खासगी, सार्वजनिक जागेवर निवडणूक प्रचारसाहित्य लावण्यास निर्बंध

पुणे, दि. १८: जिल्ह्यातील विधानसभा निवडणुकीच्या प्रक्रियेदरम्यान कोणतेही निवडणूक संबंधी साहित्य रहदारीस अडथळा होईल व अपघात होईल असे लावण्यास जिल्हाधिकारी तथा जिल्हा दंडाधिकारी डॉ. सुहास दिवसे यांनी निर्बंध आदेश जारी केले आहेत.

निवडणुकीची संपूर्ण प्रक्रिया शांततेत, निर्भय व न्याय वातावरणात पार पाडण्याच्या दृष्टीकोनातून राजकीय पक्ष, निवडणूक लढविणारे उमेदवार किंवा त्यांच्या प्रतिनिधींनी अथवा त्यांच्या हितचिंतकांनी सार्वजनिक इमारतीच्या ठिकाणी, सार्वजनिक रस्त्यावर, निवडणुकी संबंधी पोस्टर्स, बॅनर्स, पॉम्प्लेट्स, कटआऊट्स, होर्डींग्ज, कमानी आदी रहदारीस अडथळा निर्माण होवू शकेल व अपघात होईल अशा पद्धतीने लावण्यावर निर्बंध घाण्यात आले आहेत.

हे आदेश २५ नोव्हेंबर २०२४ पर्यंत अंमलात राहतील. आदेशाचे उल्लंघन केल्यास संबंधित हे लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता २०२३ कलम २२३ प्रमाणे दंडनीय कार्यवाहीस पात्र राहतील, असेही आदेशात नमूद करण्यात आले आहे.

खासगी, सार्वजनिक जागेवर निवडणूक प्रचारसाहित्य लावण्यास निर्बंध

विधानसभा निवडणूक कालावधीत खासगी व्यक्तींच्या जागेवर व सार्वजनिक प्राधिकरणाच्या जागेवर संबंधितांच्या परवानगी शिवाय निवडणूक प्रचाराचे साहित्य लावण्यास जिल्हाधिकारी तथा जिल्हादंडाधिकारी डॉ. सुहास दिवसे यांनी निर्बंध आदेश जारी केले आहेत.

जिल्ह्यातील विधानसभा निवडणूकीची संपूर्ण प्रक्रिया शांततेत, निर्भय व न्याय वातावरणात पार पाडण्याच्या दृष्टीकोनातून राजकीय पक्षांनी, निवडणूक लढविणाऱ्या उमेदवारांनी किंवा त्यांच्या प्रतिनिधींनी अथवा त्यांच्या हितचिंतकाने निवडणूकीच्या प्रचारासाठी झेंड्याच्या काठ्या उभारणे, कापडी फलक लावणे, भित्तीपत्रक लावणे, घोषणा लिहिणे इत्यादीकरीता कोणत्याही व्यक्तीच्या खासगी जागा, इमारत, आवार, भिंती इत्यादीवर संबंधित मालकीच्या परवानगी शिवाय व संबंधित सार्वजनिक प्राधिकरणाची परवानगी शिवाय वापर करण्यास निर्बंध लावण्यात आले आहेत.

हे आदेश २५ नोव्हेंबर २०२४ पर्यंत अंमलात राहतील. तसेच आदेशाचे उल्लंघन केल्यास संबंधित हे लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता २०२३ कलम २२३ प्रमाणे दंडनीय कार्यवाहीस पात्र राहतील, असेही आदेशात नमूद करण्यात आले आहे.
0000

पुणे, दि.१८ : आदर्श आचारसंहितेच्या काळात जिल्ह्यात धरणे, आंदोलन, मोर्चा, निदर्शने, उपोषण करण्यावर तसेच जात, भाषा, धर्मावर शिबिरांचे आयोजन करण्यावर जिल्हाधिकारी तथा जिल्हा दंडाधिकारी डॉ. सुहास दिवसे यांनी निर्बंधाचे आदेश जारी केले आहेत.

जिल्ह्यातील विधानसभा सार्वत्रिक निवडणूकीची संपूर्ण प्रक्रिया शांततेत, निर्भय व न्याय्य वातावरणात पार पाडण्याच्या दृष्टीकोनातून भारतीय नागरिक सुरक्षा संहिता -२०२३ चे कलम १६३ अन्वये प्रदान अधिकारानुसार डॉ. दिवसे यांनी हे आदेश काढले आहेत.

जिल्हा दंडाधिकारी, उपविभागीय दंडाधिकारी, तालुका दंडाधिकारी कार्यालय तसेच जिल्ह्यातील सर्व शासकीय, निमशासकीय कार्यालय, शासकीय विश्रामगृह, सार्वजनिक ठिकाणे, रस्त्यावर कोणत्याही राजकीय पक्षाने, व्यक्तीने, संघटनेने निवडणूक लढविणाऱ्या उमेदवाराने किंवा त्याच्या प्रतिनिधीने अथवा त्याच्या हितचिंतकाने धरणे आंदोलन, मोर्चा, निदर्शने, उपोषण करण्यावर निवडणूक कालावधीकरीता निर्बंध घालण्यात आले आहेत. तसेच जिल्ह्यात कोणत्याही प्रकारचे जात, भाषा व धर्मावर शिबिरांचे आयोजन करण्यावर निर्बंध घालण्यात आले आहेत.

हे आदेश २५ नोव्हेंबर २०२४ पर्यंत अंमलात राहतील. या आदेशाचे उल्लंघन केल्यास लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता २०२३ कलम २२३ प्रमाणे दंडनीय कार्यवाहीस पात्र राहतील, असेही आदेशात नमूद करण्यात आले आहे.
0000

पुणे, दि. १८: विधानसभा निवडणूक प्रचारासाठी राजकीय पक्ष, निवडणूक लढविणारे उमेदवार किंवा त्यांच्या प्रतिनिधींनी निवडणूक प्रचारासाठी दहा पेक्षा अधिक मोटारगाड्या, वाहनांच्या ताफ्याचा वापर करण्यास जिल्हाधिकारी तथा जिल्हादंडाधिकारी डॉ. सुहास दिवसे यांनी निर्बंध आदेश जारी केले आहेत.

हे आदेश २५ नोव्हेंबर २०२४ पर्यंत अंमलात राहतील. या आदेशाचे उल्लंघन करणारे लोकप्रतिनिधीत्व अधिनियम 1951 मधील तरतुदीनुसार व भारतीय न्याय संहिता २०२३ कलम २२३ प्रमाणे दंडनीय कार्यवाहीस पात्र राहतील, असेही आदेशात नमूद करण्यात आले आहे.

पुणे : ज्योतिष वास्तू विश्व संशोधन केंद्र, पुणे या संस्थेतर्फे तृतीय पदवी प्रदान सोहळा व पुरस्कार वितरण सोहळ्याचे आयोजन रविवार, दिनांक २० आॅक्टोबर रोजी करण्यात आले आहे. पद्मावती येथील विणकर सभागृह येथे सकाळी ९ ते सायंकाळी ६ या वेळात हा कार्यक्रम होणार आहे, अशी माहिती संस्थेचे अध्यक्ष वेदमूर्ती उमेश कुलकर्णी गुरुजी यांनी पत्रकार परिषदेत दिली.
पत्रकार परिषदेला अंक ज्योतिष अभ्यासक प्रसाद शिरोडकर उपस्थित होते.
मुख्य पदवी प्रमाणपत्र वितरण कार्यक्रम सकाळी १० वाजता होणार आहे. त्यामध्ये वास्तुविशारद, लोलक विशारद, अंक विशारद, वास्तुभूषण वर्गाच्या विद्यार्थ्यांना पदवी प्रमाणपत्र प्रदान करण्यात येणार आहे. यावेळी दत्त उपासक गुरुश्री प्रिया मालवणकर, ज्योतिषशास्त्री अंजली पोतदार हे मान्यवर उपस्थित राहणार आहेत. तृतीय पदवी प्रमाणपत्र सोहळ्याअंतर्गत विविध वयोगटातील व विविध अभ्यासक्रमा अंतर्गत तब्बल १५० विद्यार्थ्यांना  पदवी प्रमाणपत्र आणि पारितोषिक देण्यात येईल.
ते पुढे म्हणाले, रविवारी दुपारी २ वाजता वास्तू रत्न, विशेष लक्षवेधी, अचिव्हमेंट आॅफ द इयर आणि इतर पुरस्कारांचे वितरण करण्यात येणार आहे. यावेळी रमलगुरु चंद्रकांत शेवाळे, अ‍ॅड. सुनिता पागे, महाराष्ट्र ज्योतिष परिषदेचे अध्यक्ष ज्योतिष शास्त्री अनिल चांदवडकर , श्रौतस्मार्त अभ्यासक अनिरुद्ध इनामदार गुरुजी यांसह इतरही मान्यवर उपस्थित राहतील.
ज्योतिषाचार्य अनिल चांदवडकर यांना रत्नमाला पुरस्कार, गुरुश्री प्रिया मालवणकर यांना शारदा पुरस्कार, अंजली पोतदार यांना अक्षरलक्ष्मी पुरस्कार आणि अनिरुद्ध इनामदार गुरुजी यांना वेदमार्ग दीपस्तंभ पुरस्काराने गौरवण्यात येईल. दरवर्षी या कार्यक्रमाचे आयोजन करण्यात येते. तसेच संस्थेतर्फे सुरू असलेल्या अभ्यासक्रमात पारंगत होऊन अनेक विद्यार्थी आज यशस्वीरित्या समाजात कार्यरत आहेत.

पुणे : गायकी अंगाने सादर झालेल्या बंदिशी आणि विविध रागांनी परिपूर्ण संवादिनी वादनाने रसिकांची सायंकाळ सुरांच्या वर्षावात चिंब झाली. निमित्त होते भारतीय संगीत प्रसारक मंडळाच्या गांधर्व महाविद्यालय, पुणे अंतर्गत असलेल्या संवादिनी प्रेमी मंडळातर्फे (सप्रेम) आयोजित संवादिनी वादनाच्या विशेष मैफलीचे.
या मैफलीत गोवा येथील सुप्रसिद्ध संवादिनी वादक पंडित राया कोरगावकर आणि बंगळुरू येथील सुप्रसिद्ध संवादिनी वादक पंडित रवींद्र कातोटी यांचे एकल संवादिनी वादन झाले. कार्यक्रमाचे आयोजन गांधर्व महाविद्यालयातील विष्णू विनायक स्वरमंदिरात करण्यात आले होते. प्रसिद्ध उद्योजक संजय चितळे यांच्यासह गांधर्व महाविद्यालयाचे प्राचार्य पंडित प्रमोद मराठे, उपप्राचार्या परीणिता मराठे, विश्वस्त अच्युत मेढेकर यांची प्रमुख उपस्थिती होती. संवादिनी वादन क्षेत्रातील अनेक कलाकारांनी या मैफलीत आवर्जून उपस्थिती लावली.
मैफलीची सुरुवात राया कोरगावकर यांनी राग गावतीमधील पंडित रामाश्रय झा यांनी रचलेल्या ‌‘आस लागी तुम्हारे चरण‌’ आणि ‌‘हमरी पार करो साई झांझरी नैय्या‌’ या बंदिशी गायकी अंगाने सादर करून केल्या. संवादिनीतून फक्त सुरच नव्हे तर शब्दही उमटतात हे ऐकून रसिक मंत्रमुग्ध झाले. त्यानंतर राया कोरगावकर यांनी स्वत: रचना केलेला आडाचौताल रागातील तराणा अतिशय प्रभावीपणे सादर केला. ठुमरी वादनाने कोरगावकर यांनी आपल्या मैफलीची सांगता केली. त्यांना गोवा येथील तुकाराम गोवेकर (तबला), सुनाद कोरगावकर (संवादिनी) यांनी समर्पक साथ केली.
कार्यक्रमाच्या उत्तरार्धात पंडित रवींद्र कातोटी यांनी मैफलीची सुरुवात श्याम कल्याण राग ऐकवून केली. रागाचा विस्तार त्यातील बारकावे संवादिनी वादनातून सहजपणे उलगडून दाखवित कातोटी यांनी रसिकांची वाहवा मिळवली. राग जयजयवंतीचे बहारदार सादरीकरण रसिकांना विशेष भावले. पुरंदरदास यांच्या कर्नाटकी रागसंगीतात स्वरबद्ध केलेल्या रचनेचा हिंदुस्थानी शास्त्रीय संगीतावर आधारित स्वरार्थ सादर करून पंडित कातोटी यांनी रसिकांना मोहित केले. पंडित कातोटी यांनी आपल्या मैफलीची सांगता सुरेल भैरवी वादनाने केली. ऋषिकेश जगताप (तबला) तर तेजस कातोटी (संवादिनी) यांनी समर्पक साथ केली.
कलाकारांचा सत्कार संजय चितळे, अच्युत मेढेकर यांनी केला. कलाकारांची ओळख व निवेदन पंडित प्रमोद मराठे यांनी केले तर संजय चितळे यांचा सन्मान प्रसिद्ध संवादिनी वादक सुधीर नायक यांनी केला.

मोरगाव दि.१७: शिवसेना नेत्या तथा विधानपरिषद उपसभापती डॉ. नीलम गोऱ्हे यांनी तीर्थक्षेत्र मोरगाव ता. बारामती येथील मयुरेश्वराचे दर्शन घेऊन श्रींची विधिवत पूजा करत महावस्त्र, नैवेद्य, पुष्पहार अर्पण केला. तसेच गणपतींची आरती करून श्रीफळांचे तोरण अर्पण करण्यात आले. यावेळी देवस्थानच्या वतीने महावस्त्र व श्री मयुरेश्वर यांची प्रतिमा देऊन डॉ.गोऱ्हे यांचा सत्कार करण्यात आला. याप्रसंगी जेहलम जोशी, सुरेंद्र जेवरे शिवसेना जिल्हाप्रमुख यांसह देवस्थानचे पदाधिकारी उपस्थित होते.

यावेळी डॉ. गोऱ्हे यांनी, शेतकरी, महिला, युवक, विद्यार्थी या सर्वांना सुरक्षित आणि चांगलं जीवन मिळावं यासाठी प्रार्थना केली. तसेच मयुरेश्वराने याआधी अनेक संकल्प पूर्ण केलेले आहेत जे राहिले आहेत ते देखील लवकरच पूर्ण व्हावेत अशी गणराया चरणी प्रार्थना केली. याखेरीज राज्याच्या विधानसभा निवडणुकीत शंभर टक्के मतदान होण्यासाठी जनतेने निवडणूक आयोगाला सहकार्य करावे. निवडणूक आयोगाने देखील नागरिकांना योग्य सोयीसुविधा मिळण्यासाठी विशेष लक्ष दिले असल्याचे त्यांनी सांगितले.

आवश्यक सोयीसुविधा उभारण्याबाबत ऊर्जा विभाग, महापालिका आणि पोलीस आयुक्तांकडे करणार पाठपुरावा

पुणे दि.१७: बोपदेव घाट व परिसरात सुरक्षेच्या दृष्टीने उभारण्यात आलेल्या पोलीस चौकीला शिवसेना नेत्या तथा उपसभापती डॉ. नीलम गोऱ्हे यांनी भेट देऊन पाहणी केली व आढावा घेतला. तसेच भविष्यात चुकीच्या घटना टाळण्यासाठी योग्य ती खबरदारी घेण्याबाबत पोलीसांना सूचना दिल्या. यावेळी वरिष्ठ पोलीस अधिकारी उपस्थित होते.

यावेळी डॉ. गोऱ्हे यांनी घाटातील रस्त्यांवर प्रचंड अंधार असल्याने प्रकाश खांब लावणे गरजेचे असून याबाबत ऊर्जा विभाग, महापालिके आणि पोलीस विभागाकडे पाठपुरावा करणार असल्याचे सांगितले. तसेच येथील चौकीत असणाऱ्या पोलिसांकरिता मोबाईल टॉयलेटची सोय, चौकीतील खिडक्यांना सुरक्षा जाळी आणि घाट क्षेत्रात मोबाईल नेटवर्क सुविधा वाढविणे यांकरिता पोलीस आयुक्तांकडे पाठपुरावा करणार असल्याचे त्यांनी सांगितले. याखेरीज पोलीस प्रशासनाकडून करण्यात आलेली सर्च लाईट व्यवस्था, ध्वनिक्षेपकाद्वारे करण्यात येणारी घोषणा आणि या भागात तैनात करण्यात आलेले दहा पोलिसांचे गस्ती पथकाबाबत डॉ. गोऱ्हे यांनी समाधान व्यक्त केले.

पुणे : गुणीजान रिसर्च आर्ट कल्चर अँड एज्युकेशन फाऊंडेशनतर्फे (ग्रेस) प्रसिद्ध हिंदुस्थानी शास्त्रीय गायक पद्मभूषण पंडित सी. आर. व्यास यांच्या 100व्या जयंतीनिमित्त देशपातळीवर घेण्यात आलेल्या गुणीजान बंदिश स्पर्धेची अंतिम फेरी शनिवारी (दि. 19) रंगणार आहे.
अंतिम फेरी 19 ऑक्टोबर रोजी दुपारी 2:30 वाजेपासून डॉ. श्रीराम लागू रंगावकाश, हिराबाग, पुणे (ज्योत्स्ना भोळे सभागृह आवार) येथे होणार आहे. उपउपांत्य फेरीसाठी महिला गटात 11 स्पर्धकांची तर पुरुष गटात 10 स्पर्धकांची निवड करण्यात आली होती. उपउपांत्य फेरीतील स्पर्धकांचे सादरीकरण गुरुवारी झाले. त्यातून उपांत्य फेरीसाठी प्रत्येक गटातून सहा स्पर्धकांची निवड करण्यात आली आहे.
ज्येष्ठ गायिका अभिनेत्री निर्मला गोगटे, पद्मश्री तालयोगी पंडित सुरेश तळवलकर, पद्मश्री पंडित उल्हास कशाळकर, पद्मभूषण पंडित साजन मिश्रा, पद्मश्री पंडित सतिश व्यास, पंडित सुहास व्यास, विदुषी अश्विनी भिडे-देशपांडे, विदुषी देवकी पंडित यांनी स्पर्धेचे परीक्षण केले.

महिला गटात निवड झालेले स्पर्धक : आद्या मुखर्जी, सोमदत्ता चॅटर्जी, युगंधरा केचे, नंदिनी गायकवाड, स्वाती तिवारी, तेजस्विनी वेर्णेकर

पुरुष गटात निवड झालेले स्पर्धक : इशान घोष, अथर्व वैरागकर, ऋषिकेश करमरकर, मेहेर परळीकर, दर्शन मेलमंकी, चैतन्य परब

पारितोषिक वितरण समारंभ रविवार, दि. 20 ऑक्टोबर 2024 रोजी सायंकाळी 6 वाजता डॉ. श्रीराम लागू रंगावकाश, हिराबाग, पुणे (ज्योत्स्ना भोळे सभागृह आवार) येथे आयोजित करण्यात आला असून पारितोषिक वितरण मान्यवर परीक्षकांच्या हस्ते होणार आहे.
देशपातळीवर आयोजित करण्यात आलेल्या गुणीदास बंदिश स्पर्धेतील सादरीकरण रसिकांसाठी खुले असून पुण्यातील संगीतप्रेमींनी आवर्जून उपस्थिती लावून स्पर्धकांचा उत्साह वाढवावा, असे आवाहन आयोजकांतर्फे करण्यात आले आहे.

पुणे: पुणे जिल्ह्यासह सीमेवरील अहिल्यानगर, सोलापूर, ठाणे, सातारा व रायगड या जिल्ह्यांनी आपापल्या चेक पोस्टवर आचारसंहितेच्या कालावधीत संशयीत वाहतुकीवर कडक नजर ठेवून कारवाई करावी, अशा सूचना जिल्हाधिकारी तथा जिल्हा निवडणूक अधिकारी डॉ. सुहास दिवसे यांनी केल्या.

विधानसभा निवडणूकीच्या पार्श्वभूमीवर पुणे जिल्ह्याच्या सीमेवरील अहिल्यानगर, सोलापूर, ठाणे, सातारा व रायगड या जिल्ह्यातील जिल्हाधिकारी, पोलीस अधीक्षक, राज्य उत्पादन शुल्क अधिकारी, उप जिल्हा निवडणूक अधिकारी, निवडणूक निर्णय अधिकारी यांची दूरदृश्य प्रणाली द्वारे आंतरजिल्हा सीमा आढावा बैठक आयोजित करण्यात आली होती. त्यावेळी डॉ. दिवसे बोलत होते.

पुणे जिल्ह्याच्या संदर्भात डॉ. दिवसे म्हणाले, लोकसभा सार्वत्रिक निवडणूक 2024 साठी जिल्ह्याच्या सीमेवर तपासणी नाके (चेक पोस्ट) लावण्यात आलेल्या ठिकाणी पुन्हा ते लावण्यात यावेत. तसेच आवश्यकतेनुसार चेक पोस्टची जागा बदलण्यात यावी. चेक पोस्टवर सीसीटीव्ही कॅमेरे, छायाचित्रीकरण अनिवार्य करावे. येणारी वाहने ज्या जिल्ह्यात प्रवेश करतील त्या जिल्ह्यातील चेक पोस्टवर तपासणी करून संबंधित चेक पोस्ट ने अंतिम कारवाई करणे अपेक्षित आहे.

पुणे जिल्ह्यातील ताम्हिणी घाट, भोर परिसरातील पश्चिम भागात छुप्या रस्त्याने अंमली पदार्थ, गावठी दारूची वाहतूक होऊ नये यासाठी वारंवार तपासणी करण्यात यावी. तसेच जल, वायू या मार्गानेदेखील वाहतूक होऊ नये यासाठी तपासणीच्या सूचनाही त्यांनी यावेळी दिल्या.

पुणे जिल्ह्यात 204 मावळ, 199 दौंड, 200 इंदापूर, 201 बारामती, 195 जुन्नर व 198 शिरूर या विधानसभा मतदारसंघाची हद्द शेजारील रायगड, अहिल्यानगर, सोलापूर, सातारा व ठाणे या जिल्ह्याशी जोडलेली आहे.
0000