: गौरी जोशी, डॉ.अमृता चांदोरकर यांना यंदाचे महिला उद्योजिका पुरस्कार प्रदान : याज्ञवल्क्य उद्योजक विकास अभियान तर्फे आयोजन
पुणे : देशाच्या जीडीपीमध्ये घरामध्ये काम करणाऱ्या महिलेचे योगदान आपण मोजत नाही. भारतात उद्योग क्षेत्रात २० टक्के महिला कार्यरत असून जीडीपी च्या १७ टक्के महिलांचे योगदान आहे. महिला अनेक अडचणींचा सामना करून उद्योग क्षेत्रात स्थान निर्माण करतात. त्यामुळे महिलांनी एकमेकींना आधार देऊन पुढे जायला हवे. तसेच स्वतःमधील संवेदनशीलतेला आपली ताकद बनवावी, असे मत खासदार डॉ.मेधा कुलकर्णी यांनी व्यक्त केले.

शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळाचा उपक्रम असलेल्या याज्ञवल्क्य उद्योजक विकास अभियान (युवा) तर्फे महिला उद्योजिका पुरस्कार २०२६ वितरण सोहळ्याचे आयोजन करण्यात आले. सेनापती बापट रस्त्यावरील मराठा चेंबर ऑफ कॉमर्सच्या सुमंत मुळगावकर सभागृहात आयोजित कार्यक्रमाला संस्थेचे कार्याध्यक्ष विश्राम कुलकर्णी, दिलीप कुंभोजकर आदी उपस्थित होते.

सोहळ्यांतर्गत स्वयंसिद्धा पुरस्कार जी.आर. इंजिनिअरींगच्या संचालिका गौरी जोशी यांना आणि युवा उद्योजिका पुरस्कार निरामय वेलनेस च्या संचालिका डॉ.अमृता चांदोरकर यांना प्रदान करण्यात आला. सन्मानचिन्ह, मानपत्र, शाल, श्रीफळ असे पुरस्काराचे स्वरूप होते.

युवा उपक्रमांतर्गत कै.सौ.सावित्रीबाई नारायण जोशी स्मरणार्थ स्वयंसिद्धा पुरस्कार आणि कै.मनोरमा शामराव कुंभोजकर स्मरणार्थ युवा उद्योजिका पुरस्कार दिला जातो. संस्थेच्या माणिक सुपेकर, प्रतिभा संगमनेरकर, डॉ.स्वाती कुलकर्णी, श्रीकांत जोशी, उपेंद्र केळकर, मंजुषा वैद्य आदींनी कार्यक्रमाचे आयोजन केले.

पुरस्काराला उत्तर देताना गौरी जोशी म्हणाल्या, विश्वास, दर्जा आणि मेहनत या त्रिसूत्रीच्या जोरावर आम्ही यशस्वी होत आहोत. राज्याच्या कानाकोपऱ्यात उद्योजकता वाढावी, याकरिता प्रयत्न करणार असल्याचे त्यांनी सांगितले.

अमृता चांदोरकर म्हणाल्या, ‘निरामय’ वेलनेस मध्ये आलेल्यांच्या विचारांवर आम्ही काम करतो. एखाद्या व्याधीतून बरे व्हायचे असेल, तर चांगला विचार करायला हवा. विना औषध, विना स्पर्श उपचार ही संकल्पना घेऊन आम्ही कार्यरत आहोत. ऊर्जेच्या प्राचीन शास्त्रात आमचे काम सुरु असले तरी देखील आधुनिक युगात ते उपयोगी पडत आहे, असा विश्वास त्यांनी व्यक्त केला.

विश्राम कुलकर्णी म्हणाले, सन १९४० साली संस्थेची स्थापना झाली. संस्थेला आता ८५ वर्षे पूर्ण होत आहेत. संस्थेचे विविध उपक्रम सुरु आहेत. त्यामध्ये विद्यार्थांना खाद्य सबसिडी, वेद विद्या संवर्धन, वधू वर सूचक मंडळ, उद्योजकता विकास असे अनेक उपक्रम संस्था राबवीत आहे.

पुरस्कार वितरण कार्यक्रमानंतर व्यवसायिक व नोकरदार महिलांसाठी ‘व्यावसायिक कार्यामध्ये शिष्टाचार’ या एका महत्त्वाच्या सत्राचे आयोजन करण्यात आले. यामध्ये डॉ. जयश्री फडणवीस मार्गदर्शन केले. युवा उपक्रमाबद्दल श्रीकांत जोशी यांनी माहिती दिली. माणिक सुपेकर यांनी सूत्रसंचालन केले.प्रतिभा संगमनेरकर यांनी आभार मानले.

उपसभापती डॉ. नीलम गोऱ्हे यांच्या उपस्थितीत विविध मागण्या; शेतकरी महिलांना जमिनीच्या अधिकारासाठी शासन प्रयत्नशील

पुणे.दि.१४: महिला दिनाच्या औचित्याने संतुलन संस्था महाराष्ट्रतर्फे वाघोली येथे २८व्या ‘भव्य कष्टकरी शेतकरी महिला परिषद’चे आयोजन करण्यात आले. या परिषदेला महाराष्ट्र विधानपरिषदेच्या उपसभापती व शिवसेना नेत्या डॉ. नीलम गोऱ्हे प्रमुख अतिथी म्हणून उपस्थित होत्या.

डॉ. गोऱ्हे यांनी मार्गदर्शन करताना सांगितले की, महिलांची सामाजिक सक्षमता पूर्वीपेक्षा वाढली आहे. ‘लाडक्या बहिणी’ योजनेअंतर्गत दिला जाणारा भत्ता महिलांना आर्थिकदृष्ट्या सक्षम करत आहे. अनेक महिलांनी या योजनेचा योग्य वापर केल्याची उदाहरणे समोर आली आहेत. अर्थसंकल्पात एकल महिलांच्या धोरणाची अंमलबजावणी करण्याचा निर्णय घेण्यात आला आहे.

महिलांच्या नावाने घर देण्याचा आणि आदिवासी जमिनीचे पट्टे पती-पत्नी दोघांच्या नावाने करण्याचा मुद्दा विधानभवनात उपस्थित झाला असून, सरकारने याची काटेकोर अंमलबजावणी करण्याचे आश्वासन दिले आहे. एकटी पत्नी असल्यास तिच्या नावाने जमीन करण्याची प्रक्रिया सुरू आहे. यासंदर्भात आणखी कोणते मुद्दे असावेत, याबाबत महिलांनी आपले मत कळवावे, असे आवाहन त्यांनी केले.

वृद्ध महिलांसाठी पेन्शन, गरिबांसाठी घरे उपलब्ध करणे, वृद्धपकाळीन योजनांचे एकत्रीकरण आदी मुद्द्यांवर शासनस्तरावर पाठपुरावा केला जाईल तसेच कष्टकरी आणि दगडखाण कामगार महिलांचा दक्षता समितीत समावेश करण्याचा विचार करण्यात येईल. दगडखाण कामगारांच्या कार्यक्रमांसाठी निशुल्क सभागृह उपलब्ध करून देण्यात येईल. बचत गटातील महिलांनी नवीन कर्जाऐवजी बँकेतील ठेवींवर कर्ज घेण्यास प्राधान्य द्यावे आणि व्याजाच्या आमिषाला बळी पडू नये, असे डॉ. गोऱ्हे यांनी सांगितले. बांधकाम विकास महामंडळाची समिती नसेल तर उपमुख्यमंत्री एकनाथ शिंदे यांच्याशी त्यासंदर्भात चर्चा केली जाईल असे त्यांनी नमूद केले.

दगडखाण कामगार विकास परिषद महाराष्ट्र अध्यक्ष ऍड. बी. एम. रेगे यांनी, डॉ. गोऱ्हे यांच्या मार्गदर्शनामुळे खाण कामगारांच्या प्रश्नांना न्याय मिळत असल्याचे सांगितले. त्या कष्टकरी महिलांचा खरा आवाज आहेत, असे त्यांनी नमूद केले.

या परिषदेत शेतकरी महिलांच्या नावे जमिनीवर प्रथम नोंदणी, शाळकरी मुलींसाठी मोफत बस पास व सायकल योजना, वृद्ध महिलांसाठी दरमहा १० हजार रुपये पेन्शन, दगडखाण कामगारांच्या गायरान जमिनीवर घरे, बांधकाम विकास महामंडळात प्रतिनिधित्व आदी मागण्यांसह ठराव जाहीर करण्यात आला. हा ठराव डॉ. गोऱ्हे यांच्याकडे सुपूर्द करण्यात आला.

कार्यक्रमात ‘आपला विकास आपल्या हाती’ या पुस्तकाचे प्रकाशन डॉ. गोऱ्हे यांच्या हस्ते झाले.

यावेळी संतुलन संस्थेच्या अध्यक्षा वंदना भुजबळ, परिषद अध्यक्षा ऍड. पल्लवी रेगे, एस एम जोशी सोशालिस्ट फाउंडेशनचे अध्यक्ष सुभाष वारे, नगरसेवक रामभाऊ दाभाडे, शैलेंद्र बनसोडे, हेमंत बत्ते, पुणे बार असोसिएशनच्या उपाध्यक्ष प्रीती परदेशी, ऍड. अंजली बांदल, रिंकू मोरे, अनिता परदेशी आदी उपस्थित होते.

पुणे : घरगुती गॅस सिलेंडर ची दरवाढ रद्द करून, गॅस पुरवठा सुरळीत करा, अशा मागणीसाठी पुणे शहर महिला काँग्रेसच्या वतीने बालगंधर्व चौकात रस्त्यावर चूल पेटवून आज (शनिवारी) संध्याकाळी आंदोलन करण्यात आले.

पुणे शहर महिला काँग्रेसच्या अध्यक्षा स्वातीताई शिंदे यांच्या नेतृत्वाखाली आंदोलन करण्यात आले. चौकात पारंपरिक पद्धतीने शेणाने सारवून शेणाच्या गोवऱ्यांचा ढीग रचून चूल मांडण्यात आली आणि त्यावर महिला कार्यकर्त्यांनी स्वयंपाक केला.

महागाईमुळे गरीब, मध्यमवर्गीय, कष्टकरी महिला वर्ग आधीच पिचला आहे. त्यातच अचानकपणे घरगुती गॅस सिलेंडर चे दर ६० रुपयांनी वाढविण्यात आले. सरकारचा हा निर्णय अनाकलनीय आहे. गॅस सिलेंडर अभावी हॉटेल्स बंद पडत आहेत. घरगुती गॅस सिलेंडर महाग झाला असून तो वेळेवर मिळणेही अवघड झाले आहे. सरकारच्या नियोजनशून्य कारभारामुळे हे घडत आहे., त्याचा आम्ही निषेध करत आहोत, असे स्वातीताई शिंदे यांनी आंदोलकांसमोर बोलताना सांगितले.

गॅस दरवाढीच्या विरोधात महिला कार्यकर्त्यांनी हातात फलक घेऊन आंंदोलन केले. ‘महागाईला आळा घाला, गॅस सिलेंडर स्वस्त करा’, ‘जनतेची लूट थांबवा, गॅस दर कमी करा’, गॅसच्या किंमती कमी करा, नाहीतर खुर्ची खाली करा’ अशा घोषणा फलकांवर लिहीलेल्या होत्या.

आंदोलनात स्वातीताई शिंदे यांच्या समवेत नगरसेविका अश्विनी लांडगे, अनिता मकवाना, रेखा जैन, ॲड.अंजली देसाई, ॲड.राजश्री दामले-चव्हाण, कल्पना शिंदे, ज्योती अडागळे, गितांजली प्रकाश, दिपाली पवार, मनोरमा चौधरी, वर्षा सपकाळ आदी पदाधिकारी आणि कार्यकर्त्यां मोठ्या संख्येने उपस्थित होत्या.

पुणे- लोहगाव विमानतळाच्या परिसरात रिक्षा आणि कॅब चालक हे प्रशासकीय संगनमताने प्रवाश्यांची बेसुमार लुबाडणूक करताना दिसत असून इथे कारवाईस अक्षम असल्याचे RTO आणि वाहतूक पोलीस सांगतात ,दरम्यान पोलिसांच्या वाहतूक शाखेने स्वारगेट परिसरात अवैध प्रवासी रिक्षांविरुद्ध विशेष मोहीम राबवली. आणि २ दिवसात ३७५ रिक्षांवर कारवाई केली . तुम्ही तुमच्या घरून लोहगाव येथील विमानतळावर जर रिक्षा मीटर ने २०० रुपयात पोहोचत असाल तर परत येताना मात्र रिक्षा मीटरवर येत नाही तेथून परत यायला तुम्हाला किमान ५०० ते १००० रुपये मोजावे लागतात अशी स्थिती लोहगाव विमानतळावर आहे . विशेष म्हणजे प्रीपेड रिक्षा कॅब येथून उपलब्ध असूनही त्यांच्याही मार्फत प्रवाश्यांची अशी लुबाडणूक होत आहे . पार्किंग साठी एरोमोल ला भाडे द्यावे लागते हे कारण देऊन प्रीपेड रिक्षा कॅब चे दर येथून मीटरपेक्षा दुप्पट अडीचपट आकारण्यात येतात.मीटर वर येथून रिक्षा येतच नाही . RTO आणि वाहतूक पोलीस हे विमान प्राधिकरणाच्या अंतर्गत होत असल्याचे कारण सांगून अक्षम असल्याचे दर्शवित आहेत . आणि विमान प्राधिकरण आमच्याकडून प्रीपेड केंद्रापर्यंत जाण्यासाठी फ्री सेवा ठेवण्यात आल्याचे सांगून याकडे दुर्लक्ष करत आल्याचे दिसत आहे. PMPML च्या बस स्थानकापर्यंत पोहोचणे प्रवाश्यांना अडचणीचे कसे होईल या दृष्टीने येथून सारा कारभार चालतो आहे . आणि मेट्रो यायला अवधी आहे तोवर हि लुबाडणूक अशीच चालू राहील असे दिसते आहे.

दरम्यान पुणे पोलिसांच्या वाहतूक शाखेने स्वारगेट परिसरात अवैध प्रवासी रिक्षांविरुद्ध विशेष मोहीम राबवली. वाहतूक शिस्त राखण्यासाठी आणि प्रवाशांची गैरसोय टाळण्यासाठी ही कारवाई करण्यात आली असून, यामध्ये एकूण ३७५ केसेस नोंदवण्यात आल्या आहेत. जादा प्रवासी घेणे, भाडे नाकारणे, युनिफॉर्म न घालणे आणि वाहतुकीस अडथळा निर्माण करणे अशा विविध नियमभंगांवर कारवाई करण्यात आली, अशी माहिती वाहतूक पोलिस उपायुक्त हिम्मत जाधव यांनी दिली.

ही मोहीम स्वारगेट वाहतूक विभागामार्फत स्वारगेट जेधे चौक, स्वारगेट बसस्थानकाचे इनगेट-आउटगेट तसेच स्वारगेट महामेट्रो समोर या प्रमुख ठिकाणी राबवण्यात आली. १० मार्च २०२६ रोजी झालेल्या पहिल्या कारवाईत एकूण १४६ रिक्षांवर कारवाई करण्यात आली. यामध्ये जादा प्रवासी घेणाऱ्या १११ रिक्षाचालकांवर आणि भाडे नाकारणाऱ्या ३२ चालकांवर कारवाई झाली. तसेच, नियमभंग करणाऱ्या तीन फॉल्टी रिक्षा जप्त करण्यात आल्या.

यानंतर, १२ मार्च २०२६ रोजी स्वारगेट वाहतूक विभाग आणि पुणे प्रादेशिक परिवहन कार्यालय (आरटीओ) यांच्या संयुक्त पथकाने पुन्हा विशेष मोहीम राबवली. या कारवाईत स्वारगेट वाहतूक विभागाने एकूण १८६ केसेस नोंद केल्या. यामध्ये जादा प्रवासी घेणाऱ्या ९२ रिक्षा, भाडे नाकारणाऱ्या २१, युनिफॉर्म नसलेल्या ४८ तसेच वाहतुकीस अडथळा निर्माण करणाऱ्या १८ रिक्षाचालकांचा समावेश होता. यावेळी सात फॉल्टी रिक्षा जप्त करण्यात आल्या. याव्यतिरिक्त, आरटीओ पुणे यांनी ४३ प्रकरणांवर स्वतंत्र कारवाई केली.

या दोन्ही दिवसांच्या कारवाईत स्वारगेट वाहतूक विभाग आणि आरटीओ पुणे यांच्या संयुक्त मोहिमेत एकूण ३७५ केसेस नोंदवण्यात आल्या.

ही कारवाई पोलिस उपायुक्त (वाहतूक) यांच्या मार्गदर्शनाखाली स्वारगेट वाहतूक विभागाच्या प्रभारी अधिकारी एपीआय शोभा क्षीरसागर यांच्या नेतृत्वाखाली करण्यात आली. त्यांच्या पथकातील अंमलदारांनी या मोहिमेत सक्रिय सहभाग घेतला.

पुणे शहर वाहतूक शाखेकडून प्रवाशांची गैरसोय टाळण्यासाठी आणि वाहतूक शिस्त राखण्यासाठी अशा प्रकारच्या विशेष कारवाया पुढेही सातत्याने राबवण्यात येणार असल्याचे सांगण्यात आले आहे. तसेच, सर्व रिक्षाचालकांनी वाहतूक नियमांचे पालन करावे, असे आवाहनही वाहतूक शाखेकडून करण्यात आले आहे.

मुलगी ओरडू लागताच आईच्या लक्षात हा प्रकार आला.आईचा प्रयत्न अन् उपस्थितांची धावपळ,सुदैवाने मोठा अनर्थ टळला

पुणे-लिफ्टचा वापर करताना लहान मुलांच्या सुरक्षिततेबाबत गाफील राहणे किती धोकादायक ठरू शकते, याचा प्रत्यय पिंपरी-चिंचवडमधील दिघी परिसरात आला आहे.एक थरारक आणि काळजाचा ठोका चुकवणारी घटना समोर आली आहे. एका गृहनिर्माण सोसायटीच्या लिफ्टमध्ये काही महिन्यांच्या चिमुकलीचा हात दरवाजाच्या सापटीत अडकल्याने एकच खळबळ उडाली. सुदैवाने, लिफ्टमध्ये उपस्थित नागरिक आणि आईच्या तत्परतेमुळे काही मिनिटांच्या प्रयत्नांनंतर मुलीचा हात सुरक्षित बाहेर काढण्यात यश आले असून मोठा अनर्थ टळला आहे.

दिघी परिसरातील एका सोसायटीत एक महिला आपल्या चिमुकलीला कडेवर घेऊन लिफ्टने जात होती. लिफ्ट इच्छित मजल्यावर थांबली आणि दरवाजा उघडला. मात्र, काही क्षणातच दरवाजा पुन्हा बंद होऊ लागला. यावेळी कडेवर असलेल्या चिमुकलीने सहज आपला हात लिफ्टच्या सरकत्या दरवाजावर ठेवला. दरवाजा बंद होताना तिचा कोवळा हात थेट दरवाजा आणि भिंतीच्या सापटीत अडकला.मुलगी ओरडू लागताच आईच्या लक्षात हा प्रकार आला. आपला पाय दरवाजाच्या मध्ये घालून तिने दरवाजा बंद होण्यापासून रोखण्याचा प्रयत्न केला, मात्र मुलीचा हात पूर्णपणे अडकून पडला होता. वेदनेने चिमुकली रडू लागल्याने परिसरात असलेल्या नागरिकांनी तातडीने लिफ्टच्या दिशेने धाव घेतली. काही मिनिटे सर्वांचा जीव टांगणीला लागला होता. अखेर उपस्थितांच्या धडपडीनंतर दरवाजाची सापट थोडी सैल झाली आणि चिमुकलीचा हात सुरक्षित बाहेर आला.
या सर्व घटनेचा थरार सोसायटीच्या सीसीटीव्ही कॅमेऱ्यात कैद झाला असून, सध्या हा व्हिडिओ सोशल मीडियावर मोठ्या प्रमाणावर व्हायरल होत आहे. हा व्हिडिओ पाहून अनेकांच्या अंगावर काटा येत असून लिफ्टच्या सुरक्षेबाबत पुन्हा एकदा प्रश्नचिन्ह उपस्थित होत आहे.

या घटनेनंतर प्रशासनाकडून आणि गृहनिर्माण सोसायट्यांकडून पालकांसाठी सतर्कतेचा इशारा देण्यात आला आहे. लिफ्टचा वापर करताना विशेषतः लहान मुले सोबत असताना पालकांनी प्रचंड सावध राहणे गरजेचे आहे. मुलांचे हात दरवाजापासून लांब ठेवावेत. लिफ्ट पूर्ण थांबल्याशिवाय आणि दरवाजा स्थिर झाल्याशिवाय हालचाल करू नये. ऑटोमॅटिक दरवाजाच्या सापटीत हात जाणार नाही, याची विशेष दक्षता घ्यावी, असे आवाहन करण्यात आले आहे.

३ दिवसात सरकारने सुधारित ऑनलाईन प्रक्रिया सुरू करून द्यायची असून , त्यामध्ये पालकांना १ किमी, त्यापुढे ३ किमी अंतरातील पालकांनाही अर्ज भरता येतील.

आरटीई साठीची एक किलोमीटर ची मर्यादा बेकायदेशीरच!
आरटीई नियम बदल हे शैक्षणिक हक्काविरोधातील षड्यंत्रच!

पुणे-मोफत शिक्षण हक्क कायद्यानुसार गरीब व वंचित घटकातील मुलांसाठीच्या खाजगी शाळातील प्राथमिक प्रवेश अर्ज प्रक्रियेस सुरुवात झालेली असून १० मार्च २०२६ रोजी ही मुदत संपत आहे. यंदा त्यामध्ये बालकाच्या राहण्याच्या घरापासून एक किलोमीटर मधीलच शाळांमध्ये प्रवेश मिळणार आहे. या नव्या अटीमुळे पालकांना शाळांचा पर्यायच मिळत नसल्याने आम आदमी पार्टीच्या नेतृत्वात पालकांनी आयुक्त कार्यालयासमोर आंदोलन केले, निवेदने दिली , पत्रकार परिषद घेतली, मेल पाठवल्या व ही अट बेकायदेशीर असल्याने तातडीने रद्द करावी अशी मागणी केली.

या संदर्भात आम आदमी पार्टी,आप पालक युनियन चे मुकुंद किर्दत यांनी सांगितले कि,‘ शिक्षण हक्क कायद्यानुसार नजीकच्या शाळेमध्ये मुलांना प्रवेश दिला जातो . मार्च 2013 मधील 25 टक्के राखीव जागावर या महाराष्ट्र शिक्षण हक्क कायद्यानुसार एक किलोमीटर आतील पाल्यास प्राधान्य दिले जाते व त्यानंतर तीन किलोमीटर अंतरातील पाल्यास शिल्लक जागेवर प्रवेश दिला जातो. हे कायद्यामध्ये स्पष्ट असतानाही नवीन शासनादेशानुसार त्यामध्ये बदल करण्यात आल्यामुळे अनेक पालकांनी संताप व्यक्त केला असून यामुळे अनेक मुलांना खाजगी शाळांमध्ये प्रवेश मिळणार नाही. महाराष्ट्रामध्ये २०२५- २६ या शैक्षणिक वर्षात ३,०५,१५१ अर्ज आले होते. या वर्षी मात्र आज अखेरीस महाराष्ट्रातून केवळ १,९०,००० अर्ज भरले गेले आहेत.शिक्षण हा आमचा हक्क असून तो सरकारच्या मर्जीचा प्रश्न नसून या खाजगी शाळातील ३५ टक्के जागा सरकारच्या हट्टामुळे रिक्त राहतील अशी शक्यता आहे. खाजगी शाळातील २५ टक्के जागा या कायद्या नुसार वंचित दुर्बल घटकातील मुलांमधून भरावयाच्या असतात. मुळातच २०% जागा या नेहमी रिक्त राहतात. आता या १ किमी मर्यादेमुळे एकूण उपलब्ध पटसंख्येच्या केवळ ६५ टक्के जागा भरल्या जाण्याची शक्यता आहे. सरकारच्या या नव्या नियमामुळे तब्बल ३५ टक्के जागा खाजगी शाळांमध्ये पुढेही रिक्त ठेवायला लागतील.

याचा फटका मुख्यत्वे ग्रामीण भागातील पालकांना बसत असून अनेक पालकांना अर्ज भरताना त्यांच्या घराच्या जवळ कोणतीही शाळा उपलब्ध असल्याचे दिसत नाही. या अगदी शेवटच्या क्षणी घेतलेल्या निर्णयामुळे या प्रवेश प्रक्रियेची वाट पाहत असलेल्या अनेक पालकांची अडचण झाली आहे. हे जाणूनबुजून केलेले षड्यंत्र आहे. शहरामध्ये उपनगरात या मोठ्या खाजगी शाळा असून त्याच्याजवळ गरीब वस्त्या फारशा नाहीत. मध्यवर्ती भागात गरिबांच्या वस्त्या जास्त प्रमाणात आहेत परंतु तिथे फारशा शाळा नाहीत.याबाबत विधिमंडळामध्ये प्रश्न आला असता शिक्षण मंत्री दादा भुसे यांनी मात्र चुकीची माहिती देत एक किलोमीटर मर्यादा ही मूळ कायद्यात असल्याचे सांगितले त्यामुळे त्यांचे अज्ञान उघड झाले कदाचित त्यांना चुकीची माहिती प्रशासनाकडून दिली जात असावी. तसेच एक पेक्षा जास्त किलोमीटर अंतरावरून मुलांना शाळेत का आणायचे असा प्रश्न ते विधिमंडळात विचारत होते परंतु शासनाच्या स्वतःच्या शिक्षण धोरणात आता ‘ समूहशाळे ‘ ची कल्पना असून त्यामध्ये पाच किलोमीटर अंतरातील शाळा एकत्र करण्याचे प्रस्तावित आहे ही बाबही मंत्री दिशाभूल करत होते हे उघड करते.या मोफत शिक्षण योजनेस केंद्र सरकारकडून ६० टक्के निधी मिळतो असे असतानाही महाराष्ट्र सरकार हात आखडता का घेते.असाही सवाल मुकुंद किर्दत यांनीकेला आहे.

ना. चंद्रकांतदादा पाटील यांचा आणखी एक स्तुत्य पुढाकार

पुणे: सार्वजनिक वाहतूक व्यवस्था बळकट करण्यासाठी राज्याचे उच्च व तंत्रशिक्षण मंत्री चंद्रकांतदादा पाटील यांनी आणखी एक स्तुत्य पाऊल उचलले आहे. ना. पाटील यांच्या संकल्पनेतून आणि पुणे मेट्रोच्या सहकार्याने ‘रिक्षामित्र फीडर’ सेवेचा शुभारंभ आज त्यांच्या हस्ते करण्यात आला.याप्रसंगी पुणे मेट्रोचे संचालक श्रावण हर्डीकर, अनिलकुमार कोकाटे, अग्रवाल, ‘बघतोय रिक्षावाला’ संघटनेचे डॉ. केशव क्षीरसागर यांच्यासह आजी-माजी नगरसेवक, भाजप पदाधिकारी आणि संघटनेचे सदस्य मोठ्या संख्येने उपस्थित होते. 

यावेळी बोलताना ना. पाटील म्हणाले, “पंतप्रधान नरेंद्र मोदी आणि मुख्यमंत्री देवेंद्र फडणवीस सार्वजनिक वाहतूक व्यवस्था अधिक सक्षम करण्यासाठी सातत्याने प्रयत्नशील आहेत. महानगरांमध्ये पर्यावरणपूरक मेट्रोचे जाळे विस्तारण्यावर सरकारचा भर आहे. नागरिकांनी सार्वजनिक वाहतुकीचा जास्तीत जास्त वापर करावा, यासाठी कोथरुडमध्ये वर्षभरापूर्वी शटल बससेवा सुरू केली, जी आज अत्यंत यशस्वी ठरली आहे.” 

ते पुढे म्हणाले की, “१९८२ पासून माझा पुण्याशी संबंध असून, नागरिकांनी स्वतःच्या वाहनाऐवजी सार्वजनिक वाहतुकीचा वापर करावा, अशी माझी नेहमीच आग्रही भूमिका राहिली आहे. याच भावनेतून ‘बघतोय रिक्षावाला’ संघटनेच्या मदतीने पुणे रेल्वे स्थानकावर ‘प्रीपेड रिक्षासेवा’ सुरू केली, ज्याला पुणेकरांचा उत्स्फूर्त प्रतिसाद मिळाला. आता घरापासून मेट्रो स्टेशनपर्यंतचा प्रवास सुलभ करण्यासाठी ‘रिक्षामित्र फीडर सेवा’ सुरू करत आहोत. या उपक्रमालाही पुणेकर नक्कीच भरभरून प्रतिसाद देतील, असा विश्वास त्यांनी व्यक्त केला.”

पुण्याच्या महापौर मंजुषा नागपुरे यांनीही या उपक्रमाचे भरभरून कौतुक केले. त्या म्हणाल्या, “राज्याचे उच्च व तंत्रशिक्षण मंत्री समाजहिताचे वेगवेगळे उपक्रम अतिशय शांतपणे आखतात आणि त्याची यशस्वी अंमलबजावणी करतात. यापूर्वी ना. पाटील यांनी सुरू केलेल्या शटल बससेवेचा सर्वाधिक फायदा सिंहगड रोड परिसरातील नागरिकांना होत आहे. सार्वजनिक वाहतूक व्यवस्था बळकट करण्यासाठी ‘रिक्षामित्र फीडर’ सेवा देखील नक्कीच यशस्वी होईल.” 

मेट्रोचे व्यवस्थापकीय संचालक श्रावण हर्डीकर म्हणाले की, “सध्या पुणे शहरात खासगी आणि सार्वजनिक वाहतूक अशी स्पर्धा पाहायला मिळत आहे, जी मुळात निरर्थक आहे. शहराचे वाढते आकारमान पाहता, एका मर्यादेनंतर रस्त्यांची रुंदी वाढवणे शक्य होणार नाही. तसेच, मेट्रो शहराच्या प्रत्येक गल्लीबोळात जाऊन घरापर्यंत सेवा देऊ शकत नाही. त्यासाठी रिक्षा हाच सर्वोत्तम पर्याय असून, त्या घरापासून मेट्रो स्थानकापर्यंत प्रवाशांना सेवा देऊ शकतात. त्यामुळे आजची ही सेवा भविष्यात अत्यंत फायदेशीर ठरेल.” 

केंद्रीय मंत्री मुरलीधर मोहोळ यांच्यावर शस्त्रक्रिया:29 वर्षांपूर्वीची कुस्ती आखाड्यात झालेली दुखापत बळावली

पुणे- खासदार आणि केंद्रीय राज्यमंत्री मुरलीधर मोहोळ यांच्यावर आज पुण्यातील एका खासगी रुग्णालयात यशस्वी शस्त्रक्रिया करण्यात आली. सुमारे २९ वर्षांपूर्वी कुस्तीच्या आखाड्यात झालेली जुनी दुखापत पुन्हा उफाळून आल्याने डॉक्टरांच्या सल्ल्यानुसार ही तातडीची शस्त्रक्रिया करण्यात आली. या उपचारानंतर मोहोळ यांना आता किमान महिनाभर सक्तीची विश्रांती घ्यावी लागणार असल्याने त्यांच्या सार्वजनिक कार्यक्रमांना काही काळ ब्रेक लागणार आहे.

मुरलीधर मोहोळ यांनी सोशल मीडियाद्वारे आपली भावना व्यक्त करताना या दुखापतीचा इतिहास सांगितला. २९ वर्षांपूर्वी कोल्हापूर येथे कुस्ती खेळत असताना त्यांच्या गुडघ्याला गंभीर दुखापत झाली होती. या एका दुखापतीमुळे मोहोळ यांना आपले कुस्तीचे स्वप्न अर्धवट सोडावे लागले होते. गेली अनेक वर्षे त्यांनी या त्रासाकडे दुर्लक्ष केले, मात्र सार्वजनिक जीवनातील सततचा प्रवास आणि धावपळ यामुळे हा त्रास असह्य झाला होता. अखेर डॉक्टरांनी शस्त्रक्रिया करण्याचा निर्णय घेतला.

जनसेवेचा खंड शारीरिक त्रासापेक्षा मोठा

सध्या संसदेचे अधिवेशन सुरू असून, मतदारसंघातही विकासकामे आणि भेटीगाठींचे मोठे नियोजन होते. अशा महत्त्वाच्या काळात विश्रांती घ्यावी लागत असल्याने मोहोळ भावुक झालेत. “मला शारीरिक त्रासापेक्षा जनसेवेच्या कामात पडणाऱ्या या खंडामुळे अधिक त्रास होत आहे,” अशी भावूक पोस्ट त्यांनी शेअर केली आहे. आगामी ‘महाराष्ट्र केसरी’ कुस्ती स्पर्धेच्या नियोजनाचाही हा महत्त्वाचा काळ असल्याने त्यांनी कार्यकर्त्यांना कामात सातत्य राखण्याचे आवाहन केले आहे.
पुढील महिनाभर विश्रांतीचा सल्ला

शस्त्रक्रियेनंतर मोहोळ पुढील ७ ते ८ दिवस डॉक्टरांच्या देखरेखीखाली रुग्णालयातच असतील. त्यानंतर त्यांना घरी पूर्ण विश्रांती घेण्याचा सल्ला देण्यात आला आहे. “तुमच्या शुभेच्छांच्या जोरावर मी लवकरच बरा होऊन महिन्याभरात पुन्हा एकदा पहिल्यापेक्षा जास्त जोमाने जनसेवेसाठी हजर होईन,” असा विश्वास त्यांनी व्यक्त केला.

मुरलीधर मोहोळ यांची पोस्ट जशास तशी…

मुरलीधर मोहोळ आपल्या सोशल मीडिया पोस्टमध्ये म्हणाले, क्षमस्व… पण एक महिन्याची सक्तीची विश्रांती ! २९ वर्षांपूर्वी… कोल्हापूर येथे कुस्ती खेळताना झालेली दुखापत, या दुखापतीमुळेच कुस्ती कायमची सुटली… इतकी वर्षे दुर्लक्ष केलं पण आता २९ वर्षांनंतर हळूहळू तो त्रास वाढू लागला, शेवटी डॅाक्टरांनी ह्या शस्त्रक्रियेशिवाय पर्याय नसल्याचे सांगितलं. त्यामुळे किमान एक महिन्याकरता ही विश्रांती ! खरंतर संसदेचं अधिवेशन सुरू असतानाही शस्त्रक्रिया करावी लागली. अधिवेशन, कामानिमित्त देशभरातील प्रवास, माझ्या पुणे लोकसभा मतदारसंघातील नागरिकांशी संपर्क तसेच इतर कामे… आणि शिवाय यंदाची महाराष्ट्र केसरी कुस्ती स्पर्धा… या सगळ्याचं काय? दुखापतीच्या त्रासापेक्षा या सगळ्याचा त्रास जास्त होतोय. पण मला माहितीये तुमच्या शुभेच्छा आणि आशीर्वादच्या जोरावर मी लवकरच बरा होऊन महिन्याभरातच पुन्हा तुम्हा सर्वांच्या सेवेत हजर होईन, पहिल्यापेक्षा जास्त जोमाने…