पुणे-पुणे आंतरराष्ट्रीय विमानतळ परिसरात गेल्या आठ महिन्यांपासून वावर असलेला बिबट्या अखेर पकडण्यात आला आहे. पुणे वनविभाग, रेस्क्यू चॅरिटेबल ट्रस्ट, भारतीय हवाई दल आणि विमानतळ प्राधिकरणाच्या संयुक्त पथकाने ही मोहीम यशस्वी केली.

हा बिबट्या सर्वप्रथम 28 एप्रिल 2025 रोजी कॅमेरा ट्रॅपमध्ये दिसला होता. तेव्हापासून तो विमानतळाच्या भूमिगत बोगदे, दाट झुडपे आणि कमी वर्दळीच्या भागांतून फिरत होता. विमानतळाचा परिसर संवेदनशील आणि विस्तृत असल्याने त्याला पकडणे आव्हानात्मक ठरले होते. अनेक महिने कॅमेरा ट्रॅप, लाइव्ह कॅमेरे आणि पिंजरे लावूनही तो सापळ्यात अडकला नव्हता.4 डिसेंबर रोजी बिबट्या पुन्हा भूमिगत बोगद्यात शिरल्याचे निदर्शनास आले. त्यानंतर तात्काळ सर्व बाहेर पडण्याचे मार्ग बंद करून अतिरिक्त कॅमेरे बसवण्यात आले. अखेर 11 डिसेंबर रोजी सुमारे 30 सदस्यांच्या पथकाने नियोजित मोहीम राबवली. बिबट्याला अंदाजे 80 फूट लांब बोगद्यात नियंत्रित करून वन्यजीव वैद्यकीय तज्ज्ञ डॉ. गौरव मंगला यांनी अरुंद जागेतून यशस्वीपणे डार्ट केले. बिबट्याने यापूर्वी दोन लाइव्ह कॅमेरेही नष्ट केले होते, तरीही पथकाने संयमाने काम करत मोहीम फत्ते केली. पकडलेला बिबट्या सध्या पूर्णपणे स्थिर असून, पुढील वैद्यकीय तपासणी आणि उपचारासाठी बावधन येथील रेस्क्यूच्या ट्रान्झिट ट्रीटमेंट सेंटरमध्ये दाखल करण्यात आले आहे.उपवनसंरक्षक महादेव मोहिते यांनी या मोहिमेचे कौतुक करत, हे “सामंजस्य आणि सतत तयारीचे उत्तम उदाहरण” असल्याचे म्हटले. रेस्क्यूच्या नेहा पंचमिया यांनी सांगितले की, प्रत्येक प्राणी बचाव मोहीम वेगळी असते आणि त्यासाठी संयम व योग्य रणनीती आवश्यक असते. या यशस्वी मोहिमेमुळे पुणे विमानतळाची सुरक्षा पुन्हा पूर्णपणे सुनिश्चित झाली असून, मानव-वन्यजीव संघर्ष हाताळण्यात भारतीय यंत्रणांची क्षमता पुन्हा एकदा सिद्ध झाली आहे.

पुणे- सरार्स गुटखा विक्री करून माया कमाविणाऱ्या हडपसर येथील एका दाम्पत्यावर पोलिसांनी गुन्हा दाखल केला आहे . या प्रकाराने गल्लोगल्ली ,रस्तोरस्ती चालणाऱ्या पानाच्या टपऱ्या जिथे गुटखा विक्री होते त्या आता केंद्रस्थानी येऊ लागल्याचे दिसते आहे.

दरम्यान या प्रकारची माहिती देताना पोलिसांनी सांगितले कि,’वानवडी पोलीस स्टेशनकडील तपास पथकाचे सहा. पोलीस निरीक्षक श्री. उमाकांत महाडिक व पोलीस अंमलदार असे हद्दीत पेट्रोलिंग करीत असताना त्यांना गोपनीय बातमीदाराकडून बातमी मिळाली की, बारामती चिकन अॅग्रो चिकन शॉपच्या गल्लीत, रामनगर, छोटी मस्जिदजवळ, रामटेकडी, हडपसर, पुणे येथील घरात इसम नामे गुलफाम अन्सारी व त्याची पत्नी नुरजहाँ गुलफाम अन्सारी हे वेगवेगळ्या कंपनीचा पान मसाला, गुटखा त्यामध्ये मिश्रीत करण्याची तंबाखुजन्य पदार्थ त्यास शासनाने प्रतिबंधित केले असताना देखील व त्याच्या सेवनाने आरोग्याच्या दृष्टीने घातक तसेच मुखाचे कर्करोग व इतर विकार होवुन शारीरीक हानी होते हे माहित असतांनाही विक्री करीत आहेत. सदर बातमीच्या अनुषंगाने सदर ठिकाणी जावून आजूबाजूला पाहिले असता वर नमूद पती व पत्नी वेगवेगळ्या कंपनीचा पान मसाला, गुटखा त्यामध्ये मिश्रीत करण्याची तंबाखुजन्य पदार्थ त्यास शासनाने प्रतिबंधीत केले असताना देखील विक्री करीत होते. सदर रूमची झडती घेतली असता त्यांचे रूममध्ये प्रतिबंधित पान मसाला व तंबाखुजन्य पदार्थ असा एकुण १,६२,१८४/-रू. कि.चा मुद्देमाल जप्त करण्यात आला. सदर नमुद इसम गुलफाम अन्सारी वय-४५ वर्ष रामनगर, छोटी मजिदजवळ, रामटेकडी, हडपसर, पुणे व त्याची पत्नी नुरजहाँ गुलफाम अन्सारी, वय ४० वर्षे, रा. सदर यांचे विरुध्द वानवडी पोलीस स्टेशन गु.र.नं. ४९९/२०२५ भा.न्या.सं.क १२३,२२३,२७४,२७५ सिगारेट व अन्य तंबाखुजन्य उत्पादने (जाहिरात प्रतिबंध आणि व्यापार, वाणिज्य उत्पादन पुरवठा व वितरण यांचे विनीमय) अधिनियम कलम ७ (२) व २० (२) अन्न सुरक्षा मानके अधिनियम कलम २००६, चे कलम २६ (२) (i) (iv) चे उल्लंघन केल्याने कलम ५९ प्रमाणे गुन्हा दाखल करण्यात आलेला आहे.
सदरची कारवाई ही अपर पोलीस आयुक्त, पुर्व प्रादेशिक विभाग मनोज पाटील, पोलीस उप-आयुक्त, परिमंडळ ०५ राजलक्ष्मी शिवणकर, मा. सहा. पोलीस आयुक्त वानवडी विभाग नम्रता देसाई यांचे मार्गदर्शनाखाली वरिष्ठ पोलीस निरीक्षक, वानवडी पोलीस स्टेशन भाऊसाहेब पाटील, पोलीस निरीक्षक (गुन्हे) वानवडी विजयकुमार डोके यांचे सुचनांप्रमाणे तपास पथकाचे सहा. पोलीस निरीक्षक उमाकांत महाडिक, पोलीस उपनिरीक्षक अल्फाज शेख तसेच पोलीस अंमलदार दया शेगर, महेश गाढवे, अमोल पिलाणे, आशिष कांबळे, अतुल गायकवाड, विष्णू सुतार, गोपाळ मदने, अभिजित चव्हाण, अमोल गायकवाड, अर्शद सय्यद, विठ्ठल चोरमले, बालाजी वाघमारे व महिला पोलीस अंमलदार चैत्राली यादव या पथकाने केली आहे.

“घर आमच्या हक्काचं!”—काळे झेंडे, काळ्या कपड्यांसह लोकमान्यनगरवासियांनी सरकारचा केला निषेध

पुणे : लोकमान्यनगर बचाव कृती समितीच्याच्या वतीने लोकमान्य नगरातील दत्त मंदिर चौक येथे नागरिकांनी  अभूतपूर्व असा घंटानाद आंदोलन जोरदार केले. थाळ्या, घंटा, काळे झेंडे आणि काळ्या कपडे परिधान करून शेकडो नागरिक एकत्र आल्याने संपूर्ण दत्त मंदिर चौक घोषणांनी दणाणून गेला. लोकमान्यनगर पुनर्विकास प्रश्नावर अनेक दिवसांपासून नागरिकांमध्ये असंतोष वाढत असताना त्याचा उद्रेक आजच्या आंदोलनात स्पष्टपणे दिसून आला. “घर आमच्या हक्काचं नाही कोणाच्या बापाचं!”, “सरकारचं करायचं काय—खाली डोकं वर पाय!”, “लोकमान्यनगरवरील अन्याय आम्ही सहन करणार नाही!” अशा दमदार घोषणांनी वातावरण तापले होते. महिलांसह ज्येष्ठ नागरिक, युवक, विद्यार्थी—सर्वच समाजघटकांनी या आंदोलनात उत्स्फूर्त सहभाग नोंदवत प्रशासनाविरोधात तीव्र रोष दर्शवला. घरकुलाचा हक्क सुरक्षित ठेवण्यासाठी आणि पुनर्विकास प्रक्रियेत पारदर्शकता तसेच न्याय मिळावा, अशी मुख्य मागणी नागरिकांनी केली. आंदोलनकर्त्यांनी सांगितले की, अनेक वर्षे या भागात राहूनही आज पुनर्विकासाच्या नावाखाली त्यांना अनिश्चिततेत ढकलले जात आहे. घरे, हक्क, मालकी आणि भविष्यातील सुरक्षिततेबाबत कोणतीही ठोस हमी न देता निर्णय लादण्याचा प्रयत्न होत असल्याचा त्यांचा आरोप केला.लोकमान्यनगर बचाव कृती समितीने चेतावणी दिली की, प्रशासनाने सकारात्मक संवाद साधून तातडीने उपाययोजना केल्या नाहीत तर पुढील काळात यापेक्षाही मोठे आणि तीव्र आंदोलन छेडले जाईल. स्थानिक नागरिकांचा संताप आणि निर्धार पाहता या प्रश्नाची गंभीरता आणखी वाढलेल असे दिसत आहे. पुढील काळात आम्ही आणखी तीव्र आंदोलनाचा मार्ग अवलंबू – ऍड. गणेश सातपुते“लोकमान्यनगरच्या नागरिकांना न्याय मिळेपर्यंत आमचा लढा थांबणार नाही. पुनर्विकासाच्या नावाखाली कोणाच्याही हक्कांवर गदा येऊ देणार नाही. सरकारने तातडीने संवाद साधून स्पष्ट भूमिका मांडली पाहिजे. नागरिकांचा संताप हा प्रशासनाच्या दुर्लक्षाचा परिणाम आहे. आवश्यक असेल तर पुढील काळात आम्ही आणखी तीव्र आंदोलनाचा मार्ग अवलंबू.” असे ऍड. गणेश सातपुते म्हणाले. 

पुणे/नवी दिल्ली : सोशल मीडियाद्वारे वादग्रस्त, धार्मिक तेढ निर्माण करणारा, अश्लील कन्टेन्ट पसरवण्यात येत आहे. परिणामी, युवकांच्या मानसिक व सामाजिक स्वास्थ्यावर त्याचा विपरीत परिणाम होऊ शकतो. त्यामुळे केंद्रीय गृहमंत्रालयाने धार्मिक, अश्लील डिजिटल कन्टेन्टचे पुनरावलोकन करून दोषी आढळणाऱ्यांवर कठोर कारवाई करावी, अशी मागणी राज्यसभा खासदार प्रा. डॉ. मेधा कुलकर्णी यांनी केंद्रीय गृहमंत्री अमित शहा यांच्याकडे केली. नवी दिल्ली येथे गुरुवारी प्रा. डॉ. कुलकर्णी यांनी अमित शहा यांची भेट घेऊन यासंदर्भात चर्चा केली व निवेदन दिले. शहा यांनी याची दखल घेऊन योग्य ती कार्यवाही केली जाईल, असे आश्वासन दिले.

प्रा. डॉ. मेधा कुलकर्णी यांनी दिलेल्या निवेदनात म्हटले आहे की, हिंदू देव-देवतांचे एआय-आधारित डीपफेक आणि अश्लील स्वरूपातील चित्रे व व्हिडिओ सोशल मीडियावर मोठ्या प्रमाणात प्रसारित होत आहेत. ही गोष्ट अतिशय संतापजनक आणि धार्मिक तेढ निर्माण करणारी आहे. त्यामुळे सोशल मीडियाद्वारे जाणीवपूर्वक अशा गोष्टी पसरवणाऱ्यांवर कठोर कारवाई करावी. यासंदर्भात आपल्या कार्यालयाकडे काही नागरिकांनी सोशल मीडियावर व्हायरल होणारे काही व्हिडिओ व पोस्ट्स तरुणांवर चुकीचा प्रभाव टाकत असल्याची, तसेच त्यातून समाजात गैरसमज, संभ्रम व सामाजिक तणाव वाढवण्याची शक्यता असल्याची चिंता व्यक्त केली आहे. या सर्व पोस्ट्स सध्याच्या सायबर व आयटी नियमांनुसार ‘हानीकारक, दिशाभूल करणाऱ्या किंवा भडकावू’ श्रेणीत येतात का, याचे परीक्षण करण्याची मागणी त्यांनी केंद्र सरकारकडे केली आहे.

सोशल मीडिया सांस्कृतिक देवाणघेवाणीचे माध्यम असले तरी, काहीवेळा ते भावनिक दिशाभूल किंवा सामाजिक ध्रुवीकरण वाढवणारी सामग्री पसरवण्यासाठी वापरले जाते, असेही त्यांनी स्पष्ट केले. या पार्श्वभूमीवर गृहमंत्रालयाने प्राथमिक चौकशी करून सायबर मॉनिटरिंग यंत्रणांचा सहभाग आवश्यक असल्यास विचारात घ्यावा. अनेक पालक आणि नागरिकांनी तरुणांच्या मनावर अशा सामग्रीचा होणारा परिणाम लक्षात आणून दिला आहे. डिजिटल स्पेस जबाबदार राहण्यासाठी काही प्रमाणात देखरेख आवश्यक आहे,” असे कुलकर्णी यांनी पत्रात म्हटले आहे.

यात सेन्सॉरशिपचा हेतू नसून, सामाजिक सलोखा बिघडवणाऱ्याना चाप लावण्याचा उद्देश आहे. आयटी कायद्यांतर्गत आवश्यक ती कारवाई करण्यासाठी संबंधित यंत्रणांना सूचना देण्याची त्यांनी गृहमंत्रालयाला विनंती केली आहे. हाच मुद्दा घेऊन प्रा. डॉ. मेधा कुलकर्णी यांनी काही दिवसांपूर्वी राज्यसभेतही निवेदन सादर केले होते.

पुणे- राज्य जीएसटी अधिकाऱ्यांनी विविध प्रलंबित मागण्यांसाठी आजपासून आपल्या आंदोलनाची तीव्रता वाढविली आहे. ११/१२/२०२५ गुरुवारपासून ‘काम बंदआंदोलन ‘ सुरू केले आहे.

पुणे राज्य वस्तू व सेवा कर विभागातील सर्व संवर्गातील अधिकाऱ्यांनी गेली अनेक वर्ष रखडलेल्या सर्व संवर्गातील बदल्या व पदोन्नती आदेश, भौतिक सोई सुविधा व मनुष्यबळ यांचा तुटवडा , विभागाची अपुरी पुनर्रचना आणि तत्सम इतर विविध प्रलंबित मागण्यासाठी हे आंदोलन पुकारले आहे व ते टप्प्याटप्प्याने पुढे जात आहे. सोमवारी दिनांक ०८/१२/२०२५ पासून हे आंदोलन सुरु झालेले आहे .त्या दिवशी मुख्य राज्य जीएसटी मुख्यालयाच्या प्रवेशद्वारा पुढे सर्व अधिकाऱ्यांनी जोरदार ‘घोषणाबाजी’ केली .मंगळवारी दिनांक ०९/१२/२०२५ रोजी सर्व अधिकारी यांनी ‘काळ्याफिती’ लावून काम केले , तर बुधवारी ‘सामुदायिक रजा आंदोलन’ १०० % यशस्वीरित्या पार पाडले. आता आंदोलनाचा पुढील टप्पा अधिक तीव्र करण्यासाठी दिनांक ११/१२/२०२५ गुरुवारपासून ‘काम बंदआंदोलन ‘ सुरू केले आहे. जोपर्यंत सर्व प्रलंबित मागण्या पूर्ण होत नाहीत, तोपर्यंत आंदोलन अधिक तीव्र होत जाणार आहे . या विविध प्रलंबित मागण्यासाठी अनेक वेळा लेखी निवेदने,बैठका व चर्चा होऊनही विभागाच्या प्रशासनाने चालढकल करीत अद्यापही ठोस निर्णय पारित न केल्याने राज्यभरातील सर्व राज्य जीएसटी अधिकारी हतबल झाले आहेत. शासनाचा वित्तीय कणा असलेल्या व राज्याला 70 ते 75 टक्के महसूल मिळवून देणाऱ्या राज्य जीएसटी विभागाची अतिशय दयनीय अवस्था झाल्याने राजपत्रित अधिकारी संघटनेने शेवटी आंदोलनाचे हे कठोर पाऊल उचलले आहे. यावेळी पुणे राजपत्रित अधिकारी संघटनेचे उपाध्यक्ष श्री विकास शेवाळे, सहसचिव डॉ. कीर्तीराज जाधव , सौ .संगीता दरेकर, सदस्य श्री. प्रविण काळे ,श्री अभिजीत गायकवाड , सौ .पूजा डोंगापुरे व पुणे विभागातील सर्व अधिकारी उपस्थित होते.

▪️ _विजयस्तंभ अभिवादन कार्यक्रम यशस्वी करण्याकरिता सहकार्य करण्याचे जिल्हाधिकाऱ्यांचे आवाहन

पुणे, दि. ११: पेरणे फाटा येथे १ जानेवारी रोजी आयोजित करण्यात येणारा विजयस्तंभ अभिवादन कार्यक्रम सर्व संबंधित शासकीय यंत्रणानी विविध संघटनांना विश्वासात घेवून यशस्वी करावा, अनुयायांची कोणतीही गैरसोय होणार नाही यादृष्टीने जिल्हा प्रशासनाने नियोजन करावे, अशा सूचना जिल्हाधिकारी जितेंद्र डुडी यांनी दिल्या. अनुयायांना आवश्यक त्या सर्व सुविधा पुरविण्यात येतील, अशी ग्वाही जिल्हाधिकारी जितेंद्र डुडी यांनी दिली.

विजयस्तंभ अभिवादन कार्यक्रमाच्या नियोजनासाठी जिल्हाधिकारी कार्यालयात विविध संघटनांसोबत आयोजित बैठकीत ते बोलत होते. यावेळी जिल्हा परिषदेचे मुख्य कार्यकारी अधिकारी गजानन पाटील, पुणे शहर पोलीस उपआयुक्त सोमय मुंढे, पुणे ग्रामीण पोलीस अपर पोलीस अधीक्षक रमेश चोपडे, निवासी उपजिल्हाधिकारी ज्योती कदम, जिल्हा परिषदेचे अतिरिक्त मुख्य कार्यकारी चंद्रकांत वाघमारे, पोलीस उपायुक्त डॉ. संदीप भाजीभाकरे, हिम्मत जाधव, समाज कल्याण उपायुक्त वंदना कोचुरे, सहाय्यक आयुक्त तथा बार्टीचे निबंधक विशाल लोंढे, यांच्यासह सर्व संबंधित विभागाचे अधिकारी-कर्मचारी तसेच विविध संघटनेचे पदाधिकारी उपस्थित होते.

श्री. डुडी म्हणाले, विजस्तंभास अभिवादन करण्यासाठी येणाऱ्या अनुयायांना पिण्याचे पाणी, वापराचे पाणी, स्वच्छतागृह, वाहनतळ, दिशादर्शक फलके, वाहतूक व्यवस्था, आरोग्य व्यवस्था, औषधोपचार सेवा, ड्रोन्, सीसीटिव्ही, पुस्तकालय आदी सर्व सुविधा उपलब्ध करून देण्यात येतील. अनुयायांची कोणताही प्रकारची गैरसोय होणार नाही, याबाबत जिल्हा प्रशासन दक्षता घेत आहे. कार्यक्रमाच्या अनुषंगाने काही सूचना असल्यास प्रशासनाला कळवाव्यात, त्याचा यावर्षीचा नियोजनात समावेश करण्यात येईल.

अनुयायांना धुळीचा त्रास आणि त्यामाध्यमातून निर्माण होणारा आरोग्याचा प्रश्न मार्गी लावण्याकरिता सार्वजनिक बांधकाम विभागाने नियोजन करावे. पाणी पुरवठा सुरळीत राहण्याकरिता पर्यवेक्षकाची नेमणूक करावी. पीएमपीएलने बसेसच्या तपासणीच्याअनुषंगाने आवश्यक ती सर्व माहिती पुणे प्रादेशिक परिवहन विभागास 25 डिसेंबर 2025 पर्यंत सादर करावी. त्यानुसार परिवहन विभागाने तपासणी करावी. पीएमपीएलच्या वाहनचालकांच्या आरोग्य तपासणीकरिता जिल्हा शैल्यचिकीत्सक कार्यालयाने शिबीर आयोजित करावे. गरोदर महिला, लहान मुले आणि वयोवृद्ध महिलांकरिता स्वतंत्र रांग करण्याबाबत पोलीस प्रशासनाने नियोजन करावे.

सर्व संबंधित विभागाच्या अधिकाऱ्यांकरिता कार्यक्रमस्थळी एक स्वतंत्र नियंत्रण कक्ष तसेच अनुयांयाच्या तक्रारीची दखल घेण्याकरिता तक्रार निवारण कक्ष देखील स्थापन करण्यात येणार आहे. निवासी उपजिल्हाधिकाऱ्यांने सन 2019-20 चा विजयस्तंभ नियोजन आराखडा आणि यावर्षीचा आराखडा याचा तुलनात्मक अभ्यास करुन त्यामध्ये तफावत असल्यास यावर्षीच्या आराखड्यात तशा सुधारणा कराव्यात. कार्यक्रमाकरिता होणाऱ्या खर्चाचा ताळमेळ लावण्याकरिता मुख्य लेखा.व वित्त. अधिकारी यांच्या अध्यक्षतेखाली एक समिती नेमण्यात यावी, ती समिती लेखापरिक्षण अहवाल प्रशासनाला सादर करतील. पोलीस विभागाशी समन्वय साधून विजयस्तंभाकडे येणाऱ्या सर्व मार्गांवर चोख वाहतूक नियोजन करण्यात येईल. तसेच कायदा व सुव्यवस्थेच्या अनुषंगाने सर्व उपाययोजना करण्यात येतील.

बैठकीत विविध संघटनांच्या पदाधिकारी व प्रतिनिधींनी उपयुक्त सूचना केल्या असून त्या सूचनांचा आदर ठेऊन कार्यक्रम यशस्वी होण्यासाठी सकारात्मकरित्या अंमलबजावणी केली जाईल, संघटनांनी कार्यक्रम यशस्वीपणे पार पाडण्याकरिता सहकार्य करावे, असे आवाहन श्री. डुडी यांनी केले. .

श्री. पाटील म्हणाले, आषाढी वारीच्या धर्तीवर अनुयांना सोई-सुविधा पुरविण्यात येतील, त्यादृष्टीने नियोजन करण्यात येत आहे. सोहळा सुरळीतपणे पार पाडण्याकरिता पुरेषा मनुष्यबळ, साधनसाम्रुगी, शौचालय, टँकर, स्वच्छता, पाणीपुरवठा, आदी उपलब्ध करुन देण्यात येणार आहे, गतवेळीपेक्षा यावेळी शौचालयांची संख्या वाढविण्यात आली आहेत, असेही श्री. पाटील म्हणाले.