मुळशीतील ४५ कुटुंबांना फराळ, कपडे आणि शैक्षणिक साहित्याचे वाटप  

 पुणे ः दिवाळीचा फराळ, आकाशकंदील आणि फटाक्यांची आतषबाजी यांचा आनंद कधी फक्त दूरून पाहणाऱ्या कातकरी वस्तीत यंदा खऱ्या अर्थाने प्रकाश उतरला. शहरातील तरुणांच्या पुढाकारामुळे डोंगरदऱ्यांमधील या पाड्यावरही दिवाळीचा आनंद झळाळून उठला. पुण्यापासून अवघ्या काही अंतरावर असलेल्या कातकरी समाजातील शेतमजूर दिवाळीनिमित्त आयोजित आनंदोत्सवात सहभागी झाले होते.

गुरुवार पेठेतील वीर शिवराय तरुण मंडळ, येरवड्यातील नवज्योत मित्र मंडळ आणि अरण्येश्वर एकता मित्र मंडळ यांच्या संयुक्त विद्यमाने या कार्यक्रमाचे आयोजन करण्यात आले. जय गणेश व्यासपीठाअंतर्गत मुळशी तालुक्यातील कळमशेत भागातील कातकरी पाड्यावरील ४५ कुटुंबांना दिवाळी फराळ, आकाशकंदील, पणत्या, रांगोळी, नवीन कपडे तसेच वह्या-पुस्तके आदी साहित्य देण्यात आले. या वेळी मंडळाचे किरण सोनिवाल, मोहित झांजले, चैतन्य सिन्नरकर, अमित जाधव, सुधीर ढमाले, रवी जाधव, पीयूष शहा आणि मयूर सोनावणे उपस्थित होते.

किरण सोनिवाल म्हणाले, डोंगरदऱ्यांतील या कातकरी कुटुंबांच्या चेहऱ्यावरचा आनंद पाहून आमची दिवाळीही प्रकाशमान झाली. त्यांच्यासोबत सण साजरा करण्याचा आनंद शब्दात मावणार नाही. प्रत्येकाने आपल्या आनंदाचा थोडा वाटा समाजातील दुर्बल घटकांपर्यंत पोहोचवावा, हीच खरी दिवाळी. जय गणेश व्यासपीठांतर्गत दरवर्षी वंचितांना मदत करून दिवाळी साजरी केली जाते असेही त्यांनी सांगितले. 

केंद्रीय नागरी उड्डाण मंत्री मुरलीधर मोहोळ यांनी केली होती कठोर कारवाईची मागणी

कोथरूडमधील अभियंता मारहाण प्रकरणात पोलिसांना यश
पुणे – कुख्यात गजा मारणे टोळीचा मुख्य सदस्य रुपेश मारणे याला अखेर कोथरूड पोलिसांनी अटक केली आहे. फेब्रुवारी महिन्यात शिवजयंतीदिनी कोथरूड परिसरात भाजपा कार्यकर्ते असलेले अभियंता देवेंद्र जोग यांना बेदम मारहाण करून तो नऊ महिन्यांपासून फरार होता. मुळशी तालुक्यातील आंदगाव येथून गुप्त माहितीच्या आधारे त्याला जेरबंद करण्यात आले.ही घटना १९ फेब्रुवारी २०२५ रोजी घडली होती. शिवजयंतीनिमित्त कोथरूडमध्ये काढण्यात आलेल्या मिरवणुकीदरम्यान दुचाकीस्वार संगणक अभियंता देवेंद्र जोग यांना मिरवणुकीतून दुचाकी काढण्याचा प्रयत्न करताना वाद झाला. या वादातून रुपेश मारणे आणि त्याच्या साथीदारांनी जोग यांना बेदम मारहाण केली होती.

देवेंद्र जोग हे भारतीय जनता पक्षाचे (भाजप) कार्यकर्ते असल्याने या घटनेने राजकीय वर्तुळात खळबळ उडाली होती. केंद्रीय नागरी उड्डाण मंत्री मुरलीधर मोहोळ यांनी या घटनेवर तीव्र संताप व्यक्त करत आरोपींविरुद्ध कठोर कारवाईची मागणी केली होती. घटनेनंतर कोथरूड पोलिसांनी गुन्हा दाखल करून रुपेशच्या तीन साथीदारांना ताब्यात घेतले होते, मात्र रुपेश फरार झाला होता.रुपेश मारणे हा गजा मारणे टोळीचा निकटवर्तीय असून, गजा मारणे तुरुंगात असल्याने टोळीची सर्व सूत्रे तोच हलवत असल्याची माहिती पोलिस तपासात उघड झाली आहे. त्याच्यावर पुणे शहरातील विविध पोलीस ठाण्यांत मारहाण, खंडणी, खून, खुनाचा प्रयत्न, दहशत निर्माण करणे आदी गंभीर स्वरूपाचे एकूण २० गुन्हे दाखल आहेत, अशी माहिती पुणे पोलिसांच्या उपायुक्त (झोन-२) संभाजी कदम यांनी दिली.

फरारी रुपेश पोलिसांना सतत चकमा देत ठिकाण बदलत होता. त्याच्या अटकेसाठी कोथरूड पोलिसांनी शहरासह ग्रामीण भागात अनेक ठिकाणी सापळे रचले होते. मात्र, त्याचा ठावठिकाणा लागत नव्हता. अखेर गुप्त बातमीदाराच्या माहितीवरून मुळशी तालुक्यातील आंदगाव परिसरात धाड टाकत पोलिसांनी त्याला ताब्यात घेतले.

अटकेनंतर रुपेशकडून टोळीच्या इतर गुन्ह्यांबाबत माहिती मिळण्याची शक्यता आहे. कोथरूड पोलिस ठाण्यात त्याच्याविरुद्ध आणखी गुन्हे दाखल असून, पुढील तपास सुरू आहे. या अटकेमुळे मारणे टोळीच्या कारवायांना लगाम बसणार असल्याचा विश्वास पोलिसांनी व्यक्त केला आहे. शहरातील गुंडगिरीला आळा घालण्यासाठी पोलिसांची कारवाई सुरूच राहणार असल्याचे उपायुक्त कदम यांनी सांगितले.

पुणे-धनकवडीत दोन गटात एकमेकांकडे पाहण्यावरुन जोरदार धुमचक्री उडाली असून त्यात एका गटाने तरुणाच्या डोक्यात हत्याराने वार करुन जिवे ठार मारण्याचा प्रयत्न केला. पोलिसांनी खुनाचा प्रयत्न केल्याचा गुन्हा दाखल केला. त्याविरोधात दिलेल्या फिर्यादीत चौघांवर दुखापतीचा गुन्हा दाखल केला आहे.

याबाबत अविनाश महादेव घोडके (वय ३९, रा. ठाकर गिरणीसमोर, शंकर महाराज वसाहत, धनकवडी) यांनी सहकारनगर पोलीस ठाण्यात फिर्याद दिली आहे. त्यावरुन पोलिसांनी विकी बाळासो कांबळे (वय २५,रा. शंकर महाराज वसाहत, धनकवडी) याला अटक केली आहे. विशाल बाळासो कांबळे (वय २७) याच्यावर खुनाचा प्रयत्न केल्याचा गुन्हा दाखल केला आहे. ही घटना धनकवडी येथील ठाकर गिरणीसमोर २४ ऑक्टोंबर रोजी रात्री ९ वाजता घडली.याबाबत पोलिसांनी दिलेल्या माहितीनुसार, फिर्यादीचे नातेवाईक अभिषेक नरसिंगे यांचे विकी कांबळे याच्याशी शाब्दिक बाचाबाची होत असल्याचे अविनाश घोडके यांना दिसले. त्यांनी विकी कांबळे याला याबाबत विचारले असता, त्याने घोडके यांना तुला बघुन घेतो, अशी धमकी दिली. घरी जाऊन भाऊ विशाल याला घेऊन आला. विकी याने हातातील कोयत्याने घोडके यांच्या डोक्यात, डाव्या कानावर वार केले. विशाल याने पायाच्या नडघीवर वार करुन त्यांना जिवे ठार मारण्याचा प्रयत्न केला. सहायक पोलीस निरीक्षक रुपेश जाधव तपास करीत आहेत.

त्याविरोधात विकास ऊर्फ विकी बाळासो कांबळे याने सहकारनगर पोलीस ठाण्यात फिर्याद दिली आहे. त्यावरुन पोलिसांनी अविनाश महादेव घोडके (वय ३९), ओमकार दीपक घोडके (वय २१), अविनाश घोडके यांची मेव्हणी (वय ३५) व मेव्हणीचा मुलगा अशा चौघांवर गुन्हा दाखल केला आहे. अविनाश घोडके यांच्या मेव्हणीचा मुलगा हा विकी कांबळेकडे रागाने पहात असल्याने त्यास रागात पाहण्याचे कारण विचारले. तेव्हा अविनाश घोडके याने विकीला शिवीगाळ करुन धमकी दिली. डोक्यात, कपाळावर लोखंडी प्लेटने मारुन जखमी केले. ओमकार घोडके याने पाठीत दांडक्याने मारहाण करुन जखमी केले. पोलीस हवालदार धोत्रे तपास करीत आहेत.

भटकी कुत्री चावली तर महापालिकेच्या आरोग्यप्रमुखांवर गुन्हा दाखल होऊ शकेल..

पुणे:शिवाजीनगर गावठाण परिसरातील समग्र युवक क्रांती मंडळाजवळ एका तरुणाला ‘पीटबुल’ जातीच्या श्वानाने चावा घेतला. श्वानाने तरुणाच्या पोटरीचा चावा घेतल्याने त्याला गंभीर जखम झाली. या घटनेनंतर तरुणाने शिवाजीनगर पोलीस ठाण्यात फिर्याद दिली असून, श्वान मालकाविरुद्ध गुन्हा दाखल करण्यात आला आहे. फिर्यादीनुसार, श्वान मालकाने आक्रमक स्वभावाच्या ‘पीटबुल’ श्वानाला साखळी न बांधता रस्त्यावर मोकळे सोडले होते. पोलीस उपनिरीक्षक जगताप या प्रकरणाचा अधिक तपास करत आहेत.

दुसरी घटना खडकीतील रेंजहिल्स भागात घडली. किरकोळ वादातून एका श्वान मालकाने त्याचे पाळीव श्वान एका तरुणाच्या अंगावर सोडले. या श्वानाने चावा घेतल्याने तरुण जखमी झाला. याबाबत तरुणाने खडकी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, आरोपी त्याच्या पाळीव श्वानासह थांबला असताना त्याने तक्रारदार तरुणाच्या गाडीच्या दिशेने दगड भिरकावला. तक्रारदार खाली उतरून विचारणा करत असताना आरोपीने श्वान त्यांच्या अंगावर सोडले. पोलीस उपनिरीक्षक एन. शेख या घटनेचा तपास करत आहेत.

छट मातेचे व्रत आस्था, विश्वास, त्यागाचे प्रतीक – महंत श्री राजुदास महाराज

श्री विश्व श्रीराम सेनेच्या वतीने मोशी येथे छट पूजेचे भव्य आयोजन

पुणे, (दि. २७ ऑक्टोबर २०२५) छत्रपती शिवाजी महाराजांच्या शौर्याने, विश्वाला शांती आणि संयमाचा मार्ग दाखवणारे ज्ञानेश्वर माऊली, वृक्षवल्ली आम्हा सोयरे असा संदेश देणारे जगद्गुरु संत तुकाराम महाराज यांच्या पदस्पर्शाने पावन झालेल्या या पवित्र इंद्रायणी मातेच्या तीरावर सर्वांनी संकल्प करावा की, सर्वांना सामावून घेणारा एकमेव धर्म म्हणजे सनातन धर्म आहे. याची पताका जगात उंचावण्यासाठी आणि भारत देश हिंदू राष्ट्र होण्यासाठी सर्वांनी समर्पण भावनेने योगदान द्यावे असे आवाहन अयोध्या येथील सिद्धपीठ हनुमान गढीचे महंत श्री श्री १००८ श्री राजुदास महाराज यांनी केले.
उत्तर भारतात आणि विशेषतः बिहार मध्ये सूर्याची उपासना करून छटपुजेचे व्रत मोठ्या भक्तीभावाने केले जाते. सर्व मनोकामना पूर्ण करणारे हे व्रत आस्था, प्रेम, विश्वास, त्याग आणि पर्यावरण प्रति समर्पणाची भावना आहे अशी सनातन काळापासूनची धारणा आहे असेही महंत श्री राजुदास महाराज यांनी सांगितले.
गतवर्षी प्रमाणे या वर्षी देखील श्री विश्व श्रीराम सेनेच्या वतीने संस्थापक डॉ. लालबाबू अंबिकालाल गुप्ता यांच्या वतीने मोशी येथे इंद्रायणी नदीच्या घाटावर सोमवारी छटपूजा श्री सूर्यषष्ठी महोत्सवाचे भव्य आयोजन करण्यात आले होते.
यावेळी पारंपरिक पद्धतीने महंत श्री राजुदास महाराज यांच्या हस्ते इंद्रायणी मातेचे पूजन करण्यात आले. यानंतर गंगा आरती करण्यात आली.
यावेळी आमदार महेश लांडगे, विश्व हिंदू परिषदेचे सहमंत्री शंकर गायकर, माजी महापौर राहुल जाधव, आयोजक डॉ. लालबाबू अंबिकालाल गुप्ता, सामाजिक कार्यकर्ते पांडुरंग साने, सुधीर काळजे, निखिल बोऱ्हाडे, निलेश बोराटे, विकास पाटील, प्रमोद गुप्ता, श्याम गुप्ता, दीपक चव्हाण, विजय पाटील, संदीप साकोरे व छटपूजा निमित्त आलेले भक्त भाविक उपस्थित होते.
यावेळी आमदार महेश लांडगे म्हणाले की, छट माता तुमच्या सर्वांच्या मनोकामना पूर्ण करो, अशी मी प्रार्थना करतो आणि सर्व हिंदू भगिनींचे रक्षण करण्यासाठी छट मातेने मला शक्ती द्यावी असे आशीर्वाद मागतो.
विश्व हिंदू परिषदेचे सहमंत्री शंकर गायकर म्हणाले की, या सूर्यषष्ठी महोत्सवात छट मातेचे व्रत केले जाते. निसर्गात आणि समाजात एकरूपता यावी. सर्वांचे कल्याण व्हावे, पिक पाणी मुबलक यावे, यासाठी सूर्याला अर्ध्य देऊन त्याची उपासना केली जाते. सनातन धर्मात नदीला मातेचा दर्जा आहे. या महोत्सवात मातेचे पूजन करून पर्यावरणाचे रक्षण करण्याचा संदेश जगभर दिला जातो.
स्वागत,प्रास्ताविक करताना श्री विश्व श्रीराम सेनेचे संस्थापक अध्यक्ष व आयोजक लालबाबू अंबिकालाल गुप्ता यांनी सांगितले की, महंत श्री राजुदास महाराज हे प्रभू श्री रामाची जन्मभूमी अयोध्या येथून प्रभू श्री रामाचे दूत म्हणून आशीर्वाद देण्यासाठी प्रथमच पुण्यनगरीत आले आहेत. त्यांनी भारत देश अखंड हिंदुराष्ट्र व्हावे असा केलेला संकल्प पूर्ण होण्यासाठी श्री विश्व श्रीराम सेना कायम त्यांच्या सोबत राहील. मोशी येथील इंद्रायणी नदीघाट येथे भोसरी, मोशी, पिंपरी नेहरू नगर, चिंचवड़, चिंबळी, कुरुळी, कोयाळी, चाकण, मोशी, जाधववाडी, चिखली, निघोजे, आकुर्डी, तळवडे, आळंदी कृष्णानगर आदी भागातून भक्त भाविक उपस्थित होते. यावेळी पारंपरिक पूजा करून भजन, छट लोकगीते सादर करण्यात आली व महाप्रसादाचे वाटप करण्यात आले.

पुणे- पुण्यात बड्या बड्या बिल्डरांकडून जैन समाजाच्या धर्मादाय संस्थेची जी जागा विकत येत नाही , विकत कोणाला घेता येत नाही , आणि ज्या जागेचा व्यावहारिक विक्रीसाठीचे खरेदी खत देखील होऊ शकत नाही अशा मोडेल कॉलनीतील साडेतीन एकराच्या भूखंडाचा बेकायदेशीर व्यवहार झाला आणि पुण्याचे पालकमंत्री असलेल्या , कधीकाळी कलमाडींच्या नेतृत्वाची जागा घ्यायला निघालेल्या सध्या उपमुख्यमंत्री असलेल्या अजित पवारांनी कळवूनही सरार्स याकडे दुर्लक्ष केल्याने जैन समाज याबाबत असमंजस भावनेत आहे . या पार्श्वभूमीवर आज जैन समाजाचे आचार्य गुप्ती नांदी महाराज यांनी देखील पत्रकार परिषदेतून नाराजीही व्यक्त केली आहे.

काय म्हणाले जैन मुनी:आमची लढाई कोणत्‍याही पक्षाशी नव्‍हे, तर भ्रष्टाचाराशी आहे, असे स्पष्ट करत जैन मुनींनी ट्रस्‍टींना सुनावले.जैन बोर्डिंगचा जमीन व्यवहार रद्द झाला. हा समाजाचा मोठा विजय आहे, असे सांगून जैन मुनींनी पुढची दिशा काय असणार आहे, याविषयी पत्रकारांशी बोलताना आपली भूमिका मांडली.बांधकाम व्‍यावसायिक विशाल गोखले आणि केंद्रीय राज्यमंत्री मुरलीधर मोहोळ यांनी मैत्री काय असते हे त्यांनी दाखवून दिले आहे. हा करोडोचा व्यवहार होता. मात्र, मैत्रीसाठी करोडोंचा व्यवहार त्यांनी तोडून टाकला. त्यामुळे मैत्रीची नवी परिभाषा त्यांनी कायम केली असून अशी दोस्ती सर्वांची असली पाहिजे, असेही जैनमुनी आचार्य गुप्तीनंद महाराज यांनी सांगितले. या सर्व प्रकारास ट्रस्‍टचे काही पदाधिकारी जबाबदार असून, त्‍यांच्‍यामुळेच हा सर्व प्रकार घडला आहे.तसेच, हा व्‍यवहार पूर्णपणे रद्द होत नाही, तोपर्यत येत्‍या १ तारखेपासून होणारे उपोषण सुरुच राहणार असल्‍याचे ते म्‍हणाले.उपमुख्यमंत्री आणि पुण्याचे पालकमंत्री अजित पवार अद्याप या प्रकरणामध्ये काही बोललेले नाहीत. याठिकाणी आलेले नाहीत, हे अत्यंत चुकीचे आहे. १७ ऑक्टोबरला काढलेल्या मोर्चापूर्वीच आम्ही पालकमंत्री अजित पवार यांना आमचं म्हणणे पाठवले होते. मात्र त्यांच्यापर्यंत हे सर्व पोहचून देखील ते का आले नाहीत, याबाबत आम्हाला काही कल्पना नाही. या प्रकरणामध्ये अजित पवार यांनी शब्द देखील काढलेला नाही. ते समाजासोबत उभे राहावी, अशी अपेक्षाही त्‍यांनी व्‍यक्‍त केली.

दरम्यान अजित पवार यांच्या पक्षात असंख्य बिल्डर असून त्यांच्याबाबत देखील जनतेच्या असंख्य तक्रारी असतात . आणि हेच बिल्डर निवडणुकीच्या तोंडावर अजित पवार यांच्या जनसंपर्क अभियानाची सूत्रे आपल्या हातही ठेऊन असतात या बाबींचा मोठा फटका अजित पवार यांच्या पक्षाला आगामी महापालिका निवडणुकीत बसेल असा अंदाज वर्तविला जातो आहे. रवींद्र धंगेकर यांच्या मुळे एकनाथ शिंदे यांची शिवसेना आता या राजकीय स्पर्धेत पुढे येऊ पाहते आहे तर भाजपने महापालिकेच्या कारभारात तेच तेच नेते रिपीट करून आणि मुंबई दिल्लीच्या राजकारणात देखील त्याच चेहऱ्यांना संधी दिली त्यांच्या भेदभावी कारभारावर भाजपच्या १०० नगरसेवकांच्या गोटातील मोठी संख्या नाराज आहे त्याचाही फटका भाजपला बसू शकणार आहे.

अशा स्थितीत आता जैन समाजाच्या जागेबाबत , मंदिर आणि बोर्डिंग बाबत चुप्पी साधून अजित पवार गटानेही नाराजी ओढवून घेतली आहे. कॉंग्रेसचे अरविंद शिंदे , शिवसेनेचे संजय मोरे हे या विषयामुळे जैन समाजाच्या संपर्कात राहिल्याचे दिसून आले आहे.