मुंबई दि.८: राज्याचे मुख्यमंत्री एकनाथ शिंदे यांच्या नेतृत्वाखालील महायुती सरकारने घरेलू कामगारांसह समस्त महिला वर्गासाठी अर्थात लाडक्या बहिणींसाठी असंख्य महत्त्वपूर्ण आणि क्रांतीकारी निर्णय घेतले. घरेलू कामगारांसाठी योजना आणल्या तर स्वतःच्या नावात वडिलांसह आईचेही नाव लावण्याचा निर्णय घेऊन मुख्यमंत्र्यांनी समस्त महिलांचा सन्मान वाढवला आहे, असे प्रतिपादन शिवसेना नेत्या डॉ नीलम गोऱ्हे यांनी केले.

सावित्रीबाई फुले घरेलू कामगार संघटनेच्या वतीने मुंबईतील चेंबूर येथे काल गुरुवार दिनांक ७ नोव्हेंबर रोजी घरेलू कामगारांसाठी आयोजित भाऊबीज मेळावा कार्यक्रमात डॉ. नीलम गोऱ्हे बोलत होत्या.

डॉ नीलम गोऱ्हे यांच्या नेतृत्वाखाली चालवल्या जात असलेल्या स्त्री आधार केंद्राच्यावतीने घरेलू कामगारांसाठी करण्यात आलेल्या प्रयत्नांचा उल्लेख डॉ गोऱ्हे यांनी यावेळी केला. त्या म्हणाल्या, स्त्री आधार केंद्रामध्ये अनेक घर कामगार करणाऱ्या महिलांचा समावेश असल्याने त्यांचे प्रश्न अचूकपणे समजून घेण्यास मदत झाली. त्यातून विधानपरिषदेत घरेलू कामगारांसाठी विधेयक मांडण्यात आले, त्यावेळी वास्तव मांडता आले.

त्या म्हणाल्या, हे विधेयक मंजूर करताना घर कामगारांसाठी कल्याण मंडळ सुरू करण्याची संकल्पना देखील मांडली. समाजातील अवघड कामे घर कामगार मंडळी करत असतात. त्यांच्याप्रती समाजाने आदराची आणि सन्मानाची भावना कायमच ठेवली पाहिजे.

गेल्या काही दिवसात मुख्यमंत्री एकनाथ शिंदे यांच्या नेतृत्वाखालील महायुती सरकारने घर कामगार करणाऱ्या वर्गाच्या दृष्टीने हिताचे असणारे अनेक निर्णय घेतले. या निर्णयांची तात्काळ अंमलबजावणी केल्याने कामगार वर्गाला फायदा झाल्याचे दिसून येत आहे, याकडे डॉ गोऱ्हे यांनी लक्ष वेधले.

घर कामगार करणाऱ्या महिलांनी सुरक्षेच्या दृष्टीने सावध रहावे, स्वतःला कणखर बनवावे, त्यांनी अन्यायाविरुद्ध आवाज उठवावा, असे मार्गदर्शन करतानाच अनेक घटनांमध्ये महिला कामगारांना त्रास देणाऱ्या लोकांना शिक्षा झालेली आहे, हे डॉ गोऱ्हे यांनी उपस्थित घरेलु कामगारांच्या निदर्शनास आणून दिले आणि त्यांच्यातील आत्मविश्वास जगवला.

राज्यातील सर्वच घरकाम करणाऱ्या महिला या मुख्यमंत्र्यांची लाडकी बहीण झाल्या आहेत, असे सांगून डॉ गोऱ्हे म्हणाल्या, या सर्वच महिलांना अभिमान वाटावा असा निर्णय राज्याचे मुख्यमंत्री एकनाथ शिंदे आणि महायुती सरकारने घेतला आहे. स्वतःच्या नावापुढे वडीलांप्रमाणेच आईचे नाव लावण्याचा महत्वपूर्ण निर्णय घेऊन महायुती सरकारने महिलांचा समाजातील सन्मान वाढवला आहे.

महामानव डॉक्टर बाबासाहेब आंबेडकर यांनी, सर्वांना मान ताठ करून जगण्यास शिकवले. तोच आदर्श घेऊन सावित्रीबाई फुले घरेलू कामगार संघटना काम करत आहे. मराठे दाम्पत्याने घर कामगारांच्याबाबतीत वाखाणण्याजोगे काम केले आहे, अशा शब्दात डॉ. गोऱ्हे यांनी त्यांचे कौतुक केले.

याप्रसंगी माजी नगरसेविका आशाताई मराठे, संघटनेचे अध्यक्ष सुभाष मराठे, उपाध्यक्ष सलीम शेख यांसह इतर मान्यवर व घरेलू कमगार मोठ्या संख्येने उपस्थित होते.

पुणे -पुणे शहर राजस्थानी समाजाच्या संघटनेने भारतीय जनता पक्षाला आपला जाहीर पाठिंबा दिला आहे. दिवाळीनिमित्त समस्त राजस्थानी समाज पुणे शहराच्या वतीने बाणेर मध्ये दिवाळी सस्नेह संमेलनाचे आयोजन करण्यात आले होते. या कार्यक्रमात संघटनेच्या वतीने एकमताने भाजपा आणि कोथरुड विधानसभेचे महायुतीचे उमेदवार चंद्रकांतदादा पाटील यांना पाठिंबा जाहीर केला.यावेळी अध्यक्ष सुनिल गहलोत, महाराष्ट्र प्रदेश निमंत्रित उमेश चौधरी, रामलाल चौधरी, चंदुलालजी भायल, जयप्रकाश पुरोहित, दिनेश चौधरी (सिवासी), लक्ष्मणराव परिहार, भाजपा नेते प्रल्हाद सायकर, गणेश कळमकर, प्रकाश तात्या बालवडकर, लहुजी बालवडकर यांच्या सह भाजपचे इतर पदाधिकारी आणि राजस्थानी समाज बांधव मोठ्या संख्येने उपस्थित होते.

राजस्थानी समाज संघटनेचे अध्यक्ष सुनील गहलोत म्हणाले की, राजस्थानी समाज भाजपा वर प्रेम करणारा आहे. आम्ही व्यापारी आहोत, त्यामुळे आम्ही तर मतदान करणारच आहोत, पण आम्ही आमच्या ग्राहकांनाही भाजपा आणि कोथरूडचे महायुतीचे उमेदवार चंद्रकांतदादा पाटील यांनाच मतदान करण्यासाठी प्रोत्साहित करणार आहोत, अशी ग्वाही दिली.

समाजाच्या पाठिंब्याबद्दल कृतज्ञता व्यक्त करताना चंद्रकांतदादा पाटील म्हणाले की, स्वातंत्र्य काळापासून राजस्थानी बांधवांचं भाजपावर प्रेम राहिलेलं आहे. भैरवसिंह शेखावत हे तीनदा राजस्थानचे मुख्यमंत्री झाले. त्यानंतर ते उपराष्ट्रपती झाले. त्यानंतरही वसुंधरा राजेजी, राजस्थानचे विद्यमान मुख्यमंत्री भजनलालजी शर्माजी यांच्या पाठिशी राजस्थानी समाज उभा राहिला आहे.

ते पुढे म्हणाले की, राजस्थानी समाज हा व्यापारी समाज आहे. व्यापाराच्या निमित्ताने तो जगाच्या कोणत्याही कोपऱ्यात जातो, तिथे आपलं स्वतःचे वेगळे अस्तित्व निर्माण करतो. माननीय नरेंद्र मोदीजी यांच्यावरही समाजाने भरभरून प्रेम केले आहे. समाजाच्या मागणीनुसार माननीय मोदीजींनी एलबीटीतून व्यापाऱ्यांची सुटका केली. त्यामुळे भविष्यात ही समाजाचे प्रेम भाजपावर कायम राहो, अशी भावना यावेळी व्यक्त केली.

बुलढाणा -शिवसेना उद्धव बाळासाहेब ठाकरे यांनी शुक्रवारी पुन्हा एकदा उपमुख्यमंत्री देवेंद्र फडणवीस यांच्यावर टीकेची झोड उठवली. महाराष्ट्रात महाविकास आघाडीचे सरकार आल्यानंतर राज्यातील प्रत्येक जिल्ह्यात छत्रपती शिवाजी महाराज यांचे मंदिर बांधण्यात येईल. पण शिवराय हा शब्द उच्चारल्यानंतर लगेच देवेंद्र फडणवीस यांच्या अंगाची आग होते. त्यांना ते सहनच होत नाही, असे ते म्हणालेत. भाजपला केवळ मतांसाठी शिवाजी महाराज हवे असल्याचा आरोपही त्यांनी यावेळी केला.आणि सुरतेतही शिवरायांचे मंदिर बांधणार अशी घोषणाही केली .
उद्धव ठाकरे यांची शुक्रवारी दुपारी बुलढाण्यात महाविकास आघाडीच्या उमेदवारांच्या प्रचारार्थ सभा झाली. यावेळी बोलताना त्यांनी महायुती विशेषतः मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्यावर सडकून टीका केली. ते म्हणाले, आपण सर्व महाराष्ट्र प्रेमी आहोत. पण दुसरीकडे महाराष्ट्र लुटणारे महाराष्ट्र द्रोही आहेत. मागच्यावेळी आपल्याकडून एक चूक झाली. मी सध्या निवडणुकीच्या प्रचारासाठी फिरत आहे. पण प्रत्येक ठिकाणी आपल्याविरोधात आपलाच गद्दार उभा राहिला आहे. साहजिकच चूक माझीच होती.
या लोकांना गेल्यावेळी मी उमेदवारी दिली होती. त्यानंतर जनतेने माझ्यावर विश्वास ठेवून त्यांना निवडून दिले होते. मी त्या चुकीसाठी तुमची माफी मागतो. पण आता मी या चुकीची पुनरावृत्ती करणार नाही. ही चूक सुधारण्यासाठी मी येथे जयश्री शेळके यांना उमेदवारी दिली आहे. आता विश्वासघात करणाऱ्यांना धडा शिकवा.
उद्धव ठाकरे म्हणाले, छत्रपती शिवाजी महाराजांनी मावळे निर्माण केले. हा शिवरायांचा पवित्र भगवा मावळ्याच्या हातात शोभतो, दरोडेखोरांच्या हातात शोभत नाही. आपल्या पक्षावर त्यांनी दरोडा घातला. चोरी नव्हे अख्खा दरोडा घातला. 40 जणांच्या टोळीने दरोडा टाकून आपला पक्ष चोरून नेला. आता म्हणतात हा पक्ष आमचाच आहे. हे गद्दार, धोकेबाज व खोकेबाज लोक आहेत. पण आता 50 खोके नॉट ओके. त्यांनी आपल्या भावी पिढ्यांसाठी भरपूर कमावले आहे. त्यांची घरे भरली. पण गरिबांची रिती झाली. त्यामुळे आता प्रश्न सर्वसामान्य जनतेचा आहे. त्यांच्यासाठी काहीतरी करण्याची गरज आहे.
बुलढाणा म्हटले की मातृशक्तीला वंदन केलेच पाहिजे. आपले सरकार आल्यानंतर राज्यातील प्रत्येक जिल्ह्यात शिवाजी महाराजांचे एक चांगले मंदिर बांधणार आहे. केवळ महाराष्ट्रातच नाही तर हे गद्दार जिकडे पळून गेले होते, त्या सुरतेतही बांधणार आहे. का नाही बांधायचे? हे केवळ घंटा वाजवण्यासाठी व केवळ पळी – पंचपात्र घेऊन बसण्यासाठी नसेल. हे मंदिर आमचे संस्कारपीठ असेल.
देवेंद्र फडणवीस शिवाजी महाराजांच्या मंदिरावर आक्षेप घेत आहेत. कारण, शिवाजी महाराज की जय म्हटले की, त्यांच्या अंगाची आग होते. त्यांनी मला मुंब्र्यात मंदिर बांधण्याचे आव्हान दिले. मुंब्रा महाराष्ट्रातच आहे. फडणवीस यांनी आमचा दाढीवाला गद्दार फोडून जो आपल्या डोक्यावर बसवला आहे, तो मिंधे ज्या जिल्ह्यातील आहे, त्याच जिल्ह्यात हे मुंब्रा आहे. फडणवीस यांनी हे लक्षात घ्यावे. मग तुम्ही अडीच वर्षे त्यांच्यासोबत अंडी उबवत बसला होतात का? ज्या जिल्ह्यातील तुम्ही मुख्यमंत्री केला, त्या जिल्ह्यात मंदिर बांधणे तुम्हाला अवघड वाटते का? आजही मुंब्र्याच्या वेशीवर छत्रपती शिवाजी महाराज, शाहू, फुले, आंबेडकर, सावित्रीबाई, जिजाऊ यांची चांगली शिल्पे उभी करण्यात आली आहेत. मग मंदिर महाराजांचे नाही तर काय मोदींचे बांधायचे? असा सवाल उद्धव ठाकरे यांनी यावेळी उपस्थित केला.
भाजपला शिवाजी महाराज हे केवळ मतांची मशिन वाटते. हे गाजावाजत करत कुठेही पुतळे बांधतात. त्यांना मते मागण्यासाठी शिवाजी महाराज चालतात. लोकसभेच्या निवडणुकीपूर्वी त्यांनी मालवण येथे महाराजांचा पोकळ पुतळा बांधला. त्यांचे प्रेम पोकळ व पुतळाही पोकळ. हे तेवढ्यावरच थांबले नाहीत. महायुतीचे सरकार आतापर्यंतचे सर्वात भ्रष्ट सरकार आहे. त्यांनी पुतळ्यातही भ्रष्टाचार केला. अशुभ हातांनी केलेले कोणतेही काम यशस्वी होत नाही. त्यानुसार मोदींच्या हातांनी उभा केलेला पुतळा वर्षभराच्या आतच कोसळला.
आता हा पुतळा वाऱ्याने कोसळल्याचा कांगावा केला जात आहे. ज्या महाराजांनी सिंधुदुर्ग उभा केला, तो किल्ला आजही समर्थपणे वादळ – वाऱ्यांना तोंड देत उभा आहे. पण आताच्या आधूनिक काळात उभा केलेला पुतळा कसा पडतो?
लोकसभा निवडणुकीत मशालीच्या प्रचारगीतात शिवाजी महाराजांचा उल्लेख होता. तो उल्लेख काढण्यासाठी आमच्यावर दबाव टाकला. पण आम्ही तो उल्लेख वगळला नाही. आमचे काहीही झाले नाही. पण आता तुम्हा महाराजांचे नाव पुसण्यास निघालात. कोश्यारी महाराजांचा अवमान करून निघून गेले. प्रफुल्ल पटेल यांनी महाराजांचा जिरेटोप मोदींच्या डोक्यात घातला. हे पाहून महाराष्ट्राच्या हृदयात जखम झाली. म्हणून मी महाराष्ट्राच्या प्रत्येक जिल्ह्यात महाराजांचे मंदिर बांधणार असून, या मंदिरात त्यांनी दिलेली सर्वच शिकवण दिसून येईल, असे उद्धव ठाकरे म्हणाले.

धुळे- काँग्रेसचा जाती-जातीमध्ये भांडणे लावण्याचा डाव आहे. माजी पंतप्रधान पंडित नेहरूंपासून ते त्याच परिवारातील युवराज (राहुल गांधी) पर्यंत नेहरू-गांधी परिवार आरक्षण विरोधी आहे, असा आरोप पंतप्रधान नरेंद्र मोदी यांनी केला. ते धुळ्यामध्ये आयोजित प्रचारसभेत बोलत होते.मोदी म्हणाले डॉ. बाबासाहेब आंबेडकर यांनी आरक्षणासाठी मोठी लढाई लढली. दलित, मागासवर्गीयांना आरक्षण मिळू नये म्हणून माजी पंतप्रधान पंडित नेहरू यांनी प्रयत्न केले. एससी, एसटींना आरक्षण मिळू नये यासाठी इंदिरा गांधींनी प्रयत्न केले. राजीव गांधी ओबीसी आरक्षणविरोधी होते. आता त्याच परिवारारातले युवराज आरक्षण विरोधी आहेत. त्यांच्याकडून देशातील ओबीसींना छोट्या-छोट्या जातीमध्ये वाटण्याचा प्रयत्न सुरू असल्याचा आरोप त्यांनी राहुल गांधी यांच्यावर केला.

काँग्रेसने पूर्वी धर्माच्या नावावर कट रचला. आता जाती-जातीमध्ये फूट पाडणे सुरू आहे.आदिवासी, ओबीसींच्या लहान-लहान जातींमध्ये भांडणे लावण्यात येत आहेत. या जाती एक राहिल्या तर त्यांची ताकद वाढेल. आम्ही एकत्र राहिलो, तरच सुरक्षित असू, असा दावाही त्यांनी केला. पंतप्रधान नरेंद्र मोदी आजपासून दोन दिवस महाराष्ट्राच्या दौऱ्यावर आहेत. त्यांनी शुक्रवारी धुळ्यातील आपल्या पहिल्या प्रचारसभेत विरोधी पक्षांच्या महाविकास आघाडीवर टीकेची झोड उठवत राज्यातील जनतेला महाराष्ट्राच्या विकासासाठी महायुतीच्या पाठिशी ठामपणे उभे राहण्याचे आवाहन केले.महाविकास आघाडीच्या गाडीला ना चाके आहेत, ना ब्रेक आहे. त्यातच त्यांच्यात ड्रायव्हरच्या सिटवर बसण्यासाठीही वाद सुरू आहे. त्यांच्यात चारही बाजूंनी वेगवेगळ्या प्रकारचे हॉर्न ऐकू येत आहेत, याऊलट महायुती सरकारच्या अडीच वर्षांत महाराष्ट्र विकासाच्या एका नव्या उंचीवर पोहोचला आहे, असे ते म्हणालेत. आचारसंहिता संपल्यानंतर देवेंद्र फडणवीस यांचे स्वप्न पूर्ण करणार असल्याचे सूचक विधानही त्यांनी यावेळी केले.

पंतप्रधान नरेंद्र मोदी म्हणाले, मागील अडीच वर्षांत महाराष्ट्राच्या विकासाला जी गती मिळाली आहे ती थांबू देणार नाही. पुढील 5 वर्षांत महाराष्ट्राच्या प्रगतीला एका नव्या उंचीवर घेऊन जाणार. महाराष्ट्राला हवे असणारे सुशासन केवळ महायुतीचेच सरकार देऊ शकते. दुसरीकडे, महाविकास आघाडीच्या गाडीला ना चाके आहेत, ना ब्रेक आहे आणि ड्रायव्हरच्या सिटवर बसण्यासाठीही त्यांच्यात वाद सुरू आहे. त्यातच चारही बाजूंनी वेगवेगळ्या प्रकारचे हॉर्न ऐकू येत आहेत.राजकारणात आल्यानंतर प्रत्येकाचे एक लक्ष्य असते. आमच्यासारखे लोक जनतेला ईश्वराचे रूप मानतात. आम्ही जनतेच्या सेवेसाठी राजकारणात आलोत. याऊलट काही लोकांच्या राजकारणाचा आधार हा लोकांना लुटण्याचा आहे. हे लोक सरकारमध्ये आले की, ते विकास ठप्प करतात. ते प्रत्येक योजनेत भ्रष्टाचार करतात. तुम्ही महाविकास आघाडीचे धोक्यातून बनलेल्या सरकारचे अडीच वर्षे पाहिले. या लोकांनी प्रथम सरकारची लुट केली. त्यानंतर महाराष्ट्राच्या सर्वसामान्य जनतेची लूट केली. त्यांनी मेट्रो प्रकल्प ठप्प केले. वाढवण बंदरांच्या कामात अडथळे निर्माण केली. समृद्धी महामार्गाच्या कामात अडथळे निर्माण केले.महाविकास आघाडीच्या लोकांनी महाराष्ट्राच्या विकासाच्या प्रत्येक प्रकल्प ठप्प केला. या प्रकल्पांमुळे येथील जनतेचे भविष्य उज्ज्वल होणार होते. ही स्थिती तेव्हा बदलली, जेव्हा तुमच्या आशीर्वादाने येथे महायुतीचे सरकार आले. महायुतीच्या अडीच वर्षांत महाराष्ट्राने विकासाचे नवे विक्रम रचले. एकनाथ शिंदे यांच्या नेतृत्वात मुख्यमंत्री एकनाथ शिंदे यांच्या नेतृत्वात अडीच वर्षांत महाराष्ट्राला त्याचा गौरव परत मिळाला आहे. विकासाचा भरवसा परत मिळाला आहे. त्यामुळे येथील मतदारांनी भाजप महायुती आहे, तरच गती आहे, महाराष्ट्राची प्रगती आहे हे लक्षात घ्यावे, असे पंतप्रधान नरेंद्र मोदी म्हणाले.मोदी म्हणाले, मी आज महायुतीला खूप खूप शुभेच्छा देतो. या सरकारने महाराष्ट्राला नवी समृद्धी देणारा वचननामा जाहीर केला आहे. महायुतीच्या 10 संकल्पांची खूप चर्चा होत आहे. शिंदे, माझे मित्र देवेंद्र फडणीस व अजित पवार यांनी महाराष्ट्रातील जनतेच्या सूचनांचा हा शानदार वचननामा तयार केला आहे. महायुतीचा वचननाम्यामुळे विकासाची वाढेल गती, महाराष्ट्राची होणार हमखास प्रगती.महायुतीच्या या वचननाम्यात प्रत्येक वर्गाच्या आर्थिक प्रगतीची योजना आहे. समानतेचा भाव आहे. सुरक्षेची हमी आहे. तसेच सर्वांना सोबत घेऊन चालण्याचा विश्वास आहे. यात महाराष्ट्राच्या भविष्याचा रोडमॅप आहे. मी अशा जनकल्याणाच्या जाहिरनाम्यासाठी महाराष्ट्राच्या जनतेचेही कौतुक करतो. हा वचननामा विकसित महाराष्ट्राचा आधार बनेल, विकसित भारताचा आधार बनले, असे ते म्हणाले.

या सभेला आमच्या भगिनी दूरवरून आल्यात. विकसित महाराष्ट्र व विकसित भारतासाठी आमच्या भगिनींचे जीवन सहज सुलभ बनवणे फार महत्त्वाचे आहे. कारण, जेव्हा महिला पुढे जातात, तेव्हा संपूर्ण समाज वेगाने प्रगती करतो. त्यामुळे मागील 10 वर्षांत केंद्राने महिलांना केंद्रस्थानी ठेवून अनेक मोठे निर्णय घेतले. मागील सरकारने सैनिकी शाळांपासून कामाच्या विविध क्षेत्रांत महिलांचे मार्ग रोखला होता. पण हा मोदी आहे. त्याने हे सर्व बंधन काढले. महिलांना अधिकाधिक क्षेत्रांत कामाच्या संधी उपलब्ध करून दिल्या. त्यांनी सर्व दरवाजे उघडले. आम्ही नारीशक्ती वंदन कायद्याद्वारे विधानसभा व संसदेत महिलांना आरक्षणाचा अधिकार दिला. शौचालयांपासून गॅस सिलिंडरपर्यंत सर्वच योजनांच्या केंद्रस्थानी महिलाच आहेत. आम्ही या योजना सुरू केल्या तेव्हा काँग्रेसने आमची खिल्ली उडवली. पण आज याच योजना महिला सक्षमीकरणाच्या पर्याय बनल्या आहेत, असे मोदी म्हणाले.पीएम मोदी पुढे म्हणाले, राज्यातील महायुती सरकारही आमचा दृष्टिकोन पुढे नेण्याचे काम करत आहे. येथील माता-भगिनींसाठी अनेक योजना सुरू करण्यात आल्या. आज महाराष्ट्रातील प्रत्येक दस्तावेजांवर आईचे नाव अनिवार्य करण्यात आले आहे. महायुती सरकारच्या या निर्णयाचे प्रत्येकाने मोकळ्या अंतकरणाने स्वागत केले. महाराष्ट्र पोलिसांतही 25 हजार मुलींच्या भरतीतून एक नवा विश्वास तयार होईल असा मला विश्वास आहे. यामुळे महिलांचे सामर्थ्य वाढेल, एक नवा विश्वास तयार होईल, महिला सुरक्षेतही वाढ होईल, तसेच मुलींना रोजगारही मिळेल.आमच्या सरकार महिला सक्षमीकरणासाठी अनेक पाऊले उचलत आहे. हे काँग्रेस व महाविकास आघाडीला सहन होत नाही. यामुळेच ते माझी लाडकी बहीण योजनेवर टीका करत आहेत. या योजनेची देशाच्या कानाकोपऱ्यात चर्चा सुरू आहे. पण काँग्रेस ही योजना बंद करण्यासाठी विविध कटकारस्थान रचत आहे. काँग्रेसच्या इको सिस्टिमवाले लोक या योजनेविरोधात कोर्टात गेले आहेत. काँग्रेस व त्यांच्या मित्रपक्षांना ही सत्ता मिळाली तर सर्वप्रथम ते ही योजना बंद करतील. त्यामुळे जनतेने त्यांच्यापासून सावध रहावे. कारण हे लोक कधीही नारीशक्तीला सशक्त होताना पाहू शकत नाहीत, असे ते म्हणाले.मराठी भाषेला अभिजात भाषेचा दर्जा मिळावा यासाठी ही अनेक वर्षांची मागणी होती. काँग्रेसने महाराष्ट्र व केंद्रात सरकार चालवले, पण त्यांनी हा दर्जा दिला नाही. पण आमच्या सरकारने हा दर्जा देऊन दाखवला, असे म्हणाले.महाराष्ट्रातील डबल इंजिन सरकारने केलेले काम सर्व जग पाहत आहेत. आज परदेशी गुंतवणुकीत, नव्या संधीमध्ये महाराष्ट्र पहिल्या क्रमांकावर आहे. महाराष्ट्र सलग 2 वर्षे परदेशी गुंतवणुकीत एक क्रमांकावर राहिले आहे. या वर्षाच्या पहिल्या 3 महिन्यांत 50 टक्क्यांहून जास्त परदेशी गुंतवणूक एकट्या महाराष्ट्रात आला. महाराष्ट्राला सर्वच गुंतवणूक योजनांत प्राधान्य दिले जात आहे, असे मोदी म्हणाले.मी वाढवण बंदराच्या पायाभरणीला आलो होतो. त्यावेळी देवेंद्र फडणवीस यांनी एक इच्छा व्यक्त केली होती. ते म्हणाले होते की, देशाचे सर्वात मोठे बंदर तयार होत आहे, मोदीजी एवढे सारे करत आहात, हजारो कोटी लावत आहात, तर तिथे एक विमानतळही तयार करा. मी तेव्हा गप्प राहिलो. पण आचारसंहिता संपून राज्यात महायुतीच्या सरकारचा शपथविधी झाल्यानंतर मी महाराष्ट्र सरकारसोबत बसून फडणवीस यांची इच्छा पूर्ण करण्याचे काम करेन, असे मोदी म्हणाले.काँग्रेस आघाडी एकीकडे जम्मू काश्मीरमध्ये दलितांना मिळालेला अधिकार प्रस्ताव हिसकावून घेण्याचा प्रस्ताव पारित करते. तर दुसरीकडे, महाराष्ट्रात दलित व आदिवासींच्या अधिकाऱ्यांचे नावाने खोटे पसरवणे, दिशाभूल करणे, त्यांना भडकावण्याचे काम करत आहे. स्वातंत्र्याच्या 75 वर्षांनंतर जम्मू काश्मीरमध्ये बाबासाहेबांचे संविधान लागू झाले आहे. पण काँग्रेस व त्यांच्या मित्रांना हे सहन होत नाही. त्यांनी पाकिस्तानचा अजेंडा देशात राबवण्याचा प्रयत्न करू नये. काश्मीरसंबंधी फुटिरतावाद्यांची भाषा बोलू नका. तुमचे हे मनसुबे यशस्वी होणार नाहीत. मोदींवर जनतेचा आशीर्वाद असेपर्यंत तुम्हाला काश्मीरमध्ये काहीही करता येत नाही. काश्मीरमध्ये आता केवळ बाबासाहेबांचेच संविधान चालेल. हा मोदींचा निर्णय आहे. जगातील कोणतीही ताकद आता काश्मीरमध्ये कलम 370 पुन्हा लागू करू शकत नाही. महाराष्ट्र आर्थिक प्रगतीच्या मार्गावर वेगाने पुढे जात आहे, असेही मोदी यावेळी काँग्रेसवर हल्लाबोल करताना म्हणाले.

गुहागर-सध्या राज्यातील राज्यकर्ते आणि राजकारणी कसेही वागत आहेत. मतदार देखील त्यांच्याकडे शांतपणे बघत असल्याचे महाराष्ट्र नवनिर्माण सेनेचे प्रमुख राज ठाकरे यांनी म्हटले आहे. जो पर्यंत तुम्ही त्यांच्यात बदल करत नाही, जो पर्यंत त्यांना घरी बसवत नाही, तोपर्यंत विकास होत नसल्याचे राज ठाकरे यांनी म्हटले आहे. मागील पाच वर्षात या सर्व लोकांनी राजकारणात गोंधळ घातला आहे. काही या पक्षातून त्या पक्षात गेले. काही पक्ष सोबत घेऊनच दुसरीकडे गेले. आम्ही हे सर्व बरोबर केले असल्याचा त्यांचा समज जोपर्यंत चिडून, भडकवून दूर करत नाही, तोपर्यंत विकासाची स्वप्ने विसरून जा. त्यामुळे आधी या सर्वांना बाजूला करा आणि महाराष्ट्र निर्माण सेनेच्या राज्यभरातील उमेदवारांना विजयी करा, असे आवाहन राज ठाकरे यांनी केले आहे.मतदारांनी निवडून दिलेल्या नेत्यांनी काय केले? असा प्रश्न त्यांना विचारला जात नसल्याची खंत देखील राज ठाकरे यांनी व्यक्त केली आहे. केवळ पर्यटनावर कोकणातील सिंधुदुर्गसह तीन जिल्हे हे अख्या महाराष्ट्र पोसू शकतात, अशा शब्दात राज ठाकरे यांनी कोकणवासीयांना साद घातली. केवळ पर्यटन या विषयावर गोवा राज्य चालवले जात असल्याचे राज ठाकरे यांनी म्हटले आहे.कोकणामध्ये कोणते उद्योग धंदे आणले? असा प्रश्न त्यांनी उपस्थित केला. आता उद्योगधंदे आणू अशी ग्वाही विद्यमान आमदार – खासदार देतात. मग इतके वर्ष त्यांनी काय केले? असा प्रश्न त्यांना का विचारला जात नाही, असे देखील राज ठाकरे यांनी म्हणाले आहे. कोकण इतका सुंदर करता येऊ शकतो, ते आतापर्यंत का झाले नाही? याचे कारण मतदारांनी त्याच – त्याच लोकांना आणि त्याच – त्याच पक्षांना निवडून दिले असल्याचे राज ठाकरे यांनी म्हटले आहे.इथून आमदारांना आणि खासदार निवडून दिले की ते दिल्लीत जाऊन काय करतात? कोणते प्रश्न मांडतात? कोकणातील आतापर्यंत कोणते प्रश्न त्यांनी दिल्लीत मांडले? असा प्रश्न त्यांनी उपस्थित केला. पर्यटन विषयी कोणते प्रश्न मांडले गेले? असा प्रश्न त्यांना विचारायला हवा, असेही ते म्हणाले. मागील सतरा अठरा वर्षापासून कोकणच्या रस्त्याचे कामे सुरू आहेत. मात्र अद्याप देखील आम्ही खड्ड्यातून जात असल्याचे राज ठाकरे यांनी म्हटले आहे.