पुणे–पुण्यातील कुख्यात गुंड शरद मोहोळ खून प्रकरणात आरोपी असलेल्या वकिलाचा जामीन अर्ज विशेष न्यायालयाने फेटाळला आहे. आरोपी संजय उधाण याने गुन्ह्याच्या कटकारस्थानात सहभाग घेतला होता, तसेच गुन्ह्यानंतर आरोपींना मदत केल्याचे प्रथमदर्शनी पुरावे आढळल्याचे न्यायालयाने नमूद केले.संजय उधाण असे या वकिलाचे नाव आहे. विशेष सरकारी वकील ॲड. प्रदीप सिंग राजपूत यांनी, तसेच मूळ फिर्यादीचे वकील ॲड. खेतराम सोलंकी, ॲड. सोहम यादव, ॲड. संकेत राव आणि ॲड. तेजस सावंत यांनी जामीन अर्जाला तीव्र विरोध केला.

घटनेनंतर लगेचच आरोपी संजय उधाण यांचा मुख्य आरोपी नामदेव कांगुडे याच्याशी फोनवर संपर्क झाला होता. त्यानंतर ते घटनास्थळी पोहोचले आणि त्यांनी गोळीबार करणारे साहिल पोळेकर, नामदेव कांगुडे आणि चंद्रकांत शेलके यांना आपल्या गाडीतून पळून जाण्यास मदत केली, असा युक्तिवाद सरकारी पक्षाने केला.

उधाण यांनी सहआरोपी वकील रवी पवार यांच्याशी संपर्क साधून इतर आरोपींना गाडीतून हलविण्याची व्यवस्था केली. तसेच, सहआरोपींना सिम कार्ड नष्ट करण्याचा सल्ला दिला गेला आणि खेड-शिवापूर टोल नाक्याजवळ नवीन सिम कार्ड पुरविण्यात आले. आरोपीने नवी मुंबई क्राईम ब्रांचमधील अधिकाऱ्याशी संपर्क साधून आत्मसमर्पणाबाबत चर्चा करण्याचाही प्रयत्न केला होता, यावरून त्यांना गुन्ह्याची पूर्वकल्पना असल्याचे दिसून येते, असे ॲड. राजपूत आणि सोलंकी यांनी जामीनाला विरोध करताना सांगितले.

बचाव पक्षाने युक्तिवाद केला की, संजय उधाण हे व्यवसायाने वकील असून आरोपी त्यांचे पूर्वीचे पक्षकार होते. त्यांच्याशी झालेला संपर्क केवळ व्यावसायिक स्वरूपाचा होता. तसेच, सहआरोपी रवी पवार यांना उच्च न्यायालयाने जामीन मंजूर केल्याने समानतेच्या तत्त्वावर त्यांनाही जामीन द्यावा, अशी मागणी बचाव पक्षाने केली.

न्यायालयाने बचाव पक्षाचा युक्तिवाद फेटाळून लावताना नमूद केले की, रवी पवार यांची भूमिका मर्यादित होती आणि त्यांचा थेट शूटरांशी संपर्क नव्हता. उलट, संजय उधाण यांनी आरोपींना पळून जाण्यास मदत करणे, त्यांच्या हालचालींचे समन्वय करणे आणि आत्मसमर्पणाबाबत प्रयत्न करणे यावरून त्यांचा गुन्ह्यातील सक्रिय सहभाग प्रथमदर्शनी दिसून येतो. न्यायालयाने ‘कायदेशीर सल्ला’ या बचावालाही नाकारले.

पुणे:एका ज्येष्ठ नागरिकास मोबाईलवरील अनोळखी लिंक उघडणे चांगलेच महागात पडले. सायबर चोरट्यांनी या लिंकद्वारे त्यांचा मोबाईल ‘हॅक’ करून बँक खात्यातून सात लाख ९६ हजार रुपयांची रक्कम परस्पर लांबविल्याचा प्रकार उघडकीस आला आहे.
याप्रकरणी एरंडवणे परिसरातील एका ६८ वर्षीय ज्येष्ठ नागरिकाने अलंकार पोलिस ठाण्यात फिर्याद दिली आहे. त्यावरुन अज्ञाताविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार ज्येष्ठ नागरिकाचा मोबाईल क्रमांक त्यांच्या बँक खात्याशी जोडलेला आहे. काही दिवसांपूर्वी सायबर चोरट्यांनी त्यांच्या मोबाईलवर एका अनोळखी क्रमांकावरून एक लिंक पाठवली. ज्येष्ठ नागरिकाने ती लिंक उघडताच सायबर चोरट्यांनी त्यांच्या मोबाईलवर तांत्रिकदृष्ट्या ताबा मिळवत बँक खात्यातून चोरट्यांनी परस्पर सात लाख ९६ हजार रुपयांची रोकड लांबविली. बँक खात्यातून अचानक एवढी मोठी रक्कम कमी झाल्यानंतर ज्येष्ठ नागरिकास फसवणूक झाल्याचे लक्षात आले. त्यांनी पोलिसांत तक्रार दिली.

पुणे: पती-पत्नीतील मतभेद दूर करून पुन्हा एकत्र आणण्याचं आमिष दाखवत एका महिलेवर लैंगिक अत्याचार करून लाखो रुपयांची फसवणूक केल्याप्रकरणी स्वारगेट पोलिसांनी एका भोंदू बाबा विरुद्ध गुन्हा दाखल केला आहे.
या प्रकरणी ४२ वर्षीय महिलेनं स्वारगेट पोलीस ठाण्यात फिर्याद दिली आहे. त्यानुसार पोलिसांनी औदुंबर मनोहर गडदे (वय ४३, रा. तरटगाव, ता. पंढरपूर, जि. सोलापूर) याच्याविरुद्ध गुन्हा नोंदवला आहे. हा प्रकार २७ मे २०२१ ते १७ मार्च २०२६ या कालावधीत घडल्याचं पोलीसांनी सांगितले.

पोलिसांनी दिलेल्या माहितीनुसार, आरोपीने स्वत:ला ‘देवऋषी’ असल्याचं भासवून महिलेला तिच्या वैयक्तिक अडचणी सोडवून देण्याचं आश्वासन दिलं. विशेषतः पतीशी असलेले मतभेद दूर करून दोघांना एकत्र आणण्याचं आमिष दाखवत त्याने तिचा विश्वास संपादन केला. ओळख वाढवल्यानंतर आरोपीने महिलेला स्वारगेट परिसरातील एका लॉजवर बोलावून तिच्यावर अत्याचार केला.
यानंतर आरोपीने लोणेरे, उतेखोल आणि माणगाव आदी ठिकाणी वारंवार तिच्याशी जबरदस्तीने शारीरिक संबंध ठेवल्याचा आरोप आहे. याचदरम्यान आरोपीने नोकरी लावून देण्याचं, बांधकाम व्यवसायात गुंतवणूक करून जादा परतावा मिळवून देण्याचं, तसेच बंगला घेऊन देण्याचं आमिष दाखवत महिलेची फसवणूक केली. फिर्यादी महिलेचा एकटेपणा ओळखून आरोपीने तिच्याशी जवळीक साधली आणि वेळोवेळी तब्बल ५० लाख ५५ हजार रुपये उकळले. तसेच दारूच्या नशेत तिच्या घरी जाऊन शिवीगाळ, दमदाटी करून जबरदस्तीने अत्याचार केल्याचाही आरोप फिर्यादीत नमूद करण्यात आला आहे.
या प्रकरणाचा तपास पोलीस उपनिरीक्षक स्मिता पाटील करत असून, आरोपीविरुद्ध फसवणूक आणि लैंगिक अत्याचाराचे गंभीर गुन्हे दाखल करण्यात आले आहेत.

-स्थानिक व्यावसायिकांना जाणीवपूर्वक स्पर्धेतून बाहेर काढल्याचा आरोप

पुणे-महापालिकेने शहराचे उत्पन्न वाढवण्यासाठी आखलेले नवीन जाहिरात धोरण आणि त्यासाठी काढलेली निविदा वादात सापडली आहे. या धोरणामुळे उत्पन्नाची कोणतीही शाश्वती नसून, उलट शहराचे विद्रुपीकरण होण्याची भीती माजी विरोधी पक्षनेते उज्ज्वल केसकर आणि सुहास कुलकर्णी, प्रशांत बधे यांनी व्यक्त केली आहे. यासंदर्भात त्यांनी महापालिका आयुक्त नवलकिशोर राम यांना पत्र लिहून या ‘अविचारी’ धोरणाचा फेरविचार करण्याची मागणी केली आहे.

महापालिकेने जाहिरात धोरणासाठी काढलेल्या निविदेत एक जाचक अट टाकली आहे. ज्या ठेकेदाराची गेल्या पाच वर्षांतील उलाढाल १०० कोटी रुपये आहे, तोच या प्रक्रियेत सहभागी होऊ शकतो. या अटीमुळे स्थानिक आणि मध्यम आकाराच्या व्यावसायिकांना स्पर्धेतून बाद करून केवळ मोठ्या कंपन्यांचे हित जपले जात असल्याचा आरोप होत आहे. एकाच ठेकेदाराला संपूर्ण शहराचे ‘निर्विवाद अधिकार’ देणे हे स्पर्धात्मक वातावरणाच्या दृष्टीने घातक असल्याचे पत्रात नमूद करण्यात आले आहे.

प्रस्तावित धोरण ‘प्रॉफिट शेअरिंग’च्या (३० टक्के हिस्सा) तत्त्वावर आधारित आहे. मात्र, यात मोठी त्रुटी अशी की, जर ठेकेदाराला उत्पन्न मिळाले नाही, तर तो पालिकेला किमान किती रक्कम देणार, याचे कोणतेही स्पष्टीकरण निविदेत नाही. याचाच अर्थ, ठेकेदाराला सर्व मालमत्ता वापरण्याचे अधिकार मिळतील, पण पालिकेच्या खजिन्यात निश्चित किती रक्कम जमा होईल, याची कोणतीही खात्री नाही. हे धोरण पालिकेच्या आर्थिक हिताचे नसून केवळ गृहीतकांवर आधारित असल्याचा दावा केसकर कुलकर्णी आणि प्रशांत बधे यांनी केला आहे.“हे धोरण तयार करताना संबंधित खात्याच्या अधिकाऱ्यांनी कोणताही सखोल अभ्यास केल्याचे दिसत नाही. जाहिरातीसाठी जागांची पाहणी करणे आणि त्यांचे निश्चितीकरण करणे ही प्राथमिक जबाबदारी होती; मात्र ती पार पाडली गेलेली नाही,” अशी टीका पत्राद्वारे करण्यात आली आहे. केवळ उत्पन्नाच्या नादात शहराचे विद्रुपीकरण होऊ नये, यासाठी आयुक्तांनी या संपूर्ण प्रकरणाची गंभीर दखल घेऊन पारदर्शक निर्णय घ्यावा, अशी विनंती ‘आपले पुणे, आपला परिसर’ या माध्यमातून करण्यात आली आहे. येत्या २१ तारखेला या निविदा उघडल्या जाणार असून, त्यापूर्वी प्रशासन या तक्रारींची दखल घेते का, याकडे आता पुणेकरांचे लक्ष लागले आहे.

पुणे, दि.१२: सामाजिक समता सप्ताहानिमित्त “महिला मेळावा” तसेच “संविधान जागर आणि महिला सक्षमीकरण” या विषयांवर सामाजिक न्याय भवन, विश्रांतवाडी रोड, येरवडा, पुणे येथे
व्याख्यान आयोजित करण्यात आले.

कार्यक्रमाच्या अध्यक्षस्थानी पद्मा सुतार, गृहप्रमुख, शासकीय वसतिगृह, विश्रांतवाडी होत्या. या कार्यक्रमास नगरसेविका नंदिनी सिद्धार्थ धेंडे, नगरसेविका शीतल सावंत, माजी उपमहापौर श्री सिद्धार्थ धेंडे, समाजकल्याण अधिकारी माधुरी वाघमोडे, व्याख्याते पुष्पा घोडके, वाडिया महाविद्यालयाच्या प्राचार्या वृषाली रणधीर, मामासाहेब मोहळ महाविद्यालयाच्या उपप्राचार्या मेघना भोसले आणि जिल्हा महिला आर्थिक विकास महामंडळाच्या प्रतिनिधी श्रीमती सुपेकर उपस्थित होत्या.

श्रीमती धेंडे सामाजिक समता सप्ताह व महामानव डॉ. बाबासाहेब आंबेडकर यांच्या जयंतीनिमित्त शुभेच्छा दिल्या.

श्रीमती घोडके यांनी “संविधान जागर” या विषयावर मार्गदर्शन करताना भारतरत्न डॉ. बाबासाहेब आंबेडकर यांनी महिलांच्या हक्कांसाठी केलेल्या कार्याचा आढावा घेतला. त्यांनी महिलांना मतदानाचा अधिकार, शिक्षण, कायदेशीर संरक्षण, तसेच समानतेचे हक्क मिळवून देण्यात डॉ. बाबासाहेब आंबेडकरांचे योगदान अधोरेखित केले.

श्रीमती रणधीर यांनी “महिला सक्षमीकरण” या विषयावर मार्गदर्शन करताना महिलांचे अधिकार, कर्तव्ये आणि जबाबदाऱ्या यावर सविस्तर मार्गदर्शन केले.

या कार्यक्रमाला सहायक आयुक्त, समाजकल्याण कार्यालयातील अधिकारी व कर्मचारी, शासकीय वसतिगृहांचे गृहप्रमुख व गृहपाल तसेच विद्यार्थी व विद्यार्थीनी मोठ्या संख्येने उपस्थित होते.

कार्यक्रमाचे प्रास्ताविक श्रीमती भोईटे गृहपाल यांनी केले. त्यांनी सामाजिक समता सप्ताहानिमित्त विविध उपक्रमांचे आयोजन करण्यात येत असल्याची माहिती दिली.

कार्यक्रमाचे सूत्रसंचालन श्रीमती उषा कांबळे समतादूत, बार्टी यांनी केले, तर आभार प्रदर्शन शीतल बंडगर प्रकल्प व्यवस्थापक, समतादूत प्रकल्प, बार्टी यांनी केले.

पुणे जिल्हा माहेश्वरी प्रीमियर लीग स्पर्धेत सारडा स्टॅलियनवर मात

पुणे : धीरज मंत्रीच्या आक्रमक अर्धशतकाच्या जोरावर प्रारव पँथर्स संघाने पुणे जिल्हा माहेश्वरी प्रगती मंडळ (जिल्हा युवा समिती) यांच्या वतीने आयोजित पुणे जिल्हा माहेश्वरी प्रीमियर लीग (बेहडे पीएमपीएल) क्रिकेट स्पर्धेतील अंतिम लढतीत सारडा स्टॅलियन संघावर आठ गडी राखून मात केली आणि विजेतेपद पटकावले. यानंतर मास्टर स्मॅशर्स संघाने हाय-बाइट चॅलेंजर्स संघावर पाच गडी राखून मात केली आणि तिसरा क्रमांक पटकावला.

नेहरू स्टेडियममध्ये ही स्पर्धा झाली. अंतिम लढतीत सारडा स्टॅलियन संघाने मुकुल जाजूच्या अर्धशतकाच्या जोरावर निर्धारित १६ षटकांत ३ बाद १४६ धावा केल्या. मुकुलने २५ चेंडूंत ११ चौकारांसह ५४ धावा केल्या. मुकुलने रोहित राठीने सहा षटकांत ६३ धावांची सलामी दिली. यानंतर मुधुसुदन कलंत्री (५) आणि करण सारडा (१) झटपट बाद झाले. यानंतर रोहितने यश लढ्ढाच्या साथीने ६८ धावांची नाबाद भागीदारी रचली. रोहितने ४१ चेंडूंत सहा चौकारांसह नाबाद ४७, तर यशने १७ चेंडूंत तीन चौकार व एका षटकारासह नाबाद ३१ धावा केल्या.

प्रारव पँथर्स संघाने विजयी लक्ष्य १४.१ षटकांत दोन गडींच्या मोबदल्यात सहज साध्य केले. विजयाचा शिल्पकार ठरला तो तिसऱ्या क्रमांकाचा फलंदाज धीरज मंत्री. नितीश मनियार (९) बाद झाल्यानंतर धीरजने हर्ष दरकच्या साथीने ९६ धावांची भागीदारी रचली. हर्ष २७ चेंडूंत चार चौकारांसह ३५ धावा करून बाद झाला. यानंतर धीरजने गोविंद राठीच्या साथीने प्रारव पँथर्सच्या विजयावर शिक्कामोर्तब केले. धीरजने ३६ चेंडूंत सहा चौकार व चार षटकारांसह नाबाद ७९ धावा केल्या.

स्पर्धेच्या पारितोषिक वितरण प्रसंगी ज्येष्ठ उद्योजक कृष्णकुमार बूब, बेहडे ग्रुपचे निशांत बेहडे, मेटारोल ग्रुपच्या राधिका बिर्ला, क्रीडा अध्यक्ष नीरज धूत, क्रीडा सचिव गितेश झंवर, युवा अध्यक्ष रोनक झंवर, युवा सचिव मनीष मणियार, संघटनेचे जिल्हा अध्यक्ष महेश सोमानी, गणेश भुतडा आदी उपस्थित होते.

अभय करवा, राकेश लद्दड, संतोष जाजू, अभय जाजू, भूषण भट्टड, सचिन चांडक, मनोज डागा, राहुल भुतडा, अजय झंवर, नवल भुतडा, प्रद्युमन भूतडा, शुभम मंत्री, स्वप्नील बांगड, पियुष भुतडा, गोविंद डागा, हिमांशू सोनी, शुभम डाल्या, चिराग मुंदडा, नरेश बाहेती यांसह युवा च्या पदाधिकाऱ्यांनी स्पर्धेचे आयोजन केले. योगेश मुंदडा, प्रतीक कालिया, भूषण मानधने, पार्थ लाहोटी यांनी स्पर्धेदरम्यान संपूर्ण निवेदन केले.

स्पर्धेसाठी बेहडे बिल्डकॉन एलएलपी निशांत बेहडे व परिवार हे मुख्य प्रायोजक होते, त्यांनी सलग दुसऱ्या वर्षी स्पर्धेला पाठिंबा दिला. मेटारोल श्रीमती राधिका बिर्ला हे को-टायटल स्पॉन्सर होत्या. बुलडाणा अर्बन को-ऑपरेटिव्ह क्रेडिट सोसायटी लि. हे व्हेन्यू स्पॉन्सर, जीबी ग्रुप  गणेश भुतडा ट्रॉफी स्पॉन्सर, तर मॅजेस्टिक लँडमार्क कैलाश मुंदडा जर्सी स्पॉन्सर व युट्युब लाईव्ह स्पॉन्सर मेहुल शाह  म्हणून सहभागी आहेत. याशिवाय डीडब्ल्यू रिअल्टर्स अँड लॉ फर्म, स्वनिती, तिरुपती सेल्स एम्पोरियम आणि अरुणकुमार अँड कंपनी हे असोसिएट स्पॉन्सर्स म्हणून सहभागी झाले होते.

धावफलक : सारडा स्टॅलियन – १६ षटकांत ३ बाद १४६ (मुकुल जाजू ५४, रोहित राठी नाबाद ४७, यश लढ्ढा नाबाद ३१, गोविंद राठी ४-०-१७-२) पराभूत वि. प्रारव पँथर्स – १४.१ षटकांत २ बाद १५२ (धीरज मंत्री नाबाद ७९, हर्ष दरक ३५, गोविंद राठी नाबाद १९, सागर कारवा २-०-१७-१, रोहित राठी २-०-२२-१). मॅन आॅफ दि मॅच – धीरज मंत्री

तिसऱ्या क्रमांकाची लढत : हाय-बाइट चॅलेंजर्स – १२ षटकांत ८ बाद ११० (मधुर जेठलिया ६७, कन्हैया लढ्ढा १२, केदार बजाज ३-०-२८-२, नयन भन्साली ३-०-२४-२, कपिल धूत २-०-११-२) पराभूत वि. मास्टर स्मॅशर्स – १०.३ षटकांत ५ बाद ११४ (केदार बजाज ५१, अखिल तपाडिया १८, सुदर्शन हरकुट ३-०-२६-२).

पोलिस उपायुक्त सोमय मुंडे यांचे आदेश; गुंडांवर गावठी दारू विक्री, जुगार आणि इतर गंभीर गुन्हे
पुणे-पुणे शहर आणि जिल्ह्यातून गंभीर गुन्हे करणाऱ्या दहा गुंडांना तडीपार करण्याचे आदेश पोलिस उपायुक्त सोमय मुंडे यांनी दिले आहेत. गावठी दारू विक्री, जुगार आणि इतर गंभीर गुन्हे त्यांच्यावर दाखल आहेत.

तडीपार करण्यात आलेल्यांमध्ये अभिजित संजय जाधव (वय २९), साईनाथ विठ्ठल पाटोळे (वय २७), अविनाश मुरलीधर मेटे (वय ३६), गगन तानाजी शिंदे (वय २४), संकेत अमोल बांदल (वय २७), मच्छिंद्र शंकर पवार (वय ३८), सचिन भीमराव मातंग (वय २५), आदित्य बापू शिंदे (वय २५), बिरा रामदास श्रीराम (वय ३८) आणि मालती संतोष मलके (वय ४५) यांचा समावेश आहे. या आरोपींविरुद्ध चंदननगर, लोणीकंद आणि वाघोली पोलिस ठाण्यात गंभीर गुन्हे दाखल आहेत. या गुंडांना तडीपार करण्याचा प्रस्ताव तयार करण्यात आला होता, ज्याला मंजुरी मिळाल्यानंतर उपायुक्त मुंडे यांनी हे आदेश दिले.

पुणे पोलिसांच्या परिमंडळ सातमध्ये लोणीकंद, वाघोली, खराडी, चंदननगर, लोहगाव, विमानतळ आणि येरवडा ही पोलिस ठाणी येतात. गेल्या काही महिन्यांत पोलिसांनी या परिमंडळातून १०० गुंडांना तडीपार करण्याचे आदेश दिले आहेत. तडीपार केलेले गुंड शहरात दिसल्यास नागरिकांनी जवळच्या पोलिस ठाण्यात संपर्क साधावा, असे आवाहन पोलिसांनी केले आहे.

दरम्यान, पुणे शहरातील धनकवडी परिसरात दहशत माजविणाऱ्या एका गुंडाविरुद्ध झोपडपट्टी दादा प्रतिबंधक कायद्यान्वये (एमपीडीए) कारवाई करण्यात आली आहे. पोलिस आयुक्त अमितेशकुमार यांनी या कारवाईचे आदेश दिले असून, त्यानुसार गुंडाला यवतमाळ कारागृहात वर्षभरासाठी स्थानबद्ध करण्यात आले आहे.

कारवाई करण्यात आलेल्या गुंडाचे नाव रोहन राजेंद्र रोंगे (वय २१, रा. गोविंदराव पाटीलनगर, धनकवडी) असे आहे. रोंगे याच्याविरुद्ध सहकारनगर पोलिस ठाण्यात गंभीर स्वरूपाचे गुन्हे दाखल आहेत. यापूर्वी त्याच्यावर प्रतिबंधात्मक कारवाई करण्यात आली होती, मात्र त्याच्या वर्तणुकीत सुधारणा झाली नव्हती. सहकारनगर पोलिस ठाण्याचे वरिष्ठ पोलिस निरीक्षक विठ्ठल पवार यांनी रोंगेविरुद्ध एमपीडीए कारवाईचा प्रस्ताव अतिरिक्त पोलिस आयुक्त राजेश बनसोडे आणि उपायुक्त मिलिंद मोहिते यांच्याकडे सादर केला होता. या प्रस्तावाला पोलिस आयुक्त अमितेशकुमार यांनी मंजुरी दिल्यानंतर रोंगेची यवतमाळ कारागृहात रवानगी करण्यात आली

रेस्क्यू फाउंडेशनमधून 12 महिला पळाल्या
पुणे-पुण्यातील मोहम्मदवाडी येथील ससाणे वस्तीमधील रेस्क्यू फाउंडेशनमधून १२ बांगलादेशी महिला पळून गेल्याची धक्कादायक घटना समोर आली आहे. २३ मार्च रोजी पहाटे ही घटना घडली असून, केअरटेकर महिलेचे हातपाय बांधून तिला मारहाण करत या महिलांनी पलायन केले. विशेष म्हणजे, हा प्रकार तब्बल २० दिवस दडपून ठेवण्यात आला होता.पळून गेलेल्या १२ महिलांपैकी दोघींना त्याच दिवशी सय्यदनगर परिसरातून पुन्हा ताब्यात घेण्यात आले आहे. मात्र, उर्वरित दहा महिला अजूनही फरार असून, त्यांचा शोध सुरू आहे. या सर्व महिला २३ ते ३३ वयोगटातील आहेत.

या महिलांना शहरातील विविध ठिकाणी वेश्याव्यवसायावर केलेल्या कारवाईतून वाचवण्यात आले होते. दिघी, फरासखाना, देहूरोड, जेजुरी आणि कोंढवा पोलीस ठाण्यांनी केलेल्या कारवाईनंतर त्यांना रेस्क्यू फाउंडेशनमध्ये आश्रय देण्यात आला होता.न्यायालयाने १८ मार्च रोजी या महिलांना बांगलादेशात परत पाठवण्याचे आदेश दिले होते. त्यासाठी दूतावासाशी समन्वय साधण्याचे काम सुरू असतानाच, फाऊंडेशनच्या सुरक्षेचा बोजवारा उडाल्याने हा प्रकार घडल्याचे बोलले जात आहे.

२३ मार्च रोजी सकाळी साडेसहा वाजता एका बांगलादेशी महिलेने पोटदुखीचे नाटक करत महिला केअरटेकरला औषध मागण्यासाठी बोलावले. औषध देण्यासाठी आलेल्या केअरटेकरवर तिने मैत्रिणीच्या मदतीने झडप घातली. तिचे तोंड दाबून, हात-पाय बांधले आणि त्यानंतर सर्व महिलांनी मिळून मुख्य गेटचे कुलूप उघडून पळ काढला.रेस्क्यू फाउंडेशनकडून वारंवार पोलीस संरक्षणाची मागणी करण्यात आली होती, परंतु ती पुरवण्यात आली नसल्याचे समोर आले आहे. यामुळे हा प्रकार केवळ निष्काळजीपणाचा नसून, यंत्रणेच्या हलगर्जीपणाचा परिणाम असल्याचे स्पष्ट झाले आहे.

बिहू नृत्य,  होजगिरी नृत्य व संगीताची मंत्रमुग्ध करणारी मेजवानी

भारती विद्यापीठ स्कूल ऑफ परफॉर्मिंग आर्ट्स आणि असोमी यांच्यावतीने आयोजन

पुणे : वेगवान लय, हातांच्या तालबद्ध हालचाली, पारंपरिक वाद्यांचा सुरेल नाद आणि पारंपरिक वेशभूषा यामुळे बिहू नृत्य खुलले. अस्सल सादरीकरणातून प्रेक्षकांना आसामच्या सांस्कृतिक वैभवाची झलक अनुभवता आली.

 ईशान्य भारताच्या समृद्ध सांस्कृतिक परंपरेचे दर्शन घडवणारा ‘रोंगाली बिहू’  कार्यक्रम उत्साहात पार पडला. आसाममधील नामांकित नृत्यांगना आणि गायक-गायिकांनी आपल्या अप्रतिम सादरीकरणातून पुणेकर प्रेक्षकांना मंत्रमुग्ध केले. पारंपरिक बिहू नृत्याबरोबरच सुरेल आसामी संगीताची मेजवानी अनुभवण्याची संधी पुणेकरांना मिळाली.

भारती विद्यापीठ स्कूल ऑफ परफॉर्मिंग आर्ट्स आणि ‘असोमी’ यांच्या संयुक्त विद्यमाने एरंडवण्यातील भारती विद्यापीठ शैक्षणिक संकुलात या कार्यक्रमाचे आयोजन करण्यात आले होते. यावेळी भारती विद्यापीठ अभिमत विश्वविद्यालयाचे कुलगुरू शिवाजीराव कदम प्रमुख पाहुणे म्हणून उपस्थित होते. स्कूल ऑफ परफॉर्मिंग आर्ट्सचे संचालक प्रा. शारंगधर साठे, नृत्य विभाग प्रमुख डॉ. देविका बोरठकूर, असोमीचे राजीव बोरकटाटी, मौसमी बोरा उपस्थित होते.

कार्यक्रमात रुमा रुलिका भुयान, हिमाश्री मेधी कलिता, अप्सरा गोगोई, निहारिका बोर्गोहैन, जाह्नोबी गोगोई आणि प्रियाक्षी कटक्य या पुरस्कारप्राप्त नृत्यांगनांनी बहारदार सादरीकरण केले. तन्वी गोखरे, आर्या घाटे, खानंडका या पुण्यातील मुलीनी सादर केलेले त्रिपुरा राज्यातील होजगिरी लोकनृत्याने सर्वांचे मन जिंकले.

आसाममधील सुप्रसिद्ध गायक-गायिका निहारिका हजारिका, ध्रुव ठाकुरिया आणि रिपुंजीत यांनी आपल्या सुरेल आवाजाने कार्यक्रमाची शोभा वाढवली. त्यांच्या सादरीकरणातून पारंपरिक आणि आधुनिक आसामी संगीताचा सुंदर संगम अनुभवायला मिळाला.

प्रा. शारंगधर साठे म्हणाले, आसाम आणि महाराष्ट्राच्या परंपरा व कला प्रकारांमध्ये अनेक साम्य आहेत. आसाममधील वैष्णव परंपरा आणि महाराष्ट्रातील परंपरा यामध्येही साम्य आढळते. या दोन संस्कृतींमध्ये संवाद आणि आदानप्रदान व्हावे, यासाठी दरवर्षी अशा कार्यक्रमांचे आयोजन केले जाते. तसेच, भारती विद्यापीठ स्कूल ऑफ परफॉर्मिंग आर्ट्समध्ये सत्रीय नृत्याचे अभ्यासक्रम सुरू करण्यात आले असून त्यालाही चांगला प्रतिसाद मिळत आहे.

पुणे
महात्मा फुले, महात्मा गांधी, डॉ. आंबेडकर या महापुरूषांच्या काळात देखील फार मोठी प्रतिकुल परिस्थिती होती. त्याला तोंड देत सामाजिक आंदोलने उभी राहीली व परिवर्तन घडले. सामाजिक चळवळी दडपण, दबावाला न जुमानता, सामाजिक न्यायासाठी वारंवार निर्माण होतच राहतील, असा विश्वास गांधी दर्शन शिबीरात व्यक्त करण्यात आला.
महामानव भारतरत्न डॉ. बाबासाहेब आंबेडकर यांच्या जयंतीच्या पूर्वसंध्येला महात्मा जोतीबा फुले आणि भारतरत्न डॉ. बाबासाहेब आंबेडकर यांच्या योगदानावर विशेष व्याख्याने गांधी भवन, कोथरूड, पुणे येथे रविवार दि. १२ एप्रिल रोजी आयोजित करण्यात आली होती. गांधी विचार दर्शन मालिकेतेतील या ३०व्या पुष्पात ‘महात्मा फुले यांच्या कार्याची सामाजिक आणि सांस्कृतिक पार्श्वभूमी’ या विषयावर सावित्रीबाई फुले विद्यापीठाच्या महात्मा फुले अध्यासन केंद्राचे विश्वनाथ शिंदे, डॉ. बाबासाहेब आंबेडकर यांचा शैक्षणिक दृष्टीकोन’ या विषयावर मराठी भाषा सल्लागार समितीचे सदस्य,   प्राध्यापक प्रा. पी. विठ्ठल आणि ‘डॉ. बाबासाहेब आंबेडकर आणि भूमी अधिकार’ या विषयावर युवा भारत आंदोलनचे सल्लागार शशी सोनावणे यांचे व्याख्यान झाले.

विश्वनाथ शिंदे म्हणाले की, महात्मा फुले यांच्या काळात पुरोहित सांगतील तो धर्म, न्याय मानला जायचा. धर्मग्रंथांना कायद्याचे स्वरूप आले होते. त्या विरोधात बोलणे म्हणजे परमेश्वरा विरोधात बोलण्यासारखे होते. धर्माच्या नावाखाली भोंदूगिरी सुरू होती. राजकीय, सामाजिक, सांस्कृतिक, नैतिक दृष्ट्या समाज निकृष्ट अवस्थेत पोहोचला होता. अशा काळात महात्मा फुले यांनी विविध प्रकारच्या चळवळी उभ्या केल्या. त्या  सगळ्यांच्या पाठीमागे सत्यान्वयी दृष्टिकोन होता.
विश्वनाथ शिंदे पुढे म्हणाले की, जनतेचा, सुधारकांचा आवाज बंद करायचे धोरण राज्यकर्ते करत आहेत. एकहाती सत्ता असावी असे राज्यकर्त्यांना वाटते. लोक मूग गिळून गप्प बसतात तो पर्यंत हे असेच चालू राहणार. पण पुन्हा चळवळी न्यायासाठी आवाज उठवतील. संघटितपणे लोक एकत्र येऊन चुकीच्या धोरणांना विरोध करतील.

प्रा. पी.  विठ्ठल म्हणाले की, शिक्षण सर्वांसाठी खुले असावे अशी महात्मा फुले यांची धारणा होती. तोच विचार बाबासाहेबांनी पुढे नेला.  समाज शिक्षित झाला तरच समाज पुढे जाईल. म्हणून समतेवर आधारित शिक्षण असावे. शिक्षणामुळे माणूस स्वाभिमानी होतो. तर्कशूध्द आचरण करतो. जाती रचना हा समाजातील मोठा दोष आहे. मुक्ती साधायची असेल तर बुध्द धर्मात प्रवेश करा असा संदेश बाबासाहेबांनी दिला होता. आत्ताच्या पिढीने महापुरुषांशी नाते सेल्फी काढण्यापुरते जोडले आहे. शिक्षण हे फक्त नोकरी मिळवण्यासाठी नाही याचे भान सर्वांनी ठेवायला हवे.
 
शशी सोनवणे की, जमीनीचे राष्ट्रीयीकरण करणे, सुधारणा, फेर वाटप हा मुद्दा 1918 साली बाबासाहेब आंबेडकरांनी अधोरेखित केला होता. सामाजिक समतेकडे जायचे असेल तर जमिनीचे राष्ट्रीयीकरण झाले पाहिजे. सर्व समाजाच्या हाती नैसर्गिक संसाधनांची मालकी राहिली पाहिजे. जातीय उतरंड, शोषणाची उतरंड त्यातून दूर केली जाऊ शकते.
असे त्यांचे मत होते. जमिनीवरचा अधिकार प्रस्थापित करण्याचे मोठे संघर्ष भारतात झाले. प्रा. शशी सोनवणे पुढे म्हणाले की, भारतातील मुलभूत उद्योगांचे राष्ट्रीयीकरण करावे असे आम्हाला वाटते.
भांडवलशाही हे संकट आहे. नैसर्गिक संसाधनांवर कब्जा मिळवून भांडवलदार सत्ता गाजवतात.
 
लक्ष्मिकांत देशमुख म्हणाले की, सर्वांना सक्तीचे व मोफत शिक्षण दिले पाहिजे असे हंटर कमिशन पुढे महात्मा फुले यांनी मांडले. तोच आग्रह बाबासाहेबांनी धरला. विवेकाचे अधिष्ठान असलेला समाज निर्माण झाला पाहिजे.  शिक्षणातून समानता निर्माण झाली पाहिजे या ध्येयापासून आपण खूप दूर आहोत.
सत्ता, संपत्ती आणि प्रतिष्ठा यांच्या पासून वंचित असलेल्या समाजासाठी लढायचे यावर आम्ही युक्रांदमध्ये चर्चा करायचो, अशी आठवण सांगत अन्वर राजन म्हणाले की, समाजात जेव्हा न्याय असतो, तेव्हा शांतता असते. आपली समाज रचना विषमतावादी आहे. त्यामुळे शांतता नाही. अतिशय प्रतिकूल परिस्थितीत गांधी, आंबेडकर यांनी आंदोलने केली. आत्ताच्या वातावरणात देखील ठामपणे उभे राहण्याची युक्रांदची भुमिका आहे. गांधीजींच्या मार्गाने आपल्याला जावे लागेल.
लक्ष्मिकांत देशमुख यांनी स्वागत व प्रास्ताविक केले. तेजस भालेराव यांनी सुत्रसंचलन केले. सुरज कुलकर्णी यांनी पाहुण्यांची ओळख करून दिली. प्रविण सप्तर्षी यांनी आभार मानले.
कार्यक्रमात गानकोकिळा आशा भोसले यांना श्रद्धांजली अर्पण करण्यात आली.