पुणे-लोहपुरुष सरदार वल्लभभाई पटेल यांच्या 150 व्या जयंतीनिमित्ताने आंबेगाव पोलीस स्टेशन तर्फे राष्ट्रीय एकता दौड अंतर्गत अभिनव कॉलेज आंबेगाव बुद्रुक ते गायमुख चौक अशी मॅरेथॉनचे आयोजन केले होते.या मॅरेथॉन स्पर्धेमध्ये उपस्थित स्पर्धक, विद्यार्थी, नागरिक तसेच पोलीस स्टेशन कडे अधिकारी अंमलदार यांना पुष्पगुच्छ देऊन सन्मानित करण्यात आले . हि मॅरेथॉन अभिनव कॉलेज आंबेगाव बुद्रुक ते फिरंगाई देवी ते भेंडी चौक ते राम मंदिर ते गायमुख चौक ते परत अभिनव कॉलेज आंबेगाव बुद्रुक पुणे अशा मार्गावर संपन्न झाली

पोलीसठाण्यातील 08 अधिकारी व 50 अंमलदार तसेच 200 ते 250 विद्यार्थी, नागरिक, ज्येष्ठ नागरिक, शांतता समिती, पोलीस मित्र, पत्रकार, मॉलला कमिटी अल्पसंख्याक कमिटीचे सदस्य असे अनेक मान्यवर आणि नागरिक या मॅरेथॉन म्ध्त्ये सहभागी झाले होते तसेच भारती विद्यापीठ वाहतूक शाखेकडे योग्य तो बंदोबस्त नेमण्यात आलेला होता.

असा पुरूष हवाय जो मला आई बनवेल…!सोशल मीडियावरील जाहिरात करून लाखोंची फसवणूक, वाचा नेमकं प्रकरण…

नेट फ्लिक्स वर आर्थिक अडचणीत सापडलेला एक प्रामाणिक सरकारी नौकर कसा पुरुष वेश्या बनतो याची कहाणी दाखविणारी ‘CA टाॅपर’ हि मालिका ज्यांनी पाहिली असेल त्यांना या प्रकारचा तातडीने उलगडा होईल बहुधा याच पद्धतीचा पण वेगळ्या स्वरूपाची गुन्हेगारी पुण्यात सुरु झालीय कि काय असे वाटावे अशी हि बातमी आहे. असा पुरूष हवाय जो मला आई बनवेल…! अशा आशयाची जाहिरात करून तब्बल २५ लाख रुपयांचे त्यासाठी आमिष दाखवून एका कंत्राटदाराला ११ लाखाला कसा गंडा घालण्यात आला याबाबतची माहिती आता बाणेर पोलीस ठाण्यात दाखल झालेल्या एका गुन्ह्याने चव्हाट्यावर आणली आहे.

एका सायबर सुरक्षा अधिकाऱ्याने सांगितले की, गेल्या दोन वर्षांपासून देशाच्या विविध भागात “गर्भधारणेच्या नोकरी सेवा” च्या बनावट जाहिराती येत आहेत. २०२२ च्या अखेरीपासून अशा फसवणुकीत झपाट्याने वाढ झाली आहे. व्हिडिओंमध्ये महिला गर्भवती होण्यासाठी पुरुषाला मोठी रक्कम देण्यास तयार असल्याचा दावा करताना दिसतात. या जाहिरातींमुळे प्रभावित होऊन, पुरुषांकडून प्रथम नोंदणी शुल्क आकारले जाते आणि नंतर वैद्यकीय चाचण्या, कायदेशीर औपचारिकता किंवा सुरक्षा ठेवींसाठी मोठ्या प्रमाणात पैसे आकारले जातात. पैसे मिळाल्यावर, फसवणूक करणारे गायब होतात.”बिहार, उत्तर प्रदेश आणि इतर राज्यांमधील पोलिसांनी अशा अनेक प्रकरणांमध्ये अटक केली आहे. तपासात असे दिसून आले आहे की, हे सायबर गुन्हेगार देशभरातील लोकांची फसवणूक करण्यासाठी सोशल मीडिया आणि बनावट व्हिडिओ जाहिरातींचा वापर करत आहेत. पुणे पोलिसांनी नागरिकांना सोशल मीडियावरील अशा दिशाभूल करणाऱ्या आणि आक्षेपार्ह जाहिरातींना बळी पडू नका. कोणत्याही संशयास्पद लिंक्स, कॉल्स किंवा ऑफरची तक्रार सायबर क्राइम हेल्पलाइन क्रमांक १९३० किंवा www.cybercrime.gov.in वर त्वरित करावी

पुणे-सोशल मीडियाच्या या झगमगाटीच्या जगात आजकाल विविध नोकऱ्यांचे घोटाळे फोफावत आहेत. पुण्यातील एका ४४ वर्षीय कंत्राटदाराची कहाणी खरोखरच भयावह आहे. बनावट जाहिरातीला बळी पडून त्याने लाखोंचे नुकसान केले.सोशल मीडियावरील जाहिरातीत एका महिलेने लिहिले होते, “मला असा पुरूष हवा आहे जो मला आई बनवू शकेल.” महिलेने गर्भधारणा केल्यास २५ लाख रुपयांचे बक्षीस देण्याचे आश्वासन होते. पण प्रत्यक्षात तो एक सापळा होता. ज्यामुळे कंत्राटदाराचे ११ लाख रुपये गमवावे लागले. ही घटना वाचून तुम्हालाही हादरा बसेल.

तक्रारदाराला जेव्हा कळले की, तो सायबर फसवणूक करणाऱ्या टोळीचा बळी पडला आहे तेव्हा ही फसवणूक उघडकीस आली. पोलिसांनी गुन्हा दाखल करून तपास सुरू केला आहे. ही घटना केवळ वैयक्तिक कटाचे उदाहरण नाही तर सायबर गुन्हेगारांच्या नवीन धूर्ततेवरही प्रकाश टाकते. मिळालेल्या माहितीनुसार, हे सर्व सप्टेंबरच्या पहिल्या आठवड्यात सुरू झाले. पुण्यातील हडपसर भागात राहणाऱ्या या कंत्राटदाराला फेसबुकवर एक जाहिरात दिसली.जाहिरातीत एका आकर्षक महिलेचा फोटो होता जी गर्भवती राहू शकत नसल्याचा आरोप होता. जाहिरातीत ती म्हणाली, “मला मूल हवे आहे, पण नवरा नको. जो पुरुष मला तीन महिन्यांत गर्भवती करेल त्याला २५ लाख रुपये, गाडी आणि घरात वाटा मिळेल. मला असा पुरुष हवा आहे जो मला आई बनवू शकेल. मला मातृत्वाचा आनंद देऊ शकेल. तो शिक्षित आहे की नाही, तो कोणत्या जातीचा आहे, तो गोरा आहे की काळा आहे याची मला पर्वा नाही, असं लिहिलं होतं.

आर्थिक अडचणीत असलेल्या कंत्राटदाराला वाटले की, पैसे कमविण्याचा हा एक सोपा मार्ग आहे. त्याने जाहिरातीच्या शेवटी दिलेल्या नंबरवर कॉल केला. कॉल करणाऱ्याने स्वतःची ओळख “प्रेग्नंट जॉब्स” नावाच्या कंपनीत सहाय्यक म्हणून करून दिली. त्याने सांगितले की, तो त्या महिलेसोबत राहून काम सुरू करण्यापूर्वी तिला कंपनीत नोंदणी करावी लागेल आणि ओळखपत्र द्यावे लागेल. त्यानंतर कंत्राटदाराकडून नोंदणी शुल्क, ओळखपत्र शुल्क, पडताळणी शुल्क, जीएसटी, टीडीएस, प्रक्रिया शुल्क इत्यादी विविध सबबीखाली पैसे मागितले गेले.

याबाबत तपास अधिकाऱ्याने सांगितले की, “तक्रारदाराची इतकी फसवणूक झाली की त्याने सप्टेंबरच्या पहिल्या आठवड्यापासून ते २३ ऑक्टोबर दरम्यान १०० हून अधिक छोटे व्यवहार केले. एकूण रक्कम ११ लाख रुपयांपर्यंत पोहोचली. ही सर्व देयके यूपीआय आणि आयएमपीएस ट्रान्सफरद्वारे करण्यात आली.” तक्रारदाराने प्रश्न विचारण्यास सुरुवात केली तेव्हा फसवणूक करणाऱ्यांनी त्याला ब्लॉक केले. त्यानंतरच त्याला समजले की तो सायबर फसवणुकीचा बळी ठरला आहे. तक्रारीनंतर, बाणेर पोलीस ठाण्यात एफआयआर नोंदवण्यात आला आहे.

पुणे, दि. २९:
प्रधानमंत्री आवास योजना (ग्रामीण) अंतर्गत पुणे जिल्ह्यातील खेड तालुक्यातील ग्रामपंचायत रासे येथे भूमिहीन व बेघर कुटुंबांसाठी उभारण्यात येणाऱ्या ५२ घरकुलांच्या गृहसंकुलाचे भूमिपूजन गजानन पाटील, मुख्य कार्यकारी अधिकारी, जिल्हा परिषद पुणे यांच्या हस्ते Habitat for Humanity India Trust (मुंबई) या स्वयंसेवी संस्थेच्या सहकार्याने आज मोठ्या उत्साहात पार पडले.

जिल्हा परिषद पुणे मार्फत या लाभार्थ्यांना प्रधानमंत्री आवास योजना (ग्रामीण) अंतर्गत घरकुलांची मंजुरी देण्यात आली होती. लाभार्थ्यांना गायरान शासकीय जागेचे विनामूल्य वाटप करून जून २०१९ मध्ये ऑनलाइन मंजुरी देण्यात आली होती. फेब्रुवारी २०२२ मध्ये पहिल्या हप्त्याचे अनुदानही वितरित करण्यात आले होते. तथापि, स्थानिक पातळीवरील काही अडचणींमुळे बांधकाम सुरू होऊ शकले नव्हते. ग्रामपंचायत रासे, पंचायत समिती खेड आणि जिल्हा ग्रामीण विकास यंत्रणा, जिल्हा परिषद पुणे यांच्या पाठपुराव्यामुळे Habitat for Humanity India Trust संस्थेच्या सहकार्याने हा प्रकल्प प्रत्यक्षात राबविण्याचा मार्ग मोकळा झाला आहे.

या गृहसंकुलामध्ये प्रत्येक घरात पिण्याचे पाणी, वीज (सौरऊर्जा संच), स्वच्छता सुविधा, परसबाग व सांडपाणी व्यवस्थापन यांसारख्या सर्व मूलभूत सोयी उपलब्ध करून दिल्या जाणार आहेत. संस्था शासनाच्या निकषांनुसार आधुनिक व टिकाऊ बांधकाम तंत्रज्ञानाचा वापर करून घरे उभारणार आहे. या उपक्रमामुळे ठाकर समाजासह वंचित व गरजू कुटुंबांना पक्क्या घरांचे स्वप्न साकार होणार आहे.

या कार्यक्रमास श्रीमती शालिनी कडू, प्रकल्प संचालक, जिल्हा ग्रामीण विकास यंत्रणा; भूषण जोशी, उपमुख्य कार्यकारी अधिकारी (पंचायत); विशाल शिदे, गट विकास अधिकारी, पंचायत समिती खेड; तसेच Habitat for Humanity India Trust संस्थेचे वरिष्ठ अधिकारी राजीव रमण, बुरहानुद्दीन बोहरा, सतीश जाधव आणि ग्रामपंचायत रासेचे सरपंच, उपसरपंच, सदस्य व लाभार्थी मोठ्या संख्येने उपस्थित होते.

या नाविन्यपूर्ण प्रकल्पामुळे शासन व सामाजिक संस्थांच्या संयुक्त प्रयत्नांतून ग्रामीण भागात टिकाऊ व सशक्त विकासाचा पाया रचला जात असून, जिल्हा परिषदेच्यावतीने हे पुणे जिल्ह्यातील पहिलेच सामूहिक घरकुल गृहसंकुल ठरणार आहे.

पुणे-
ताम्हिणी घाट परिसरात सुरू असलेल्या अवकाळी पावसामुळे डोंगरकड्यावरून छोटे-मोठे दगड कोसळत आहेत. याच दरम्यान घडलेल्या दुर्दैवी अपघातात एका महिलेचा मृत्यू झाला आहे. पुण्याहून माणगावकडे जाणाऱ्या कारवर डोंगरावरून कोसळलेला दगड थेट कारच्या सनरूफमधून आत घुसला आणि डोक्याला गंभीर दुखापत झाल्याने महिलेचा जागीच मृत्यू झाला. मृत महिलेचे नाव स्नेहल गुजराती असे असून, त्यांचे पती आणि मुलगा किरकोळ जखमी झाले आहेत.
आज सकाळी स्नेहल गुजराती आपल्या कुटुंबासह पुणे-रायगड जोडणाऱ्या ताम्हिणी घाटातून प्रवास करत होत्या. घाटात सतत जोरदार पाऊस सुरू असल्याने डोंगरावरून सतत दगड कोसळत होते. अचानक एक मोठा दगड त्यांच्या कारच्या टपावर आदळला आणि सनरूफची काच फोडून आतमध्ये घुसला. दगड थेट स्नेहल गुजराती यांच्या डोक्यात लागला आणि त्यांचा जागीच मृत्यू झाला. जखमी पती आणि मुलाला तातडीने रुग्णालयात दाखल करण्यात आले आहे.

घटनेनंतर स्थानिक पोलिस आणि प्रशासनाने घटनास्थळी धाव घेऊन मदतकार्य सुरू केले. स्नेहल यांना तातडीने दवाखान्यात नेण्यात आले, मात्र उपचारापूर्वीच त्यांचा मृत्यू झाल्याची माहिती डॉक्टरांनी दिली.
अवकाळी पावसामुळे ताम्हिणी घाट परिसरात गेल्या काही दिवसांपासून भूस्खलन आणि दगड कोसळण्याच्या घटना वाढल्या आहेत. त्यामुळे रायगड जिल्हाधिकारी कार्यालयाने नागरिकांना अत्यावश्यक कामाशिवाय घाटातून प्रवास न करण्याचे आवाहन केले आहे. तसेच, प्रशासनाने रस्त्यांची पाहणी आणि सुरक्षा उपाययोजना वाढवण्याचे आदेश दिले आहेत

या घटनेनंतर पुन्हा एकदा सनरूफच्या वापरावर प्रश्नचिन्ह उपस्थित झाले आहे. भारतात कार विक्रीसाठी सनरूफ हे एक आकर्षक फीचर म्हणून दाखवले जाते, मात्र ते प्रत्यक्षात सुरक्षेच्या दृष्टीने धोकादायक ठरू शकते. परदेशात थंड वातावरणामुळे सूर्यकिरणे अंगावर घेण्यासाठी सनरूफचा वापर केला जातो, परंतु भारतात तो बहुतेकदा बाहेर डोकावण्यासाठी किंवा फोटो काढण्यासाठी वापरला जातो. त्यामुळे अपघाताच्या वेळी काच फुटून जखमी होण्याचे प्रकार वारंवार घडतात.

नेहरु-गांधींचे विचार नवीन पिढीपर्यंत पोहोचविण्याची गरज — विश्‍वंभर चौधरी

पुणे : देशातील साडेपाच हजार धरणांपैकी निम्मी धरणे माजी पंतप्रधान पंडित नेहरु यांच्या कार्यकाळात उभारली गेली आहेत. स्वातंत्र्यलढ्यात नेहरु-गांधी घराण्याचे मोठे योगदान असून, सध्याचे सत्ताधारी त्यांचा इतिहास पुसण्याचे काम करीत आहेत, अशी खंत ज्येष्ठ विचारवंत विश्‍वंभर चौधरी यांनी व्यक्त केली. देशासाठी योगदान देणाऱ्या महापुरुषांच्या कार्याची मोडतोड होत असल्याचेही त्यांनी नमूद केले.

पुणे शहर जिल्हा काँग्रेस कमिटीच्या वतीने माजी पंतप्रधान श्रीमती इंदिरा गांधी यांच्या पुण्यतिथीनिमित्त त्यांच्या जीवनावर आधारित छायाचित्र प्रदर्शनाचे आयोजन बाळासाहेब ठाकरे कलादालन येथे करण्यात आले. या प्रदर्शनाचे उद्घाटन ज्येष्ठ विचारवंत विश्‍वंभर चौधरी यांच्या हस्ते झाले. या वेळी माजी मंत्री बाळासाहेब शिवरकर,काँग्रेसचे ज्येष्ठ नेते उल्हासदादा पवार,, पुणे शहर काँग्रेसचे शहराध्यक्ष अरविंद शिंदे, महाराष्ट्र प्रदेश काँग्रेस कमिटीचे  खजिनदार व ज्येष्ठ नेते  अ‍ॅड. अभय छाजेड, अजित दरेकर, यासीन शेख, सचिन आडेकर, आबा जगताप, विठ्ठल गायकवाड, भारत सुराणा, सीमा महाडिक, हेमंत राजभोज, संतोष पाटोळे, अनुसया गायकवाड, सुंदरा ओव्हाळ सुनिल शिंदे यांच्यासह काँग्रेस पदाधिकारी उपस्थित होते.

विश्‍वंभर चौधरी म्हणाले, “नेहरुंनी बांधलेली धरणे आज जीर्णावस्थेत असून, त्यांची देखभाल सध्याच्या सत्ताधाऱ्यांकडून होत नाही, ही खंतजनक बाब आहे. २०१४ पासून ‘नवीन देशभक्तांची’ एक तुकडी निर्माण झाली असून, त्यांचे काम फक्त देशासाठी कार्य करणाऱ्या नेत्यांची बदनामी करणे आहे. अशा विकृतींना विचारांच्या बळाने प्रत्युत्तर द्यावे लागेल. पं. नेहरु, इंदिरा गांधी आणि सरदार पटेल यांचे विचार पुढील पिढीपर्यंत पोहोचविण्यासाठी समाजमाध्यमांचा प्रभावी वापर करणे आवश्यक आहे.”

उल्हासदादा पवार म्हणाले, “इंदिरा गांधी या खऱ्या अर्थाने ‘आयरन लेडी’ होत्या. पाकिस्तानला शरणागती पत्करायला भाग पाडण्याची ताकद त्यांनी दाखवून दिली. सिक्किमला भारतात विलीन करून त्यांनी देशाचे सार्वभौमत्व दृढ केले. त्यांचे नेतृत्व आणि धैर्य जागतिक पातळीवर भारताला सन्मान मिळवून देणारे ठरले.”

प्रास्ताविक अ‍ॅड. अभय छाजेड यांनी केले. ते म्हणाले, “आज इतिहासाची मोडतोड करून राष्ट्रपुरुषांच्या कार्याचा अवमान केला जात आहे. इंदिरा गांधी यांनी देशाचे प्रभावी नेतृत्व करत जगाच्या राजकारणात भारताला बळकट स्थान मिळवून दिले. मुंबई महाराष्ट्रात आणण्यात त्यांचे महत्त्वपूर्ण योगदान राहिले. त्यांच्या जीवनावर आधारित छायाचित्र प्रदर्शनाद्वारे त्यांचे विचार आणि कार्य नवीन पिढीपर्यंत पोहोचविण्याचा आमचा प्रयत्न आहे.”  अक्षय जैन यांनी आभार मानले.

साऊथ आफ्रिका केप टाऊन  येथे  क्लासिक व इक्विप्ड जागतिक मास्टर्स पॉवरलिफ्टिंग स्पर्धा 

४  सुवर्णपदक आणि मानाचा बेस्ट लिफ्टर वर्ल्ड चा तिसऱ्या क्रमांकाचा किताब पटकावला

पुणे: साऊथ आफ्रिका केप टाऊन  येथे  क्लासिक व इक्विप्ड जागतिक मास्टर्स पॉवरलिफ्टिंग स्पर्धा पार पडल्या. जगभरातील सुमारे 480 खेळाडूंनी त्यात आपले शक्ती प्रदर्शन केले. पुण्याच्या डॉ. शर्वरी इनामदार यांनी ५७  किलो वजनी गटात क्लासिक प्रकारात ३७२.५  किलो तर इक्विप्ड प्रकारात ४०७.५  किलो वजन उचलत स्क्वॉट, बेंचप्रेस, डेडलिफ्ट व टोटल यामध्ये ३ कांस्यपदके, ४  सुवर्णपदके याबरोबरच मानाचा बेस्ट लिफ्टर वर्ल्ड चा तिसऱ्या क्रमांकाचा किताबही पटकावला. 

फ्रान्स, ग्रेट ब्रिटन, जर्मनी, अमेरिका, बेल्जियम, स्पेन, आयर्लंड, ऑस्ट्रेलिया, कॅनडा, ब्राझील, साऊथ आफ्रिका, जपान या देशाच्या खेळाडूंशी अत्यंत चुरशीची लढत देत त्यांनी भारतासाठी ही विजयश्री खेचून आणली. मंगोलिया येथे दोन वर्षांपूर्वी झालेल्या जागतिक स्पर्धेत दुहेरी मुकुट पटकावल्यानंतर त्यांनी आत्तापर्यंत तीन एशियन चॅम्पियनशिप्स, कॉमनवेल्थ चॅम्पियनशिप जिंकत ओपन, क्लासिक, इक्विप्ड, मास्टर्स, बेंचप्रेस या सर्व प्रकारात मिळून तब्बल 17 वेळा स्ट्रॉंग वुमन ऑफ महाराष्ट्र,  8 वेळा बेस्ट लिफ्टर इंडिया , ३ वेळा बेस्ट लिफ्टर एशिया, बेस्ट लिफ्टर कॉमनवेल्थ किताबही पटकावले आहेत.

कोझिकोड येथे झालेल्या नॅशनल पॉवरलिफ्टिंग स्पर्धेतून त्यांची या जागतिक चॅम्पियनशिपसाठी निवड झाली होती. डॉ .शर्वरी पुण्याच्या ‘कोडब्रेकर’ जिम मध्ये डॉ .वैभव इनामदार यांच्या मार्गदर्शनाखाली सराव करतात. सदाशिव पेठेत ‘आहार आयुर्वेद’ क्लिनिकमध्ये त्या खेळाडूंसाठी व विविध मेटाबोलिक डिसऑर्डर साठी जीवनशैली मार्गदर्शनाचे प्रशिक्षण देतात.
आई-वडील, कुटुंबीय, मित्रपरिवार, पुणे -महाराष्ट्र व पॉवरलिफ्टिंग इंडिया यांच्या पाठिंबामुळेच सर्व अडचणींवर मात करत सातत्याने उच्च पातळीवरचे यश मिळवणे शक्य होते असे त्यांनी सांगितले. जागतिक स्पर्धेत भारतासाठी अत्यंत चमकदार कामगिरी केल्याबद्दल त्यांचे सर्वत्र कौतुक होत आहे.

पुणे : शहरात सध्या महाप्रीत आणि सीसीटीव्ही कॅमेऱ्यांच्या कामांमुळे नागरिकांना खड्डे, धूळ, आणि वाहतुकीतील अडथळ्यांचा त्रास सहन करावा लागत आहे. या पार्श्वभूमीवर भाजप शहराध्यक्ष धीरज रामचंद्र घाटे यांनी पुणे महानगरपालिकेचे आयुक्त नवल किशोर राम यांना पत्र लिहून समन्वय, सुरक्षितता आणि योग्य पुनर्डांबरीकरणाबाबत तातडीने कार्यवाही करण्याची मागणी केली आहे.

५०० किमी खोदकाम, १२५ किमी भागात दुप्पट कामे

शहरातील विविध भागांमध्ये महाप्रीत आणि सीसीटीव्ही या दोन स्वतंत्र योजनांसाठी सुमारे ५०० किलोमीटर खोदकाम सुरू आहे. यातील सुमारे १२५ किलोमीटरचा भाग समान क्षेत्रात असून, दोन्ही कामे एकत्रितपणे करण्याबाबत पालिकेत बैठक होऊन निर्णय घेण्यात आला होता. मात्र, प्रत्यक्षात सीसीटीव्ही कामाचा ठेकेदार आधी खोदकाम करून नंतर महाप्रीत कंपनीकडून त्याच भागात पुन्हा खोदकाम होत असल्याने नागरिकांना दुहेरी त्रास होत आहे, असे घाटे यांनी नमूद केले आहे.

पुनर्डांबरीकरणाच्या दर्जावर प्रश्नचिन्ह

पालिकेने “रस्त्यांना कमीत कमी छेद घेऊन खोदकाम करावे” अशा सूचना दिल्या होत्या, तरी मोठ्या आकाराचे खड्डे घेतले जात आहेत. त्यानंतर फक्त खडी टाकून काम अपूर्ण ठेवले जाते, त्यामुळे रस्त्यावर खडी पसरून वाहनघसर अपघात वाढत आहेत, असे घाटे यांनी निदर्शनास आणले.
शिवदर्शन चौक, ई-लर्निंग स्कूलसमोर आणि इतर ठिकाणची कामे पाहिल्यास या समस्येचे गांभीर्य अधिक स्पष्ट होते, असेही त्यांनी नमूद केले.

ठेकेदारांवर कारवाईची मागणी

घाटे यांनी ठेकेदारांकडून रस्त्यावर खडी न पसरण्याची, पुनर्डांबरीकरण नीट करण्याची आणि योग्य बॅरिकेडिंग व सूचना फलक लावण्याची हमी घेण्याची मागणी केली आहे. नियमभंग झाल्यास संबंधित ठेकेदारांवर तातडीने कारवाई करावी, अशी त्यांनी आयुक्तांना विनंती केली आहे.

जागतिक सायकल स्पर्धेच्या पार्श्वभूमीवर विशेष दक्षता

जानेवारी २०२६ मध्ये पुण्यात होणाऱ्या जागतिक सायकल स्पर्धेच्या पार्श्वभूमीवर विविध रस्त्यांवर मिलिंगचे काम सुरू आहे. मात्र, त्यानंतर तातडीने डांबरीकरण होत नसल्याने वाहने घसरत आहेत. त्यामुळे मिलिंगनंतर २४ ते ४८ तासांच्या आत पुनर्डांबरीकरण करणे बंधनकारक करावे, अशी मागणी घाटे यांनी केली आहे.
तसेच या कामांदरम्यान सुरक्षा निकषांचे पालन, दिशादर्शक फलक व चेतावणी चिन्हे लावणे अनिवार्य करावे, असेही त्यांनी सुचवले आहे.

नागरिकांच्या सुरक्षिततेसाठी तातडीचे निर्देश अपेक्षित

शहराच्या सौंदर्याचे जतन आणि नागरिकांच्या सुरक्षिततेच्या दृष्टीने पालिकेने दोन्ही कंपन्यांमध्ये समन्वय साधून कामे व्यवस्थित आणि नियोजनबद्ध पद्धतीने पूर्ण करावीत, अशी विनंती घाटे यांनी आपल्या पत्रात केली आहे.