शांतिदूत धर्मादाय प्रतिष्ठान आयोजित सुवर्णरत्न पुरस्कार वितरण सोहळा उत्साहात
पुणे – “प्रतिभेचा अंश दैवी असू शकतो, पण तो अंश फुलवण्यासाठी आवश्यक परिश्रम, संघर्ष आपल्याला दिसत नाहीत. झगमगाटामागे तपश्चर्या असते, हे आपण विसरता कामा नये”, असे प्रतिपादन माजी केंद्रीय मंत्री प्रकाश जावडेकर यांनी मंगळवारी येथे केले. ‘यशामागील अशा तपश्चर्येचा सन्मान सुवर्णरत्न पुरस्काराच्या निमित्ताने होतो, हे कौतुकास्पद आहे’, असेही जावडेकर म्हणाले.
शिक्षण, पर्यावरण रक्षण तसेच महिला सक्षमीकरणाच्या क्षेत्रात कार्यरत ‘शांतिदूत धर्मादाय प्रतिष्ठान’च्या वतीने आयोजित ‘सुवर्णरत्न पुरस्कार’ वितरण समारंभात ते प्रमुख पाहुणे म्हणून बोलत होते. यावेळी विविध क्षेत्रांत उत्तम कामगिरी केलेल्या मान्यवरांना सुवर्णरत्न पुरस्कार प्रदान करून गौरविण्यात आले. कोथरूड येथील यशवंतराव चव्हाण नाट्यगृहात हा सोहळा पार पडला.
पुरस्कारप्राप्त व्यक्तींमध्ये मकरंद देशपांडे (अभिनय, दिग्दर्शन, लेखन) यांना जीवनगौरव पुरस्कार प्रदान करण्यात आला. गश्मीर महाजनी (अभिनय), केतकी माटेगावकर (गायन), समिधा गुरू (अभिनय), शिव ठाकरे ( स्टाईल आयकान), वलय मुळगुंद (गीतलेखन), वनिता बोराडे (स्त्रीशक्ती पुरस्कार), सूरज खटावकर (सोशल मिडिया प्रभाव), शेफ संदीप सोनार (उद्योजक), सुयश जाधव (क्रीडा – भारतीय पॅरा जलतरणपटू), अशोक अष्टेकर (ज्वेलर्स) यांचा समावेश होता. शाल आणि मानचिन्ह असे पुरस्काराचे स्वरूप होते. पुरस्काराचे हे सहावे वर्ष होते.
यावेळी सुवर्णरत्न पुरस्कार समितीचे अध्यक्ष डॉ. सागर पौलस्ते, उपाध्यक्ष समीर पौलस्ते, शांतिदूत धर्मादाय प्रतिष्ठानचे संस्थापक जयवंत पौलस्ते, संचालिका सोनाली सागर पौलस्ते, तसेच राज्याचे माजी प्रधान सचिव नंदकुमार वडनेरे, गाडगीळ ज्वेलर्सचे संचालक पराग गाडगीळ, गायक आनंद भाटे, पं. नंदकिशोर कपोते, अभिनेत्री किशोरी शहाणे, आनंद माडगूळकर आदी मान्यवरही याप्रसंगी उपस्थित होते.
“यशामागे मेहनत, चिकाटी, जिद्द असते. पण सर्वसामान्यांना फक्त यशानंतरचा झगमगाट दिसतो. त्यासाठी त्या त्या व्यक्तीने केलेली तपश्चर्या नजरेआड राहते. सुवर्णरत्न पुरस्कारांच्या निमित्ताने अशा तपश्चर्येचा गौरव होतो, हे स्वागतार्ह आहे”, अशा शब्दांत जावडेकर यांनी या उपक्रमाचे कौतुक केले.
सुवर्णरत्न जीवनगौरव पुरस्काराने सन्मानित मकरंद देशपांडे म्हणाले, “जीवनगौरव म्हणजे थांबलेले काम, पण मी हा कामाचा नसून जीवनाचा गौरव समजतो. माणूस जीवन जगतो विंगेत आणि सादरीकरण करतो व्यासपीठावर, असे अभिनेता म्हणून मला वाटते. जगताना जे अनुभव मिळाले, ते शिकवणारे ठरले. अभिनय आपण सर्वजण करतो. आम्ही तो अधिक जाणीवपूर्वक करतो. आपल्याला जे प्रश्न पडतात, त्यांची उत्तरे खरे तर जीवनच देत असते. ती समजून घेण्यासाठी भगवद्गीता उपयोगी पडते कारण गीता प्रत्येक वयात मार्गदर्शक आहे, असे मला वाटते”.
गश्मीर महाजनी म्हणाले, ‘माझे पदार्पण याच नाट्यगृहात झाले होते. तिथेच आज हा पुरस्कार स्वीकारताना अतिशय आनंद वाटतो. मी आता निर्मितीच्या क्षेत्रातही पदार्पण करत आहे’.
शिव ठाकरे म्हणाले, ‘एका टप्प्यावर मिळालेली शाबासकी म्हणून मी या पुरस्काराकडे पाहतो’. ज्वेलर्स अशोक अष्टेकर यांनी ज्वेलरीच्या व्यवसायाच्या निमित्ताने अनेक कलाकारांसाठी दागिने घडवता आले, याचा आनंद वाटतो, अशी भावना व्यक्त केली. अभिनेत्री समिधा गुरू यांनी हा भावनात्मक क्षण असून, एका कलाकाराची नागपूर – मुंबई वाटचालीची आठवण या निमित्ताने झाल्याचे सांगितले. केतकी माटेगावकरने चित्रपटगीत सादर केले. ‘प्रत्येकाला एक बीज मिळालेले असते. ते ओळखून फुलवणे आवश्यक आहे’, असे ती म्हणाली.
पॅरा जलतरणपटू सुयश जाधव यांनी एका अपघातात दोन्ही हात गमावल्यानंतरची पॅरा आलिंपिकपटू होण्यापर्यंतची वाटचाल कथन केली. “माझ्या परिस्थितीतही मी एवढे करू शकलो, तुम्ही सारे धडधाकट आहात, तर कितीतरी करू शकता”, हे त्यांचे उद्गार उपस्थितांना अंतर्मुख करून गेले.
वलय मुळगुंद म्हणाले, ‘हा माझ्यासाठी मोलाचा व आनंदाचा क्षण आहे. मला पुढील कामासाठी ऊर्जा देणारा हा पुरस्कार आहे’. शेफ संदीप सोनार यांनी राज्य, राष्ट्रीय स्तरावरचे काम आता आंतरराष्ट्रीय स्तरावर पोहोचल्याचे सांगितले. आमच्या केटरिंग कंपनीला थेट इंग्लंडमधून मागणी आल्याचे ते म्हणाले. खाऊ घालण्याचे समाधान ही माझी पॅशन होती आणि मी पॅशन जगतो, असे ते म्हणाले. समाज माध्यमाच्या व्यासपीठावरून मला माणूस हा विलक्षण जगण्याचा प्रकार आहे, हे समजले, अशी भावना सूरज खटावकर यांनी व्यक्त केली. सर्पमित्र वनिता बोराडे यांनी सर्पविषयक गैरसमज आणि भीती दूर करण्यासाठी वैज्ञानिक दृष्टीकोनातून जगजागृती आणि प्रबोधनाचे कार्य सुरू असल्याचे सांगितले.
कार्यक्रमाचे आयोजक सागर तसेच समीर पौलस्ते यांनी आभार मानले. आपल्या कार्यक्रमाचा हेतू प्रेरणादायी असावा, असे मानून हा उपक्रम केल्याचे ते म्हणाले. प्राजक्ता मांडके यांनी सूत्रसंचालन केले. पुरस्कारादरम्यान विविध सांस्कृतिक कार्यक्रम सादर करण्यात आले.

पुणे, दि. २८: आंतरराष्ट्रीय पर्यावरण दिन ५ जूनच्या निमित्ताने पुणे पोलीस, वन विभाग, व पुणे स्थित वृक्षाथॉन फाऊंडेशन यांच्या संयुक्त विद्यमाने येत्या १ जून रोजी ‘वृक्षाथॉन- २०२५’ या मॅरेथॉन स्पर्धेचे आयोजन करण्यात आले आहे.

वृक्षाथॉनचे हे ४ थे वर्ष असून या स्पर्धेचा मुख्य उद्देश हा नागरिकांमध्ये वृक्ष लागवड व निसर्ग संवर्धन याबाबत जनजागृती व्हावी असा आहे. या स्पर्धेमध्ये देशभरातून १० हजारावर स्पर्धक सहभागी होणार आहेत. प्रत्येक सहभागी स्पर्धकास वनविभागामार्फत एक झाडाचे रोपटे देऊन त्याचे संवर्धन करण्याबाबत मार्गदर्शन करण्यात येणार आहे.

ही स्पर्धा एकूण ३ किमी, ५ किमी, १० किमी व २१ किमी (हाफ मॅरेथॉन) अशा चार प्रकारामध्ये आणि १८ ते ३० वर्षे, ३१ ते ४५, ४६ ते ६० आणि ६१ वर्ष व त्यावरील अशा चार वयोगटामध्ये आयोजित करण्यात येणार आहे. स्पर्धेमध्ये सहभागी होणाऱ्या स्पर्धकांसाठी इलेक्ट्रिक दुचाकी, इलेक्ट्रिक सायकल तसेच लाखो रुपयांची पर्यावरणपूरक पारितोषिके असणार आहेत.

या सर्व स्पर्धांची सुरूवात पोलीस मुख्यालय होऊन निश्चित मार्गाने जाऊन परत पोलीस मुख्यालय येथेच शेवट होईल.

२१ कि.मी. अर्धमॅरेथॉनचा प्रारंभ पोलीस मुख्यालय शिवाजीनगर येथे होऊन – चापेकर चौक – ई-स्क्वेअर – चतुश्रुंगी चौक – पाषाण रोड – अभिमान श्री – एनसीएल मंदिर – डिआरडीओ गेट – पाषाण सर्कल – बावधन – चांदणी चौक येथून युटर्न घेऊन परत त्याच मार्गाने पोलीस मुख्यालय शिवाजीनगर येथे शेवट होईल.

प्रत्येक स्पर्धकांस आयोजकांमार्फत टी शर्ट, बीब्ज, गॉडी बॅग, स्नॅक्स, पाण्याची बाटली देण्यात येणार असून मार्गावर ठिकठिकाणी हायड्रेशन पॉईंट लावण्यात येणार आहेत. तसेच आपत्कालीन परिस्थितीसाठी रुग्णवाहिका व वैद्यकीय पथक तसेच स्पर्धकांच्या मदतीसाठी स्वंयसेवक असणार आहेत.

स्पर्धेच्या दिवशी वाहतूक बदल करण्यात येणार असून पर्यायी वाहतूक मार्गांची माहिती कळविण्यात येईल.

पुणे शहर, पिंपरी चिंचवड व महाराष्ट्र तसेच देशभरातील पर्यावरण प्रेमी, नागरिक व धावपटू यांनी या स्पर्धेमध्ये आवर्जून सहभागी होऊन वृक्ष लागवड व निसर्ग संवर्धनासाठी आपला सहभाग नोंदवावा. सदर स्पर्धेकरीता https://www.vrukshathon.com या लिंकवर भेट देऊन नोंदणी करावी, असे आवाहन विभागीय वन अधिकारी (प्रसिद्धी व माहिती, वने) रेश्मा व्होरकाटे यांनी प्रसिद्धीपत्रकान्वये केले आहे.

पुणे, दि. २८ : महाराष्ट्र शासन सामाजिक न्याय व विशेष सहाय्य विभागामार्फत चालविण्यात येणाऱ्या मागासवर्गीय मुलींचे शासकीय वसतिगृह गोलेगाव रोड, शिरुर या संस्थेत २०२५-२६ या शैक्षणिक वर्षाकरीता प्रवेश प्रक्रिया सुरु झाली असून इच्छुक मुलींनी प्रवेश घेण्याचे आवाहन करण्यात आले आहे.

अनुसूचित जाती, अनुसूचित जमाती, विमुक्त जाती व भटक्या जमाती, इतर मागासवर्गीय, विशेष मागास प्रवर्ग, अनाथ व शारिरीकदृष्ट्या दिव्यांग आदी प्रवर्गातील विद्यार्थींनींना वसतिगृहात मोफत प्रवेश देण्यात येणार आहेत.

शासकीय वसतिगृहातील प्रवेशित विद्यार्थींनींना विनामुल्य भोजन व निवासाची व्यवस्था असून क्रमीक पुस्तके, शैक्षणिक साहित्य इत्यादी शासनाने ठरवून दिलेल्या आर्थिक मर्यादेपर्यंतची रक्कम विद्यार्थींनीच्या बँक खात्यावर जमा करण्यात येते. तसेच दरमहा निर्वाह भत्ता अदा करण्यात येतो. शिवाय विद्यार्थीनींकरीता ई-ग्रंथालय व सुसज्ज व्यायामशाळा आदी अनेक सुविधा येथे उपलब्ध आहेत.

विद्यार्थीनी बाहेरगावची परंतू शिरुर मध्ये शिक्षण घेणारी असावी. प्रवेशासाठी मागील वर्षाची गुणपत्रिका, सक्षम प्राधिकाऱ्याने दिलेले जातीचे प्रमाणपत्र, वडिलांचे उत्पन्नाचे प्रमाणपत्र, ज्या महाविद्यालयात प्रवेश निश्चित झाला आहे तेथील बोनाफाईड दाखला, अधिवास प्रमाणपत्र, आधारकार्ड (विद्यार्थीनीचे व वडीलांचे), शिधापत्रिकेची दुय्यम प्रत सोबत आणाव्यात. वसतीगृह प्रवेश प्रक्रिया https://hmas.mahaait.org या संकेतस्थळावर ऑनलाईन पद्धतीने होणार आहेत. अधिक माहितीसाठी गृहपाल मागासवर्गीय मुलींचे शासकीय वसतिगृह, गोलेगाव रोड, पुणे-नगर हायवे, शिरुर येथे संपर्क साधावा, असे आवाहन वसतिगृहाच्या गृहपाल श्रीमती ए. एस. सूर्यवंशी यांनी केले आहे.

पुणे : एरंडवणे  येथील भीम नगर झोपडपट्टी चे एसआरए अंतर्गत पुनर्वसन योजनेत झोपडपट्टी धारकांची कोणतीही फसवणूक होऊ देऊ नका, गरज पडल्यास नागरिकांना अधिकच्या सुविधा द्याव्यात किंवा संपूर्ण स्कीम रद्द करावी असे आदेश उच्च शिक्षण मंत्री चंद्रकांत पाटील यांनी झोपडपट्टी पुनर्वसन प्राधिकरण चे मुख्य कार्यकारी अधिकारी नीलेश गटणे यांना दिले आहेत. 

भीम नगर झोपडपट्टी पुनर्वसन योजनेत फसवणूक व भ्रष्टाचार झाल्याचा आरोप करत,  मूळ जागेपासून नऊ किलोमीटर लांब सक्तीचे स्थलांतर अमान्य करत झोपडपट्टी धारकांनी या विरोधात गेल्या काही दिवसांपासून आंदोलन पुकारलेले आहे.  या संदर्भात त्यांनी नुकतेच मंत्री  चंद्रकांत  पाटील यांच्या कार्यालयावर बिऱ्हाड मोर्चा नेला होता.  या बिऱ्हाड मोर्चाच्या पार्श्वभूमीवर आज चंद्रकांत पाटील व झोपडपट्टी धारकांचे  प्रतिनिधी यांची संयुक्त बैठक पार पडली.  या बैठकीत नागरिकांच्या समस्या ऐकून घेऊन कोणत्याही परिस्थितीत झोपडपट्टी धारकांची फसवणूक होणार नाही, याबाबत आपण सर्व ती काळजी घेऊ असे आश्वासन त्यांनी झोपडपट्टी धारकांना दिले. तसेच झोपडपट्टी धारकांच्या हिताच्या दृष्टिकोनातून सदर पुनर्वसन प्रक्रियेमध्ये झोपडपट्टी धारकांना अधिक लाभ देण्यात यावा अथवा फसवणूक झाली असल्यास संपूर्ण योजना रद्द करावी असे आदेश झोपडपट्टी पुनर्वसन प्राधिकरण चे मुख्य कार्यकारी अधिकारी नीलेश गटणे यांना चंद्रकांत पाटील यांनी दिले आहेत.  

मंत्री चंद्रकांत  पाटील यांनी झोपडपट्टी धारकांच्या हिताचा विचार मांडल्याने आंदोलनात बळकटी प्राप्त झाली असून झोपडपट्टी पुनर्वसन योजनेत झोपडपट्टी धारकांना फसवणूक करण्याचा इरादा ठेवणाऱ्या बिल्डरांना यामुळे चाप लागणार असल्याची भावना यावेळी रिपब्लिकन युवा मोर्चाचे राहुल डंबाळे, स्थानिक रहिवासी देविदास ओव्हाळ ,प्रभु सूनगर,  जावेद शेख दादू गायकवाड व सुनील डमरे यांनी व्यक्त केली. 

दरम्यान, या प्रश्नावर अधिक चर्चा करण्यासाठी झोपडपट्टी पुनर्वसन प्राधिकरणाचे मुख्य कार्यकारी अधिकारी यांचे दालनात शुक्रवारी  विशेष बैठकीचे आयोजन करण्यात आले असून या बैठकीत उपस्थित होणाऱ्या मुद्द्यांच्या आधारे पुढील निर्णय घेतला जाईल असे देखील ठरवण्यात आले आहे.

पुणे : केवळ हिंदुत्ववाद्यांचा अट्टाहास पुरवण्यासाठी मुस्लिम धर्मस्थळावर केली जाणारी एकतर्फी कारवाई अन्यायकारक असून अशा प्रकारच्या कारवाईला कायदेशीर विरोध केला जाईल. तसेच यासंदर्भात लवकरच आंदोलन देखील उभारले जाईल, असा स्पष्ट इशारा नॅशनल कॉन्फरन्स फॉर मायनॉरिटीच्या वतीने आज पुणे महानगरपालिका आयुक्त डॉ. राजेंद्र भोसले यांना देण्यात आला.

पुणे शहरातील विविध भागांमध्ये मज्जित, मदरसा व दर्ग्यांवर पुणे महानगरपालिकेच्या वतीने कारवाई करण्यात येत आहे.  ही कारवाई धर्मनिरपेक्षपणे केली जात नसल्याने तातडीने थांबवण्यात यावी, अशी मागणी करणारे निवेदन नॅशनल कॉन्फरन्स फॉर मायनॉरिटीच्या वतीने शिष्टमंडळाद्वारे पुणे महानगरपालिका आयुक्त डॉ. राजेंद्र भोसले यांना देण्यात आले. यावेळी नॅशनल कॉन्फरन्स फॉर मायनॉरिटीचे राष्ट्रीय अध्यक्ष राहुल डंबाळे, माजी नगरसेवक अॅड. आयुब शेख, माजी नगरसेवक रफिक शेख,गफूर पठाण   काँग्रेस पक्षाचे नेते महबूब शेख यांच्यासह मोहसिन शेख,रफीक शेख, महबूब नदाफ,जावेद खान, शहाबुद्दीन शेख, जावेद शेख, किसान जाफरी, रॉय शेख इत्यादी प्रतिनिधी उपस्थित होते.

दरम्यान, शहरांमध्ये दहा हजार पेक्षा अधिक धार्मिक स्थळे अनधिकृत आहेत. मात्र केवळ मुस्लिम धर्मस्थळावरच कारवाई करणे ही कायद्यातील असमानता दर्शवणारी बाब असून हा मुस्लिमांवरील धार्मिक अत्याचार असल्याने तो तातडीने थांबवण्यात यावा अशी भूमिका राहुल डंबाळे यांनी मांडली आहे.

तसेच सर्वोच्च न्यायालय व राज्य शासनाच्या निर्देशानुसार नियमित होणाऱ्या धार्मिक स्थळांना नियमित करावे व कोणत्याही  धार्मिक स्थळांवर कारवाई करू नये; अशी भूमिका ज्येष्ठ नगरसेवक आयुब शेख यांनी मांडली

देशात तणावाची परिस्थिती असताना संपूर्ण देश धार्मिक शक्ती विरोधात एकत्रित येत आहे. असे असताना भारतीय जनता पक्ष मात्र धार्मिक ध्रुवीकरणाचे राजकारण करत असेल व त्यासाठी ते मंदिर – मशीद असा वाद करत असतील तर ते निंदाजनक असल्याचे रफिक शेख यांनी सांगितले

तर कारवाई करताना कोणताही धर्म न पाहता कारवाई करणे अपेक्षित असताना; प्रशासन मात्र अत्यंत चुकीची भूमिका घेत कारवाई करत आहे. या विरोधात प्रसंगी न्यायालयीन लढाई देखील लढली जाईल अशी माहिती यावेळी महबूब नदाफ यांनी घेतली आहे.

पुणे- रेल्वे प्रवाशांच्या सुरक्षेसाठी आलेला 100 कोटीचा निधी गेला कुठे? असा सवाल करत आज येथे शिवसेनेने आंदोलन केले. याप्रसंगी पुणे शहरप्रमुख संजय मोरे, गजानन थरकुडे, राज्य संघटक वसंत मोरे, उत्तम भुजबळ, राजेश मोरे, अनिल परदेशी, किशोर रजपूत, रुपेश पवार, महिला आघाडी निवडणूक समन्वयक विद्या होडे, ज्योती चांदेरे, रोहिणी कोल्हाळ, सविता गोसावी, विजया बेंगळे, नसीम कांबळे, पार्वती कांबळे, संपदा कांबळे, योगेश इंगुळकर, पंकज बरिदे, सागर गंजकर, संजय व्हालेकर, अजय परदेशी, गिरीश गायकवाड, मनीष सिंग, संजय लोहोट, राहुल शेडगे, संतोष होडे, बंडूनाना बोडके, नागेश खडके, किशोर रजपूत, जुबेर शेख, नितिन निगडे, विजय पालवे, अभिषेक जगताप, दत्तात्रय घुले, प्रकाश पुजारी, विजय रावडे, मिलिंद पत्की, अजय परदेशी, प्रवीण रणदिवे साहिल पिरजादे, जुबेर तांबोळी, संतोष गवळी, महेश मोरे, सागर लांडगे, संतोष बनसोडे, नितीन जगताप, नितीन शेलार, जयवंत गिरी, मेजर खोमणे, मंगेश रासकर, मोहन पांढरे अशोक रसाळ आदी शिवसैनिक सहभागी झाले होते. आंदोलनानंतर रेल्वे व्यवस्थापक राजेश वर्मा यांच्यासोबत झालेल्या चर्चेनुसार त्यांनी सर्व जुने 59 कॅमेरे हे निकामी असल्याचे मान्य केले. आम्ही 30 जून पर्यंत सर्व 166 नवीन सीसी टीव्ही कॅमेरा बसवून घेणार आहोत. तसेच स्कॅनिंग मशीन लावून घेउ. प्रवाशांच्या सुरक्षेसाठी जीआरएफ व लोहमार्ग पोलीस यांची कुमक तैनात करू. प्रवाशांना वेटींगसाठी आणखी जागा उपलब्ध करून देउ. अशी अनेक आश्वासन दिली आहेत.
यासर्व मागण्या पूर्ण केल्या नाहीतर रेल रोको आंदोलन करणार असल्याचे शिवसेनेच्या वतीने सांगितले.

यावेळी शिवसेना शहर प्रमुख संजय मोरे म्हणाले,’ पुणे रेल्वे स्टेशनला लाखो प्रवासी रेल्वेने ये जा करत असतात. त्या सर्व प्रवाशांच्या सुरक्षित प्रवासाची जबाबदारी रेल्वे प्रशासनाची आहे. परंतु रेल्वे प्रशासन याबाबत उदासीन असल्याचे निदर्शनास येते. आताची रेल्वे स्टेशनची परिस्थिती ‘आओ जाओ घर तुम्हारा’ अशी झालेली आहे. आम्ही आमच्या पक्षाच्या माध्यमातून प्रवाशांच्या सुरक्षेचे संदर्भात अनेक निवेदनं दिली व आंदोलन सुद्धा केले. त्यावेळी आम्हाला त्या वेळेचे डी आर एम दुबे मॅडम यांनी दिनांक 23 मार्च 2023 रोजी सांगितले होते की लवकरच रेल्वे बोर्डाकडून पुणे रेल्वे स्टेशन येथे 120 सीसी कॅमेरे बसविण्यात येणार आहेत. परंतु आत्तापर्यंत कुठेही सीसी कॅमेरे लावलेले नाही. याचा अर्थ रेल्वे प्रशासन सुरक्षिततेच्या बाबतीत चालढकल करीत आहे. असे आमच्या निदर्शनास येत आहे. पुणे रेल्वे स्टेशन येथे येणाऱ्या प्रवाशांच्या सुरक्षितते संदर्भातील मागण्या रेल्वे प्रशासनाने त्वरित मान्य कराव्यात, अन्यथा शिवसेना (उद्धव बाळासाहेब ठाकरे) पक्षाच्या वतीने तीव्र स्वरूपाचे आंदोलन करण्यात येईल. असे आपणास 27 मार्च 2025 रोजी समक्ष भेटून दिलेल्या पुणे रेल्वे प्रवाशांच्या सुरक्षततेबाबतच्या मागण्यांचे निवेदनात नमूद केले होते.

दिल्ली रेल्वे बोर्डाकडून 100 कोटींचा निधी सन 2023 मधे नवीन 120 सीसी टीव्ही कॅमेरे बसविण्यासाठी व सुरक्षा यंत्रणांना प्रवाशांच्या सुरक्षेसाठी आला होता. त्याचे काय झाले व त्या निधीचे काय केले ? याचे उत्तर आजतागायत आपणाकडून जाहिर केले नाही. जुन्या झालेल्या 59 सीसी टिव्ही ऐवजी नवीन अत्याधुनिक यंत्रणा असलेले 120 सीसी टिव्ही बसविण्याचे जाहिर केले होते. नवीन अत्याधुनिक यंत्रणेचे सीसी टिव्ही लावले गेले नाहीतच. पण 100 कोटीच्या निधीचा अपहार झाल्याचा संशय आपल्या उदासीनतेमुळे सर्वसामान्य जनतेमधे निर्माण झाला आहे. हे मात्र नक्की. हा भ्रष्टाचार शिवसेना सहन करणार नाही. आमच्या लेखी प्रवाशांची सुरक्षा महत्वाची आहे. काही काही घटना घडल्यानंतर पश्चात्ताप करून उपयोग नाही. वेळीच उपाययोजना करणे महत्वाचे आहे. म्हणून आम्ही सातत्याने प्रवाशांच्या सुरक्षेविषयी भूमिका मांडत आहोत. परंतू रेल्वे प्रशासन ऐकून घेण्याच्या व कार्यवाही करण्याच्या भूमिकेत नाही. उदासीन आहे. असेही मोरे यांनी यावेळी सांगितले.

पुणे, दि. २८: विभागीय माहिती कार्यालय पुणे आणि पुणे श्रमिक पत्रकार संघाच्या संयुक्त विद्यमाने पत्रकार भवन येथे माध्यम प्रतिनिधींना पत्रकारांसाठी असलेल्या शासनाच्या विविध योजनांची माहिती देण्यासाठी विकास पत्रकारिता कार्यशाळेचे आयोजन करण्यात आले.

यावेळी राज्य अधिस्वीकृती समिती सदस्य एस. एम. देशमुख, स्वप्नील बापट, शरद पाबळे, विभागाचे माहिती उपसंचालक डॉ.किरण मोघे, पुणे विभागीय अधिस्वीकृती समितीचे अध्यक्ष हरिष पाटणे, पुणे सदस्य सुनीत भावे, चंद्रसेन जाधव, पुणे पत्रकार संघाचे खजिनदार शिवाजी शिंदे, सरचिटणीस मीनाक्षी गुरव आदी उपस्थित होते.

डॉ. मोघे म्हणाले, माहिती व जनसंपर्क विभागाच्या संकेतस्थळावर पत्रकारांसाठीच्या योजनांची माहिती देण्यात आली आहे. प्रत्यक्ष पत्रकारांशी संवाद साधून त्यांच्यापर्यंत या योजना पोहोचविण्यासाठी या कार्यशाळेचे आयोजन करण्यात आले. विकास पत्रकारिता वास्तवाचा स्वीकार करणे, विश्लेषण करणे, मूल्यांकन करणे आणि सामाजिक जबाबदारी या चार पैलूंवर आधारीत आहे. अशा पत्रकारितेला प्रोत्साहन देण्यासाठी राज्य शासनातर्फे विकास पत्रकारिता पुरस्कार देण्यात येतात. यासोबतच पत्रकारांसाठी शासनाने विविध योजना सुरू केल्या आहेत.

स्व. शंकरराव चव्हाण पत्रकार कल्याण निधीतून विविध आजारांवरील उपचारांसाठी अधिस्वीकृतीधारक पत्रकारांना, त्यांच्यावर अवलंबून असणारे पती/पत्नी आणि दोन मुलांनाही १५ हजारापासून ते १ लाख रुपयांपर्यंत मदत मिळते. तसेच केंद्र शासनाच्या पत्रकार कल्याण योजनेअंतर्गतही अधिस्वीकृतीधारक पत्रकार आणि किमान ५ वर्षे पत्रकारिता करणाऱ्या पत्रकारांना अर्थसहाय्य करण्यात येते, अशी माहिती त्यांनी दिली. डॉ.मोघे यांनी आचार्य बाळशास्त्री जांभेकर पत्रकार सन्मान योजना आणि अधिस्विकृती संबंधितच्या नियमावलीचीही माहिती दिली. या योजनांचा लाभ घेण्याचे आवाहन त्यांनी केले. पत्रकारांना योजनांचा लाभ देण्यासाठी माहिती विभागाची नेहमीच सकारात्मक भूमिका राहील, असेही डॉ.मोघे म्हणाले.

एस. एम. देशमुख म्हणाले, बहुसंख्य पत्रकारांना आपल्या लाभाच्या योजनाची माहिती नसल्याने योजनांपासून वंचित राहत होते. त्यामुळे माहिती व जनसंपर्क विभागाने या योजनांच्या माहितीची पुस्तिका काढून त्याचे वितरण करावे. शासकीय योजनांचा अधिकाधिक पत्रकारांना लाभ व्हावा यासाठी शासनाकडे राज्य अधिस्विकृती समितीच्या माध्यमातून पाठपुरावा करण्यात येत आहे. अधिस्वीकृतीसाठी आपण कोणत्या संवर्गात पात्र ठरतो याचा अभ्यास करुन पत्रकारांनी अर्ज केल्यास अधिस्वीकृती मिळण्याची कार्यवाही लवकर होते, असेही ते म्हणाले. पत्रकारांना शासकीय योजनांची माहिती देण्यासाठी अशा कार्यशाळा उपयुक्त असून कार्यशाळेचे आयोजन प्रत्येक जिल्ह्यात व्हावे, असे आवाहन त्यांनी केले.

पत्रकार सन्मान योजनेंतर्गत प्रति लाभार्थी दरमहा ११ हजार रुपये सन्मान निधी देण्यात येतो. देशात इतकी मोठी रक्कम देणारी योजना राबविणारे इतर कोणतेही राज्य नाही. सन्मान योजनेचा लाभही अधिकाधिक पत्रकारांना मिळावा यादृष्टीनेही प्रयत्न होत आहेत. पत्रकारांनी योजनेची माहिती जाणून घ्यावी आणि अधिकाधिक अर्ज करावेत. त्याचा अधिकाधिक पत्रकारांना लाभ व्हावा यासाठी प्रयत्न व्हावेत, असेही ते म्हणाले. यावेळी श्री. देशमुख यांनी अधिस्वीकृतीसाठीचा वरिष्ठ पत्रकार संवर्ग, कोटा पद्धती, अर्जासोबत जोडावयाची कागदपत्रे आदींची माहिती देऊन याबाबत पुणे अधिस्वीकृती समितीकडून चांगला पुढाकार घेतल्याचे नमूद केले.

श्री. पाटणे म्हणाले, ग्रामीण भागातील पत्रकारांना अधिस्वीकृती पत्रिका आणि अन्य योजनांची माहिती नसल्याने त्यांच्याकडून अर्ज येत नाहीत. मात्र गेल्या दीड वर्षात पुणे विभागीय अधिस्वीकृती समितीच्यावतीने पत्रकारांना माहिती देण्यात आल्याने त्याचे सकारात्मक परिणाम दिसून आले आहेत, त्यामुळे ग्रामीण पत्रकारांना या सुविधेचा लाभ देता आला. अर्जाची काटेकोर तपासणी केली जातेच परंतु अर्जात काही त्रुटी असल्यास समितीकडून त्रुटी दूर होण्यासाठी आवश्यक मार्गदर्शन केले जाते. लवकरच सातारा येथेही अशी कार्यशाळा घेण्यात येईल, असे त्यांनी सांगितले.

प्रास्ताविकात श्री. भावे यांनी पत्रकारांसाठीच्या योजनांची पत्रकारांना माहिती असणे आवश्यक असून त्यासाठी पुणे श्रमिक पत्रकारसंघाने पुढाकार घेऊन कार्यशाळेचे आयोजन केल्याचे सांगितले.

यावेळी उपस्थित पत्रकारांच्या शंकांना उत्तरे देण्यात आली. विविध वृत्तपत्रांचे, प्रसारमाध्यमांचे प्रतिनिधी कार्यशाळेस उपस्थित होते.