पुणेकरांनी मोठ्या संख्येने उद्घाटन समारंभाला उपस्थित राहण्याचे पुणे पुस्तक महोत्सवाचे मुख्य संयोजक राजेश पांडे यांचे आवाहन

पुणे : वाचन चळवळीला सक्षम करण्यासाठी आणि पुण्याला नवी ओळख देण्यासाठी फर्ग्युसन महाविद्यालयाच्या मैदानावर होणाऱ्या पुणे पुस्तक महोत्सवाचे उद्घाटन राज्याचे लोकप्रिय मुख्यमंत्री देवेंद्र फडणवीस यांच्या हस्ते शनिवारी १४ डिसेंबरला सायंकाळी पाच वाजता होणार आहे. मुख्यमंत्री झाल्यावर देवेंद्र फडणवीस यांचा पहिलाच पुणे दौरा असल्याने, सर्वांनाच उत्सुकता आहे. त्यामुळे उद्घाटन समारंभाला पुणेकरांनी मोठ्या संख्येने उपस्थित राहावे, असे आवाहन पुणे पुस्तक महोत्सवाचे मुख्य संयोजक राजेश पांडे यांनी मंगळवारी केले.

राष्ट्रीय पुस्तक न्यासाच्या (एनबीटी) फर्ग्युसन महाविद्यालयाच्या मैदानावर येत्या १४ ते २२ डिसेंबर या कालावधीत पुणे पुस्तक महोत्सव होत आहे. या महोत्सवाच्या उद्घाटनाची माहिती देण्यासाठी आयोजित करण्यात आलेल्या पत्रकार परिषदेत पांडे बोलत होते. यावेळी संयोजन समितीचे सदस्य प्रसेनजित फडणवीस, बागेश्री मंठाळकर, प्राचार्य डॉ. संजय चाकणे आदी उपस्थित होते. या महोत्सवाची तयारी अंतिम टप्प्यात सुरू असून, उद्घाटनाचा कार्यक्रम हजारो पुणेकरांच्या उपस्थितीत जल्लोषात होणार असल्याचे पांडे यांनी सांगितले.

पांडे म्हणाले की, राज्याचे मुख्यमंत्री देवेंद्र फडणवीस यांनी पुणे पुस्तक महोत्सवाच्या उद्घाटनप्रसंगी उपस्थित राहण्याचे मान्य केले आहे. देवेंद्र महोत्सवातील पुस्तकांच्या स्टॉलला भेट देऊन, लेखक, साहित्यिक, प्रकाशकांशी संवाद साधणार आहे. या निमित्ताने पुणेकरांना देवेंद्रजींशी संवाद साधण्याची संधी मिळेल. उद्घाटनाचा मुख्य कार्यक्रम फर्ग्युसन महाविद्यालयाच्या मैदानावर उभारण्यात आलेल्या भव्य स्टेजवर होणार आहे. या कार्यक्रमाला कुलगुरू, साहित्यिक, लेखक, कवी, चित्रकार, संपादक, प्राचार्य अशी मंडळी उपस्थित राहणार आहे. हा कार्यक्रम सर्वासाठी खुला असल्याने, पुणेकरांनी मोठ्या संख्येने उपस्थित राहून वाचन संस्कृतीला वाढविण्यासाठी हातभार लावावा, असे आवाहन पांडे यांनी केले.
आज ‘ शांतता…पुणेकर वाचत आहे’ उपक्रमात सहभागी व्हा
पुणे शहरात ‘ शांतता…पुणेकर वाचत आहे’ हा उपक्रम आज बुधवारी ११ डिसेंबरला दुपारी १२ ते १ या वेळेत अप्पा बळवंत चौकसह, शाळा, महाविद्यालये, पुणे मेट्रो स्टेशन, पीएमपीएमएल बसथांबे, विमानतळ, कारागृह, वाचनालये, ग्रंथालये अशा शेकडो ठिकाणी उत्साहात होणार आहे. हा उपक्रम सामाजिक संस्था आणि संघटनांनी उत्साहात साजरा करण्याचे ठरवले आहे. पुणेकरांनी आज १२ ते १ या वेळेत असेल त्या ठिकाणी आपल्या आवडीचे पुस्तक वाचून, वाचन चळवळ बळकट करण्यासाठी योगदान द्यायचे आहे, असे आवाहन राजेश पांडे यांनी केले आहे.
ज्ञानसरिता दिंडीचे आयोजन
पुणे पुस्तक महोत्सवाच्या उद्घाटन होण्यापूर्वी शहरात नाविन्यपूर्ण ज्ञानसरिता दिंडी काढण्यात येणार आहे. या दिंडीत सावित्रीबाई फुले पुणे विद्यापीठाशी संलग्न १०१ महाविद्यालयातील दिंड्या सहभागी होणार आहेत. पुणे परिसरातील संत, क्रांतिकारक, समाजसुधारक, विचारवंत यांच्या कार्यावर आधारित दींड्या राहणार आहेत. सामाजिक, शैक्षणिक, सांस्कृतिक अशा सर्व विचारांची दिंडी टिळक रस्त्यावरील न्यू इंग्लिश शाळेतून सुरू होऊन, फर्ग्युसन महाविद्यालयात येणार आहे, अशी माहिती बागेश्री मंठाळकर यांनी दिली.

पुणे, १० डिसेंबर: ‘पुणे पुस्तक महोत्सवा’च्या बोधचिन्हाच्या स्वरुपात साकारलेल्या भव्य प्रवेशद्वाराचे उद्घाटन मंगळवारी सायंकाळी पाच वाजता फर्ग्युसन महाविद्यालयाच्या प्रवेशद्वाराजवळ करण्यात आले. ज्येष्ठ साहित्यिक-वात्रटिकाकार रामदास फुटाणे, ज्येष्ठ लेखक अच्युत गोडबोले, माजी आयपीएस अधिकारी अशोक धिवरे, महोत्सवाचे मुख्य संयोजक राजेश पांडे, दिल्ली येथे नियोजित ९८ व्या अखिल भारतीय मराठी साहित्य संमेलनाचे संयोजक संजय नहार, माजी खासदार प्रदीप रावत, जाधवर ग्रुप ऑफ इन्स्टिट्यूटचे डॉ. सुधाकर जाधवर आदी मान्यवरांच्या हस्ते या प्रवेशद्वाराचे उद्घाटन झाले. पुण्यनगरीचा मानबिंदू असलेल्या शनिवार वाड्याचे प्रवेशद्वार आणि पुण्याच्या वाचनसंस्कृतीची ओळख दर्शविणारे पुस्तकरुपी बुरुज अशा संकल्पनेतील महोत्सवाचे बोधचिन्ह महोत्सवाच्या भव्य-दिव्य प्रवेशद्वाराच्या स्वरुपात साकारण्यात आले असून, महोत्सवाला भेट देणाऱ्या वाचकांसाठी ते खास आकर्षण ठरणार आहे. ६६ फूट रुंदी आणि ३३ फूट उंची असलेले हे प्रवेशद्वार फॅब्रिकेशन, प्लायबोर्ड, रबरशीट आदी साहित्य वापरून तयार करण्यात आले आहे.

भारतातील पहिली एव्हरेस्टिंग स्पर्धा

पुणे -महाराष्ट्र पर्यटन विभाग व सिम्पल स्टेप्स फिटनेस संस्था यांच्या संयुक्त विद्यमाने सिंहगड किल्ल्यावर भारतातली पहिली एव्हरेस्टिंग स्पर्धा 13 डिसेंबर 2024 ते 15 डिसेंबर 2024 या कालावधीत होणार आहे. या स्पर्धेत स्पर्धकांना माउंट एव्हरेस्टची उंची 8848 मीटर सिंहगड चढून सर करायची आहे. त्यामुळे स्पर्धकांना लागोपाठ 16 वेळा सिंहगड सर करावा लागेल. पूर्ण एव्हरेस्टिंग (सोळा वेळा) व अर्ध एव्हरेस्टिंग (आठ वेळा) अशा दोन विभागात यात स्पर्धक सहभागी होऊ शकतात. स्पर्धक स्वतंत्र रीतीने अथवा टीम करून देखील सहभागी होऊ शकतात. नवोदितांसाठी यामध्ये फन रन / वॉक हा पर्याय देखील उपलब्ध आहे. या पर्यायात स्पर्धक पौर्णिमेच्या रात्री म्हणजे 14 डिसेंबरला एकदा सिंहगड सर करतील.
सर्व स्पर्धक घाट रस्त्याने सिंहगड सर करणार आहेत. त्यामुळे स्पर्धेच्या कालावधीत सिंहगड घाट रस्ता वाहतुकीसाठी (अत्यावश्यक सेवेतील वाहने वगळता) पूर्णपणे बंद असेल. महाराष्ट्रातील व महाराष्ट्र बाहेरचे अनेक स्पर्धक यामध्ये सहभागी होत आहेत. सिम्पल स्टेप्सच्या वतीने स्पर्धेत सहभागी होणाऱ्या सर्वांना टी-शर्ट व गुडी बॅग देण्यात येईल. तसेच स्पर्धेच्या ठिकाणी सर्व सहभागींना रूट सपोर्ट, स्पर्धा कालावधीत जेवण व वैद्यकीय सेवा याचीही सोय केली जाईल. स्पर्धा पूर्ण करणाऱ्या सर्व यशस्वी स्पर्धकांना मेडल देण्यात येईल. पतंजली आत्मबोध वेलनेस सेंटर हा स्पर्धेचा बेस कॅम्प व स्टार्ट पॉइंट असणार आहे. यानिमित्त या केंद्रातर्फे आरोग्य विषयक कार्यशाळा स्पर्धकांसाठी घेतल्या जातील.
या स्पर्धेची माहिती देण्याकरिता 10 डिसेंबर 2024 रोजी पुणे येथे झालेल्या पत्रकार परिषदेमध्ये श्रीमती शमा पवार, उपसंचालक महाराष्ट्र पर्यटन पुणे विभाग, वन विभागाचे उपवनसंरक्षक श्री. दीपक पवार, सिंपल स्टेप्स चे संस्थापक श्री. आशिष कासोदेकर इत्यादी मान्यवर उपस्थित होते. त्याचबरोबर ऍडव्होकेट श्री. प्रकाश केदारी सिंहगड परिवार, श्री. दिग्विजय जेधे अध्यक्ष वेस्टन घाट रनिंग फाउंडेशन हे मान्यवर देखील आवर्जुन उपस्थित होते.

पुणे- (Satish Wagh Murder Case Update)भाजपा आमदार योगेश टिळेकर यांचे मामा सतीश वाघ यांचे अपहरण करून खून करण्याच्या प्रकरणात एकूण सुमारे १० आरोपींचा समावेश असल्याचे पोलीस सूत्राकडून सजते आहे दरम्यान यापैकी दोघांना पोलिसांनी वाघोली येथे पकडले असून एकाचे नाव पवन शर्मा आणि नवनाथ गुरसाळे असल्याची माहिती पुढे येते आहे.

पोलिसांनी सांगितले कि “काल सकाळी जेव्हा सतीश वाघ यांचं अपहरण झालं होतं. त्याची आम्हाला माहिती मिळाली.आम्ही सगळीकडे तपास केला. त्यांचा मृतदेह संध्याकाळी सापडला आहे. त्यांचा मृत्यू हा सकाळी झाला असावा जिथे त्यांचा मृतदेह सापडला त्या घटनास्थळावर एक लाकडी दांडा दिसत आहे.संध्याकाळी ५ ते ६ वाजता काही मुलं फिरण्यासाठी आले होते. त्यांना सतीश वाघ यांचा मृतदेह दिसला. स्थानिकांनी याची माहिती पोलिसांना दिली. त्यानंतर लगेच पोलिसांची टीम घटनास्थळी पोहोचली. त्यांच्या शरिरावर अजून कोणत्या जखमी आढळून आल्या नाही.या घटनेचा कसून तपास सुरू आहे. काही लोकांना तपासासाठी आम्ही ताब्यात सुद्धा घेतलं आहे. या संपूर्ण घटनेच्या तपासासाठी एकूण 16 टीम्स तयार करण्यात आले आहेत. सहा क्राइम ब्रांचच्या टीम सुद्धा यात सहभागी आहेत. CP स्वतः या संपूर्ण घटनेकडे बारीक केली लक्ष ठेवून आहेत. काही सीसीटीव्ही फुटेज देखील आम्हाला मिळाले आहेत. संपूर्ण घटनेचे गांभीर्य ओळखत काही गोपनीयता पाळणं गरजेचं आहे. लवकरच आम्ही आरोपी पर्यंत पोहोचू आणि त्यांना अटक करू, अशा विश्वास पोलिसांनी व्यक्त केला आहे.मृतदेह उरुळी कांचन मधील शिंदवणे घाटात सापडला. पुणे शहर पोलिसांची फॉरेन्सिक टीम आणि डॉग स्कॉडने घटनास्थळी काम पूर्ण केले आहे.

सतीश वाघ यांची लोणी काळभोर परिसरातील माळीमळा येथे वडिलोपार्जित शेती आहे. ती शेती सतीश वाघ करतात.या शेतातील एक एकराबाबत दिवाणी न्यायालयात खटला सुरू आहे. त्याची सुनावणी सुरू आहे, दाखल फिर्यादीत नमूद केल्यानुसार सतीश वाघ यांनी दहा वर्षांपूर्वी एका व्यक्तीला तीस ते पस्तीस लाख रुपये जमिनीच्या व्यवहारासाठी दिले होते व पैसे परत मिळत नसल्याने वडील (सतीश वाघ) हे वारंवार कॉल करत असल्याचे ओंकार वाघ यांनी त्यांच्या फिर्यादीत म्हटले आहे. किंवा या व्यतिरिक्त अन्य कोणतं वैयक्तिक कारण आहे का याचा पोलिस तपास करत आहेत. पुण्यातील या घटनेने पुन्हा खळबळ उडाली आहे.

पहाटे 6.00 वाजता सतीश वाघ यांचं अपहरण
ओळखीच्या प्रत्यक्षदर्शीने घटनेची 7 च्या सुमारास माहिती कुटुंबाला दिली.नातेवाईक,स्थानिक यांना सगळ्यांना माहिती कळविण्यात आली.पोलिसांना 7.30 वाजता घटनेची माहिती हडपसर पोलिसांना कळविण्यात आली.
हडपसर पोलिसांनी तात्काळ प्रत्यक्षदर्शीच्या माहितीवरून गुन्हा दाखल करून तपास सुरू केला साधारण 8.30 वाजता
गुन्हे शाखेला 9 वाजता टीम रवाना करण्याचे आदेश.
9.30 वाजेच्या सुमारास गुन्हे शाखेच्या 12 टीम्स ने प्रत्यक्षात शोधाशोध सुरू केली.
12 वाजता सीसीटीव्ही आणि टॉवर लोकेशनच्या मदतीने तपास सुरू
3 वाजेच्या सुमारास पोलीस आयुक्त स्वतः हडपसर पोलीस ठाण्यात दाखल
शोध सुरू असताना संध्याकाळी 6 वाजेच्या सुमारास उरूळीकांचनच्या घाटात बेवारस मृतदेह सापडल्याची माहिती ग्रामीण पोलिसांना मिळाली.
हडपसर पोलीस,गुन्हे शाखेचे पोलीस मृतदेह सापडलेल्या ठिकाणी पोहोचले.
रात्री 8 वाजेच्या सुमारास आयकार आणि फॉरेन्सिक टीम घटनास्थळी रवाना.

पुणे – एकेकाळी काँग्रेस पक्षाचा बालेकिला असलेल्या पर्वती विधानसभा मतदारसंघात आघाडीच्या जागावाटपात काँग्रेसच्या अस्तित्वाचा प्रश्न गंभीर होत असल्याने नुकत्याच पार पडलेल्या विधानसभा निवडणुकीत अपक्ष म्हणून निवडणूक लढविणाऱ्या माजी उपमहापौर आबा बागुल यांच्यामुळे काँग्रेस कार्यकर्त्यांनाच उभारी मिळाली शिवाय काँग्रेस विचारधारेच्या मतदारांची ‘व्होट बँक’ही राखता आली. त्यामुळे कोणतेही पत्र न देता आणि म्हणणे ऐकून न घेता पक्षातून निलंबन केले असल्यास ते तातडीने मागे घ्यावे आणि काँग्रेस पक्षाचाच कार्यकर्ता असल्याचे पत्र द्यावे अशी मागणी माजी उपमहापौर आबा बागुल यांनी पक्षश्रेष्ठींकडे केली आहे.
यासंदर्भात आबा बागुल यांनी महाराष्ट्र प्रदेश काँग्रेस कमिटीचे प्रशासन व संघटक उपाध्यक्ष नाना गावंडे यांच्यासह निरीक्षक रमेश चेन्निथला, प्रदेश अध्यक्ष नाना पटोले यांच्यासह सर्व नेत्यांना पत्र पाठवले आहे. त्यात म्हटले आहे कि,
पर्वती मतदारसंघ हा राष्ट्रवादी काँग्रेस पार्टीकडे गेली पंधरा वर्षे आहे मात्र त्या पक्षाचे अधिकृत उमेदवार सलग तीन वेळा मोठ्या मताधिक्याचे फरकाने पराभूत झालेले आहेत. यंदाच्या निवडणुकीतही पुन्हा त्याच पक्षाचे उमेदवार मोठ्या मताधिक्याने पराभूत झालेले आहे.
ही सर्व परिस्थिती पक्ष श्रेष्ठींकडे अनेक वेळा मी व इतरही पदाधिकाऱ्यांच्या निदर्शनास आणून दिलेली होती व काँग्रेसच्या पदाधिकाऱ्यांनी आता हा मतदारसंघ काँग्रेस पक्षाकडे घेण्यासंबंधी प्रयत्न केल्याचेही कळविले होते. पण नेहमीप्रमाणे २१२ पर्वती विधानसभा मतदारसंघ राष्ट्रवादी काँग्रेस पक्षाकडे (शरद पवार गट) यांच्याकडे जागावाटपात राहीला. परिणामी गेली अनेक वर्षे पक्षाचा सक्रिय कार्यकर्ता असूनही माझ्या उमेदवारी बाबत विचार केलाच गेला नाही.गेल्या तीस वर्षांपासून या मतदारसंघात वॉर्ड असो किंवा प्रभाग सलग निवडून येणारा काँग्रेस पक्षाचा एकमेव नगरसेवक आहे. शिवाय वार्डामध्ये नाविन्यपूर्ण विकासकामे तर केली तसेच पुण्यातील अनेक भागांमध्ये चांगली विधायक कामे केलेली आहेत.त्याबद्दल पक्षांमधील सर्व ज्येष्ठ व सक्रिय नेत्यांनी तसेच महाविकास आघाडीमधील घटक पक्षांमधील नेत्यांनी माझी वेळोवेळी जाहीर प्रशंसा केलेली आहे. त्यामुळे यंदा पक्षातर्फे अधिकृत उमेदवारी मिळणे अत्यंत आवश्यक होते. परंतु दुर्दैवाने तसे काही झाले नाही व सलग चौथ्या वेळी म्हणजेच वीस वर्ष मला आमदारकीची उमेदवारीपासून डावलण्यात आले आहे. परिणामी गेली वीस वर्षे या मतदारसंघात काँग्रेस पक्ष कमी होत आहे. एकेकाळी काँग्रेसचा बालेकिल्ला असणाऱ्या मतदारसंघात काँग्रेस पक्ष नावालाही राहणार नाही. या कारणामुळे केवळ नाईलाजाने काँग्रेस पक्षाचे कार्यकर्ते कायमस्वरूपी पक्षासमवेत राहावेत व काँग्रेसचे मतदार जपले जावेत या हेतूने मी अपक्ष म्हणून उमेदवारी अर्ज भरलेला होता.याकडेही आबा बागुल यांनी लक्ष वेधले आहे.

शिस्तभंग नाहीच…

भारतीय राष्ट्रीय काँग्रेस पक्षाच्या घटनेमध्ये व कायदा यामधील तरतुदींचा कोणताही विचार न होता मला नैसर्गिक न्याय तत्त्वानुसार माझे खरे व योग्य म्हणणे ऐकून न घेता तसेच कोणतेही लेखी अथवा तोंडी खुलासा करण्याची संधी न देता तसेच मला पक्षातर्फे अधिकृतरित्या कोणतीही निलंबनाची नोटीस आजमितीपर्यंत कोणत्याही मार्गाने व कशाही प्रकारे अद्याप पर्यंत प्राप्त झालेली नसताना निलंबनाची माहिती प्रसार माध्यमांद्वारे समजली आहे व केवळ त्याच कारणाने मी आपणाकडे हा खुलासा माझे सर्व अधिकार अबाधित ठेवून प्राथमिक स्वरूपात केलेला आहे. काँग्रेस पक्षाच्या अधिकृत उमेदवाराच्या विरुद्ध मी निवडणूक लढवली नाही. त्यामुळे मी पक्षाची शिस्तभंग केलेली नाही.तरी या कारणामुळे माझे पक्षाने निलंबन केले असल्यास ते तातडीने मागे घेऊन मला काँग्रेस पक्षाचाच कार्यकर्ता असल्याचे पत्र द्यावे असेही आबा बागुल यांनी पत्रात नमूद केले आहे.

पुणे, ९: डॉ. बाबासाहेब आंबेडकरांनी स्वातंत्र्य, समता, बंधुतेवर आधारित समाज निर्माण करण्यासाठी काम केले. परंतु आज महागाई, बेरोजगारी, खाजगीकरण, वाढता जातीवाद, धर्मांधता यांमुळे समाजातील विषमता अधिकाधिक वाढत चालली आहे. त्यामुळे बाबासाहेबांचे कार्य आपल्यासाठी प्रासंगिक, प्रेरणादायी आणि दिशादर्शक असून बाबासाहेबांचे साहित्य वाचण्याचा व ते समाजापर्यंत पोहचवण्याचा संकल्प करूयात असं एका महाविद्यालयीन विद्यार्थ्याने स्पष्ट मत मांडले. याला निमित्त होते, डॉ. बाबासाहेब आंबेडकर महापरिनिर्वाण दिनानिमित्त शहरातील संविधान प्रेमी गटाने आयोजित केलेल्या उपक्रमांचे, ज्याला तरुण-विद्यार्थी-महिला यांचा उत्स्फूर्त प्रतिसाद लाभला. शहरात रविवार दिनांक 8 डिसेंबरला लोकायत हॉलवर संविधान प्रेमी गटातर्फे वाचन शिबिर आणि डॉ. बाबासाहेब आंबेडकर म्युझियमला भेट अशा कार्यक्रमांचे आयोजन केले होते, असं संविधान प्रेमी गटाच्या समन्वयक कल्याणी दुर्गा रवींद्र यांनी सांगितले. यावेळी बाबासाहेबांनी लिहिलेले साहित्य व अनेक सामाजिक राजकीय विषयांवरची पुस्तके वाचनासाठी उपलब्ध करून देण्यात आली होती. बाबासाहेबांच्या कार्याबद्दल सांगताना महिलांनी सांगितले की, ‘भारतरत्न डॉ. बाबासाहेबांचे व्यक्तीमत्व अष्टपैलू  होते. सामाजिक, राजकीय, आर्थिक, शैक्षणिक,धार्मिक, पत्रकारिता, कायदे अशा विविध क्षेत्रात आपल्या वक्तृत्वाने, लेखनाने व कुशल नेतृत्वाने डॉ. बाबासाहेब आंबेडकर यांनी दलितांच्या, श्रमिकांच्या, महिलांच्या उन्नतीसाठी अविरतपणे काम केले’.
       डॉ. बाबासाहेब आंबेडकर म्युझिअम, पुणेला भेट या उपक्रमातही विद्यार्थी, तरुण, ज्येष्ठ नागरिक यांची उपस्थिती लक्षणीय होती. बाबासाहेबांच्या आयुष्यातील महत्वाच्या घटनांचे फ़ोटो प्रदर्शन दाखवत माहिती देण्यात आली. कामगार मंत्री असताना बाबासाहेबानी केलेलं काम, स्वतंत्र मजदूर पक्षाची स्थापना, हिंदूंकोड बिल, चवदार तळे सत्याग्रह, भारतीय संविधान बनवण्यातील सहभाग अशा घटनांवर चर्चा करण्यात आली. तसेच म्युझियममध्ये बाबासाहेबांनी वापरलेली खुर्ची, टेबल, पुस्तके, जेवणाची भांडी ह्या वस्तू पाहून  बाबासाहेब हे देखील आपल्यासारखे सामान्य मनुष्य होते व आपणही समाज परिवर्तनासाठी प्रयत्न केले पाहिजे याची जाणीव झाली. यातून आम्हाला समाजासाठी काम करण्याची नवीन ऊर्जा मिळाली, अशा भावनाही उपस्थितांनी व्यक्त केल्या.