पुणे, दि.23 जानेवारी : एसएफए फुटबॉल टुर्नामेंटमध्ये नांदे येथील ध्रुव ग्लोबल स्कूलच्या फुटबॉल खेळाडूंनी विजयाने सुरुवात केली.   शिवछञपती क्रीडा संकुल बालेवाडी येथे झालेल्या एकतर्फी सामन्यात ध्रुव ग्लोबल स्कूलच्या खेळाडूंनी लॉयोला हायस्कूलवर २-० च्या विजयासह तिसर्‍या स्थानासाठी सामना जिंकला. खेळाडू आरव चौधरी व श्रीजन वर्मा यांनी गोल केला. ध्रुवच्या खेळाडूंनी प्रेक्षकांना ही विजयाची भेट देऊन टाळ्यांचा कडकडाट केला. खेळाडूंचा जोश आणि चिकाटी पाहून ध्रुव ग्लोबल स्कूलचे संचालक यशवर्धन मालपाणी व प्रिन्सिपल संगीता राऊतजी यांनी विद्यार्थ्यांना शुभेच्छा दिल्यात.
सामन्यातील पहिल्या हाफ च्या २५’ व्या मिनिटाला ध्रुव ग्लोबल स्कूलचा खेळाडू आरव चौधरी याने गोल करून संघाला १-० अशी आघाडी मिळवून दिली. पहिल्या सत्रात ध्रुव स्कूलच्या खेळाडूंनी ही आघाडी कायम ठेवली. दुसर्‍या सत्रातही ध्रुव च्या खेळाडूंनी उत्कृृष्ट कामगिरी सुरू ठेवली. २९’ व्या मिनिटाला श्रीजन वर्मा याने गोल करत संघाची आघाडी २-० अशी वाढवली व विजय निश्चित केला.  
ध्रुव ग्लोबल स्कूलच्या फुटबॉल टीम मध्ये समनमय गुप्ता, आरव चौधरी, कबीर बिजूर, आयुष गाडवे, अर्जुन विजयेंद्रन, नमिष सिंह, श्रीजन वर्मा आणि नरेन प्रसाद यांचा समावेश होता. या खेळाडूंनी आपल्या चिकाटीच्या जोरावर यश मिळविले. या खेळाडूना समर्पित प्रशिक्षक अमेय कलाटे आणि पार्थ सायकिया यांचे मार्गदर्शन लाभले.

आरोग्य, पायाभूत सुविधा व बंदरांच्या सक्षमीकरणाला चालना मिळणार; अंबर आयदे यांची माहिती 
पुणे: दावोसमधील (स्वित्झर्लंड) वर्ल्ड इकॉनॉमिक फोरममध्ये मुख्यमंत्री देवेंद्र फडणवीस यांच्या नेतृत्वात महाराष्ट्र शासनाने पुण्यातील रूरल एन्हान्सर्स संस्थेशी १० हजार कोटींच्या गुंतवणुकीचा क्रेडिट लाईन सामंजस्य करार केला. आरोग्यसेवा, रुग्णालय, पायाभूत सुविधा, बंदरे व सामाजिक क्षेत्राच्या सक्षमीकरणासाठी हा सामंजस्य करार महत्वपूर्ण असून, मुख्यमंत्री फडणवीस व संस्थेचे प्रमुख अंबर आयदे यांनी करार आदानप्रदान केला. महाराष्ट्रातील स्टार्टअपसाठी, तसेच पुण्यासाठी ही अतिशय अभिमानास्पद गोष्ट असल्याचे केंद्रीय सहकार व हवाई वाहतूक राज्यमंत्री मुरलीधर मोहोळ यांनी दूरध्वनीवरून अभिनंदन करताना म्हटले आहे.
राज्य शासनाच्या वतीने परकीय गुंतवणूक विभागाचे सचिव कौस्तुभ धावसे यांच्या पुढाकारातून नेदरलँड येथील शासकीय संस्थांचा त्रिपक्षीय करार झालेला आहे. यावेळी कौस्तुभ धावसे, राज्य शासनाचे उद्योग विभागाचे प्रधान सचिव पी. अनबलगन, एमआयडीसी विभागाचे सचिव पी. वेलारसू, नेदरलँड शासनामार्फत एडविन सीएसवरदा, रुरल एन्हान्सर्स समूहाचे चेअरमन इन डेस्क सुब्रह्मण्यम येडावली, मुख्यमंत्र्यांचे सहायक जयंत येरवडेकर उपस्थित होते. अंबर आयदे यांच्या संस्थेला राज्य शासनामार्फत दावोस येथे उपस्थित राहण्याचे विशेष आमंत्रण देण्यात आलेले होते.
अंबर आयदे म्हणाले, “ही गुंतवणूक पुढच्या दोन वर्षांमध्ये राज्यातील आरोग्य व्यवस्था, राज्य शासनासाठी लागणारी ॲम्बुलन्स व्यवस्था, पुण्यातील लोहगाव येथील पोलीस बांधवांचा रखडलेला गृहप्रकल्प, पायाभूत सुविधांची उभारणी आणि महाराष्ट्र राज्य शासनाची बंदरे, शिपिंग इन्फ्रास्ट्रक्चर बळकट करण्याच्या दृष्टीने उपयोगात आणण्यात येणार आहे. यापूर्वी संस्थेच्या माध्यमातून भारतातील पहिली ईसीए आधारित गुंतवणूक पुणे महापालिकेसोबत वारजे येथे मल्टीस्पेशालिटी हॉस्पिटल उभारण्यासाठी २०२३ करण्यात आलेली आहे. हे हॉस्पिटल २०२७ मध्ये पुणेकरांच्या सेवेत येणार आहे. मार्चमध्ये मुख्यमंत्र्यांच्या उपस्थितीत मुंबई येथे ईसीए आधारित भारतातील पहिली आर्थिक परिषद घेण्यात येणार आहे.”
कौस्तुभ धावसे म्हणाले, रुरल एन्हान्सर्स संस्थेचे अंबर आयदे हे मुख्यमंत्र्यांच्या महत्त्वकांक्षी ‘कंट्री डेस्क’ या परकीय गुंतवणूक बघणाऱ्या टीमचे सदस्य आहेत. २०२१ पासून महाराष्ट्रात ईसीए गुंतवणूक कशी आणता येईल यावर ते काम करत आहेत. दावोसमध्ये झालेल्या १० हजार कोटी रुपयांच्या गुंतवणूक करारामुळे राज्याला मोठा फायदा होणार आहे.

रुग्णालय, आरोग्यसेवा व अन्य सामाजिक क्षेत्राच्या सक्षमीकरणासाठी नेदरलँड व रूरल एन्हान्सर्स संस्थेशी झालेला १० हजार कोटी गुंतवणुकीचा करार महत्वाचा ठरेल. यातून रुग्णालयांची उभारणी, ऍम्ब्युलन्स व्यवस्था, पायाभूत सुविधांची उभारणे करणे शक्य होईल.- देवेंद्र फडणवीस, मुख्यमंत्री महाराष्ट्र 

पुणे- पुण्यातील कोर्टात काम करणाऱ्या एका पतीने पत्नीची शिलाई मशिनच्या कात्रीने गळा चिरून हत्या केल्याची धक्कादायक घटना समोर आली आहे. पुण्यातील खराडी परिसरात ही घटना घडली. ज्योती शिवदास गिते असं हत्या झालेल्या महिलेचे नाव आहे. बुधवारी (22 जानेवारी) पहाटे साडेचारच्या सुमारास ही घटना घडली. पोलिसांनी विविध कलमांतर्गत गुन्हा दाखल करत आरोपी पतीला अटक केली आहे. या घटनेचा पुढील तपास पोलीस करत आहेत.

पोलिसांच्या सूत्रांकडून मिळालेल्या माहितीनुसार,आरोपी शिवदास गिते हा मुळचा बीड जिल्ह्यातील रहिवासी आहे. तो पुण्याच्या खराडी परिसरातील तुळजाभवानी नगर परिसरात भाड्याच्या घरात राहत होता. तो पुणे जिल्हा सत्र न्यायालयात टंकलेखक म्हणून काम करत होता. काही दिवसांपूर्वी त्याला नोकरीवरून काढून टाकलं होतं, अशी माहिती देखील समोर आली आहे. दारूच्या व्यसनामुळे आरोपी शिवदास गिते सतत पत्नीसोबत वाद घातल होता.पहाटे पत्नीने उठवल्याचा रागातून आरोपीने ही हत्या केल्याची माहिती आहे. मुलाला खूर्चीवर बसवून पतीने पत्नीचा गळा चिरला. त्यानंतर त्याने आपण ही हत्या सेल्फ डिफेन्समध्ये केल्याचं म्हटलं. त्याचा व्हिडीओ काढून त्याने व्हॉट्स अॅप ग्रुपवर शेअर देखील केला होता. घटनेची माहिती मिळताच चंदननगर पोलीस घटनास्थळी दाखल झाले. पोलिसांनी तातडीने ज्योती यांना ससून रुग्णालयात दाखल केलं. मात्र तोपर्यंत फार उशीर झाला होता. रुग्णालयात जाता डॉक्टरांनी ज्योती यांना मृत घोषित केलं.

दरम्यान, आरोपी शिवदास गिते हा सस्पेंड होता, त्यामुळे त्याची पत्नी त्याला सकाळी चार वाजता अभ्यासाला उठवायची. परंतू पत्नीने उठवल्याचा राग आल्याने त्याने हे धक्कादायक कृत्य केल्याची माहिती समोर आली आहे. पोलिसांनी आरोपीला अटक केली असून पोलीस या प्रकरणात अधिकची माहिती घेत आहेत.

साईड मार्जिन, फ्रंट मार्जिन, पार्किंग स्पेस मधील संपूर्ण शहरातील अनधिकृत बांधकामे काढण्याची मागणी

पुणे- भारतीय जनता पार्टीचे महाराष्ट्र प्रदेश प्रवक्ता ,संदीप खर्डेकर यांनी कर्वेनगर मधील बेकायदा बांधकामावर धडक कारवाईबाबत महापालिकेचे अभिनंदन केले आहे. याबाबत त्यांनी महापालिका आयुक्त आणि पोलीस आयुक्त या दोहोंच्या नावे प्रसिद्धीस दिलेल्या पत्रात म्हटले आहे कि,’

आज सकाळी कर्वेनगर मधील पाणंद रस्त्यावरील धडक कारवाई बघून सुखद धक्का बसला.जगप्रसिद्ध कर्वे स्त्री शिक्षण संस्था,
सिद्धिविनायक महाविद्यालय, कमीन्स इंजिनियरिंग कॉलेज, आर्किटेक्चर कॉलेज,यांच्या समोरील ह्या रस्त्यावर bottle neck झाले होते.ह्या रस्त्यावर मोठ्या वाहनांची, पी एमपी एल बसची वाहतूक सुरु असते,अरुंद रस्त्यावरील अतिक्रमाणामुळे तेथे पादचारी, वाहनचालक विद्यार्थीनी, सामान्य नागरिक जीव मुठीत धरून प्रवास करतात.
अनेक वर्ष माझ्यासह ह्या भागातील नागरिक रस्ता रुंदीकरण करावे अशी मागणी करत होते,अखेर आज त्याचा मुहूर्त लागला .
स्थानिक लोकप्रतिनिधी, पथ विभाग प्रमुख, अतिक्रमण विभाग प्रमुख व टीम मनपा चे मनःपूर्वक अभिनंदन व आभार.
ह्या अनुषंगाने आणखी काही मागण्या खर्डेकर यांनी केल्या आहेत.

त्या पुढीलप्रमाणे ..
1) शहरात सर्वत्र साईड मार्जिन, फ्रंट मार्जिन, पार्किंग स्पेस अश्या ठिकाणी सर्रास अनधिकृत व्यवसाय सुरु असून त्यामुळे वाहने रस्त्यावर पार्क होतात व त्यामुळे वाहतूक कोंडीत भर पडते. तरी वरील विभागांप्रमाणेच बांधकाम विभागाला देखील सक्रिय करून त्यांच्या कडून देखील कडक व सातत्यापूर्ण कारवाई ची पुणेकरांची अपेक्षा आहे.
2) अश्याच पद्धतीने ( कर्वेनगर ) पुण्यनगरीत सार्वत्रिक कारवाई केल्यास प्रशासनास पुणेकर दुवा देतील आणि निश्चितच शनिवारवाड्यावर आपला जाहीर सत्कार कार्यक्रम आयोजित केला जाईल.
3) पथारी व्यवसायिकांचा व्यवसायिक हक्क अबाधित राखण्यासाठी आणि त्यांना वैधरित्या व्यवसाय करता यावा यासाठी अनेक वर्ष प्रलंबित असलेला हॉकर्स झोन चा विषय लवकरात लवकर मार्गी लावावा अशी मागणी करत आहे.

पंडित प्रमोद गायकवाड यांच्या एकसष्टीपूर्तीनिमित्त विशेष सत्कार
गांधर्व महाविद्यालय, पुणे आणि स्वर ताल अकॅडमीतर्फे आयोजन
पुणे : गांधर्व महाविद्यालय, पुणे आणि स्वर ताल म्युझिक अकॅडमी यांच्या संयुक्त विद्यमाने बुधवारी आयोजित श्रीकृष्ण संगीत महोत्सवात गायन-वादनाची सुरेल मैफल अनुभवायला मिळाली. शहनाई, बासरी आणि संवादिनी या सुषीर वाद्यांच्या त्रिवेणी संगमात रसिक रममाण झाले.
संगीत साधक, गुरू डॉ. पंडित प्रमोद गायकवाड यांच्या एकसष्ठीपूर्ती निमित्ताने गांधर्व महाविद्यालयातील विष्णू विनायक स्वरमंदिरात संगीत महोत्सवाचे आयोजन करण्यात आले होते. पंडित गायकवाड यांचा डॉ. विकास कशाळकर यांच्या हस्ते या वेळी विशेष सन्मान करण्यात आला. पंडित प्रमोद मराठे, पंडित राजेंद्र कुलकर्णी, पंडित रामदास पळसुले, विदुषी सानिया पाटणकर, डॉ. शुभांगी बहुलीकर, विनायक गुरव, संतोष घंटे, पंडित सुरेश पतकी उपस्थित होते.
कार्यक्रमाची सुरुवात स्वर ताल अकॅडमीच्या विद्यार्थ्यांच्या तबला सहवादनाने झाली. ताल तीनतालमध्ये पेशकार, कायदे, रेले, तोडे-तुकडे सादर केले. विद्यार्थ्यांना मयुरेश गाडगीळ याने लहेरा साथ केली. विदुषी सानिया पाटणकर यांनी आपल्या गायन मैफलीची सुरुवात राग बसंत केदारमधील विलंबित तीनतालात ‌‘अतर सुगंध‌’ या पारंपरिक बंदिशीने केली. यानंतर मोगुबाई कुर्डिकर यांची द्रुत एकतालातील ‌‘खेल न आयी नवेली नार‌’ ही बंदिश सादर केली. बसंत रागातील सरगमने त्यांनी मैफलीची सांगता केली. सुरेल आवाज, दमदार ताना, आवाजाची फिरत या वैशिष्ट्यांनी मैफल रंगली. विनायक गुरव (तबला), संतोष घंटे (संवादिनी), वेदवती परांजपे, प्रशिका सहारे (सहगायन) यांनी साथसंगत केली.
कार्यक्रमाच्या उत्तरार्धात पंडित राजेंद्र कुलकर्णी (बासरी), पंडित प्रमोद मराठे (संवादिनी) आणि डॉ. प्रमोद गायकवाड (शहनाई) यांच्या सहभागातून सुषीर वाद्यांचा संगम साधला गेला. या दिग्गज कलाकारांना आपल्या वादन मैफलीची सुरुवात राग मारुबिहागने केली. पंडित डॉक्टर प्रमोद गायकवाड यांच्या शहनाईचे सुमधुर स्वर, पंडित प्रमोद मराठे यांच्या संवादिनीचे सुरेल वादन तर पंडित राजेंद्र कुलकर्णी यांच्या बासरीचे आसमंतात भरून राहणारे सूर यांनी मैफलीत रंगत आणली. बनारसी धुन ऐकविल्यानंतर कलाकारांनी मैफलीची सांगता भैरवीतील धुन ऐकवून केली. या सर्व दिग्गज कलाकारांना जगविख्यात तबलावादक पंडित रामदास पळसुले यांच्या तबल्याची अजोड साथ लाभल्याने ही वादन मैफल उत्तरोत्तर रंगत गेली. उपस्थित कलाकार, संगीत प्रेमी रसिकांसाठी ही अनोखी मैफल हृदयात जपून ठेवण्यासाठी अनमोल ठरली. कलाकारांचा सत्कार डॉ. विकास कशाळकर यांच्या हस्ते करण्यात आला.
या वेळी बोलताना डॉ. कशाळकर म्हणाले, डॉ. प्रमोद गायकवाड हे उत्तम गायक असून कलाकारात आवश्यक व्यापकता आणि मनाचा मोठापणा त्यांच्याकडे भरभरून आहे. सहकलाकारांना सामावून घेत मैफलीत रंग भरणे हे त्यांचे वैशिष्ट्य आहे. त्यांनी शहनाई या वाद्याचे शास्त्रोक्त संशोधन करून संगीत जगताला मोठी देणगी दिली आहे.
सत्काराला उत्तर देताना डॉ. प्रमोद गायकवाड म्हणाले, मी आजपर्यंत सांगीतिक क्षेत्रात केलेल्या कामाचे गुरूंकडून कौतुक होत आहे. या पवीत्र वास्तूत माझा सन्मान होत आहे, हा माझ्यासाठी सुवर्णक्षणच आहे. डॉ. शुभांगी बहुलकीकर यांनी मनोगत व्यक्त केले.
सूत्रसंचालन अबोली सेवेकर यांनी केले तर आभार विनायक गुरव यांनी मानले.

पुणे, दि. २२ : पुणे शहर व परिसरात गुलेन बारी सिंड्रोम जीबी या आजाराचे रुग्ण आढळून आल्याच्या पार्श्वभूमीवर विभागीय आयुक्त डॉ.चंद्रकांत पुलकुंडवार यांनी विभागीय आयुक्त कार्यालयात, विभागीय व जिल्ह्याच्या सर्व आरोग्य यंत्रणांचा या आजारा संदर्भात करण्यात येणाऱ्या उपचार व उपायोजनाचा सविस्तर आढावा घेतला.
यावेळी डॉ.पुलकुंडवार म्हणाले, ज्या भागामध्ये,कॉलनी मध्ये पेशंट आढळून येत आहेत त्या भागातील पाण्याचे स्त्रोत महानगरपालिकेने तपासावेत आणि नागरिकांना पिण्याचे स्वच्छ व सुरक्षित पाणी उपलब्ध होईल याची दक्षता घ्यावी.

दवाखान्यात भरती असलेल्या रुग्णांची संपूर्ण माहिती घेऊन त्याचा अभ्यास करावा जेणेकरून हा आजार नेमका कशामुळे होतोय याची माहिती समोर येईल आणि नागरिकांना त्याबाबत सजग करता येईल.

सहसंचालक आरोग्य सेवा यांनी तांत्रिक अधिकाऱ्यांसोबत बैठका घेऊन त्यानंतर नागरिकांच्या माहितीसाठी एक मार्गदर्शक माहिती प्रसिद्ध करावी.

आरोग्य विभाग वैद्यकीय शिक्षण विभाग आणि महानगरपालिकेच्या आरोग्य विभाग यांनी आपसात समन्वय ठेवून आवश्यक त्या उपाययोजना तातडीने कराव्यात अशा सूचना त्यांनी दिल्या. ससून रुग्णालयाचे अधिष्ठाता डॉ.एकनाथ पवार म्हणाले,गुलेन बारी सिंड्रोम हा मज्जातंतूचा आजार असून या आजारामध्ये सुरुवातीला पोटाचे आजार जसे, जुलाब, उलटी, पोटदुखी किंवा श्वसन आजार जसे, की खोकला,सर्दी इत्यादी होते. आजार झाल्यानंतर पाच ते सात दिवसानंतर रुग्णालयाच्या हात पायाची ताकद कमी होते व रुग्णास चालता येत नाही व हात हलवता येत नाही आजार वाढल्यास श्वास घेण्यास त्रास होतो व रुग्णास व्हेंटिलेटर लावण्याची गरज भासू शकते या आजाराचे निदान नर्वे कंडक्शन स्टडी व ( सी एस एफ तपासणीद्वारे) पाठीच्या मणक्यावरील पाणी तपासून केले जाते.या आजाराची लक्षणे दिसल्यास तात्काळ डॉक्टरांच्या सल्ल्याने लवकरात लवकर उपचार घ्यावेत या आजारातून बहुतांश रुग्ने बरे होतात असे त्यांनी सांगितले . ससून सर्वोपचार रुग्णालयामध्ये या आजाराचे सध्या १० प्रौढ रुग्ण व दोन लहान मुलं दाखल झाले आहेत. यामध्ये आठ पुरुष व चार स्त्रिया यांचा समावेश आहेत. सर्व रुग्णांना योग्य उपचार देण्यात येत आहेत. अशी माहिती डॉ. पवार यांनी दिली.
बैठकीस,जिल्हा परिषदेचे मुख्य कार्यकारी अधिकारी गजानन पाटील, आरोग्य सेवा उपसंचालक डॉ. आर बी पवार, जिल्हा आरोग्य अधिकारी डॉ. सचिन देसाई, जिल्हा शल्य चिकित्सक डॉ. नागनाथ यम्पल्ले, मनपा आरोग्य अधिकारी डॉ. मीरा बोराडे,
बीजे मेडिकल विद्यालयाचे मायक्रोलॉजी विभाग प्रमुख राजेश कार्यकर्ते महाविद्यालयाचे मेडिसिन विभागाचे प्रमुख डॉ. एच.डी. प्रसाद उपस्थित होते तसेच जिल्हाधिकारी जितेंद्र डूडी, पिंपरी चिंचवड महानगरपालिका आयुक्त शेखर सिंह, साथरोग विभागाच्या सहसंचालक बबिता कमलापूरकर, अन्न व औषध प्रशासनाचे सहायक आयुक्त, मनपा पाणी पुरवठा विभागाचे नंदकुमार जगताप दूरदृश्य प्रणालीद्वारे उपस्थित होते.