चित्रपट महोत्सवासाठी ऑनलाईन नोंदणी प्रक्रिया सुरू

पुणे फिल्म फाउंडेशन, सांस्कृतिक विभाग, महाराष्ट्र शासन व दादासाहेब फाळके चित्रनगरी यांच्या संयुक्त विद्यमाने १३ ते २० फेब्रुवारी २०२५ दरम्यान आयोजित करण्यात येत असलेल्या २३ व्या पुणे आंतरराष्ट्रीय चित्रपट महोत्सवा(पीफ)तील स्पर्धात्मक विभागातील मराठी चित्रपटांची यादी आज महोत्सवाचे संचालक डॉ. जब्बार पटेल यांनी जाहीर केली.

या स्पर्धेसाठी एकूण ४० मराठी चित्रपटांनी आपला सहभाग नोंदवला. यातून ७ चित्रपटांची अंतिम स्पर्धेसाठी निवड झाली आहे. गिराण (दिग्दर्शक – विजय श्रीरंग खुडे), सांगला (दिग्दर्शक – रावबा गजमल), मॅजिक (दिग्दर्शक – रवींद्र विजय करमरकर), सिनेमॅन (दिग्दर्शक – उमेश बागडे), निर्जली (दिग्दर्शक – स्वाती सदाशिव कडू), रावसाहेब (दिग्दर्शक – निखिल महाजन), स्नो फ्लॉवर (दिग्दर्शक – गजेंद्र अहिरे) या ७ चित्रपटातून सर्वोत्कृष्ट आंतरराष्ट्रीय मराठी चित्रपटाची निवड चित्रपट महोत्सवात परदेशी आंतरराष्ट्रीय ज्युरी चित्रपट बघून करतील.

महाराष्ट्र शासनाचा संत तुकाराम उत्कृष्ट आंतराष्ट्रीय मराठी चित्रपट या स्पर्धात्मक विभागासाठी ५ लाख रुपयांचा रोख पुरस्कार आहे. चित्रपट महोत्सवाचा सांगता समारंभात हा पुरस्कार समारंभपूर्वक प्रदान केला जाईल.

चित्रपट महोत्सवासाठी डेलीगेट नोंदणी प्रक्रिया www.piffindia.com या संकेतस्थळावर सुरू झाली असून, सर्वांसाठी कॅटलॉग फी केवळ रु. ८०० इतकी आहे.

पुणे आंतरराष्ट्रीय व्यंगचित्र महोत्सवाला सुरुवात
देश-परदेशातील 280 व्यंगचित्रकारांच्या व्यंगचित्रांचा समावेश
शनिवार-रविवारी परिसंवाद, प्रात्यक्षिकांचे आयोजन

पुणे : देश-विदेशातील व्यंगचित्रकारांनी रेखाटलेल्या व्यंगचित्रांची दुनिया आज (दि. 17) बालगंधर्व कलादालनात पुणेकरांना पाहण्यासाठी खुली झाली आहे. व्यंगचित्र महोत्सव रविवार, दि. 19 जानेवारीपर्यंत सकाळी 10 ते रात्री 8 या वेळेत सर्वांसाठी खुला आहे. जवळपास 280 व्यंगचित्रकारांची चित्रे यात मांडण्यात आली आहेत.
युवा संवाद सामाजिक संस्थेच्या पुढाकारातून पुणे आंतरराष्ट्रीय व्यंगचित्र महोत्सवाचे आयोजन करण्यात आले असून या महोत्सवाचे उद्घाटन शुक्रवारी ज्येष्ठ पत्रकार अविनाश भट यांच्या हस्ते झाले. ज्येष्ठ व्यंगचित्रकार वैजनाथ दुलंगे, घन:श्याम देशमुख, लहु काळे, गणेश जोशी आणि ज्येष्ठ चित्रकार मुरली लाहोटी यांची प्रमुख उपस्थिती होती.
व्यंगचित्र महोत्सवाचे संयोजक, व्यंगचित्रकार धनराज गरड यांनी प्रास्ताविकात उपक्रमाची माहिती देताना सांगितले की, कार्टुनिस्ट कंबाईन या संस्थेच्या सहकार्याने महोत्सवाचे आयोजन करण्यात आले असून पुण्याच्या सांस्कृतिक पटलावर व्यंगचित्रांच्या माध्यमातून एक वेगळी ओळख निर्माण करावी याकरीता व्यंगचित्र महोत्सवाचे आयोजन करण्यात आले आहे. महोत्सवाचे यंदाचे दुसरे वर्ष आहे. शनिवार (दि. 18) आणि रविवारी (दि. 19) व्यंगचित्रांची प्रात्यक्षिके आणि परिसंवादांचेही आयोजन करण्यात आले आहे.
राजकीय, सामाजिक, पर्यावरण, आधुनिक तंत्रज्ञान, प्रदुषण, पाणी टंचाई, जागतिक पातळीवरील युद्ध परिस्थिती अशा विविध विषयांवर मार्मिक टीका-टिप्पणी करणारी व्यंगचित्रे प्रदर्शनात असून महाराष्ट्रासह देश-विदेशातील व्यंगचित्रकारांची प्रतिभा यातून पाहावयास मिळणार आहे.
उद्घाटनपर मनोगत व्यक्त करताना अविनाश भट म्हणाले, व्यंगचित्रकार त्याच्या चित्राच्या माध्यमातून मोठा आशय व्यक्त करीत असतो. व्यंगचित्रकार हा जन्माला यावा लागतो त्याचे काम सर्जनशील असते. व्यंगचित्रकार समाजातील बारकावे मिश्किल भावातून आपल्या चित्रांद्वारे प्रकट करतो त्याचप्रमाणे समाजातील संवेदनशीलता जीवंत ठेवतो.
वैजनाथ दुलंगे म्हणाले, व्यंगचित्रकला ही गांभीर्याने करण्याची करण्याची गोष्ट असून ती दुधारी तलवार आहे. व्यंगचित्रकाराला राजकीय, सामाजिक तसेच आजूबाजूच्या घटनांचा डोळसपणे, सखोल अभ्यास करावा लागतो. व्यंगचित्रकाराने स्वत:च्या शैलीतून ओळख निर्माण करताना झोकून देऊन मेहनत करणे आवश्यक आहे. हसवसा हसवता विचार करायला लावणारी तर काही वेळा हादरवून टाकणारा आशय मांडणारी अशी ही व्यंगचित्रकला आहे. घन:श्याम देशमुख यांनी मनोगत व्यक्त केले. कार्यक्रमाचे सूत्रसंचालन किशोर गरड यांनी केले.

24 जानेवारीपासून निरंकारी संत समागमात मानवतेचा महासंगम

पुण्यासह संपूर्ण महाराष्ट्रातून हजारो स्वयंसेवक पूर्वतयारीमध्ये सहभागी

पिंपरी: महाराष्ट्राचा 58वा निरंकारी संत समागम सुरु होण्यास अवघे काही दिवस उरले असल्याने समागमाच्या पूर्वतयारीमध्ये लागलेले निरंकारी भाविक भक्तगण समागम स्थळ समतल व सुंदर बनविण्यासाठी त्यामधील प्रत्येक व्यवस्थेला अंतिम रुप देत आहेत. समागमाच्या पूर्वतयारीमध्ये पुणे झोनसह संपूर्ण महाराष्ट्रातील हजारो सेवादल स्वयंसेवक आणि भाविक भक्तगण सातत्याने आपल्या निष्काम सेवा अर्पण करत आहेत. पिंपरीतील मिलिटरी डेअरी फार्मच्या सुमारे 400 एकरच्या विस्तीर्ण मैदानात शुक्रवार, दि.24 जानेवारी 2025 पासून हा तीन दिवसीय संत समागम सुरू होत असून, त्याची सांगता 26 जानेवारी 2025 रोजी होणार आहे. मुख्य सत्संग कार्यक्रम दररोज दुपारी 2 वाजता सुरू होईल ज्यामध्ये अनेक वक्ते, गीतकार, कवी सद्गुरु आणि ईश्वराप्रती आपल्या मनातील भावना व्यक्त करतील. शेवटी रात्री ८ वाजल्यापासून सर्वांना सद्गुरु माता सुदीक्षा जी महाराज यांचा पवित्र आशीर्वाद लाभणार आहे.

मागील एक महिन्यांपासून महाराष्ट्रा व्यतिरिक्त इतर राज्यांतून निरंकारी भक्तगणांनी समागम स्थळांवर येऊन आपल्या निष्काम सेवांच्या माध्यमातून समागम स्थळाला एका सुंदर नगरीच्या रुपात परिवर्तित केले आहे. सर्व श्रद्धाळू ज्या उत्साहाने, आवडीने, भक्तिभावाने, मर्यादा व अनुशासनाचे पालन करत आपल्या सेवा निभावत आहेत ते पाहून जनसामान्य अत्यंत प्रभावित आहेत. समागम स्थळाचे हे अनुपम दृश्य आजूबाजूने जाणाऱ्या वाटसरूंना आणि स्थानिक नागरिकांना आकर्षण व उत्सुकतेचे केंद्र बनून राहिले आहे.

मानवतेच्या कल्याणासाठी आयोजित केलेल्या या संत समागमाचे साक्षी बनण्यासाठी समस्त भाविकांना व निरंकारी भक्तगणांना नुक्कड नाटक, बॅनर तसेच पुण्याच्या कानाकोपऱ्यात खुल्या प्रांगणांमध्ये सत्संगच्या माध्यमातून सादर आमंत्रित केले जात आहे ज्यायोगे त्यांनी या संत समागमामध्ये सहभागी होऊन आपले जीवन सार्थक करावे.

समागमात सहभागी होणाऱ्या सर्व भक्तगणांसाठी व्यापक स्तरावर निवासी तंबू, लंगर, कॅन्टीन, दवाखाने, सुरक्षा व्यवस्था, पार्किंग आणि रेल्वे स्थानक आणि बसस्थानकातून ये-जा करण्यासाठी वाहतूक व्यवस्था इत्यादीची यथोचित व्यवस्था करण्यात आली आहे. समागम स्थळावर स्वच्छतेची विशेष काळजी घेतली जात आहे. प्रकाशन विभागाकडून समागम स्थळावर वेगवेगळ्या ठिकाणी स्टॉल लावले जात आहेत. संत निरंकारी मिशनचे सचित्र दर्शन घडविण्यासाठी आकर्षक निरंकारी प्रदर्शनीचेही आयोजन केले जात आहे यासह एकूण आठ कार्यशाळा असलेली भव्य बाल प्रदर्शनी देखील असेल, प्रत्येक कार्यशाळा मुलांना आकर्षक आणि शैक्षणिक अनुभव प्रदान करण्यासाठी डिझाइन करण्यात आली आहे. हे सर्व सद्गुरु माता सुदीक्षाजी महाराज यांच्या पावन मार्गदर्शनानेच शक्य झाले आहे.

भक्तिभावाने केल्या गेलेल्या या सर्व पूर्वतयारीमध्ये कुशलतेची एक सुंदर झलक पहायला मिळत आहे. निश्चितच या संत समागमामध्ये देश-विदेशातील विविधतेने नटलेल्या संस्कृतीची व सार्वभौमत्वाची छटा उमटलेली पहायला मिळेल आणि यामध्ये सहभागी होणारे समस्त भाविक भक्तगण अलौकिक आनंदाची प्राप्ती करत सद्गुरु व संतांच्या दिव्य वाणीने प्रभावित होऊन आपल्या जीवनाच्या मूळ उद्देशाकडे अग्रेसर होत प्रेमाभक्तीच्या भावनेचा विस्तार करतील.

मानवतेच्या या महामेळाव्यासाठी प्रत्येक धर्मप्रेमी बंधू भगिनींना आदरपूर्वक आमंत्रित करण्यात येत आहे.

जागर माय मराठीचा, संदेश महाराष्ट्राच्या ऐक्याचा.

पुणे;शुक्रवार दि. १७ जानेवारी रोजी सरहद शाळेच्या प्रांगणात सकाळी ७.३० वाजता मराठीच्या प्रचार व प्रसारार्थ शोभा यात्रेने बाल साहित्य संमेलनाची थाटात सुरुवात झाली.
सरहद, पुणे आयोजित अखिल भारतीय साहित्य महामंडळचे ९८वे अखिल भारतीय मराठी साहित्य संमेलन दि. २१, २२ व २३ फेब्रुवारी २०२५ या कालावधीत दिल्ली येथील छत्रपती शिवाजी साहित्य नगरी (तालकटोरा स्टेडियम) येथे होत आहे. नुकताच मराठी भाषेला अभिजात भाषेचा दर्जा प्राप्त झाला आहे. या पार्श्वभूमीवर सरहद मध्ये बाल साहित्य संमेलनाचे आयोजन करण्यात आले आहे.
दोन दिवसीय बाल साहित्य संमेलनाची सुरुवात दि. १७ रोजी सकाळी ७.३० वाजता शोभा यात्रेने करण्यात आली. ग्रंथ पूजन करून शोभा यात्रेस सुरुवात झाली. ढोल-ताशा, टाळ मृदुंग, लेझीम,साहित्यिक व संतांच्या, वारकऱ्यांच्या वेशभूषेतील पूर्व प्राथमिक विभागाचे बालचमुही यात सहभागी झाले होते.वाचनाचे महत्त्व, साहित्यिकांचे विचार सांगणारे फलक विद्यार्थ्यांनी हाती घेतले होते.चला चला रे वाचू आपण पुस्तक, ज्ञाना पुढे होऊ नतमस्तक’ असा संदेश देत, मराठी भाषेचे महत्व सांगणाऱ्या घोषणा विद्यार्थी देत होते.
संस्थेचे अध्यक्ष संजय नहार, सचिव सुषमा नहार, विश्वस्त शैलेश वाडेकर, मुख्याध्यापिका कविता वानखेडे,प्राथमिक विभागाच्या पर्यवेक्षिका दिपाली कोंडे, ज्यु.कॉलेजच्या पर्यवेक्षिका रुबीना देशमुख, माध्यमिक विभागाच्या पर्यवेक्षिका स्वाती राऊत, पूर्व प्राथमिक विभागाच्या पर्यवेक्षिका पल्लवी पासलकर, सर्व विभागाचे विद्यार्थी, पालक आणि शिक्षक वृंद उपस्थित होते.

पुणे, दि. १७ : मुख्यमंत्री यांच्या निर्देशानुसार शिक्षण विभागाकरीता आखण्यात आलेल्या १० कलमी कार्यक्रमाची प्रभावीपणे अंमलबजावणी करावी; विभागाच्या अधिकाधिक सेवा ऑनलाईन पद्धतीने उपलब्ध करण्याच्यादृष्टीने नियोजन करावे, असे निर्देश शालेय शिक्षण मंत्री दादाजी भुसे यांनी दिले.

महाराष्ट्र राज्य माध्यमिक व उच्च माध्यमिक शिक्षण मंडळ येथे शालेय शिक्षण आयुक्तालयाच्या अधिनस्त असलेल्या विषयाबाबत आढावा बैठकीत त्यांनी सूचना दिल्या. यावेळी शिक्षण आयुक्त सचिंद्र प्रताप सिंह, राज्य शैक्षणिक संशोधन व प्रशिक्षण परिषदेचे संचालक राहुल रेखावर, शिक्षण संचालक माध्यमिक संपत गोसावी, शिक्षण संचालक प्राथमिक शरद गोसावी, योजना संचालक महेश पालकर, बालभारतीचे संचालक कृष्णकुमार पाटील आदी उपस्थित होते.

श्री. भुसे म्हणाले, माध्यमिक व उच्च माध्यमिक परीक्षेतील गैरप्रकार टाळण्यासाठी कृती कार्यक्रम आखून राज्यात कॉपीमुक्त अभियान राबवावे. शिक्षण विभागातील अधिकाऱ्यांनी शाळांना भेटी देऊन तेथील परिस्थितीचा आढावा घ्यावा, भेटीदरम्यान स्वच्छतागृह, स्वयंपाकगृह, आहार, स्वच्छ पिण्याचे पाणी, बैठक व्यवस्था आदी भौतिक सुविधांसोबत अभ्यासक्रमावरही लक्ष केंद्रीत करावे. शाळेतील भौतिक सुविधांबाबत राज्यस्तरीय आराखडा तयार करावा, याकरीता आवश्यकतेनुसार सुधारणात्मक उपाययोजना कराव्यात. याकामी विविध सामाजिक संस्थांचीही मदत घ्यावी. अधिकाऱ्यांनी एक शाळा दत्तक घेण्याबाबत नियोजन करावे. शाळेच्या पहिल्या दिवशी मुख्यमंत्री प्रत्यक्ष शाळेत जाऊन विद्यार्थ्यांचे स्वागत करणार आहेत, त्यादृष्टीने नियोजन करावे.

विद्यार्थ्यांच्या अंगी असलेल्या कला, क्रीडा अशा गुणांचा विकास झाला पाहिजे, याकरीता विभागनिहाय शाळेबाबत नियोजन करावे. तालुकास्तरावर इतर शाळांना मार्गदर्शक ठरेल अशी एखादी आदर्श शाळा निर्माण करा, त्यामध्ये वाचनालय, अत्याधुनिक प्रयोगशाळा, संगणकीकृत वर्ग, क्रीडांगण, खेळाचे साहित्य आदींचा समावेश करावा. शालेय प्रवेश प्रक्रियेत पालक व विद्यार्थ्यांची गैरसोय होता कामा नये, शाळेत विद्यार्थ्यांना गुणवत्तापूर्ण आहार द्यावा, विद्यार्थ्यांची नियमितपणे आरोग्य तपासणी करावी, आजाराचे निदान होईपर्यंत त्याला मदत करावी, असेही ते म्हणाले.

विविध जिल्ह्यात नाविन्यपूर्ण उपक्रम राबविण्यात येत असून त्याबाबत राज्यस्तरीय अंमलबजावणी करण्याच्यादृष्टीने प्रयत्न करावेत. नाविन्यपूर्ण उपक्रम राबविणाऱ्या शिक्षकाला प्रोत्साहान देण्यात यावे, शैक्षणिक क्षेत्रात गुणात्मक परिवर्तन करणाऱ्या शिक्षकांचा गौरव करावा. आदर्श शिक्षकांच्या अंगी असलेल्या कौशल्याचा इतर ठिकाणाही उपयोग करुन घ्यावा. शिक्षकांचे वैद्यकीय प्रतिपूर्तीचे देयक वेळेत मिळेल यादृष्टीने नियोजन करावे. शिक्षक भरती प्रक्रियेला गती द्यावी. शैक्षणिक क्षेत्रात परिवर्तनात्मक बदल घडविण्याच्या कार्यात पालक, शिक्षणतज्ज्ञ, सामाजिक संस्थांनी सहकार्य करावे, असे आवाहन श्री. भुसे यांनी केले.

राष्ट्रीय शैक्षणिक धोरणाची प्रभावीपणे अंमलबजावणी करावी. सीबीएसई पॅटर्नच्या शाळेकरीता प्रशिक्षित शिक्षकांना प्रशिक्षण देण्याची कार्यवाही करावी. राष्ट्रगीतानंतर राज्य गीताचे गायन होईल, याबाबत दक्षता घ्यावी. कामकाज करताना त्रुटी राहिल्यास त्याची पूर्तता करुन पुढील कामाचे नियोजन करावे.

श्री. भुसे यांच्या हस्ते शिक्षण आयुक्तालयाच्या ‘दिशादर्शिका वर्ष २०२५’ चे अनावरण करण्यात आले.

श्री. सिंह म्हणाले. आगामी काळात शैक्षणिक क्षेत्रात तंत्रज्ञानाचा वापर करण्यावर विभागाचा भर आहे. शिक्षकांना शैक्षणिक कार्यात सहभागी करुन शालेय पातळीवर गुणात्मक परिवर्तन घडविण्याकरीता प्रयत्न करण्यात येईल, असेही श्री. सिंह म्हणाले.

श्री. गोसावी यांनी प्राथमिक विभाग, श्री. सूर्यवंशी यांनी माध्यमिक विभाग आणि श्री. पालकर यांनी योजना विभागाचा आढावा यावेळी सादर केला.
00000

कलायन कल्चरल सेंटर तर्फे भारतीय शास्त्रीय संगीत कार्यक्रमाचे आयोजन
पुणे : तबल्याच्या थापेतून निर्माण होणारे मनोहारी ताल, त्याला हार्मोनियमची सुरेल साथ आणि विविध रागांमधून तयार झालेले  शास्त्रीय संगीत अशा ताल आणि सुरांच्या मिलापातून संगीतमय सुरेल बैठक रंगली. तन्मय  बिच्चू यांनी उस्ताद झाकीर हुसेन यांच्या कल्पनेतून निर्माण झालेली कला रसिकांच्या समोर सादर केली. त्यांचे तबलावादन ऐकून रसिकांना उस्ताद झाकीर हुसेन यांच्या तबला वादनाचा आनंद मिळाला.

कलायन कल्चरल सेंटर तर्फे कर्वे रस्त्यावरील संस्थेच्या सभागृहामध्ये या कार्यक्रमाचे आयोजन करण्यात आले होते. तबलावादक उस्ताद झाकीर हुसेन यांचे शिष्य तन्मय बिच्चू आणि मेहेर परळीकर यांनी कार्यक्रमात सादरीकरण केले. अमेय बिच्चू, ऋषिकेश जगताप, सारंग काटकर आणि छाया गोरले यांनी त्यांना साथसंगत केली.

तन्मय बिच्चू यांनी  तीन तालातून मैफिलीची सुरुवात केली. अमेय  बिच्चू यांनी त्यांना हार्मोनियम वर साथ दिली. नादमय वादन, कठीण लयकारी आणि काव्यमय रचना असे अनेक पैलू उलगडत अप्रतिम तबलावादन तन्मय बिच्चू यांनी केले. मेहेर परळीकर यांनी राग यमन ने आपल्या मैफिलीची सुरुवात केली आणि त्या नंतर राग खामज प्रस्तुत केला. विविध तालातील बंदिश यांनी नटलेल्या त्यांच्या गायनाने रसिकांना मंत्रमुग्ध केले.

पुणे शहरात सिग्नलची व्यवस्था स्मार्ट सिटीकडून पुणे पोलिसांकडे सोपविण्यात यावी या प्रस्तावाचा मी मुख्यमंत्री आणि उपमुख्यमंत्री यांच्याकडे पाठपुरावा करतो- महाराष्ट्र गृहराज्यमंत्री योगेश कदम

पुणे दि. १७ : पुणे शहरांमध्ये नोव्हेंबर २०२४ पासून आतापर्यंत जे गुन्हे घडलेले आहेत त्याबाबत आज पुणे पोलीस आयुक्तालय येथे बैठक आयोजित करण्यात आली होती. ही बैठक महाराष्ट्राचे गृहराज्यमंत्री योगेश कदम आणि विधान परिषद उपसभापती डॉ. नीलम गोऱ्हे यांच्या प्रमुख उपस्थितीत पार पडली. त्याचबरोबर पुणे शहर पोलीस आयुक्त अमितेश कुमार यांनी घडलेल्या गुन्ह्यांच्या कारवाईबाबत सादरीकरण केले. यावेळी घडलेल्या घटनांवर गांभीर्याने लक्ष देत अशा घटना पुन्हा घडू नयेत यासाठी उपसभापती डॉ. नीलम गोऱ्हे यांनी काही महत्त्वाच्या सूचना देत उपायोजना करण्याबाबत सांगितले आहे.

महिलांवरील अत्याचार रोखण्यासाठी सर्व घटकांनी एकत्र येऊन काम करण्याची गरज आहे, अशा सूचना डॉ. नीलम गोऱ्हे यांनी यावेळी दिल्या. तसेच, पुढे बोलताना त्या म्हणाल्या की, “आज या बैठकीत मी चार-पाच प्रश्न समोर मांडले आणि त्यामध्ये पहिला प्रश्न म्हणजे पुण्यातल्या वाहतूक कोंडी संदर्भातला आहे. यामध्ये सिग्नलची व्यवस्था, पुणे शहरांमध्ये स्मार्ट सिटीकडून पुणे पोलिसांकडे सोपवण्यात यावी हा प्रस्ताव अजूनही विचाराधीन आहे, बऱ्याच वर्षापासून हा प्रयत्न चाललेला आहे. तर तो प्रस्ताव सन्माननीय मुख्यमंत्री देवेंद्रजी फडणवीस आणि उपमुख्यमंत्री एकनाथजी शिंदे, अजितदादा पवार यांच्याकडे मी पाठपुरावा करतो असं गृहराज्यमंत्री श्री. योगेश कदम यांनी सांगितले. दुसरा महत्त्वाचा विषय म्हणजे नवीन दंड सहितेनुसार, महिलांच्या विरोधात जे हिंसाचार आणि अत्याचाराचे गुन्हे आहेत ते B Summery केले जातात म्हणजे ते रद्द केले जातात परंतु, दंड संहितेत म्हटलेले आहे की असे कुठलेही गुन्हे रद्द करता कामा नयेत, तर त्याचे पुनर्निरीक्षण करा, अशा मी त्यांना सूचना दिलेल्या आहेत.

त्याचबरोबर शहरामध्ये बाराशे-तेराशे पॉक्सोची प्रकरणे आहेत. त्यामधल्या मुलींना प्रत्येक तारखेच्या आधी कळवणे क्रमप्राप्त असते की, त्यांची तारीख आहे आणि त्यांना कोणत्या अडचणी आहेत का? त्या प्रत्येक मुलीला दर महिन्यात त्यांच्या तारखेच्या वेळेला पुणे पोलीस फोन करतात कोणती अडचण असेल तर, गृह भेट देतात. यावर डॉ. नीलम गोऱ्हे यांनी मुलींची उमेद वाढवण्याच्या दृष्टीने काही साहित्य उपसभापती कार्यालय आणि स्त्री आधार केंद्राच्यावतीने देण्याची इच्छा असल्याचे व्यक्त केले आणि यासाठी त्यांचा अत्यंत सकारात्मक प्रतिसाद मिळाला.

तसेच, पुणे शहराची वस्ती वाढत आहे म्हणून महिला दक्षता समितीच्या ज्या पोलीस स्टेशन पुरत्या मर्यादित आहेत तशा न ठेवता बीट स्तरावरती महिला दक्षता समिती कराव्यात असे सुचवले. पोलीस निधी हा जो उपक्रम आहे तो शाळा, कॉलेजपर्यंत मर्यादित आहे. तर जे बीटचे कॉन्स्टेबल्स आहे ते त्या परिसरामध्ये सातत्याने जातच असतात त्यांनी महिलांची समिती बीट स्तरावरती करावी याला पण पोलीस आयुक्त यांनी मान्यता दिलेली आहे आणि त्याच्याबद्दल ते सकारात्मक होते. या खेरीज ड्रग्से प्रमाण कमी झाले पाहिजे, वाहतूक कोंडीमुळे होणाऱ्या अपघातासाठी आणि सायकल प्रेमींसाठी सुरक्षिततेची पावलं उचलली गेली पाहिजेत,” असे उपसभापती डॉ. नीलम गोऱ्हे म्हणाल्या.

पुढे ऑनर किलिंग सारख्या महत्त्वाच्या मुद्द्याकडे लक्ष वेधत उपसभापती डॉ. नीलम गोऱ्हे म्हणाल्या, “ऑनर किलिंगची एकही घटना पुणे शहरात घडलेली नाही आहे. परंतु, ऑनर किलिंग हे टायटल गुन्ह्यांमध्ये असावं जेणेकरून एखादी जरी ऑनर किलिंगची घटना घडली तर त्याची गांभीर्याने दखल घेतली जाईल.”

• संक्रातीला गरजूना साड्या वाण म्हणून देताना आनंद – तेजस्विनी दाभेकर

पुणे – घरकाम करणाऱ्या महिला ह्या आपल्या कुटुंबाचाच एक भाग आहेत असे समजूनच त्यांच्याशी वागले पाहिजे आणि त्यांच्या सुखदुःखात आपण सहभागी झाले पाहिजे असे मा. नगरसेविका व शिक्षण समिती अध्यक्ष मंजुश्री खर्डेकर म्हणाल्या आज संक्रातीच्या हळदीकुंकवाच्या निमित्ताने घरकाम करणाऱ्या गरजू भगिनींना साड्या वाण म्हणून देताना खूप आनंद होतं आहे असे भरत मित्र मंडळाच्या महिला उत्सव प्रमुख तेजस्विनी दाभेकर म्हणाल्या.

भरत मित्र मंडळाच्या वतीने हळदीकुंकू समारंभ व गरजू महिलांना साडी भेट देण्याचा उपक्रम आयोजित करण्यात आला होता त्यावेळी ह्या दोघींनी हे मत व्यक्त केले.घरकाम करणाऱ्या महिला ह्या कबाडकष्ट करून आपला संसार सावरत असतात तसेच त्या अनेक वेळा सणासुदीला सुद्धा धुणी भांडी, झाडू पोछा, कपडे धुणे इ कामं करत असतात, त्यांना क्वचितच सुट्टी मिळते, अश्या परिस्थितीत ह्या महिलांच्या चेहऱ्यावर आनंद फुलावा यासाठी आम्ही असे उपक्रम राबवत असल्याचे मंजुश्री खर्डेकर आणि तेजस्विनी दाभेकर म्हणाल्या.यावेळी 35 महिलांना साडी वाण म्हणून भेट देण्यात आली तर सुमारे 500 महिलांना हळदीकुंकू व भेटवस्तू वाण म्हणून देण्यात आल्या.

यावेळी भरत मित्र मंडळाचे संस्थापक बाळासाहेब दाभेकर,क्रिएटिव्ह फॉउंडेशन चे अध्यक्ष संदीप खर्डेकर,उत्सव प्रमुख निरंजन दाभेकर,अनिल यनपुरे,चंदन बकरे इ मान्यवर उपस्थित होते.

पुणे – शिवसेना गटाचे शहर प्रमुख नाना भानगिरे आणि भाजपमध्ये नुकताच प्रवेश केलेल्या शिवसेना (उबाठा) गटातील माजी नगरसेवक विशाल धनवडे यांची मकर संक्रांत पर्वात राज्याचे उच्च व तंत्रशिक्षण मंत्री चंद्रकांतदादा पाटील यांच्या प्रमुख उपस्थितीत दिलजमाई झाली.

देशात इंडिया आघाडी आणि राज्यात महाविकास आघाडी फुटीच्या उंबरठ्यावर असताना, राज्यातील महायुतीच्या घटक पक्षांमध्ये आणि नेत्यांमध्ये एकवाक्यता असून, आम्ही एक कुटुंब म्हणून एकत्र असल्याचे मत चंद्रकांतदादा पाटील यांनी या वेळी व्यक्त केले.

माजी नगरसेवक विशाल धनावडे म्हणाले, “खरी शिवसेना कोणती याबाबत पत्रकार परिषदेत प्रश्न विचारल्यानंतर अनवधानाने उद्धव ठाकरे असे उत्तर दिले गेले. त्याबद्दल कोणाच्या भावना दुखावल्या असतील तर मी दिलगिरी व्यक्त करतो. महायुतीतील आम्ही सर्वच पक्ष एकदिलाने काम करत असून उपमुख्यमंत्री एकनाथ शिंदे आणि शिवसेनेबद्दल आमच्या सर्वांच्या मनात नितांत प्रेम, आदर आणि विश्वास आहे.”

शिवसेना शहर प्रमुख नाना भानगिरे म्हणाले, “धनवडे यांनी केलेल्या खुलाशानंतर आमच्या मनात त्यांच्याबद्दल किंवा भाजपमध्ये नुकत्याच प्रवेश केलेल्या शिवसेना (उबाठा) नगरसेवकांबद्दल कोणताही आक्षेप नाही. राज्याचे मंत्री चंद्रकांत दादा पाटील यांनी वडिलकीच्या नात्याने आमची एकत्र भेट घडवून आणली, त्याबद्दल आम्ही कृतज्ञता व्यक्त करतो. पुणे शहराच्या विकासासाठी या पुढील काळात आम्ही महायुती म्हणून एकदिलाने काम करणार आहोत.”

विशाल धनवडे, बाळा ओसवाल, पल्लवी जावळे, संगीता ठोसर, प्राची आल्हट या नगरसेवकांनी भाजपमध्ये नुकताच प्रवेश केला.