चार दिवस दिवाळी, ख्रिसमस, रमजान अंकांचे प्रदर्शन पाहण्याची पुणेकरांना संधी

पुणे: स्वर्गवासी कमलाबाई रसिकलाल धारिवाल पुरस्कृत ‘छंदश्री आंतरराष्ट्रीय दिवाळी अंक स्पर्धा पुरस्कार’ वितरण सोहळा व दिवाळी, ख्रिसमस, रमजान निमित्ताने प्रकाशित होणाऱ्या अंकांच्या प्रदर्शनाचे आयोजन केले आहे. १ ते ४ जुलै २०२५ या कालावधीत सकाळी ११ ते सायंकाळी ८ या वेळेत आयोजित प्रदर्शनाचे उद्घाटन मंगळवारी (ता. १ जुलै) सकाळी ११ वाजता बालगंधर्व रंगमंदिराच्या कलादालनात माजी संमेलनाध्यक्ष व संत साहित्याचे अभ्यासक डॉ. सदानंद मोरे यांच्या हस्ते, धारिवाल इंडस्ट्रीजचे व्यवस्थापकीय संचालक प्रकाशशेठ धारिवाल यांच्या हस्ते होणार आहे. पुरस्काराचे यंदा नववे वर्ष असून, पुरस्कार वितरण सोहळा संध्याकाळी ५ वाजता गणेश सभागृह, टिळक रस्ता पुणे येथे प्रसिद्ध अभिनेत्री डॉ. निशिगंधा वाड, अखिल भारतीय मराठी साहित्य महामंडळाचे अध्यक्ष मिलिंद जोशी, ज्येष्ठ लेखिका सिसिलिया कार्व्हालो, संमेलनाचे माजी अध्यक्ष भारत सासणे यांच्या उपस्थितीत होणार आहे, अशी माहिती दिनमार्क पब्लिकेशनचे दिनकर शिलेदार यांनी दिली. प्रसंगी साहित्यिक माधव राजगुरू उपस्थित होते.

दिनकर शिलेदार म्हणाले, “ही स्पर्धा दिवाळी अंकांसाठी आंतरराष्ट्रीय स्तरावर घेण्यात येते. यंदा स्पर्धेत ख्रिसमस सणाच्या निमित्ताने वसई येथून प्रकाशित होत असलेल्या अंकांच्या प्रवेशिका, तसेच रमजान सणानिमित्त प्रकाशित होणार ‘नब्ज्’ हा अंक स्पर्धेसाठी स्वीकारण्यात आला आहे. देशभरातून प्रकाशित होणाऱ्या दिवाळी अंकांची माहिती पुणेकरांना व्हावी, यासाठी या अंकांचे प्रदर्शन भरविण्यात येत आहे. कादौडी, पाशिहार हे अंक ख्रिसमसमध्ये कादौडी भाषेत प्रसिद्ध होतात. स्पॅनिश लोक भारतात ५०० वर्षांपूर्वी आले होते; तेव्हा कादौडी भाषेचा जन्म झाला. कादौडी भाषा काही लोकांची बोली भाषा म्हणून प्रचलित झाली. गीत, संक्रमण अशासारखे अंक मराठी भाषेतच प्रसिद्ध होतात. त्यामुळे त्यांना या स्पर्धेत सामावून घेण्यात आले. पुढील वर्षी पश्चिम बंगालमधून बंगाली भाषेतील दुर्गा पूजेनिमित्त प्रसिद्ध होणारे अंक सामील करून घेतले जाण्याचा मानस आहे. यंदा स्पर्धेमध्ये २३४ प्रवेशिका स्वीकारण्यात आल्या आहेत. अमेरिकेतून दोन दिवाळी अंक स्पर्धेत सहभागी झाले आहेत. अशा प्रकारची स्पर्धा आणि प्रदर्शन भारतात प्रथमच सादर करण्याचा मान दिनमार्क पब्लिकेशन्सला मिळणार आहे. काही अंक पूनम एजन्सीच्या श्रीकांत भुतडा यांच्या सहकार्यातून मिळवणार असून, ३०० पेक्षा जास्त अंक प्रदर्शनात असतील, असा विश्वास आहे.”

पुण्यातून मिनाज लाटकर या गेली तीन वर्षे रमजाननिमित्त ‘नब्ज’ नावाचा अंक मराठी भाषेत देवनागरी लिपीत सादर करीत आहेत. कोणत्याही सणानिमित्त प्रसिद्ध होणारे अंक वाचन संस्कृतीचा आधारस्तंभ ठरतात. विविध प्रकारची माहिती त्यामुळे उपलब्ध होते. यामुळेच अंकांचे प्रदर्शन भरवण्याचा घाट घालण्यात आला आहे. इथे धर्माचा विचार बाजूला ठेवला आहे. फक्त वाचन संस्कृतीवर भर देण्यात येतो. आक्षेपार्ह लिखाण केले जात नाही ना, याची काळजी घेण्यात येते. यात कुणाच्या भावना दुखावण्याचा विचार मनात आलेला नाही. त्यातूनही कुणाच्या भावना दुखावल्या गेल्या तर मी त्याची आगाऊ माफी मागतो. केवळ वाचकांना चांगले खाद्य मिळावे, हाच त्यामागचा विचार आहे, असे दिनकर शिलेदार यांनी नमूद केले.

छंदश्री आंतरराष्ट्रीय दिवाळी अंक स्पर्धा पुरस्कार

सर्वोत्कृष्ट दिवाळी अंकाचे दोन्ही पुरस्कार यावर्षी सकाळ माध्यम समूहाच्या ‘अवतरण’ आणि ‘ॲग्रोवन’ या दिवाळी अंकाने पटकावले. उत्कृष्ट मुखपृष्ठाचा मान लोकमत समूहाच्या ‘दीपोत्सव’ दिवाळी अंकाला मिळाला आहे. त्याचे श्रेय सुप्रसिद्ध चित्रकार चंद्रमोहन कुलकर्णी यांना जाते. त्याशिवाय उत्कृष्ट दिवाळी अंकांचे प्रथम, द्वितीय आणि उत्तेजनार्थ पुरस्कार असे एकूण ४२ पुरस्कार यावर्षी देण्यात येणार आहेत. अनेक पुरस्कारांत महाराष्ट्र टाइम्स, लोकसत्ता, दिव्यमराठी या वृत्तपत्रांनीही उल्लेखनीय कामगिरी केली आहे.

पुणे : सामाजिक समावेशकतेला चालना देण्यासाठी राउंड टेबल इंडिया या संस्थेतर्फे पुण्यात दृष्टीहिनांसाठी ‘बियॉंड साईट’, ही आगळीवेगळी कार रॅली आयोजित करण्यात आली आहे. ही कार रॅली येत्या रविवारी (ता. २९) रोजी सकाळी १० वाजता द फर्न क्लब, अमनोरा पार्क, पुणे येथे होणार आहे, अशी माहिती राउंड टेबल इंडियाचे (एरिया १५) अध्यक्ष अंशुल मंगल यांनी पत्रकार परिषदेत दिली. प्रसंगी पूना ब्लाइंड मेन्स असोसिएशनच्या प्रकल्प संचालिका डॉ. आर्वा चिनीकमवाला, राउंड टेबल इंडियाचे सुमित गुप्ता, रोनक पतोडीया, मनन शहा, गुरप्रीत सिंग, इंद्रोनील चॅटर्जी, तरुण सिंग आदी उपस्थित होते.

अंशुल मंगल म्हणाले, “या रॅलीमध्ये ५० कारचालक सहभागी होणार आहेत. दृष्टिक्षम व्यक्ती कार चालवणार आहे, तर दृष्टिहीन व्यक्ती स्मार्टफोनवरून मिळणाऱ्या सूचना ऐकून ड्रायव्हरला मार्ग दाखवणार आहे. दोन तासाचा वेळ, २४ किलोमीटर अंतर असलेल्या या रॅलीचा मार्ग अमनोरा पार्क, खराडी बायपास, शक्ती स्पोर्ट्स, हयात इन्स्टा, गोल्ड ऍडलॅब चौक, वर्दे सोसायटी, गुंजन टॉकीज, कोरेगाव पार्क, वेस्टीन हॉटेल, मुंढवा चौक, मगरपट्टामार्गे अमनोरा पार्क असा आहे. ‘बियाँड साइट’ ही केवळ स्पर्धा नाही, तर दृष्टिहीन व्यक्तींच्या कौशल्यावर विश्वास दाखवण्याचा आणि त्यांच्याविषयी असलेल्या रूढ कल्पनांना आव्हान देण्याचा उपक्रम आहे. संथ गतीने शहरातील ठराविक मार्गावर ही रॅली पार पडणार असून, दृष्टिहीन व्यक्तींची दिशा ज्ञान, स्थानिक समज आणि संवाद कौशल्ये यांचा प्रत्यय इथे येणार आहे.”

“राउंड टेबल इंडियामध्ये आम्ही संधी निर्माण करत समाजातील वंचित घटकांना सक्षम करण्यावर विश्वास ठेवतो. ‘बियाँड साइट’ ही आमच्या समावेशकतेवरील कटिबद्धतेचे आणि दृष्टिहीनांच्या क्षमतेवर असलेल्या विश्वासाचे प्रतीक आहे. या उपक्रमामध्ये विविध पार्श्वभूमीचे नागरिक सहभागी होणार असून, ड्रायव्हिंगबद्दलची आवड आणि दृष्टिहीन समुदायाबद्दलचा आदर यांच्या जोरावर ते एकत्र येणार आहेत. या रॅलीच्या माध्यमातून केवळ मनोरंजन नव्हे, तर ‘अपंगत्व म्हणजे असमर्थता नव्हे’ हा सामाजिक संदेशही दिला जाणार आहे,” असेही त्यांनी नमूद केले.

ही फक्त रॅली नाही, तर दृष्टिहीनांच्या अद्भुत कौशल्यांना ओळख देणारे व्यासपीठ आहे. ‘बियाँड साइट’च्या माध्यमातून अनेकांचे दृष्टिकोन बदलतील आणि दृष्टिहीनांसाठी अधिक समावेशक संधी निर्माण होतील, अशी आशा आहे,” असे डॉ. आर्वा चिनीकमवाला यांनी सांगितले. या उपक्रमाविषयी अधिक माहिती www.roundtableindia.org या संकेतस्थळावर उपलब्ध आहे.

पुणे-अखिल भारतीय मराठा शिक्षण परिषद पर्वती पुणे येथे राजर्षी शाहू जयंती उत्साहात साजरी करण्यात आली. कार्यक्रमाचे प्रमुख पाहुणे सामाजिक कार्यकर्ते पद्मश्री डॉ. गिरीष प्रभुणे, कार्यक्रमाचे अध्यक्ष तंजावरचे  छत्रपती विजयसिंहराजे भोसले, सौ.प्रमिला गायकवाड, सरचिटणीस आखिल भारतीय मराठा शिक्षण परिषद, , संयुक्त चिटणीस अजय पाटील, वासंती बोर्डे, खजिनदार ॲड भगवानराव साळुंखे, नियामक मंडळाच्या अध्यक्ष कमलताई व्यवहारे,के. टी. सोनावणे  यांचे उपस्थितीत कार्यक्रमाची सुरवात राजर्षी शाहू महाराज यांचे पुतळ्यास पुष्पहार अर्पण करून झाली.  राजर्षी शाहू महाराजांच्या कार्याविषयी बोलताना डॉ. गिरीष प्रभुणे यांनी शाहूमहाराज यांनी  शिक्षण हे एकमेव ध्येय डोळ्यापुढे ठेवून शिक्षण प्रसाराचे कार्य केले. त्यासाठी प्राथमिक शिक्षण मोफत आणि सक्तीचे केले व जे पालक मुला-मुलींना शाळेत पाठवणार नाहीत त्यांना दंड तसेच त्याच्यावर कायदेशीर दंडात्मक कारवाई करण्याचा कायदा तयार केला. जात हे भारतीय समाजाचे वास्तव आहे हे ओळखून शैक्षणिक विषमता दूर करण्यासाठी जातनिहाय बोर्डिंग, स्त्रियांच्या शिक्षणासाठी प्रयत्न करणारा दूरदर्शी राजा म्हणजे शाहू महाराज होय. चातुवर्ण समाजव्यवस्थेला छेद देऊन आपल्या राजदंडाचा वापर स्त्री उद्धारासाठी केला. विधवा पुनर्विवाह, आंतरजातीय विवाह, दलितांबरोबर मानवतावादी व्यवहार करण्याचा पायंडा स्वतःपासून घातला.औद्योगिक व कृषी क्षेत्रात भरीव कामगिरी केली. कुस्ती,गायन,चित्रकला या सारख्या विविध कलांना राजाश्रय दिला असे उपस्थितांना मार्गदर्शन केले. छत्रपती विजयसिंहराजे भोसले यांनी या प्रसंगी बोलताना आयुष्याचे प्रश्न सोडविण्यासाठी वैज्ञानिक दृष्टीकोन बाळगून कौशल्याआधारित  शिक्षणाचे महत्व जाणणारा द्रष्टा राजा म्हणजे लोकराजा राजर्षी शाहू महाराज असे उपस्थितांना मार्गदर्शन केले.
मा. सौ.प्रमिला गायकवाड सरचिटणीस आखिल भारतीय मराठा शिक्षण परिषद यांनी प्रास्ताविकामध्ये संस्थेच्या विविध शाखा, राबविले जाणारे विविध अभ्यासक्रम,पुरविल्या जाणाऱ्या सुविधा विषयी सांगून संस्थेचा परिचय करून दिला. सदर कार्यक्रमासाठी पद्मश्री डॉ. गिरीष प्रभुणे, छत्रपती विजयसिंहराजे भोसले, सौ.प्रमिला गायकवाड, अजय पाटील, वासंती बोर्डे, ॲड भगवानराव साळुंखे, मा.कमलताई व्यवहारे, के. टी. सोनावणे, संस्थेचे सदस्य, सर्व महाविद्यालयाचे प्राचार्य, शिक्षक, शिक्षकेत्तर कर्मचारी आणि विद्यार्थी बहुसंख्येने उपस्थित होते. या कार्यक्रमाचे सूत्रसंचालन डॉ.दीपक गायकवाड यांनी केले तर आभार संयुक्त चिटणीस  अजय पाटील यांनी मानले.

जागतिक अमली पदार्थ सेवन व अवैध वाहतूक विरोधी दिनानिमित्त, आनंदवन व्यसनमुक्ती केंद्र, अमली पदार्थ विरोधी पथक – पुणे पोलीस, आणि मराठवाडा कॉलेज ऑफ कॉमर्स यांच्या संयुक्त विद्यमाने आयोजन

पुणे: गांजा, अफू, चरस, दारू यांसारख्या व्यसनांचे प्रतिकात्मक रूप असलेल्या राक्षसाची होळी करून, नव्या पिढीसाठी घातक ठरणाऱ्या व्यसनांचा प्रतिकार करण्याचा संदेश देण्यात आला.  यावेळी तरुणांनी व्यसनमुक्त होण्याची शपथ घेतली.

जागतिक अमली पदार्थ सेवन व अवैध वाहतूक विरोधी दिनानिमित्त, आनंदवन व्यसनमुक्ती केंद्र, अमली पदार्थ विरोधी पथक  पुणे पोलीस, आणि मराठवाडा कॉलेज ऑफ कॉमर्स यांच्या संयुक्त विद्यमाने व्यसनमुक्ती जनजागृती कार्यक्रमाचे आयोजन करण्यात आले. यावेळी पोलीस अधीक्षक संदीप भोसले, सुदर्शन गायकवाड, आनंदवन व्यसनमुक्ती केंद्राचे अध्यक्ष डॉ. अजय दुधाणे, प्रा.डॉ. पुनम शिंदे, आपलं फाउंडेशनचे मनीष भोसले, प्राचार्य गणेश पठारे, डॉ. अश्विन पारखे, प्रा. दशरथ गावित, प्रा. शिल्पा काब्रा, प्रा. अमित गोसावी, आपलं फाउंडेशन संस्थेचे गुरुप्रसाद रंधे, एन एस एस च्या प्रा. वैशाली निंबाळकर, आनंदवन चे विशाल शिंदे, सागर कांबळे,दत्ता सोनार आदि उपस्थित होते.

या उपक्रमाद्वारे युवकांमध्ये व्यसनांविषयी सजगता निर्माण करण्याचा आणि त्यांना व्यसनमुक्त आयुष्याचा संदेश देण्यात आला. विद्यार्थ्यांसाठी प्रबोधनात्मक सत्राचे आयोजनही यावेळी करण्यात आले होते. 

डॉ. अजय दुधाणे म्हणाले, आजचे तरुण व्यसनांच्या विळख्यात अडकत चालले आहेत. गांजा, चरस, निकोटीन, अल्कोहोल आणि स्क्रीन अ‍ॅडिक्शनसारखी नवी व्यसने तरुणाईचे आयुष्य उद्ध्वस्त करत आहेत. अशा काळात केवळ कायद्याने नव्हे, तर सामाजिक आणि मानसिक पातळीवरही लढा उभारणे गरजेचे आहे.  ऋषिकेश इंगळे यांनी सूत्रसंचलन केले. सूरज कांबळे यांनी आभार मानले.

शारदा, रत्नमाला पुरस्कारांसह विविध पुरस्कारांचे होणार वितरण

पुणे : ज्योतिष वास्तू विश्व संशोधन केंद्र, पुणे यांच्या वतीने चतुर्थ पदवी प्रमाणपत्र वितरण व पुरस्कार सोहळ्याचे भव्य आयोजन रविवार, दिनांक २९ जून २०२५ रोजी करण्यात आले आहे. हा सोहळा पद्मावती येथील विणकर सभागृहात सकाळी ९ ते दुपारी ४ या वेळेत पार पडणार असल्याची माहिती संस्थेचे अध्यक्ष वेदमूर्ती उमेश रमेश कुलकर्णी गुरुजी यांनी पत्रकार परिषदेत दिली.

पत्रकार परिषदेस संस्थेचे मार्गदर्शक व ज्येष्ठ उद्योगपती मनोज राठी, संपर्कप्रमुख श्रुती योगेश पिसे हे मान्यवर देखील उपस्थित होते.

कार्यक्रमाची सुरुवात सकाळी १० वाजता पदवी प्रमाणपत्र वितरण सोहळ्याने होणार आहे. या वेळी वास्तु विशारद, लोलक विशारद, अंक विशारद आणि वास्तु भूषण अभ्यासक्रम पूर्ण करणा-या विद्यार्थ्यांना प्रमाणपत्र वितरित केले जाणार आहे. या सोहळ्यास ज्योतिष व अध्यात्म क्षेत्रातील प्रतिष्ठित मान्यवरांची उपस्थिती लाभणार आहे. या वर्षीच्या पदवी वितरण सोहळ्यात १२० हून अधिक विद्यार्थ्यांना प्रमाणपत्र व गौरवचिन्ह प्रदान करण्यात येणार आहे.

कार्यक्रमात सकाळी १० वाजता पुरस्कार वितरण सोहळा संपन्न होईल. यामध्ये विद्यावाचस्पती ज्येष्ठ  गाणपत्य डॉ. स्वानंद पुंड महाराज यांना शारदा पुरस्कार, अभिनव ज्योतिष मंडळ सोलापूर या संस्थेचे अध्यक्ष ज्येष्ठ पंचांग कर्ते मोहन दाते यांना रत्नमाला पुरस्कार,  योगीराज वेद विज्ञान आश्रम या पाठशाळेचे अध्यक्ष अश्वमेघयाजी चैतन्य नारायण काळे गुरुजी यांना वेद संवर्धन प्रेरणा पुरस्कार, वेदमूर्ती दत्तात्रय मनोहर साधले गुरुजी यांना वेदमार्ग दीपस्तंभ पुरस्कार प्रदान करण्यात येणार आहे. या पुरस्कार सोहळ्याचे उद्घाटन ज्येष्ठ ज्योतिषतज्ञ शुभांगिनी पांगारकर यांच्या हस्ते होणार आहे. यानंतर पुरोहितांचे मंगल मंत्र पठण, सान्वी फुंडकर यांचे सुसंस्कृत नृत्य आणि सन्मान समारंभ पार पडणार आहे.

दुपारी विशेष सत्रात विद्यार्थ्यांचे मनोगत तसेच प्रॅक्टिकल वास्तू व्हिजीट आयोजित करण्यात आली आहे. ज्योतिष वास्तू विश्व संशोधन केंद्र हे गेल्या अनेक वर्षांपासून वास्तूशास्त्र, अंकशास्त्र व ज्योतिषशास्त्राच्या क्षेत्रात गुणवत्तापूर्ण प्रशिक्षण देत आहे. आजवर या संस्थेतून ३,००० पेक्षा अधिक विद्यार्थी यशस्वीरीत्या प्रशिक्षित होऊन समाजसेवेच्या माध्यमातून स्वत:चे यशस्वी करियर घडवत आहेत.

पुणे- सोलापुरातून येऊन अंमली पदार्थाची तस्करी करणा-या गुन्हेगार टोळीच्या पोलीसांनी मुसकया बांधून त्यांना गजाआड केले आहे.

या संदर्भात पोलिसांनी सांगितले कि,’दिनांक १९/०६/२०२५ रोजी स्वारगेट बस स्टॅन्ड येथे एक सडपातळ इसम, दाढी राखलेली, मानेवर इंग्रजीमध्ये टॅट्यु काढलेला, डोक्यावर काळी टोपी, काळी पॅन्ट घातलेला असुन तो स्वारगेट एस.टी. स्टॅन्ड येथुन वेळापुर येथे जाण्यासाठी बस पकडण्यासाठी स्वारगेट एस.टी स्टॅण्ड येथे उभा आहे. त्याच्या हातात चॉकलेटी कलरची बॅग असून त्या बॅगमध्ये गांजा सारखा अंमली पदार्थ आहे अशी खबर पोलीस अंमलदार राहुल होळकर, विक्रम सांवत, यांना मिळाली होती. त्यामुळे सदर इसमास ताब्यात घेण्यासाठी सापळा लावून स्वारगेट बसस्टॅन्ड येथे स्टाफ रवाना करण्यात आला. सदर इसमास पंढरपुर बस स्टॉप येथे शोधुन बॅगबाबत विचारणा करताच तो बॅग सोडुन पळुन लागला त्यास पोलीस अंमलदार राहुल होळकर, नवनाथ शिंदे व स्वारगेट बस स्थानक ड्युटीवरचे पोलीस अंमलदार विक्रम सावंत यांनी पाठलाग करुन शिताफीने पकडले आहे. सदर इसमाचे नाव नितीन नरसिंह पाल वय-२३ वर्ष रा. ग्रीन सिटीच्या पाठीमागे वेळापुर जिल्हा-सोलापुर असे आहे.
त्याच्या ताब्यातील चॉकलेटी रंगाची बॅग स्वतः पंचासमक्ष तपासणी करता गांजा सारखा अंमली पदार्थ मिळुन आला. सदर इसमास ताब्यात घेवुन विचारपुस केली असता त्याने आणखी ०२ साथीदार नामे अल्ताफ ईलाई तांबोळी वय-२८ वर्ष रा. ग्रीनसिटीच्या पाठीमागे वेळापुर ता. माळशिरस जि. सोलापुर व विठ्ठल ऊर्फ दादा हरी शिवपाल वय-३१ वर्ष रा. आंबेडकरनगर वेळापुर ता. माळशिरस जि. सोलापुर यांच्या मार्फतीने सदर माल विक्रीसाठी पुण्यात घेवुन आल्याचे तपासात सागितले. सदर मालाचा उर्वरीत साठा इन्होव्हा क्रिस्टा गाडी नंबर-एम.एच.४५ए.डी.३३३३ या गाडीत साठा करुन ठेवला असलेबाबत माहिती दिल्याने सदरबाबत वरिष्ठाच्या मार्गदर्शनाखाली सहायक पोलीस आयुक्त, स्वारगेट विभाग राहुल आवारे यांनी एक विशेष पथक तयार करुन बंडगार्डन पोलीस ठाण्याचे पोलीस निरीक्षक संपतराव राऊत, पोलीस अंमलदार राहुल होळकर, विक्रम सांवत, फिरोज शेख, सुजय पवार यांना वेळापुर, पंढरपुर या भागात रवाना करुन संशयीत आरोपींच्या मोबाईलचे तांत्रीक विश्लेषणाच्या आधारे शोध घेवून पकडले.

सदरची कामगिरी अपर पोलीस आयुक्त, पश्चिम प्रादेशीक विभाग, पुणे, राजेश बनसोडे पोलीस उप आयुक्त परिमंडळ २, श्रीमती स्मार्तना पाटील यांचे मार्गदर्शनाखाली सहायक पोलीस आयुक्त स्वारगेट विभाग राहुल आवारे यांनी कारवाई कामी नेमलेल्या विशेष पथकातील पोलीस निरीक्षक, गुन्हे बंडगार्डन पो.स्टे संपतराव राऊत, पोलीस उपनिरीक्षक सुर्यकात सपताळे, पोलीस अंमलदार राहुल होळकर, विक्रम सांवत, फिरोज शेख, सुजय पवार, नवनाथ शिंदे तसेच महिला पोलीस हवालदार प्रिती मोरे, सुजाता दांगट, सहा. पो. फौ. राजेश गोसावी, विजय लोयरे यांच्या पथकाने केली.