पृथ्वीराज चव्हाण यांच्या उपस्थितीत गुरुवारी होणार गौरव

पुणे : भारतीय संविधान संवर्धन व संरक्षण समितीतर्फे भारतीय संविधान दिन अमृत महोत्सवी वर्षानिमित्त गुरुवारी संविधान रत्न पुरस्कार प्रदान सोहळा आयोजित करण्यात आला आहे.
कार्यक्रम गुरुवार, दि. 21 नोव्हेंबर रोजी सायंकाळी 5 वाजता महाराष्ट्र साहित्य परिषदेच्या माधवराव पटवर्धन सहभागृहात आयोजित करण्यात आला आहे. ज्येष्ठ विचारवंत, अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस आणि शिवस्पूर्ती प्रतिष्ठानच्या अध्यक्षा ॲड. शैलजा मोळक यांना संविधान रत्न पुरस्काराने गौरविले जाणार आहे. पुरस्कार वितरण माजी मुख्यमंत्री पृथ्वीराज चव्हाण यांच्या हस्ते होणार आहे, अशी माहिती कार्यक्रमाचे मुख्य समन्वयक विठ्ठल गायकवाड यांनी निवेदनाद्वारे कळविली आहे. कार्यक्रमाचे स्वागताध्यक्ष रमाई महोत्सवाचे अध्यक्ष ॲड. प्रमोद आडकर असून कार्यक्रमाच्या अध्यक्षपदी महाराष्ट्र आर्थिक विकास मंडळाचे उपाध्यक्ष सचिन ईटकर असणार आहेत. कार्यक्रम सर्वांसाठी खुला आहे.

पुणे, दि. 14 : “आमच्या उज्वल भवितव्यासाठी व राज्याच्या प्रगतीसाठी मतदान करा”, असे साकडे शिवाजीनगर विधानसभा मतदारसंघातील मॉडर्न विद्यालयातील विद्यार्थिनींनी भ्रमणध्वनी संदेशाचे माध्यम वापरण्याऐवजी पत्र पाठवून आपल्या पालकांना व नातेवाईकांना घातले आहे.

मतदानाचा टक्का वाढावा म्हणून भारत निवडणूक आयोग, पुणे जिल्हाधिकारी कार्यालय व स्विप व्यवस्थापन कक्ष यांच्यावतीने शिवाजीनगर विधानसभा मतदारसंघामध्ये विविध उपक्रमांचे आयोजन केले जात आहे. शिवाजीनगर येथील मॉडर्न मुलींचे विद्यालय या शाळेतील विद्यार्थिनींनी पालक आणि नातेवाईकांना पत्र लिहीले आहे. निवडणुकीपूर्वीच ते त्यांच्या हातात मिळेल. “आमच्या उज्वल भवितव्यासाठी व राज्याच्या प्रगतीसाठी मतदान करा”. असे आवाहन या पत्रातून करण्यात आले आहे.

या उपक्रमात 300 विद्यार्थिनींनी सहभाग घेतला होता. शालेय अभ्यासक्रमामध्ये पत्रलेखन हा विषय आहे. मात्र भ्रमणध्वनीच्या या जमान्यात पत्रलेखन करून आपल्या नातेवाईकांशी हितगुज करणे दुरापस्त झाले असतांना पत्रलेखन करण्याचा अनुभव घेत आपल्या नातलगांना विद्यार्थीनींनी पत्र लिहीले आहे. मतदानापूर्वी त्यांच्या नातेवाईकांच्या हातात हे टपाल खात्याचे पत्र पोहोचेल, ते सुद्धा याचा सुखद अनुभव घेतील, अशा बेताने हे पत्र टपालाद्वारे पाठविले जाणार आहे. या माध्यमातून मतदानाची टक्केवारी वाढण्यासाठी निश्चितपणे मदत होणार आहे.

शिवाजीनगर विधानसभा मतदारसंघ स्वीप समन्वय समितीचे दीपक कदम, सागर काशीद, विशाल म्हेत्रे, शाळेच्या मुख्याध्यापिका माया नाईक, डॉ. उज्ज्वला हातागळे, वैशाली घोडके, अनुप्रिती गाजरे, माधवी चिटणीस, जान्हवी दुर्गे, रेश्मा आदमाने, अश्विनी चेन्नूर, श्रुती साठे यांनी या उपक्रमाचे नियोजन केले.

पुणे, दि. 14 : येत्या विधानसभा सार्वत्रिक निवडणुकीमध्ये सर्व मतदारांनी आपला मतदानाचा हक्क बजवावा या उद्देशाने तृतीयपंथीय आणि बचत गटातील महिलांद्वारे शिवाजीनगर विधानसभा मतदारसंघामधील रस्त्यावर मानवी साखळी करून लोकशाहीसाठी मताचे दान मागितले.

निवडणूक निर्णय अधिकारी दादासाहेब गीते यांच्या मार्गदर्शनाखाली शिवाजीनगर विधानसभा मतदारसंघात स्वीप पथकाद्वारे कमी मतदान झालेल्या भागांमध्ये विशेष मोहीम राबवून उपक्रमांचे आयोजन केले जात आहे. या अनुषंगाने पाटील इस्टेट वसाहत येथे मतदार जन जागृती कार्यक्रम घेण्यात आला. तृतीयपंथी आणि बचत गटातील महिलांनी या मोहिमेत सहभाग घेत ‘मतदार राजा जागा हो लोकशाहीचा धागा हो’ अशा घोषणा देत घरोघरी जात मतदारांना मतदान करण्याचे आवाहन केले. पाटील वसाहत येथील पुणे-मुंबई रस्त्यावर मानवी साखळी तयार करून मतदारांचे लक्ष्य वेधत सदृढ लोकशाहीच्या बळकटीसाठी मताचे दान मागून मतदारांना प्रोत्साहित करण्यात आले. नागरिकांनी या उपक्रमाचे स्वागत केले.

कार्यक्रमामध्ये समूह संघटिका अलका गुजनाल, तृतीयपंथी आयकॉन शरद खुडे यांच्यासह महिला बचत गटातील प्रतिनिधी तसेच शिवाजीनगर विधानसभा मतदारसंघ स्वीप समन्वय समितीचे दीपक कदम, सागर काशीद, विशाल आदी या उपक्रमात सहभागी झाले होते.

 एन. बी. ट्रॉफी क्रिकेट स्पर्धा : निलेश भिंताडे स्पोर्ट्स फाउंडेशनच्या वतीने आयोजन 
पुणे : मातोश्री इलेव्हन, हेमराज मृत्यूंजय यांनी निलेश भिंताडे स्पोर्ट्स फाउंडेशनच्या वतीने आयोजित पुणे जिल्हा टेनिस प्रीमियर एन. बी. ट्रॉफी क्रिकेट स्पर्धेत आपापल्या प्रतिस्पर्ध्यावर मात केली.
वडगाव बुद्रुक येथील सिंहगड रोडवरील मैदानावर ही स्पर्धा सुरू आहे.पहिल्या लढतीत मातोश्री इलेव्हन संघाने टिंगरे सरकार ग्रुपवर २७ धावांनी मात केली.मातोश्री इलेव्हन संघाने प्रथम फलंदाजी करताना निर्धारित ८ षटकांत ३ बाद १०४ धावाकेल्या. दिलीप वर्माने २३ चेंडूंत सात षटकार व दोन चौकारांसह नाबाद ६३ धावाकेल्या. त्याला कर्णधार राजेश पवारची उत्तम साथ लाभली. पवारने १९ चेंडूंत दोन षटकार व तीन चौकारांसह ३३ धावा केल्या. प्रत्युत्तरादाखल टिंगरे ग्रुप संघाला ८बाद ७७ धावा केल्या. यात धीरज गच्चेने अवघ्या सहा धावांत टिंगरे ग्रुपचा निम्मा संघ गारद केला. 
‘ड’ गटात मातोश्री इलेव्हन संघाचा हा पहिलाच विजय आहे. यानंतर दुसऱ्या लढतीत हेमराज मृत्युंजय संघाने शिरसाठ संघावर ५३धावांनी मात केली. हेमराज संघाने प्रथम फलंदाजी करताना ६ बाद १११ धावापर्यंत मजल मारली. अनिकेत ताकवनेने २१ चेंडूंत पाच षटकार व चार चौकारांसह ५५ धावा केल्या.लक्ष्याचा पाठलाग करताना शिरसाठ स्पोर्ट्स संघाला ७ बाद ५८ धावाच करता आल्या. 
‘क’गटात हेमराज संघ सलग दोन विजयांसह अव्वल क्रमांकावर आहे. धावफलक : मातोश्री इलेव्हन – ८ षटकांत ३ बाद १०४ (दिलिप वर्मा नाबाद ६३, राजेश पवार ३३, असिफ शेख १-२३, अमोल पवार १-२३,अनिकेत रोडे १-४) वि. वि. टिंगरे सरकार ग्रुप – ८ षटकांत ८ बाद ७७ (रोहन गर्दाडे २४,भरत कदम २०, धीरज गच्चे ५-६, अविष्कार दाते २-१३, प्रथमेश गोसावी १-२४). 
हेमराज मृत्युंजय – ८ षटकांत ६ बाद १११ (अनिकेत ताकवने ५५, विशाल सरकार १९, किसन मरगळे १३, सूरज गवळी २-२८, संदीप गिर्हे१-२८, रणजित फराटे १-२३) वि. वि. शिरसाठ स्पोर्ट्स – ८ षटकांत ७ बाद ५८(संकेत भुजबळ १९, प्रतीक फराटे १६, वसिक शेख २-२, अनिकेत ताकवने२-२१). 
शिरसाठ स्पोर्ट्स – ८ षटकांत ९ बाद ६४ (रणजित फराटे १८, अक्षय खोंड नाबाद १६, नीलेश ढगे २-१०, अमर गोरे २-१९, अभि २-३) वि.वि. सुखाई प्रतिष्ठान – ८ षटकांत सर्व बाद ५६ (रोहित पाटील १३, रणजित फराटे ३-११, संदीप गिर्हे १-१३, प्रतीक फराटे १-११).

पुणे, दि. 14: महाराष्ट्र विधानसभा निवडणुकीच्या पार्श्वभूमीवर आदर्श आचारसंहिता कालावधीत राज्य उत्पादन शुल्क पुणे विभागाचे अधीक्षक चरणसिंह राजपूत यांच्या मार्गदर्शनाखाली जुन्नर तालुक्यातील ओतूर येथे 13 लाख रुपये किंमतीचे विदेशी मद्यसाठा जप्त करण्यात आला आहे, अशी माहिती राज्य उत्पादन शुल्क, भरारी पथक क्र.3 चे पुणे निरीक्षक देवदत्त पोटे यांनी दिली आहे.

पथकाला 13 नोव्हेंबर रोजी माहितीनुसार बालाजी प्लाजा नगर कल्याण रोड, ओतुर एसटी स्टॅण्ड जवळ,ओतूर ता.जुन्नर येथे विदेशी दारु, वाईन, बिअरचा साठा बेकायदेशीर विक्री करण्याच्या उद्देशाने साठवून ठेवल्याची माहिती मिळाली. त्यानुसार सदर ठिकाणी छापा टाकून पथकाच्यावतीने कारवाई केली असता विदेशी मद्दाचे 100 बॉक्स, बिअरचे 125 बॉक्स,वाईनचे 37 बॉक्स असे मिळून एकूण 262 बॉक्स एकूण 13 लाख 20 हजार 420 रुपये किंमतीचा मद्दसाठा जप्त करण्यात आला. मयूर पुरुषोत्तम तांबे याचे विरुध्द गुन्हा नोंदविण्यात आला आहे.

या कारवाईत भरारी पथक क्र.3 पथकाचे निरीक्षक देवदत्त पोटे, दुय्यम निरीक्षक वाय.एम.चव्हाण, पी.ए.ठाकरे, सहाय्यक दुय्यम निरीक्षक संजय साठे, जवान सर्वश्री जगन्नाथ चव्हाण,अमर कांबळे,जयदास दाते,अनिल दांगट व शरद हांडगर सहभागी होते, अवैध मद्य निर्मिती, विक्री वाहतूक तसेच साठवणूकीबाबत माहिती मिळाल्यास तात्काळ राज्य उत्पादन शुल्क, भरारी पथकाशी संपर्क साधावा, असे आवाहन श्री. पोटे यांनी केले आहे.

पुणे, दि. १४ : पर्वती विधानसभा मतदारसंघात यापूर्वी असलेल्या ६३ पदनिर्देशित ठिकाणांमध्ये आणखी एका पदनिर्देशित ठिकाणाची वाढ होवून आता एकूण ६४ पदनिर्देशित ठिकाणे झाली आहेत, अशी माहिती निवडणूक निर्णय अधिकारी मनोजकुमार खैरनार यांनी दिली आहे.

पर्वती मतदारसंघात ३४४ मतदान केंद्रे आहेत. यातील मतदान केंद्र क्र. ६३ हे रोहन कृतिका हौसिंग सोसायटी, पु. ल. देशपांडे उद्यान जवळ, नवश्या मारुती परिसर, सिंहगड रोड येथे आहे. या केंद्राची एकूण मतदार संख्या १ हजार ३७९ झाली असल्यामुळे पर्वती विधानसभा मतदार संघाच्या पदनिर्देशित ठिकाणांच्या संख्येत एकने वाढ झालेली आहे.

संबधित मतदान केंद्रामध्ये पुणे पाट बंधारे खात्याची नारायण कोठी उत्तर दिशेकडील गणेश मंदीर जवळ-जयदेव नगर- साठे वसाहत- गणेश मळा-सिंहगड रोड-रोहन कृतिका हौसिंग सोसायटी-सीता बाग- विठ्ठलवाडी जुना जकात नाक्या जवळ- व्यंकटेश्वरा हॅचरीज कंपनी शेजारीचा भाग असून या मतदान क्षेत्रामध्ये असलेल्या मतदारांनी या मतदान क्षेत्रामध्ये असलेल्या मतदारांनी या मतदान केंद्रावर जावून तेथे असणाऱ्या मतदार यादीबाबत खात्री करून घ्यावी, जेणेकरून मतदानाचे दिवशी त्यांचा मतदान केंद्राबाबत गोंधळ न होता ते नियोजित वेळेत मतदान करू शकतील, अशी माहिती पर्वती विधानसभा मतदारसंघाचे निवडणुक निर्णय अधिकारी श्री. खैरनार यांनी दिली आहे.

बालदिनानिमित्त आमदार रवींद्र धंगेकर यांनी बालचमूला मिठाई वाटून साजरी केली नेहरू जयंती व लहुजी वस्ताद जयंती

पुणे : आज महाराष्ट्रातच नव्हे, तर संपूर्ण देशात भाजप सरकारमार्फत सर्व लोकशाही संकेत धुडकावून बेबंदशाहीचा कारभार सुरू आहे. या अंदाधुंद कारभाराच्या पार्श्वभूमीवर पंडित जवाहरलाल नेहरू यांच्या विचारांची प्रकर्षाने गरज निर्माण झाली आहे, असे प्रतिपादन ज्येष्ठ काँग्रेस नेते व माजी आमदार उल्हासदादा पवार यांनी केले.

पंडित नेहरू जयंतीनिमित्त आज नेहरू स्टेडियम येथील पंडित जवाहरलाल नेहरू यांच्या पुतळ्याला पुष्पहार अर्पण करून त्यांना अभिवादन करण्यात आले. त्यावेळी उल्हासदादा बोलत होते.

यावेळी क्रांतिवीर लहुजी वस्ताद यांनाही उपस्थितांनी जयंतीनिमित्त अभिवादन केले.

यावेळी बोलताना उल्हासदादा म्हणाले की, महाराष्ट्रात विधानसभेच्या सध्या निवडणुका सुरू आहेत. त्या पार्श्वभूमीवर नेहरू जयंती साजरी करताना या राज्यात पुन्हा लोकशाही आणि संविधान सर्वोच्च स्थानी ठेवणाऱ्या राज्यकर्त्यांची महाराष्ट्रात गरज आहे, याचा विचार आपण सर्वांनी केला पाहिजे. पंडित नेहरू यांनी आधुनिक भारताची पायाभरणी करताना देशात अनेक विज्ञान, तंत्रज्ञान, संशोधन संस्था उभारल्या. ‘इस्रो’सारखी अंतरिक्ष संशोधन संस्था नेहरूंनीच सुरू केली. नेहरूंच्या पुढाकाराने पुणे परिसरातही असंख्य संस्था उभ्या राहिल्या आहेत. त्यामुळे पुण्याच्या वैभवात भर पडली आहे. पंडित नेहरूंनी अत्यंत सुसंस्कृत राजकारण केले. विरोधकांनाही संसदीय राजकारणात योग्य तो मानसन्मान दिला. पण आज सत्तेचा दुरुपयोग करून विरोधकांचे संपूर्ण खच्चीकरण करण्याचे काम विद्यमान राजवटीत सुरू आहे. संसदेत विरोधकांचा माइक बंद केला जातो, त्यांचा आवाज दाबला जातो, दरवाजे बंद करून आवाजी मतदानाने कोणताही विषय दडपून संमत केला जातो, संवेदनशील विषयांवर चर्चा होऊ दिली जात नाही. हा सगळा प्रकार जर थांबवायचा असेल, तर आपल्याला नेहरूंच्या विचारानेच यापुढील काळात मार्गक्रमण करावे लागेल, असेही उल्हासदादा म्हणाले.

यावेळी बोलताना आमदार रवींद्र धंगेकर यांनी पंडित जवाहरलाल नेहरू यांना आदरांजली वाहतानाच, क्रांतिवीर लहुजी वस्ताद यांनी समाजकारणात दिलेल्या योगदानाचेही स्मरण केले. लहुजी वस्ताद यांनी अनेक माणसे घडवली. त्यांच्या तालमीत बलोपासनेबरोबरच राष्ट्रउपासनेचेही धडे दिले गेले, असे ते म्हणाले.

या कार्यक्रमाला प्रदेश काँग्रेस उपाध्यक्ष मोहन जोशी, माजी गृह राज्यमंत्री व कँटोन्मेंट विधानसभा मतदारसंघातील काँग्रेस पक्षाचे उमेदवार रमेश बागवे, प्रदेश काँग्रेस सरचिटणीस अभय छाजेड, प्रदेश काँग्रेस सरचिटणीस संजय बालगुडे, नरेंद्र व्यवहारे, अप्पा शेवाळे आदी मान्यवर उपस्थित होते.

यावेळी उपस्थित बालचमूनेही पंडितजींच्या पुतळ्याला अभिवादन केले. त्यानंतर या उपस्थित बालचमूला रवींद्र धंगेकर यांच्या हस्ते खाऊवाटप करण्यात आले. उपस्थित बालकांनी नेहरू चाचा आणि लहुजी वस्ताद यांच्या नावांचा जयघोष करीत त्यांना अभिवादन केले.

ती डॉ. धनंजय शिरोळकर लिखित ‌‘अनंताख्यान‌’ ओविबद्ध चरित्रग्रंथाचे प्रकाशन

पुणे : गुरूंप्रती अत्यंत नम्रभाव, श्रद्धा, शरणागती या त्रिगुणातून ‌‘अनंताख्यान‌’ अर्थात ‌‘श्री वरदानंद भारती : कथामृत काव्यबिंदू‌’ या ओविबद्ध चरित्रग्रंथाची निर्मिती डॉ. धनंजय शिरोळकर यांच्या हातून घडल्याचे जाणवते. हा ग्रंथ परिवारापुरता मर्यादित न राहता जास्तीत जास्त वाचकांपर्यंत पोहोचावा आणि त्याचे पारायणरूपाने वाचन व्हावे, अशी अपेक्षा श्री राधादामोदर प्रतिष्ठानच्या अध्यक्षा डॉ. कल्याणी नामजोशी यांनी व्यक्त केली. अनंताख्यान हे ग्रंथ शिर्षक अत्यंत समर्पक असून या ग्रंथातून प.पू. वरदानंद भारती यांच्या जीवनातील घटनाक्रम सहज-सोप्या आणि आशयघन शब्दांतून ओवीरूपाने समोर आला आहे, असेही त्यांनी नमूद केले.

प.पू. वरदानंद भारती तथा अनंतराव (अप्पा) आठवले यांच्या तेजाचे चांदणे या आत्मचरित्रपर ग्रंथाच्या ओवीबद्ध अवतर्णिकेची निर्मिती त्यांचे सुशिष्य डॉ. धनंजय शिरोळकर यांनी केली आहे. या ओवीबद्ध चरित्रग्रंथाचे प्रकाशन डॉ. कल्याणी नामजोशी यांच्या हस्ते झाले. त्या वेळी त्या बोलत होत्या. कार्यक्रम गणेश सभागृहात आयोजित करण्यात आला होता. गोरटे येथील श्री दासगणू प्रतिष्ठानचे अध्यक्ष महेश आठवले यांची प्रमुख उपस्थिती होती. कल्याणी शिरोळकर, देवव्रत शिरोळकर व्यासपीठावर होते.
डॉ. नामजोशी पुढे म्हणाल्या, ग्रंथातील ओव्यांची मांडणी आकर्षक असून कमीतकमी शब्दात परंतु भक्तीरसाची महती दर्शविणारा भावविलास उत्तम साधला आहे. प.पू. वरदानंद भारती यांना आलेल्या अतींद्रिय अनुभूती रचनाकार डॉ. शिरोळकर यांनी अतिशय निर्भिडपणे सात्विक-निर्मळ मनातून मांडल्या आहेत.
महेश आठवले यांनी प.पू. दासगणु महाराजांचे अनुयायी असलेल्या वडील प.पू. वरदानंद महाराज यांच्या अनेक आठवणी सांगत त्यांच्या स्वभावाचे, विचारांचे पैलू उलगडून दाखविले. हा ग्रंथ म्हणजे प.पू. वरदानंद महाराज यांच्या चरित्राचे रसाळ शब्दातील ओवीबद्ध दर्शन होय, असे गौरवोद्गार त्यांनी काढले.
पुस्तकाच्या निर्मितीविषयी बोलताना डॉ. धनंजय शिरोळकर म्हणाले, प.पू. वरदानंद महाराज यांच्या विचारधनाचे भांडार सर्व समाजापर्यंत पोहोचावे, त्यांचे सामाजिक योगदान पुढे यावे यासाठी ग्रंथाची निर्मिती केली आहे. देवव्रत शिरोळकर यांनी मनोगत व्यक्त केले.
कार्यक्रमाचे सूत्रसंचालन रवींद्र खरे यांनी केले तर आभार अभय जबडे यांनी मानले.
फोटो ओळ : ‌‘अनंताख्यान‌’ अर्थात ‌‘श्री वरदानंद भारती : कथामृत काव्यबिंदू‌’ या ओविबद्ध चरित्रग्रंथाच्या प्रकाशनप्रसंगी उपस्थित (डावीकडून) कल्याणी शिरोळकर, महेश आठवले, डॉ. कल्याणी नामजोशी, डॉ. धनंजय शिरोळकर.