पुणे-केंद्रीय मंत्री मुरलीधर मोहोळ यांनी जैन बोर्डिंग भूखंड विक्री प्रकरणात आपल्यावर होणारे आरोप जोरकसपणे फेटाळून लावलेत. तसेच रवींद्र धंगेकर वगळता इतर कोणताही व्यक्ती माझ्यावर आरोप करत नसल्याचेही त्यांनी ठणकावून सांगितले आहे. जैन बोर्डिंग प्रकरणात माझ्यावर आरोप करणारा एकच माणूस आहे. कदाचित त्यांना चावी देणारा माणूस दुसरा कुणीतरी असेल, असे ते म्हणाले. पुण्यातील जैन बोर्डिंग वसतिगृहाची जागा शिवाजीनगर येथे आहे. ही जागा परस्पर हडप करून तिची विक्री करण्यात आल्याचा आरोप जैन समुदायाने केला आहे. या व्यवहाराशी संबंध असलेल्या गोखले कन्स्ट्रक्शन कंपनीचे भाजप खासदार मुरलीधर मोहोळ यांच्याशी संबंध असल्याचा आरोप केला जात आहे. उपमुख्यमंत्री एकनाथ शिंदे यांच्या नेतृत्वातील सत्ताधारी शिवसेनेचे नेते रवींद्र धंगेकर यांनी हा विषय लावून धरत मोहोळ यांच्यावर टीकेची झोड उठवली आहे. त्यांनी मोहोळ यांनी गोखले कन्स्ट्रक्शन कंपनीसाठी केलेली एक व्हिडिओ जाहिरातही पोस्ट केली आहे. या पार्श्वभूमीवर मुरलीधर मोहोळ यांनी पुढे येत या प्रकरणाचा आपल्याशी कोणताही संबंध नसल्याचा पुनरुच्चार केला आहे.

मुरलीधर मोहोळ गुरूवारी दुपारी पत्रकारांशी बोलताना म्हणाले, मी यापूर्वीच माझी बाजू स्पष्ट केली आहे. सध्या माझ्यावर आरोप करणारा माणूस एकच आहे. मी त्याच्यावर बोलणे सोडून दिले आहे. हा व्यक्ती उठसूठ माझ्यावर आरोप करतो. या लोकांमुळे शहराचे वातावरण दूषित होत आहे. त्यामुळे पत्रकारांनी प्रथम त्यांचे कागद तपासावेत. त्यानंतर त्यांच्या मुलाखती चालवाव्यात. मी वैफल्यग्रस्त माणसांकडून काहीही अपेक्षा करत नाही. मी पुन्हा त्यावर बोलणार नाही. ठाकरे गटाचे खासदार संजय राऊत यांनी रवींद्र धंगेकरांना भाजपचेच काही लोक रसद पुरवत असल्याचा आरोप केला आहे. पत्रकारांनी याविषयी मोहोळ यांना विचारणा केली. त्यावर ते म्हणाले, संजय राऊत रोज काहीतरी बोलत असतात. त्यांना किती सीरियस घ्यायचे हे ज्याचे त्याने ठरवायचे. मला पुन्हा – पुन्हा या प्रकरणात आपली बाजू स्पष्ट करण्याची गरज वाटत नाही. विशाल गोखले (गोखले कन्स्ट्रक्शन कंपनीचे सर्वेसर्वा) हा माझा मित्र होता, आहे व पुढेही राहील. त्यात बदल होणार नाही. पण त्यांनी (रवींद्र धंगेकर) 5 वर्षांपूर्वीचा एक व्हिडिओ काढून मी त्यांची जाहिरात करत असल्याचा आरोप केला. तुम्ही जैन बोर्डिंग प्रकरणातील सत्यता तपासा. पडताळून पाहा. तुम्हाला वस्तुस्थिती लक्षात येईल. पण आत्ता त्यांचाही एक व्हिडिओ समोर आला आीहे. मग त्यांच्यावरही ते त्या व्यवसायात पार्टनर असल्याचा आरोप करावा का? मला असे वाटते की, आपण त्यात पडू नये. या शहराचे नाव खराब होऊ नये. कारण, या शहराची एक राजकीय संस्कृती आहे. कुठेतरी एक माणूस या राजकीय संस्कृतीची वाट लावत आहे. या प्रकरणी सर्वांनी सावध राहण्याची गरज आहे. मोहोळ पुढे म्हणाले, बाणेर, बालेवाडीतील काही शेतकरी 5 वर्षांपूर्वी माझ्याकडे आले होते. त्यांनी माझ्याकडे या बिल्डरने खोटी मोजणी करून प्लॅन मंजूर केल्याची तक्रार केली होती. त्यानंतर मी त्याची माहिती काढली. तेव्हा प्रशासनाने त्यापूर्वीच त्याला स्टे दिल्याचे निष्पन्न झाले. हे काम महापालिकेचे आहे. आज मी महापालिकेत नाही. मी महापालिका सोडून 5 वर्षे झाली. त्यानंतर 3 वर्षे मी लोकप्रतिनिधीही नव्हतो. त्यानंतर वर्ष दीड वर्षांनी मी पुन्हा लोकप्रतिनिधी झालो. या प्रकरणाचे उत्तर महापालिका प्रशासन देईल. पण कुणीही उठायचे आणि काहीही आरोप करायचे हे बरोबर नाही. कदाचित यामागे चावी देणारे दुसरे कुणीतरी असेल. मी त्याकडे लक्ष देत नाही, असे ते म्हणाले. स्थानिकच्या निवडणुकीत वरिष्ठ जे सांगतील तेच होईल मुरलीधर मोहोळ यांनी पुण्यातील स्थानिक स्वराज्य संस्थांच्या निवडणुकीत वरिष्ठांनी सांगितलेल्या सूचनांचे पालन होणार असल्याचेही स्पष्ट केले. ते म्हणाले, आमची राज्यपातळीवर महायुती आहे. आम्ही अजित पवारांची राष्ट्रवादी, एकनाथ शिंदेंची शिवसेना सर्वजण एकत्र आहोत. स्थानिक स्वराज्य संस्थांच्या निवडणुकीत आमचे नेते जो आदेश देतील त्याचे पालन आम्ही करू. काही ठिकाणी स्थानिक पातळीवर निर्णय घ्यावे लागतील. उद्या पुण्यातही स्थानिक पातळीवर निर्णय घेण्याचा विचार आला तर आमच्या कोर्टात बॉल येईल. पण आता तरी राज्याचे नेते सांगतील तेच त्यामध्ये होईल.

धंगेकरांच्यामागे भाजप सरकारमधील बडा नेता:

लक्षात ठेवा, आमच्या शिवसेनेचा पराभव म्हणजे मराठी माणसाचा पराभव-

मुंबई-मुंबईतून मराठी माणसाला हद्दपार करण्यासाठी महायुतीचे तिघे एकत्र आले आहेत. या सर्वांचे लक्ष मुंबई आहे. बाकी इतरत्र ते एकत्र नाही. मुंबईत शिवसेनेचा पराभव घडवणे म्हणजे मराठी माणसाचा पराभव घडवणे त्याविषयी त्यांचे एकमत आहे. बाळासाहेबांचा मुंबई मनपा वरील भगवा काढण्यासाठी हे तिघे एकत्र आहेत, इतर ठिकाणी ते एकत्र नाहीत, असा हल्लाबोल ठाकरे गटाचे खासदार संजय राऊत यांनी केला आहे.संजय राऊत म्हणाले की,पुण्यात भाजपमध्ये अंतर्गत संघर्ष ठिकठिकाणी उफाळून आला आहे.मोहोळ विरुद्ध धंगेकर असे नसून भाजपमधील एक गट मोहोळाविरोधात आहे. धंगेकर हा मोहरा आहे, त्यांच्या मागे असणारे त्यांच्याच सरकारमध्ये बसलेले आहेत.

संजय राऊत म्हणाले की, अमित शहा आणि त्यांच्या बेनामी कंपन्या हे मुंबई अदानींना देण्यासाठी सज्ज झाले आहेत. 2029 पर्यत नरेंद्र मोदी हे पंतप्रधान राहतील का? 2029 पर्यत मोदी प्रधानमंत्री पदी राहु शकले तरच महाराष्ट्रात देवेंद्र फडणवीस मुख्यमंत्री राहू शकतील. केंद्रात भाजपमध्ये मोठ्या घडामोडी घडण्याची शक्यता आहे. राजकारणात बहुमत हे चंचल असते. महाराष्ट्रातील बहुमत हे खूप चंचल आहे. देवेंद्र फडणवीसांना अजित पवार, एकनाथ शिंदेंचा गट फोडायचा आहे. त्यांना स्वयंभू राजकारण करायचे आहे. येणाऱ्या काळात दिल्ली अस्थिर होणार आहे. फडणवीस शिंदेंचा बंदोबस्त करण्यास सक्षम आहे.

संजय राऊत म्हणाले की, काँग्रेस पक्ष हा इंडिया आणि महा विकास आघाडीतील मित्रपक्ष आहे. या दोन्ही आघाड्या या एकाच पक्षामुळे अस्तित्वात नाही. काँग्रेससोबत आमच्यासारखे अनेक पक्ष आहेत म्हणून महा विकास आघाडी आणि इंडिया आघाडी निर्माण झाली आहे. स्थानिक स्वराज्य संस्थांच्या निवडणुकीसाठी जर कुणी वेगळी भूमिका घेतली असेल तर तो त्यांचा प्रश्न आहे. पण आम्ही आमच्याकडून आमच्या मित्रपक्षांना आणि सहकाऱ्यांना अडचणीत आणणारे कोणतेही विधान करणार नाही. राज ठाकरे हे मनसेप्रमुख आहेत त्यांचा स्वतंत्र पक्ष आहे. त्यांच्यामुळे जर कुणी ही भूमिका घेत असेल तर तोही त्यांचा प्रश्न आहे. आम्हाला भाजपचा पराभव करायचा आहे. आम्हाला मुंबई अदानींच्या धशात जाऊ द्यायची नाही ती वाचवायची आहे. या मुंबईसाठी संयुक्त महाराष्ट्र समिती स्थापन झाली होती. त्यामध्ये अशा प्रकारे सर्व पक्ष एकत्र आले होते. हा इतिहास काँग्रेसच्या नेत्यांनी समजून घेणं गरजेचे आहे. मुंबईसाठी सर्व मतभेद विसरत सर्व पक्ष एकत्र आले होते, त्या प्रमाणे पुन्हा एकदा तसे वातावरण निर्माण झाले आहे. बिहारमध्ये राज ठाकरे आहे का? तिथे राजद आणि काँग्रेसमध्ये वाद सुरू आहेत. हे ही नको ते ही नको असे वाक्य एक दिवसाच्या प्रसिद्धीसाठी असतात असे म्हणत राऊतांनी भाई जगताप यांना टोला लगावला आहे. मुंबई महाराष्ट्राची राजधानी आहे ती मराठी माणसाच्या हातात राहिली पाहिजे त्यासाठी काँग्रेसमधील मराठी नेतृत्वाने मुंबईवरील संकटाचा गांभीर्याने विचार केला पाहिजे. आम्हाला बोलायचे असेल तर आम्ही काँग्रेसच्या वरिष्ठ नेत्यांशी चर्चा करू. लोकशाही वाचवण्यासाठी ही लढाई आहे हे काँग्रेसने समजून घेतले पाहिजे.

संजय राऊत म्हणाले की, आम्हाला काँग्रेसचा प्रधानमंत्रीच करायचा होता. पण नाही होऊ शकला ना? आम्ही इंडिया आघाडी केली कारण आम्हाला राहुल गांधी यांना पंतप्रधान करायचे होते. आम्ही कधी असे म्हंटलो नाही की शिवसेनेचा किंवा इतर पक्षाचा पंतप्रधान करायचा आहे. काँग्रेस दिल्लीतील सर्वात मोठा पक्ष आहेच, त्यामुळे आमचे मन फार मोठे आहे, आम्हाला राहुल गांधी यांनाच पंतप्रधान करायचे आहे. तुम्ही मुंबई महापौरांचे काय घेऊन बसलात.27 मनपामध्ये तुम्ही काँग्रेसचे महापौर करा. भाजपला रोखणे आणि मराठी महापौर होणे याला आम्ही प्राधान्य देत आहोत. यापूर्वी 30 वर्षे मुंबईमध्ये शिवसेनेचा महापौर आहे त्यांचे श्रेय शिवसेनेला द्यावे लागेल यात एकदा काँग्रेसने आम्हाला मदत केली हे देखील विसरता येणार नाही. त्यामुळे मुंबईतील काँग्रेसचे नेते काय बोलतात हे महत्त्वाचे नाही. आतापर्यंत काँग्रेस आमच्यासोबत पूर्णपणे सामील झालेला आहे. वेगळा होण्याचा काही मुद्दा चर्चेला गेलेला नाही. समाजवादी पार्टीला त्यांची फार ताकद आहे असे वाटत असेल किंवा भाजपला मदत करण्याची त्यांची इच्छा असेल पण जनता आमच्यासोबत आहे.

पुण्यात फुटणार होते सुमारे २५ नगरसेवक,ते फुटू नये म्हणून स्वबळावर …

मुंबई- राज्यात स्थानिक स्वराज्य संस्थांच्या निवडणुकांचे बिगूल वाजण्यापूर्वीच पुण्यासारख्या शहरात नेत्यांच्या विरोधात असलेल्या वातावरणामुळे सुमारे २५ नगरसेवक कॉंग्रेसच्या वाटेवर असल्याची माहिती समोर येत असल्याच्या पार्श्वभूमीवर मुख्यमंत्री देवेंद्र फडणवीस यांनी आगामी महापालिका निवडणुकांबाबत भाजपची भूमिका स्पष्ट केली आहे. फडणवीस यांनी मोजक्या पत्रकारांना दिलेल्या माहितीनुसार, भाजप मुंबई वगळता इतर प्रमुख महापालिकांमध्ये स्वबळावर निवडणूक लढवणार आहे. यामध्ये ठाणे, पुणे आणि पिंपरी-चिंचवडसारख्या महत्त्वाच्या शहरांचा समावेश आहे.देवेंद्र फडणवीस म्हणाले, जिथे महायुतीतील मित्रपक्ष एकमेकांचे स्पर्धक आहेत, तिथे आम्ही वेगळे लढू. मात्र, मुंबईत कोणत्याही परिस्थितीत महायुती म्हणूनच निवडणूक लढवली जाईल. “मुंबई वगळता इतर महापालिकेत भाजप स्वबळावर लढेल. निकालानंतर काय करायचे ते ठरवू. मुंबईत एकत्र, पण राज्यात म्हणजेच इतर महापालिकांमध्ये वेगळे लढून निकालानंतर एकत्र येऊ.दरम्यान ठाणे महापालिकेत शिंदे गटाची ताकद मोठी आहे तिथे भाजपा नेमकी काय भूमिका कशा पद्धतीने राबविणार याकडे लक्ष लागून राहणार आहे .

गेल्या काही दिवसांपासून राज ठाकरे आणि उद्धव ठाकरे यांच्यातील जवळीक वाढल्याच्या चर्चा आहेत. हे दोन्ही बंधू एकत्रित निवडणुकीला सामोरे जाण्याची शक्यता वर्तवली जात आहे. त्यामुळे कुठलीही जोखीम न घेता, मुंबई महापालिकेत महायुती म्हणून एकत्र लढण्याचा भाजपचा विचार आहे. फडणवीस यांनी यावेळी मुंबई महापालिकेवर युतीचाच महापौर असेल, असा विश्वास व्यक्त केला.मतदार याद्यांवरून टीका करणाऱ्या विरोधी पक्षांना त्यांच्याच पद्धतीने उत्तर देण्यात येणार असल्याचे फडणवीस यांनी सांगितले. तसेच, लोकसभा निवडणुकीत महाविकास आघाडीला कसा फायदा झाला, याचे पुरावे देणार असल्याचेही त्यांनी म्हटले.

दरम्यान, फडणवीस दिल्लीत जाणार असल्याची चर्चा गेल्या काही महिन्यांपासून सुरू आहे. यावरही त्यांनी यावेळी स्पष्ट भाष्य केले. “सध्या तरी मी वर्षावरच राहणार आहे. दिल्लीत जाण्याबाबत 2029 नंतर बघू,” असे विधान मुख्यमंत्री देवेंद्र फडणवीस यांनी केले.दुसरीकडे, ठाणे महापालिका निवडणुकीत भाजपसोबत युती करायची की नाही, याबाबतचा अंतिम निर्णय घेण्याचे सर्व अधिकार उपमुख्यमंत्री एकनाथ शिंदे यांना देण्यात आले आहेत. ठाण्यात शिवसेना शिंदे गटाचे मोठे वर्चस्व असल्याने युती झाल्यास संभाव्य राजकीय नुकसानीची शक्यता लक्षात घेऊन हा महत्त्वाचा निर्णय घेण्यात आल्याचे सूत्रांनी सांगितले आहे.

ठाणे हा एकनाथ शिंदेंचा बालेकिल्ला म्हणून ओळखला जातो. शिवसेनेच्या फुटीनंतरही एका नगरसेवकाचा अपवाद वगळता सर्व नगरसेवक शिंदे यांच्यासोबत कायम राहिले आहेत. त्यामुळे ठाणे महापालिकेत शिंदे गटाची ताकद मोठी आहे. सूत्रांच्या माहितीनुसार, जर महायुतीअंतर्गत निवडणूक लढवली गेली, तर काही जागा भाजपसाठी सोडाव्या लागतील. याचा थेट फटका एकनाथ शिंदे यांच्या शिवसेनेला बसण्याची शक्यता आहे. कारण, शिंदे यांच्यासोबतच्या आजी-माजी नगरसेवकांनी आपापल्या प्रभागात तयारी सुरू केली आहे. जागावाटपात त्यांची जागा भाजपकडे गेल्यास, या इच्छुकांच्या मनात नाराजी निर्माण होऊ शकते.

या नाराजीतून उमेदवारी न मिळालेले अनेक इच्छुक नगरसेवक पुन्हा उद्धव ठाकरे यांच्या ठाकरे गटाकडे परत जाण्याची शक्यता वर्तवली जात आहे. ही राजकीय जोखीम टाळण्यासाठी आणि ठाण्यातील आपले वर्चस्व टिकवून ठेवण्यासाठी, युती आणि जागावाटपाचा निर्णय पूर्णपणे एकनाथ शिंदे यांनीच घ्यावा, असा महत्त्वपूर्ण निर्णय महायुतीत झाल्याची माहिती आहे.

मुंबई-अभिनेते महेश कोठारे यांनी आपल्या सुनेला अपघात प्रकरणातून वाचवण्यासाठी भाजप व पंतप्रधान नरेंद्र मोदी यांची स्तुती केल्याचा दावा शिवसेना उद्धव बाळासाहेब ठाकरे पक्षाच्या नेत्या किशोरी पेडणेकर यांनी केला आहे. त्यांच्या या आरोपामुळे महेश कोठारे यांच्या भाजप प्रेमाला वेगळे वळण लागण्याची शक्यता आहे.महेश कोठारे यांनी आपण पंतप्रधान नरेंद्र मोदी व भाजपचा भक्त असल्याचे स्पष्ट् केले आहे. तेव्हापासून ते ठाकरे गटाच्या रडारवर आहेत. खासदार संजय राऊत यांनी कालच या प्रकरणी त्यांना तात्या विंचू रात्री तुमचा गळा आवळेल असा टोला हाणला होता. त्यानंतर आता किशोरी पेडणेकर यांनी त्यांच्यावर हल्ला चढवत स्वतःच्या सुनेला अपघात प्रकरणातून वाचवण्यासाठी त्यांना भाजप प्रेमाचे भरते आल्याचा दावा केला आहे. किशोरी पेडणेकर म्हणाल्या, अभिनेते महेश कोठारे यांची सून उर्मिला कोठारे ही एका अपघात प्रकरणात अडकली आहे. तिला त्या प्रकरणातून बाहेर काढण्यासाठीच महेश कोठारे यांनी भाजपची स्तुती केली आहे.

त्या पुढे म्हणाल्या, महेश कोठारे एक कलाकार आहेत. ही खरी गोष्ट आहे. पण त्यांच्या सुनबाई एका अपघात प्रकरणात अडकल्यात. तिला कसे वाचवायचे? हा प्रश्न त्यांच्यापुढे आहे. भाजपवर अशी मुक्ताफळे उधळल्याशिवाय ही गोष्ट साध्य होणार नाही हे त्यांना ठावूक आहे. महाराष्ट्रात एक वेगळीच संस्कृती तयार होत आहे. मी या प्रकरणी नाव घेऊन कोणत्याही जातीचा अपमान करणार नाही. पण छत्रपती शिवाजी महाराजांच्या काळापासून ज्या संस्कृतीने संपूर्ण महाराष्ट्रावर शौर्य दाखवले, त्यासोबतच क्रौर्यही दाखवले, असे त्या म्हणाल्या.

उर्मिला कोठारे यांच्या कारचा गेल्यावर्षी डिसेंबर महिन्यात भीषण अपघात झाला होता. त्यात एक मजूर ठार झाला होता. यासंबंधीच्या माहितीनुसार, ठाणे ते घोडबंदर रस्त्यावर गत डिसेंबर महिन्यात मध्यरात्री 12.54 च्या सुमारास हा अपघात घडला होता. त्यावेळी उर्मिला कोठारे आपल्या मैत्रिणीला भेटून तिच्या घरी जात होती. तिचा चालक गजानन पाल हा कार चालवत होता. कांदिवाली पोईसर मेट्रो स्थानकालगत चालकाचे कारवरील नियंत्रण सुटले आणि कार उलटली. तत्पूर्वी, तिने मेट्रो स्थानकालगत काम करणाऱ्या दोन मजुरांना उडवले होते. त्यापैकी सम्राटदास जितेंद्र नामक मजूर ठार झाला होता.

या अपघातात उर्मिला कोठारेही जखमी झाली होती. तिला उपचारासाठी रुग्णालयात दाखल करण्यात आले होते. पोलिसांनी याप्रकरणी गुन्हा दाखल करून कार चालकाच्या रक्ताचे नमुणे घेतले होते. पण त्याने कार चालवताना मद्यपान केले होते का? हे अजून स्पष्ट झाले नाही. या प्रकरणाचा तपास अद्याप पोलिसांकडून सुरू आहे.

महेश कोठारे यांनी भाजपच्या मागाठाणे येथील दिवाळी पहाट कार्यक्रमात बोलताना भाजप व पंतप्रधान नरेंद्र मोदी यांची मुक्तकंठाने प्रशंसा केली होती. ते मी मोदी भक्त असल्याचे म्हणाले होते. तसेच मुंबईचा महापौर भाजपचाच होणार असल्याचा दावाही त्यांनी केला होता. भाजप म्हणजे आपले घर आहे. कारण मी स्वतः भाजपचा भक्त आहे. पंतप्रधान नरेंद्र मोदी यांचा भक्त आहे. आपल्याला इथून नगरसेवक निवडून द्यायचा आहे.विशेषतः यावेळचा महापौरही येथूनच निवडून गेलेला असेल. मुंबईत नक्कीच कमळ फुलेल. मी पियुष गोयल यांच्या प्रचारासाठी आलो होतो. तेव्हा मी म्हणालो होतो की, तुम्ही खासदार नव्हे तर मंत्री निवडून देत आहात. आताही या विभागातून नगरसेवक नव्हे तर महापौर निवडला जाईल, असे महेश कोठारे म्हणाले होते. त्यांच्या या विधानाची मराठी सिनेसृष्टीसह राजकारणात खमंग चर्चा रंगली असताना त्यांनी आपण आपल्या विधानावर ठाम असल्याचा पुनरुच्चारही केला आहे.

मुंबई-आगामी मुंबई महानगरपालिका निवडणुकीच्या पार्श्वभूमीवर काँग्रेस पक्षात मोठ्या हालचाली सुरू झाल्या आहेत. युतीबाबतचे तर्क-वितर्क सुरू असतानाच काँग्रेसचे ज्येठ नेते आणि माजी मुंबई काँग्रेस अध्यक्ष भाई जगताप यांनी स्पष्टपणे जाहीर केले आहे की, काँग्रेस पक्ष ठाकरे बंधूंसोबत, म्हणजेच उद्धव ठाकरे आणि राज ठाकरे, या दोघांच्या पक्षांसोबत युती करणार नाही. मी मुंबई काँग्रेसचा अध्यक्ष असताना हीच भूमिका स्पष्ट केली होती आणि आजही त्यात बदल नाही, असे ठामपणे सांगत जगताप यांनी पक्षातील कार्यकर्त्यांचा आवाज मांडला आहे. त्यामुळे महानगरपालिकेच्या रणांगणात काँग्रेस स्वतंत्रपणे उतरू शकते, अशी शक्यता अधिक बळावली आहे.

भाई जगताप यांनी पत्रकारांशी बोलताना सांगितले की, मुंबई महानगरपालिकेची निवडणूक ही स्थानिक कार्यकर्त्यांची असते, नेत्यांची नाही. गेल्या अनेक वर्षांपासून काँग्रेसचा झेंडा खांद्यावर घेऊन काम करणाऱ्या कार्यकर्त्यांची इच्छा असते की, त्यांनी देखील कधीतरी निवडणूक लढवावी. त्यामुळे या निवडणुका कार्यकर्त्यांना लढू द्या, त्यांना निर्णय घेऊ द्या. आम्ही मुंबईतील स्थानिक आहोत, त्यामुळे आम्ही स्वबळावर लढूया, हीच आमची भूमिका आहे.

त्यांनी पुढे सांगितले की, राजकीय कामकाज समितीच्या बैठकीतही त्यांनी रमेश चेन्निथला यांच्यासमोर हीच भूमिका स्पष्ट मांडली आहे. राज ठाकरे तर दूरच, पण आम्ही उद्धव ठाकरेंसोबतही लढणार नाही, असे वक्तव्य त्यांनी करून काँग्रेसच्या रणनीतीवर नवीन चित्र निर्माण केले आहे.

दरम्यान, भाई जगताप यांनी उद्धव ठाकरेंसोबतची परिस्थिती स्पष्ट करताना म्हटले की, महाविकास आघाडीत शिवसेना एकटी नव्हती. उद्धव ठाकरे मविआत आले तेव्हा त्यांची शिवसेना होती, पण आता दोन शिवसेना झाल्या आहेत. त्यामुळे युतीबाबतचा निर्णय स्थानिक कार्यकर्त्यांनी घ्यावा. त्यांनी आणखी स्पष्ट केले की, काँग्रेसने आजवर कधीही राज ठाकरेंसोबत जाण्याचा विचार केलेला नाही. उद्धव ठाकरेंसोबत देखील स्थानिक कार्यकर्त्यांची तयारी नाही. त्यामुळे मुंबई महानगरपालिकेत काँग्रेसने स्वबळावर लढले पाहिजे. भाई जगताप यांच्या या विधानाने काँग्रेसच्या भविष्यातील धोरणाबाबत नवी दिशा सुचवली आहे.

या पार्श्वभूमीवर काँग्रेसच्या मिडिया सेलचे प्रमुख सचिन सावंत यांनीदेखील पक्षाची भूमिका स्पष्ट केली आहे. मनसेसोबत आमचे मुलभूत मतभेद आहेत आणि त्याबाबत कोणतीही शंका नाही. आमची बैठक चेन्निथला यांच्यासोबत झाली, त्यावेळी आम्ही आमची मते स्पष्टपणे मांडली. स्थानिक स्वराज्य संस्थांच्या निवडणुकीत स्थानिक नेत्यांच्या सल्ल्यानुसारच निर्णय घेतले जातात. काँग्रेस हायकमांड सर्व नेत्यांशी चर्चा करून अंतिम निर्णय घेईल, असे सावंत यांनी सांगितले. यावरून हे स्पष्ट झाले आहे की, काँग्रेस सध्या कोणत्याही युतीच्या दबावाखाली न येता, स्थानिक पातळीवर कार्यकर्त्यांच्या इच्छेनुसार पुढे जाण्याच्या तयारीत आहे.