पुणे, दि. ९: मुद्रांक शुलक् अभय योजनांची मुदत ३० सप्टेंबर २०२४ रोजी समाप्त झाली असून प्रलंबित प्रकरणे मार्गी लावण्याच्या अनुषंगाने या योजनेस मुदतवाढ देण्याकरीता प्रस्ताव सादर करावा, नागरिकांच्या दस्ताऐवजाची गोपनीयता अबाधित ठेवण्यासोबतच त्याचा गैरवापर टाळण्याकरीता प्रणाली विकसित करण्याबाबत विचार करावा, असे निर्देश राज्याचे महसूलमंत्री चंद्रशेखर बावनकुळे यांनी दिले.

नवीन प्रशासकीय इमारत येथे नोंदणी व मुद्रांक विभागाच्या क्षेत्रीय आढावा बैठकीत ते बोलत होते. यावेळी राज्याचे नोंदणी महानिरीक्षक व मुद्रांक नियंत्रक रविंद्र बिनवडे, अपर मुद्रांक नियंत्रक, प्रधान मुद्रांक संजयसिंह चव्हाण, सह नोंदणी महानिरीक्षक व मुद्रांक अधीक्षक अशोक पाटील, नोंदणी उपमहानिरीक्षक उदयराज चव्हाण व अभयसिंह मोहिते, लेखा उपसंचालक अविनाश देशमुख यांच्यासह पुणे विभागाचे नोंदणी उपमहानिरीक्षक व मुद्रांक उपनियंत्रक दीपक सोनवणे, छत्रपती संभाजीनगर विभागाचे विजय भालेराव, मुंबई विभागाचे राजू थोटे, नागपूर व अमरावती विभागाचे साहेबराव दुतोंडे, नाशिक विभागाचे कैलास दवंगे, कोकण विभागाचे राहुल मुंडके आदी उपस्थित होते.

श्री. बावनकुळे म्हणाले, विभागाच्या कामकाजाचा आढावा पाहता न्यायालयीन प्रकरणे मार्गी लावण्याकरीता ५ विधी अधिकारी व महालेखापाल तपासणीतील आक्षेपाचे निराकरण करण्याकरीता सनदी लेखापाल (सीए) नेमणूक करण्याची कार्यवाही करावी. मंत्रालयीन स्तरावरील प्रकरणांचा पाठपुरावा करुन ते मार्गी लावण्याकरीता एका समन्वयक अधिकाऱ्याची नियुक्ती करावी, असे निर्देश त्यांनी दिले.

ते पुढे म्हणाले, नोंदणी महानिरीक्षक व मुद्रांक नियंत्रकांनी क्षेत्रीय कार्यालयाच्या बांधकामाचा दरमहा आढावा घ्यावा. नोंदणी उपमहानिरीक्षक व मुद्रांक उपनियंत्रकांने महिन्यात दोन ऐवजी चार कार्यालयीन कामकाजाची तपासणी करावी. विभागातील प्रलंबित विषय मार्गी लावून प्रकरणे शून्य प्रलंबितता (झिरो पेंडन्सी) राहील, याकरीता सर्व विभाग प्रमुखांनी प्रयत्न करावे. रिक्त पदे भरण्यासोबतच पदोन्नतीची प्रकरणे मार्गी लावण्याची कार्यवाही सुरु करावी.

राज्य शासनाच्या १५० दिवसाच्या कार्यालयीन सुधारणा कार्यक्रमाअंतर्गत ‘एक राज्य एक नोंदणी’ व ‘एक जिल्हा एक नोंदणी’ आदीबाबत माहिती देण्याकरीता अधिकाऱ्यांसाठी विभागनिहाय प्रशिक्षण सत्राचे आयोजन करावे. अत्याधुनिक तंत्रज्ञानाचा वापर करत नोंदणी प्रक्रिया सुटसुटीत करुन नागरिकांना सुलभ सेवा देण्याचे काम करावे. याकरिता इतर राज्यातील चांगल्या कामांचा अभ्यास करावा. विभागाच्यावतीने विविध लोककल्याणकारी मार्गदर्शक सूचना, नियम, आदेश पारीत करुन नागरिकांना दिलासा देण्याचा प्रयत्न होत असताना क्षेत्रीय अधिकाऱ्यांनी याबाबतची माहिती नागरिकांपर्यंत पोहोचविण्याचे काम करावे. अधिकारी व कर्मचाऱ्यांनी अचूकपणे कामे करावीत, पारदर्शक कामे करण्यासोबतच गैरप्रकार होणार नाही, याबाबत दक्षता घ्यावी.

यावेळी श्री. बिनवडे यांनी सन २०२४-२५ चे शासकीय वसुलीचे उद्दिष्ट व वसुली, सन २०२५-२६ शासकीय वसुलीचे उद्दीष्ट साध्य करण्यासाठी केलेले नियोजन, परतावा, अभिनिर्णय, महाराष्ट्र मुद्रांक अधिनियमाच्या कलम १० ड ची अंमलबजावणी, कार्यालयीन तपासणी प्रक्रिया, फेसलेस नोंदणी प्रक्रियेचा आढावा, अभिलेख्याचे संगणकीकरण आणि स्कॅनिंग, १०० दिवसांचा आढावा आणि आगामी १५० दिवसात करावयाच्या कामाचे नियोजन, रिक्त पदे, महालेखापाल तपासणी, दस्त नोंदणी प्रक्रिया आदीबाबत माहिती दिली. येत्या काळात बैठकीत ठरल्याप्रमाणे कार्यवाही करण्यात येईल, असेही श्री. बिनवडे म्हणाले.
0000

पुणे, दि. ९: उपमुख्यमंत्री तथा जिल्ह्याचे पालकमंत्री अजित पवार यांच्याहस्ते देशातील पहिल्या फिरत्या पशुवैद्यकीय दवाखान्याचा शुभारंभ हडपसर येथे करण्यात आला.

यावेळी आमदार चेतन तुपे, पुणे महानगरपालिकेचे सहायक आयुक्त बाळासाहेब ढवळे, युनिव्हर्सल ॲनिमल वेल्फेअर सोसायटीचे अध्यक्ष डॉ. हनुमंत शेळके, सचिव डॉ. स्वाती शेळके आदी उपस्थित होते.

सन २०३० पर्यंत रेबीज निर्मूलन करण्याचे ध्येय
डॉ. हनुमंत शेळके व डॉ. स्वाती जोगदंड शेळके या दांपत्याने २००९ साली बीड जिल्ह्यातून युनिव्हर्सल ॲनिमल वेल्फेअर सोसायटीची स्थापना केली. सन २०३० पर्यंत रेबीज निर्मूलन करण्याचे ध्येय समोर ठेऊन हे रुग्णालय सुरू केले आहे. ग्रामीण भागात श्वानांची वाढती संख्या, श्वानदंशामुळे नागरिकांच्या आरोग्यास निर्माण झालेला धोका व त्यावर उपाय योजना राबविण्यासाठी उपलब्ध असलेले व्यवस्था, कर्मचारी राहण्यासाठी गैरसोय या सर्व अडचणीवर मात करण्यासाठी फिरता दवाखाना सुरू केला आहे. या रुग्णालयाच्या माध्यमातून राज्यातील विविध भागात पशुवैद्यकीय सेवा देत आहेत.

महिन्याला ५०० शस्त्रक्रिया करण्याची क्षमता
फिरते पशुवैद्यकीय रुग्णालयाचे क्षेत्रफळ सुमारे २ हजार चौरस मीटर आहे. पहिल्यामजल्यावर १० कर्मचारी राहण्यासाठी व्यवस्था, महिन्याला ५०० शस्त्रक्रिया करण्याची क्षमता, ज्यामध्ये १०० कुत्र्यांना ठेवण्याची सुविधा, ऑपरेशन थिएटर, ओपीडी, आणि कन्व्हर्टेबल कॉन्फरन्स रूम, किचन, अभिलेख कक्ष, चर्चासत्र कक्ष व वातानुकूलित, अत्याधुनिक ऑपरेशन थिएटर, सोलर पॅनलद्वारे वीज निर्मिती, ओपीडी, लसीकरण, आपत्कालीन उपचार, नसबंदी आदी सुविधा उपलब्ध आहेत.
0000

राष्ट्रीय स्वयंसेवक संघ, मोतीबाग नगर ; घोषवादनासह शिस्तबद्ध संचलन 

पुणे : राष्ट्रीय स्वयंसेवक संघ, मोतीबाग नगरातर्फे धर्मवीर छत्रपती संभाजी महाराज जयंतीनिमित्त तरुण विभागाचे ‘कौमुदी संचलन’ उत्साहात पार पडले. घोषवादनासह शिस्तबद्ध संचलनात स्वयंसेवकांनी पूर्ण गणवेशात सहभाग घेतला. 

न्यू इंग्लिश स्कूल, रमणबाग प्रशालेतून संचलनाला प्रारंभ झाला. यावेळी कसबा भाग संघचालक प्रशांत यादव उपस्थित होते. रमणबाग प्रशालेतून मुठेश्वर मंडळ, गरुड गणपती चौक, लक्ष्मी रस्त्याने अलका टॉकीज चौक, खंडुजीबाबा चौक, छत्रपती संभाजी महाराज यांच्या पुतळ्याला प्रदक्षिणा मारून कुमठेकर रस्त्याने उंबऱ्या गणपती चौकामार्गे रमणबाग प्रशाला मैदान येथे संचालनाचा समारोप झाला. 

छत्रपती संभाजी महाराज यांच्या पुतळ्याला स्वयंसेवकांनी पुष्पहार अर्पण करीत अभिवादन देखील केले. तसेच संचालनाचे ठिकठिकाणी स्वागत पुणेकरांनी केले. रा. स्व. संघाच्या आगामी शताब्दी वर्षांचा विचार करीत तरुण वर्गाची ताकद वाढावी, याकरिता देखील संचालनाचे आयोजन करण्यात आले होते. 

पुणे दि. ९ जून : माईर्स एमआयटी विश्वशांती केंद्राद्वारे महाराष्ट्रात घेण्यात आलेल्या “विश्वधर्मी प्रा.डॉ. विश्वनाथ कराड अध्यात्म-विज्ञानाधिष्ठित वैश्विक शिक्षण शिष्यवृत्ती २०२५” या मूल्याधिष्ठित शिक्षण व यशस्वी व्यक्तिमत्व विकास परीक्षेचा निकाल घोषित करण्यात आला. यामध्ये पश्चिम विभाग (सोहम गंभीर)े, मराठवाडा (अथर्व वाघचौरे) आणि विदर्भ (गौरी मुंडोकार) यांनी प्रथम क्रमांक पटकाविला आहे. अशी माहिती परीक्षेचे मुख्य समन्वयक व नागपूर विद्यापीठाचे माजी कुलगुरू डॉ.एस.एन.पठाण यांनी पत्रकार परिषदेत दिली.
माईर्स एमआयटी पुणे या शिक्षण संस्थेचे संस्थापक विश्वधर्मी प्रा.डॉ. विश्वनाथ दा. कराड यांनी गुणवत्तापूर्ण उच्च शिक्षणाला मूल्याधिष्ठित शिक्षण आणि यशस्वी व्यक्तिमत्व विकासाची जोड दिली आहे. संस्थेतून तयार झालेले विद्यार्थी भारताचे थोर सुपुत्र स्वामी विवेकानंद यांनी म्हटल्याप्रमाणे अध्यात्म आणि विज्ञान यांच्या समन्वयातून जगात विश्वशांती व राष्ट्रनिर्मितीचे काम करतील. हा उद्देश्य ठेऊन गेल्या १२ वर्षापासून मूल्याधिष्टित शिक्षण व यशस्वी व्यक्तिमत्व विकास परीक्षा राज्यात शालेय विद्यार्थ्यांसाठी घेतली जाते. २०२५ या वर्षापासून परीक्षेचे रुपांतर शिष्यवृत्ती मध्ये करण्यात आले आहे.
या परीक्षेसाठी १०वीचा विद्यार्थी बसू शकतो. त्या विद्यार्थ्याला १०वींत ७० टक्के गुण मिळणे आवश्यक आहे. ही शिष्यवृत्ती त्याला ११वी आणि १२वी या दोन वर्षासाठी दिली जाईल.
विभागात गुणानुक्रमे येणार्‍या विद्यार्थी प्रथम (२५ हजार), द्वितीय (२० हजार), तृतीय (१५ हजार), चतुर्थ (१० हजार) आणि पाचवा (५ हजार) ही शिष्यवृत्ती देण्यात येणार आहे.
या परीक्षेचा निकाल ः पश्चिम महाराष्ट्र विभागः सोहम संग्राम गंभीरे (प्रथम, संत ज्ञानेश्वर विद्यालय, कोथरूड, पुणे), दर्शन सतीश जगदाळे (द्वितीय,विश्वशांती गुरुकुल, पंढरपूर), आर्य सचिन लोखंडे (तृतीय, अभिनव विद्यालय, पुणे), पायल संदीप बोरुडे(चतुर्थ, ज्ञानगंगा विश्वविद्यालय, शिरूर), वेदिका संतोष बडे (पाचवा, ज्ञानगंगा विश्वविद्यालय, शिरुर )
मराठवाडा विभागः अथर्व अमोल वाघचौरे (प्रथम, कै. दादाराव कराड विद्यालय, अंबाजोगाई), वैभवी तातेराव लहाडे (द्वितीय, श्री सरस्वती विद्यालय, रामेश्वर रूई), आर्या सचिन गडदे (तृतीय, कै. दादाराव कराड विद्यालय,अंबाजोगाई), सुरज विश्वंबर गायकवाड (चतुर्थ, मुकुंदराज विद्यालय, नांदगाव), दिव्या विलास धांडे (पाचवी, यशवंतराव चव्हाण माध्यमिक विद्यालय, रांजणगाव)

विदर्भ विभागः गौरी गोपाळ मुंडोकार(प्रथम, श्री शिवाजी विद्यालय,अकोट), पयोष्णी विजय पार्शिवकर (द्वितीय, जनता विद्यालय, पूर्णानगर), सह्याद्री अरविंद कळसकर (तृतीय, जनता विद्यालय, पूर्णानगर), स्वराज नितीन बंड (चतुर्थ , जनता विद्यालय,पूर्णानगर), वैभवी नंदकिशोर अकोटकर (पाचवा, श्री शिवाजी विद्यालय, अकोट )

कल्पना चावला स्पेस अकॅडमीच्या पहिल्या वर्गाचे उद्घाटन

पुणे / लोणावळा : यशाकडे जाणारा रस्ता शोधण्यासाठी दृष्टी असावी लागते आणि अशी प्रगतिशील दृष्टी प्रयत्नांनी विकसित करावी लागते, असे मत संरक्षण संशोधन व विकास संस्थेचे निवृत्त शास्त्रज्ञ डॉ भारतभूषण जोशी यांनी व्यक्त केले.

लोणावळा येथील विद्यानिकेतन एज्युकेशन ट्रस्टच्या वतीने सुरू करण्यात आलेल्या कल्पना चावला स्पेस अकादमीच्या उद्घाटन समारंभात ते बोलत होते. या कार्यक्रमाला संस्थेचे अध्यक्ष ॲड. माधव भोंडे, उपाध्यक्ष नारायण भार्गव, संस्थेच्या कार्यकारिणीचे सदस्य आणि इस्रोचे निवृत्त शास्त्रज्ञ प्रा जगदीशचंद्र मठ, राजेंद्र चतुर्वेदी, पिंपरी चिंचवड सायन्स पार्क शिक्षणाधिकारी सुनील पोटे, विश्वस्त पंडित विद्यासागर,अभिनेत्री आणि संस्थेच्या विश्वस्त मीनाक्षी शेषाद्री सचिव राधिका भोंडे आदी मान्यवर उपस्थित होते.

विज्ञान कितीही प्रगत झाले असले तरी देखील आजपर्यंत माणसाला विश्वाच्या एकूण पसाऱ्यापैकी केवळ पाच टक्के माहिती उपलब्ध झाली आहे. या पुढील काळात उर्वरित माहिती उजेडात आणण्याचे काम युवा शास्त्रज्ञांचे आहे. त्यासाठी युवकांना मोठा वाव उपलब्ध आहे, अशी जोशी यांनी यावेळी सांगितले.

प्रत्येकाने कल्पना चावला यांच्यासारखे अंतराळवीर व्हावे असे नाही तर अभियंता, शास्त्रज्ञ, कलाकार अशा कोणत्याही भूमिकेतून मानवतेच्या प्रगतीसाठी योगदान दिले जाऊ शकते, असेही त्यांनी नमूद केले.

अंतराळ विज्ञानात भारत जगात तिसऱ्या क्रमांकाचा देश असून तो लवकरच प्रथम क्रमांकावर विराजमान होणार आहे. अंतराळ वैज्ञानिक घडविण्याच्या उद्देशाने कल्पना चावला स्पेस अकादमीची स्थापना करण्यात आली असून अत्यंत काटेकोरपणे या अकादमीसाठी विद्यार्थ्यांची निवड करण्यात आली आहे. निवड करताना प्राधान्याने ग्रामीण भागातील विद्यार्थ्यांना प्राधान्य देण्यात आले आहे. सध्याचे युग हे स्पर्धा करण्याचे नव्हे तर सहकार्य करण्याचे आहे. त्यामुळे या संस्थेसाठी इस्रो, नेहरू स्पेस सेंटर अशा अनेक संस्थांशी सहकार्य करार करण्यात आला आहे, अशी माहिती भार्गव यांनी यावेळी दिली.

कल्पना चावला स्पेस अकादमीच्या अभ्यासक्रमाबद्दलची माहिती जगदीश चंद्र मठ यांनी दिली. उत्सुकताही प्रगतीची जननी आहे. त्यामुळे विद्यार्थ्यांमध्ये उत्सुकता निर्माण करणे यावर अभ्यासक्रमात भर देण्यात आला आहे. प्रथम दोन वर्षात अंतराळ विज्ञानाची मूलभूत तत्व विद्यार्थ्यांना शिकवली जाणार आहे. त्यानंतर अंतराळ विज्ञानातील विविध शाखांपैकी विद्यार्थ्यांना रस असलेल्या शाखेची निवड करून त्या शाखेचे विशेष प्रशिक्षण देण्यात येणार आहे. अंतराळ संशोधन संस्थेमध्ये उमेदवारी हा देखील अभ्यासक्रमाचा घटक असणार आहेत. त्याचप्रमाणे यशस्वी शास्त्रज्ञ घडवण्याबरोबरच नीतिवान, भावनिक दृष्ट्या सबळ व्यक्तिमत्व घडविण्यासाठी जीवन विद्येचा समावेश अभ्यासक्रमात करण्यात आला आहे, असेही प्रा मठ यांनी सांगितले.

अंतराळ विज्ञानाचे प्रशिक्षण देणारी कल्पना चावला स्पेस अकादमी ही भारतातील, किंबहुना जगातील एकमेव संस्था असून या संस्थेत प्रशिक्षण घेणाऱ्या विद्यार्थ्यांचे भवितव्य उज्ज्वल असल्याची ग्वाही राजेंद्र चतुर्वेदी यांनी यावेळी दिली.

सुनील पोटे यांनी संस्थेला आणि विद्यार्थ्यांना शुभेच्छा दिल्या. देवतोष कृष्णा यांनी सूत्रसंचालन केले तर राधिका भोंडे यांनी आभार मानले.

पुणे दि.9 : अंध, अस्थिव्यंग, मुकबधिर अशा तिनही प्रवर्गातील दिव्यांग विदयार्थ्यांसाठी शासकीय बहुउददेशिय दिव्यांग संमिश्र केंद्र येरवडा येथे इयत्ता 1 ली ते 10 वी पर्यंत (वयोगट 06 ते 18 वर्ष) साठी प्रवेश प्रक्रिया सुरु आहे. दिव्यांग विद्यार्थ्यांनी या संधीचा लाभ घ्यावा, असे आवाहन संस्थेच्या अधिक्षिका रोहिणी मोरे यांनी प्रसिध्दी पत्रकान्वये केले आहे.
या केंद्रात प्रशिक्षित शिक्षक वर्ग, डिजिटल शिक्षण, दर्जेदार वसतीगृह, भौतिक उपचार, व्यवसाय उपचार समाज उपचार, वैद्यकिय मदत, व समुपदेशन आवश्यकतेनुसार मोफत शस्त्रक्रिया यांसारख्या अत्याआधुनिक सुविधा दिल्या जातात. विद्यार्थ्यांचा सर्वांगीण विकास होण्यासाठी विविध प्रशिक्षण उपक्रम आणि नैतिक मुल्यांचे शिक्षण केंद्रात दिले जाते. प्रवेशासाठी संपर्क शासकीय वहुउददेशिय दिव्यांग संमिश्र केंद्र, गोल्फ क्लब रोड (औद्यागिक शाळेच्या बाजुला) येरवडा पुणे. मोवाईल नंबर:-मोरे-9763895598, वाघ-9960233823, सोनवणे-9226959371, कारंडे-9765077666. सरोदे-9730515597 या नंबरवर संपर्क साधावा असेही प्रसिध्दी पत्रकात नमुद केले आहे.

पुणे-वाघाेली परिसरात केसनंद रस्त्यावर तळेरानवाडी येथे हुंडाबळीचा आणखी एक प्रकार उघडकीस आला आहे. लग्नात हुंडयात पाच लाख रुपये व सात ताेळे साेने न दिल्याने विवाहितेचा सासरी छळ करण्यात आल्याने तिने राहते घराचे दुसऱ्या मजल्यावरुन खाली उडी मारुन आत्महत्या केल्याचा खळबळजनक प्रकार घडला आहे. स्वाती पाठक (वय- २०) असे आत्महत्या केलेल्या महिलेचे नाव आहे.

याबाबत स्वातीच पती सुरज राजेंद्रप्रसाद पाठक (वय- २६), सासू सुनिता राजेंद्रप्रसाद पाठक (४५), दिर निरज राजेंद्रप्रसाद पाठक (२३), मामा अरुण ऊर्फ अंकु रमेश उपाध्याय (४५,रा. लाेहगाव, पुणे), मामा अरविंद रमेश उपाध्याय (४०,रा. पुणे) अशी गुन्हा दाखल झालेल्या आराेपींची नावे आहे. याबाबत वाघाेली पाेलिस स्टेशन मध्ये आराेपी विराेधात मयताची आई पुनम पांडे (वय- ५३, रा. सहादप पुरा, जि. महू, उत्तरप्रदेश) यांनी फिर्याद दिली आहे. तक्रारदार यांची मुलगी स्वाती हिचा सुरज पाठक साेबत ६/३/२०२४ राेजी विवाह झाला हाेता. लग्नाचे वेळी सासरच्या व्यक्तींनी लग्नात पाच लाख व साेन्याचे दागिन्याची मागणी केली. परंतु लग्नात स्वातीच्या कुटुंबियांनी एक लाख व सात ताेळे हुंडा मागणीप्रमाणे दिला. परंतु याेग्य हुंडा न दिल्याने स्वातीला सासरच्या व्यक्तींनी त्रास देणे सुरु केले.

हुंडा न दिल्याचे रागातून तिचा सासरच्या व्यक्तींनी मारहाण करुन तिला शारिरिक व मानसिक त्रास देणे सुरु केले. तसेच तिच्या अंगावरील साेन्याचे दागिने तिचा पती व सासु यांनी मुथूट फायनान्स मध्ये गहाण ठेऊन त्यावर पैसे घेतले. संबंधित साेने साेडविण्यासाठी स्वाती हिचेकडे तीन ते चार लाख रुपयांची मागणी करुन, तीन लाख रुपये राेख स्वरुपात स्विकारले. तसेच स्वाती हिला घरगुती वेगवेगळया कारणास्तव वादविवाद करुन तिचा शारिरिक व मानसिक छळ केला. त्यामुळे या त्रासाला कंटाळून स्वाती हिने मध्यरात्री साडेबारा वाजण्याच्या सुमारास राहते घराचे दुसऱ्या मजल्यावरुन उडी मारुन आत्महत्या केली आहे. याप्रकरणी तिला आत्महत्येस प्रवृत्त केल्याप्रकरणी तिचे पती, सासु, दीर, मामा यांचे विराेधात पाेलिसांनी भारतीय न्याय संहिता २०२३ चे कलम ८०, ११५ (२), ३ (५), ३५२ प्रमाणे गुन्हा दाखल केला आहे. याबाबत पुढील तपास सहाय्यक पाेलिस निरीक्षक विनायक आहिरे करत आहे.

“ना. चंद्रकांतदादा पाटील हे एक संवेदनशील नेतृत्व” – संदीप खर्डेकर.

“रोलबॉल ह्या पुण्यात जन्मलेल्या खेळाने नवनवीन शिखरे गाठावीत” – श्री. बद्री मूर्ती.

पुणे-नामदार चंद्रकांतदादा पाटील हे एक अत्यन्त संवेदनशील नेतृत्व असून त्यांचे राहणीमान, त्यांचे सार्वजनिक वर्तन, त्यांचे समाजाप्रतीचे दातृत्व हे सगळेच राजकारणात दुर्मिळ असून चंद्रकांतदादांना वाढदिवसाच्या शुभेच्छा देताना होणारा आनंद अवर्णनीय आहे असे संदीप खर्डेकर म्हणाले. “दादा” तुम्ही शतायुषी व्हा, तुम्हाला आरोग्यसंपन्नता लाभो आणि अगदी सोप्या भाषेत सांगायचे तर “असेच रहा दादा”, सामान्य नागरिकांच्या आशीर्वाद तुमच्या सोबत आहेत असेही संदीप खर्डेकर म्हणाले.
तर मा. चंद्रकांतदादा नसते तर पुण्यात रोलबॉल च्या विश्वचषक स्पर्धेचे यशस्वी आयोजन होऊ शकले नसते असे भावपूर्ण उद्गार ह्या खेळाचे जनक राजू दाभाडे सर यांनी काढले.
ना.चंद्रकांत दादा पाटील यांच्या वाढदिवसानिमित्त रोलबॉल असोसिएशन च्या वतीने जिल्हास्तरीय रोलबॉल स्पर्धा आयोजित करण्यात आल्या तसेच विविध शाळेतील क्रीडा शिक्षकांना क्रीडा साहित्याची भेट देण्यात आली ह्या कार्यक्रम प्रसंगी ते बोलत होते.
यावेळी परांजपे विद्यामंदिर, महेश विद्यालय, कोथरूड सिटी इंटरनॅशनल स्कूल, न्यू इंडिया स्कूल, एसपीएम इंग्लिश मीडियम स्कूल निगडी, टाटा मोटर्स स्कूल, पीसीएमसी सेंट उर्सुला स्कूल, पिंपरी चिंचवड फिटनेस फायटर अकॅडमी,ग्लोबल इंग्लिश मीडियम स्कूल,एवरेस्ट इंग्लिश मीडियम स्कूल, अशा विविध शाळांना क्रीडा साहित्याचे वाटप प्रमुख अतिथी श्री बी.जी मूर्ती सर, असोसिएशन चे महाराष्ट्र प्रदेश अध्यक्ष संदीप खर्डेकर,रोलबॉल या खेळाचे जनक राजू दाभाडे सर, नगरसेविका सौ. मंजुश्री खर्डेकर, भाजपा आय टी प्रकोष्ठ च्या सौ. कल्याणी खर्डेकर यांच्या हस्ते करण्यात आले.
ना. चंद्रकांतदादा पाटील यांनी भ्रमणध्वनी द्वारे उपस्थितांना संबोधित केले व ह्या खेळाच्या वाढीसाठी मी कटिबद्ध असून त्यासाठी सर्वांतोपरी मदत करेन असेही ते म्हणाले.माझा वाढदिवस अश्या अगळ्यावेगळ्या पद्धतीने साजरा केल्याबद्दल त्यांनी सर्वांच्या प्रती कृतज्ञता व्यक्त केली.
रोलबॉल ह्या खेळासाठी सर्वप्रथम मैदान मी बाल शिक्षण मंदिर येथे उपलब्ध करून दिले आणि आता हा खेळ जगभर लोकप्रिय होत आहे असे प्रमुख अतिथी श्री. बद्री मूर्ती म्हणाले. या खेळाने नवनवीन शिखरे गाठावीत अश्या शुभेच्छा देखील त्यांनी दिल्या.
यावेळी क्रीडा प्रशिक्षकांना प्रमाणपत्राचे वाटप करण्यात आले.
चंद्रकांतदादांच्या वाढदिवसाच्या निमित्ताने 17 वर्षा खालील जिल्हा स्तरिय रोलबॉल स्पर्धा पुणे जिल्हा रोलबॉल संघटने मार्फत घेण्यात आल्या. या स्पर्धेत 17 वर्षाखालील ज्युनिअर गटातील 18 संघांनी सहभाग नोंदविला. यामध्ये मुलांचे दहा तर मुलींचे आठ संघ सहभागी होते.
पहिला जूनियर वर्ल्ड कप केनिया येथे होणार असून त्याचे प्रशिक्षण बालेवाडी येथे सुरू आहे.देश भरातील विविध राज्यातील खेळाडू या प्रशिक्षण शिबिरामध्ये सहभागी आहेत,त्या खेळाडूंनी देखील या स्पर्धेमध्ये सहभाग नोंदविला यामध्ये जम्मू कश्मीर, आसाम,उत्तर प्रदेश, दिल्ली महाराष्ट्र,मध्य प्रदेश, राजस्थान, तेलंगणा, गुजरात, तामिळनाडू,आंध्र प्रदेश, केरळ,अशा विविध राज्यातील खेळाडू या संघांमध्ये एकत्रित होऊन त्यांचे संघ तयार केले होते ते संघ या स्पर्धेमध्ये सहभागी झाले.

स्पर्धेचे निकाल…
मुलांच्या गटात
1 इंडिया ईस्ट हा संघ प्रथम

2. इंडिया वेस्ट हा संघ द्वितीय 3. महेश विद्यालय कोथरूड तृतीय.

मुलींच्या गटात

1. इंडिया ईस्ट प्रथम
2. इंडिया वेस्ट द्वितीय
3. महेश विद्यालय तृतीय.

ह्या स्पर्धा यशस्वी करण्यासाठी दादासाहेब भोरे,प्रमोद काळे, रफिक इनामदार,प्रभाकर वडवेराव, निलेश शिंदे, जयप्रकाश सिंग इ.यांनी मोलाची कामगिरी बजावली.

पुणे-गुजरातच्या भावनगर येथील डाॅ.श्याम व्हाेरा (वय- २५) हा तरुण पुण्यातील नामांकित रुबी हाॅल क्लिनिक रुग्णालयात रेडियाेलाॅजिस्ट म्हणून शिक्षण घेण्यास आला हाेता. परंतु कामाच्या अतिताणामुळे त्याने रुबी रुग्णालयापासून जवळच असलेल्या ढाेले पाटील चाैकातील दामाेदर भवन या वसतिगृहातील आपल्या खाेलीत गळफास घेऊन आत्महत्या केल्याचा प्रकार उघडकीस आला. या प्रकरणाची माहिती मिळताच पाेलिसांनी घटनास्थळी धाव घेऊन त्याचा मृतदेह ताब्यात घेतला. तसेच तो शवविच्छेदनासाठी ससून रुग्णालयात पाठवला. रुग्णालयातील कामाच्या अतिताणामुळे या प्रशिक्षणार्थी डॉक्टरने आत्महत्या केल्याचा संशय व्यक्त केला जात आहे.

याबाबत पाेलिसांनी डाॅ. श्याम व्हाेरा याच्या कुटुंबियास माहिती दिली. पीडित कुटुंब गुजरात मधील भावनगर येथून साेमवारी पुण्यात दाखल झाले. त्यानंत पोलिसांनी मृत तरुणाचा मृतदेह त्यांच्या स्वाधीन केला. पोलिसांच्या माहितीनुसार, डाॅ.शाम व्हाेरा हा रुबी रुग्णालयात निवासी डाॅक्टर म्हणून काम करत हाेता. रुबी रुग्णालयाचे वतीने चालविण्यात येणाऱ्या वसतिगृहात ताे अन्य एका डाॅक्टर साेबत राहत हाेता. रविवारी रात्री ताे रुममध्ये एकटाच असताना त्याने गळफास घेऊन आत्महत्या केली. आत्महत्या करण्यापूर्वी त्याने लिहून ठेवलेली एक चिठ्ठी पाेलिसांना प्राप्त झाली आहे. त्यात कागदावर त्याने आपल्या माेबाईलचा पासवर्ड लिहून ठेवला होता. मृताने कुणावरही आरोप केले नसल्यामुळे त्याच्या आत्महत्या मागील गूढ वाढले आहे. दरम्यान, याप्रकरणी काेरेगाव पार्क पाेलिस ठाण्यात अकस्मात मृत्युची नाेंद करण्यात आली आहे. मयत डॉक्टरयाच्या कुटुंबीयांनी याबाबत कोणती अद्याप तक्रार पोलिसांकडे दाखल केली नाही. काेरेगाव पार्क पाेलिस पुढील चाैकशी करत असल्याची माहिती पाेलिसांनी दिली आहे.