा ही संस्थेची त्रिसूत्री आहे. समितीमध्ये विद्यार्थ्यांना कमवा व शिका, चारतास काम करावे लागते. येथील सर्व कामे विद्यार्थी-विद्यार्थिनीच करतात.”

गेल्या काही वर्षांत ग्रामीण भागातील मुलींचे उच्च शिक्षण घेण्याचे प्रमाण वाढले आहे. शेतकरी, शेतमजूर पालकांना आपल्या मुली शिकाव्यात असे वाटू लागल्याने त्यांचा पुण्याकडे येण्याचा कल वाढला आहे. परवडणारा खर्च आणि सुरक्षितता यामुळे समितीत प्रवेश मिळावा अशी सर्वाची इच्छा असते. त्यामुळे पुण्यात मुलींसाठी अजून एक वसतिगृह बांधण्याचा संकल्प संस्थेने केला आणि दोन वर्षात ही इमारत पूर्ण झाली. त्यामुळे ३३६ विद्यार्थिनींची व्यवस्था वाढली आहे, असे संजय अमृते यांनी सांगितले.

प्रभाकर पाटील यांनी विद्यार्थ्यांच्या सर्वांगीण विकासासाठी समितीमध्ये विद्यार्थी विकास केंद्रांतर्गत राबविण्यात येत असलेल्या उपक्रमांविषयी माहिती दिली. रत्नाकर मते समितीच्या विविध प्रकल्पांविषयी माहिती दिली. तसेच समितीमार्फत विद्यार्थ्यांना दिल्या जाणाऱ्या सुविधांविषयी सांगितले.