पुणे :

कनिना खास कारकला (हरयाणा) येथे झालेल्या ‘सीबीएससी बॉक्सिंग नॅशनल कॅाम्पीटीशन 2023-2024 ‘मध्ये राजवीर प्रिया अमीत सुर्यवंशी ने गोल्ड मेडल पटकावले तसेच बेस्ट बॉक्सर हा बहुमान मिळवला. दि.१६ ते २० ऑक्टोबर २०२४ दरम्यान ही स्पर्धा झाली.१७ वर्षाखालील मुलांच्या ५० ते ५२ किलो या वजनी गटात त्याने हे विजेतेपद पटकावले.राजवीर हा दिल्ली पब्लिक स्कुल(पुणे)चा विद्यार्थी असून एमआयजीएस पुणे या क्लबमध्ये बॉक्सिंगचे प्रशिक्षण घेतले.त्याला मृणाल भोसले,रोहन जगदाळे,उमेश जगदाळे, मंगेश यादव,हरिकिशन बेलवाल,जयसिंग पाटील,अर्जुन नेगी, मोहम्मद आरिफ,विजय शर्मा, सिद्धार्थ वर्मा यांचे मार्गदर्शन लाभले .

राष्ट्रवादी कॅांग्रेसच्या राज्य प्रवक्ता अॅड.रूपाली पाटील-ठोंबरे,अजय दराडे,माजी नगरसेवक युवराज बेलदरे,डॉ.संतोष तळेकर,अविनाश बागवे,भरत वावळ,मदन वाणी,अभिमन्यू सूर्यवंशी,अमोल सोनवणे, विजय गुजर,जीवनलाल निनदाणे,अशोक मेमजादे,रॅाबर्ट दास,ऋषिकांत वचकळ,शरद कंक, गोडसे,वाढवणे,जयदीप नीलवर्ण,वेदप्रकाश यादव,प्रवीणकुमार,एमआयजीएस,सर्व पालक व विद्यार्थी यांनी राजवीरचे अभिनंदन केले.

एमआयटी डब्ल्यूपीयूत‘ सहाव्या राष्ट्रीय माध्यम व पत्रकारिता परिषदेचे उद्घाटन’

पुणे, २१ ऑक्टोबर :” मिडिया आणि समाज यांचे अतूट नाते आहे. सामाजिक प्रश्न आणि जनहिताशी जोडूनच पत्रकारिता अर्थपूर्ण बनते. पत्रकारितेच्या तीन स्तरावरील अभ्यासात सर्व प्रथम स्तर गेल्या १०० वर्षातील पत्रकारिता, स्वातंत्र्यपूर्व काळातील पत्रकारिता आणि वर्तमान काळातील पत्रकारिता असा अभ्यास करता येतो.” असे विचार माजी सनदी अधिकारी व सांसद टिव्हीचे माजी वरिष्ठ कार्यकारी अधिकारी रवी कपूर यांनी व्यक्त केले.
एमआयटी वर्ल्ड पीस युनिव्हर्सिटी च्या स्कूल ऑफ मिडिया अँड कम्युनिकेशन, पुणेतर्फे सहाव्या राष्ट्रीय माध्यम व पत्रकारिता परिषद, कोथरुड येथील एमआयटी वर्ल्ड पीस युनिव्हर्सिटी येथे आयोजित करण्यात आली. याच्या उद्घाटन प्रसंगी प्रमुख पाहुणे म्हणून ते बोलत होते.
पुणे युनियन ऑफ वर्किंग जर्नालिस्ट, आर. के.लक्ष्मण संग्रहालय आणि  नवी दिल्ली फॉरेन करस्पॉन्डंटस क्लब ऑफ साउथ एशिया यांच्या सहयोगाने ही परिषद  होत आहे.
यावेळी प्रसिद्ध टेलिव्हिजन निर्माता सिद्धार्थ काक, पुणे श्रमिक पत्रकार संघाचे अध्यक्ष सुमित भावे, हेरॉल्ड पब्लिकेशनचे समूह प्रमुख सुजय गुप्ता, बुलंद भारत टिव्हीचे मुख्य संपादक राजकिशोर तिवारी, लेखक निल डिसुल्वा आणि अभिनेत्री प्रांजली सिंग परिहार या प्रमुख पाहुणे म्हणून उपस्थित होते. कार्यक्रमाच्या अध्यक्षस्थानी एमआयटी डब्ल्यूपीयूचे संस्थापक अध्यक्ष प्रा. डॉ. विश्वनाथ दा. कराड होते.
तसेच एमआयटी वर्ल्ड पीस युनिव्हर्सिटीचे सीओओ डॉ. संजय कामतेकर व स्कूल ऑफ मीडिया कम्युनिकेशनचे सहयोगी अधिष्ठाता धिरज सिंग उपस्थित होते.
एमआयटी वर्ल्ड पीस युनिव्हर्सिटीचे कार्याध्यक्ष राहुल विश्वनाथ कराड यांच्या संकल्पनेतून आणि नेतृत्वाखाली ही परिषद होत आहे.
रवी कपूर म्हणाले,” सर्वात पहिला स्तर म्हणजे गेल्या १०० वर्षामध्ये सृष्टीवरील संपूर्ण समाजाला आणि घटनांना बीबीसी, सीएनबीसी, इकॉनॉमिक्स आणि टाईम्स ऑफ इंडिया या वृत्तपत्रांनी जोडून ठेवले होते. त्यानंतर देशात स्वातंत्र्यपूर्व काळात म. गांधीजी यांनी वृत्तपत्रांच्या माध्यमातून संपूर्ण समाजाला नियंत्रित केले होते. वर्तमान काळात सोशल मिडियाच्या माध्यमातून संपूर्ण मानव एक दूसर्‍याशी जुळलेला आहे. आता सरकारवर विचार करण्याची वेळ आली आहे की याला नियंत्रित कसे करावे. त्यातच भविष्य एआयचे आहे. परंतू हे सर्व असतांना सुद्धा कंटेन्ट सर्वात महत्वपूर्ण राहणार आहे.”
प्रा.डॉ. विश्वनाथ दा. कराड म्हणाले,”माध्यमांच्या माध्यमातूनच समाजाला दिशा दाखविण्याचे कार्य होत आहे. त्यामुळे पत्रकारितेत तत्वांचे पालन करून योग्य मार्गावर चालावे. आध्यात्माच्या आधारे तत्वनिष्ठ पत्रकारिता करावी. सध्याच्या काळात शिक्षण क्षेत्रात काॅन्शियसनेस ही संकल्पना नवी दिशा देणारी असल्याने माध्यमांनी यावर ही विचार करावा.”
सुमीत भावे म्हणाले,” पत्रकारिता ही समाजातील घटनांना व्यक्त करणारे माध्यम आहे. परंतू वर्तमान काळात वाढत्या सोशल मिडियामुळे समाजाला व्यक्त होता येते परंतू हाच मिडिया देशामध्ये विभाजन आणू पाहतो. एआयचा प्रवेश होत असतांना पत्रकाराने स्वतःला अपडेट करावे.”
” पुणे श्रमिक पत्रकार संघ हा देशातील सर्वात जुनी १९४० ची संघटना असून यामध्ये जवळपास ५०० पेक्षा अधिक पुणे व पिंपरीचे सदस्य असल्याचे त्यांनी नमूद केले.”
राजकिशोर तिवारी म्हणाले,” सतत बातम्यांच्या शोधात असलेले माध्यमे हे शक्तीशाली असून त्यामध्ये अनेक आव्हाने आहेत. ५ डब्ल्यू १ एच या तत्वाचे पालन करून प्रश्न विचारण्याची ताकत तुमच्यात असावी. याशिवाय पत्रकारिता पूर्ण होऊच शकत नाही. एआयच्या जगात मोठ्या प्रमाणात बदल होणार्‍या माध्यमात आजही कंटेन्टला सर्वाधिक महत्व आहे.”
सिध्दार्थ काक म्हणाले,” समाजाला नवउत्साह देण्याचे काम माध्यमातून होत आहे. पत्रकारिता करतांना निरिक्षण अत्यंत महत्वाचे आहे. तसेच ऐकणे व समजणे, प्रश्न विचारणे आणि विचारपूर्वक लिखाण करणे हे खूप गरजेचे आहे.”
 मिडिया हा समाजाशी जुळलेला असल्याने कोणताही विषय हाताळतांना त्याच्या मुळापर्यंत जाऊन काम करावे. मिशन, व्हिजन, गोल आणि शोध पत्रकारिता करतांना पत्रकारितेचे तत्व सोडू नये. कोविडच्या काळानंतर या क्षेत्रात प्रचंड बदल आले आहेत. असे विचार सुजय गुप्ता, निल डिसुल्वा व अभिनेत्री प्रांजली सिंग परिहार यांनी व्यक्त केले.
 एमआयटी डब्ल्यूपीयूचे कुलगुरू डॉ. आर.एम.चिटणीस यांनी व्हिडीओच्या माध्यमातून संदेश देऊन शुभेच्छा दिल्या. त्यानंतर डॉ. संजय कामतेकर यांनी विचार मांडले.
प्रा.धिरज सिंग यांनी स्वागतपर भाषण केले.  
डॉ. गौतम बापट यांनी सूत्रसंचालन केले.

खोट्या बातम्या पसरवून माझी उमेदवारी धोक्यात आणण्याचे प्रयत्न सुरु

पण पक्ष श्रेष्ठींवर माझा विश्वास –त्यांना ठाऊक कामाच्या माणसालाच विरोध केला जातो

पुणे- आज काही माध्यमातून बागवे पिता पुत्र फडणवीसांना भेटले आणि ते भाजपच्या वाटेवर आहेत असे वृत्त दिल्याने कॉंग्रेसचे पुणे कॅन्टोन्मेंट विधानसभा मतदार संघातील इच्छुक उमेदवार आणि माजी गृहराज्यमंत्री रमेश बागवे अखेरीस संतापले आहे,आजवर विविध मार्गाने मला उमेदवारी मिळू नये म्हणून भाजपची सुपारी घेऊन माझे विरोधक प्रयत्न करत आहे आता त्यांनी अशा चांगल्या समजल्या जाणाऱ्या माध्यमांना हाताशी धरून खोट्या बातम्या पेरून माझी उमेदवारी धोक्यात आणण्यासाठी प्रयत्न सुरु केले आहेत. मी इकडे भाजप आणि फडणवीस यांच्या विरोधात आंदोलने करतो माझ्या अध्यक्षपदाच्या कारकिर्दीत सर्वाधिक आंदोलने जनतेच्या हिताच्या मुद्द्यावर करणारा मी क्रमांक १ चा अध्यक्ष असेल . माझ्या विरोधकांनी उघडलेल्या खेचाखेचीच्या राजकारणाला बळी पडून माध्यमांनी यांच्या नादाला लागून खोट्या बातम्या देऊ नयेत.मी जर भेटलो असेल फडणवीसांना तर पुराव्यासह दाखवून द्यावे .मुळात मी गांधीवादी आणि सर्वधर्मसमभाव मानणारा कार्यकर्ता आहे,पुणे कॅन्टोन्मेंट विधानसभा मतदार संघात माझा विजय निश्चित आहे आणि माझ्या एवढा जनसंपर्क दांडगा ठेवलेला,स्ट्राँग उमेदवार नाही म्हणून माझे पाय खेचायचे कामे केली जात आहेत. पण मी या सर्वांना पुरून उरेन असेही ते म्हणाले. पक्ष श्रेष्ठींवर माझा विश्वास असून त्यांना माझ्या कामाबाबत काम केल्याने शत्रू निर्माण झालेबाबत माहिती आहे. त्यामुळे अशा बिनबुडाच्या बातम्या आणि आरोपांवर ते विश्वास ठेवणार नाहीत.

विश्वबंधुता साहित्य परिषदेतर्फे रयत विचारवेध संमेलन
पुणे: “समाजातील सर्व घटकांना शिक्षणाची दारे खुली व्हावीत, त्यातून समताधिष्ठित समाजाची निर्मिती व्हावी, यासाठी कर्मवीर भाऊराव पाटील यांनी समता व बंधुतेचा विचार घेऊन रयत शिक्षण संस्थेच्या माध्यमातून गोरगरिबांना सन्मान दिला. ही समताधिष्ठित समाज व्यवस्था भविष्यातही टिकून राहावी, यासाठी बंधुतेची गरज आहे,” असे प्रतिपादन ज्येष्ठ साहित्यिक, माजी संमेलनाध्यक्ष डॉ. श्रीपाल सबनीस यांनी केले. 
बंधुता लोकचळवळीच्या सुवर्ण महोत्सवी वर्षानिमित्त विश्वबंधुता साहित्य परिषद आणि रयत शिक्षण संस्थेच्या डॉ. बाबासाहेब आंबेडकर महाविद्यालयाच्या संयुक्त विद्यमाने आयोजित रयत विचारवेध संमेलनाच्या उद्घाटनप्रसंगी डॉ. श्रीपाल सबनीस बोलत होते. नवी पेठेतील पत्रकार भवनात झालेल्या कार्यक्रमात संमेलनाध्यक्ष बंधुताचार्य प्रकाश रोकडे, उद्घाटक रयत शिक्षण संस्थेचे सहसचिव डॉ. शिवलिंग मेनकुदळे, कवयित्री ललिता सबनीस, स्वागताध्यक्ष प्रा. डॉ. अरुण आंधळे, विद्यार्थी शिक्षक साहित्य संमेलनाध्यक्ष डॉ. सविता पाटील, कवी प्रा. चंद्रकांत वानखेडे, साहित्यिक प्रा. शंकर आथरे आदी उपस्थित होते.
याप्रसंगी डॉ. श्रीपाल सबनीस यांच्या अमृतमहोत्सवी वाढदिवसानिमित्त त्यांचा सपत्नीक सत्कार करण्यात आला. तसेच सबनीस यांच्या हस्ते डॉ. शिवलिंग मेनकुदळे, डॉ. अरुण आंधळे, डॉ. सविता पाटील, चंद्रकांत वानखेडे, शंकर आथरे, संगीता झिंजुरके आणि जनसंपर्क व पत्रकारितेतील योगदानाबद्दल जीवराज चोले यांचा संविधान देऊन सन्मान करण्यात आला.
डॉ. श्रीपाल सबनीस म्हणाले , “स्वार्थाच्या राजकारणापायी समाज तुटत चालला आहे. माणूस जातीधर्माच्या, वर्णभेदाच्या चौकटीत विभागाला जात आहे. अशावेळी समाजाला एकसंध ठेवण्यासाठी बंधुत्वाची भावना जनमानसात रुजायला हवी. भाऊरावांनी शंभर वर्षांपूर्वी केलेले कार्य पुढे घेऊन जाण्याचे काम प्रकाश रोकडे करत आहेत. धर्मांधतेचे राजकारण आपण हणून पाडायला हवे. मतभेदांना दूर करून सामाजिक समरसता जोपासण्याचे काम बंधुतेचा विचार करतो. बंधुतेची ही चळवळ विश्वव्यापी होतेय, याचा आनंद वाटतो.”
डॉ. शिवलिंग मेनकुदळे म्हणाले, “समता आणि बंधुता जपणारा माणूस आपल्याला बनायचे आहे. शाहू महाराजांकडून ज्या पद्धतीने कर्मवीर भाऊराव पाटील यांनी प्रेरणा घेतली तशी प्रेरणा आपल्याला घयायची आहे. अशा महापुरुषांचा विचार जपण्यासाठी आज बंधुतासारख्या संस्थांची गरज आहे. पारंपरिक बुरसटलेल्या विचारांना छेद देऊन भाऊराव पाटलांनी जसे शिक्षणाला प्राधान्य दिले त्याप्रमणे आज प्रत्येकाने शिक्षित होणे गरजेचे आहे. समाजात जर का सर्व बाजूनी परिवर्तन घडवायचे असेल तर शिक्षणाशिवाय याला पर्याय नाही. “
बंधुताचार्य प्रकाश रोकडे म्हणले, “छत्रपती शिवाजी महाराज, कर्मवीर भाऊराव पाटील, डॉ बाबासाहेब आंबेडकर यांनी नेहमीच रयतेचा विचार केला. आपल्याला लोकशाहीचे, मानवतावादाचे धडे त्या काळापासून दिले आहेत. मात्र अलीकडच्या काळात रयतेला जाती-धर्माच्या नावाने लढवले जात आहे. आरक्षणाच्या नावाखाली देशातील रयतेला एकमेकांसोबत झुंजत ठेवले जात आहे. ही गोंधळाची परिस्थिती निवारण्यासाठी हे रयत संमेलन आहे. आज प्रत्येकाच्या घरात संविधान असणे महत्त्वाचे आहे. साहित्यिकांनी अपप्रवृत्तीच्या विरोधात आवाज उठवला पाहिजे.”
प्रा. डॉ. अरुण आंधळे यांनी प्रास्ताविक केले. संगीता झिंजुरके यांनी अमोघ सूत्रसंचालन केले. रमेश पतंगे यांच्या सनई चौघडा वादनाने कार्यक्रमाला चांगलीच रंगत आली. प्रा. शंकर आथरे यांनी आभार मानले.

पोलीस स्मृतिदिन संचलन २१ ऑक्टोबर २०२४ शोक कवायत

पुणे-मागील एका वर्षाचे कालावधीत ज्या पोलीस अधिकारी व पोलीस कर्मचा-यांना आपले कर्तव्य बजावत असताना, वीरमरण आले, अशा संपुर्ण भारत देशातील सर्व राज्य, केंद्रातील निमलष्करी पोलीस दलातील पोलीस अधिकारी व पोलीस अंमलदार / जवान यांचे स्मृतिला आज दिनांक २१ ऑक्टोबर २०२४ रोजी सकाळी ०७/३० वा.ते ०९/०० वा.चे दरम्यान पाषाण रोड स्थित महाराष्ट्र राज्य पोलीस संशोधन केंद्र, (सीपीआर), पाषाण पुणे येथील पोलीस हुतात्मा स्मृतिस्थळावर पोलीस दलाच्या वतीने आदरांजली वाहण्यात आली.
लडाख येथे दि.२१ ऑक्टोबर १९५९ या दिवशी हॉटस्प्रिंग या कडाक्याच्या थंडीच्या ठिकाणी, सुसज्ज चिनी सैन्याने केंद्रीय निमलष्करी पोलीस दलाच्या १० शुर शिपायांच्या तुकडीवर पुर्व तयारी निशी अचानक हल्ला केला. त्यावेळी त्या १० शुर वीरांनी शत्रुशी निकराने लढत देऊन देशासाठी आपले देह धारातिर्थी ठेवले. तेव्हापासुन २१ ऑक्टोबर हा दिवस देशातील विविध पोलीस दलाचे वतीने पोलीस स्मृतीदिन म्हणुन पाळला जातो. पोलीस स्मृतिदिनाचे दिवशी एकाच वेळी देशातील सर्व पोलीस मुख्यालयाचे ठिकाणी मागील एका वर्षाचे कालावधीत ज्या पोलीस अधिकारी व कर्मचाऱ्यांनी आपले कर्तव्य बजावत असताना प्राणांची आहुती दिली त्या सर्वांना आदरांजली वाहण्यात येते.

आज महाराष्ट्र राज्य पोलीस संशोधनकेंद्र, (सीपीआर), पाषाण पुणे येथील पोलीस हुतात्मा स्मृति स्मारकावर सकाळी ०८/०० वा. श्री. दत्ता पडसलगीकर मानद संचालक महाराष्ट्र गुप्तवार्ता प्रबोधनी पुणे व माजी पोलीस महासंचालक, महाराष्ट्र राज्य तसेच श्री. अमितेश कुमार पोलीस आयुक्त, पुणे शहर, विनयकुमार चौबे, पोलीस आयुक्त, पिंपरी- चिंचवड, पुणे, दीपक पाण्डये अप्पर पोलीस महासंचालक व संचालक पोलीस दळणवळण माहिती तंत्रज्ञान व परिवहन महाराष्ट्र राज्य पुणे,सुनिल फुलारी विशेष पोलीस महानिरीक्षक, कोल्हापुर परिक्षेत्र, रंजनकुमार शर्मा पोलीस सह आयुक्त, पुणे शहर, शशीकांत महावरकर पोलीस सह आयुक्त, पिंपरी चिंचवड, वसंत परदेशी अप्पर आयुक्त, पिंपरी चिंचवड पुणे, अरविंद चावरिया अप्पर पोलीस आयुक्त, प्रशासन पुणे शहर, शैलेश बलकवड अप्पर पोलीस आयुक्त, गुन्हे पुणे शहर, मनोज पाटील अप्पर पोलीस आयुक्त, पुर्व प्रादेशीक विभाग पुणे शहर, अतुल पाटील पोलीस महानिरीक्षक, मोटार परिवहन विभाग, पंकज देशमुख पोलीस अधिक्षक, पुणे ग्रामीण, तुषार दोशी पोलीस अधिक्षक, पुणे लोहमार्ग व पुणे शहर पोलीस आयुक्तालयातील इतर वरिष्ठ पोलीस अधिकारी (तसेच सेवानिवृत्त पोलीस अधिकारी कृष्णन, नारायण स्वामी, चंद्रशेखर दैठणकर, मकरंद रानडे, रामराव वाघ, मानगावकर, प्रकाश मुत्याळ, श्री. शेषराव सुर्यवंशी, प्रभाकर ढमाले, राम मांडुरके, आर.एस. खैरे, सी.जी. कुंभार, अरुण वालतुरे, जाफरभाई शेख, सुनिल देशमुख, राम पठारे असे सेवानिवृत्त पोलीस अधिकारी व इतर मान्यवर उपस्थित होते.
मान्यवर, पोलीस अधिकारी व पोलीस अमंलदार यांनी पुष्प अर्पण करुन श्रध्दांजली वाहिली.

दि.१ सप्टेंबर २०२३ ते ३१ ऑगस्ट २०२४ या कालावधीत महाराष्ट्रातील १. पोलीस उप निरीक्षक प्रकाश नाना शिंदे २. पोलीस कॉन्सटेबल राहूल गोपीचंद पवार ३. पोलीस कॉन्सटेबल वैभव सुनिल वाघ असे ०३ पोलीस जवान कर्तव्यावर असताना शहिद झाले.
या प्रसंगी शोक कवायतीचे आयोजन करण्यात आले होते. शोक कवायतीसाठी पुणे शहर पोलीस आयुक्तालया कडील एक प्लाटुन, पुणे ग्रामीण कडील एक प्लाटुन, पिंपरी-चिंचवड पोलीस आयुक्तालया कडील एक प्लाटुन, पुणे लोहमार्ग कडील एक प्लाटुन व राज्य राखीव पोलीस बल गट क्र.१ व २ यांचेकडील प्रत्येकी एक प्लाटुन अशा एकुण ०६ प्लाटुन मधील पोलीस अधिकारी व पोलीस अंमलदार यांनी तसेच बॅण्ड पथका मध्ये पुणे शहर, पुणे ग्रामीण यांचे कडील वाद्य-वृंदांनी भाग घेतला होता. परेड कमांडर, राखीव पोलीस निरीक्षक, मुख्यालय, पुणे शहर दशरथ हटकर, व सेकंड परेड कमांडर, राखीव पोलीस उप-निरीक्षक, मुख्यालय, शिवाजीनगर, पुणे संजय जाधव यांनी परेड कवायतीचे नेतृत्व केले. पुणे शहर पोलीस आयुक्तालय, पुणे ग्रामीण, बिनतारी संदेश विभाग, गुन्हे अन्वेषण विभाग, मोटार परिवहन विभाग पुणे, विविध शाखा या विभागातील वरिष्ठ पोलीस अधिकारी व पोलीस अंमलदार, पोलीस दवाखाना वैद्यकीय स्टाफ यांचेसह हजर होते.
दि.१ सप्टेंबर २०२३ ते ३१ ऑगस्ट २०२४ या कालावधीत आपले कर्तव्य बजावित असताना, वीरगती प्राप्त झालेल्या देशातील पोलीस अधिकारी व पोलीस जवान (सर्व दर्जाचे) असे एकुण २१४ जवानांच्या नावाच्या यादीचे वाचन शोक कवायत्तीचे दरम्यान नंदिनी वाग्याणी सहा. पोलीस आयुक्त, वाहतुक शाखा, पुणे शहर व अनुजा देशमाने सहा. पोलीस आयुक्त, खडकी विभाग, पुणे शहर यांनी केले.
कार्यक्रमाचे सुत्र संचालनसिताराम नरके, सेवानिवृत्त, सहा. पो. फौज. एसआरपीएफ, ग्रुप, रामटेकडी, पुणे व दत्तात्रय निकम, पोलीस अंमलदार, पिंपरी पो.स्टे. यांनी केले.

पुणे-महाराष्ट्र विधानसभा निवडणुक २०२४ साठी आचार संहिता लागू झाली आहे. सध्या रेशनिंग दुकानातून शिधापत्रिकाधारकांना दिवाळीचा गोड शिधा वाटप चालू आहे. हा शिधा देण्यासाठी ज्या पिशव्‍या वापरण्यात आल्या आहेत त्या पिशव्‍यांवरती भारताचे पंतप्रधान, महाराष्ट्र राज्याचे मुख्यमंत्री व उपमुख्यमंत्री आदींचे फोटो छापलेले असून त्यांची जाहिरातबाजी चालू आहे. आचार संहितेच्या काळात अशी जाहिराबाजी करून तीचा भंग केला जात आहे.

पुणे शहर जिल्हा काँग्रेस कमिटीचे अध्यक्ष अरविंद शिंदे यांच्या नेतृत्वाखाली आज काँग्रेसच्या शिष्ट मंडळाने मुख्य निवडणुक अधिकारी यांची भेट घेतली. या भेटी दरम्यान रेशनिंग दुकानातून गोड शिधा वाटपाच्या पिशव्‍यांवर छापण्यात आलेले फोटो व त्यांची जाहिरात या विषयांवर चर्चा करण्यात आली. तसेच त्वरीत रेशनिंग दुकानदारांना आदेश देवून हे थांबविले पाहिजे व जाहिरात केल्या प्रकरणी आचार संहिता भंग केल्याबाबत संबंधितांवर त्वरीत गुन्हा दाखल करावा अशी मागणी करून निवेदन सादर करण्यात आले.

यावेळी पुणे शहर जिल्हा काँग्रेस कमिटीचे अध्यक्ष अरविंद शिंदे, आमदार रविंद्र धंगेकर, प्रदेश सरचिटणीस ॲड. अभय छाजेड, माजी महापौर कमल व्‍यवहारे, उपाध्यक्ष अजित दरेकर, संजय बालगुडे, मुख्तार शेख, ब्लॉक अध्यक्ष सुजित यादव, राजू ठोंबरे व मुकेश धिवार आदी उपस्थित होते.

मीना कुर्लेकर यांची माहिती; वंचित विकास अभयाच्या वतीने एस. एम. जोशी सोशलिस्ट फाउंडेशन येथे आयोजन
पुणे : वंचित विकास अभयाच्या वतीने ‘आपली दिवाळी स्वदेशी दिवाळी’ हे छोट्या व्यावसायिकांचे प्रदर्शन येत्या २५, २६ व २७ ऑक्टोबर २०२४ या तीन दिवशी सकाळी १० ते रात्री ८ या वेळेत नवी पेठेतील एस. एम. जोशी सोशलिस्ट फाउंडेशन येथे होणार आहे. या प्रदर्शनाचे उद्घाटन यशस्वी उद्योजिका अनघा अजित चाफळकर यांच्या हस्ते होईल, अशी माहिती वंचित विकास संस्थेच्या कार्यवाह मीना कुर्लेकर यांनी दिली. प्रसंगी वंचित विकासच्या संचालिका सुनीता जोगळेकर, देवयानी गोंगले, मीनाक्षी नवले, चैत्राली वाघ आदी उपस्थित होते.
मीना कुर्लेकर म्हणाल्या, “वंचित विकास संस्था गेली चाळीस वर्ष स्त्रिया आणि मुलांमध्ये काम करते. छोट्या व्यावसायिकांचे प्रशिक्षण घेते व त्यांच्या उत्पादनांच्या विक्रीसाठी व्यासपीठ उपलब्ध करुन देते. यंदा प्रदर्शनात २५ ऑक्टोबरला सायंकाळी खास महिलांसाठी होम मिनिस्टर हा खेळ, तर २६ ऑक्टोबरला सायंकाळी मुलांसाठी गंमत जत्रा असणार आहे. यासह दिवाळीच्या वस्तू, फराळ, इमिटेशन ज्वेलरी, खाद्यपदार्थ, गिफ्ट आर्टिकल्स, कपडे, मुलांसाठी विज्ञान खेळणी, तसेच उत्तम प्रतीचा सुकामेवा निम्म्या किमतीत उपलब्ध असेल. हे प्रदर्शन सर्वांसाठी विनामूल्य खुले असणार आहे.”
या प्रदर्शनात वापरण्यायोग्य कपडे, भांडी, वर्तमानपत्राची रद्दी आणि सर्व प्रकारचे ई-वेस्ट संकलित केले जाणार आहे. वंचित विकास प्रबोधनाचे काम करते. प्रत्येक भारतीयाने मतदान करावे, असे जागृती अभियानही या प्रदर्शनातून केले जाणार आहे. एकल महिलांच्या सन्मानासाठी अभया संबोधावे, असा शासन आदेश येण्यासाठी सही अभियानही करणार आहोत. दिवाळीच्या निमित्ताने पुण्यामध्ये अनेक प्रदर्शने असतात. पण सामाजिक संस्थेने महिला उद्योजकांसाठी आयोजित केलेले हे प्रदर्शन आहे. या छोटया व्यावसायिकांना प्रोत्साहन देण्यासाठी जरुर यावे, असे आवाहन संयोजकांनी केले आहे. 
‘आपली दिवाळी स्वदेशी दिवाळी’ची वैशिष्ट्ये– छोट्या व महिला व्यावसायिकांना प्रोत्साहन, आर्थिक सक्षमीकरणासाठी व्यासपीठ- दि. २५ ते २७ ऑक्टोबर २०२४ या कालावधीत सकाळी १० ते रात्री ८ पर्यंत विनामूल्य खुले- उत्तम प्रतीचे ड्रायफ्रूट निम्म्या किमतीत उपलब्ध होणार- शाळेतील मुलांनी बनवलेल्या हात कागदाच्या वस्तू- बचत गटातील महिलांची विविध उत्पादने, खाद्यपदार्थ असतील- हँडमेड ज्वेलरी, कलमकारी कपडे, कलाकुसरीच्या वस्तू, हस्तकला, गिफ्ट आर्टिकल्स, होम डेकोरेशन, फराळ आदी

पुणे :सह दुय्यम निबंधक कार्यालय हवेली-२० मध्ये रेरा कायद्याची पायमल्ली करून झालेल्या दस्त नोंदणीची चौकशी करण्यासाठी तपासणी पथक नियुक्त करण्यात आले आहे.सह जिल्हा निबंधक (मुद्रांक जिल्हाधिकारी) संतोष हिंगणे यांनी तसा आदेश काढला आहे.तपासणी पथकामध्ये एक सह दुय्यम निबंधक वर्ग-१,दोन वरिष्ठ लिपिक,एक कनिष्ठ लिपिक यांचा समावेश आहे.

या प्रकरणी चौकशीची मागणी लोकजनशक्ती पार्टी रामविलासचे पुणे शहराध्यक्ष संजय आल्हाट यांनी दि.८ ऑक्टोबर रोजी सह जिल्हा निबंधक (मुद्रांक जिल्हाधिकारी) यांना दिलेल्या निवेदनाद्वारे केली होती.बांधकामाच्या ग्रामपंचायत परवानग्या असलेल्या दस्तांची सह दुय्यम निबंधक कार्यालय हवेली-२० मध्ये नोंदणी करण्यात आल्या.त्यातून महा रेरा कायद्याची पायमल्ली करण्यात आली.१५ ऑगस्ट २०२४ पर्यंत आणि नंतरही येथील अधिकाऱ्याने दस्त नोंदणी चालू ठेवली.हे दस्त सर्व आवश्यक बांधकाम परवानग्या घेऊन केलेले आहेत का आणि कबुली जबाबासाठी राखून ठेवले आहेत का याची चौकशी व्हावी आणि चौकशी पूर्ण होईपर्यंत संबंधित उपनिबंधकाचा पदभार काढून घेण्यात यावा,अशी मागणी या निवेदनात करण्यात आली होती.अन्यथा आंदोलन करण्याचा इशारा देण्यात आला होता.राज्याचे नोंदणी महानिरीक्षक तसेच पुणे जिल्हाधिकारी यांनाही या निवेदनाची प्रत पाठविण्यात आली होती.या पाठपुराव्याची दखल घेऊन तपासणी पथक नियुक्त करण्यात आले असून त्यात एक सह दुय्यम निबंधक वर्ग -१,दोन वरिष्ठ लिपिक,एक कनिष्ठ लिपिक यांचा समावेश आहे.

कायद्याची पायमल्ली करून अवैधरित्या दस्त नोंदणी करणे हा गंभीर प्रकार असून तपासणी पथकाने तातडीने तपासणी करून गैर प्रकार उघडकीस आणावेत आणि या द्वारे दोषींना शिक्षा व्हावी,असे लोकजनशक्ती पार्टी रामविलासचे पुणे शहराध्यक्ष संजय आल्हाट यांनी म्हटले आहे.