पुणे, दि. ९ : महाराष्ट्र राज्य परीक्षा परिषदेमार्फत राष्ट्रीय आर्थिक दुर्बल घटकातील इयत्ता ८ वीतील विद्यार्थ्यांसाठी शिष्यवृत्ती योजना परीक्षेचे (एनएमएमएस) रविवार २८ डिसेंबर, २०२५ रोजी आयोजन करण्यात आले असून प्रवेशपत्रे परीक्षा परिषदेच्या www.mscepune.in व https://mscerumms.in या संकेतस्थळावर उपलब्ध करुन देण्यात आली आहेत.

ही परीक्षा महाराष्ट्रात एकूण ७५८ केंद्रावर घेण्यात येणार असून परीक्षेसाठी राज्यातून १३ हजार ७८९ शाळा व एकूण २ लाख ५० हजार ५४४ विद्यार्थ्यांची नोंदणी करण्यात आली आहे. ही प्रवेशपत्रे विद्यार्थ्यांस उपलब्ध करुन देण्याची जबाबदारी संबंधित शाळेच्या मुख्याध्यापकांची असेल. प्रवेशपत्रात विद्यार्थ्यांचे नाव, वडीलांचे नाव, आडनाव, आईचे नाव यामधील स्पेलिंग दुरुस्ती असल्यास तसेच जन्मतारीख, जात, आधारकार्ड आदींमध्ये दुरुस्ती असल्यास दुरुस्तीसाठी २७ डिसेंबर पर्यंत संबंधित शाळेच्या लॉगिनमध्ये ऑनलाईन अर्ज उपलब्ध करुन देण्यात आले आहेत. कोणत्याही परिस्थितीत पूर्ण नावात बदल केला जाणार नाही. ऑनलाईन आलेल्या अर्जाव्यतिरिक्त टपाल, समक्ष अथवा ईमेल आदी कोणत्याही पद्धतीने पाठविलेल्या दुरुस्त्या तसेच विहित मुदतीनंतर प्राप्त झालेल्या दुरुस्ती अर्जांचा विचार केला जाणार नाही. या दुरुस्त्या परीक्षा झाल्यानंतर करण्यात येणार आहेत, असे महाराष्ट्र राज्य परीक्षा परिषदेमार्फत कळविण्यात आले आहे.

उपमुख्यमंत्री अजित पवार यांनी डॉ. बाबा आढाव यांच्या पार्थिवाचे घेतले अंत्यदर्शन

डॉ. बाबा आढाव यांचे कष्टकरी, श्रमिक, गरीब, वंचित वर्गाकरिता संपूर्ण आयुष्य समर्पित-उपमुख्यमंत्री अजित पवार

पुणे, दि. ९ : ज्येष्ठ समाजसेवक डॉ. बाबा आढाव यांच्यावर वैकुंठ स्मशानभुमी, नवी पेठ येथे अंत्यसंस्कार करण्यात आले. शासनाच्यावतीने उपमुख्यमंत्री तथा जिल्ह्याचे पालकमंत्री अजित पवार यांनी त्यांच्या पार्थिवाचे अंत्यदर्शन घेतले; पुष्पचक्र अर्पण करून श्रद्धांजली वाहिली.

यावेळी माजी गृहमंत्री मंत्री अनिल देशमुख, माजी राज्यमंत्री रमेश बागवे, माजी आमदार मोहन जोशी, चेतन तुपे, पोलीस उपायुक्त कृषिकेष रावल, उपविभागीय अधिकारी विठ्ठल जोशी, पुणे शहर तहसीलदार स्मिता माने, हवेली तहसीलदार अर्चना निकम यांच्यासह विविध क्षेत्रातील मान्यवर उपस्थित होते.

श्री. पवार म्हणाले, डॉ. बाबा आढाव यांनी खऱ्या अर्थाने कष्टकरी, श्रमिक, गरीब, वंचित आदी वर्गाकरिता संपूर्ण आयुष्य समर्पित केले. रिक्षा पंचायत, हमाल पंचायत, माथाडी, असंघटित कामगारांच्या प्रसंगात त्यांना कठोर भूमिका घ्यावी लागली. ते विचार घेऊन ते शेवटच्या श्वासापर्यंत आयुष्य जगले.

छत्रपती शिवाजी महाराज, छत्रपती शाहू महाराज, महात्मा फुले आणि डॉ. बाबासाहेब आंबेडकर यांची विचारधारा स्मरणात ठेवून त्यादृष्टीने वाटचाल केली, एक संघर्ष योद्धा म्हणून त्यांना भारतासह महाराष्ट्राने अनुभवले आहे, अशा शब्दात श्री. पवार यांनी भावपूर्ण श्रद्धांजली अर्पण केली.

यावेळी उपमुख्यमंत्री श्री. पवार यांनी यांनी बाबा आढाव यांच्या कुटुंबियांची भेट घेऊन त्यांचे सांत्वन केले. बाबा आढाव यांच्या पत्नी शीलाताई आढाव, मुलगा असीम आढाव, अंबर आढाव आदी उपस्थित होते.

पर्यटकांना घडणार पुण्याच्या वारसा, कला, संस्कृतीचे दर्शन

पुण्याचे खासदार, केंद्रीय राज्यमंत्री मुरलीधर मोहोळ यांची माहिती

पुणे

हवाई मार्गाने पुण्यात येणाऱ्या पर्यटक-प्रवाशांना लवकरच जाता-येताना उत्तम दर्जाचा प्रशस्त रस्ता उपलब्ध होणार आहे. तसेच त्यांना पुण्याच्या समृद्ध वारसा, कला, परंपरा, संस्कृतीचे दर्शनही घडणार आहे. यासाठी नागपूर चाळ ते विमानतळ प्रवेशद्वारापर्यंतचा रस्ता सध्याच्या १२ मीटरवरून २४ मीटर रुंद केला जाईल. व त्याला सुशोभीकरणाची जोड दिली जाईल. सामाजिक उत्तरदायित्व निधीतून (सीएसआर) विकसित होणाऱ्या या रस्त्याचे काम लवकरच सुरू होईल, अशी माहिती पुण्याचे खासदार, केंद्रीय नागरी विमान वाहतूक राज्यमंत्री मुरलीधर मोहोळ यांनी दिली.

लोहगाव येथे पुणे आंतरराष्ट्रीय विमानतळ आहे. सध्या या विमानतळावरून दररोज सुमारे २००- २२५ उड्डाणे होतात. तर वार्षिक प्रवासीसंख्येने एक कोटींचा टप्पा ओलांडला आहे. दिवसेंदिवस त्यात वाढ होते आहे. मात्र, प्रवाशांची आणि वाहनांची वर्दळ वाढल्याने विमानतळ रस्त्यावर बाराही महिने प्रवाशांना वाहतूक कोंडीचा सामना करावा लागतो. त्यामुळे या रस्त्याचे रुंदीकरण आवश्यक बनले होते. नागपूर चाळ ते विमानतळापर्यंत रस्ता हवाई दलाचा आणि खाजगी मालकीचा आहे. हवाई दलाकडून जागा ताब्यात येत नसल्याने रस्त्याचे रुंदीकरण दीर्घकाळ रखडले होते. त्यामुळे मोहोळ यांनी त्यासाठी पाठपुरावा केला.
केंद्रीय राज्यमंत्री मुरलीधर मोहोळ यांच्या प्रयत्नामुळे हवाई दलाने नागपूर चाळीपासून विमानतळपर्यंत रस्त्याचे रुंदीकरण करण्यासाठी मंजुरी दिली. तसेच खाजगी जागा मालकांनी भूसंपादनाला मान्यता दिली. त्यामुळे नागपूर चाळ ते लोहगाव विमानतळपर्यंत ३ किलोमीटर रस्त्याच्या रुंदीकरणाचा मार्ग मोकळा झाला आहे.

रस्त्याची वैशिष्ट्ये

• नागपूर चाळ ते विमानतळ रस्ता १२ मीटरवरून २४ मीटर रुंद होणार
• जागतिक दर्जाचा रस्ता विकसित केला जाणार
• पादचारी मार्ग, शोभिवंत झाडे, कारंजी, विद्युत रोषणाई- प्रवासी व नागरिकांसाठी आकर्षक फर्निचर-
• चित्र व शिल्पांद्वारे उलडगणार पुण्याचा गौरवशाली वारसा कला, संस्कृती, परंपरेचेही घडणार दर्शन

विमानतळावरून पुण्यात येताना आणि जाताना दिसणारे चित्र पाहून प्रवाशांच्या मनात पुण्याचे पहिले आणि शेवटचे प्रतिबिंब उमटते. पुण्यात येताना त्यांना प्रसन्नतेचा अनुभव यावा,शहराची ओळख व्हावी आणि जाताना शहराचा समृद्ध वारसा, संस्कृती, परंपरा, सोयीसुविधा यांचा ठसा त्यांच्या मनावर कायमस्वरूपी उमटावा, यादृष्टीने हा रस्ता विकसित केला जात आहे. लवकरच या कामाला सुरुवात होईल. हा रस्ता पुण्याची नवी ओळख बनेल.

मुरलीधर मोहोळ, केंद्रीय राज्यमंत्री

अग्निशमन दलाकडून चार अग्निशमन वाहने दाखल. आग विझवण्याचे काम सुरु..

पुण्यातील फॅब्रिक व डाईंगसाठी ओळखल्या जाणाऱ्या रमेश डाईंग दुकानाला अचानक भीषण आग लागली. दुकानाच्या शेवटच्या मजल्यावरून धुराचे लोट दिसू लागल्यानंतर परिसरात एकच गोंधळ उडाला.काही मिनिटांतच आगीने रौद्ररूप धारण केले आणि शेवटच्या मजल्यावरील साहित्य पूर्णपणे जळून खाक झाल्याची प्राथमिक माहिती मिळत आहे.

दुकानातील मोठ्या प्रमाणातील कापडसाठा व इतर साहित्याला आगीचा मोठा धोका निर्माण झाला. आग लागलेल्या मजल्यावर अत्यंत ज्वलनशील वस्तू असल्याने ज्वाळा वेगाने पसरल्याचे सांगितले जात आहे.

घटनास्थळी अग्निशमन दलाच्या अनेक गाड्या दाखल होऊन आग विझवण्याचे काम युद्धपातळीवर सुरू आहे. नेमकी आग कशामुळे लागली याचे कारण मात्र अद्याप स्पष्ट झालेले नाही.

नागरिकांनी रोज रात्री झोपताना काहीतरी वाचण्याची सवय लावावी – संदीप खर्डेकर.

पुणे –पुणे पुस्तक महोत्सवात आज ” शांतता पुणेकर वाचत आहेत ” ह्या उपक्रमात उद्यम विकास सहकारी बँकेचे कर्मचारी उत्साहाने सहभागी झाले होते.
नागरिकांनी रोज रात्री झोपताना काहीतरी वाचण्याची सवय लावावी आणि ती प्रत्यक्ष पुस्तक वाचण्याची असावी, मोबाईल नव्हे असे आवाहन संदीप खर्डेकर यांनी केले. उद्यम सहकारी बँकेच्या कर्मचाऱ्यांनी आज ह्या उपक्रमात सहभाग घेतला त्यावेळी ते बोलत होते.
यावेळी बँकेचे माजी अध्यक्ष व संचालक संदीप खर्डेकर, संचालक गोकुळ शेलार, बँकेचे मुख्य कार्यकारी अधिकारी जयवंत कडू, पतित पावन संघटनेचे शहर अध्यक्ष श्रीकांत शिळमकर व कर्मचारी वर्ग यांनी सहभाग घेतला.
यावेळी प्रसिद्ध लेखक हेक्टर गार्सीया यांचे “इकीगाई”, डॉ. उदय कुलकर्णी यांचे “नानासाहेब पेशवा एक विलक्षण कालखंड”,चंद्रशेखर गोखले यांचा कविता संग्रह, रॉबर्ट कियोसाकी यांचे “Rich dad poor Dad”,पं. दीनदयाळ उपाध्याय यांचे “एकात्म मानववाद”,डॉ. दत्ता कोहीनकर यांचे “सुखी जीवनाची गुरुकिल्ली”, विश्वास नांगरे पाटील यांचे “कर हर मैदान फतह “, तुषार रंजनकर व नवनाथ जगताप यांचे ” मोबाईल व्यसनमुक्ती ” यासह विविध विषयांवरील पुस्तकांचे वाचन करण्यात आले. यापुढे रोज रात्री काही न काही वाचूनच झोपण्याचा निर्धार देखील कर्मचाऱ्यांनी व्यक्त केला.
या उपक्रमात प्रामुख्याने मनोज शिंदे,सौ.इंद्रायणी रड्डी,सौ.शुभांगी कडू,सौ. शुभांगी माकर,सौ. प्रियांका मेलगे,विनायक पडवळ, सुरेंद्र यादव,कु. वैभवी शिंदे,इ सहभागी झाले होते.
कार्यक्रमाचे संयोजन संदीप खर्डेकर यांनी केले.

पुणे- भाजपा पदाधिकाऱ्यांच्या निर्देशानुसार महापालिकेने प्रभाग रचना आणि प्रभागांच्या मतदार याद्या केल्याचाआरोप आज संजय बालगुडे यांच्या समवेत विचारवंत विश्वंभर चौधरी , वकील असीम सरोदे यांनी पत्रकार परिषद घेऊन केला आहे.

सीसीटीव्ही फुटेजमध्ये भाजप-महापालिका अधिकाऱ्यांचे साटेलोटे केले उघड:

काँग्रेस नेते संजय बालगुडे यांचा प्रारूप मतदारयाद्या संगनमताने बनवल्याचा आरोप

महापालिकेच्या आगामी निवडणुकीसाठीच्या प्रारूप मतदारयाद्यांमध्ये भाजप आणि मनपा अधिकाऱ्यांनी संगनमत करून फेरफार केल्याचा गंभीर आरोप काँग्रेस नेते संजय बालगुडे यांनी केला आहे. मतदारयाद्या जाहीर होण्यापूर्वीच मनपा कार्यालयांमध्ये भाजपचे कार्यकर्ते आणि अधिकारी बंद दाराआड याद्यांमध्ये बदल करत असल्याचे सीसीटीव्ही फुटेजमध्ये उघड झाल्याचे बालगुडे यांनी म्हटले आहे.बालगुडे यांनी पत्रकार परिषदेत सांगितले की, २० नोव्हेंबर रोजी प्रारूप मतदारयादी जाहीर होण्यापूर्वी काही दिवस आधीच महापालिकेच्या प्रत्येक क्षेत्रीय कार्यालयात भाजपचे काही लोक उपस्थित होते. संबंधित कार्यालयांचे सीसीटीव्ही फुटेज तपासले असता, मनपा अधिकारी आणि भाजपचे लोक बंद दाराआड मतदारयाद्या चाळत होते. प्रारूप यादी जाहीर होण्यापूर्वी २० ते २५ दिवस आधीच कोणत्या वॉर्डात कोणते मतदार टाकायचे, हे काम सुरू असल्याचे फुटेजमध्ये दिसत आहे.हा लोकशाहीची हत्या करणारा मोठा कट असून, निवडणूक आयोग भाजपच्या आदेशानुसार काम करत असल्याचा आरोप बालगुडे यांनी केला. सीसीटीव्ही फुटेजमध्ये भाजपचे लोक मनपा अधिकाऱ्यांना सूचना कशा देत आहेत, हे स्पष्ट दिसत आहे. सरकारी कार्यालयाचे दार लावून सलग साडेचार तास ही बैठक सुरू असल्याचेही त्यांनी नमूद केले.प्रत्येक मतदारसंघातून हजारो मतदार बदलण्याचे काम करण्यात आले आहे. हा मोठ्या प्रमाणात भ्रष्टाचार असून, लोकशाही प्रक्रियेवरील दरोडा आहे, असे बालगुडे म्हणाले. मतदारयाद्या पारदर्शक आणि प्रामाणिकपणे तयार होईपर्यंत मनपा निवडणुका घेऊ नयेत, अशी मागणी त्यांनी केली. तसेच, कडी लावून ठराविक लोक बसून याद्या बदलत असतील, तर यात काय काळेबेरे आहे, याची चौकशी झाली पाहिजे, असेही ते म्हणाले.या पत्रकार परिषदेला ॲड. असीम सरोदे, सामाजिक कार्यकर्ते विश्वंभर चौधरी आणि शिवसेना (उबाठा) शहराध्यक्ष गजानन थरकुडे उपस्थित होते. विश्वंभर चौधरी म्हणाले की, भाजप आणि निवडणूक आयोग यांच्यात युती झाली असून, भाजपचे लोक मनपा अधिकाऱ्यांना मतदारयादीतील बदल समजावून सांगतात, हे धक्कादायक आहे. प्रत्येक प्रभागात अशाप्रकारे बदल केले गेले असून, रहिवाशांचे ठिकाण बदलून त्यांना लांबच्या मतदारसंघात टाकले गेले आहे.शिवसेना (उबाठा) शहराध्यक्ष गजानन थरकुडे यांनी यावेळी बोलताना सांगितले की, मतदारयाद्यांचा घोळ निवडणुकीच्या शेवटच्या दिवसापर्यंत राहणार असल्याचे दिसून येत आहे.

पुणे- विश्रांतवाडी परिसरात अल्पवयीन तरुणीवर अत्याचार झाल्याची धक्कादायक घटना उघडकीस आली आहे. मुनाकिब नासिर अन्सारी असे आरोपीचे नाव असून त्याला पोलिसांनी ताब्यात घेतले आहे. चार डिसेंबर रोजी हा प्रकार घडला असून पीडित तरुणीच्या कुटुंबियांनी दिलेल्या तक्रारीनंतर पोलिसांनी कारवाई केली केला. या घटनेमुळे पुण्यात एकच खळबळ उडाली आहे.

मिळालेल्या माहितीनुसार, आरोपी मुनाकिब अन्सारी हा महाविद्यालयीन विद्यार्थी असून त्याची आणि पीडित मुलीची ओळख काही दिवसांपूर्वी एका बसस्टॉपवर झाली होती. चार डिसेंबर रोजी त्याने तिला “शाळेत सोडतो” असे सांगत विश्वासात घेतले आणि तिला आपल्या दुचाकीवर बसवले. मात्र शाळेत न नेत, आरोपी तिला एका खोलीत घेऊन गेला आणि तेथे जबरदस्तीने तिच्यावर अत्याचार केला.

अत्याचारानंतर पीडित तरुणीने कुटुंबीयांना सर्व प्रकार सांगितला. कुटुंबीयांनी तत्काळ विश्रांतवाडी पोलिस ठाण्यात धाव घेत तक्रार दाखल केली. तक्रार दाखल झाल्यानंतर पोलिसांनी अल्पावधीत तपास सुरू करून आरोपीचा शोध घेतला व त्याला अटक केली. या प्रकरणी विश्रांतवाडी पोलिसांनी आरोपीविरोधात संबंधित कलमांनुसार गुन्हा दाखल केला असून पुढील तपास सुरू आहे. या घटनेमुळे परिसरात चिंतेचे वातावरण निर्माण झाले असून महिलांच्या सुरक्षिततेबाबत पुन्हा एकदा प्रश्नचिन्ह निर्माण झाले आहे.