पुणे, : नगरपरिषद व नगरपंचायत सार्वत्रिक निवडणूक २०२५ शांततेत, निर्भय आणि न्याय्य वातावरणात पार पाडण्याच्यादृष्टीने पुणे जिल्हाधिकारी तथा जिल्हादंडाधिकारी जितेंद्र डूडी यांनी भारतीय नागरीक सुरक्षा संहिता, २०२३ चे कलम १६३ अन्वये आदेश जारी केले आहेत, सदरचे आदेश ३ डिसेंबर २०२५ पर्यंत अंमलात राहणार असल्याचे आदेशात नमूद करण्यात आले आहे.

राजकीय पक्षांनी, निवडणूक लढविणाऱ्या उमेदवारांनी किंवा त्यांच्या प्रतिनिधीनी किंवा त्यांच्या हितचिंतक, मुद्रणालयाचे मालक व इतर सर्व माध्यमाद्वारे छपाई करणाऱ्या मालकाने तसेच प्रकाशकाने नमुना मतपत्रिका छापतांना पुढील बाबीवर निर्बंध घालण्यात येत आहेत. यामध्ये इतर उमेदवाराचे नाव व त्यांनी नेमून देण्यात आलेले चिन्ह वापरणे, आयोगाने निश्चित केल्याप्रमाणे नमूना मतपत्रिकेसाठी कागद वापरणे तसेच कागदाच्या आकारामध्ये नमुना मतपत्रिकेची छपाई करणे.

निवडणूक निर्णय अधिकारी, सहायक निवडणूक निर्णय अधिकारी, जिल्हाधिकारी कार्यालय, सर्व उपविभागीय अधिकारी कार्यालये, सर्व तालुका दंडाधिकारी कार्यालये आणि सर्व शासकीय, निमशासकीय कार्यालय व विश्रामगृह या ठिकाणी कोणत्याही प्रकारची मिरवणूक, सभा घेणे, मोर्चा काढणे, उपोषण करणे, कोणत्याही प्रकारच्या घोषणा देणे, वाद्य वाजविणे किंवा गाणी म्हणने इत्यादी. तसेच कोणत्याही प्रकारचा निवडणूक प्रचार करणे या बाबी करण्यास बंदी घालण्यात आली आहे.

स्थानिक स्वराज्य संस्थाच्या निवडणूक प्रचाराचे साहित्य, सार्वजनिक इमारतीचे ठिकाणी, सार्वजनिक रस्त्यावर निवडणूकी संबंधी पोर्स्टस, बॅनर्स, पॉम्प्लेटस, कटआऊटस, होर्डिंग्ज , कमानी आदी रहदारीस अडथळा निर्माण होईल व अपघात होईल अशा पध्दतीने लावण्यावर निर्बंध घालण्यात येत आहे. कोणत्याही राजकीय पक्षानी, निवडणूक लढविणा-या उमेदवारांनी, किंवा त्यांच्या प्रतिनिधींनी निवडणूक प्रचारासाठी १० पेक्षा अधिक मोटार गाड्या, वाहनांचा ताफ्याचा वापर करण्यावर निर्बंध घालण्यात येत आहे.

निवडणूक प्रचारासाठी ध्वनीक्षेपकाचे वापरावरील निर्बंध: कोणतीही व्यक्ती, संस्था, पक्ष, कार्यकर्ते यांनी ध्वनीक्षेपकाचा वापर पोलीस अधिकाऱ्यांच्या परवानगी शिवाय करता येणार नाही. सकाळी ६ वाजण्यापूर्वी आणि रात्री १० वाजेनंतर कोणत्याही फिरत्या वाहनावर व कोणत्याही क्षेत्रात ध्वनीक्षेपणाचा वापर करता येणार नाही तसेच प्रचाराकरीता ध्वनी क्षेपकाचा वापर विशिष्ट ठिकाणी थांबूनच करावा, फिरणाऱ्या वाहनास रस्त्यावरुन धावत असतांना ध्वनीक्षेपकाचा वापर करता येणार नाही. सर्व राजकीय पक्ष आणि उमेदवार व इतर व्यक्तींनी निश्चित ठिकाणी ध्वनीक्षेपकाच्या वापरासंबंधीच्या परवानगीबाबत माहिती जिल्हादंडाधिकारी, संबंधित निवडणूक निर्णय अधिकारी व संबंधित यंत्रणेस कळविणे बंधनकारक राहील.

प्रचाराकरिता वापरण्यात येणाऱ्या वाहनांवर पक्ष प्रचाराचे फलक लावणे, झेंडे लावणे आदीबाबत निर्बंध: फिरत्या वाहनांवर पक्ष प्रचाराचा झेंडा हा वाहनाच्या डाव्या बाजूला विंड स्क्रिन ग्लासच्यापुढे राहणार नाही आणि तो त्यावाहनाच्या टपापासून २ फुट उंधी पेक्षा जास्त राहणार नाही. प्रचाराच्या फिरत्या वाहनांवर कापडी फलक वाहन चालकाच्या आसनामागे वाहनाच्या डाव्या व उजव्या बाजूने लावण्यात यावा, इतर कोणत्याही बाजुस लावू नये. वाहनावर लावायचा पक्ष प्रचाराचा झेंडा किंवा कापडी फलक संबंधित पक्षाचे जिल्हाध्यक्ष उमेदवार, प्रतिनिधी, निवडणूक प्रचारासाठी निवडणूक निर्णय अधिकारी यांच्याकडून अधिकृत परवानगी घेतलेल्या वाहना व्यतिरिक्त इतर कोणत्याही वाहनांवर लावता येणार नाही.

या आदेशाचे उल्लंघन करणाऱ्या कोणत्याही व्यक्तीवर भारतीय न्याय संहिता २०२३ मधील कलम २२३ तसेच इतर प्रचलित कायद्यांन्वये शिक्षेस पात्र राहील, असेही जिल्हादंडाधिकारी श्री. डुडी यांनी आदेशात स्पष्ट केले आहे.

पुणे: “ज्ञानेश्वर माऊलींचा सहिष्णुतेचा संदेश जगाला सुख, समाधान आणि शांती मार्ग दाखवित आहे.  या भूमीमध्ये  प्रा. डॉ. विश्वनाथ दा कराड  यांनी वारकरी संप्रदायाच्या माध्यमातून सहिष्णुतेचा संदेश जगाच्या कानाकोपऱ्यात पोहचविण्याचे कार्य केले आहे. ” असे विचार साहित्य व संस्कृती महामंडळाचे अध्यक्ष डॉ. सदानंद मोरे यांनी व्यक्त केले.
विश्वशांती केंद्र (आळंदी), माईर्स एमआयटी, पुणे, भारत व श्री क्षेत्र आळंदी-देहू परिसर विकास समिती यांच्या संयुक्त विद्यमाने ‘श्री संत ज्ञानेश्वर-तुकाराम ज्ञानतीर्थ’, विश्वरूप दर्शन मंच, श्रीक्षेत्र आळंदी येथे संत शिरोमणी तत्वज्ञ श्री ज्ञानेश्वर माऊली यांच्या ७२९ व्या संजीवन समाधी सोहळ्यानिमित्ताने लोकप्रबोधन पर आयोजित करण्यात आलेल्या जागतिक सहिष्णुता सप्ताहाच्या रौप्य महोत्सवी वर्षाच्या उद्घाटन प्रसंगी ते बोलत होते.
यावेळी श्री क्षेत्र भंडारा डोंगर ट्रस्टचे अध्यक्ष बाळासाहेब काशीद, आळंदी नगरपरिषदेच्या माजी नगराध्यक्षा वैजयंतीताई उमरगेकर, पिंपरी चिंचवड मनपाचे माजी नगरसेवक विक्रांत लांडे, आळंदी नगरपरिषदेचे माजी नगराध्यक्ष सुरेश काका वडगावकर, हभप आदिनाथ महाराज फपाळ, हभप बुट्टे पाटील महाराज,  नंदकुमार वडगावकर, विठ्ठलराव काळोखे, बाळासाहेब काळोखे, रमेश काळोखे हे प्रमुख पाहुणे म्हणून उपस्थित होते. तसेच श्री क्षेत्र आळंदी-देहू परिसर विकास समितीच्या समन्वयक प्रा. स्वाती कराड चाटे आणि सौ. उषा विश्वनाथ कराड उपस्थित होत्या.
डॉ. सदानंद मोरे म्हणाले,”प्रा. डॉ. विश्वनाथ कराड यांची  विश्वशांती केंद्र स्थापनेमागची दृष्टी वारकरी संप्रदाय, महाराष्ट्र किंवा देशापुरती मर्यादित नसून संपूर्ण जगाला शांततेचा मार्ग दाखवणे ही आहे. या उद्देशाने ते अविरत कार्य करीत आहेत. त्यांनी ज्या पद्धतीने संस्थांची निर्मिती केली आहे त्या संस्थांमध्ये जागतिक पातळीवर शांतता निर्माण करण्यासाठी हातभार लावण्याचे सामर्थ्य आहे.”
प्रा. स्वाती कराड चाटे म्हणाल्या,”जागतिक सहिष्णुता सप्ताहाचे हे रौप्य महोत्सवी वर्ष आहे. या माध्यमातून समाज निमिर्तीसाठी पवित्र तीर्थक्षेत्रांचे खऱ्या अर्थाने ज्ञानतीर्थ क्षेत्रांमध्ये परिवर्तन घडविण्याचा लोकशिक्षणाचा अभिनव उपक्रम सर्वच समाजासाठी राबविला जात आहे. समाजाने संतांच्या विचारांवर चालावे आणि विद्यार्थ्यांनीही यातून शिकावे हा यापाठीमागचा उद्देश आहे.”

यावेळी श्री क्षेत्र भंडारा डोंगर ट्रस्टचे अध्यक्ष बाळासाहेब काशीद यांनीही आपले विचार मांडले.
हभप शालीकराम खंदारे यांनी सूत्रसंचालन केले व महेश महाराज नलावडे यांनी आभार मानले.

पुणे- मकोका लावल्यावर फरार झालेल्या आरोपीचा मागोवा काढत ट्रॅव्हल्सच्या बस अड्ड्यावर शोध घेत नंतर ट्रॅव्हल्सच्या बसचा पाठलाग करत या आरोपीला पुणे पोलिसांनी पकडले अजय युवराज कसबे, वय-२४, रा-भिमज्योत मित्र मंडळ, लक्ष्मीनगर, येरवडा, पुणे असे या आरोपीचे नाव आहे.

पोलिसांनी दिलेली माहिती अशी कि,’येरवडा पोलीस स्टेशन गु.र.नं.४३६/२०२५ भारतीय न्याय संहिता २०२३ कलम ११८ (२) (३) (५) सह भारतीय हत्यार कायदा ४, २५ सह महाराष्ट्र पोलीस अधिनियम ३७ (१) (ब), १३५, क्रिमीनल लॉ अमेंडमेंट ३, ७. महाराष्ट्र संघटीत गुन्हेगारी नियंत्रण अधिनियम ३ (१) (२), ३(२), ३(४) अन्वये गुन्हा दाखल झाला होता. या गुन्ह्यातील आरोपी हे मकोका अंतर्गत कारवाई झालेनंतर फरार झाला होता . या आरोपींना तात्काळ ताब्यात घेणेबाबत वरीष्ठांनी सुचना दिल्या होत्या.
या सुचनांच्या अनुषंगाने पोलीस उपायुक्त, परिमंडळ ०४, सोमय मुंडे, सहा. पोलीस आयुक्त, येरवडा विभाग प्रांजली सोनवणे यांनी देखील सुचना केल्या होत्या त्यानुसार वरीष्ठ पोलीस निरीक्षक अंजुम बागवान यांचे मार्गदर्शनाखाली तपास पथकाचे पोलीस अंमलदार शैलेश वाबळे यांनी आरोपीचा मोबाईल क्रमांक तांत्रिक विश्लेषनातुन मिळवुन त्या आधारे आरोपी हा वारंवार मोबाईल क्रमांक, वास्तव्य व ओळख लपवुन वावरत असल्याने तसेच श्रेणी पोलीस उप निरीक्षक प्रदिप सुर्वे यांना त्यांचे बातमीदारामार्फत बातमी मिळाली की संबधित आरोपी पुणे सोलापुर रोड मार्गे मुळ गावी पळुन जाण्याचे तयारीत आहे तेव्हा तपास पथकाचे सहप्रभारी प्रदिप सुर्वे, पोलीस अंमलदार जायभाय, कांबळे, शिंदे यांनी मिळालेल्या बातमीच्या ठिकाणी जाऊन सापळा रचुन पाळत ठेवली .तिथे आरोपी हा खाजगी ट्रव्हल्स मधुन गावी जात असल्याबाबत माहिती मिळाली परंतु त्याठिकाणी खाजगी ट्रॅव्हल्सची संख्या जास्त असल्याने आरोपी शोधणे कठीण होते. आरोपीच्या शोधार्थ प्रत्येक ट्रॅव्हल्सची तपासणी सुरु असताना माहिती मिळाली की काही वेळापुर्वीच सोलापुरचे दिशेने २-३ टॅव्हल्स या निघुन गेल्या आहेत अशी माहिती मिळाताच त्याबाबत खातरजमा करणेकरीता तपास पथकातील नमुद अधि/कर्मचारी यांनी त्यांचेजवळील कारने भरधाव वेगाने २० ते २५ किमी गाडीचा पाठलाग करुन सदर ट्रॅव्हल्सला थांबवुन तपासणी करत असताना एका ट्रॅव्हल्स मध्ये सगळे प्रवासी तपासकामी सहकार्य म्हणुन खाली उतरले परंतु एका सीटवरील प्रवासी हा आपली ओळख लपवुन सीट खाली लपत असताना मिळुन आला. त्याचे जवळ जाण्याचा प्रयत्न केला असता तो झटापट करुन पळून जाण्याचे तयारीत असताना त्यास शिताफीने ताब्यात घेतले त्यास त्याचे नाव पत्ता विचारले असता त्याने त्याचे नाव अजय युवराज कसबे, वय-२४, रा-भिमज्योत मित्र मंडळ, लक्ष्मीनगर, येरवडा, पुणे असे असल्याचे सांगितले. या आरोपीस पुढील करावाईसाठी येरवडा पोलीस स्टेशन येथे आणले असुन पुढील तपास सहा. पोलीस आयुक्त प्रांजली सोनवणे हे करत आहेत.
सदरची कामगिरी पोलीस आयुक्त अमितेश कुमार, पोलीस सह आयुक्त रंजनकुमार शर्मा, अप्पर पोलीस आयुक्त, पुर्व प्रादेशिक विभाग मनोज पाटील, पोलीस उपायुक्त, परिमंडळ ०४ सोमय मुंडे,सहा. पोलीस आयुक्त प्रांजली सोनवणे,वरीष्ठ पोलीस निरीक्षक अंजुम बागवान, पोलीस निरीक्षक विजय ठाकर, यांचे मार्गदर्शनाखाली तपास पथकाचे प्रभारी फौजदार महेश फटांगरे, सहप्रभारी प्रदिप सुर्वे, पोलीस हवालदार शिंदे, कोकणे, वाबळे, जायभाय, सोगे, कांबळे, सुतार, जाधव, अडकमोल, गायकवाड, निलख यांनी केली आहे.

पुणे: धायरी येथील धारेश्वर विद्या व क्रीडा प्रतिष्ठान संस्थेतील विद्यार्थिनींनी राज्यस्तरीय व राष्ट्रीय स्तरावरील स्पर्धेत सुवर्ण कामगिरी करून संस्थेच्या रौप्यमहोत्सवी वर्षात संस्थेचे आणि पुण्याचे देशभर उज्ज्वल केले आहे. रायगड येथे झालेल्या राज्यस्तरीय शालेय कुस्ती स्पर्धेत ६९ किलो वजनी गटात कोमल मानकर हिने सुवर्णपदक पटकविले, तर गाझियाबाद येथे झालेल्या राष्ट्रीय शूटिंग बॉल स्पर्धेत स्वामिनी सोनवणे हिने सांघिक कामगिरीत सुवर्णपदक मिळवले. उत्कृष्ट कामगिरीच्या जोरावर कोमल मानकर आता गोरखपूर (उत्तरप्रदेश) येथे होणाऱ्या राष्ट्रीय कुस्ती स्पर्धेत महाराष्ट्राचे प्रतिनिधित्व करणार आहे. 

कोमल मानकर व स्वामिनी सोनावणे या दोन्ही सुवर्णकन्यांचा सत्कार संस्थेचे अध्यक्ष सोपान उर्फ काकासाहेब चव्हाण व संचालक अनिकेत चव्हाण यांच्या हस्ते करण्यात आला. यावेळी संस्थेचे अन्य पदाधिकारी, मुख्याध्यापक व शिक्षकवृंद उपस्थित होता. कोमलने अतिशय दमदार आणि कौशल्यपूर्ण खेळ करत हे यश मिळवले आहे, तर राष्ट्रीय स्तरावर संस्थेचे व महाराष्ट्राचे नाव उंचावणारी कामगिरी स्वामिनीने केली आहे. 

काकासाहेब चव्हाण म्हणाले, “संस्थेच्या रौप्यमहोत्सवी वर्षात या विद्यार्थिनींनी केलेली सुवर्ण कामगिरी संस्थेसाठी अभिमानास्पद क्षण आहे. या यशामागे खेळाडू, त्यांच्या कुटुंबियांचा आणि क्रीडा शिक्षकांचा मोलाचा वाटा आहे. संस्थेच्या या दोन्ही सुवर्णकन्यांनी दाखवलेली जिद्द, मेहनत आणि यश हे आगामी पिढ्यांसाठी प्रेरणादायी ठरणार आहे.”

अनिकेत चव्हाण यांनी सांगितले की, “लवकरच आपल्या परिसरात आधुनिक ‘स्पोर्ट्स कॉम्प्लेक्स’ उभारण्यात येणार असून, यामुळे धायरी व सिंहगड रोड परिसरातील अनेक नवोदित खेळाडूंना उत्तम दर्जाचे प्रशिक्षण मिळणार आहे.”

पुणे- राष्ट्रवादी काँग्रेसच्या नेत्या रुपाली पाटील ठोंबरे यांच्या विरोधात पुणे शहरातील खडक पोलिस ठाण्यात बेकायदेशीर जमाव जमवल्याप्रकरणी गुन्हा दाखल करण्यात आला आहे. रुपाली पाटील यांची बहीण आणि अन्य तीन जणांवर खडक पोलिस ठाण्यात गुन्हा दाखल झाल्यानंतर त्या संतापल्या होत्या आणि याच गुन्ह्याचा जाब विचारण्यासाठी त्या पोलिस ठाण्यात गेल्या होत्या.पोलिस ठाण्यात गेल्यानंतर रुपाली पाटील ठोंबरे यांनी थेट वरिष्ठ पोलिस निरीक्षक शशिकांत चव्हाण यांच्यासोबत अरेरावी करण्याचा प्रयत्न केला, तसेच उपस्थित पोलिसांवरही त्या संतापल्या असा त्यांच्यावर आरोप आहे . या संपूर्ण प्रकारानंतर पोलिसांनी शासकीय कामात अडथळा आणि बेकायदेशीर जमाव जमवल्याच्या आरोपावरून पोलिसांनी रुपाली पाटील ठोंबरे यांच्या विरोधात गुन्हा दाखल केला आहे.

माधवी खंडाळकर नावाच्या महिलेने रुपाली पाटील यांच्या विरोधात सोशल मीडियावर पोस्ट लिहिली होती. याचा राग मनात धरून रुपाली पाटील यांच्या बहिणीने आपल्याला मारहाण केल्याचा व्हिडिओ माधवी खंडाळकर हिने व्हायरल केला होता. जरी नंतर गैरसमजातून हे घडल्याचे तिने सांगितले असले, तरी माधवी खंडाळकर हिने खडक पोलिस ठाण्यात तक्रार दाखल केल्यानंतर रुपाली पाटील यांच्या बहिणीसह अन्य तीन जणांवर खडक पोलिस ठाण्यात गुन्हा दाखल करण्यात आला होता .

या घटनेनंतर रुपाली पाटील यांच्या बहिणीनेही माधवी खंडाळकर यांच्याविरोधात तक्रार दाखल केली असून, त्यांच्यावरही गुन्हे दाखल झाले आहेत. महत्त्वाचे म्हणजे, रुपाली पाटील ठोंबरे यांनी या संपूर्ण वादामागे महिला आयोगाच्या अध्यक्षा रूपाली चाकणकर यांचा हात असल्याचा थेट आरोप केला आहे.माधवी खंडाळकरने रुपाली ठोंबरे पाटील यांच्या विरोधात आक्षेपार्ह पोस्ट लिहिली होती. त्यानंतर ती पोस्ट डिलीट करण्यात आली. मात्र, त्या बदल्यात रुपाली पाटलांच्या बहिणीने हल्ला केल्याचा आरोप खंडाळकरने केला होता. त्यावरून हे संपूर्ण प्रकरण घडले आहे.