पुणे : जागतिक स्तरावर प्रसिद्ध असलेल्या वंध्यत्व, एंडोस्कोपिक शस्त्रक्रिया तज्ज्ञ तसेच रुबी हॉलक्लिनिकच्या हॉस्पिटलच्या विभाग प्रमुख स्त्रीरोगतज्ज्ञ डॉ. सुनीता तांदुळवाडकर यांची ‘फेडरेशन ऑफ ऑब्स्टेट्रिक्स अँड गायनॅकोलॉजिकल सोसाईटीज ऑफ इंडिया’ (FOGSI) च्या ६३ व्या अध्यक्षपदी नियुक्ती करण्यात आली आहे. नुकत्याच मुंबईत पार पडलेल्या अखिल भारतीय स्त्रीरोग आणि प्रसूतीशास्त्र परिषदे मध्ये त्यांच्या नियुक्तीची घोषणा करण्यात आली.

आपल्या निवयक्तीविषयी डॉ. तांदुळवाडकर म्हणाल्या, “भारतातील २७७ सोसायट्यांमधील ४६,००० हून अधिक प्रसूती आणि स्त्रीरोग तज्ञांचे प्रतिनिधित्व करणाऱ्या फोग्सी सारख्या महत्त्वपूर्ण संस्थेचं नेतृत्व करणे ही एक खूप मोठी गोष्ट आहे. या अध्यक्षपदी असताना मी महिला आरोग्याच्याक्षेत्रात मोठे बदल घडवून आणण्यासाठी पाऊल उचलणार आहे. ‘सम्पूर्ण: स्वस्थ जन्म अभियान’, ‘Know Your Numbers’, आणि ‘दो तिके जिंदगी के’ यासारख्या उपक्रमांद्वारे महिला आरोग्याच्या क्षेत्रात महत्त्वपूर्ण बदलघडविण्याचा आमचा उद्देश आहे.”

मातृत्व आणि मृत्यू दर,असंसर्गजन्य रोग,गर्भाशयाचा कर्करोग,आरोग्य सेवांची उपलब्धता आणि प्रजनन आरोग्य जागरूकता अशा भारतातील महिलांच्या आरोग्यावर प्रभाव टाकणाऱ्या मुख्य समस्यांवर डॉ. तांदुळवाडकर यांच्या पुढाकाराने त्वरित आणि ठोस उपाययोजना करण्यात येणार आहेत, ज्यामुळेसंपूर्ण भारतातील महिलांना केवळ अत्यावश्यक आरोग्य सेवाच नाही तर त्यांना त्यांच्या स्वत:च्या आरोग्याचीजबाबदारी घेण्यास सक्षम केले जाईल.

पहा व्हिडीओ-व्हायरल झाल्यावर, २ दिवसांनी गुन्हा दाखल

पुणे-मोक्कामध्ये येरवडा जेलमध्ये असलेला प्रफुल उर्फ गुड्या गणेश कसबे हा २ दिवसांपूर्वी जेलमधून बाहेर आला. त्यानंतर त्याने आणि त्याच्या सुमारे ५०-६० समर्थकांनी येरवडा बाजार परिसरात आलिशान कारमधून रॅली काढली. रॅलीचा व्हिडिओ आता समाज माध्यमांवर Viral होत आहे. परिसरातील नागरिकांना रॅलीमधील युवकांनी धमकावले होते असे देखील नागरिकांचे म्हणणे आहे. आता बाप बाहेर आलाय, बॉस बाहेर आलाय म्हणून रॅलीमधील युवकांनी नागरिकांना शिवीगाळ केली. व्हिडिओ आणि घडलेल्या प्रकाराबाबत नागरिकांनी Laxmi नगर (शास्त्रीनगर) पोलीस चौकीमध्ये माहिती दिली पण कारवाई झाली नाही असे नागरिकांचे म्हणणे होते पण आज पोलीस शिपाई लहू एकनाथ गडमवाड येरवडा पोलीस स्टेशन यांनी याबाबत फिर्याद दाखल केली आहे. आणि 1)प्रफुल्ल उर्फ गुड्या कसबे राहणार भीम ज्योत सर्वे नंबर 12 लक्ष्मी नगर येरवडा पुणे, 2) दीपक मदने, 3) करण सोनवणे, 4)अनिकेत कसबे, 5) अंश पुंडे, 6) अजय कसबे, 7) सागर कसबे, 8) अभिजीत ढवळे, 9) राहुल रसाळ, 10) नन्या कांबळे, 11) रोशन पाटील, 12) तुषार पेठे आणि अन्य ३५ ते ४० जणांवर या प्रकरणी गुन्हा दाखल केला आहे .07/01/2025 रोजी रात्री १० वाजता चे सुमारास गुंजन चौक येरवडा पुणे 6 येथून हि रॅली गेल्याचे फिर्यादीने पहिले .फिर्यादी हे पर्णकुटी मार्शल ड्युटी हजर असताना व पोलीस स्टेशन हद्दीमध्ये पेट्रोलिंग फिरत असताना येरवडा पोलीस स्टेशन कडील अभिलेखा वरील दिनांक 07/01/25 रोजी गुन्ह्यातून जामिनावर बाहेर आलेला प्रफुल्ल उर्फ गुड्या कसबे, त्याच्या स्वागतासाठी त्याचे 11 साथीदार व इतर 35 ते 40 इसम यांनी त्यांच्याकडील 04 चार चाकी गाड्या व 20 ते 30 दुचाकी गाड्या वरून येऊन गैर कायद्याची मंडळीचा जमाव जमवून त्यांच्याकडील चार चाकी व दुचाकी वाहने बेदरकारपणे चालवून आरडा ओरडा करून व घोषणा देऊन येरवडा परिसरामध्ये दहशत निर्माण केली आहे म्हणून त्याच्याविरुद्ध फिर्याद दिली आहे.

पुणे- सरकार पोलिसांना इतक्या चांगल्या सुविधा देत असताना कायदा सुव्यवस्थेचा प्रश्न का निर्माण व्हावा. शहराच्या पोलीस प्रमुखाचे हे अपयश आहे.पुण्यातील वाढत्या गुन्हेगारीच्या प्रश्नावर उपमुख्यमंत्री अजित पवार यांनी हे वक्तव्य करत थेट .. तुम्हाला जमत नसेल तर सांगा .. आमच्याकडे आणखी चांगले अधिकारी आहेत असा थेट पोलीस आयुक्तांना इशारा देत या प्रकरणी आपण मुख्यमंत्र्यांशी संवाद करू असेही म्हटले आहे .

उपमुख्यमंत्री अजित पवार यांनी पुणे येथे अधिकाऱ्यांची बैठक घेत पुण्यातील विकासकामांचा आढावा घेतला आहे. या बैठकीनंतर त्यांनी पत्रकारांशी संवाद साधला. यावेळी त्यांनी पुण्यातील मुद्यांवर भाष्य केले आहे. याचसोबत त्यांना मंत्री धनंजय मुंडे यांच्याविषयी देखील काही प्रश्न विचारण्यात आले. यावर देखील त्यांनी उत्तर दिले आहेत.

बीडच्या मस्साजोगचे सरपंच संतोष देशमुख यांच्या हत्येनंतर राज्यातील राजकीय वातावरण ढवळून निघत आहेत. अशात अनेक राजकीय नेत्यांसह समाजिक कार्यकर्त्यांनी या हत्येतील आरोपींचा धनंजय मुंडे यांच्याशी कथित संबंध असल्याचा आरोप करत, मुंडे यांच्या कॅबिनेट मंत्रिपदाच्या राजीनाम्याची मागणी केली आहे. पुण्यात आज उपमुख्यमंत्री आणि राष्ट्रवादी (अजित पवार) पक्षाचे अध्यक्ष अजित पवार यांनी मुंडे यांच्या राजीनाम्याबाबत विचारले असता ते म्हणाले, “पक्ष वगैरे न बघता दोषी आढळणाऱ्यावर कडक कारवाई करणार आहे.”या हत्या प्रकरणाचा विविध तपास यंत्रणा तपास करत आहेत. त्याच्यबरोबर मुख्यमंत्र्यांनीही सांगितले आहे, या प्रकरणात कोणी दोषी असल्याचे सिद्ध झाले तर त्याच्यावर ताबडतोब कारवाई केली जाईल. मी सुद्धा देवेंद्र फडणवीस यांना भेटून सांगितले आहे की, पक्ष वगैरे न बघता यामध्ये वरिष्ठ पातळीवर काम करणारे कोणी दोषी असतील तर त्यांची गय करण्याचे कारण नाही. ही निर्घून पद्धतीने झालेली हत्या आहे. अशा प्रकारच्या घटना आम्ही खपवून घेणार नाही.”बीडच्या मस्साजोग गावचे सरपंच संतोष देशमुख यांच्या हत्येवरून विरोधी पक्ष आणि विविध सामाजिक संघटनांनी आंदोलनं सुरू केली आहेत. या हत्याप्रकरणामुळे धनंजय मुंडे वादाच्या केंद्रस्थानी सापडले असून त्यांच्या राजीनाम्याची मागणी केली जात आहे. धनंजय मुंडे यांचे कथित निकटवर्तीय वाल्मिक कराड यानेच देशमुख यांच्या हत्येचा कट रचला होता, असा आरोप केला जात आहे.
अजित पवार यांना विचारण्यात आले की, सुरेश धस यांनी बडी मुन्नी म्हणून काही आरोप केले आहेत. त्यावर बोलताना संतापून अजित पवार हे म्हणाले की, ते त्यांना विचारा…हे असल्या फालतू गोष्टी कोणी बोलत असेल तर मी स्पष्ट नावे घेऊन बोलणार आहे. त्याच्यामुळे त्याला विचारा…कोण आहे ते…सुरेश धस यांच्यावर अजित पवार हे संतापलेले दिसले. राष्ट्रवादीमध्ये एक बडी मुन्नी आहे आणि तिने समोर यावे, असे सुरेश धस यांनी म्हटले होते.

पुणे- येरवडा परिसरात मंगळवारी एका 28 वर्षीय तरुणीची कोयत्याने वार करून निर्घृण हत्या झाली होती. आता या घटनेचा एक व्हिडिओ समोर आला आहे. त्यात सदर तरुणी रक्ताच्या थारोळ्यात घटनास्थळी पडल्याचे दिसून येत असून, तिथे बघ्यांची तोबा गर्दी असल्याचेही दिसत आहे. दुर्दैव म्हणजे या गर्दीपैकी कुणीही तिच्या मदतीला धावून गेले नाही.आरोपी आपल्या हातातील कोयता खाली टाकतो आणि त्यानंतर नागरिक त्याला मारण्यासाठी धावून जातात.असे व्हिडीओत दिसते आहे.

कृष्णा सत्यनारायण कनोजिया (30) असे या प्रकरणातील आरोपीचे नाव आहे. तर शुभदा शंकर कोदारे असे मृत तरुणीचे नाव आहे. हे दोघेही येरवडा परिसरातील एका नामांकित कंपनीत नोकरीस होते. कृष्णाने आर्थिक व्यवहारातून शुभदाची हत्या केल्याचे सांगण्यात येत आहे. यासंबंधीच्या माहितीनुसार, मयत शुभदाने वडिलांच्या आजारपणाचे कारण सांगून कृष्णाकडून वेळोवेळी पैसे घेतले होते. पण हे पैसे ती वेळेवर परत करू शकली नाही. त्यामुळे कृष्णाने मंगळवारी तिच्यावर धारदार कोयत्याने हल्ला केला. त्यात ती गंभीर जखमी झाली. तिला तत्काळ स्थानिक रुग्णालयात दाखल केले असता तिचा उपचारादरम्यान मृत्यू झाला. या प्रकरणी येरवडा पोलिस ठाण्यात गुन्हा दाखल करण्यात आला आहे.

काय आहे व्हिडिओत?

या घटनेचा एक व्हिडिओ आता समोर आला आहे. त्यात आरोपी कनोजिया हातात कोयता घेऊन उभा असल्याचे दिसत आहे. तर मृत शुभदा कोदारे जखमी अवस्थेत खाली पडल्याचे दिसून येत आहे. याशिवाय घटनास्थळी बघ्यांची मोठी गर्दी असल्याचेही व्हिडिओत दिसून येत आहे. आरोपी जखमी शुभदाच्या आसपास मोबाईल घेऊन फिरतोय. शुभदा गंभीर जखमी असतानाही मोबाईलवरून झाल्या प्रकाराची माहिती कुणालाही तरी देत असते. पण आरोपी तिच्याजवळील फोन हिसकावून घेताना व्हिडिओत दिसतो.उल्लेखनीय बाब म्हणजे घटनास्थळी बघ्यांची प्रचंड गर्दी असल्याचे व्हिडिओत दिसून येत आहे. पण कुणीही आरोपी कृष्णाला अडवताना दिसून येत आहे. शेवटी आरोपी आपल्या हातातील कोयता खाली टाकतो आणि त्यानंतर नागरिक त्याला मारण्यासाठी धावून जातात. या घटनेचा एक व्हिडिओ सोशल मीडियात चांगलाच व्हायरल झाला आहे.

पुणे:-देशाच्या लोकशाहीचा मुलगाभा असलेल्या स्थानिक स्वराज्य संस्थांच्या निवडणुका (स्थास्वसं) खोळंबल्या आहेत. गेल्या दोन ते चार वर्षांपासून राज्यातील अनेक महानगर पालिका आणि जिल्हा परिषदांच्या निवडणुका न झाल्याने येथे ‘पंचायती राज’ ऐवजी ‘प्रशासन राज’ सुरू आहे.स्थानिक जनक्षोभ त्यामुळे वाढत असून प्रशासकीय राज हटवण्याचे आवाहन करीत स्थानिक स्वराज्य संस्थांच्या निवडणुका जाहिर करण्याची मागणी बहुजन समाज पक्षाचे प्रदेश महासचिव आणि पश्चिम महाराष्ट्र मुख्य प्रभारी डॉ.हुलगेश चलवादी यांनी आज, गुरूवारी (ता.९) केली आहे.

वस्ती, गल्लीबोळासह महानगराच्या विकासाचा मुख्य आराखडा अंमलात आणण्याची जबाबदारी ‘स्थास्वसं’वर असते. ‘सर्वजन हिताय,सर्वजन सुखाय’ या विचारानूसार बहुजनांसह सर्वजनांना सुखी करण्यासाठी त्यांच्या स्थानिक समस्यांची सोडवणूक तात्काळ होण्याची गरज असते.पंरतु,निवडणूका रखडल्याने स्थानिक लोकप्रतिनिधी निवडण्याचा अधिकार जनतेकडून हिरावून घेतला असल्याचे चित्र उभे झाले असल्याची खंत डॉ.चलवादी यांनी व्यक्त केली.

प्रशासनाला लोकप्रतिनिधींची जोड मिळाल्यावरच विकासाला वेग मिळता.सरकारच्या विविध योजनांची प्रभावी अंमलबजावणी लोकप्रतिनिधींच्या सक्रिय सहभागाशिवाय शक्य नाही. नगरसेवक, जिल्हापरिषद सदस्य खऱ्या अर्थाने लोकभावना प्रशासनापर्यंत पोहचवत असतात. अशात लोकप्रतिनिधीच नसल्याने लोकभावना, त्यांच्या समस्या प्रशासनापर्यंत पोहचत नाहीत. नागरिकांना त्यामुळे मनस्ताप सहन करावा लागत असल्याचे डॉ.चलवादी म्हणाले.

विविध कारणांमुळे आणि कायदेशीर अडचणींमुळे स्थानिक स्वराज्य संस्थांच्या निवडणुकांना विलंब होत आहे. मात्र, निवडणूक आयोगाच्या नियमावलीनुसार, अशा निवडणुका सहा महिन्यांपेक्षा जास्त काळ पुढे ढकलता येऊ शकत नसल्याचे डॉ.चलवादी म्हणाले.सर्वोच्च न्यायालयात २२ जानेवारी रोजी स्थानिक स्वराज्य संस्थांच्या निवडणुकांबाबत सुनावणी आहे. ओबीसी आरक्षण अंमलबजावणीसंदर्भात सध्या अनेक अडचणी आहेत. राज्य सरकारने त्यामुळे न्यायालयात योग्य बाजू मांडून निवडणुकीचा मार्ग सुकर करावा,अशी मागणी डॉ.चलवादी यांनी केली आहे. 

पुणे:- पुणे शहरातील विविध IT कंपन्यांमध्ये मोठ्या प्रमाणात महिला कर्मचारी काम करत आहेत. नुकतीच खराडी येथील आय टी कंपनीतील एका महिला कर्मचाऱ्याचा तिच्या सोबत काम करणाऱ्या पुरुष कर्मचाऱ्यांनेच अत्यंत निर्घृणपणे खुन केल्याची घटना घडली आहे. ह्या पार्श्वभूमीवर पुणे शहर भारतीय जनता पार्टी महिला आघाडीच्या शिष्टमंडळाच्या वतीने पुणे पोलीस आयुक्त श्री.अमितेशकुमार यांना निवेदन देण्यात आले या निवेदनात खालील मागण्या करण्यात आल्या

1) आपण शहरातील सर्व IT कंपन्यांना तातडीने स्वतंत्र महिला कर्मचारी सुरक्षा विषयक धोरण तयार करण्याबाबत निर्देश द्यावेत.

2) या कंपन्यांमधील कर्मचारी सुटण्याच्या वेळी संबंधित परिसरात महिला पोलीसांची गस्त सुरु करावी.

3) सर्व कंपन्यांच्या आवारातील CCTV यंत्रणेचे ॲाडीट करण्यात यावे व हे कॅमेरे चालू स्थितीत आहेत का? त्यांची संख्या पुरेशी आहे का? ते योग्य ठिकाणी लावले गेले आहेत का? याचा तपास करण्यात यावा.

4) या सर्व कंपन्यांना त्यांच्या अंतर्गत सुरक्षा व्यवस्थेमध्ये पूर्ण वेळ महिला सुरक्षा रक्षक तैनात करण्याचे निर्देश द्यावेत.

तरी आमची आपणांस या निवेदनाद्वारे नम्र विनंती आहे की आपण वरील मागण्यांबाबत सकारात्मक विचार करुन याबाबत लवकरात लवकर योग्य ती कारवाई करावी
या बाबत ठोस पावले उचलण्याचे आश्वासन पोलीस आयुक्तांनी शिष्टमंडळाला दिले या शिष्टमंडळात महिला शहराध्यक्ष हर्षदा फरांदे, प्रियंका शेंडगे शिंदे स्वाती मोहोळ, गायत्री खडके नेहा गोरे अश्विनी कोसरीकर,मनीषा मोरे आणि खुशी लाटे यांचा समावेश होता