ग्रामविकास मंत्री जयकुमार गोरे यांच्या हस्ते निर्मल दिंडीचा शुभारंभ

महाआवास व संत गाडगेबाबा ग्राम स्वच्छता अभियान पुरस्कारांचे वितरण;*महाआवास अभियानात पुणे जिल्हा तर स्वच्छ ग्राम स्पर्धेत शेळकेवाडी ग्रामपंचायत प्रथम

पुणे, दि. २१:महाआवास व संत गाडगेबाबा ग्रामस्वच्छता हे दोन्ही अभियान ग्रामविकासासाठी महत्त्वाची आहेत. स्वच्छ, सुंदर व प्लास्टिक मुक्त महाराष्ट्रासाठी ग्रामपंचायतीनी महत्त्वाची भूमिका निभवावी व शासनामार्फत लवकरच राबविण्यात येणाऱ्या मुख्यमंत्री समृद्ध ग्राम स्पर्धेत सहभागी होण्यासाठी सज्ज व्हावे, असे आवाहन ग्रामविकास व पंचायतराज मंत्री जयकुमार गोरे यांनी केले.

विभागीत आयुक्त कार्यालयात आयोजित निर्मल वारीचा शुभारंभ तसेच राष्ट्र संत तुकडोजी महाराज स्वच्छ ग्राम स्पर्धा, संत गाडगेबाबा ग्रामस्वच्छता अभियान व महाआवास योजनेतील पुरस्कार वितरण सोहळ्यात मंत्री श्री. गोरे बोलत होते. यावेळी विभागीय आयुक्त डॉ.चंद्रकांत पुलकुंडवार, जिल्हा परिषदेचे मुख्य कार्यकारी अधिकारी गजानन पाटील,अतिरिक्त मुख्य कार्यकारी अधिकारी चंद्रकांत वाघमारे, अपर आयुक्त नितीन माने, विजय मुळीक उपस्थित होते.

मंत्री श्री. गोरे म्हणाले, ग्रामविकास विभागाने आषाढी वारीच्या अनुषंगाने सर्व व्यवस्था उभ्या केल्या आहेत. पंढरपूरला दर्शनासाठी येणारा प्रत्येकजण व्हीआयपी आहे. त्यामुळे आषाढी एकादशी होईपर्यंत सर्व व्हीआयपी दर्शन बंद केले आहेत. सर्व मंदिर परिसर वाहनमुक्त केला आहे. ३ हजार स्वयंसेवकांच्या माध्यमातून पंढरपूर मध्ये उद्या (२२ जून) महास्वच्छता अभियान राबविण्यात येणार आहे.

ते म्हणाले, आषाढीवारी मध्ये वारकऱ्यांना सर्व सुविधा उपलब्ध करुन देण्यासाठी शासनाने पुरेसा निधी उपलब्ध करुन दिला असून पालखी तळ व मार्गावर स्वच्छतेवर भर देण्यात येत आहे. ७ लाख रेनकोटची व्यवस्था करण्यात आली आहे. फिरते दवाखाने, औषधोपचार कीट, महिलांच्या स्नानगृहांची व्यवस्था, पर्यायी मार्ग तसेच यावर्षीपासून वृद्ध वारकऱ्यांसाठी मसाज व्यवस्था करण्यात आली आहे असे सांगून ‘सर्वांसाठी घरे’ या केंद्र सरकारच्या योजनेत एका वर्षात ३० लाख घरांना मान्यता मिळाली आहे. त्यासाठी ६५ हजार कोटी रुपयांना मान्यता मिळाली असून याअंतर्गत एका वर्षात ५० टक्के घरे पूर्ण होतील. या योजनेतही ग्रामविकास विभागातील चांगल्या कामाबद्दल अधिकाऱ्यांचे कौतुक करुन ग्रामविकास विभागामार्फत यंदाचा वारी सोहळाही सर्वोत्तम होईल असा विश्वास व्यक्त केला.

विभागीय आयुक्त डॉ. पुलकुंडवार म्हणाले,
पंचायत राज व्यवस्था ज्या उद्देशाने स्वीकारली आहे, जे स्वप्न आपल्या राष्ट्रनिर्मात्यांनी पाहिले, त्रिस्तरीय पंचायत राज व्यवस्था स्वीकारली आणि प्रत्येक गाव स्वावलंबी व्हावे या उद्देशाने ग्रामपंचायतींनी नागरिकांचे जीवनमान उंचावण्यासाठी केलेले काम उत्कृष्ट आहे. सर्वांसाठी चांगले आरोग्य महत्त्वाचे आहे, त्यासाठी योगसाधनेला पर्याय नाही. ग्रामसभेमध्ये योग साधनेचा प्रसार करावा असा संदेश योग दिनाच्या निमित्ताने त्यांनी दिला.

ते म्हणाले, सार्वजनिक स्वच्छतेकडे लक्ष द्यावे. गावांमध्ये कचरा, प्लास्टिक, टाकाऊ अन्न इतरत्र पसरलेले असते, त्याबाबत जनजागृती आवश्यक आहे. संत गाडगेबाबा स्वच्छतेचे अग्रदूत आहेत. ग्रामविकासाची गीता संत तुकडोजींनी लिहिली. ग्रामगीतेमध्ये आरोग्य,सुंदर गावांची संकल्पना, स्त्री-पुरुष समानता, स्त्री संरक्षण आदी विविध पैलूंवर प्रकाश टाकलेला आहे, असे सांगून सर्वांनी नद्यांचे पावित्र्य जपावे व पर्यावरणाचा समतोल राखण्यासाठी वृक्ष लागवड करावी. वारकऱ्यांनी हरित वारी, निर्मल वारीसाठी प्लास्टिकचा वापर टाळावा असे आवाहन त्यांनी केले.

मुख्य कार्यकारी अधिकारी श्री. पाटील यांनी वारकऱ्यांसाठी करण्यात आलेल्या सुविधांची माहिती दिली.

सन २०२३-२४ महाआवास योजनेंतर्गत प्रधानमंत्री आवास योजना ग्रामीण व राज्य पुरस्कृत आवास योजना सर्वोकृष्ट जिल्हे, तालुके व ग्रामपंचायती तसेच शासकीय जागा उपलब्धता सर्वोकृष्ट कामगिरी करणारे तालुके, वाळू उपलब्धता सर्वोकृष्ट कामगिरी करणारे तालुक्यांना पुरस्कार वितरण करण्यात आले.

सन २०२२-२०२३ राष्ट्र संत तुकडोजी स्वच्छ ग्राम स्पर्धेतील प्रथम, द्वितीय व तृतीय विजेत्या ग्रामपंचायती : शेळकेवाडी (करवीर, कोल्हापूर), बोरगाव (कवठे महाकाल, सांगली), कवठे ( खंडाळा, सातारा )

संत गाडगेबाबा ग्राम स्वच्छता अभियान २०२२-२०२३ अंतर्गत विभागस्तरीय विशेष पुरस्कार:
स्व. वसंतराव नाईक पुरस्कार- दरेवाडी (सातारा), डॉ. बाबासाहेब आंबेडकर पुरस्कार- ग्रामपंचायत सांडगेवाडी (सांगली), स्व. आबासाहेब खेडकर पुरस्कार- गोयेगाव (सोलापूर)

संत गाडगेबाबा ग्रामस्वच्छता अभिमान २०२३-२४ जिल्हास्तरीय पुरस्कार: ग्रामपंचायत गावडेवाडी (प्रथम- ६ लाख), मांजरी खु. (द्वितीय- ४ लाख), सदोबाची वाडी (तृतीय- ३ लाख रुपये)

विशेष पुरस्कार प्राप्त ग्रामपंचायती- स्व. वसंतराव नाईक पुरस्कार- चिंचोली (जुन्नर), डॉ. बाबासाहेब आंबेडकर पुरस्कार- ग्रामपंचायत टाकवे खु. (मावळ), स्व. आबासाहेब खेडकर पुरस्कार- मांजरवाडी (जुन्नर)

यावेळी स्वच्छ सर्वेक्षण लोगोचे, पुणे जिल्हा परिषदेने तयार केलेली पालखी सोहळा माहिती पुस्तिका तसेच वारी सुविधा व टॉयलेट सुविधा ॲपचे मंत्री गोरे यांच्या हस्ते अनावरण करण्यात आले. तसेच मंत्री जयकुमार गोरे यांच्या हस्ते विभागीय आयुक्त कार्यालयाच्या प्रांगणात निर्मल दिंडी, आरोग्याची वारी पंढरीच्या दारी, मोबाईल व्हॅन, लोककला पथक, संवाद वारी आदी चित्ररथाचा शुभारंभ करण्यात आला.

पुरस्कार सोहळ्याला पुरस्कार प्राप्त तालुक्याचे गट विकास अधिकारी, प्रकल्प अधिकारी, ग्रामसेवक, सरपंच उपस्थित होते.

पुणे, दि. २१: राज्य शासनाच्या विविध विभागांच्या ठळक लोककल्याणकारी योजना, उपक्रमांची माहिती देणाऱ्या माहिती व जनसंपर्क महासंचालनालय मार्फत आयोजित ‘संवाद वारी’या चित्र प्रदर्शनाचे, एलइडी व्हॅन कलापथक व्हॅन तसेच चित्ररथाचे राज्याचे ग्रामविकास व पंचायत राज मंत्री जयकुमार गोरे यांच्या हस्ते उद्घाटन करण्यात आले.

विधानभवनाच्या प्रांगणात झालेल्या या कार्यक्रमास विभागीय आयुक्त डॉ. चंद्रकांत पुलकुंडवार, जिल्हा परिषदेचे मुख्य कार्यकारी अधिकारी गजानन पाटील, अतिरिक्त मुख्य कार्यकारी अधिकारी चंद्रकांत वाघमारे, जिल्हा माहिती अधिकारी डॉ. रवींद्र ठाकूर आदी उपस्थित होते.

श्री संत ज्ञानेश्वर महाराज पालखी सोहळा तसेच श्री संत तुकाराम महाराज पालखी सोहळ्यासोबत पालखी मुक्कामाच्या ठिकाणी हे प्रदर्शन ठेवण्यात येणार असून मुक्काम तळांसोबत संपूर्ण मार्गावर चित्ररथ, कलापथक तसेच एलइडी व्हॅनच्या माध्यमातून शासकीय योजनांची जनजागृती करणार आहेत.

प्रदर्शनात ३० फ्लेक्स पॅनेलचा समावेश आहे. पशुसंवर्धन विषयक किसान क्रेडिट कार्डची सुविधा पशुपालकांना देणे, पशुधन अभियानांतर्गत उद्योजकता विकासाला चालना, बळीराजा शेतकऱ्याच्या उन्नतीसाठीच्या योजना व घेतलेले निर्णय, नागरिकांना भेसळविरहित अन्नधान्य मिळावे यासाठी सुरक्षित अन्न तपासणीच्या सुविधा, मुख्यमंत्री सौर कृषी वाहिनी योजना, कृषी योजनांच्या लाभासाठी ॲग्रीस्टॅक नोंदणी, ‘महाविस्तार- एआय’ ॲप, सायबर सुरक्षितता, जलसिंचनासाठीचे प्रकल्प, सामाजिक न्यायासाठी मंत्रालयात ज्येष्ठ नागरिक कक्ष स्थापना, तृतीयपंथीयांच्या हक्कांचे संरक्षण आणि कल्याणकारी मंडळाची पुनर्रचना, आदिवासींच्या उत्थानासाठी महाराष्ट्र राज्य अनुसूचित जमाती आयोगाची स्थापना, प्रधानमंत्री आवास योजना टप्पा २ अंतर्गत ३० लाख घरे मंजूर, पीएम- जनमन, रमाई, शबरी, अटल बांधकाम कामगार वसाहत, पुण्यश्लोक अहिल्यादेवी होळकर, मोदी आवास योजना आदी योजनांची माहिती देण्यात आली आहे.

याशिवाय पशुसंवर्धन अंतर्गत मुख्यमंत्री पशुस्वास्थ्य योजना, राज्य स्तरावर कॉल सेंटरची स्थापना, पशु आरोग्य सेवांसाठी टोल फ्री क्रमांक, सहकार विभागांतर्गत आपले सहकार पोर्टलवर सहकार विभागाच्या ऑनलाईन सेवा उपलब्ध, परिवहन विभागांतर्गत महाराष्ट्र इलेक्ट्रिक वाहन धोरण २०२५, पुण्यश्लोक अहिल्यादेवी होळकर वसतिगृह योजना, गोवारी बांधवांच्या विकासासाठी स्वतंत्र योजना, दिव्यांगणसाठी स्वतंत्र विभाग, उच्च व तंत्र शिक्षण अंतर्गत राष्ट्रीय शैक्षणिक धोरण २०२० ची अंमलबजावणी आदी माहिती या प्रदर्शनात फ्लेक्स पॅनेलवर प्रदर्शित करण्यात आली आहे.

पुणे- दिंडी सोहळयात मोबाईल चोरताना रेकॉर्डवरील २ आरोपी पोलिसांच्या अलगद जाळ्यात सापडले
मार्केटयार्ड पोलीस ठाणे कडील रेकॉर्डवरील गुन्हेगार नामे प्रकाश देवराम परिहार, वय-२९ वर्षे, रा- लोहियानगर, पुणे याने व त्याचा साथीदार नामे मोहम्मद मनान जमाल शेख वय-२५ वर्षे रा. मार्केटयार्ड, गाळा नं.१८१, पुणे यांना मार्केटयार्ड परिसरातील शारदा गजानन मंदीराजवळ आलेल्या दिडीतील फिर्यादी व इतर ०२ इसमांचे चोरीस गेलेले मोबाईल त्यांचे ताब्यात मिळुन आल्याने त्यांना मार्केटयार्ड पोलीस स्टेशन येथे अटक केली आहे.
दिनांक २०/०६/२०२५ रोजी मार्केटयार्ड परिसरात आलेल्या दिडीतील इसम हे मोबाईल चोरीस गेले बाबत तक्रार देणेकामी पोलीस स्टेशन येथे आले असता श्रीमती मनिषा पाटील, वपोनि मार्केटयार्ड पोलीस स्टेशन यांनी अधिनस्त अधिकारी व अंमलदार यांना पुढील कार्यवाहीकरीता आदेश दिले. दिले आदेशाप्रमाणे तपास पथकातील पोलीस अंमलदार थोरात, कौस्तुभ जावध, राऊत व निगराणी पथकातील पोलीस अंमलदार लोणकर तसेच मार्केटयार्ड पोलीस स्टेशन कडील बीट मार्शल वरील पोलीस अंमलदार यांनी मार्केटयार्ड परिसरात पेट्रोलिंग करुन रेकॉर्डवरील आरोपी नामे प्रकाश देवराम परिहार यास ताब्यात घेतले व पोलीस स्टेशन येथे आणुन त्याचेकडे कसून चौकशी केली असता त्यांने व त्याचा साथीदार नामे मोहम्मद मनान जमाल शेख यांनी मोबाईल चोरी केले असल्याचे कबुल केले. त्यांचेकडे आणखी सखोल चौकशी केली असता त्यांनी आणखी ०२ मोबाईल चोरी केले असचे कबुल केले असुन सदरचे मोबाईल ताब्यात घेवून त्यांचेवर गु.र.नं.१३६/२०२५ भारतीय न्याय संहिता कलम ३०३ (२) तसेच गु.र.नं.१३७/२०२५ भारतीय न्याय संहिता कलम ३०३ (२) अन्वये गुन्हा नोंद करुन आरोपीतांस अटक करणेत आलेली आहे.
सदरची कारवाई अप्पर पोलीस आयुक्त, पुर्व प्रादेशिक विभाग, पुणे शहर, श्री मनोज पाटील, पोलीस उप आयुक्त, परि ०५ पुणे शहर, डॉ राजकुमार शिंदे, सहा पोलीस आयुक्त, वानवडी विभाग धन्यकुमार गोडसे, यांचे मार्गदर्शनाखाली मार्केटयार्ड पोलीस स्टेशनचे वरिष्ठ पोलीस निरीक्षक श्रीमती मनिषा पाटील, पोलीस निरीक्षक (गुन्हे) श्रीमती सुनिता नवले यांचे आदेशाने तपास पथकातील अंमलदार पोलीस अंमलदार थोरात, कौस्तुभ जावध, राऊत व निगराणी पथकातील अंमलदार लोणकर तसेच मार्केटयार्ड पोलीस स्टेशन कडील बीट मार्शल वरील अंमलदार यांनी केली आहे.

पुणे-दिंडी सोहळयात हरवलेल्या महिलेस पोलिसांनी शोधले अन दिंडीप्रमुख यांच्या पर्यंत सुखरुप पोहोचविले .

दि.२०/०६/२०२५ रोजी दिंडी सोहळ्याच्या अनुषंगाने वरिष्ठ पोलीस निरीक्षक, मार्केटयार्ड पोलीस स्टेशन, पुणे श्रीमती मनिषा पाटील, या अधिनस्त अंमलदार यांचेसह पेट्रोलिंग करत असताना एक महिला घाबरलेल्या स्थितीत दिसुन आल्या. तेव्हा त्यांना त्याबाबत विचारणा केली असता त्यांनी सांगितले की, त्या दिंडीमध्ये आल्या असुन त्या चुकल्या आहेत. तेव्हा श्रीमती मनिषा पाटील, वपोनि, मार्केटयार्ड पोलीस स्टेशन, पुणे शहर यांनी त्यांना त्यांचे नाव पत्ता विचारणा करता त्यांनी सीता दत्तात्रय ठाकूर वय ५५ वर्षे रा. दसखार, भटआळी असे सांगितले. परंतु त्यांचेकडे कोणाचाही मोबाईल नंबर नसल्याने व त्यांना सविस्तर माहिती देता येत नसल्याने शोध घेणे कठीण होत.
वरिष्ठ पोलीस निरीक्षक श्रीमती मनिषा पाटील यांनी अधिनस्त अंमलदार यांना उरण पोलीस स्टेशन येथे संपर्क करण्याचे सांगितले. उरण पोलीस स्टेशन व्दारे सदर बाबत माहिती घेतली असता सदर महिलेच्या पतीचा व दिंडीमालक यांचा मोबाईल नंबर प्राप्त झाला. मोबाईल नंबर प्राप्त होताच मिळालेल्या मोबाईल क्रमांकावर संपर्क करुन सदर बाबत दिंडी मालक यांना माहिती दिली. काही वेळाने दिंडी मालक व इतर दोन इसम मार्केटयार्ड पोलीस स्टेशन येथे आले असता त्यांचेकडे खात्री करुन महिला नामे सीता दत्तात्रय ठाकूर वय ५५ वर्षे रा. दसखार, भटआळी यांना त्यांचे ताब्यात सुखरुप देण्यात आले आहे.

पुणे- 

२१ जून २०२५ रोजी, वारीच्या दरम्यान, वारकऱ्यांनी पुण्यातील साधू वासवानी मिशनला भेट दिली. त्यांनी साधू वासवानी व दादा वासवानी यांच्या पवित्र समाधीस्थळी नतमस्तक होऊन भक्तिपूर्वक वंदन केले. यंदाचा त्यांचा दौरा पवित्र एकादशीच्या दिवशी घडल्याने एक अनोखा, दैवी संयोग अनुभवायला मिळाला.

समाधीस्थळी उभे राहून त्यांनी हृदयस्पर्शी अभंग गायले. काही वारकऱ्यांनी हवनातही सहभाग घेतला. एक कीर्तनकार भावुक होऊन म्हणाले, “साधूजी आमच्यासोबतच गात होते.”

सुधीर नामक एक नियमित वारकरी, म्हणाले, “मी दरवेळी पूर्ण आस्वाद घेतो — प्रत्येक भेट म्हणजे एक नवा आनंद.”

गणेश नामक जेष्ठ वारकरी व गटप्रमुख, अंतर्मुख होऊन म्हणाले, “मिशन जे करतं, तेच खरोखर ईश्वराने शिकवलं आहे — सेवा आणि करुणा. कोविडसारख्या जागतिक संकटातही मिशनची सेवा थांबली नाही, ही गोष्ट खूप बोलकी आहे. वयस्कर लोकांचा, आमच्यासारख्या मित्रांचा सन्मान आणि आपुलकीने केलेले स्वागत मनाला स्पर्शून गेले. आता पुढच्या भेटीची वाट पाहतोय.”

मिशनकडून प्रत्येक वारकऱ्याला प्रेमपूर्वक स्वागत करत, उपवासाच्या दिवशी उपयोगी ठरतील अशी सामग्री—सरबताच्या बाटल्या, टॉवेल, रुमाल, उपवास चिवडा व चिक्की, दोन केळी आणि एक आंबा—कापडी पिशवीत दिली गेली.

ही वार्षिक भेट म्हणजे प्रेम, श्रद्धा आणि एकात्मतेचा साक्षात अनुभव होता. वारकरी नवचैतन्याने त्यांच्या यात्रेवर पुढे निघाले आणि मिशनही त्यांच्या भेटीने अध्यात्मिक आनंदाने न्हालं. असं म्हणतात: “भक्ताची सेवा म्हणजेच देवाची सेवा!”

पुणे, ता. २१: पुणे विद्यार्थी गृहाच्या कॉलेज ऑफ इंजिनिअरिंग, टेक्नॉलॉजी अँड मॅनेजमेंट, पुणे या अभियांत्रिकी महाविद्यालयास स्वायत्त दर्जा बहाल करण्यात आला. महाविद्यालयाला शैक्षणिक वर्ष २०२५-२६ पासून शैक्षणिक स्वायत्तता लागू करण्यात आली असून यासंदर्भातील अकॅडमिक कौन्सिलची बैठक नुकतीच यशस्वीरित्या पार पडली. या बैठकीस महाविद्यालयाचे संचालक सुनील रेडेकर व प्रा. राजेंद्र कडुस्कर, प्राचार्य डॉ. मनोज तारांबळे, सर्व विभागप्रमुख, डीन इंडस्ट्री इन्स्टिट्यूट सेल, डीन अकॅडमीक, परीक्षा नियंत्रक, बोर्ड ऑफ स्टडीजचे प्रतिनिधी, शिक्षक प्रतिनिधी तसेच विशेष निमंत्रित सदस्य उपस्थित होते.

यासोबतच, निमंत्रित सदस्य म्हणून आयआयआयटी प्रयागराजचे संचालक डॉ. मुकुल सुतावणे, आयआयटी मुंबईच्या इलेक्ट्रिकल अभियांत्रिकी विभागातील प्राध्यापक डॉ. विक्रम गद्रे, सावित्रीबाई फुले पुणे विद्यापीठाच्या विज्ञान व तंत्रज्ञान विभागाचे प्रमुख डॉ. आदित्य अभ्यंकर, रसायनशास्त्र विभागातील प्राध्यापिका डॉ. अनुपमा कुंभार, गोखले इन्स्टिट्यूट ऑफ पॉलिटिक्स अँड इकॉनॉमिक्समधील सेंटर फॉर सस्टेनेबल डेव्हलपमेंटचे संचालक प्रा. डॉ. गुरुदास नुलकर, एआय आधारित मार्केटिंग कन्सल्टंट व आंतरराष्ट्रीय प्रशिक्षक डॉ. अमेय पांगारकर उपस्थित होते.

या बैठकीत प्रथम वर्ष अभियांत्रिकी अभ्यासक्रम, प्रथम वर्ष व्यवस्थापन अभ्यासक्रम, प्रथम वर्ष पदव्युत्तर अभ्यासक्रम – इलेक्ट्रिकल आणि प्रिंटिंग विभाग, महाविद्यालयाचे शैक्षणिक व परीक्षा नियम आदी गोष्टीना अधिकृत मान्यता देण्यात आली. ही बैठक संस्थेच्या शैक्षणिक स्वायत्ततेच्या अंमलबजावणीसाठी महत्त्वपूर्ण ठरली आहे, असे संचालक सुनील रेडेकर यांनी नमूद केले.

पुणे, 21 जून 2025

अकराव्या आंतरराष्ट्रीय योग दिनानिमित्त केंद्रीय संचार ब्युरो, पुणे (महाराष्ट्र-गोवा), प्रादेशिक कार्यालयातर्फे योग सरावाचे आयोजन करण्यात आले होते.

हा योग सराव महामेट्रो पुणे यांच्या सोबत जिल्हा न्यायालय स्थानकामध्ये करण्यात आला; यावेळी महामेट्रोचे व्यवस्थापकीय संचालक श्रावण हर्डीकर आपल्या अधिकारी कर्मचाऱ्यांसह आवर्जून उपस्थित राहिले. केंद्रीय संचार ब्युरो, पुणेचे कार्यालय प्रमुख उपसंचालक निखिल देशमुख आणि इतर अधिकारी-कर्मचारी देखील याप्रसंगी सहभागी होते.

योग सरावाच्या सुरुवातीला केंद्रीय संचार ब्युरोच्या विभागीय आणि नोंदणीकृत कलाकारांनी योग विषयावर आधारित गीतांचे सादरीकरण केले.

पुणे स्थित राष्ट्रीय निसर्गोपचार संस्थेचे (आयुष मंत्रालय) तज्ज्ञ मार्गदर्शक डॉ. कुणाल बगाडे आणि सिक्कीमचे डॉ. यॉंग यावेळी योग प्रात्यक्षिक मार्गदर्शनासाठी उपस्थित होते.

त्यानंतर पुणे मेट्रोच्या स्वारगेट स्थानकावर मांडलेल्या योगासन विषयावर आधारीत प्रदर्शनाचे डॉ. श्रावण हर्डीकर यांनी उद्घाटन केले. 

भारत सरकारच्या प्रकाशन विभागाचा पुस्तक विक्री स्टॉल देखील स्वारगेट स्थानकात मांडण्यात आला आहे, याचे देखील उद्घाटन हर्डीकर यांनी केले.

हे योग प्रदर्शन आणि सवलतीमध्ये पुस्तक विक्री स्वारगेट स्थानकाच्या प्रवेश द्वारपाशी दिनांक 21, 22 आणि 23 जून रोजी सर्व नागरिकांसाठी खुले आहे. सध्या संत ज्ञानेश्वर महाराज व संत तुकाराम महाराज यांच्या पालख्या तसेच वारकरी पुण्यामध्ये मुक्कामास आहेत, स्वारगेट मेट्रो स्थानकात असंख्य वारकरी प्रदर्शन न्याहाळताना आणि त्याचा आनंद घेताना दिसले.

केंद्रीय संचार ब्युरोचे माहिती-चित्र रथ केंद्रीय राज्यमंत्री मुरलीधर मोहोळ यांच्या हस्ते रवाना

पुणे:माहिती व प्रसारण मंत्रालयाच्या केंद्रीय संचार ब्युरो, पुणे तर्फे पंढरपूर वारीनिमित्त दोन माहिती-चित्र रथ आज पुण्यातून निघाले. केंद्रीय सहकार व नागरी उड्डाण राज्यमंत्री मुरलीधर मोहोळ यांनी या रथांचे उद्घाटन करून मार्गस्थ केले. केंद्र सरकारच्या अकरा वर्षातील विविध योजनांची दृक-श्राव्य माहिती देत हे डिजिटल रथ संपूर्ण वारीत दोन्ही मार्गांवर चालत राहतील. हे डिजिटल रथ पुणे ते पंढरपूर असा प्रवास करतील.

याप्रसंगी पुण्याचे विभागीय आयुक्त डॉ. चंद्रकांत पुलकुंडवार तसेच माहिती व प्रसारण मंत्रालयाच्या पश्चिम क्षेत्र महासंचालक, स्मिता वत्स शर्मा देखील उपस्थित होते.

या उद्घाटनाच्या निमित्ताने केंद्रीय राज्यमंत्री मुरलीधर मोहोळ यांनी आपले मनोगत व्यक्त करताना म्हटले, “आपल्या महाराष्ट्राची शेकडो वर्षांची परंपरा म्हणजे संत ज्ञानेश्वर आणि संत तुकाराम महाराज यांची पालखी, हा पालखी सोहळा आपल्यासाठी पर्वणी असते. एक वेगळा अनुभव असतो; या वारीच्या निमित्ताने लाखो वारकरी, भाविक पंढरीच्या दिशेने निघाले आहेत. ही वर्षानुवर्षे जुनी परंपरा वृद्धिंगत होताना आपण पाहत आहोत. गेल्या अकरा वर्षात केंद्र सरकारने केलेल्या कामाची माहिती जनतेपर्यंत पोहचविण्याचे काम या वारीच्या निमित्ताने होणार आहे. त्यासाठी या दोन डिजिटल रथांचे उद्घाटन आज होत आहे; माहिती आणि प्रसारण मंत्रालयातर्फे केंद्र सरकारच्या योजनांची माहिती देण्याचे काम हे गावागावापर्यंत पोहचणार आहे.”

“केवळ देशात नाही तर आंतरराष्ट्रीय स्तरावर पंतप्रधानांच्या नेतृत्वाखालील एक शक्तिशाली, सामर्थ्यवान राष्ट्र म्हणून आपल्या देशाचे नाव घेतले जात आहे. अकरा वर्ष सेवा, सुशासन आणि गरीब कल्याणाची, असे म्हटले जाते; सोबत समृद्ध, सशक्त आणि सुरक्षित भारताची अकरा वर्षे असे देखील आपण म्हणू शकतो हे ‘ऑपरेशन सिंदूर’ने दाखवून दिले. देशाची 25 कोटी जनता दारिद्रय रेषेच्या वर आली, देशातील सर्वसामान्य माणसांचा विचार झाला. गरीब कल्याणाच्या असंख्य योजना आणल्या गेल्या. म्हणून ही अकरा वर्ष मला जन कल्याणाची, आत्मनिर्भर भारताच्या प्रगतीची आहेत; विकसित भारताचा पाया आहेत, आता कळस बांधण्याकडे आपण चाललो आहोत.” असे विचार त्यांनी यावेळी मांडले.

केंद्रीय संचार ब्युरोच्या विभागीय कलाकारांसोबत नोंदणीकृत लोककलावंतांनी वर आधारीत गीतांचे सादरीकरण केले. यावेळी केंद्रीय संचार ब्युरो, पुणेचे विभागीय कलाकार, गायक-गीतकार-संगीतकार मकरंद मसराम यांनी सादर केलेल्या स्वरचित गीताचे केंद्रीय राज्यमंत्री यांनी कौतुक केले.

केंद्र सरकारच्या लोकाभिमुख विविध योजनांचा उल्लेख करून त्यांचा राज्यातील जनतेला लाभ मिळाल्याचे विभागीय आयुक्त डॉ. चंद्रकांत पुलकुंडवार यांनी यावेळी नमूद केले.

एलईडी डिस्प्ले स्क्रीन आणि कलाकारांच्या सादरीकरणानी सुसज्ज असलेले हे रथ लाखो वारकऱ्यांसह यात्रेच्या मार्गावर प्रवास करतील आणि पारंपारिक सांस्कृतिक सादरीकरणे तसेच सरकारी योजनांवरील माहिती पुस्तिकांचे वितरण करून केंद्र सरकारच्या अकरा वर्षांच्या विविध कामगिरीचे दर्शन घडवतील.

पुणे दि.२१: आषाढी पालखी सोहळ्यानिमित्त मुख्यमंत्री देवेंद्र फडणवीस यांनी भवानी पेठेतील पालखी विठ्ठल मंदिरात संतश्रेष्ठ श्री ज्ञानेश्वर महाराज यांच्या पादुकांचे शुक्रवार (२०) रोजी दर्शन घेतले. मंदिरात त्यांच्या हस्ते पालखीची पूजा झाली.

मंदिर समितीच्यावतीने मुख्यमंत्री फडणवीस यांचा सत्कार करण्यात आला. यावेळी उच्च व तंत्र शिक्षण मंत्री चंद्रकांत (दादा) पाटील, श्री ज्ञानेश्वर महाराज संस्थांचे प्रमुख विश्वस्त योगी निरंजननाथ, गुरु शांतिनाथ, राजेंद्र उमाप, भावार्थ देखणे, पुरुषोत्तम पाटील, पालखी विठ्ठल मंदिर संस्थांचे अध्यक्ष तेजेंद्र कोंढरे, विश्वस्त प्रमोद बेंगरूट, शिवाजीराव जगदाळे, गोरख भिकुले आदी उपस्थित होते.

मुख्यमंत्र्यांनी आषाढी वारी निमित्त पालखीसोबत पंढरपूरला जाणाऱ्या वारकऱ्यांना शुभेच्छा दिल्या. तत्पूर्वी विठ्ठल नामाचा गजर आणि ज्ञानोबा-तुकारामच्या जयघोषात टाळ मृदुंगाच्या तालावर भक्तिमय वातावरणात संतश्रेष्ठ श्री ज्ञानेश्वर महाराज पालखीचे विठ्ठल मंदिरात आगमन झाले. मंदिर परिसरात मोठ्या प्रमाणावर वारकरी व भक्तगण उपस्थित होते.