‘फसक्लास दाभाडे’मधील धमाल ‘यल्लो यल्लो’ गाणं प्रदर्शित.

सध्या सगळीकडे लग्नसराईचा हंगाम सुरू असून लग्नातील हळदी समारंभ हा सर्वात खास आणि धमाल समारंभ असतो. याच धमाल वातावरणात, ‘फसक्लास दाभाडे’ चित्रपटातील ‘यल्लो यल्लो’ गाणं एक नवा रंग घेऊन आलं आहे. नुकताच दाभाडे कुटुंबियांच्या घरातील हळदी सोहळा मोठ्या दणक्यात पार पडला. यानिमित्ताने ‘यल्लो यल्लो’ हे हळदीचे खास गाणंही प्रदर्शित करण्यात आलं. या सोहळ्यात दाभाडे कुटुंबाने एकत्र येऊन धमाल, मजामस्ती, नाचगाणी आणि विविध खेळ खेळत सोनू आणि कोमलचा हळदी समारंभ अगदी थाटामाटात साजरा केला. या हळदी समारंभाला हेमंत ढोमे, क्षिती जोग, अमेय वाघ, सिद्धार्थ चांदेकर, निवेदिता सराफ, हरीश दुधाडे, राजन भिसे आणि राजसी भावे उपस्थित होते.

सोनू आणि कोमलच्या हळदी समारंभातील ‘यल्लो यल्लो’ गाण्यात धमाल पाहायला मिळत असून या गाण्याला अमितराज यांचे संगीत लाभले आहे. गाण्याचे बोल क्षितिज पटवर्धन यांचे असून या गाण्याने हळदी सोहळ्याचा उत्साह द्विगुणित केला आहे. या धमाकेदार गाण्यात नकाश अझीझ यांच्या आवाजाने अधिकच रंगत आणली आहे. सोनू आणि कोमलच्या हळदीचं हे गाणं प्रत्येकाला थिरकायला लावणारं आहे. ‘यल्लो यल्लो’ या गाण्यात हळदी समारंभातील धमाल क्षण पाहायला मिळत असून गाण्यात उत्साही वातावरणात कुटुंबातील प्रत्येक सदस्याचा आनंद आणि मस्तीची झलक दिसतेय.

निर्माते भूषण कुमार म्हणतात, ‘’हे गाणं म्हणजे आमच्या तुमच्या घरातील लग्नातले चित्रण आहे. यातील प्रत्येक व्यक्तिरेखा प्रेक्षक स्वतःमध्ये कुठेतरी शोधतील. खूप सुंदर असे सादरीकरण असून प्रत्येकाला थिरकायला लावणारे हे गाणे आहे.’’

निर्माते आनंद एल राय म्हणतात, “ हळदीसारखा एक धमाल कार्यक्रमाचा आनंद ‘यल्लो यल्लो’ गाण्यात पाहायला मिळेल. दाभाडे कुटुंबातील हळदी समारंभाची मस्ती, प्रेम आणि नात्यांची मुरलेली गोडी या गाण्यात उत्तमरित्या दाखवण्यात आली आहे. या गाण्याने हळदी सोहळ्यातील धमाल रंग उधळले असून, हे गाणं प्रेक्षकांना त्यांच्या स्वतःच्या आठवणींशी जोडेल. मला खात्री आहे, हे गाणे इथून पुढे प्रत्येक हळदी समारंभात धमाल उडवेल.”

दिग्दर्शक हेमंत ढोमे यांनी गाण्याबद्दल म्हणतात, “हळद हा एक असा सोहळा असतो जिथे मस्ती, आनंद आणि नात्यांचे खेळ रंगतात. पारंपरिक मराठमोळ्या पद्धतीने खेळल्या जाणाऱ्या या सोहळ्याची धमाल ‘यल्लो यल्लो’ गाण्यात पहायाला मिळणार आहे… हे मराठमोळं कौटुंबिक सेलिब्रेशन पाहायला प्रेक्षकांना नक्कीच आवडेल.”

टी-सीरीज, कलर यल्लो प्रॉडक्शन आणि चलचित्र मंडळी यांचा आगामी चित्रपट ‘फसक्लास दाभाडे’ २४ जानेवारी २०२५ रोजी प्रदर्शित होणार आहे. हेमंत ढोमे लिखित, दिग्दर्शित या चित्रपटाचे निर्माते भूषण कुमार, क्रिशन कुमार, आनंद एल राय आणि क्षिती जोग आहेत. चित्रपटाचे वितरण पॅनोरमा स्टुडिओजने केले आहे.

(Sharad Lonkar)

‘आभार आणि उत्साह: ताहिर राज भसीन यांची ‘ये काली काली आंखें’ च्या सीझन 3 वर प्रतिक्रिया’

नेटफ्लिक्सची सुपरहिट थ्रिलर ‘ये काली काली आंखें’ पुन्हा एकदा प्रेक्षकांच्या मनावर अधिराज्य गाजवत आहे! 22 नोव्हेंबर 2024 रोजी दुसऱ्या सीझन च्या थरारक प्रीमियरनंतर अवघ्या तीन आठवड्यांत या शोला तिसऱ्या सीझनसाठी हिरवा कंदील मिळाला आहे, ज्यामुळे जगभरातील चाहत्यांमध्ये उत्साह आहे .

डार्क ट्विस्ट्स, सायकोलॉजिकल खोली आणि थरारक लव ट्राइंगल साठी ओळखला जाणारा हा शो लोकप्रियतेच्या शिखरावर पोहोचत आहे। दुसऱ्या सीझनने नेटफ्लिक्स इंडिया टॉप 10 मध्ये #1 वर सुरुवात केली आणि पहिल्या सीझनबद्दल पुन्हा रस निर्माण केला, ज्यामुळे शोच्या मोठ्या आकर्षणाची आणि समीक्षकांच्या प्रशंसेची खात्री पटते। अवघ्या सहा भागांची प्रभावी कथा, आंतरराष्ट्रीय कटकारस्थान आणि सखोल पात्रांच्या कंगोऱ्यांनी याला वेगळी ओळख मिळवून दिली आहे।

मुख्य अभिनेता ताहिर राज भसीन, जो शोमध्ये विक्रांत सिंह चौहानची भूमिका साकारली, त्याने आपला आनंद व्यक्त केला, “मला खूप आनंद आहे की ‘ये काली काली आंखें’ ला तिसऱ्या सीझनसाठी मंजुरी मिळाली आहे आणि माझ्या पात्राला तसेच शोला मिळालेल्या प्रशंसेमुळे मी आभारी आहे। पहिला सीझन आपल्या पाल्प एंटरटेनमेंटने प्रेक्षकांना खिळवून ठेवणारा ठरला, तर दुसऱ्या सीझन ने ‘सीझन 2 चा शाप’ मोडीत काढत मोठे यश मिळवले आहे। त्याच्या जबरदस्त ट्विस्ट्स आणि थरारक नाट्यामुळे प्रेक्षकांना खूप आनंद झाला आहे।”

ताहिरने आपल्या भूमिकेचे आव्हान आणि अनुभवावर सांगितले, “हे माझ्या कारकिर्दीतील सर्वात आव्हानात्मक भूमिकांपैकी एक आहे। तिसऱ्या सीझनसाठी हिरवा कंदील मिळणे म्हणजे आपण केलेल्या परिश्रमांना मान्यता मिळणे आहे। विक्रांतला पुन्हा साकारणे रोमांचक आणि समाधानकारक ठरले, आणि मी पुढील अध्याय अधिक ट्विस्ट्स आणि तीव्रतेसह मांडण्यासाठी उत्सुक आहे। समीक्षकांची प्रशंसा आणि चाहत्यांचा पाठिंबा आम्हाला प्रत्येक वेळी अधिक चांगले करण्यासाठी प्रेरित करतो।”

शोचे निर्माता सिद्धार्थ सेनगुप्ता यांनी त्याच्या गतीशील घटनाक्रम आणि अप्रत्याशित वळणांना उत्कृष्टरीत्या हाताळले आहे, ज्यामध्ये उच्च स्तरावरील नाट्य आणि गुंतागुंतीच्या प्रेमकथेचा समतोल साधला आहे। सीझन 2 च्या क्लिफहॅंगर—विक्रांत जखमी आणि पूर्वा गर्भवती—मुळे तिसऱ्या सीझनमध्ये अधिक गडद आणि थरारक कथा उलगडली जाणार आहे।

आंचल सिंग, श्वेता त्रिपाठी आणि इतर कलाकारांचा दमदार अभिनय, शोचा अ‍ॅक्शन आणि रोमांसचा अनोखा समतोल, यामुळे ‘ये काली काली आंखें’ रोमँटिक थ्रिलर प्रकाराला नवे परिमाण देत आहे। चाहत्यांना खात्री आहे की सर्वात उत्तम अद्याप येणे बाकी आहे।

सोनी एन्टरटेन्मेंट टेलिव्हिजनवरून!

“CID हा भारतातील सर्वात जास्त काळ चाललेल्या TV शोज पैकी एक आहे, कारण, तो नेहमी काळाच्या पुढे असायचा”: CID मधील अभिनेता दयानंद शेट्टी

गुन्ह्याचा आणि गुन्हेगारांचा शोध घेणारा अत्यंत लोकप्रिय झालेला CID हा शो सोनी एन्टरटेन्मेंट टेलिव्हिजन वर 21 डिसेंबर 2024 पासून पुनरागमन करण्यास सज्ज आहे. दर शनिवारी आणि रविवारी रात्री 10 वाजता त्याचे प्रसारण करण्यात येईल. शिवाजी साटम (ACP प्रद्युमन), दयानंद शेट्टी (दया) आणि आदित्य श्रीवास्तव (अभिजीत) हे कलाकार पुन्हा एकदा त्याच्या गाजलेल्या भूमिकेत दिसणार आहेत. एका दिलखुलास मुलाखतीत या शोच्या पुनरागमनाबद्दल, पुन्हा प्रेक्षकांसमोर येण्याबद्दल असलेला रोमांच दयानंद शेट्टीच्या बोलण्यातून व्यक्त झाला. त्याने सांगितले की, नव्या सीझनमध्ये जुन्या आठवणींचे क्षण असतील आणि नवीन, वेधक केसिस व बरेच काही असेल.

CID परत येत आहे! इतक्या वर्षांनंतर पुन्हा दयाच्या भूमिकेत शिरताना कसे वाटते आहे?

फक्त मीच नाही, तर संपूर्ण टीम खूप रोमांचित आहे. आणि त्याहीपेक्षा आमच्या चाहत्यांचा उत्साह तर विचारुच नका! आम्ही 6 वर्षांनी परत येत आहोत. आमच्या चाहत्यांच्या प्रतिक्रिया पाहिल्या, त्यांच्या भावना पाहिल्या की वाटते, हा शो आम्ही इतक्या लवकर बंद करायला नको होता. लोक या शो ला अजून फॉलो करतात, जुने एपिसोड आवडीने बघतात. लोक हा शो यूट्यूबवर, बसमध्ये किंवा टॅक्सीत बसूनही बघतात. असे वाटते की, त्यांचे केवळ या मालिकेशीच नाही, तर त्यातील व्यक्तिरेखांशीही एक नाते जडले आहे. त्यामुळे लोकांच्या आवडत्या दयाच्या रुपात परत येताना मला खूप आनंद होत आहे. हा दया आता CID च्या नवीन सीझनमध्ये बरेच दरवाजे तोडणार आहे.

इतकी वर्षे दयाची भूमिका करण्यातील सगळ्यात सुखद भाग काय आहे?

हा एक अद्भुत प्रवास आहे. यातला सगळ्यात आवडता भाग म्हणजे प्रेक्षकांकडून मिळालेले प्रेम. आम्ही कुठेही गेलो तरी असे कधी वाटलेच नाही, की आपला शो आता चालू नाही आहे. लोक सुरू असलेल्या मालिकांविषयी न बोलता CID विषयीच जास्त बोलत असत. हा शो अजूनही लोकांशी निगडीत आहे असे वाटायचे, जणू तो अजून चालूच असावा. याचे श्रेय प्रेक्षकांचे आहे. आमचे चाहते फारच निष्ठावंत आहेत. आजही काही चाहते माझा नंबर मिळवून मला व्हॉटस्अॅप मेसेज पाठवत असतात. मी सोशल मीडियावर फारसा सक्रिय नाही, पण लोक CID चे मीम्स शेअर करतात, त्यातल्या काही प्रसिद्ध संवादांविषयी बोलतात, हे मला माहीत आहे. त्यांचे प्रेम पाहून मी खरोखर भारावून जातो.

CID पुन्हा सुरू होत आहे, त्यामध्ये सगळ्यात जास्त आनंद तुला कशाबद्दल आहे? यावेळी तुमच्यासमोर काही आव्हाने आहेत का?

जेव्हा तुम्ही त्याच त्याच लोकांसोबत अनेक वर्षे काम करता, तेव्हा तुम्हाला एका कुटुंबासारखे वाटू लागते. त्यामुळे, माझ्यासाठी सगळ्यात आनंदाचा भाग हा आहे की, मला CID च्या टीमसोबत काम करण्याची संधी पुन्हा मिळणार आहे. यावेळी, आव्हान हे आहे की, लोकांनी पुन्हा प्रेमात पडावे असा शो आम्हाला सादर करायचा आहे. खास करून हा शो चालू नसताना त्यांनी आम्हाला जे प्रेम दिले आहे, त्यामुळे आता ही आमची जबाबदारी आहे. उदाहरणार्थ, CID चे संवाद खूप गाजले आहेत. यावेळी आम्ही संवाद लिहिण्याचे आणि ते बोलण्याचे काम करू पण ते किती गाजतात, हे तर लोकच ठरवतील. लोकांमुळेच त्यांची मीम्स बनतात किंवा ते रोजच्या संभाषणाचा भाग बनतात. उदाहरणार्थ, नुसते दार बघितले तरी लोकांना “दया, दरवाजा तोड दो!” हा संवाद आठवतो. त्यामुळे, हे आमच्या नियंत्रणात नाही. फक्त प्रेक्षकांचे प्रेम आणि त्यांची क्रिएटिव्हिटी यामुळेच हे संवाद जिवंत राहू शकतात. त्यांचे CID शी असलेले नातेच खास आहे, आणि त्यांच्यासाठी आम्ही परत येत आहोत, याचा आम्हाला आनंद आहे.

‘बाहुबली-कटप्पा’पेक्षा एक मोठे रहस्य हे आहे की, इंस्पेक्टर अभिजीतने दयाला का मारले?

इंस्पेक्टर अभिजीतने दयाला का मारले हे कोणालाच, चाहत्यांनाही माहीत नाही. सगळ्यांच्या मनात हा प्रश्न आहे. या गोष्टीमुळे लोकांना धक्का बसला होता आणि त्याचे उत्तर जाणून घेण्याचे कुतूहलही जागे झाले होते. पण, सगळ्या काहण्यांमध्ये कलटण्या असतातच ना! तुम्हाला 21 डिसेंबरलाच ते कळेल.

तुला हे पूर्वी कधी असे वाटले होते का की, CID मालिका इतकी गाजेल आणि मालिका बंद झाल्यावरही लोक तिची इतकी आठवण काढतील?

खरं सांगायचं तर, आम्ही जेव्हा पहिल्यांदा CID सुरू केली, तेव्हा आमच्यातल्या कोणालाच ही कल्पना नव्हती ही मालिका इतकी लोकप्रिय होईल आणि एकामागून एक दशके लोक या मालिकेवर प्रेम करतील. CID ने हा दर्जा मिळवला, त्याच्या मागे समस्त टीमचे परिश्रम आहेत- आमचे लेखक, दिग्दर्शक, सह-कलाकार आणि सगळ्यात महत्त्वाचे म्हणजे आमच्या चाहत्यांनी दिलेले प्रेम. या गोष्टीचा मला अचंबा वाटतो की वेगवेगळ्या वयोगटातील, पिढ्यांमधील लोक अजूनही या मालिकेशी निगडीत आहेत. इतक्या लोकांसाठी ही मालिका इतकी जवळची झाली आहे हे पाहून मी भारावून जातो. अशा लोकप्रिय मालिकेत सहभागी असल्याची जाणीव मला नेहमीच आनंद देत राहील.

नवीन सीझनमध्ये प्रेक्षकांसाठी नवीन काय आहे? त्यात काही नवीन घटक आहेत की, तोच फॉरमॅट आहे?

आपण कितीही आधुनिक झालो, आपण कितीही प्रगती केली, तरी माणसांना एकमेकांशी जोडतात, त्यांना हेलावून सोडतात त्या भावनाच असतात. CID हा शो भारतात सर्वात जास्त काळ चाललेल्या मालिकांपैकी एक आहे, कारण तो पहिल्यापासून काळाच्या पुढे होता. फॉरेन्सिक सायन्ससारखी संकल्पना आम्ही दाखल केली होती, जी गोष्ट त्याआधी फारशी ज्ञात नव्हती. उदाहरणार्थ, 2004-05 मध्ये, एका भागात नार्को-अॅनालिसिस टेस्ट दाखवली होती. त्यावेळी, लोकांना असे वाटले होते की ही गोष्ट काल्पनिक आहे. एखाद्याला इंजेक्शन देऊन, त्याच्या डोक्याला इलेक्ट्रॉड जोडून तो माणूस खरं बोलत आहे की खोटं हे कसं काय कळू शकेल? पण आज, या पद्धती सगळ्यांना माहीत झाल्या आहेत. लोकांना माहीत नसलेली प्रगत टेक्नॉलॉजी दाखवून CID ने नेहमी पुढचे पाऊल टाकले आहे. आता यापुढे, आम्हाला आणखी नाविन्यपूर्णता आणावी लागेल. लोकांना कंटेंट आवडावा यासाठी नवीन संशोधने, प्रगती आणि वेधक गोष्टी आणाव्या लागतील. आणि त्याच बरोबर CID ची ओळख असलेला त्याचा गाभा तसाच जपावा लागेल. शेवटी, ही सुद्धा माणसांच्या नात्याचीच गोष्ट आहे. लोकांना अशा गोष्टी आवडतात, ज्यामध्ये भावना असतात, नाती असतात आणि नाट्य आणि विनोद यांचे हवहवेसे क्षण असतात. लोकांच्या पसंतीस उतरण्यासाठी एक असे पॅकेज असावे लागते, ज्यामध्ये इनोव्हेशन आणि मानवी भावनांचे आकर्षण यांचे सुंदर मिश्रण असेल.

CID चा प्रेक्षकवर्ग अत्यंत ईमानदार आहे. नवीन सीझनची वाट बघणाऱ्या प्रेक्षकांसाठी तू काय संदेश देशील?

इतकी वर्षे आमच्याशी निष्ठावान राहिलेल्या आमच्या सगळ्या चाहत्यांविषयी मी मनापासून कृतज्ञता व्यक्त करतो. प्रेक्षकहो, तुमचे प्रेम आणि निष्ठा हाच या मालिकेचा प्रेरणास्रोत आहे. मला माहीत आहे की, तुम्ही या मालिकेच्या नव्या सीझनची उत्सुकतेने वाट बघत आहात. मी तुम्हाला वचन देतो, तुम्ही केलेल्या प्रतीक्षेचे फळ तुम्हाला मिळेल. तुमचा उत्साह, तुमचे मेसेजिस आणि तुमचे समर्थन यामुळे इतकी वर्षे ही मालिका चालली आणि त्यानंतरही जिवंत राहिली. नवा सीझन देखील तसाच रोमांचक आणि मनोरंजक व्हावा यासाठी आम्ही प्रयत्न केला आहे आणि आम्हाला आशा आहे की, हा सीझन देखील तुमच्या जीवनात आनंद, रहस्य आणि न्याय भावना घेऊन येईल. CID तुमच्यामुळेच परत येत आहे!

-Sharad Lonkar