नमाजकरीता होणा-या अजानकरीता कौसरबाग सोसायटी कमिटीकडून मोबाईलवर वापरता येणारे ऑनलाईन अजान अॅप्लीकेशन वापरण्याचे आवाहन

पुणे -कोंढवा पोलीस ठाण्याकडून कोंढवा खुर्द येथे मरकजी बैतुल माल फाउंडेशन यांच्या सहकार्याने प्रतिवर्षाप्रमाणे पवित्र रमजान महिन्याच्या पाचव्या रोजा निमीत्त दावत ए इफ्तार चा सामाजिक सलोखा वृद्धींगत करणारा कार्यक्रम पोलीस आयुक्त अमितेश कुमार यांच्या प्रमुख उपस्थितीमध्ये पार पडला. या वेळेस पोलीस सह आयुक्त रंजनकुमार शर्मा, अपर पोलीस आयुक्त मनोज पाटील, पोलीस उपआयुक्त, परिमंडळ ०५, राजलक्ष्मी शिवणकर, पोलीस उप आयुक्त, विशेष शाखा, डॉ. संदिप भाजीभाकरे, पोलीस उपआयुक्त, वाहतुक शाखा हिम्मत जाधव, सहायक पोलीस आयुक्त, वानवडी विभाग नम्रता देसाई, तसेच बैतुल माल फाउंडेशनचे अल्ताफ मर्चट, आबीद सय्यद, हाजी तौसीफ शेख, कौसरबाग ट्रस्टचे अध्यक्ष सलीम शेख, मजहर मणियार, कौसरबाग मस्जिद मौलाना कारी अब्दुल्ला, जाहिदभाई शेख अध्यक्ष महाराष्ट्र अॅक्शन कमिटी, वसिमगाई बागवान, बासित शेख, नगरसेवक गफूर पठाण यांची प्रमुख उपस्थिती होती. याप्रसंगी कोढवा परिसरातील नागरिक मोठ्या संख्येने सहभागी झाले होते. या प्रसंगी पोलीस आयुक्त यांनी जमलेल्या नागरिकांसमोर केलेल्या भाषणात रमजान महिन्यामध्ये कोंढवा परिसरामध्ये नागरिकांना सायंकाळी उपवास सोडण्याकरीता मस्जिद परिसरात जाण्यासाठी वाहतुकीच्या अडचनींना सामोरे जावे लागु नये याकरीता पोलीस दलातर्फे जास्तीत जास्त सुरळीत वाहतुक ठेवण्याकडे आमचे अधिक लक्ष राहणार आहे.तसेच रमजान या पवित्र सणाच्य कालावधीमध्ये कोंढवा परिसरामध्ये जे गुन्हेगार प्रवृत्तीचे लोक आहेत आणि ते त्रास देत असतील त्यांची माहिती पोलीसांना दयावी त्यावर पोलीस दलाकडून अशा लोकांवर कठोर कारवाई करण्यात येईल अशी सुचना दिली आहे. रमजान या पवित्र सणामध्ये पोलीस कायदा व सुव्यवस्था राखण्यासाठी कटिबध्द असल्याबाबतचे ही त्यांनी सांगितले. तसेच युवकांमध्ये अंमली पदार्थाचे प्रमाण वाढत असून त्याबाबत त्यांनी चिंता व्यक्त केली असून अंमली पदार्थ शहरातून हद्दपार करण्याकरीता पोलीसांना सहकार्य करण्याचे आवाहन केले आहे. सर्वोच्च न्यायलयाच्या आदेशाचे उल्लंघन होवू नये म्हणून नमाजकरीता होणा-या अजानकरीता कौसरबाग सोसायटी कमिटी यांचेकडून मोबाईलवर वापरता येणारे ऑनलाईन अजान अॅप्लीकेशन तयार केले. असून त्याचे उदघाटन पोलीस आयुक्त, पुणे शहर यांचे हस्ते करण्या आलेले आहे. हे अॅप वापरणेसाठी त्यांनी नागरीकांना आवाहन केले .
या कार्यक्रमाचे आयोजन पोलीस उप आयुक्त, परिमंडळ ५ राजलक्ष्मी शिवणकर, वरिष्ठ पोलीस निरीक्षक कुमार घाडगे, पोलीस निरीक्षक (गुन्हे), नवनाथ जगताप, कोंढवा पोलीस ठाणे, पुणे शहर यांनी केले. कार्यक्रमांचे सुत्रसंचालन इस्माईल बागवान यांनी केले.

पुणे : शहराच्या सुरक्षेसाठी २४ तास कार्यरत असलेल्या अग्निशमन दलातील सुमारे ९० कर्मचाऱ्यांचे आवश्यक प्रशिक्षण रखडले असल्याची बाब समोर आली आहे. वेळेत प्रशिक्षण पूर्ण न झाल्यास निश्चित वयोमर्यादा उलटून अनेक जवान भविष्यातील पदोन्नतीपासून कायमचे वंचित राहण्याची चिंता संबंधित कर्मचाऱ्यांनी व्यक्त केली आहे. या पार्श्वभूमीवर नगरसेवक राघवेंद्र बाप्पु मानकर यांनी महापौर मंजुषा नागपुरे यांची भेट घेऊन प्रशिक्षण लवकरात लवकर पूर्ण करण्यात यावे, अशी मागणी केली.

अग्निशमन विभागातील अनेक कर्मचारी हे ४३ ते ५३ वयोगटातील आहेत. भविष्यातील पदोन्नतीसाठी आवश्यक शैक्षणिक अर्हता पूर्ण करण्यासाठी नागपूर येथील राष्ट्रीय अग्निशमन सेवा महाविद्यालयामार्फत विविध प्रशिक्षण कोर्सेस पूर्ण करणे बंधनकारक आहे. संबंधित प्रशिक्षणासाठी वयोमर्यादा निश्चित करण्यात आलेली असून, २०२७ पर्यंत प्रशिक्षण पूर्ण करण्यासाठी वयाची अट ५४ वर्षांपर्यंत शिथिल करण्यात आली आहे. मात्र, गेल्या काही वर्षांत पुरेशा संख्येने कर्मचारी प्रशिक्षणासाठी पाठविण्यात आले नसल्याने सुमारे ९० हून अधिक जवानांचे प्रशिक्षण अद्याप प्रलंबित आहे. यापैकी अनेक कर्मचाऱ्यांची वयोमर्यादा संपत आलेली असून ते प्रशिक्षण व पदोन्नतीपासून वंचित राहण्याची शक्यता निर्माण झाली आहे. हे प्रशिक्षण पूर्ण झाल्यास प्रशिक्षित मनुष्यबळही अग्निशमन दलास उपलब्ध होऊ शकणार आहे.

‘अग्निशमन दलाचे जवान आग, पूरस्थिती तसेच नैसर्गिक आपत्तीच्या वेळी स्वतःच्या जीवाची पर्वा न करता नागरिकांचे प्राण व मालमत्ता वाचविण्याचे काम करतात. केवळ तांत्रिक कारणांमुळे भविष्यात त्यांच्या करिअरमध्ये अडथळे निर्माण होणे अन्यायकारक असल्याचे नगरसेवक राघवेंद्र बाप्पु मानकर यांनी नमूद केले. तसेच, महानगरपालिका हद्दीत नव्याने समाविष्ट झालेल्या गावांमध्ये भविष्यात नवीन अग्निशमन केंद्रे उभारली जाणार असून, त्यासाठी प्रशिक्षित मनुष्यबळाची आवश्यकता भासणार आहे. उपलब्ध अनुभवी मनुष्यबळाला भविष्यात पदोन्नतीच्या संधींत सामावून घेता यावे, यासाठी हे प्रशिक्षण अत्यंत महत्त्वाचे ठरणार आहे.

वरील सर्व बाबींचा विचार करून, वयोमर्यादा संपत आलेल्या जवानांसाठी नागपूर येथील महाविद्यालयाची आवश्यक मान्यता घेऊन संबंधित प्रशिक्षण पुण्यातच आयोजित करण्यात यावे, तसेच २०२७ पूर्वी सर्व प्रलंबित प्रशिक्षण पूर्ण करण्यासाठी धोरणात्मक निर्णय घेण्यात यावा, अशी मागणी नगरसेवक राघवेंद्र बाप्पु मानकर यांनी महापौर मंजुषाताई नागपुरे यांच्याकडे केली.

यावर सकारात्मक निर्णय घेण्याचे आश्वासन महापौर मंजुषा नागपुरे यांनी दिले असल्याचे राघवेंद्र बाप्पु मानकर
यांनी सांगितले. यावेळी मुख्य अग्निशमन अधिकारी देवेंद्र पोटफोडे व अग्निशमन दलाचे जवान उपस्थित होते.

तनुश्री गर्भसंस्कार परिवारातर्फे
१ मार्च रोजी विनामूल्य कार्यशाळेचे आयोजन

पुणे, दि.२४ फेब्रुवारी: तनुश्री स्नेहमेळावा परिवाराद्वारे तनुश्री संस्कार साधना या नावाने स्त्रीला स्वतःला जोडणारा, स्वतःला उभा करणारा ‘बाई पण भारी देवा’ या अनोख्या थीमच्या माध्यमातून विनामूल्य कार्यशाळेचे अयोजन करण्यात आले आहे. या वर्षी मधुरा बाचल आणि झेलम चौबळ यांना तनुश्री ‘जन संस्कार पुरस्काराने’ सन्मानीत करण्यात येणार आहे. रविवार, दि.१ मार्च २०२६ रोजी सकाळी ८.३० ते दुपारी १२.३० वाजेपर्यंत न्यू सांगवी येथील साई चौक येथील संस्कृती लॉन्स मध्ये याचे आयोजन करण्यात आले आहे. अशी माहिती डॉ. सुप्रिया गुगळे आणि डॉ. तन्वी खाबिया (गुगळे) यांनी पत्रकार परिषदेत दिली.
डॉ. सुप्रिया गुगळे यांनी सांगितले की, ‘बाई पण भारी देवा’ हा सोहळा तिच्या अस्तित्वाचा गौरव, सामर्थ्याचा सन्मान आणि आत्मविश्वासाला नवी दिशा देण्यासाठी आहे. हा सोहळा स्त्री शक्तीला प्रणाम करण्यासाठी, तिच्या आत्मविश्वााला नवे पंख देण्यासाठी आणि तिच्या ‘मी’ ला पुन्हा उजाळा देण्यासाठी आहे.
डॉ. तन्वी खाबिया म्हणाल्या,“तनुश्री स्नेहमेळाव्याचे हे १३ वर्ष असून या वर्षी मधुरा बाचल आणि झेलम चौबळ यांना तनुश्री ‘जन संस्कार पुरस्काराने’ गौरविण्यात येणार आहे. सन्मानपत्र, स्मृतिचिन्ह, शाल व श्रीफळ असे या पुरस्काराचे स्वरूप आहे. ‘बाई पण भारी देवा’ हा कार्यक्रम स्वतःशी जोडणारा, स्वतःला उभं करणारा प्रवास आहे. त्यामुळे या वर्षी अभिनेत्री शर्वरी जैमिनिस (बाई पण भारी देवा), कलाकार किशोर महाबोले आणि कलाकार अश्विनी कासार या शुभेच्छा देतील. तसेच मधुरा बाचल(स्त्री शक्तीचा गौरव), झेलम चौबळ (तिच कर्तृत्वाशाली नेतृत्व), डॉ. सुजाता पाटील (तिचं आरोग्य आणि आयुर्वेद), वीणा गोखले (देणे समाजाचे), हिमांशु बक्षी, उमा नेने (सुरेल साथ) या वेगवेगळया विषयांवर विचार मांडतील तसेच शुभांगी दामले, डॉ. सुनंदा रानडे, एसीपी अनुजा देशमाने या शुभेच्छा देतील. या कार्यक्रमाचे निवेदन वसुंधरा काशीकर या करतील.”
प्रत्येक स्त्रीला तिच्यातील दडलेली शक्ती, आत्मविश्वास आणि स्वाभिमान पुन्हा अनुभवता यावा यासाठी विविध उपक्रम, प्रेरणादायी सत्रे आणि सांस्कृतिक कार्यक्रमाचे आयोजन करण्यात आले आहे. आयुर्वेद, संस्कार आणि सकारात्मक विचारांच्या बळावर स्त्रीने स्वतःला सक्षम केले तर तिच्याच हातून घडेल आणि सुंदर, सुदृढ आणि संस्कारित उद्याचे भविष्य हे या कार्यक्रमाचा मुख्य संदेश आहे.

इच्छुकांना सहभागी होण्यासाठी नाव नोंदणी विनामूल्य पण आवश्यक आहे. नोंदणी साठी मो.नं., ८००७२३२०११, +९१८००७१०५३०९ आणि +९१९११२२३१७१५ वर संपर्क साधावा.

डॉ. अनिल व डॉ. सुप्रिया गुगळे यांच्या कार्याचा अल्प परिचयः
डॉ. अनिल गुगळे व डॉ. सुप्रिया गुगळे हे गेल्या २९ वर्षापासून सांगवी येथे गर्भसंस्कार केंद्र यशस्वी रित्या चालवित आहेत. यांच्यातर्फे आयोजित गर्भसंस्कार कार्यक्रमात आतापर्यंत ६५०० पालकांनी सहभाग घेतला आहे. या मध्ये आईची शारीरिक, मानसिक आरोग्य वृध्दी व बाळ निरोगी, आनंदी व सुसंस्कारीत होण्यासाठी केली आहे. त्याचप्रमाणे तनुश्री ब्रम्ह मुहूर्त कार्यक्रम आयोजित केला जातो. यामध्ये आरोग्य संपन्न जीवनशैलीसाठी मार्गदर्शन केेले जाते. गेल्या ५ वर्षारंभा पासून २५ हजार कुटुंबाने ऑनलाईन कार्यक्रमाचा लाभ घेतला.गर्भ संस्कार व सकारात्मक मनाद्वारे नितिमान पिढी निर्माण करण्यासाठी पालकांना मदत केल्या जाते.

पुणे नगरसेवक स्वप्निल दुधाने यांनी आपल्या प्रभाग क्र. ३०, (कर्वेनगर-हिंगणे होम कॉलनी) येथील वारजे महामार्ग चौक ते मुठा नदी असा १२ मीटर डीपी सर्विस रस्ता विकसित करण्यात यावा, याकरिता प्रत्यक्ष ठिकाणी जाऊन पाहणी के ली.

पुणे मनपाचे पथ विभागाचे उपअभियंता, कनिष्ठ अभियंता आणि संबंधित बाधित जागा पुणे मनपाला हस्तांतरीत व्हावी, याकरिता कार्यरत असणाऱ्या मालमत्ता विभागाचे उपअभियंता आणि कनिष्ठ अभियंता यांच्यासह झालेल्या या पाहणीदरम्यान रस्ता बाधित नागरिक वर्गाशी सुसंवाद साधण्यात आला. वाढती लोकसंख्या आणि सम प्रमाणात वाढते शहरीकरण यासाठी रस्त्याचे महत्व नागरिकांना पटवून देताना प्रशासनाला सहकार्य करावे, असे आवाहन त्यांनी केले.

याप्रसंगी ओढयावरील पुलाचे काम काळाची गरज असून सदर कामाचा शुभारंभ करण्याबद्दल प्रशासनाला विनंती करण्यात आली. याबाबत मनपाचा आराखडा तयार करण्यात आला असून आज तांत्रिक अडचणी दूर करण्यात आल्या. वाढत्या लोकसंख्या आणि नागरीकरण या प्रमाणात लोकप्रतिनिधी आणि प्रशासन यांची जबाबदारी याबद्दल सकारात्मक चर्चा करण्यात आली असून प्रशासनानेही यावर सकारात्मक प्रतिसाद दिला असल्याने लवकरच सदर कामाचा श्रीगणेशा होईल, असा विश्वास वाटतो. असेही दुधाने यांनी म्हटले आहे.

भाजपची एकहाती सत्ता, बिनविरोध निवडणुका आणि बिडकरांची अचूक रणनीती; पुणे महापालिकेत नवा पॅटर्न

महापौर ते स्थायी समिती अध्यक्ष… सर्वत्र बिनविरोध! पुणे पालिकेत नवा पॅटर्न; बिडकरांची रणनीती कामी

पुणे महापालिकेत सर्वच पदे बिनविरोध, बिडकरांची रणनीती यशस्वी

पुणे : पुणे महानगरपालिका निवडणुकीत पुणेकरांनी स्पष्ट बहुमत देत भारतीय जनता पार्टीला एकहाती सत्ता दिली. यानंतर झालेली महापालिकेतील सत्तास्थापनेची प्रक्रिया यंदा वेगळ्याच पद्धतीने पार पडली. तब्बल ११९ नगरसेवक निवडून आल्यानंतर महापौर, उपमहापौर, स्थायी समितीसह सर्व विषय समित्यांचे अध्यक्ष बिनविरोध निवडले जाणे, हा यंदाच्या कार्यकाळातील विशेष पैलू ठरला आहे.

महापौरपदी मंजुषा नागपुरे व उपमहापौरपदी परशुराम वाडेकर यांची बिनविरोध निवड करण्यात आली. पूर्वीच्या कार्यकाळात या पदांसाठी विरोधकांकडून उमेदवार उभे राहत असत; मात्र यंदा भाजपकडून सभागृह नेते गणेश बिडकर यांनी समन्वयाची रणनीती अवलंबत विरोधकांशी संवाद साधला. राष्ट्रवादीसह काँग्रेसनेही महापौर व उपमहापौर पदासाठी दिलेल्या उमेदवारांची माघार घेतली.

भाजपकडून सभागृह नेतेपदी ज्येष्ठ नगरसेवक गणेश बिडकर यांची नियुक्ती झाल्यानंतर त्यांनी विरोधी पक्षांतील नेत्यांशी सातत्याने संपर्क ठेवत निवडणूक प्रक्रिया निर्विघ्न पार पाडली. महानगरपालिकेमध्ये यंदा सर्व महत्त्वाच्या पदांची बिनविरोध निवड घडवून आणण्यात बिडकर यांच्या राजकीय रणनीतीची निर्णायक भूमिका राहिल्याचे स्पष्ट दिसून आले.

भाजपकडे मोठे बहुमत असतानाही विरोधकांकडून आपले उमेदवार देत प्रत्यक्ष निवडणूक घडवून आणण्याची शक्यता नाकारता येत नव्हती. मात्र बिडकर यांनी केवळ संख्याबळावर विसंबून न राहता संवादाचा मार्ग स्वीकारला. विविध पक्षांतील वरिष्ठ नेत्यांशी वैयक्तिक संपर्क, गटनेत्यांसोबत संवाद आणि समित्यांवरील प्रतिनिधित्वाचा समतोल साधण्याचा प्रयत्न या माध्यमातून त्यांनी वातावरण प्रत्यक्ष निवडणुकीपर्यंत जाण्यापासून रोखले.

आज स्थायी समिती अध्यक्षपदी श्रीनाथ भिमाले यांचीही बिनविरोध निवड झाली. राष्ट्रवादी काँग्रेसचे सुहास टिंगरे यांचा अर्ज वेळेत न भरल्याने अवैध ठरला आणि निवडणूक एकतर्फी झाली. याशिवाय विधी समिती अध्यक्षपदी स्वरदा गौरव बापट, शहर सुधारणा समिती अध्यक्षपदी स्मिता वस्ते, महिला व बालकल्याण समिती अध्यक्षपदी अल्पना गणेश वरपे, शिक्षण समिती अध्यक्षपदी अरुण राजवाडे, नाव समिती अध्यक्षपदी पल्लवी जावळे आणि क्रीडा समिती अध्यक्षपदी नारायण गलांडे यांची नियुक्ती करण्यात आली.

भाजपाच्या स्पष्ट बहुमतासोबतच संवाद आणि समन्वयावर आधारित व्यूहरचनेमुळे सर्व महत्त्वाच्या पदांची बिनविरोध निवड शक्य झाली. या प्रक्रियेत सभागृह नेते गणेश बिडकर यांच्या राजकीय कौशल्याची महत्त्वाची भूमिका असल्याचे बोलले जात आहे.

पुणे- काँग्रेस प्रवक्ते हनुमंत पवार यांना मारहाण करून पिस्तुलाचा धाक दाखवल्याप्रकरणी तुषार दामगुडे आणि त्यांच्या साथीदारांविरुद्ध स्वारगेट पोलिसांनी गुन्हा दाखल केला आहे. ही घटना सोमवारी सायंकाळी मित्रमंडळ चौकातील पदपथावर घडली.या प्रकरणी हनुमंत दिगंबर पवार (वय 41, रा. जाधवनगर, वडगाव बुद्रुक, पुणे) यांनी स्वारगेट पोलिस ठाण्यात फिर्याद दिली आहे. फिर्यादीनुसार, तुषार दामगुडे यांच्यासह बाळासाहेब गालफाडे, गौरव राठोड, श्रीनिवास निगडे, ऋषीकेश परदेशी आणि अभिमन्यू मैड यांच्याविरुद्ध गुन्हा नोंदवण्यात आला आहे.

पोलिसांनी दिलेल्या माहितीनुसार, दामगुडे आणि पवार हे सोमवारी सायंकाळी एका वृत्तवाहिनीच्या चर्चासत्रात सहभागी झाले होते. चर्चासत्र संपल्यानंतर सायंकाळी साडेपाचच्या सुमारास ते मित्रमंडळ चौकातील पदपथावर थांबले होते.त्यावेळी दामगुडे आणि पवार यांच्यात बाचाबाची झाली. दामगुडे यांनी पवार यांना तू भारतीय जनता पक्षाच्या विरोधात बोलतोस. तुला हर्षवर्धन सपकाळ यांचा एवढा पुळका का आहे? पुण्यात राहायचे असेल, तर नीट राहा, अशी धमकी दिली. त्यानंतर दामगुडे यांनी पिस्तूल दाखवून जिवे मारण्याची धमकी दिली आणि त्यांच्या साथीदारांसह पवार यांना मारहाण केली, असे फिर्यादीत नमूद आहे.

मित्रमंडळ चौकातील सीसीटीव्ही कॅमेऱ्यांमध्ये पवार यांना मारहाण केल्याचा प्रकार कैद झाला आहे. या घटनेनंतर पवार यांनी स्वारगेट पोलिस ठाण्यात जाऊन दामगुडे यांच्याविरुद्ध तक्रार दिली. रात्री उशिरा या प्रकरणी गुन्हा दाखल करण्यात आला असून, सहायक पोलिस निरीक्षक शिरसाठ पुढील तपास करत आहेत.

याप्रकरणात काँग्रेस शिष्टमंडळाने पुणे पोलिस आयुक्त अमितेश कुमार यांची मंगळवारी भेट घेतली. काँग्रेस प्रवक्ते हनुमंत पवार यांना पोलिस संरक्षण द्यावे अशी मागणी यावेळी करण्यात आली आहे.

पोलीस आयुक्त साहेब अटक करणार कधी ?

पुणे-पुण्यात सोमवारी संध्याकाळी काँग्रेस प्रवक्ते हनुमंत पवार यांना हिंदुत्ववादी कार्यकर्ते तुषार दामगुडे आणि त्यांच्या साथीदारांनी मारहाण केल्याची खळबळजनक घटना घडली आहे. ही संपूर्ण घटना सीसीटीव्ही कॅमेऱ्यात कैद झाली असून, मारहाणीदरम्यान दामगुडे यांनी आपल्याला पिस्तुल दाखवून धमकावल्याचा गंभीर आरोप पवार यांनी केला आहे. या प्रकारामुळे राजकीय वर्तुळात मोठी खळबळ उडाली असून पोलिस या प्रकरणाचा अधिक तपास करत आहेत.

पुण्यात सोमवारी ‘पुढारी न्यूज’च्या ‘धुरळा’ या चर्चासत्रात ‘शिवरायांचा अवमान, मराठी अस्मिता गपगुमान’ या विषयावर झालेल्या चर्चेनंतर, काँग्रेस प्रवक्ते हनुमंत पवार आणि हिंदुत्ववादी कार्यकर्ते तुषार दामगुडे यांच्यात कार्यालयाबाहेर जोरदार शाब्दिक वाद झाला. या वादाचे रूपांतर पुढे हाणामारीत झाले असून, तुषार दामगुडे आणि त्यांच्या 3-4 साथीदारांनी हनुमंत पवार यांना मारहाण केल्याचे समोर आले आहे. ही संपूर्ण घटना सीसीटीव्ही कॅमेऱ्यात कैद झाली असून, त्यामध्ये दामगुडे यांनीच सुरुवातीला हात उगारल्याचे स्पष्टपणे दिसत आहे.

मारहाणीच्या घटनेनंतर हनुमंत पवार यांनी प्रतिक्रिया दिली. ते म्हणाले, कार्यक्रम संपल्यावर मी कार्यालयातून बाहेर पडत होतो. यादरम्यान गेटबाहेर थांबलेल्या दामगुडे आणि त्यांच्या साथीदारांनी मला शिवीगाळ करुन बोलावले आणि तू भाजप- संघाला विरोध का करतो, हर्षवर्धन सपकाळ यांची बाजू का घेतो, असा जाब विचारत तुषार दामगुडेंनी मला पिस्तुल दाखवले. त्यानंतर हल्लेखोर पळून गेले.

काही दिवसांपूर्वी एका वृत्तवाहिनीवरील चर्चासत्रात तुषार दामगुडे यांनी काँग्रेस प्रदेशाध्यक्षांना केलेल्या शिवीगाळीचा हनुमंत पवार यांनी तीव्र विरोध केला होता. याच जुन्या वादाचा राग धरून दामगुडे यांनी सोमवारी पवार यांना ‘तू हर्षवर्धन सपकाळांची बाजू घेणारा कोण?’ असा जाब विचारत त्यांच्यावर हा हल्ला केला. पवार यांच्या दाव्यानुसार, मागील चर्चेतील ती शाब्दिक चकमकच या मारहाणीमागचे प्रमुख कारण ठरली असून, वैचारिक विरोधाचे रूपांतर अशा प्रकारे शारीरिक हिंसाचारात झाल्याचे त्यांनी स्पष्ट केले आहे.

गुंड प्रवृत्तीच्या तुषार दामगुडेला तुरुंगात टाकावे- हर्षवर्धन सपकाळ

हर्षवर्धन सपकाळ यांनी ट्विट करत या घटनेचा निषेध केला आहे. ते म्हणाले, कॉंग्रेस पक्षाचे प्रवक्ते हनुमंत पवार यांना दैनिक पुढारी कार्यालय, मित्र मंडळ चौक पुणे येथे भाजप गुंड तुषार दामगुडे याने बंदुकीचा धाक दाखवत मारहाण केली आहे. या घटनेचा आम्ही निषेध करतो. देवेंद्र फडणवीस यांच्या आशिर्वादाने या मर्द मावळ्यांच्या महाराष्ट्रात गुंड मवाल्यांचं राज्य फोफावू पाहतंय. या महाराष्ट्र नासवणाऱ्या औलादींना अभय देण्याचे काम गृहमंत्री फडणवीसांनी करू नये, हा महाराष्ट्र तुम्हाला कधीही माफ करणार नाही, या गुंड प्रवृत्तीच्या तुषार दामगुडेला लगेच अटक करून तुरूंगात टाकण्यात यावे, त्याची खरी जागा तीच आहे, अशी मागणी सपकाळ यांनी केली आहे.

पुणे- मंगळवारी पहाटे चारच्या सुमारास पुण्यातील कर्जत घाट परिसरात भीषण अपघात घडला. कात्रज बोगद्याकडून नवले पुलाच्या दिशेने जाणाऱ्या महामार्गावर हा अपघात झाला. विशेषतः कर्जत न्यू टनेल येथून पुढे जांभुळवाडी दरी पुलादरम्यान ही धडक झाली. पहाटेची वेळ असल्याने रस्त्यावर वाहतूक तुलनेने कमी होती; मात्र अचानक झालेल्या या अपघातामुळे काही वेळातच परिस्थिती गंभीर बनली. लोखंडी पाईप आणि सळया भरून जाणाऱ्या ट्रकने समोर चाललेल्या बसला पाठीमागून जोरात धडक दिली. धडक इतकी तीव्र होती की काही क्षण परिसरात भीतीचे वातावरण निर्माण झाले.

अपघातानंतर ट्रकचा पुढील केबिन पूर्णपणे चक्काचूर झाला. बसमधील प्रवाशांना या धडकेचा जबर धक्का बसला. प्राथमिक माहितीनुसार बसमधील चार ते पाच प्रवासी किरकोळ जखमी झाले. त्यांना तातडीने जवळच्या रुग्णालयात हलवण्यात आले असून त्यांच्यावर उपचार सुरू आहेत. सुदैवाने बसमधील इतर प्रवासी सुरक्षित असल्याची माहिती समोर आली आहे. मात्र ट्रक चालक गंभीर जखमी झाला होता. त्याला उपचारासाठी रुग्णालयात दाखल करण्यात आले; परंतु उपचारादरम्यान त्याचा मृत्यू झाल्याची प्राथमिक माहिती पोलिसांनी दिली आहे.

ट्रकचा क्लीनर धडकेनंतर ट्रकमधील लोखंडी सळ्या आणि वाकलेल्या केबिनमध्ये अडकून पडला. त्यामुळे बचावकार्य करताना मोठे अडथळे निर्माण झाले. परिस्थितीचे गांभीर्य लक्षात घेऊन अग्निशमन दलाला पाचारण करण्यात आले. अग्निशमन दलाच्या जवानांनी कटरच्या सहाय्याने केबिन कापून क्लीनरला बाहेर काढले. काही काळासाठी संपूर्ण परिसरात तणावपूर्ण वातावरण होते. बचावकार्य सुरळीत पार पाडण्यासाठी पोलिसांनी वाहतूक नियंत्रित करण्याचे काम हाती घेतले.

घटनास्थळी पोलिस, अग्निशमन दल तसेच राष्ट्रीय महामार्ग प्राधिकरणाचे पथक तातडीने दाखल झाले. अपघातामुळे महामार्गावरील वाहतूक विस्कळीत झाली. पहाटेची वेळ असूनही वाहनांच्या लांबच लांब रांगा लागल्याचे चित्र दिसून आले. जांभुळवाडी दरी पुलाजवळ काही काळ वाहतूक पूर्णपणे ठप्प झाली होती. पोलिसांनी पर्यायी मार्गांचा वापर करण्याचे आवाहन केले. अपघातग्रस्त वाहने बाजूला काढण्यासाठी आणि रस्ता मोकळा करण्यासाठी यंत्रणा युद्धपातळीवर काम करत होती.

दरम्यान, या अपघाताचे नेमके कारण अद्याप स्पष्ट झालेले नाही. ट्रक चालकाचे नियंत्रण सुटले की ब्रेक निकामी झाले, याबाबत विविध शक्यता व्यक्त केल्या जात आहेत. मात्र अधिकृत माहिती तपासानंतरच स्पष्ट होईल, असे पोलिसांनी सांगितले. अपघाताच्या पार्श्वभूमीवर महामार्गावरील सुरक्षिततेचा प्रश्न पुन्हा एकदा ऐरणीवर आला आहे. पहाटेच्या वेळीही वेग आणि निष्काळजीपणा जीवघेणा ठरू शकतो, याची जाणीव या घटनेने करून दिली आहे. पोलिसांकडून पुढील तपास सुरू असून घटनेचा सविस्तर अहवाल लवकरच समोर येण्याची अपेक्षा आहे.

कर्मवीर भाऊसाहेब हिरे हायस्कूलच्या माजी विद्यार्थ्यांचा आनंद मेळा उत्साहात

पुणे : शाळेच्या आठवणींनी ओथंबलेले क्षण, मैत्रीचा जिव्हाळा आणि कृतज्ञतेची भावना घेऊन कर्मवीर भाऊसाहेब हिरे हायस्कूलच्या माजी विद्यार्थ्यांनी पुन्हा एकदा आपल्या शाळेच्या अंगणात पाऊल ठेवत आनंद मेळ्याचे आयोजन केले. शिक्षणाचा वारसा पुढे नेत माजी विद्यार्थ्यांनी आजी विद्यार्थ्यांना वही, पेन, पेन्सिल व विविध शैक्षणिक साहित्याचे वाटप करण्याकरिता दिंडी काढली. यासोबतच शाळेच्या विकासासाठी १ लाख रुपयांची देणगी देत संस्थेबद्दलची आपली कृतज्ञता व्यक्त केली.

अखिल भारतीय मराठी शिक्षण परिषदेच्या पर्वती येथील शाळेत हा कार्यक्रम उत्साहात पार पडला. कार्यक्रमासाठी प्रमिला ताई गायकवाड, अजय आबा पाटील, मुख्याध्यापक माने सर व माजी मुख्याध्यापक संजय भैलुमे सर यांनी मार्गदर्शन केले. तसेच बहुजन मुलांसाठी शिक्षणाची दारे खुली करणारे कर्मवीर भाऊसाहेब हिरे आणि उत्तमराव पाटील यांना रांगोळीच्या माध्यमातून चलचित्र साकारून अनोखी श्रद्धांजली अर्पण करण्यात आली. हा संपूर्ण उपक्रम हिरे हायस्कूल माजी विद्यार्थी संघ यांच्या पुढाकाराने आयोजित करण्यात आला.

शाळेच्या प्रार्थनेने कार्यक्रमाची सुरुवात झाली. वर्गातील तासांत शिक्षकांशी गप्पा मारत जुन्या आठवणींना उजाळा देण्यात आला. शिक्षक व शिक्षकेतर कर्मचाऱ्यांचा मानपत्र देऊन सन्मान करण्यात आला. मधल्या सुट्टीनंतर मैदानावर कबड्डी, खो-खो, लंगडी अशा खेळांनी वातावरणात उत्साहाची भर पडली आणि माजी विद्यार्थ्यांनी आपल्या सुवर्णकाळाचा पुन्हा एकदा अनुभव घेतला. शिक्षणाबद्दलची निष्ठा, शिक्षकांविषयी आदर आणि समाजाप्रती बांधिलकी यांचे सुंदर दर्शन या आनंद मेळ्यातून घडले.