पुणे, दि. 3: केंद्रीय मोटार वाहन नियम, १९८९ मधील नियम १९८ अन्वये नवीन दुचाकी वाहन खरेदी करणाऱ्या ग्राहकांना खरेदीच्यावेळी वाहन वितरकाने दोन हेल्मेट पुरविण्याबाबत दुचाकी वाहन वितरकांना सुचना देण्यात आल्या आहेत; ग्राहकांनी नवीन दुचाकी वाहन खरेदी करतांना वितरकांकडून हेल्मेट घ्यावेत, अशी माहिती उप प्रादेशिक परिवहन अधिकारी स्वप्निल भोसले यांनी प्रसिद्धी पत्रकान्वये कळविले आहे.

दुचाकीस्वारांनी वाहन चालवितांना हेल्मेटचा वापर केल्यास अपघातामध्ये होणाऱ्या मृत्यूचे प्रमाण कमी होण्यास मदत होईल. त्यामुळे वाहनचालक आणि सोबत बसलेल्या व्यक्तीनेही रस्ता सुरक्षा मानकांची पूर्तता करणाऱ्या हेल्मेटचा वापर करणे अत्यावश्यक आहे, अशी माहिती श्री. भोसले यांनी दिली आहे.

संमेलनाबाबत पुणेकरांच्या अपेक्षा पूर्ण करेन : मुरलीधर मोहोळ

संमेलनाच्या साहित्य परिषदेतील संपर्क कार्यालयाचे मुरलीधर मोहोळ यांच्या हस्ते उद्घाटन

पुणे : पुण्याने देशामध्ये स्वत:ची एक वेगळी ओळख निर्माण केली आहे. पुणे विद्येचे माहेरघर, सांस्कृतिक राजधानी आणि साहित्याची भूमी समजली जाते. विचारांची-इतिहासाची वारसा असलेली ही भूमी आहे. संमेलनाच्या सरकार्यवाहपदाची जबाबदारी सांभाळताना मी कुणी साहित्यिक अथवा अभ्यासक या भूमिकेतून कार्य करणार नसून मी एक कार्यकर्ता या भूमिकेतून जबाबदारीच्या जाणीवेने, आत्मियता जपत पुणेकरांच्या अपेक्षा पूर्ण करेन, अशी ग्वाही केंद्रीय सहकार आणि नागरी विमान वाहतूक राज्यमंत्री मुरलीधर मोहोळ यांनी दिली.

सरहद, पुणेतर्फे दिल्ली येथे आयोजित करण्यात आलेल्या 98व्या अखिल भारतीय मराठी साहित्य संमेलनाचे पुण्यातील संपर्क कार्यालय साहित्य परिषदेत सुरू करण्यात आले असून त्याचे उद्घाटन आज (दि. 2) मोहोळ यांच्या हस्ते झाले. त्या वेळी ते बोलत होते. महाराष्ट्र साहित्य परिषदेच्या माधवराव पटवर्धन सभागृहात उद्घाटनाचा कार्यक्रम झाला. संमेलनाच्या सरकार्यवाहपदी नेमणूक केल्याबद्दलचे पत्र मंत्री मोहोळ यांना महाराष्ट्र साहित्य परिषदेचे कार्याध्यक्ष प्रा. मिलिंद जोशी, प्रमुख कार्यवाह सुनिताराजे पवार, सरहद पुणेचे अध्यक्ष संजय नहार, डॉ. सतिश देसाई, शैलेश पगारिया, सचिन ईटकर यांच्या प्रमुख उपस्थितीत देण्यात आले. पुणे शहरातील सांस्कृतिक घडामोडींचे नियमित वृत्तांकन करणाऱ्या माध्यम प्रतिनिधींचा, साहित्य सेवकांचा सत्कार या प्रसंगी मंत्री मोहोळ यांच्या हस्ते करण्यात आला. मानपत्र, स्मृतिचिन्ह आणि ग्रंथ असे सन्मानाचे स्वरूप होते.

साहित्य क्षेत्रातील वृत्तांकन करणाऱ्या माध्यम प्रतिनिधींच्या कार्याचा गौरव करून मंत्री मोहोळ पुढे म्हणाले, दिल्लीत होणाऱ्या साहित्य संमेलनाचे महत्त्व मोठे असून प्रत्येकाच्या मनात असलेली कार्यकर्त्याची भूमिका माझ्याही मनात आहे. यातूनच आत्मविश्वासपूर्णतेने साहित्य संमेलनाच्या यशस्वीततेसाठी मी बांधील आहे. पुण्याचा प्रतिनिधी आणि पुण्याविषयी आदरभाव जपत प्रामाणिकपणे चांगले काम करून माझ्या शहराचे नाव जपेन.

प्रा. मिलिंद जोशी म्हणाले, साहित्य संमेलन हा भाषिक उत्सव, भाषेची जत्र असते. हा उत्सव अधिक देखणा करण्यासाठी प्रत्येकाच्या मनात आदरभाव असून त्या दृष्टीने आम्ही कार्यरत आहोत. दिल्ली येथे होणारे साहित्य संमेलन प्रयोगशीलता आणि नाविन्यतेचा वापर करून संयोजक संजय नहार आणि त्यांचे सहकारी अधिक देखणे करतील.

प्रास्ताविकात संजय नहार म्हणाले, अखिल भारतीय मराठी साहित्य संमेलन हे असे व्यासपीठ आहे जेथे महाराष्ट्राची व्यापक भूमिका मांडली जाते. संयुक्त महाराष्ट्राच्या चळवळीनंतर दिल्लीत होणारे हे पहिले संमेलन आहे. दिल्लीत संमेलन आयोजित करण्याची संधी सरहद पुणेला मिळाली आहे, याचा आनंद आहे. दिल्लीत होणाऱ्या संमेलनामागे मराठी माणूस एक होत आहे ही संकल्पना जपली जात आहे.

शफी पठाण आणि प्रशांत गौमत यांनी माध्यम प्रतिनिधींच्या वतीने मनोगत व्यक्त केले. सुरुवातीस मंत्री मुरलीधर मोहोळ यांचा सत्कार प्रा. मिलिंद जोशी यांनी केला. कार्यक्रमाचे सूत्रसंचालन मिलिंद कुलकर्णी यांनी केले तर आभार लेशपाल जवळगे यांनी मानले.

सहस्त्र शंकर गीता पारायण समितीच्या  वतीने सोहळ्याचे आयोजन 
पुणे: सद्गुरू शंकरबाबा महाराज की जय… च्या जयघोषाने परिसर दुमदुमून गेला. शंकर महाराजांची महाआरती, महिमा, लिला, कथा, भजन आणि भक्तांना आलेली प्रचिती अशा विविधांगी अनुभूतीने एक दिवसीय सहस्त्र शंकरगीता पारायण सोहळा पुण्यात संपन्न झाला.  
सातारा रस्त्यावरील शिवछत्रपती शिवाजी मंगल कार्यालय धनकवडी येथे श्री स्वामी भक्त मठाधिपती गुरुवर्य दादा ठोंबरे यांच्या मार्गदर्शनाखाली श्री सद्गुरू शंकर बाबांच्या एक दिवसीय सहस्त्र शंकरगीता पारायण सोहळ्याचे आयोजन करण्यात आले. अनिल हगवणे, कमलेश दुबे, संतोष सपकाळ, तेजस मर्चंट, श्रीधर साळुंखे,  निरंजन जाधव, प्रदीप बधे यांनी सोहळ्यासाठी विशेष सहकार्य केले.
सहस्त्र शंकर गीता पारायण समितीच्या माध्यमातून शंकर बाबांच्या भक्त परिवारात हा पारायण सोहळा संपूर्ण वर्षभर कोणतेही मानधन न घेता साजरा केला जातो. आज पर्यंत हजारो भक्तांच्या घरी हा पारायण सोहळा संपन्न झालेला आहे. त्यातूनच नवीन वर्षाची सुरुवात स्वामीच्या बाबाच्या सेवेने होवो, हा उद्देश आहे.    

उपक्रमाचे हे तिसरे वर्ष आहे. महाराष्ट्रातील हा पहिला सहस्त्र शंकरगीता पारायण सोहळा असून सोहळ्यात महाराष्ट्रातील विविध जिल्ह्यातून हजारो भक्तांनी उपस्थिती लावली. सोहळ्यात सकाळी इष्टदैवत पीठ पूजन झाल्यानंतर शंकर गीता पारायणाला सुरुवात झाली. सायंकाळी महाआरती नंतर महाप्रसादाचे आयोजन करण्यात आले. त्यानंतर विविध भजनी मंडळांची भजन सेवा सादर झाली.

पुणे: कोरेगाव भीमा येथे २०७ व्या शौर्य दिनानिमित्त विजयस्तंभास अभिवादन करण्यासाठी आलेल्या लाखो भीमसैनिकांना आरोग्यसेवा पुरविण्यात आली. सिम्बायोसिस अभिमत विद्यापीठ व ‘सौ. शीला राज साळवे मेमोरिअल ट्रस्ट’ यांच्यातर्फे कोरेगाव भीमा येथे ‘भीमरुग्ण सेवा’ आरोग्य शिबिराचे आयोजन केले होते.या आरोग्य शिबिराचे उद्घाटन पुण्याचे नगर अभियंता प्रशांत वाघमारे यांच्या हस्ते झाले. प्रसंगी पाणी पुरवठा विभागाचे अभियंता सुरेश साखरे, सुशील मोहिते, ऍड. अतुल राज साळवे आदी मान्यवर उपस्थित होते. आरोग्य तपासणी, गोळ्या-औषधांचे वाटप, वेदनाशामक औषधे वाटप करण्यात आली.
प्रशांत वाघमारे यांनी या उपक्रमाचे कौतुक केले. देशभरातून आलेल्या भीमसैनिकांना सामाजिक बांधिलकीच्या भावनेतून आरोग्य सेवा पुरविण्याचे कार्य कौतुकास्पद आहे. सिम्बायोसिस विद्यापीठ आणि साळवे मेमोरियल ट्रस्टने नेहमीच अशा उपक्रमांमध्ये पुढाकार घेतेलेला आहे. या उपक्रमामुळे हजारो लोकांची सेवा झाली आहे. विजयस्तंभाला अनोख्या पद्धतीने केलेले अभिवादनच आहे, असे वाघमारे म्हणाले.
ऍड. अविनाश राज साळवे म्हणाले, “शौर्य दिनानिमित्त विजयस्तंभास मानवंदना देण्यासाठी खेड्यापाड्यातून कोरेगाव भीमा येथे लाखो भीमसैनिक येतात. अनेकजण पायी चालत येत असतात. अशा सर्वांना अभिवादन स्थळी आरोग्य सुविधा पुरवण्याच्या उद्देशाने या ‘भीमरूग्ण सेवा’ आरोग्य शिबिराचे आयोजन केले जाते. हजारो लोकांवर उपचार केल्याचे समाधान मिळते.”सिम्बायोसिस’चे संस्थापक पद्मभूषण डॉ. शां. ब. मुजुमदार व साळवे मेमोरियल ट्रस्टचे प्रमुख ऍड. अविनाश राज साळवे यांच्या मार्गदर्शनाखाली आयोजित या आरोग्य शिबिरात हजारो भीमसैनिकांनी औषधोपचाराचा लाभ घेतला. गेल्या सहा वर्षांपासून आरोग्यसेवेतून विजयस्तंभास मानवंदना देण्याचा उपक्रम या दोन्ही संस्थांकडून राबविण्यात येत आहे.

पुणे, दि. ०२ जानेवारी २०२५: पुणे परिमंडलामध्ये दरमहा वीजविक्रीचा महसूल आता १९०० कोटींवर गेला आहे. या महसूलाची वसूली करताना शून्य थकबाकीला प्राधान्य द्यावे व कोणत्याही परिस्थितीत चालू वीजबिलांची १०० टक्के वसूली करावी. तसेच नवीन वीजजोडणी, ‘सौर’शी संबंधित विविध योजना, अचूक बिलिंग आदींच्या माध्यमातून ग्राहकसेवा आणखी गतिमान करावी असे निर्देश महावितरणचे मुख्य अभियंता श्री. राजेंद्र पवार यांनी दिले.

रास्तापेठ येथील ‘प्रकाशदूत’ सभागृहात बुधवारी (दि. २) पुणे परिमंडलातील विविध कामांचा मुख्य अभियंता श्री. पवार यांनी आढावा घेतला. पुणे परिमंडलातील सर्व अधिकारी व कर्मचार्‍यांनी कृती मानकांनुसार निश्चित केलेल्या कालावधीत तत्पर ग्राहक सेवा देण्यासाठी अधिक सजग व सज्ज राहावे तसेच ज्या शाखा कार्यालयांचे ग्राहकसंख्येनुसार विभाजन करणे आवश्यक आहे तसे प्रस्ताव त्वरित सादर करावेत अशी सूचना यावेळी त्यांनी केली.

मुख्य अभियंता श्री. पवार यांनी सांगितले, की सद्यस्थितीत पुणे परिमंडलामध्ये २४३ कोटी रुपयांच्या वीजबिलांची थकबाकी आहे. या थकबाकीसोबतच चालू वीजबिलांची १०० टक्के वसूली करणे क्रमप्राप्त आहे. ग्राहकसेवेच्या बाबतीत पुणे परिमंडलाची कामगिरी उंचावत आहे. नवीन वीजजोडण्या देण्याचा मासिक वेग १६ हजारांवरून २० हजारांवर गेला आहे. नवीन वीजमीटर मुबलक प्रमाणात उपलब्ध आहेत. त्यामुळे ज्या ठिकाणी इन्फ्राची गरज नाही तेथे कोटेशनचा भरणा केल्यानंतर तात्काळ वीजजोडणी देण्यात यावी. अचूक बिलिंगमध्ये सातत्याने सुधारणा होत आहे त्याचे प्रमाण वाढून ९५.५२ टक्क्यांवर गेले आहे. वीजग्राहकांची डिजिटल ग्राहकसेवेला पसंती वाढत असून दरमहा राज्यात सर्वाधिक सरासरी ८३ टक्के लघुदाब वीजबिलांचा भरणा ऑनलाइनद्वारे होत आहे. तसेच गो-ग्रीन योजनेला पुण्यातील वीजग्राहकांनी राज्यात सर्वाधिक पसंती दिली आहे.  

पुणे परिमंडलामध्ये भविष्यातील वीजसेवेसाठी प्रस्तावित अतिउच्चदाबाच्या २१ पैकी ८ उपकेंद्रांना महावितरणकडून मंजूरी मिळाली आहे. तत्पर ग्राहकसेवेसाठी भोसरी, चाकण उपविभागांचे विभाजन करून नवीन उपविभाग व शाखा कार्यालये तसेच नगररोड विभागात नवीन लोहगाव व चंदननगर शाखा कार्यालयांना मंजूरी मिळाली आहे, अशी माहिती मुख्य अभियंता श्री. पवार यांनी दिली.

‘सौर’च्या माध्यमातून पारंपरिककडून अपारंपरिक ऊर्जानिर्मितीकडे नव्या परिवर्तनाचा वेगवान प्रवास सुरू झाला आहे. यातील पीएम सूर्यघर मोफत वीज योजना व इतर ‘सौर’ योजनांच्या अंमलबजावणीमध्ये आणखी वेग द्यावा असे निर्देश मुख्य अभियंता श्री. पवार यांनी दिले. यावेळी सहायक महाव्यवस्थापक (वित्त) सौ. माधुरी राऊत, कार्यकारी अभियंता श्री. धनराज बिक्कड (प्रशासन) तसेच सर्व विभागांचे कार्यकारी अभियंता, अधिकारी उपस्थित होते.

जाधवर ग्रुप आॅफ इन्स्टिटयूटस्, न-हे, पुणे तर्फे आयोजन ; सहा क्रीडाप्रकारांचा सहभाग
पुणे : जाधवर ग्रुप आॅफ इन्स्टिटयूटस्, तर्फे दुस-या जाधवर आंतरशालेय क्रीडा महोत्सवाचे आयोजन करण्यात आले आहे. दिनांक ६ ते ११ जानेवारी २०२५ दरम्यान मानाजीनगर न-हे येथील डॉ. सुधाकरराव जाधवर शैक्षणिक संकुल – १ येथे या क्रीडा स्पर्धा होणार आहेत. महोत्सवांतर्गत विजेते खेळाडू व संघांना ८० हजार रुपयांची पारितोषिके देण्यात येणार आहेत, अशी माहिती जाधवर ग्रुप आॅफ इन्स्टिटयूटस्चे उपाध्यक्ष अ‍ॅड. शार्दुल जाधवर यांनी पत्रकार परिषदेत दिली. 
क्रीडा महोत्सवांतर्गत सहा क्रीडा प्रकारांत स्पर्धा होणार आहेत. इनडोअर मध्ये बुद्धीबळ, टेबल टेनिस आणि तायक्वांदो तसेच आऊटडोअर मध्ये व्हॉलिबॉल, रस्सीखेच, कबड्डी या खेळांच्या स्पर्धा होणार आहेत. स्पर्धेत १४ वर्षाखालील आणि १७ वर्षाखालील अशा दोन गटांत स्पर्धकांना सहभागी होता येणार आहे. 
अ‍ॅड. शार्दुल जाधवर म्हणाले, शालेय अभ्यासाप्रमाणे शारीरिक तंदुरुस्ती देखील तितकीच गरजेची आहे. त्यामुळे संस्थेतर्फे जाधवर करंडक, विविध स्पर्धा, युवा संसद यांसह आंतरशालेय क्रीडा महोत्सवाचे देखील आयोजन करण्यात आले आहे. यामध्ये पुणे शहर, पिंपरी-चिंचवड व पुणे जिल्ह्यातील स्पर्धक तसेच शाळांचे संघ सहभागी होत आहेत. क्रीडा क्षेत्राला प्रोत्साहन देत आंतरराष्ट्रीय स्तरावरील खेळाडू घडावेत, याकरिता अशा महोत्सवांचे आयोजन संस्था सातत्याने करीत आहे. 
महोत्सवात सहभागाची अंतिम तारीख ४ जानेवारी असून ८२०८८४८२४४, ९६३७८०५१४३ या क्रमांकावर संपर्क साधावा. तसेच विद्यार्थ्यांनी मोठया संख्येने सहभागी व्हावे, असे आवाहनही त्यांनी केले.

पुणे-पुणे फिल्म फाउंडेशन, सांस्कृतिक कार्य विभाग, महाराष्ट्र शासन व दादासाहेब फाळके चित्रनगरी, मुंबई यांच्या संयुक्त विद्यमाने आयोजित २३वा पुणे आंतरराष्ट्रीय चित्रपट महोत्सव २०२५ यंदा १३ ते २० फेब्रुवारी या कालावधीत पीव्हीआर, पॅव्हिलियन मॉल, आयनॉक्स – बंडगार्डन आणि सिनेपोलीस-औंध येथे ११ स्क्रीनस मध्ये आयोजित करण्यात आला आहे. या चित्रपट महोत्सवात जागतिक व मराठी चित्रपट स्पर्धात्मक विभाग आणि अन्य विभाग यांमध्ये सुमारे १५० हून अधिक देशी विदेशी चित्रपट रसिक प्रेक्षकांना बघता येतील. शोमैन राज कपूर यांची १००वी जयंती ही या वर्षीची थीम असणार आहे. सर्वांसाठी कॅटलॉग फी ८००/- असून याची नाव नोंदणी www.piffindia.com यावर दि. १५ जानेवारी पासून सुरु होत आहे, अशी माहिती ज्येष्ठ चित्रपट दिग्दर्शक व पुणे फिल्म फाउंडेशनचे चेअरमन डॉ. जब्बार पटेल यांनी पत्रकार परिषेदत दिली. याप्रसंगी ज्येष्ठ चित्रपट समीक्षक व चित्रपट निवड समितीचे अध्यक्ष समर नखाते, विश्वस्त डॉ. मोहन आगाशे, विश्वस्त डॉ. सतीश आळेकर, चित्रपट निवड समितीचे सदस्य अभिजीत रणदिवे, उपसंचालक विशाल शिंदे (प्रोग्रॅम व फिल्म), उपसंचालक अदिती अक्कलकोटकर (आंतरराष्ट्रीय संपर्क व समन्वय) उपस्थित होते.

जागतिक चित्रपट स्पर्धात्मक विभागात यंदा १०७ देशांमधील १०५० हून अधिक चित्रपटांनी सहभाग नोंदवला होता. परीक्षक मंडळाने हे सर्व चित्रपट बघून त्यातील १४ चित्रपटांची अंतिम फेरीसाठी निवड केली आहे. अंतरराष्ट्रीय ज्युरींमार्फत अंतिम फेरीतील हे १४ चित्रपट बघून सर्वोत्कृष्ट आंतराष्ट्रीय चित्रपट निवडला जाईल. त्यास ‘महाराष्ट्र शासन संत तुकाराम सर्वोत्कृष्ट आंतरराष्ट्रीय चित्रपट पुरस्कार’ – १० लाख रुपये देऊन समारोप कार्यक्रमात गौरवले जाईल.

यंदा जागतिक चित्रपट स्पर्धा विभागात निवडण्यात आलेल्या १४ चित्रपटांची यादी पुढील प्रमाणे :

१. डार्केस्ट मीरियम, दिग्दर्शक – नाओमी जये, कॅनडा
२. ऑन द इन्वेंशन ऑफ स्पीशीज़, दिग्दर्शक – तानिया हरमीड, इक्वाडोर, क्यूबा
३. टू अ लँड अननोन, दिग्दर्शक – मह्दी फ्लेफेल, युनायटेड किंगडम, फ्रान्स, जर्मनी, नेदरलँड, ग्रीस, कतार, सौदी अरेबिया, पॅलेस्टाईन
४. ग्रैंड टूर, दिग्दर्शक – मिगुएल गोम्स, पोर्तुगाल, इटली, फ्रान्स
५. अरमंड, दिग्दर्शक – हलफदान उल्लमांन तोंडेल, नॉर्वे, नेदरलँड, जर्मनी, स्वीडन
६. सेक्स, दिग्दर्शक – डॅग जोहान हाउगेरूड, नॉर्वे
७. इलेक्ट्रिक फील्ड्स, दिग्दर्शक – लिसा गेर्ट्सच, स्वित्झर्लंड
८. अंडर द वोल्केनो, दिग्दर्शक – डेमियन कोकूर, पोलंड
९. ए ट्रॉवेलर्स नीड्स, दिग्दर्शक – हाँग सांगसू , दक्षिण कोरिया
१०. ब्लैक टी, दिग्दर्शक – अब्दर्रहमान सिसाको, फ्रान्स, मॉरिटानिया, लक्झेंबर्ग, तैवान, आयव्हरी कोस्ट
११. सम रेन मस्ट फॉल, दिग्दर्शक – यांग क्यू, चीन, अमेरिका, फ्रान्स, सिंगापूर
१२. एप्रिल, दिग्दर्शक – डी कुलुंबेगश्वील, फ्रान्स, इटली, जॉर्जिया
१३. थ्री किलोमीटर्स टू द एंड ऑफ द वर्ल्ड्स, दिग्दर्शक – एमानुअल पर्वू , रोमानिया
१४. इन रिट्रीट, दिग्दर्शक – मैसम अली, इंडिया

पुणे – प्राध्यापकांची भरती विद्यापीठ स्तरावर करण्याचा विचार महायुती सरकार करत असून, हे धोरण काँग्रेसला मान्य नाही. प्राध्यापकांची भरती महाराष्ट्र लोकसेवा आयोग (एमपीएससी) मार्फतच व्हावी, अशी मागणी महाराष्ट्र प्रदेश काँग्रेसचे उपाध्यक्ष, माजी आमदार मोहन जोशी यांनी मा.राज्यपालांकडे केली आहे. तसेच मा.मुख्य मंत्री देवेंद्रजी फडणवीस, आणि महाराष्ट्र लोकसेवा आयोगाचे अध्यक्ष यांच्याकडेही पत्राद्वारे केली आहे.

प्राध्यापकांची भरती एमपीएससी मार्फत करण्याची प्रक्रिया पारदर्शी असून, या प्रक्रियेत गुणवत्ता, जातीनिहाय आरक्षण आणि याचबरोबर भ्रष्टाचारमुक्त निवड केली जाते. याकरिता महाराष्ट्रातील प्राध्यापकांची भरती एमपीएससी मार्फत करणे गरजेचे आहे, असे मोहन जोशी यांनी म्हटले आहे.

महाराष्ट्रातील विद्यापीठे राज्य सरकारच्या अखत्यारीत येतात. त्यांचे प्रमुख राज्यपाल असतात. विद्यापीठात रिक्त जागा तयार झाल्यानंतर त्या राज्य शासनाच्या सामान्य प्रशासन विभागाला कळवून मुख्य मंत्र्यांच्या संमतीने आयोगाला कळविल्या जातात. त्यानंतर आयोगामार्फत भरतीची प्रक्रिया राबविली जाते. ही पद्धत पारदर्शी आहे. तसेच कायद्यानुसारही ही प्रक्रिया विशिष्ट कालावधीत करणे आयोगाला बंधनकारक आहे, असे निवेदनात म्हटले आहे. विद्यापीठ स्तरावर भरती केल्यास ही प्रक्रिया पारदर्शी न रहाता, त्यात भ्रष्टाचाराला वाव राहील. गुणवत्तेला महत्त्व रहाणार नाही, अशी शक्यता आहे, याकरिता विद्यापीठ स्तरावर भरती करण्याला काँग्रेस पक्षाचा विरोध राहील, असे मोहन जोशी यांनी पत्रात म्हटले आहे.

पुणे : सामाजिक क्षेत्रात योगदान देणाऱ्या रोटरी क्लबतर्फे शनिवारी (दि. 4) आणि रविवारी (दि. 5) पुण्यात पहिले रोटरी मराठी साहित्य संमेलन होत आहे. प्रसिद्ध कादंबरीकार विश्वास पाटील यांच्या अध्यक्षतेखाली होत असलेल्या संमेलनात साहित्यिक चर्चा घडणार असून विविध विषयांवर परिसंवादात मान्यवरांची मते ऐकावयास मिळणार आहेत. गप्पा, कविसंमेलन, प्रहसने आणि संगीत नाटकाचेही आयोजन करण्यात आले आहे.
कोथरूडमधील यशवंतराव चव्हाण नाट्यगृहात अखिल भारतीय मराठी साहित्य संमेलनाच्या धर्तीवर पहिले रोटरी साहित्य संमेलन होणार आहे. दि. 4 रोजी सकाळी 9:15 वाजता ग्रंथदिंडीने संमेलनाची सुरुवात होणार असून उद्घाटन समारंभ सकाळी 10 वाजता आयोजित करण्यात आला आहे. संमेलनाचे उद्घाटन प्रसिद्ध क्रिकेटपटू पद्मभूषण चंदू बोर्डे यांच्या हस्ते होणार आहे. खासदार प्रा. डॉ. मेधा कुलकर्णी, उच्च व तंत्रशिक्षण मंत्री चंद्रकांत पाटील, महापालिका आयुक्त राजेंद्र भोसले, महाराष्ट्र साहित्य परिषदेचे कार्याध्यक्ष प्रा. मिलिंद जोशी, नॅशनल बुक ट्रस्टचे विश्वस्त राजेश पांडे, नगरसेवक जयंत भावे, उपप्रांतपाल मोहन पालेशा, डि. लर्निंग जिल्हा प्रशिक्षक पंकज शहा, संतोष मराठे, नितीन ढमाले यांची प्रमुख उपस्थिती असणार आहे. सकाळी 11:30 वाजता संमेलनाध्यक्ष विश्वास पाटील यांच्या मुलाखतीचा कार्यक्रम आयोजित करण्यात आला आहे. दुपारी 2:45 वाजता ‌‘यशस्वी लेखनाची सूत्रे‌’ या विषयावर परिसंवाद, दुपारी 4:15 वाजता ‌‘मन:शांती‌’ हे प्रहसन, सायंकाळी 4:30 वाजता रोटरियन्सचा सहभाग असलेले निमंत्रितांचे कविसंमेलन होणार आहे. तर रात्री 8:30 वाजता ‌‘संगीत कट्यार काळजात घुसली‌’ या नाटकाचा प्रयोग आयोजित करण्यात आला आहे.
संमेलनाच्या दुसऱ्या दिवसाची सुरुवात शिववंदना नृत्याने होणार असून सकाळी 10 वाजता प्रसिद्ध व्यंगचित्रकार शि. द. फडणीस यांचा रोटरी व्होकेशनल एक्सलन्स ॲवॉर्डने सन्मान करण्यात येणार आहे. सकाळी 11 वाजता अशोक नायगावकर यांच्या मुलाखतीचा कार्यक्रम होणार असून दुपारी 2 वाजता ‌‘ऑफिस ऑफिस‌’ हे प्रहसन सादर करण्यात येणार आहे. त्यानंतर दुपारी 2:15 वाजता ए. आय.चा साहित्यावर परिणाम होईल का? या विषयावर परिसंवाद आणि दुपारी 3:45 वाजता ‌‘आगलावे वि. पेटवे‌’ हे प्रहसन सादर होणार आहे. ग. दि. माडगूळकर यांच्या गीतांवर आधारित ‌‘अमृतसंचय‌’ हा सांगीतिक कार्यक्रम दुपारी 4 वाजता आयोजित करण्यात आला आहे. सायंकाळी 5:30 वाजता प्रसिद्ध राजकीय विश्लेषक भाऊ तोरसेकर यांच्या समवेत गप्पांचा कार्यक्रम होणार आहे. या प्रसंगी सहकार आणि नागरी विमान वाहतूक केंद्रीय राज्यमंत्री मुरलीधर मोहोळ यांची उपस्थिती असणार आहे. त्यानंतर संमेलनाध्यक्ष विश्वास पाटील आणि प्रांतपाल शितल शहा, सूर्यकांत वझे यांच्या प्रमुख उपस्थितीत समारोप समारंभ आयोजित करण्यात आला आहे.

पुणे, दि. २: पुणे जिल्ह्याचे जिल्हाधिकारी म्हणून जितेंद्र डूडी यांनी आज पदभार स्वीकारला. यावेळी मावळते जिल्हाधिकारी डॉ. सुहास दिवसे यांनी त्यांचे स्वागत करून त्यांच्याकडे पदभार सोपवला.

जिल्हाधिकारी श्री. डुडी यांनी यापूर्वी सन २०१९ मध्ये सहायक जिल्हाधिकारी तथा प्रकल्प अधिकारी एकात्मिक आदिवासी विकास प्रकल्प कार्यालय तळोदा, नंदूरबार, सन २०१९ ते २०२० या कालावधीत सहायक जिल्हाधिकारी मंचर तथा प्रकल्प अधिकारी एकात्मिक आदिवासी विकास प्रकल्प कार्यालय घोडेगाव, पुणे तर सांगली जिल्हा परिषदचे मुख्य कार्यकारी अधिकारी आणि सातारा जिल्हाधिकारी या पदावर काम केले आहे.

श्री. डूडी यांच्या सेवा कालावधीत पोषण अभियानातंर्गत ५ व्या राष्ट्रीय पोषण महिन्यात अधिकाधिक उपक्रम राबवून उल्लेखनीय कामगिरी केल्याबद्दल राज्यात तृतीय पुरस्काराने त्यांना सन्मानित करण्यात आले. तसेच राष्ट्रीय मतदान दिन २०२४ च्यावेळी पुणे विभागात उत्कृष्ट जिल्हा निवडणूक अधिकारी म्हणून प्रथम पुरस्कारानेही त्यांना सन्मानित करण्यात आले आहे.