एकलव्य कॅालेज जवळील मिसिंग लिंकचे लोकार्पण

पुणे- ना. चंद्रकांतदादा पाटील यांच्या पाठपुराव्यामुळे २५ वर्षांपासून प्रदीर्घ काळ रखडलेला मिसिंग लिंकचा प्रश्न मार्गी लागला असून, एकलव्य कॅालेज पासून राष्ट्रीय महामार्गाला जोडणाऱ्या मिसिंग लिंकचे आज लोकार्पण झाले. यापूर्वी एरंडवणे रजपूत वीटभट्टी येथून नदीपात्राच जाणाऱ्या मिसिंग लिंकचे ना. पाटील यांच्या पाठपुराव्यामुळे रुंदीकरण होऊन आता हा मार्ग वाहतुकीसाठी सुलभ झाला आहे.

कोथरुड मतदारसंघातील वाहतूक कोंडी सोडवण्यासाठी मतदारसंघातील मिसिंग लिंक पूर्ण करण्याचा ना. चंद्रकांतदादा पाटील यांनी संकल्प केला होता. यासाठी महापालिका आयुक्तांसोबत वारंवार बैठका घेऊन; यातील अडथळे दूर करण्याच्या सूचना आयुक्त आणि संबंधित अधिकाऱ्यांना दिल्या होत्या.

यापैकी एकलव्य कॅालेज ते राष्ट्रीय महामार्गाला जोडणाऱ्या मिसिंग लिंकसाठी जमीन अधिग्रहण ही मोठी अडचण होती. ही मिसिंग लिंक पूर्ण करण्यासाठी संबंधित जमीन मालकासोबत महापालिका अधिकाऱ्यांच्या वारंवार बैठका होऊनही त्यात यश येत नव्हते. त्यामुळे ना. पाटील यांनी स्वतः यामध्ये लक्ष घालून जागा मालकास भेटून त्याच्या सर्व शंकाचे निरसन करुन महापालिकेची जमीन हस्तांतरित करुन दिली. तसेच, महापालिकेला ही जलदगतीने रस्ता पूर्ण करण्याच्या सूचना ही दिल्या.

त्यानुसार, सदर रस्त्याचे काम पूर्ण झाले असून आज त्याचे लोकार्पण करण्यात आले. यावेळी बोलताना ना. पाटील म्हणाले की, २०१९ च्या विधानसभा निवडणुकीवेळी कोथरुड मतदारसंघातील वाहतूक कोंडी सोडवण्यासाठी मिसिंग लिंकचा प्रश्न मार्गी लागणे प्रकर्षाने जाणवत होते. त्यामुळे विधानसभा निवडणुकीनंतर सदर विषयात लक्ष घालून पाठपुरावा करत होतो. यामध्ये जमीन अधिग्रहण हा मुख्य मुद्दा असल्याचे लक्षात आले. त्यामुळे संबंधित जागा मालकांशी वारंवार संवाद करुन रस्त्याची आवश्यकता ही पटवून दिली. त्यामध्ये एकलव्य कॅालेज ते महामार्गाला जोडणाऱ्या मिसिंग लिंकसाठी बांदल कुटुंबियांनी ही सहकार्य केले. त्यामुळे सदर मार्ग तयार होऊन वाहतुकीसाठी खुला झाला आहे. मतदारसंघातील इतरही मार्ग लवकरच पूर्ण होतील, असा विश्वास ही त्यांनी यावेळी व्यक्त केला.

या लोकार्पण प्रसंगी महापालिकेच्या पथ विभागाचे अनिरुद्ध पावसकर, जागा मालक बांदल कुटुंबीय, माजी नगरसेविका डॉ. श्रद्धा प्रभूणे-पाठक, अल्पना वरपे,माजी नगरसेवक किरण दगडे पाटील,दिलीप वेडे पाटील, भाजप पुणे शहर सरचिटणीस पुनीत जोशी, गणेश वरपे, जिल्हा नियोजन समिती सदस्य डॉ. संदीप बुटाला, विद्या टेमकर, गिरीश भेलके, वैभव मुरकुटे यांच्यासह स्थानिक नागरिक मोठ्या संख्येने उपस्थित होते.

इतिहास प्रेमी मंडळ व ज्ञानप्रबोधिनी प्रशालेच्या वतीने १५०० हजार पणत्यांचा भव्य दीपोत्सव : तब्बल ५०० विद्यार्थ्यांनी केले ‘वंदे मातरम्’ चे समूहगान  

पुणे: तब्बल दिड हजार पणत्या प्रज्वलित करून साकारलेली अक्षरे… पाचशे विद्यार्थ्यांनी खड्या आवाजात केलेले वंदे मातरम् चे समूहगान… अशा देशभक्तीने भारलेल्या वातावरणात  वंदे मातरम् या अजरामर गीताचा शतकोत्तर सुवर्ण महोत्सव साजरा करण्यात आला. वंदे मातरम् गीताच्या १५० व्या वर्षपूर्तीनिमित्त १५०० हजार दीप प्रज्वलित करण्यात आले.

स. प. महाविद्यालयाच्या मैदानावर वंदे मातरम् गीताच्या १५० व्या वर्षपूर्तीच्या पूर्वसंध्येला इतिहास प्रेमी मंडळ आणि ज्ञानप्रबोधिनी प्रशालेच्या संयुक्त विद्यमाने भव्य दीपोत्सवाचे आयोजन करण्यात आले होते. यावेळी प्रमुख पाहुणे म्हणून ज्येष्ठ शिक्षणतज्ज्ञ व लेखक प्रा. डॉ.न. म. जोशी, इतिहासप्रेमी मंडळाचे अध्यक्ष मोहन शेटे आदी उपस्थित होते.

मैदानावर वंदे मातरम् ही अक्षरे रेखाटण्यात आली होती. कविवर्य ग.दि. माडगूळकर लिखित ‘वेदमंत्राहून आम्हा वंद्य वंदे मातरम्’ हे गीत गात १५०० पणत्या प्रज्वलित करण्यात आल्या. भारतमातेच्या प्रतिमेचे पूजन करण्यात आले व तिरंगा ध्वज फडकविण्यात आला. तसेच तब्बल ५०० विद्यार्थ्यांनी अजय पराड यांनी संगीतबद्ध केलेल्या वंदे मातरम् गीताचे समूहगान सादर केले.

डॉ.न म.जोशी म्हणाले, क्रांतीची ज्वाला कधीही विझत नाही. राष्ट्र प्रेमासाठी अर्पण होणारे विद्यार्थी व्हा. राष्ट्रप्रेम आणि सदवर्तन ठेवा. वंदे मातरम हे गीत नाही तर ऊर्जा आहे, अशी भावना त्यांनी व्यक्त केली.

मोहन शेटे म्हणाले, बंकिमचंद्र चटोपाध्याय यांनी वंदे मातरम् हे गीत ‘आनंदमठ’ या कादंबरीत समाविष्ट केले होते. १९०५ मध्ये झालेल्या वंगभंगविरोधी आंदोलनात या गीताला जणू रणघोषाचे स्वरूप प्राप्त झाले. आम्ही भारतीय लोक राष्ट्राला केवळ जमीन मानत नाही, तर ‘आई’ म्हणून तिचे पूजन करतो,  हाच आपला सांस्कृतिक राष्ट्रवाद आहे. बंगालचे महाकवी बंकिमचंद्र चटोपाध्याय यांनी ७ नोव्हेंबर १८७५ रोजी वंदे मातरम् या गीताची रचना केली. भारतीय स्वातंत्र्य संग्रामात या गीताने जनतेच्या मनात राष्ट्रभक्तीची ज्योत प्रज्वलित केली. या भावनेचा गौरव करण्यासाठीच हा दीपोत्सव आयोजित करण्यात आला. ज्ञान प्रबोधिनीचे श्रीरंग टोके यांनी आभार मानले.

पुणे- आज सकाळीच येणाऱ्या बातम्यांच्या पार्श्वभूमीवर अखेरीस सुप्रिया सुळे यांनी पार्थ पवारांना फोन केला आणि विचारले की नेमका विषय काय आहे, जरा समजून तरी सांगा. त्यावर पार्थ पवार म्हणाले की आत्या मी काहीही चूक केलेली नाही… असे खुद्द खासदार सुप्रिया सुळे यांनी म्हटले आहे.

-राज्याचे उपमुख्यमंत्री अजित पवार यांचे सुपुत्र पार्थ पवार यांच्या ‘अमीडीया होल्डिंग्स एलएलपी’ कंपनीने केलेल्या जमीन खरेदी व्यवहारावरून महाराष्ट्राच्या राजकारणात मोठी खळबळ उडाली आहे. या प्रकरणी विरोधक आक्रमक झाले असून, अजित पवार आणि सरकारवर टीकेची झोड उठली आहे. यावर आता राष्ट्रवादी कॉंग्रेस शरद पवार गटाच्या खासदार सुप्रिया सुळे यांनी प्रतिक्रिया दिली आहे.सुप्रिया सुळे म्हणाल्या, पुण्यातील जमिनीचे प्रकरण नेमके काय आहे, हे राज्याच्या सरकारने स्पष्ट केले पाहिजे. मुख्यमंत्री देवेंद्र फडणवीस यांनी याबाबत स्पष्ट करायला पाहिजे. कारण सर्व संभ्रम आहे, या प्रकरणात माझे तीन प्रश्न आहेत. माझा पहिला प्रश्न आहे की ही जमीन सरकारी होती का? तर मग ती विकता येते का? जर विकता येत असेल तर नियमाप्रमाणे व्यवहार झाला का? दूसरा महत्त्वाचा मुद्दा तहसीलदार म्हणतात की मी त्यावर स्वाक्षरी केली नाही, मग स्वाक्षरी केली नसेल तर व्यवहार कसा झाला? असा सवाल सुळे यांनी उपस्थित केला आहे.

सुप्रिया सुळे यांचे पार्थ पवार यांच्याशी काही बोलणे झाले का? असा प्रश्न विचारण्यात आला असता त्या म्हणाल्या, हो सकाळीच पार्थ पवारांना फोन केला आणि विचारले की नेमका विषय काय आहे, जरा समजून तरी सांगा. त्यावर पार्थ पवार म्हणाले की आत्या मी काहीही चूक केलेली नाही आणि माझ्या वकिलांशी माझे बोलणे झाले आहे. मग जर पार्थ पवार यांचे वकिलांशी बोलणे झाले असेल तर वकील याबाबत स्पष्टीकरण देतील, असे सुळे म्हणाले.

मुख्यमंत्री पार्थ पवार यांना अडचणीत आणत आहेत का? असा प्रश्न सुप्रिया सुळे यांना विचारण्यात आला, यावर त्या म्हणाल्या, शक्यता नाकारता येत नाही. कारण मुख्यमंत्र्यांनी यात उत्तर दिले पाहिजे. शासनाचे विभाग कोणाला उत्तरदायी असतात? तर मुख्यमंत्र्यांना.पार्थ पवारांचा या प्रकरणात काही संबंधच येत नाही. महाराष्ट्र सरकारने पहिल्यांदा सांगितलं की, या जमिनीचा व्यवहार होऊ शकत नाही. जर व्यवहारच होऊ शकत नसेल तर मुद्रांक शुल्क भरण्याची नोटीस कशी काय आली? मुद्रांक शुल्क किती असावे? यावरही एकमत नाही. या प्रकरणात गोलमाल दिसत असल्याचा आरोप सुप्रिया सुळे यांनी केला आहे.

पुणे, दि. ६ नोव्हेंबर: विद्यार्थी दिवसानिमित्ताने जिल्ह्यातील सर्व शाळा आणि कनिष्ठ महाविद्यालयांमध्ये डॉ. बाबासाहेब आंबेडकर यांच्या जीवनावर आधारित निबंध स्पर्धा, वक्तृत्व स्पर्धा, काव्यवाचन आदी विविध उपक्रमांचे आयोजन करावे, असे सहायक आयुक्त (समाजकल्याण) विशाल लोंढे यांनी प्रसिद्धी पत्रकान्वये कळविले आहे.

सामाजिक न्याय विभागामार्फत ७ नोव्हेंबर २०२५ रोजी सकाळी १० वाजता डॉ. बाबासाहेब आंबेडकर सामाजिक न्याय भवन, येरवडा, पुणे येथे “शिक्षण हेच वाघिणीचे दूध” या विषयावर अॅड. विभीषण गदाचे यांचे जाहीर व्याख्यान आयोजित करण्यात आले आहे.

डॉ. बाबासाहेब आंबेडकर यांच्या जीवनपटाबाबत विद्यार्थ्यांना अधिक माहिती व्हावी याकरिता शालेय शिक्षण व क्रीडा विभागाच्या निर्देशानुसार दरवर्षी ७ नोव्हेंबर हा दिवस राज्यातील सर्व शाळा व कनिष्ठ महाविद्यालयांमध्ये “विद्यार्थी दिवस” म्हणून साजरा करण्यात येतो, असेही श्री. लोंढे यांनी कळविले आहे.

पुणे : छत्रपती शिवाजीनगर मतदारसंघातील रस्ता रुंदीकरण, स्वच्छता, विहिरी संवर्धन, महापालिका वसाहत पुनर्निर्माण आदी विकासकामे मार्गी लावण्याच्या दृष्टीने महत्त्वाच्या ३४ मुद्द्यांवर महापालिका आयुक्त नवल किशोर राम यांच्या समवेत आमदार शिरोळे यांनी आज प्रदीर्घ चर्चा केली. छत्रपती शिवाजीनगर मतदारसंघातील विकासकामे आणि अन्य नागरी सुविधांच्या कामांची तत्काळ अंमलबजावणी करावी, अशा सूचना आयुक्त राम यांनी विविध खात्यांच्या प्रमुखांना दिल्या. शिवाय कामांच्या प्रगतीचा आढावा सहा महिन्यांनी घेतला जाईल, असेही आश्वासन आयुक्तांनी, आमदार शिरोळे यांना दिले.

महात्मा फुले वस्तुसंग्रहालयाचे आधुनिकीकरण करणे आणि इनोव्हेशन हबची उभारणी करणे, जंगली महाराज रस्त्यावरील मल्टिलेव्हल पार्किंग प्रकल्प मार्गी लावणे, डॉ. बाबासाहेब आंबेडकर रोडचे रुंदीकरण करणे, औंधमधील भाजी मंडई, जलतरण तलाव, ड्रेनेज लाईन सुधारणा आदी कामे, छत्रपती संभाजी महाराज उद्यानात छत्रपती संभाजी महाराज यांचा पुतळा बसविणे आणि उद्यानाचे सुशोभीकरण करणे, रस्त्यांवरील खड्डे बुजविणे, कचऱ्याचे निर्मुलन करणे आणि अतिक्रमण हटविणे, महापालिका शाळांच्या इमारतीत दुरुस्त्या करणे, महापालिकेची रुग्णालये सुसज्ज करणे, सार्वजनिक स्वच्छतागृहांची देखभाल करणे, मुळा आणि मुठा नद्यांचे संवर्धन करणे, रेन वॉटर हार्वेस्टिंग आणि विहिरींचे जतन आणि संवर्धन करणे, वाकडेवाडी, पांडवनगर येथील महापालिका वसाहतींचे (कॉलनी) पुनर्निर्माण करणे, भटक्या कुत्र्यांवर नियंत्रण आणि केबल व्यवस्थापन यांसारखे नागरिकांशी निगडित अनेक विषय वेगाने मार्गी लागतील, अशी माहिती आमदार सिद्धार्थ शिरोळे यांनी दिली.