पुणे- निवडणुकीच्या आचार संहितेचा नामला सुरु झाल्यावर त्याच दिवशी अनेक शासनाचे निर्णय धडाधड धडकत असून याच दिवशी पुणे महापालिकेला सुमारे ४०० कोटीचा फटका बसेल असा निर्णय शासनाने दिला आहे अर्थात आचारसंहिता संपल्यावर महापलिका त्याबाबतचा निर्णय घेण्यास सरसावणार आहेच . आचार संहितेचा अंमल सुरु झाला त्याच दिवशी राज्य शासनाने महापालिकेत २०१७ पासून समाविष्ट झालेल्या नवीन ३२ गावांमधील मिळकतकर आकारणी करण्यास स्थगिती दिली आहे.

त्याचबरोबर या गावांसाठी महापालिकेकडून लावण्यात आलेल्या मिळकतकर आकारणीचे पुनर्विलोकन करावे आणि हा कर ही गावे ग्रामपंचायतीत असताना त्या वेळी झालेल्या करआकारणीच्या दुप्पट दराने आकारणी करावी. असे आदेश दिले आहेत.हा निर्णय होईपर्यंत या समाविष्ट गावांमधून कोणतीही करवसुली करू नये, अशा स्पष्ट सूचना महापालिकेस दिल्या आहेत.

परिणामी महापालिकेस मोठा आर्थिक फटका बसणार असून, कर आकारणीवरून जुनी हद्द आणि नवीन हद्द या नव्या वादाला तोंड फुटणार आहे.शासनाकडून लोकसभा निवडणुकीपूर्वी या गावांमधील शास्तीकर वसुलीस स्थगिती दिली होती. या स्थगितीबाबत निर्णय झालेला नसतानाच आता शासनाने सरसकट करवसुलीलाच स्थगिती दिल्याने महापालिकेचे आर्थिक नियोजन कोलमडण्याची भीती आहे.

महापालिकेत २०१७ मध्ये ११ गावे समाविष्ट करण्यात आली. त्यानंतर २०२१ मध्ये आणखी २३ गावांचा समावेश करण्यात आला आहे. त्यानंतर महापालिकेकडून या सर्व गावांंमध्ये महापालिकेनजीकच्या मिळकतीच्या दरानुसार करआकारणी सुरू केली आहे.मात्र, या मिळकतींना महापालिका आकारत असलेला कर ग्रामपंचायतीच्या करापेक्षा कितीतरी पट अधिक असल्याने या गावांमधील नागरिकांनी शासनाकडे मागणी करून मिळकतकर रद्द करण्याची मागणी केली होती.

त्यात उरूळी देवाची आणि फुरसुंगी या दोन्ही गावांचाही समावेश होता. मात्र, शासनाने आता ही दोन गावे वगळून नवीन नगरपरिषद केल्याने आता ३२ गावांमधील करवसुलीस स्थगिती दिली आहे.

महापालिकेत समाविष्ट झालेल्या ३४ गावांमध्ये एकूण ४ लाख ३७ हजार ३४५ मिळकती आहेत. महापालिकेने केलेल्या कर आकारणीनुसार या मिळकतींंना २०२४-२५ या आर्थिक वर्षासाठी पालिकेने सुमारे ५९५ कोटी रुपयांची बिले पाठविली आहेत.त्यामुळे या गावांमधून महापालिकेस ६०० कोटींचा महसूल मिळणार होता. मात्र, आता शासनाच्या आदेशानुसार ग्रामंपचायतीच्या नियमानुसार करआकारणी केल्यास पालिकेची मागणी थेट ४०० कोटींनी कमी होऊन २०० कोटींवर येणार आहे. त्यामुळे महापालिकेस ४०० कोटींच्या महसुलावर पाणी सोडावे लागणार आहे.

पुणे-

सार्वजनिक आरोग्य व कुटुंब कल्याण मंत्री तानाजी सावंत यांच्या धनकवडी येथील बंगल्यावर काम करणार्‍या सुरक्षा रक्षकाच्या घरी एक घटना घडली आहे. रिव्हॉल्व्हरमध्ये राऊंड भरुन ते बॅगेत कपाटात ठेवले होते. मुलाचा धक्का लागून बॅग खाली पडली व गोळी सुटून १३ वर्षाच्या मुलाच्या पायाला लागून तो जबर जखमी झाला आहे.अभय शिर्के (वय १३) असे जखमी झालेल्या मुलाचे नाव आहे. याबाबत पोलीस हवालदार हेमंत राऊत यांनी सहकारनगर पोलीस ठाण्यात फिर्याद दिली आहे. त्यानुसार पोलिसांनी नितीन हनुमंत शिर्के (वय ४०, रा. श्री गणेश अपार्टमेंट, वनराई कॉलनी, धनकवडी) यांच्यावर गुन्हा दाखल केला आहे. हा प्रकार मंगळवारी दुपारी सव्वा तीन वाजता शिर्के यांच्या घरात घडला.

याबाबत पोलिसांनी दिलेल्या माहितीनुसार, नितीन शिर्के हे मंत्री तानाजी सावंत यांच्या धनकवडीतील बंगल्यावर सुरक्षा रक्षक म्हणून काम करतात. त्यांच्याकडे परवाना असलेले रिव्हॉल्व्हर आहे. त्यांनी आपल्या परवाना धारी रिव्हॉल्व्हरमध्ये राऊंड भरुन कसलीही खबरदारी न घेता रिव्हॉल्व्हर असलेली बॅग कपाटात ठेवली. त्यांचा मुलगा अभय शिर्के याने कपडे घालण्यासाठी कपाट उघडले. त्याने शर्ट घातला. त्यानंतर पँट घालत असताना धक्का लागून कपाटातील रिव्हॉल्व्हर असलेली बॅग खाली पडून त्यातून गोळी सुटली. ती अभय याच्या उजव्या पायाच्या पोटरीला लागून तो जबर जखमी झाला. त्याला तातडीने रुग्णालयात दाखल करण्यात आले आहे. रुग्णालयातून पोलिसांना याची माहिती देण्यात आली. त्यानंतर सहकारनगर पोलीस ठाण्याचे वरिष्ठ पोलीस निरीक्षक छगन कापसे व अन्य अधिकारी यांनी रुग्णालयात जाऊन घटनेची माहिती घेतली. सहायक पोलीस निरीक्षक सागर पाटील अधिक तपास करीत आहेत.

पुणे-अखिल भारतीय ब्राह्मण महासंघ, पुणे जिल्ह्याच्या वतीने, पुणे महानगरपालिका आयुक्त डॉ राजेंद्र भोसले , आणि अभियंता युवराज देशमुख यांची भेट घेऊन महात्मा फुले स्मारक (पूर्वीचा भिडे वाडा) येथे, तात्याराव भिडे यांचा पूर्णाकृती पुतळा उभारण्यात यावा व त्यांनी केलेल्या त्यागाचा इतिहास फलक स्वरूपात मांडण्यात यावा अशी मागणी करण्यात आली, ही मागणी प्रोजेक्ट च्या प्लॅन मध्ये समाविष्ट करण्यात आली व वर्षभरात तिथे पुतळा उभारण्यात येईल याची खात्री देण्यात आली तसेच या प्रकल्पातील पुतळा पूर्णत्वासाठी आवश्यक वाटल्यास अखिल भारतीय ब्राह्मण महासंघाच्या टीम चे सहकार्य घेण्यात येईल.

पुणे महानगरपालिका येथे झालेल्या बैठकीला जिल्हाध्यक्ष मंदार रेडे, महिला आघाडी जिल्हाध्यक्ष सौ केतकी कुलकर्णी, ब्रह्मद्योग आघाडी अध्यक्ष अमोघ पाठक, उपाध्यक्ष विकास अभ्यंकर, जिल्हा सरचिटणीस राहुल जोशी, कोथरूड शाखा महिला आघाडी अध्यक्ष सौ जयश्री घाटे उपस्थित होते.तात्याराव भिडे यांनी समाजाचा विरोध झुगारून आपला राहता वाडा (भिडे वाडा पुणे) देशातील पहिली मुलींची शाळा सुरू करण्यासाठी महात्मा ज्योतिबा व सावित्रीबाई फुले यांना त्यांच्या विचारांनी प्रेरित होऊन दिला होता.ब्राह्मण समाजाचा इतिहास चिरकाल टीकावा, अस्तित्व अबाधित रहावे यासाठी घेतलेल्या धाडसी निर्णयाचे यशस्वी पाऊलात रूपांतर झाले असे म्हणता येईल.असे मंदार रेडे,केतकी कुलकर्णी यांनी म्हटले आहे.

पीसीसीसोईआर येथे ‘अल्टिमेट रोबोटिक चॅम्पियनशिप – २४’ चे उद्घाटन

पिंपरी, पुणे (दि. १७ ऑक्टोबर २०२४) – विविध स्पर्धांमधून भाग घेताना विद्यार्थ्यांच्या नाविन्यपूर्ण विचारांना प्रेरणा मिळते. चाकोरी बाहेरच्या नवकल्पना अशा स्पर्धांमधून प्रकट होतात. त्यासाठी रोबोटिक चॅम्पियनशिप सारख्या राष्ट्रीय स्पर्धा एक उपयुक्त व्यासपीठ आहे, असे मत सावित्रीबाई फुले पुणे विद्यापीठाच्या तंत्रज्ञान विभागाचे अधिष्ठाता प्रा. डॉ. आदित्य अभ्यंकर यांनी व्यक्त केले.
पिंपरी चिंचवड एज्युकेशन ट्रस्ट संचलित (पीसीईटी) रावेत येथील पिंपरी चिंचवड कॉलेज ऑफ इंजीनियरिंग अँड रिसर्च (पीसीसीसोईआर) येथे अल्टिमेट रोबोटिक चॅम्पियनशिपचे (युआरसी) आयोजन करण्यात आले होते. या स्पर्धेचे उद्घाटन बुधवारी (दि. १६) करण्यात आले. यावेळी पीसीसीसोईआर चे प्राचार्य डॉ. हरीश तिवारी, ई अँड टीसी विभागाचे प्रमुख प्रा. डॉ. राहुल मापारी, प्रा. दिपाली ढाके, प्रा. रूपाली तावडे आदी उपस्थित होते.
या दोन दिवसीय राष्ट्रीय स्पर्धेत देशभरातील विविध शैक्षणिक संस्थांच्या २२ संघांनी सहभाग घेतला आहे. विद्यार्थ्यांना रोबोटिक क्षेत्रातील माहिती व्हावी, तसेच आधुनिक तंत्रज्ञानाचा वापर कसा करावा याबद्दल जाणून घेता यावे यासाठी ही स्पर्धा आयोजित केली आहे, असे डॉ. राहुल मापारी यांनी सांगितले.
येत्या काळात कृत्रिम बुद्धिमत्ता आणि रोबोटिक तंत्रज्ञानाचा वापर वाढणार आहे. विद्यार्थ्यांनी नियमित अभ्यासक्रमा बरोबरच तंत्रज्ञानातील बदल आत्मसात करण्यावर भर दिला पाहिजे, असे डॉ. हरीश तिवारी म्हणाले.
कार्यक्रमास महाविद्यालयातील विविध विद्याशाखांचे प्रमुख, देशभरातून आलेले विद्यार्थी, प्राध्यापक उपस्थित होते. सुत्रसंचलन सुहानी चालमेटी हिने केले. प्रा. रूपाली तावडे यांनी आभार मानले.

पीसीईटीचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयू चे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांनी स्पर्धेत सहभागी झालेल्या विद्यार्थ्यांना शुभेच्छा दिल्या.

शिक्षणावर ब्रिटिशांचा पगडा – डॉ. आदित्य अभ्यंकर

भारतावर ब्रिटिशांनी अनेक वर्ष राज्य केले. त्याचा परिणाम शैक्षणिक क्षेत्रातही दिसून येतो. या शिक्षण पध्दतीत केवळ कारकुन तयार होण्याचे काम होते. रट्टा मारून शिक्षणाची प्रगती होत नाही. मुलांना लहानपणापासून अनेक छोटे छोटे प्रश्न सतावत असतात. परंतु या शिक्षण पद्धतीमुळे त्यांना पडलेले प्रश्न सोडविण्यासाठी बळ मिळत नाही. विचार, संशोधन वृत्तीला खतपाणी घातले पाहिजे. हळूहळू ही परिस्थिती बदलत आहे‌. विद्यार्थ्यांमध्ये संशोधन वृत्ती जोपासली जात आहे. त्यासाठी सरकार व अनेक शैक्षणिक संस्था प्रयत्न करत आहे; ही समाधानाची बाब आहे. आयटी क्षेत्रात प्रॉडक्टिव्ह कंपनी भारतामध्ये नाही ती भविष्यात उभी राहिली पाहिजे, अशी अपेक्षा डॉ. आदित्य अभ्यंकर यांनी व्यक्त केली.

पुणे-पुण्यातील एका सराफाला खंडणी मागितल्याच्या प्रकरणात गाजलेले पुणे जिल्हा परिषदेचे माजी सभापती मंगलदास बांदल, हनुमंत संभाजी खेमधारे, सतीश जाधव आणि त्यांच्या कुटुंबीयांच्या 85 कोटी रुपयांच्या मालमत्तेवर सक्तवसुली संचालनालयाने (ईडी) टाच आणली आहे.पीएमएलए कायद्यानुसार या सर्वांच्या पुणे, सोलापूर आणि अहिल्यानगर येथील स्थावर मालमत्तांवर ईडीने टाच आणली आहे. बांदल यांच्या पुण्यातील महंमदवाडी, शिक्रापूर आणि बुरुंजवाडी (ता.शिरूर) येथील निवासस्थानांवर ईडीच्या पथकाने ऑगस्ट महिन्यात छापे टाकले होते. मंगलदास बांदल यांच्याकडे 5 आलिशान गाड्या आणि 1 कोटी किमतीची चार मनगटी घड्याळेही आढळून आली होती. शिवाजीराव भोसले सहकारी बँक फसवणूक प्रकरणी हि कारवाई केल्याचे सांगण्यात आले.

पुणे जिल्ह्याच्या राजकारणात बांदल यांच्या नावाच्या वारंवार चर्चा केल्या जातात. शिरूर तालुक्यातील शिक्रापूर येथील बांदल पैलवान म्हणूनही त्यांची ओळख आहे. मंगलदास बांदल हे पुणे जिल्हा परिषदेचे आरोग्य व बांधकाम विभागाचे माजी सभापती आहेत, वारंवार पक्षबदलाचे आरोप त्यांच्यावर होत असतो.मंगलदास बांदल हे कधीकाळी राष्ट्रवादी काँग्रेसचे प्रदेश उपाध्यक्ष होते. पुण्यातील एका सराफाला खंडणी मागितल्यावरून त्यांच्यावर गुन्हा दाखल झाला होता. पोलिसांकडून त्यांची चौकशी सुरू असतानाच राष्ट्रवादी काँग्रेसने त्यांना पक्षातून निलंबित केलं होतं. याशिवाय मंगलदास बांदल यांनी 2009 ला भाजपकडून विधानसभा निवडणूक लढवली होती. अपक्ष उमेदवार म्हणून ते जिल्हा परिषदेवरही निवडून गेले होते. तर 2019 मध्येही त्यांनी दिलीप वळसे पाटील यांच्या विरोधात निवडणूक लढवली होती.

बँक फसवणुकीचे नेमके काय होते प्रकरण?

शिरूर जिल्हा परिषदेच्या बांधकाम समितीचे माजी सभापती मंगलदास बांदल यांनी बनावट खरेदी खताच्या आधारे शिवाजीराव भोसले सहकारी बँकेकडून सव्वा कोटींचे कर्ज घेतले आणि त्याची परतफेड न करत एका नागरिकाची फसवणूक केल्याप्रकरणी शिक्रापूर पोलिसांनी 26 मे 2021 रोजी अटक केली होती. दत्तात्रय मांढरे यांनी दिलेल्या तक्रारीनंतर बांदल यांच्यावर कारवाई झाली होती. मंगलदास बांदल यांनी फिर्यादी मांढरे यांच्याशी सुरुवातीला मैत्रीचे संबंध निर्माण केले. मांढरे यांच्या नावावर खोटे खरेदी खत करून बांदल यांनी त्या आधारे शिवाजीराव भोसले बँकेतून आठ लाख रुपये कर्ज घेऊन ते स्वतः वापरले. त्यानंतर पुन्हा सदर मिळकतीवर कर्जाकरिता मांढरे यांचे कुलमुकात्यारपत्र व बोगस पुरवणी दस्त करून शिवाजीराव भोसले बँकेतून सव्वा कोटी रुपये कर्ज घेत तेही स्वतः साठी वापरले. त्याचे कर्ज हप्ते अडीच कोटी रुपयापर्यंत गेले आहे. या प्रकरणी फसवणूक झाली म्हणून मांढरे यांनी फिर्याद दिली होती.

पुणे, दि. १६: विधानसभा सार्वत्रिक निवडणुकीची आदर्श आचारसंहिता लागू झाली असून निवडणूक प्रक्रियेमध्ये माध्यम कक्षाची भूमिका खूप महत्त्वाची आहे. निवडणूक प्रक्रिया पार पाडताना मतदार संघनिहाय माध्यम कक्ष समन्वय अधिकाऱ्यांनी निरपेक्ष व पारदर्शकपणे काम करावे, असे निर्देश जिल्हाधिकारी डॉ. सुहास दिवसे यांनी दिले.

जिल्हाधिकारी कार्यालयात आयोजित जिल्ह्यातील २१ विधानसभा मतदार संघातील माध्यम कक्ष समन्वय अधिकाऱ्यांच्या बैठकीत ते बोलत होते. यावेळी जिल्हा माहिती अधिकारी डॉ. रवींद्र ठाकूर, माहिती अधिकारी सचिन गाढवे, पिंपरी-चिंचवड महानगरपालिकेचे विशेष अधिकारी किरण गायकवाड, सावित्रीबाई फुले पुणे विद्यापिठाच्या संज्ञापन व वृत्तपत्रविद्या विभागाचे सहायक प्राध्यापक योगेश बोराटे, सहायक संचालक जयंत कर्पे उपस्थित होते.

जिल्हाधिकारी डॉ. दिवसे म्हणाले, जनमानसामध्ये प्रशासनाची सकारात्मक प्रतिमा निर्माण करण्याचे काम माध्यम कक्षामार्फत केले जाते. निवडणूक प्रक्रियेत माध्यम प्रमाणिकरण आणि संनियंत्रण समिती खूप महत्त्वाची असून या समितीमार्फत राजकीय पक्ष, उमेदवार यांना सर्वच माध्यमांद्वारे जाहिरात प्रसारणासाठी पूर्व परवानगी दिली जाते. तालुका स्तरावरील माध्यम कक्षांनी पेड न्यूज, वृत्त वाहिन्यावरील जाहिराती, मतदारांची दिशाभूल करणाऱ्या समाज माध्यमांवरील पोस्टवर बारकाईने लक्ष देणे, निवडणूक प्रक्रियेविषयी चुकीची माहिती पसरवणाऱ्या वृत्तांचे तात्काळ खंडन करणे, राजकीय पक्ष आणि उमेदवारांचे व्यक्तिगत चारित्र्य हनन, समाजामध्ये द्वेष, तेढ निर्माण करणाऱ्या अथवा नियमांचे उल्लंघन करणाऱ्या पोस्ट, बातम्या, प्रचारावर लक्ष ठेऊन त्याबाबत निवडणूक निर्णय अधिकारी, जिल्हास्तरीय माध्यम कक्षाच्या निदर्शनास आणून देणे तसेच चुकीच्या बातम्यांचे तातडीने निराकरण करावे आणि त्यावर बारकाईने लक्ष ठेवावे, अशा सूचनाही डॉ. दिवसे यांनी दिल्या.

ते म्हणाले, निवडणूक प्रक्रियेवर भारत निवडणूक आयोगाचे बारकाईने लक्ष असते. निवडणूक प्रक्रिया महत्त्वाचे कार्य असून या प्रक्रियेत वैयक्तिक हितसंबंधाला महत्त्व देता कामा नये. जिल्ह्यात ८७ लाख मतदार आहेत. त्यामुळे निवडणूक आयोगाचे जिल्ह्यावर विशेष लक्ष आहे. सर्व अधिकाऱ्यांनी निवडणूक आयोगाच्या मार्गदर्शक तत्त्वांचा बारकाईने अभ्यास करुन जागरुकपणे आपापली जबाबदारी पार पाडावी, असेही ते म्हणाले.

जिल्हा माहिती अधिकारी डॉ. रवींद्र ठाकूर म्हणाले, भारत निवडणूक आयोगाच्या मार्गदर्शक तत्त्वानुसार माध्यम कक्षाची जबाबदारी निश्चित करण्यात आली आहे. उमेदवारांच्या प्रचार-प्रसिद्धीच्या खर्चावर जिल्हास्तरावर माध्यम प्रमाणिकरण आणि संनियंत्रण समितीमार्फत नियंत्रण ठेवण्यात येते. या समितीमार्फत जाहिरातींच्या प्रसारणासाठी पूर्व प्रमाणिकरण आवश्यक असून राजकीय पक्षांना सर्वच माध्यमांद्वारे प्रसारित करण्यात येणाऱ्या जाहिरातींसाठी या समितीमार्फत पूर्व परवानगी दिली जाते असे सांगून सर्व विधानसभा मतदार संघ स्तरीय माध्यम कक्षाच्या अधिकाऱ्यांनी पेड न्यूज व समाजमाध्यमांवरुन प्रसारित होणाऱ्या संदेशांबाबत सतर्क रहावे असे आवाहन केले. बैठकीला माध्यम प्रमाणिकरण आणि संनियंत्रण समिती सदस्य आकाशवाणीचे कार्यक्रम अधिकारी विक्रांत मंडपे व दैनिक सकाळचे पत्रकार अनिल सावळे तसेच विधानसभा मतदार संघाचे माध्यम कक्षांचे समन्वय अधिकारी उपस्थित होते.
0000

विद्यार्थ्यांनी पथनाट्य व रॅलीच्या माध्यमातून दिला समाजाला सकारात्मक संदेश 

पुणे:  एमआयटी आर्ट, डिझाईन आणि टॅक्‍नॉलॉजी विद्यापीठ, विश्वराजबाग, पुणेच्या स्कूल ऑफ एज्युकेशन अँड रिसर्च व स्कूल ऑफ वेदिक सायन्सेस यांच्या संयुक्त विद्यमाने जागतिक मानसिक आरोग्य दिनानिमित्त ‘मानसिक आरोग्य सप्ताह’ साजरा करण्यात आला. या सप्ताहाच्या समारोपप्रसंगी विद्यार्थ्यांच्या वतीने ‘संवेदनशीलता –  मानसिक आरोग्याची’ या विषयावर लोणी-काळभोर गावात रॅली काढून व पथनाट्याद्वारे जनजागृती करण्यात आली.

विद्यापीठातील ‘मॅनेट’ या इमारतीपासून या रॅलीला विद्यापीठाचे प्र.कुलगुरू प्रा. डाॅ.अनंत चक्रदेव व डाॅ.मोहित दुबे यांच्या हस्ते हिरवा झेंडा दाखवून प्रारंभ करण्यात आला. यावेळी, स्कूल ऑफ एज्युकेशन अँड रिसर्चच्या प्रभारी प्राचार्या डॉ. प्रिया सिंग आणि स्कूल ऑफ वेदिक सायन्सेसच्या प्रभारी प्राचार्या  डॉ. माधवी गोडबोले यांच्यासह दोन्ही स्कुलचे प्राध्यापक, शिक्षकेतर कर्मचारी आणि शेकडो विद्यार्थी देखील उपस्थित होते. 

ही रॅली लोणी-काळभोर गावात पोचल्यानंतर प्रा. पुष्पा आटोळे आणि डॉ. शशिकला यादव यांच्या मार्गदर्शनाखाली विद्यार्थ्यांनी मानसिक आरोग्यावर आधारित, ‘पिंजरे से मुक्ती’  हे अतिशय सुंदर पथनाट्य सादर केले. रॅलीच्या सांगते साठी लोणी-काळभोर गावच्या सरपंच सौ. सविताताई लांडगे यांनीही हजेरी लावून पथनाट्याचे तोंडभरून कौतुक करताना विद्यार्थ्यांचा उत्साह वाढविला. या रॅलीच्या व मानसिक आरोग्य सप्ताहाच्या यशस्वीतेसाठी समन्वयक डॉ. नीता म्हवान यांनी कष्ट घेतले. या कार्यक्रमासाठी विद्यापीठाचे कुलगुरू तथा कार्याध्यक्ष प्रा. डाॅ.मंगेश कराड, कार्यकारी संचालक डाॅ.सुनिता कराड, प्र. कुलगुरू डॉ. रामचंद्र पुजेरी, कुलसचिव डॉ. महेश चोपडे यांचे मार्गदर्शन लाभले.