पुणे, दि. १७: मावळ तालुक्यातील कुंडमळा येथे घडलेली दुर्घटना आणि त्यात झालेले ४ पर्यटकांचा मृत्यू हे अतिशय दुर्दैवी आहेत. नागरिकांच्या सुरक्षेला सर्वोच्च प्राधान्य देऊन संभाव्य दुर्घटना टाळण्यासाठी सर्व यंत्रणांनी एकत्रितपणे काम करावे. आपत्तीच्या काळात जिल्हा प्रशासनाच्यावतीने जारी केलेल्या मार्गदर्शक सूचनांचे पालन करावे, असे निर्देश जिल्हाधिकारी कार्यालयात जिल्हा आपत्ती व्यवस्थापन प्राधिकरणाच्या कामकाज आढावा बैठकीत जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डूडी यांनी दिले.

या बैठकीस जिल्हा परिषदेचे मुख्य कार्यकारी अधिकारी गजानन पाटील, जिल्हा पोलीस अधीक्षक ग्रामीण संदीप गिल्ल, जिल्हा आपत्ती व्यवस्थापन अधिकरी विठ्ठल बनोटे आदी उपस्थित होते.

श्री. डुडी म्हणाले, आपत्ती व्यवस्थानाच्यादृष्टीने जिल्ह्यातील धोकादायक तसेच अतिधोकादायक जुने पुल, साकव, रस्ते, इमारती, वाडे, जाहिरात फलके, रेल्वे पुलाचे येत्या 7 दिवसात बांधकाम तपासणी (स्ट्रॅक्चरल ऑडिट) करुन त्याबाबतचा अहवाल जिल्हा आपत्ती व्यवस्थापन कक्षाकडे सादर करावा, परिक्षणात धोकादायक असलेले पुल, साकव, इमारती, वाडे, जाहिरात फलके काढून घ्यावेत, कार्यवाही करतांना नागरिकांची गैरसोय होणार नाही, याबाबत दक्षता घ्यावी,

जिल्ह्यातील धोकदायक ठिकाणांची पाहणी करुन जागा निश्चिती करावी. त्याची विविध माध्यमांद्वारे व्यापकस्वरुपात जनजागृती करावी. पावसाळ्यात धोकादायक नसलेल्या तथापि पाणी साचणाऱ्या रस्त्यावर बॅरिकेट करावे. पर्यटकांच्या सुरक्षितेतच्यादृष्टीने त्यांना धोकादायक पयर्टनस्थळी जाण्यास प्रतिबंधित करावे तसेच पर्यटनस्थळी व रस्त्यावर दिशादर्शक फलके लावावीत, याठिकाणी वन व्यवस्थापन समितीची मदत घ्यावी, आवश्यकतेप्रमाणे अतिरिक्त कर्मचाऱ्यांची नियुक्त करावी. धोकादायक ठिकाणी मॉकड्रील आयोजित करावे. तालुकास्तरीय नियंत्रण कक्ष २४ तास सुरु ठेवावेत.

मान्सून काळात संभाव्य पुरपरिस्थिती लक्षात घेता पूरबाधित गावांची पाहणी करुन आवश्यक त्या उपाययोजना कराव्यात. नदी पात्रातील पूररेषेखाली येणाऱ्या झोपडपट्ट्या, अतिक्रमणे काढण्याची कार्यवाही संबंधितांनी करावी. आपदा मित्रांना आवश्यतेप्रमाणे पायाभूत सूविधा उपलब्ध करुन देण्यासोबतच त्यांची कार्यशाळा आयोजित करावी. चांगले काम करणाऱ्या आपदा मित्रांना सन्मानित करावे.

आरोग्य विभागाने रुग्णालय, खाटा, वैद्यकीय अधिकारी, रुग्णवाहिका, रक्तपेढी, औषधे साठा तयार ठेवावे. गावातील रेनगेज स्टेशनची सद्यस्थिती पडताळून कार्यान्वित असल्याची खात्री करावी. गर्दीच्या ठिकाणी पोलीस बंदोबस्त व जीवरक्षक पथकाची नियुक्ती करावी. महावितरणने वीजेचे खाब, रोहित्र, तारांची तपासणी करावी, असेही त्यांनी सांगितले.

जिल्ह्यात दरडप्रवण क्षेत्रातील गावातील नागरिकांना पूर्वसंकेत ओळखण्यासोबतच खबरदारीच्या उपाययोजनांबाबत स्थानिक प्रशासनाने माहिती द्यावी. संबंधित विभागाने जिल्हास्तरापासून ते गावपातळीपर्यत आपत्ती व्यवस्थापन आराखडा तयार करावा, नागरिकांना सोप्या भाषेत परंतू अद्ययावत माहिती देण्याची कार्यवाही करावी. आपत्तीच्या काळात नागरिकांना सुरक्षिततेच्यादृष्टीने करण्यात येणाऱ्या उपाययोजनाबाबत माहिती द्यावी. जिल्ह्यात मागील काळात घडलेल्या घटनेच्यावेळी झालेल्या चुकांमध्ये दुरुस्ती करावी, त्याप्रमाणे आपत्ती व्यवस्थापन आराखड्यात समावेश करावा.

येत्या काळात जगद्गुरू श्री संत तुकाराम महाराज आणि संतश्रेष्ठ संत ज्ञानेश्वर महाराज पालखी सोहळ्यास सुरुवात होणार आहे, यापार्श्वभूमीवर रत्याच्याकडेला असलेली अनाधिकृत जाहिरात फलके तसेच धोकदायक वृक्षे काढून घ्यावीत, सर्व रस्त्यांना बाजुला पट्टे भरुन घ्यावेत. रस्त्यावर वाहतूकीस होणाऱ्या अडथळा लवकरात लवकर करण्याची कार्यवाही करावी,असे निर्देश श्री. डुडी यांनी दिले.

श्री. पाटील म्हणाले, पालखी सोहळ्यासोबत आपत्ती व्यवस्थापनाचेही नियोजन करावे. जिल्ह्यातील पुल, साकव, रस्ते, इमारती, वाडे, जाहिरात फलके आदींची संख्या विचार घेता स्ट्रॅक्चरल ऑडिट करण्याकरीता पॅनेल तयार करुन त्यांच्याकडून स्ट्रॅक्चरल ऑडिट करण्याबाबत विचार करावा. पावसाळ्यात अहिल्यानगर ते कल्याण महामार्गावर जिल्ह्यात अपघाताची संख्या तसेच नाणेघाट, जीवधन किल्ला, भीमाशंकर येणाऱ्या पर्यटकांची संख्या विचारात घेता उपाययोजना कराव्यात, असेही श्री.पाटील म्हणाले.

श्री. गिल्ल म्हणाले, जिल्ह्यातील धोकदायक ठिकाणांची पोलीस प्रशासनाच्यावतीने पाहणी करण्यात करुन जिल्हा प्रशासनासमवेत आवश्यतेप्रमाणे उपाययोजना करण्यात येत आहे. आवश्यतेनुसार आपदा मित्रांची संख्येत वाढ करण्यात यावी. स्थानिकांशी समन्वय साधण्याकरीता दर 15 दिवसांनी बैठकांचे आयोजन करावे, असेही श्री. गिल्ल म्हणाले.

या बैठकीस सार्वजनिक बांधकाम, पाटबंधारे, कृषी, आरोग्य, पुणे व पिंपरी चिंचवड महानगर पालिका, नगर परिषद, पुणे प पिंपरी चिंचवड शहर आयुक्तालय, जिल्हा अधीक्षक पुणे ग्रामीण कार्यालय, पुणे महानगर प्रदेश विकास प्राधिकरण, महावितरण, वन विभाग, वन, प्रादेशिक परिवहन कार्यालय, भारतीय हवामान विभागासह सर्व संबंधित विभागांचे उपविभागीय अधिकारी आणि तहसीलदार, मुख्याधिकारी उपस्थित होते.

पुणे- रसिकलाल माणिकचंद धारिवाल फाऊंडेशन द्वारा आयोजीत शोभाताई आर धारीवाल यांच्या जन्मदिनानिमित्त एच व्ही देसाई आय हॉस्पिटल येथे मोफत नेत्र तपासणी , ५०१ मोतीबिंदूं रुग्णांच्या तपासणी व शस्त्रक्रिया , वैद्यकीय क्षेत्रातील विद्यार्थ्यांना शिष्यवृत्तीचे वाटप, रक्तदान शिबीर व आर एम डी इंग्रजी शाळा कोंढवा, लोणीधामणी गाव , कासारी गाव , नवलेवाडी पिंपरी पेंढार या गावांमध्ये वृक्षारोपण असे असे विविध कार्यक्रम आयोजित करण्यात आलेले होते .
कार्यक्रमाच्या ठिकाणी शोभाताई आर धारीवाल उपाध्यक्षा,जान्हवी धारीवाल बालन अध्यक्षा आर एम डी फाऊंडेशन , नितीनभाई देसाई विश्वस्त एच व्ही देसाई आय हॉस्पिटल , इंद्राणी बालन फाऊंडेशन व बालन ग्रुप चे अध्यक्ष पुनीतदादा बालन , परवेझ बिलिमोरिया कार्यकारी संचालक तसेच रुग्णालयाचा कर्मचारी वर्ग व शिकावू विध्यार्थी ,विविध वृत्तपत्राचे प्रतिनिधी , उपस्थित होते .
या प्रसंगी जान्हवी धारीवाल बालन यांनी श्री रसिकशेठ धारीवाल यांनी आर एम डी फाऊंडेशनची स्थापना करून समाजातील सर्वच घटकांसाठी विविध योजना यामध्ये मोफत गुजरात राज्यातील कॅन्सर हॉस्पिटल, ससून पुणे येथील सर्व सोयीयुक्त अपघात रुग्णालय , नाशिक येथील आर एम डी हॉस्पिटल व रिसर्च सेंटर , पूना हॉस्पिटल येथे कार्डीयाक कक्ष , तसेच शिक्षण क्षेत्रात फार्मसी , व्यवस्थापन , अभियांत्रिकी महाविद्यालय सोबतच इंग्रजी शाळांची स्थापना , हुशार व गरजू विध्यार्थ्यांना उच्च शिक्षण घेण्यासाठी दरवर्षी शिष्यवृत्ती , पर्यावरण क्षेत्रात खडवासला धरणाचा गाळ काढून पाण्याचा स्तर वाढविणे , शेकऱ्यांसाठी बंधारे बांधणे इत्यादी समाजपयोगी कामं केलीत . हे सर्व प्रकल्प आखतांना आई शोभाताई यांचा सिंहाचा वाटा असे अशी माहिती दिली . मोतीबिंदू शस्त्रक्रियेसाठी गरजू रुग्णांनी संपर्क साधावा असे आवाहनही यावेळी त्यांनी केले . श्री पुनीत बालन यांनी समाजाचे ऋण फेडतांना कमाईतील वाटा समाजासाठी खर्च करणे हि सामाजिक जबाबदारी असून आज शोभाताईच्या जन्मदिनानिमित्त नक्कीच हॉस्पिटल च्या कार्यात आमचाही सहभाग असेल असे आश्वासन दिले.
त्यानंतर फाऊंडेशनद्वारा प्रायोजित मोफत मोतीबिंदू शस्त्रक्रियेचा धनादेश व शिष्यवृत्तीच्या विध्यार्थ्यांचे धनादेश वाटप करण्यात आले. रक्तदान करणाऱ्या रक्तदात्यांना यावेळी प्रमाणपत्र देऊन गौरवण्यात आले .

पुणे-मावळ तालुक्यातील कुंडमळा येथे दोन दिवसांपूर्वी धोकादायक पूल कोसळण्याची दुर्घटना घडली होती. या दुर्घटनेतील जखमी रुग्णाची राज्याचे उपमुख्यमंत्री आणि पुण्याचे पालकमंत्री अजित पवार यांनी आज पवना हॉस्पिटल येथे जाऊन भेट घेतली. यावेळी त्यांच्या प्रकृतीची चौकशी करत रुग्णालयातील डॉक्टरांशी संवाद साधला. यावेळी स्थानिक आमदार सुनील शेळके व अधिकारी उपस्थित होते.

पुणे जिल्ह्यातील कुंडमळा येथील इंद्रायणी नदीवरील पूल कोसळल्याची घटना रविवारी दुपारी घडली. त्यात चार लोकांचा मृत्यू झाला होता. तसेच 40 ते 45 पर्यटक नदीच्या प्रवाहात वाहून गेले होते. त्यांना वाचवण्यात यश आले. सुमारे 38 जण जखमी झाले होते. या जखमींवर रुग्णालयात उपचार सुरू आहेत. आज उपमुख्यमंत्री अजित पवार यांनी या जखमींची भेट घेऊन त्यांच्या तब्येतीची विचारपूस केली.जखमींची भेट घेतल्यानंतर अजित पवारांनी माध्यमांशी संवाद साधला. घटना घडल्यानंतर काही मिनिटांतच वेगवेगळ्या शासकीय यंत्रणा हलवण्यात आल्या आणि तिथे लोकांना कशा प्रकारे वाचवता येईल, यासाठी प्रशासनाकडून प्रयत्न करण्यात आला. आमदार सुनील शेळके, जिल्हाधिकारी, मुख्य कार्यकारी अधिकारी यांसह इतर विभागांच्या टीमने यामध्ये जलद गतीने सगळ्या गोष्टी केल्यामुळे अनेकांना या संकटातून बाहेर काढू शकलो. अनेकांचा जीव वाचवू शकलो. परंतु, दुर्दैवाने चार जणांना प्राण गमवावे लागले, असे अजित पवार म्हणाले.
अजित पवार यांनी यावेळी जखमींवरील उपचाराबाबत माहिती दिली. आयसीयूमध्ये 8 वेगवेगळ्या नागरिकांवर उपचार सुरू आहेत. जनरल वॉर्डात 8 जणांवर उपचार सुरू आहेत. जवळपास 33 जणांना रुग्णालयांतून सुटी देण्यात आली आहे. मृत्यू झालेल्या 4 जणांचे मृतदेह त्यांच्या कुटुंबीयांकडे सुपूर्द करण्यात आलेल्या आहेत. सध्या रुग्ण्यालया उपचार सुरू असलेल्या जखमींशी आम्ही बोललो. राज्य सरकारच्या वतीने ज्या काही गोष्टी जाहीर करण्यात आलेल्या आहेत, त्या तातडीने पूर्ण कराव्यात, अशी मागणी त्यांनी केल्याचे अजित पवार यांनी सांगितले.
कुंडमळा येथील घटनेची आजच्या मंत्रिमंडळात देखील चर्चा झाली. राज्यातील धोक्याचे पूल, लोकांना वापरण्यायोग्य नसलेल्या पुलांवर बोर्ड लावण्यापेक्षा काढून टाकण्याचा निर्णय घेण्यात आल्याची माहिती अजित पवारांनी दिली. बोर्ड लावल्यानंतरही काही जण त्याकडे दुर्लक्ष करतात. त्यावर कुणी लक्ष देत नाहीत. बोर्ड बाजूला फेकून देतात. प्रशासनाचे कुणी ऐकत नाहीत. त्यामुळे धोकादायक पूल काढून टाकण्याचा निर्णय घेतला आहे, अशी माहिती अजित पवार यांनी दिली.
दरम्यान, कुंडमळा येथील दुर्घटनेनंतर पुणे जिल्हाधिकाऱ्यांनी मोठा निर्णय घेतला आहे. पुणे जिल्ह्यातील गावे आणि वाड्यातील धोकादायक लहान पूल पाडण्याचा निर्णय घेण्यात आला आहे. जिल्ह्यातील गावे आणि वाड्यांना जोडणारे लहान पूल तोडण्याचा निर्णय जिल्हा प्रशासनाने जाहीर केला आहे. तसेच यापूर्वी वेगवेगळ्या सरकारी यंत्रणेने केलेल्या ऑडिटचा अहवाल तातडीने सादर करण्याचे आदेश जिल्हाधिकारी जितेंद्र गुड्डी यांनी दिले आहेत.

पुणे: सूर्यदत्त एज्युकेशन फाउंडेशन संचालित बावधन येथील सूर्यदत्त इंटरनॅशनल इन्स्टिट्यूट ऑफ सायबर सिक्युरिटीचा (एसआयआयसीएस) निकाल सलग तिसऱ्या वर्षी १०० टक्के लागला आहे. नेहा लड्ढा हिने ८४.०४ टक्के मिळवून प्रथम, रितू चौधरी हिने ८३.५ टक्के मिळवत द्वितीय, तर परेश कुलकर्णी याने ८२ टक्के गुण मिळवून तृतीय क्रमांक मिळवला आहे. विद्यार्थ्यांच्या या अभिमानास्पद कामगिरीबद्दल ‘सूर्यदत्त’चे संस्थापक अध्यक्ष प्रा. डॉ. संजय बी. चोरडिया यांनी विद्यार्थ्यांचे, पालकांचे व सर्व शिक्षक-शिक्षकेतर कर्मचाऱ्यांचे अभिनंदन केले आहे.

प्रा. डॉ. संजय बी. चोरडिया म्हणाले, “आजच्या डिजिटल युगात सक्षम व्यावसायिक घडवण्यासाठी प्रात्यक्षिक ज्ञान आणि उद्योगाचा प्रत्यक्ष अनुभव अत्यंत महत्त्वाचा आहे. ‘सूर्यदत्त’मध्ये आम्ही आमच्या विद्यार्थ्यांना अनुभवात्मक शिक्षणाच्या माध्यमातून सक्षम बनवण्यास कटिबद्ध आहोत. ही सातत्यपूर्ण कामगिरी सायबर आणि डिजिटल सायन्स या क्षेत्रातील शैक्षणिक उत्कृष्टतेप्रती व भविष्यकालीन शिक्षणप्रणालीप्रती ‘एसआयआयसीएस’च्या दृढ वचनबद्धतेची साक्ष आहे. २०२०-२१ या शैक्षणिक वर्षात स्थापनेपासूनच ‘एसआयआयसीएस’ सायबर सुरक्षेच्या शिक्षणात अग्रेसर राहिले आहे. सावित्रीबाई फुले पुणे विद्यापीठाशी संलग्न असलेली सायबर आणि डिजिटल सायन्समध्ये पदवी अभ्यासक्रम सुरू करणाऱ्या पहिल्या संस्थांपैकी एक आहे.”

संस्थेच्या यशाचे श्रेय तिच्या नवोन्मेषपूर्ण शैक्षणिक मॉडेलला जाते. जे वर्गखोलीतील शिक्षणासोबतच वास्तव जगातील अनुभवही विद्यार्थ्यांना प्रदान करते. या मॉडेलमध्ये जागतिक मान्यताप्राप्त सर्टिफिकेशन प्रशिक्षण, नियमित औद्योगिक भेटी, अत्याधुनिक संगणक प्रयोगशाळा, अनुभवी प्राध्यापक व उद्योगतज्ज्ञांकडून मार्गदर्शन आदी गोष्टींचा समावेश आहे. विभागप्रमुख, सर्व प्राध्यापक प्रत्येक विद्यार्थ्याचे वैयक्तिकरित्या मार्गदर्शन करून त्यांचा शैक्षणिक व व्यावसायिक प्रवास घडवण्यात महत्त्वपूर्ण भूमिका बजावत आहेत. त्यामुळेच यशाची ही शिखरे गाठता येत आहेत, असे प्रा. डॉ. संजय बी. चोरडिया यांनी नमूद केले.

‘एसआयआयसीएस’मध्ये २०२५-२६ या शैक्षणिक वर्षासाठी ‘सायबर आणि डिजिटल सायन्स’ या पदवी अभ्यासक्रमासाठी प्रवेश प्रक्रिया सुरु झाली असून, प्रवेशासाठी अर्ज मागवण्यात येत आहेत. सध्या उद्योगक्षेत्रात विशेष कौशल्य असलेल्या व्यावसायिकांची वाढती गरज लक्षात घेता, याच शैक्षणिक वर्षापासून ‘एसआयआयसीएस’मध्ये सायबर सिक्युरिटी या विषयात पदव्युत्तर अभ्यासक्रमही सुरू होणार आहे.

पुणे: लहान मुलं आणि त्यांच्या पालकांच्या कल्याणासाठी कटिबद्ध असलेल्या पुणे महानगरपालिकेने Urban95 अंतर्गत Nurturing Neighbourhoods 2.0 या उपक्रमांतर्गत बहु-क्षेत्रीय समविचार बैठकीचे आयोजन केले. यावेळी पुणे शहराला लहान मुलं व पालकांसाठी अनुकूल शहर बनवण्याच्या दृष्टीकोनाचे अनावरण करण्यात आले आणि कुटुंब-मित्र सार्वजनिक जागांसाठी डिझाईन मार्गदर्शक तत्त्वांचे प्रकाशन करण्यात आले.

हा उपक्रम गृहनिर्माण व शहरी व्यवहार मंत्रालय, स्मार्ट सिटी मिशन आणि वॅन लियर फाउंडेशन यांच्या सहकार्याने आणि WRI इंडिया यांच्या तांत्रिक मार्गदर्शनाखाली राबवला जात आहे. यामध्ये बाल्यावस्थेच्या आरोग्यपूर्ण विकासाला आणि पालकांच्या कल्याणाला चालना देणाऱ्या समावेशक आणि लहान मुलांसाठी अनुकूल शहरी जागा निर्माण करणे हे उद्दिष्ट आहे.

पुणे शहरात प्रत्येक झोनमध्ये सुरक्षित, समावेशक आणि आकर्षक सार्वजनिक जागा व बालविकास केंद्रांमध्ये प्रवेश सुधारणे आणि वापरात नसलेल्या जागांचा पुनर्वापर करणे यावर भर देण्यात येत आहे. लहान मुलांचं आरोग्य त्यांच्या आजूबाजूच्या वातावरणावर आणि पालकांशी होणाऱ्या संवादावर अवलंबून असते हे लक्षात घेऊन, शहर लहान मुलांकरिता केंद्रित सार्वजनिक जागा तयार करत आहे आणि त्याचबरोबर पालकांच्या देखील गरजा पूर्ण करणाऱ्या सेवा सक्षम करत आहे.

पुढे जाऊन, पुणे शहरात लहान मुलं आणि पालकांच्या कल्याणाला संस्थात्मक रूप देण्याचा उद्देश असून, त्यासाठी सकारात्मक पालकत्व पद्धती प्रोत्साहित करणे, सामाजिक व वर्तनात्मक बदल घडवणे आणि सार्वजनिक जागा समावेशक व सुरक्षित बनवणे आवश्यक आहे. हे साध्य करण्यासाठी डेटा-आधारित नियोजन, अधिकाऱ्यांचे व फील्ड वर्कर्सचे प्रशिक्षण आणि समुदाय, NGO आणि नागरी संस्थांचा सहभाग आवश्यक आहे. कार्यशाळेत प्रसिद्ध करण्यात आलेल्या डिझाईन मार्गदर्शक तत्त्वांद्वारे सार्वजनिक जागांचे डिझाईन आणि अंमलबजावणीसाठी तांत्रिक आधार मिळणार आहे.

शहराचे बाल विकास अधिकारी विविध विभागीय समन्वय साधण्यासाठी महत्त्वाची भूमिका बजावतील. या समविचार बैठकीत विविध भागधारकांनी एकत्र येऊन रणनीती ठरवल्या व शहराच्या एकत्रित दृष्टीकोनासाठी रोडमॅप तयार केला. ४० हून अधिक सहभागी सदस्यांनी सहभागी उपक्रमांतून पुणेला ‘कुटुंब-मित्र’ शहर बनवण्यासाठी स्वतःची भूमिका जाणून घेतली.

पृथ्वीराज बी.पी.आयएएस, अतिरिक्त महापालिका आयुक्त,(इ) पुणे महानगरपालिका म्हणाले, “पुणे हे लहान मुलं आणि पालकांना केंद्रस्थानी ठेवून शहरी विकासाकडे पाहणाऱ्या भारतातील अगदी मोजक्या शहरांपैकी एक आहे. पुणे किड्स फेस्टिव्हलसारख्या उपक्रमांनी आम्ही दीर्घकालीन दृष्टिकोन स्वीकारला आहे आणि आता Nurturing Neighbourhoods 2.0 अंतर्गत हे उपक्रम मुख्य प्रवाहात आणण्यासाठी आणि संस्था पातळीवर रुजवण्यासाठी प्रयत्न करत आहोत. ही कार्यशाळा हे उद्दिष्ट साध्य करण्यासाठी उद्दिष्टे निश्चित करण्याचे आणि मार्ग ठरवण्याचे एक उत्तम व्यासपीठ ठरली आहे.”

अनुष्री पाटील, कार्यक्रम व्यवस्थापक, सस्टेनेबल सिटीज आणि ट्रान्सपोर्ट, WRI इंडिया म्हणाल्या, “ही कार्यशाळा पुण्यातील भागधारकांना सामाजिक व वर्तनात्मक बदलांसारख्या विविध उपाययोजनांची समज देण्यात उपयुक्त ठरली. सार्वजनिक जागांचा वापर लहान मुलं आणि त्यांच्या कुटुंबासाठी कसा वाढवता येईल हे ठरवण्यात मदत झाली. WRI इंडिया म्हणून आम्ही पुणे शहराला इतर शहरांसाठी आदर्श (Lighthouse) बनवण्यास पाठिंबा देत राहू. शहरांची रचना बाल्यावस्थेतील अनुभवांवर परिणाम करते यावर आमचा विश्वास आहे.”

आमिर पटेल, वरिष्ठ कार्यक्रम अधिकारी, इंडिया, Urban95, Van Leer Foundation म्हणाले, “जीवनाची चांगली सुरुवात ही प्रत्येक मुलाचा मूलभूत अधिकार आहे. त्यासाठी लहान मुलं व त्यांच्या पालकांचे आरोग्य व कल्याण महत्त्वाचे आहे. शहरांमध्ये अशी सेवा व कार्यक्रम राबवले गेले पाहिजेत जे पालकांसाठी आधारभूत वातावरण तयार करतील. भारतात Urban95 व Nurturing Neighbourhoods 2.0 अंतर्गत आम्ही शहर प्रशासन, नेते व चॅम्पियन्सना स्थानिक गरजांनुसार उपाययोजना विकसित करण्यासाठी पाठिंबा देत आहोत. पुणे या दृष्टिकोनाला मुख्य प्रवाहात आणील आणि NN 2.0 च्या माध्यमातून इतर शहरांसाठी उदाहरण बनेल अशी मला आशा आहे.”

ही समविचार बैठक पुणे शहराच्या ‘कुटुंब-मित्र’ शहर बनण्याच्या प्रवासातील एक महत्त्वपूर्ण टप्पा आहे. शासकीय विभाग, नागरी संस्था आणि WRI इंडिया यासारख्या तांत्रिक भागीदारांच्या एकत्रित प्रयत्नांमुळे पुणे शहरात लहान मुलांच्या विकासासाठी आणि नागरिकांच्या जीवनमानाच्या उन्नतीसाठी उपयुक्त अशा जागा निश्चितपणे विकसित होतील.

पुणे: रोटरी क्लब ऑफ तळेगाव दाभाडेतर्फे विद्यार्थी साहाय्यक समितीचे कार्यकारी विश्वस्त तुषार रंजनकर यांना पहिला ‘वोकेशनल एक्सलन्स अवार्ड’ प्रदान करण्यात आला. प्रसंगी सौ. मीनल रंजनकर, ‘रोटरी’चे नियोजित प्रांतपाल संतोष मराठे, रोटरी क्लब ऑफ तळेगाव दाभाडेचे अध्यक्ष कमलेश कार्ले, माजी अध्यक्ष दिपक शहा, व्होकेशनल डायरेक्टर संजय अडसूळ, प्रमोद दराडे, समितीचे विश्वस्त, कार्यकर्ते, मुख्य विकास अधिकारी चंद्रकांत कुलकर्णी, मुख्य कार्यपालन अधिकारी दुर्गेश पवार, रोटरी क्लबचे सदस्य आदी उपस्थित होते.

तुषार रंजनकर म्हणाले, “रोटरी क्लबतर्फे मिळालेला ‘व्होकेशनल एक्सलन्स’ हा पुरस्कार भारावणारा आहे. माझ्या जडणघडणीत समितीचा मोलाचा वाटा असून, मित्र परिवार, कुटुंबियांचे संपूर्ण सहकार्य मिळाल्यामुळे काही विधायक कामे करू शकलो. समितीच्या कार्याला, सहकाऱ्यांना व समितीशी संबंधित कार्यकर्त्यांना हा पुरस्कार समर्पित करतो. व्यक्तिमत्व विकास साधून संस्कारक्षम पिढी निर्माण करण्याचे समितीचे ध्येय आहे. समिती, अल्फाबाईट संस्थेमार्फत होत असलेल्या कार्याची ही पोचपावती आहे.”

संतोष मराठे म्हणाले, “समितीचे संस्थापक अच्युतराव आपटे आणि माझ्या वडिलांचे स्नेहाचे संबंध होते. या ऋणानुबंधांना पुन्हा उजाळा मिळाला. रोटरी क्लब गेल्या १०० वर्षांपासून सामाजिक बांधिलकीच्या भावनेतून काम करत आहे. समाजासाठी झटणाऱ्या आदर्श व्यक्तींचा सन्मान करून इतरांना प्रेरणा देण्याच्या उद्देशाने ‘रोटरी’च्या वतीने दिले जाणारे पुरस्कार महत्वपूर्ण ठरतात.”

कमलेश कार्ले म्हणाले, “ग्रामीण भागातून पुण्यात शिकायला येणाऱ्या विद्यार्थ्यांसाठी कार्यरत असलेल्या विद्यार्थी साहाय्यक समितीच्या कार्यात तुषार रंजनकर यांनी गेल्या तीस वर्षांपासून स्वत:ला वाहून घेतले आहे. शिक्षण, सामाजिक कार्यात त्यांचे उल्लेखनीय योगदान आहे.” प्रमोद दराडे यांनी आभार मानले.

पुणे : ‌‘माझे विद्यार्थी हेच माझा बँक बॅलन्स‌’ असे म्हणणारे विद्यार्थीप्रिय शिक्षक, समाजधुरीण प्रा. श्रीराम पुजारी यांच्या जन्मशताब्दीनिमित्त दोन दिवसीय विशेष सांगीतिक कार्यक्रमाचे आयोजन करण्यात आले आहे. यात युवा कलाकारांसह ज्येष्ठ कलाकारांना ऐकण्याची संधी रसिकांना मिळणार आहे.
कार्यक्रम शनिवार, दि. 21 रोजी सायंकाळी 5:30 वाजता आणि रविवार, दि. 22 जून रोजी सकाळी 9 आणि सायंकाळी 5:30 या वेळात पुण्याई सभागृह, पौड रोड, कोथरूड येथे आयोजित करण्यात आला आहे.
शनिवारी भारतरत्न पंडित भीमसेन जोशी यांचे नातू विराज जोशी आणि पंडित विनायक तोरवी यांचे शिष्य सिद्धार्थ बेलामनू यांचे गायन होणार आहे. त्यापूर्वी प्रा. श्रीराम पुजारी यांच्या जीवनप्रवासावर आधारित चित्रफित दाखविली जाणार आहे.
रविवारी सकाळी 9 वाजता सुप्रसिद्ध व्हायोलिन वादक पद्मभूषण एन. राजम्‌‍ यांची नात रागिणी शंकर यांचे व्हायोलिन वादन तर विख्यात गायक पंडित कुमार गंधर्व यांचे नातू भुवनेश कोमकली यांचे शास्त्रीय गायन होणार आहे. सायंकाळी प्रसिद्ध हिंदुस्थानी शास्त्रीय गायक पंडित व्यंकटेश कुमार यांच्या गायनाने दोन दिवसीय सांगीतिक कार्यक्रमाची सांगता होणार आहे.
कलाकारांना भरत कामत, प्रणव गुरव, तनय रेगे, आशय कुलकर्णी, अभिजित बारटक्के (तबला), सुयोग कुंडलकर, मिलिंद कुलकर्णी, अविनाश दिघे (संवादिनी) साथसंगत करणार आहेत. कार्यक्रम सर्वांसाठी खुला आहे, अशी माहिती प्रतिष्ठानचे अध्यक्ष डॉ. प्रकाश जोशी, सचिव ललिता दातार यांनी निवेदनाद्वारे कळविली आहे.

पुणे : कऱ्हाडे ब्राह्मण संघातर्फे बुधवार, दि. 18 जून रोजी रणरागिणी झाशीची राणी लक्ष्मीबाई यांच्या पुण्यतिथीनिमित्त अभिवादन सोहळ्याचे आयोजन करण्यात आले आहे. शिवाजीनगर येथील बालगंधर्व रंगमंदिरासमोर कऱ्हाडे ब्राह्मण संघाच्या सहकार्याने उभारण्यात आलेल्या राणी लक्ष्मीबाई यांच्या अश्वारूढ पुतळ्यास सकाळी 9 वाजता पुणे महापालिकेचे आयुक्त, कऱ्हाडे ब्राह्मण संघाचे उपाध्यक्ष गिरीश शेवडे आणि भापचे प्रदेश प्रवक्ते संदीप खर्डेकर पुष्पहार अर्पण करणार आहेत. या प्रसंगी मॉडर्न हायस्कूलमधील 350 विद्यार्थिनींच्या घोषपथकाचे वादन होणार आहे, अशी माहिती उपाध्यक्ष हरी मुणगेकर यांनी निवेदनाद्वारे कळविली आहे.

पुणे : महाराष्ट्र टॅक्स प्रॅक्टिशनर्स असोसिएशनच्या अर्थात कर सल्लागार संस्थेच्या अध्यक्षपदी ॲड. अनुरुद्र चव्हाण, तर उपाध्यक्षपदी ॲड. ज्ञानेश्वर नरवडे यांची निवड झाली आहे. संस्थेच्या ‘ज्ञानमंदिर’ सभागृहात नुकत्याच झालेल्या ४५ व्या वार्षिक सर्वसाधारण सभेत २०२५-२६ या वर्षाकरिता नवनिर्वाचित कार्यकारिणीची निवड करण्यात आली. कार्यकारिणीमध्ये ॲड. कैलास काशीद, सीएमए नवनाथ नलवडे, उमेश दांगट, ॲड. प्रणव शेठ, सीए योगेश इंगळे, सुभाष घोडके, सीए परीक्षित औरंगाबादकर, मिलिंद हेंद्रे, नेहा नाणेकर यांचा, तर स्वीकृत सदस्य म्हणून अश्विनी बिडकर व विनोद रहाते यांचा समावेश आहे.

यावेळी संस्थेचे मावळते अध्यक्ष ॲड. प्रसाद देशपांडे, माजी अध्यक्ष ॲड. नरेंद्र सोनावणे, सीएमए श्रीपाद बेदरकर, सीएमए बी. एम. शर्मा, प्रकाश पटवर्धन, मनोज चितळीकर, ॲड भारत डिंबले, संतोष शर्मा आदी मान्यवर उपस्थित होते. प्रसंगी ‘एमटीपीए मेरुमणी’ पुरस्काराने सीएमए श्रीपाद बेदरकर यांना, तर ‘एमटीपीए कोहिनुर’ पुरस्काराने सीएमए प्रकाश रिझवानी, अनिल चव्हाण, संतोष सहर्म व अनिल वखारिया यांना सन्मानित करण्यात आले. कृतज्ञता सन्मान सीए मिलिंद काळे यांना प्रदान करण्यात आला.

कर सल्लागार संस्था आपल्या कार्यामुळे महाराष्ट्रासह संपूर्ण देशात प्रसिद्ध आहे. दोन हजाराहून अधिक मान्यवर सभासद आहेत. संस्थेकडून सर्व कर सल्लागार, सनदी लेखापाल आदींना कर रचनेतील विविध बदल याबाबत मार्गदर्शन करण्याबरोबरच, प्रत्यक्ष आणि अप्रत्यक्ष करांबाबत सरकारच्या विविध योजनांचा प्रसार केला जातो. संस्थेचे हे कार्य नेटाने पुढे नेण्याचा प्रयत्न करणार असल्याचे ॲड. अनुरुद्र चव्हाण यांनी नमूद केले.

कर सल्लागार संस्थेने गेल्या वर्षात राबवलेल्या उपक्रमाविषयी, तसेच विविध मान्यवर संस्थांशी झालेल्या सामंजस्य करार, प्राप्तिकर, जीएसटी यावर विविध प्रमाणपत्र अभ्यासक्रम, ज्ञान अमृत कुंभ राष्ट्रीय परिषद व अन्य कार्यक्रमाचा आढावा घेतला. सर्व सहकाऱ्यांचे यामध्ये मोलाचे सहकार्य लाभले. त्या सर्वांप्रती कृतज्ञता व्यक्त करतो, अशा भावना ॲड. प्रसाद देशपांडे यांनी व्यक्त केल्या. ॲड. प्रणव शेठ व ॲड. ज्ञानेश्वर नरवडे यांनी सूत्रसंचालन केले.