पुणे: शहर आणि परिसरात गेल्या दोन दिवसांपासून संततधार पाऊस पडत आहे. काल रात्रीपासून पावसाची हजेरी सुरूच असून पावसाची रिपरिप सुरू आहे. पुण्याच्या मध्यवर्ती भागाबरोबरच, खडकवासला धरण क्षेत्र परिसर, सिंहगड रोड, धायरी, कात्रज, धनकवडी, आंबेगाव या उपनगरात पाणी साचल्याचे आढळून आले आहे.आज दुपारी प्रथम ठीक दुपारी . 1.00 वा. खडकवासला धरणाच्या सांडव्यावरून मुठा नदी पात्रामध्ये 1920 क्युसेक ने विसर्ग सुरू करण्यात आला त्यानंतर सुरू असणारा 1920 क्युसेक्स विसर्ग वाढवून संध्याकाळी 06:00 वा. 4345 क्यूसेक्स करण्यात आला आहे आणि अजून तासाभराने म्हणजे संध्याकाळी 07:00 वा. 8734क्यूसेक्स करण्यात आला आणि आता रात्री साडेनऊ वाजता 15 हजार क्युसेक चा विसर्ग सुरू करण्यात आला.

काही भागात घरात पाणी शिरल्याच्या घटना समोर आल्या आहेत.पुणे महापालिकेने खडकवासला धरणातून दुपारी १ वाजता सुमारे २ हजार क्युसेक पाण्याचा विसर्ग सुरु केला आहे. नदीकाठच्या नागरिकांनी विशेष सतर्क राहावे. अनावश्यक प्रवास व नदीकाठी फिरणे टाळावे. कृपया नदीपात्रात उतरू नये. नदीपात्रात काही तत्सम साहित्य अथवा जनावरे असल्यास तात्काळ हलविण्यात यावीत. कृपया सखल भागातील संबंधीत नागरीकांना सूचना देण्यात याव्या आणि उचित कार्यवाही करण्यात यावी. सर्वांनी योग्य ती खबरदारी व दक्षता घ्यावी. असे महापालिकेकडून सांगण्यात आले आहे. हवामान विभागाने दिलेल्या अंदाजानुसार या आठवड्यात आकाश ढगाळ राहून हलका ते मध्यम स्वरूपाचा पाऊस पडण्याची शक्यता वर्तवण्यात आली होती. या रिपरिपीमुळे शहरातील प्रमुख रस्त्यांवरील वाहतूक संथ गतीने सुरू असल्याने प्रमुख मार्गांवर वाहतूककोंडी झाल्याचे दिसून आले आहे. त्यामुळे वाहनचालकांना मनस्ताप सहन करावा लागला.सध्या भिडे पुलावरून वाहतूक बंद असल्याने काळजी करण्याचे कारण नसल्याचे दिसून येत आहे.खडकवासला, पानशेत, टेमघर, वरसगाव या परिरसरातही मुसळधार पाऊस सुरु आहे. त्यामुळे दरवर्षी धरणं ही जुलै महिन्यानंतर किंवा ऑगस्ट महिन्यांत भरत असली तरी यंदा पावसाचे लवकर आगमन झाले आहे. त्यामुळे धरणं लवकरच भरतील अशी आशा निर्माण झाली आहे. त्यामुळे पुणेकरांची वर्षभराच्या पाण्याची चिंता जुलै महिन्याच्या सुरुवातीलाच मिटेल, असा अंदाज आहे.

महिला आयोगाने महिला वारकऱ्यांच्या आरोग्याबाबत घेतलेला पुढाकार स्तुत्य- उच्च व तंत्र शिक्षण मंत्री चंद्रकांत पाटील

पुणे, दि. १९: राज्य शासनाने आषाढी वारीसाठी अनेक सुविधा उपलब्ध करून दिल्या आहेत. यामध्ये स्वच्छतेला जास्तीत जास्त महत्त्व देण्यात येत असून राज्य महिला आयोगानेही वारीदरम्यान महिलांच्या आरोग्याच्या दृष्टीने मासिक पाळीतील अडचणीला लक्षात घेऊन सॅनिटरी नॅपकीन व्हेंडिंग यंत्रे, नष्टीकरणासाठी इन्सीनरेशन यंत्रे आदी उपलब्ध करुन देण्यासाठी घेतलेला पुढाकार स्तुत्य आहे, असे प्रतिपादन उच्च व तंत्र शिक्षण मंत्री चंद्रकांत पाटील यांनी केले.

उच्च व तंत्र शिक्षण मंत्री चंद्रकांत पाटील यांच्या हस्ते महाराष्ट्र राज्य महिला आयोग आणि पुणे महानगरपालिकेच्यावतीने आयोजित ‘आरोग्य वारी’ उपक्रमाचे उद्घाटन निवडुंगा विठोबा मंदिर येथे करण्यात आले. यावेळी विधान परिषदेच्या उपसभापती डॉ. नीलम गोऱ्हे (दूरदृष्य प्रणालीद्वारे), आयोगाच्या अध्यक्षा रुपाली चाकणकर, आमदार चेतन तुपे, माजी आमदार सुनील टिंगरे, आयोगाच्या सचिव नंदिनी आवडे, पीएमपीएमएलच्या अध्यक्ष व मुख्य कार्यकारी अधिकारी दीपा मुधोळ- मुंडे, पुणे महानगरपालिकेचे उपायुक्त संदीप कदम, सुनील बल्लाळ, माजी नगरसेवक विशाल धनवडे आदी उपस्थित होते.

वारीसाठी सुविधांमध्ये वाढ करण्यासाठी प्रयत्न सुरू आहेत, असे सांगून मंत्री श्री. पाटील म्हणाले, प्रत्येक दिंडीला २० हजार रुपये अनुदान दिले आहे. पंढरपूर येथे दर्शनबारी उभी करण्यासाठी ७३ कोटी रुपये खर्चास मंजुरी दिली आहे. या बारीत एकाच वेळेस ६ हजार लोक या दर्शनबारीत असतील तसेच या इमारतीमध्ये बारीमध्ये असताना बाकडे, पिण्याच्या पाण्याची, स्वच्छतेची आदी सुविधा उपलब्ध असतील. पूर्वी पालखीच्या मार्गावर शौचालयांची सुविधा खूप कमी असल्याने अस्वच्छता होत असे. मात्र मोठ्या प्रमाणात फिरत्या स्वच्छतागृहांची मुक्कामाच्या ठिकाणी व्यवस्था केली आहे.

शहरात सॅनिटरी नॅपकीन विक्रीसाठी ‘स्वच्छ’ संस्थेच्या महिलांनी पुढाकार घ्यावा
आयोगाने सॅनिटरी नॅपकीन पुरवण्यासाठी चांगला पुढाकार घेतला आहे. एक रुपयाला एक सॅनिटरी पॅड याप्रमाणे १० उत्कृष्ट गुणवत्तेच्या पॅडचे पाकीट १० रुपयाला देण्याची केंद्र शासनाची योजना आहे. पुणे शहरात स्वच्छतेचे काम करणाऱ्या ‘स्वच्छ’ संस्थेच्या महिलांनी ५ रुपयांना एक पाकीट आपल्या भागातील महिलांना विकल्यास त्यांना अडीच रुपयांना हे पॅक देऊ. त्यासाठी पुढाकार घेईल, असे श्री. पाटील यांनी सांगितले. त्या माध्यमातून सॅनिटरी नॅपकिन न वापरणाऱ्या मोठ्या प्रमाणातील महिलांपर्यंत ते पोहोचेल, असा विश्वास त्यांनी व्यक्त केला..

डॉ. गोऱ्हे म्हणाल्या, महिलांनी संघटित होण्यासाठी महिला आयोगाने सुरू केलेला हा आरोग्य वारीचा उपक्रम अत्यंत स्तुत्य आहे. राज्य शासनाने वारीसोबत मोठ्या प्रमाणात मोबाईल टॉयलेटची व्यवस्था केली आहे. त्यामध्ये अजून बदल करता येऊ शकतील. वारकरी महिलांनी स्वत:च्या सुरक्षिततेच्या दृष्टीने टारगटपणा करणाऱ्यांचे छोटे १ मिनिटांचे व्हिडिओ काढून पाठवावेत. त्यांच्यावर पोलिसांनी कारवाही करावी, यासाठी प्रयत्न करण्यात येतील.

स्त्रिया आणि पुरुष अशा सर्वांना कोणत्याही योजनेचा लाभ मिळाला पाहिजे. म्हणून महिलांची विशेष गरज ओळखून लाडकी बहीण योजना राबविली आहे. त्यामुळे या योजनेविषयी गैरसमज पसरवले जाऊ नयेत. पीएमपीएमएल बसमध्ये टारगट लोक महिलांची, मुलींची नावे टोकदार वस्तुने कोरतात. ती तत्काळ मिटविण्यासाठी व्यवस्था केली जावी. तसेच अशा लोकांचे व्हिडिओ काढून लोकांकडून प्रशासनाकडे पाठविले जातील यासाठी प्रयत्न करा, असेही त्या म्हणाल्या.

श्रीमती चाकणकर म्हणाल्या, राज्य महिला आयोगाच्या वतीने गेली ४ वर्षे हा उपक्रम राबविला जातो. देहू आळंदीची वारी २२ दिवस तर मुक्ताईनगर येथून ३० दिवस चालते. त्यामुळे महिलांच्या मासिक पाळीचा प्रश्न निर्माण होत असतो. हे लक्षात घेऊन आयोगाने हा पुढाकार घेतला आहे. हिरकणी कक्ष, सॅनिटरी नॅपकिन व्हेंडिंग मशीन, नॅपकिन बर्निंग इन्सिनरेशन आदी सुविधा प्रत्येक १० ते १२ किलोमीटर अंतरावर केल्या आहेत.

३ हजार ५०० न्हाणीघरे पालखी मार्गावर सुविधा केली आहेत. महिलांच्या सुरक्षिततेसाठी बीट मार्शल सोबत ठेवले आहेत. टोल फ्री क्रमांक चे फलक लावले आहेत. टारगट लोकांकडून त्रास झाल्यास महिलांनी या क्रमांकावर संपर्क साधावा, असे आवाहन त्यांनी केले. भक्तिमय वारी आरोग्याची वारी व्हावी यासाठी प्रयत्न केला आहे. महिलांना कोणाकडूनही त्रासाला, गुन्हेगारीला सामोरे झाल्यास पोलिसांकडे ऑनलाइन तक्रार करता येईल. कौटुंबिक हिंसाचार च्या अनुषंगाने भरोसा सेल काम करते. समस्या न सुटल्यास आयोगाकडे संपर्क साधावा, असे आवाहन त्यांनी केले.

महिलांना सुरक्षिततेचा, प्रगतीचा विश्वास देण्यासाठी आयोग प्रयत्न करत आहे. मुलींचा बालविवाह करू नका. त्यासाठी आई म्हणून महिलांनी भूमिका बजावावी, स्त्रीभ्रूणहत्या होऊ देऊ नये, अनिष्ट रूढी परंपरांविरोधात उभे रहावे, असे आवाहन त्यांनी केले.

आमदार श्री. तुपे म्हणाले, महिला आयोगाने महिलांच्या सुरक्षित आणि स्वच्छ सोहळ्याची जोड या पालखी सोहळ्याला आयोगाने दिली आहे. अनेक महिला वडकी नाका आणि काही महिला दिवे घाटापर्यंत पालखीला पोहोचविण्यासाठी जातात. त्यामुळे या महिलांना परत आणण्यासाठी बसेसची व्यवस्था करण्याचा पीएमपीएमएलने घेतलेला निर्णय कौतुकास्पद आहे.

श्रीमती दीपा मुधोळ मुंडे म्हणाल्या, मागच्या चार पाच दिवसापासून आळंदी आणि देहूला जाण्या- येण्यासाठी जादा बसेसची सुविधा केली आहे. सासवड येथून ११ नियमित बसेस शिवाय ६० जादा बसेस सुरू केल्या आहेत. गर्दीच्या कालावधीत महिलांसाठी विशेष बस सोडण्यात येत आहेत.

प्रास्ताविकात श्रीमती आवडे म्हणाल्या, महाराष्ट्राच्या काना-कोपऱ्यातून महिला वारकरी देखील आषाढी वारीमध्ये सहभागी होत असतात. राज्य महिला आयोग महिला भगिनीसाठी विविध उपक्रम राबवित असते. आरोग्य वारी या उपक्रमाच्या माध्यमातून वारी मार्गावर, विसाव्याचे ठिकाण, मुक्कामाच्या ठिकाणी महिलांच्या सुविधांसाठी विविध उपक्रम राबविण्यात येत आहेत. सामाजिक समतेचा, समाजाला एकत्र आणण्याचा हा उपक्रम आहे, असेही त्या म्हणाल्या.

यावेळी महानगरपालिकेचे उपायुक्त सुनील बल्लाळ म्हणाले, पुणे महानगरपालिकेच्यावतीने महानगरपालिका हद्दीत श्री संत ज्ञानेश्वर महाराज पालखीसाठी २२ ठिकाणी तर श्री संत तुकाराम महाराज पालखीसाठी १८ ठिकाणी वैद्यकीय पथकांची सुविधा करण्यात आली आहे. हिरकणी कक्ष उभारण्यात आले आहेत. पंढरपूरपर्यंत एक अद्ययावत रुग्णवाहिका उपलब्ध करून देण्यात आली आहे.

यावेळी राज्य महिला आयोगाच्या पुस्तिकेचे प्रकाशन करण्यात आले.
0000

कर्णधार राहुल त्रिपाठीची फटकेबाजी आणि थेंग, डांगी व गुर्बानी यांच्या धारदार माऱ्याने पावसाने खंडित झालेल्या मोसमात कोल्हापूरने बाद फेरी गाठली

१९ जून २०२५, पुणे: शिस्तबद्ध आणि आक्रमक गोलंदाजीच्या जोरावर पीबीजी कोल्हापूर टस्कर्स संघाने २०२५ महाराष्ट्र प्रीमियर लीगच्या प्लेऑफमध्ये सलग तिसऱ्यांदा प्रवेश मिळवला आहे. ९ कठीण गुण मिळवत त्यांनी अखेरचा प्लेऑफ स्थान मिळवले. सततच्या पावसामुळे आणि अतिशय थोडक्याच फरकामुळे निर्णय होत असतानाही, कोल्हापूरच्या गोलंदाजांनी निर्णायक भूमिका बजावत प्रतिस्पर्धी संघांना रोखले आणि महत्त्वाची गडी बाद करत सामने आपल्या बाजूने फिरवले.

रत्नागिरी आणि रायगड यांच्यावर निर्णायक विजय मिळवत आणि पावसामुळे प्रभावित झालेल्या सामन्यांतून मिळालेले मुद्दे महत्त्वाचे ठरले. संपूर्ण साखळी टप्प्यात संघाने सातत्य आणि संयम दाखवला. प्रत्येक सामना दबावाखाली खेळला गेला आणि टस्कर्सच्या गोलंदाजांनी अखेरपर्यंत प्लेऑफच्या शर्यतीत स्वतःला टिकवले.

राजनीश गुर्बानी आणि स्थानिक खेळाडू आनंद थेंग हे संघाचे प्रमुख मारा करणारे गोलंदाज ठरले. दोघांनी प्रत्येकी ८ बळी घेतले आणि विरोधी भागीदाऱ्या मोडत रन्सच्या गतीवर नियंत्रण ठेवले. डावखुरा चेंडू फिरवणारा दीपक डांगी हा आक्रमणात संतुलन आणणारा गोलंदाज ठरला. त्याने ७ बळी घेतले आणि ६.२१ च्या अर्थपूर्ण इकॉनॉमी रेटसह मोसमातील सर्वाधिक किफायतशीर गोलंदाजांमध्ये स्थान मिळवले.

पीबीजीचे मालक आणि पॅरिट बलान ग्रुपचे अध्यक्ष पॅरिट बलान म्हणाले, “तरुण भारतीय खेळाडूंना संधी देण्यावर आणि भितीविरहित खेळसंस्कृती घडवण्यावर आमचा विश्वास आहे. पावसामुळे सतावलेल्या या अनपेक्षित मोसमात आमच्या खेळाडूंनी दाखवलेली झुंज हीच आमच्या दृष्टीकोनाची ताकद आहे. प्लेऑफमध्ये पोहोचणे ही केवळ सुरुवात आहे—आता आमचा उद्देश केवळ सहभागी होणे नाही, तर जिंकणे आहे.”

कर्णधार राहुल त्रिपाठीने फलंदाजीतूनही पुढाकार घेतला, १५५ धावा १५५ च्या स्ट्राइक रेटने फटकावत मधल्या फळीत स्थैर्य दिले आणि निर्णायक टप्प्यांमध्ये जबाबदारी घेतली.

प्लेऑफमध्ये प्रवेश मिळवल्यानंतर राहुल त्रिपाठी म्हणाला, “हा मोसम खडतर पण समाधानकारक ठरला. आम्ही परिस्थितीवर नियंत्रण ठेवू शकलो नाही, पण आमचा दृष्टिकोन, शिस्त आणि एकमेकांसाठी खेळण्यावर लक्ष केंद्रित केलं. संघाने ज्या पद्धतीने एकत्र राहून खेळ केला, त्याचा मला अभिमान आहे. आता आम्ही उपांत्य फेरीसाठी सज्ज आहोत.”

मुख्य प्रशिक्षक अक्षय दरेकर म्हणाले, “या संघाने खरी मानसिक ताकद दाखवली. पाऊस, दबाव, अपयश—कशानेही लक्ष विचलित झाले नाही. आमच्या गोलंदाजांनी जबाबदारी घेतली, फलंदाजांनी योग्य वेळी प्रतिक्रिया दिली. आता एलिमिनेटर सामन्यासाठी आम्ही आमच्या प्रक्रियेत आणि खेळाडूंवर विश्वास ठेवून उतरू.”

रायगडविरुद्धच्या थरारक २ गडी राखून मिळालेल्या विजयामुळेच त्यांना बाद फेरीत स्थान निश्चित करता आले, जो या मोसमातील निर्णायक क्षण ठरला.

आता एलिमिनेटर सामन्यात उतरणाऱ्या कोल्हापूर टस्कर्सला अंतिम फेरी गाठण्यासाठी फक्त दोन विजय हवे आहेत. एकसंधपणा, विश्वास आणि अंमलबजावणीच्या जोरावर त्यांनी इथवरचा प्रवास केला आहे आणि आता इतिहासाच्या उंबरठ्यावर उभे आहेत.