• संघाचा शताब्दी वर्षात प्रवेश
• बारा हजार स्वयंसेवकांचा सहभाग
• वस्ती व सोसायट्यांमधून संचलनांचे भव्य स्वागत

पुणे – राष्ट्रीय स्वयंसेवक संघाचा स्थापना दिन असलेल्या विजयादशमीच्या निमित्ताने शनिवारी (१२ ऑक्टोबर) राष्ट्रीय स्वयंसेवक संघाच्या पुणे महानगर रचनेतील ५८ ठिकाणी सघोष संचलने काढण्यात आली. पुणे महानगरात नऊ भागातील विविध ५५ नगरांमध्ये काढण्यात आलेल्या संचलनांमध्ये एकूण बारा हजारांहून अधिक पूर्ण गणवेशातील स्वयंसेवकांनी सहभाग घेतला.महानगरात सर्व उपनगर व वस्त्यांमध्ये (झोपडपट्टी) सर्व स्तरातील नागरिकांनी पथसंचलनाचे जोरदार स्वागत केले. विजयादशमीच्याच दिवशी नागपूरामध्ये मोहिते वाड्यात १९२५ मध्ये संघाची स्थापना झाली होती.यंदा संघ शताब्दी वर्षात प्रवेश करत असल्याने सघोष पथ संचलनांना एक वेगळे महत्त्व प्राप्त झाले होते.

या वेळेच्या संचलनाचे वैशिष्ठ्य सांगायचे तर शहरातील विविध वस्त्या (झोपडपट्टी) व छोट्या- मोठ्या सोसायट्यांमधून संचलन मार्गाचे प्रकारचे नियोजन करण्यात आले होते.तसेच विद्यापीठ नगराचा भाग असलेल्या सावित्रीबाई फुले पुणे विद्यापीठात यंदा प्रथमच सघोष संचलन काढण्यात आले. त्यात विद्यार्थी स्वयंसेवक लक्षणीय संख्येने सहभागी झाले. दरम्यान काही ठिकाणी संचलनासमवेत शस्त्र पूजन उत्सवांचे आयोजन देखील करण्यात आले होते. विशेष म्हणजे हे संचलन वस्तीतून विविध मार्गस्थ होताना सर्व स्तरातील नागरिकांनी भव्य असे स्वागत केले. यावरून समाजात संघाविषयी स्वीकारार्हता वाढल्याचे दिसून येते आहे.

विजयादशमी निमित्ताने विविध नगरांमध्ये सकाळी ७.३० वाजता सघोष संचलनांचे आयोजन करण्यात आले होते. संचलनाच्या मार्गावरून नागरिकांनी आकर्षक रांगोळी आणि विविध फुलांच्या व पाकळ्यांच्या सड्यांनी भरून गेलेले दिसत होते. दरम्यान संचलनातील स्वयंसेवकांवर व भगव्या ध्वजावर पुष्पवृष्टी करून स्वागत करण्यात आले. विशेष म्हणजे विविध नगरांमध्ये सर्व विविध पक्षांच्या पदाधिकारी व कार्यकर्त्यांनी देखील संचलनाचे स्वागत केले. तर पुणे महानगराच्या विविध नगरांमध्ये प्रतिष्ठित व मान्यवर नागरिकांनी प्रमुख पाहुणे यावेळी उपस्थित राहून संचलनाची पाहणी केली.

प्रथेप्रमाणे सकाळी राष्ट्रीय स्वयंसेवक संघाच्या वैशिष्ट्यपूर्ण घोषातर्फे शिवाजीनगर भागातील एसएसपीएमएस संस्थेच्या प्रांगणातील छत्रपती शिवाजी महाराजांच्या पुतळ्याला सघोष मानवंदना देण्यात आली.यावेळी व केंद्रीय हवाई वाहतूक व सहकार विभागाचे राज्यमंत्री खासदार मुरलीधर मोहोळ, खासदार मेधा कुलकर्णी, पुणे महानगर संघचालक रवींद्र वंजारवाडकर व कसबा भागाचे संघचालक अॅड. प्रशांत यादव यांनी शिवाजी महाराजांच्या पुतळ्याला पुष्पहार अर्पण करून अभिवादन केले.
त्याआधी पुणे महानगर संघचालक रवींद्र वंजारवाडकर व कसबा भागाचे संघचालक प्रशांत यादव यांच्या हस्ते मोतीबाग कार्यालयात शंख व भगव्या ध्वजाचे पूजन व ध्वजारोहण करण्यात आले.याप्रसंगी संघाचे पुणे महानगर कार्यवाह सचिन भोसले आदी मान्यवरांची उपस्थिती होती.

संघ कामात अधिकाधिक लोकांचा सहभाग वाढताना दिसतो आहे. अनेक तरूणांनी संघ कार्यात सहभाग वाढवित व संचलनात संपूर्ण गणवेशात सहभागी झालेले दिसून आले. तरूणांसोबत अनेक ज्येष्ठ स्वयंसेवक देखील गणवेशासह संचलनात सहभाग नोंदविला.

शस्त्र पूजन उत्सवात तरूणांचा सहभाग अधिक
विजयादशमीपूर्वी पुणे शहरामधे एकूण ३७ ठिकाणी तरूण विभागाचे शस्‍त्रपूजन उत्‍सव झाले तसेच ४० ठिकाणी बाल विभागाचे शस्‍त्रपूजन उत्‍सव झाले. या उत्‍सवांना देखील ७००० पेक्षा अधिक तरूण आणि ३००० पेक्षा अधिक बाल उपस्थित होते.

श्री महालक्ष्मी मंदिर सारसबाग सार्वजनिक नवरात्र उत्सव ; महिला अत्याचार, स्त्री भ्रूण हत्येविषयी जनजागृती
पुणे :  महिला अत्याचार, स्त्री भ्रूण हत्या, बालशोषण, नशाखोरी, वृद्धांची उपेक्षा, बेरोजगारी, भेदभाव यांसह विविध दहा सामाजिक समस्यांच्या प्रतिकात्मक रावण दहन कार्यक्रमाचे आयोजन सारसबागेसमोरील श्री महालक्ष्मी मंदिरासमोर करण्यात आले. यावेळी प्रभू श्रीराम यांची वानरसेना आणि रावणाची सेना यांच्या युद्धाचा जीवंत प्रसंग देखील सादर करण्यात आला. 
श्री महालक्ष्मी मंदिर सारसबाग, श्री बन्सीलाल रामनाथ अग्रवाल धार्मिक व सांस्कृतिक ट्रस्ट तर्फे रावण दहन कार्यक्रमाचे आयोजन करण्यात आले होते. यावेळी तब्बल २५ फूट उंच प्रतिकात्मक रावणाचे दहन यावेळी करण्यात आले. मंदिराचे संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड. प्रताप परदेशी, डॉ. तृप्ती अग्रवाल, भरत अग्रवाल, प्रवीण चोरबेले, हेमंत अर्नाळकर, नारायण काबरा, निलेश लद्दड यांसह आमदार माधुरी मिसाळ देखील यावेळी उपस्थित होत्या.
डॉ. तृप्ती अग्रवाल म्हणाल्या, वाढत्या महिला अत्याचाराच्या पार्श्वभूमीवर नवरात्र उत्सवात स्त्री शक्तीचा जागर करण्यासोबतच नारी शक्तीचा सन्मान देखील करण्यात आला. यंदा आयोजित केलेल्या रावण दहन कार्यक्रमात देखील महिला अत्याचार व स्त्री भ्रूण हत्येसारख्या समस्यांच्या प्रतिकात्मक रावणाचे दहन करुन समाजात स्त्री सबलीकरणाचा संदेश दिला असल्याचे त्यांनी सांगितले.

पुणे, दि.13 : . पुणे शहरात मेट्रो आली, नदीसुधार प्रकल्प सुरु आहे. काँग्रेसच्या सत्ताकाळात नुसती भूमिपूजन झाली पण मोदी सरकार प्रत्यक्षात प्रकल्प साकारत आहेत. त्यामुळेच शहराचा चेहरा मोहरा बदलत असल्याचे मत केंद्रीय नागरी उड्डाण राज्यमंत्री मुरलीधर मोहोळ यांनी व्यक्त केले.

आमदार माधुरी मिसाळ यांच्या प्रयत्नातून पु. ल. देशपांडे उद्यान येथे विकसित करण्यात आलेल्या कलाग्रामचे लोकार्पण मोहोळ यांच्या हस्ते झाले, त्यावेळी ते बोलत होते. याप्रसंगी माधुरी मिसाळ, महापालिका आयुक्त राजेंद्र भोसले, दीपक मिसाळ, धीरज घाटे, करण मिसाळ, श्रीकांत जगताप, किरण ठाकूर यांची उपस्थित होते. वास्तूरचनाकार तीर्था मिसाळ यांचा सत्कार करण्यात आला.

मोहोळ म्हणाले, आपलं पुणे ही जशी सांस्कृतिक नगरी आहे, तशीच ती कलाकारांची ही नगरी आहे. कलाकरांना आपले कलाविष्कार सादर करण्यासाठी विविध व्यासपीठे पुण्यनगरीने उपलब्ध करुन दिलेली आहेत. आणि आता याच पुण्यनगरीत कलाकारांसाठी हक्काचं व्यासपीठ असणारं ‘कलाग्राम’ नक्कीच मोठा आधार ठरणारं आहे. या ‘कलाग्राम’च्या माध्यमातून विविध कलाविष्कार सादर करण्याची संधी कलाकारांना मिळणार असून कलाकारांना आपले कलाविष्कार लोकांपर्यंत पोहोचणं सहज शक्य होणार आहे. अतिशय भव्य-दिव्य अशा या कलाग्राममुळे पुण्याच्या कला विश्वात वैभवात निश्चितच भर पडली आहे. शिवाय यामुळे पर्यटनालाही चालना मिळण्यास मदत होणार आहे. ‘कलाग्राम’ साकारल्याबद्दल माधुरीताई आणि महापालिकेचे विशेष अभिनंदन !

आमदार माधुरी मिसाळ म्हणाल्या, सिहंगड रोड ला 50 एकर जागा यामध्ये पहिल्या फेजमध्ये पु. ल. देशपांडे उद्यान झाले, आता कलाग्राम झाले म्हणजे पूर्ण 50 एकर विकसित करण्याचे स्वप्न पूर्ण झाले. पुढे पु. ल. देशपांडे कट्टा विकसित केला जाईल. ज्यामध्ये पु. ल. देशपांडे यांच्या जीवनावर आधारित कला, साहित्याचे सादरीकरण करण्यात येईल.

मिसाळ म्हणाल्या, बांबू दगडांपासून तयार करण्यात आलेल्या वस्तू आणि ग्रामीण कलाकृतींच्या प्रात्यक्षिकांसह विविध राज्यांमधील लोककला आणि खाद्यपदार्थांची मेजवानी पुणेकरांना एकाच शताकाली येथे उपलब्ध होणार आहे. कलाग्रामचा परिसर बांधकाम एखाद्या गावातील वास्तूप्रमाणे साकारण्यात आले आहे. या ठिकाणी तीस गाळे बांधण्यात आले असून, त्यात एक अँमफी थिएटर, विविध राज्यांच्या वस्तूंच्या विक्रीचे काउंटर, लायब्ररी, विविध राज्यांमधील खाद्यपदार्थ विक्री करणारे स्टॉल, विविध प्रकारच्या कार्यशाळासाठी खुली व्यासपीठे, तसेच बांबू व दगडापासून तयार केलेल्या विविध वस्तू व हस्तकलांची प्रात्यक्षिके पाहता येणार आहेत.

प्रास्ताविक राजेंद्र भोसले यांनी केले.
सूत्रसंचालन मिलिंद कुलकर्णी यांनी केले.

सैनिक मित्र परिवार तर्फे आयोजन ; सेनाधिकारी एअर मार्शल सुनील सोमण (निवृत्त) यांचा गौरव
पुणे : शूरवीरांचा सन्मान नौबतीसह करायचा ही मराठी परंपरा आहे. त्यानुसार विजयादशमीला भारतीय सैन्यदलातील सेनाधिका-यांचा त्यांच्या निवासस्थानी जाऊन सनई-चौघडयाच्या गजरात, रांगोळी व दारावर तोरण लावून मराठमोळ्या पद्धतीने पुण्यात सन्मान करण्यात आला. सेनाधिकारी एअर मार्शल सुनील सोमण (निवृत्त) या वायुदलातील निवृत्त सेनाधिका-यांचा गौरव सैनिक मित्र परिवारातर्फे करण्यात आला. यावेळी विविध सामाजिक संस्था, गणेशोत्सव मंडळांचे पदाधिकारी व कार्यकर्ते उपस्थित होते.

एनआयबीएम कोंढवा येथील सोमण यांच्या निवासस्थानी कार्यक्रमाचे आयोजन करण्यात आले होते. यावेळी सोमण यांच्या पत्नी रश्मी सोमण, ज्येष्ठ बँकिंग तज्ञ अ‍ॅड.सुभाष मोहिते, किरण पाटोळे, आनंद सराफ, शिरीष मोहिते, विष्णू ठाकूर, नितीन पंडित  आदी उपस्थित होते.  पुणेरी पगडी, तिरंगी उपरणे, सन्मानचिन्ह, श्रीफळ, मिठाई असे सन्मानाचे स्वरुप होते. कल्याणी सराफ, स्वाती ओतारी, प्रज्ञा काळे त्यांनी आयोजनात सहभाग घेतला. 

सुनील सोमण म्हणाले, सैन्यदलात सेवेत असताना माझ्या २३ ठिकाणी बदल्या झाल्या. सकाळी ५.३० ते ६ पासून मी बाहेर जात असे. त्यामुळे मुला-मुलीचे लहानपण पाहिले नाही. अनेकदा आठवडा आठवडा आमचे बोलणे देखील होत नसे. माझ्या पत्नीने कुटुंबाकडे लक्ष देत सर्व काही केले. त्यामुळे मी देश रक्षणार्थ कार्य करु शकलो. भारतीय हवाई दलात मी सन १९७६ पासून कारकीर्दीस सुरुवात केली. युद्ध सहभाग, तातडीच्या मोहिमा, लढाऊ विमान दलाचे नेतृत्व, नवोदितांना प्रशिक्षण, लष्कराच्या विशेष समितीचे सल्लागार, असा प्रदीर्घ कार्य सहभाग देखील घेतला. आता निवृत्तीनंतर सैनिक मित्र परिवारने माझ्या कार्याची दखल घेत केलेला सन्मान माझ्यासाठी खूप वेगळा आहे.

आनंद सराफ म्हणाले, सन १९९६ पासून सैनिकांसाठी कृतज्ञतेने काम करण्याचा प्रयत्न, सैनिक मित्र परिवाराच्या माध्यमातून केला जात आहे. सामान्य नागरिकांनी सैनिकांसाठी काहीतरी करावे, यासाठी ही संकल्पना सुरु झाली. तिरंगी झेंडयासाठी प्राण पणाला लावणा-या सैनिकांच्या प्रत्येक सणाला पहिला मान आहे. त्यामुळे त्यांच्या घरी जाऊन हे सण साजरे करण्याचा आमचा प्रयत्न आहे, असेही त्यांनी सांगितले. भारत खळदकर यांनी सनई-चौघडा वादन केले.  

पुणे -महाराष्ट्र शासनाने राबवलेल्या ‘मुख्यमंत्री माझी शाळा, सुंदर शाळा’ या अभियानामध्ये ‘न्यू इंग्लिश स्कूल, टिळक रोड, पुणे’ या शाळेने विभागीय पातळीवर अ व ब वर्ग महापालिका खासगी शाळा गटात प्रथम क्रमांक पटकावून एकवीस लाखांचे पारितोषिक मिळवले आहे. नागपूरच्या सरस्वती विद्यालयाला दुसरा तर पुण्याच्या श्री शिवाजी मराठा हायस्कूल शाळेला तिसरा क्रमांक मिळाला

शाळेच्या मुख्याध्यापिका सुनीता राव, पर्यवेक्षक सुरेश वरगंटीवार, शाला समिती अध्यक्ष खेमराज रणपिसे यांच्या मार्गदर्शनाखाली सर्व विद्यार्थ्यांनी आणि शिक्षकांनी एकत्र येऊन या स्पर्धेसाठी नियोजनपूर्वक प्रयत्न केले. या प्रयत्नांना या पुरस्काराच्या रूपाने यश आले.

कृत्रिम तारांगण असलेली आशिया खंडातील एकमेव शाळा, अवकाश निरीक्षणासाठी वेधशाळेची सोय, ३७००० पुस्तकांचे भव्य ग्रंथालय, इंग्रजी भाषा प्रयोगशाळा, गणित खेळघर, भव्य प्रयोगशाळा, भव्य मैदान, जगभरातील १२५ खनिजांचे भूवस्तूसंग्रहालय, दुर्मीळ दिव्यांचे संग्रहालय अशी या शाळेची वैशिष्ट्ये आहेत.

विष्णुशास्त्री चिपळूणकर यांच्या जयंतीच्या शतकोत्तर अमृत महोत्सवी वर्षात या पारितोषिकाच्या रूपाने पुन्हा एकदा शाळेचे नाणे खणखणीत वाजले आहे.
भारतीय स्वातंत्र्याच्या चळवळीत योगदान दिलेल्या या शाळेने इतिहास घडविला आहे.
अगदी सामान्य घरांमधून आलेल्या विद्यार्थ्यांना अत्यंत प्रामाणिकपणे आणि मनापासून शिक्षण देऊन, त्यांचा सर्वांगीण विकास करून, समाजामध्ये, विविध क्षेत्रांमध्ये नावलौकिक मिळवून समाजाची सेवा करण्यासाठी चांगले नागरिक घडविणाऱ्या या शाळेच्या आजपर्यंतच्या प्रयत्नांना महाराष्ट्र शासनाकडून मिळालेली ही शाबासकीची थाप आहे.

शाळेने राबवलेल्या काही महत्त्वपूर्ण उपक्रमांची यादी खालीलप्रमाणे,-
ऐतिहासिक वारसा लाभलेल्या या शाळेतील माजी विद्यार्थ्यांच्या आणि शिक्षकांच्या उल्लेखाशिवाय भारतीय स्वातंत्र्यलढ्याचा, मराठी साहित्याचा आणि मराठी व्याकरणाचा इतिहास पूर्णच होऊ शकत नाही. अशा या शाळेमधील विविध उपक्रमांच्या माध्यमातून ऐतिहासिक वारसा विद्यार्थ्यांपर्यंत पोहचवण्याचे कार्य शाळेमधून व्याख्याने, क्षेत्रभेटी यांचे आयोजन करून सतत केले जाते.
शाळेतील विद्यार्थ्यांनी शिक्षकांच्या मदतीने दुधीभोपळा, दोडकी, वांगी, मिरच्या, कांदा व अळू यांचे उत्पादन परसबागेत घेतलेले आहे. शाळा सदर भाज्या जशा उपलब्ध होतील तशा पोषण आहारासाठी उपयोगात आणते.

पर्यावरण संवर्धनासाठी शाळेतील विद्यार्थी स्वयंसेवक पर्यावरणपूरक कार्यक्रम राबवतात. विद्यार्थी दर शनिवारी सभा घेऊन पुढील आठवड्यात करायच्या कामाची रूपरेषा ठरवतात. विद्यार्थी स्वत:च्या परिसरातील प्लास्टिक कचरा जमा करून इको ब्रिक्स तयार करतात. या ब्रिक्स सामाजिक संस्थांना देतात.

शाळेच्या इमारतीभोवती असणाऱ्या वृक्षांची देखभाल विद्यार्थी करतात. याशिवाय शाळेबाहेर जाऊन टेकड्यांवरही वृक्षारोपण केले जाते. स्वतः तयार केलेले सीडबॉल विविध ठिकाणी जाऊन टाकतात.
इयत्ता नववीच्या विद्यार्थ्यांची स्वच्छता दूत म्हणून नेमणूक केली आहे. हे विद्यार्थी स्वत:च्या परिसरामध्ये राहणाऱ्या जनतेचे स्वच्छता विषयक प्रबोधन करतात. विविध वर्गांमध्ये जाऊन स्वच्छतेचे महत्त्व पटवून देतात. वॉशरूममध्ये हँडवॉशचा वापर करण्याचे प्रात्यक्षिक करून दाखवतात. हे स्वच्छता दूत असणारे विद्यार्थी इतर विद्यार्थ्यांचे निरीक्षण करतात आणि त्यांना सुधारणा करण्यास प्रेरणा देतात.

विद्यार्थ्यांना शालेय परिसरातील ऐतिहासिक ठिकाणी भेट देण्यासाठी नेले जाते. यामध्ये भारत इतिहास संशोधक मंडळ, पुण्यातील विविध मार्गांवरील नीलफलक असलेल्या वास्तू, सिंहगड अशा ठिकाणी नेऊन विद्यार्थ्यांना संबंधित अभ्यासघटकाचे अध्यापन केले जाते.

शाळेतील शिक्षक स्वत:चे मोबाईल ॲप तयार करून त्यावर अध्यापन करतात. शिक्षक स्वत: विविध पीपीटी तयार करून त्यांचा वापर अध्यापनात करतात. शैक्षणिक कार्ड, तक्ते, खेळ तयार करून विद्यार्थ्यांना आवडेल अशा पद्धतीने अध्यापन करतात. शाळेमध्ये विविध दिवसांचे औचित्य साधून गगोला (गणिताची गोडी लावणे), पाय डे, शेकडो विद्यार्थ्यांचे विज्ञान प्रात्यक्षिक असे उपक्रम घेतले जातात. शिक्षक स्वत: पुस्तके लिहितात.

शाळेने ICT प्रयोगशाळा उभारलेली आहे. यामध्ये आधुनिक संगणक ज्ञानाचा पाया भक्कम करण्यासाठी आवश्यक अभ्यासक्रम शिकवला जातो. हा अभ्यासक्रम शाळेने तयार केलेला आहे. अद्ययावत ३१ संगणकांच्या माध्यमातून विद्यार्थ्यांना आधुनिक संगणकज्ञानासाठी तयार केले जाते.

सुतारकाम, शेती व्यवस्थापन, प्लंबिंग, केटरिंग, इलेक्ट्रिशियन असे व्यवसाय मार्गदर्शन वर्ग शाळेने डेक्कन एज्युकेशन सोसायटी संस्थेच्या माध्यमातून तयार केलेले आहेत. येथे विद्यार्थी वर्कशॉपमध्ये प्रत्यक्ष कार्य करून व्यवसायात तयार होतात. प्लंबिंगमध्ये तुषार सिंचन प्रकल्प, रोबोट, मोबाईल स्टँड, पुस्तक स्टँड, कपडे सुकवण्याचे स्टँड तयार करतात. सुतारकामामध्ये लाकडी किचन तयार करतात. केटरिंगमध्ये केक तयार करतात. विद्यार्थी उटणे तयार करून त्याची विक्री करतात.
शाळेतील विद्यार्थी योगासन व कराटे स्पर्धा़मध्ये राज्यस्तरीय व राष्ट्रीय स्तरावरील पुरस्कार मिळवतात. शाळेचे मैदान भव्य आहे. तेथे विविध खेळांचा सराव घेतला जातो. काही प्रशिक्षक विद्यार्थ्यांना दररोज मोफत मार्गदर्शक करतात. माजी विद्यार्थी आर्थिक साहाय्य करून क्रीडा साहित्य, मैदान निर्मिती (उदा. गोळाफेकीचे मैदान) करतात.
पर्यावरण संवर्धनासाठी विविध उपक्रम घेतले जातात.
विद्यार्थ्यांसाठी इतिहासतज्ज्ञ पांडुरंग बलकवडे (क्रांतिदिन), श्री. प्रांजल अक्कलकोटकर (लोकमान्य टिळक व स्वातंत्र्यवीर सावरकर), श्री. किरण सबनीस (व्यवसाय मार्गदर्शन) अशा व्याख्यात्यांना निमंत्रण देऊन विद्यार्थांना वैचारिक मेजवानी दिली जाते. विद्यार्थ्यांची सामाजिक जडणघडण, सांस्कृतिक जडणघडण व मूल्यसंवर्धन यांसाठी या व्याख्यानांचा उपयोग होतो.
विद्यार्थ्यांचा अध्ययन स्तर उत्तम राखण्यासाठी शाळा विशेष प्रयत्न करते आहे. शाळेमध्ये नेव्ही व एअरफोर्स असे दोन एनसीसी विभाग कार्यरत आहेत. त्यांमध्ये विद्यार्थी व विद्यार्थिनी सहभागी होतात. तसेच शाळेमध्ये स्काऊट-गाईडचे गट आहेत. विविध निवासी प्रशिक्षणासाठी या सर्व गटांतील विद्यार्थी जातात.
इयत्ता पाचवी शिष्यवृत्ती, आठवी शिष्यवृत्ती, मंथन, NMMS, इतिहास प्रज्ञाशोध परीक्षा, भूगोल प्रज्ञाशोध परीक्षा, संस्थेतर्फे आयोजित करण्यात येत असलेली इयत्ता सातवीची प्री-स्कॉलरशिप परीक्षा अशा विविध स्पर्धापरीक्षांमध्ये विद्यार्थी सहभाग घेऊन यश मिळवत आहेत. या परीक्षांच्या निकालाचा आलेख वाढता दिसून येत आहे.

इयत्ता दहावीनंतर कोणकोणती क्षेत्रे उपलब्ध आहेत, त्यांची माहिती शाळेकडूनच दिली जाते. एनडीए प्रवेशासाठी विशेष मार्गदर्शन करणारे व्याख्याते बोलवून विद्यार्थ्यांना माहिती दिली जाते.
चित्रकला, शिल्पकला, कथाकथन अशा स्पर्धा घेऊन विद्यार्थ्यांच्या कलागुणांना वाव दिला जातो.
विशेष बाबींचे औचित्य साधून शाळा दरवर्षी एक विशेष उपक्रम घेते. शाळेचे आद्यसंस्थापक विष्णुशास्त्री चिपळूणकर यांच्या शतकोत्तर अमृतमहोत्सवी वर्षाचेनिमित्त साधून यावर्षी शाळेने संस्थापक सप्ताह आयोजित केला होता. यामध्ये इंडिया बुक ऑफ रेकॉर्डला नोंद झालेल्या लोकमान्य टिळकांच्या प्रतिमांचे प्रदर्शन भरविण्यात आले. या काळात महाराष्ट्र राज्य उच्च तंत्र व शिक्षण तथा वस्त्रोद्योग मंत्री मा. चंद्रकांतदादा पाटील, लोकमान्य टिळकांच्या वंशज मा. डॉ. गीताली टिळक, माजी बालसाहित्य संमेलन अध्यक्ष डॉ. न. म. जोशी, साहित्यिका डॉ. संगीता बर्वे, व्याख्याते मोहन शेटे अशा अनेक मान्यवरांनी शाळेस भेट दिली आहे. विद्यार्थ्यांनी संस्थापकांच्या जीवनातून कोणता आदर्श घ्यावा, याबाबत हस्तलिखिते तयार केली आहेत.

अनेक माजी विद्यार्थी, सामाजिक संस्था व दानशूर व्यक्तींच्या माध्यमांतून शाळेसाठी देणगी मिळवली जाते. या देणगीमधून एकल पालक विद्यार्थी व गरजू विद्यार्थी यांना आर्थिक साहाय्य केले जाते.

श्रीनगर/ पुणे :
काश्मीर खोऱ्यात विजयादशमी (दसरा) उत्सव मोठ्यात उत्साहात आणि धुमधडाक्यात साजरा करण्यात आला. श्रीनगर येथे पुनीत बालन ग्रुप वकाश्मिरी पंडित संघर्ष समिती यांच्या वतीने दसरा मोहत्सव 2024 निमित्त सलग दुसऱ्या वर्षी आयोजित प्रतिकात्मक रावण दहन कार्यक्रम हा या उत्सवाचे मुख्य आकर्षण ठरला. हजारो काश्मिरी नागरिकांनी रावण दहन कार्यक्रम पाहण्यासाठी मोठी गर्दी केली होती.
श्रीनगर येथील शेर-ए-काश्मीर स्टेडियम येथे या महोत्सवाचे आयोजन करण्यात आले होते. समृद्ध ऐतिहासिक सांस्कृतिक आणि धार्मिक वारसा काश्मिर खोऱ्याला लाभला आहे. त्याला चालना देण्यासाठी श्रीनगर येथे पुनीत बालन ग्रुप व काश्मिरी पंडित संघर्ष समिती यांच्या वतीने गत वर्षीपासून ‘दसरा महोत्सव’ सुरू करण्यात आला आहे. वाईटावर चांगल्या प्रवृत्तीचा विजयाचे प्रतिक म्हणून यावर्षी या मोहत्सवात रावण, मेघनाथ आणि कुंभकरण यांच्या प्रतिकात्मक दहन करण्यात आले. काश्मीर खोऱ्यातील हा एकमेव विजय दशमी उत्सव असल्याने हा कार्यक्रम पाहण्यासाठी विविध शासकीय अधिकाऱ्यांबरोबर येथील समाजातील सर्व घटकांतील नागरिक मोठया संख्येने उपस्थित होते. रावण दहन कार्यक्रम आता काश्मिरी पंडित आणि मुस्लिम यांच्यातील सामायिक सांस्कृतिक वारशाचे प्रतीक बनले आहे, ज्यामुळे विविधतेतील एकतेच्या कल्पनेला बळकटी मिळाली आहे. या वर्षीच्या उत्सवाने सांप्रदायिक सलोख्याचा संदेश आणखी मजबूत केला. या उत्सवाचे प्रायोजक पुण्यातील युवा उद्योजक पुनीत बालन यांच्या पुनीत बालन ग्रुपने सलग दुसऱ्या वर्षी हा महोत्सव यशस्वी होण्यासाठी मोठे सहकार्य केले. पुनीत बालन यांची जी सामाजिक बांधिलकीमुळेच या भव्य पुतळण्यांची उभारणी आणि सर्व कार्यक्रम शक्य होऊ शकला अशी भावना काश्मिरी पंडित संघर्ष समिती यांच्याकडून व्यक्त करण्यात आली. त्याबद्दल त्यांनी पुनीत बालन यांचे आभारही व्यक्त केले.
वाईटावर चांगल्याचा, असत्यावर सत्याचा आणि अन्यायावर नीतिमत्तेच्या विजय म्हणजेच विजयादशमी. काश्मीर खोऱ्यात एकजुटीची भावना आणि सांस्कृतिक वारशाला चालना मिळावी या भावनेतून दसरा मोहत्सव सुरू करण्यात आला आहे. येथील नागरिकांचा या महोत्सवाला प्रचंड प्रतिसाद मिळाला. काश्मिरी पंडित संघर्ष समिती आणि सर्वांचे मी मनापासून आभार व्यक्त करतो.
– पुनीत बालन, अध्यक्ष, पुनीत बालन ग्रुप.