स्थायी समितीचे अध्यक्ष श्रीनाथ भिमाले यांची माहिती

पुणे : एकाच छताखाली सर्वसमावेशक कर्करोग (कॅन्सर) उपचार देण्याच्या उद्देशाने पुणे महापालिकेने बाणेर येथे उभारलेल्या देशातील पहिल्या सार्वजनिक खाजगी तत्त्वावरील (पीपीपी) रुग्णालयाचे लोकार्पण मुख्यमंत्री देवेंद्र फडणवीस यांच्या हस्ते रविवारी (दि.१७) दुपारी साडेबारा वाजता होणार आहे. पुणे महापालिका आणि आपुलकी हेल्थकेअर यांचा हा संयुक्त प्रकल्प आहे. ही माहिती स्थायी समितीचे अध्यक्ष श्रीनाथ भिमाले यांनी दिली.

केंद्रीय राज्यमंत्री मुरलीधर मोहोळ, उपमुख्यमंत्री सुनेत्रा पवार, उच्च व तंत्रशिक्षण मंत्री चंद्रकांतदादा पाटील, नगरविकास राज्यमंत्री माधुरी मिसाळ, महापौर मंजुषा नागपुरे,विरोधी पक्षनेते निलेश निकम, सभागृहनेते गणेश बिडकर, आयुक्त नवलकिशोर राम, उपमहापौर परशुराम वाडेकर यांच्यासह सर्व खासदार, आमदार, लोकप्रतिनिधी यांच्या प्रमुख उपस्थितीत हा सोहळा पार पडणार आहे.

श्रीनाथ भिमाले पुणे महानगरपालिकेत सभागृह नेते असताना सॅलिसबरी पार्क परिसरात हे रुग्णालय उभारावे यासाठी स्थायी समिती आणि सर्वसाधारण सभेत मंजुरी देण्यात आली. भिमाले यांनी आपल्या ‘स’ यादीतून १४.८५ कोटी रुपये इतका निधी या रुग्णालयासाठी उपलब्ध करून दिला होता. परंतु जागेची उपलब्धता आणि व्यवहार्यता लक्षात घेता हा प्रकल्प सॅलिसबरी पार्क येथून बाणेर येथे उपलब्ध जागेवर स्थलांतरित करण्यात आला. भिमाले यांच्या सातत्यपूर्ण पाठपुराव्यामुळे सहा वर्षांमध्ये तो पूर्ण झाला. या रुग्णालयातून गरीब आणि गरजू रुग्णांना केंद्र सरकारच्या आरोग्य योजनेतून (सीजीएचएस) सवलतीच्या दरात परवडणारे उपचार दिले जाणार आहेत.

कॅन्सरचे रुग्णालय उभारणारी पहिली महापालिका आहे. पुण्यातील रुग्णांना आता मुंबईमध्ये उपचारासाठी जाण्याची गरज भासणार नाही. त्यामुळे एखाद्या रुग्णाने वेळीच तपासणी केल्यास आजाराचे निदान लवकर होण्यास
मदत होणार आहे. शहरातील कॅन्सर रुग्णांच्या वाढत्या संख्येचा रुग्णसंख्येचा विचार करून पुणे महापालिकेने बाणेर येथे स्वतंत्र कॅन्सर हॉस्पिटल उभारण्याचा महत्त्वपूर्ण निर्णय घेण्यात आला होता. सर्वसामान्य नागरिकांना परवडणाऱ्या दरात अत्याधुनिक कॅन्सर उपचार उपलब्ध करून देणे हा या प्रकल्पाचा मुख्य उद्देश आहे.

महापालिकेचे हे पहिले स्वतंत्र कॅन्सर हॉस्पिटल असणार असून, शहरातील आरोग्य सुविधांमध्ये मोठी भर पडणार आहे. सध्या कॅन्सर उपचारांसाठी रुग्णांना खासगी रुग्णालयांवर मोठ्या प्रमाणात अवलंबून राहावे लागते. त्यात खर्चिक उपचारामुळे अनेक कुटुंबांवर आर्थिक ताण येतो. या पार्श्वभूमीवर महापालिकेचा हा उपक्रम महत्वाचा ठरणार असल्याचा विश्वास भिमाले यांनी व्यक्त केला.

या रुग्णालयात कॅन्सर तपासणी, केमोथेरपी, रेडिएशन थेरपी, शस्त्रक्रिया तसेच आधुनिक निदान सुविधा उपलब्ध करून दिल्या जाणार आहेत. पीईटी-सीटीसारख्या अत्याधुनिक यंत्रणेसह डे-केअर ऑन्कोलॉजी विभागही उभारण्यात आला आहे. गरीब आणि आर्थिकदृष्ट्या दुर्बल घटकांसाठी अनुदानित दरात उपचार देण्यावर विशेष भर दिला जाणार आहे.

बाणेर परिसर आरोग्य सुविधांच्या दृष्टीने झपाट्याने विकसित होत असून, तेथे आधीच काही प्रगत रुग्णालये कार्यरत आहेत. त्यामुळे या भागात कॅन्सर उपचारांचे केंद्र विकसित होत आहे. महापालिकेच्या या प्रकल्पामुळे शहरातील तसेच परिसरातील रुग्णांना स्थानिक पातळीवरच उपचार मिळण्यास मदत होणार आहे.

दरम्यान, कॅन्सर व डायलिसिस रुग्णांसाठी महापालिकेकडून दिल्या जाणाऱ्या आर्थिक मदतीची मर्यादा वाढवण्याचाही प्रस्ताव आहे. त्यामुळे उपचारांचा खर्च काही प्रमाणात कमी होण्यास मदत होईल. या योजनेंतर्गत पात्र रुग्णांना मोठ्या प्रमाणावर आर्थिक सहाय्य मिळू शकते.

पुणे महानगरपालिका व आपुलकी हेल्थ केअर यांच्या संयुक्त विद्यमाने सार्वजनिक-खासगी भागीदारी (पीपीपी ) अंतर्गत बाणेर, पुणे येथे अत्याधुनिक “आपुलकी मेडिकल सेंटर” सुरू करण्यात येत आहे. या प्रकल्पासाठी पुणे महानगरपालिकेकडून सुमारे एक एकर जागा उपलब्ध करून देण्यात आली असून, प्रकल्पाच्या आर्थिक व्यवहार्यतेसाठी मनपाकडून सुमारे रुपये १४.८५ कोटी इतका निधी (Viability Gap Funding) देण्यात आला आहे.

सदर प्रकल्पामध्ये आपुलकी हेल्थ केअरकडून रुग्णालयाचे बांधकाम, अत्याधुनिक वैद्यकीय यंत्रसामग्री, तज्ज्ञ डॉक्टर, प्रशिक्षित कर्मचारी तसेच सर्व वैद्यकीय सेवा उपलब्ध करून देण्याची जबाबदारी स्वीकारण्यात आली आहे. हे केंद्र १५० बेडचे अत्याधुनिक कर्करोग व हृदयरोग उपचार केंद्र असून निदान, उपचार आणि पुनर्वसन या सर्व सुविधा एकाच ठिकाणी उपलब्ध करून देण्यात येणार आहेत. या सेवा सी.जी.एच.एस. (Central Government Health Scheme) दरांनुसार उपलब्ध होणार असल्याने आर्थिकदृष्ट्या दुर्बल व गरजू रुग्णांना मोठा लाभ होणार आहे.

या मेडिकल सेंटरमध्ये अत्याधुनिक तंत्रज्ञानाचा वापर करण्यात येणार असून त्यामध्ये लिनियर अॅक्सिलरेटर – ट्रूबीम व हायपरआर्क, डिजिटल PET स्कॅनर, जीनोम सिक्वेन्सिंग सुविधा, ३ टेस्ला MRI, १६०-स्लाइस CT स्कॅनर, मॉड्युलर ऑपरेशन थिएटर, समर्पित ICU/CCU तसेच केमोथेरपी व न्यूक्लियर मेडिसिन विभागाचा समावेश आहे. विशेष म्हणजे PPP प्रकल्पांतर्गत अशा प्रकारची अत्याधुनिक सुविधा उपलब्ध करून देणारे हे भारतातील पहिलेच केंद्र ठरणार आहे.

रुग्णांच्या सोयीसाठी खाजगी, अर्ध-खाजगी व सामान्य वॉर्डची व्यवस्था करण्यात आली असून सर्व शासकीय आरोग्य योजना तसेच खासगी विमा कंपन्यांच्या सेवा येथे उपलब्ध राहणार आहेत. पुरुषांमध्ये मुख, अन्ननलिका, जठर, फुफ्फुस व प्रोस्टेट कर्करोग तसेच महिलांमध्ये स्तन व गर्भाशय मुखाच्या कर्करोगावर अत्याधुनिक रेडिओथेरपी व इतर उपचार सुविधा उपलब्ध करून देण्यात येणार आहेत.

काम वेळेत पूर्ण करण्याची सूचना ; दोनदिवसीय पाहणी दौऱ्याची सांगता

पुणे, दिनांक – 15 मे 2026

दर वर्षी विठ्ठलाच्या ओढीने पंढरपूरकडे प्रस्थान करणाऱ्या लाखो वारकऱ्यांची वारी सुखकर आणि विना अडथळ्यांची व्हावी, या उद्देशाने  श्रद्धा व आधुनिकतेचा प्रभावी संगम साकारत पुनर्विकास करण्यात येत असलेल्या संत तुकाराम महाराज पालखी मार्गाच्या (राष्ट्रीय महामार्ग-965 जी) कामाचे आज केंद्रीय रस्ते वाहतूक आणि परिवहन मंत्री नितीन गडकरी यांनी पाहणी केली. यावेळी राज्याचे कृषीमंत्री दत्तात्रय भरणे, आमदार राहुल कुल, माजी आमदार हर्षवर्धन पाटील आदी मान्यवर उपस्थित होते.

देहू व पंढरपूर या दोन महत्त्वाच्या धार्मिक स्थळांना जोडणारा संत तुकाराम महाराज पालखी मार्ग (राष्ट्रीय महामार्ग-965 जी) हा पाटस ते पंढरपूर असा 130 किमी लांबीचा महामार्ग पुणे आणि सोलापूर जिल्ह्यांना जोडतो. पाटस ते बारामती, बारामती ते इंदापूर आणि इंदापूर ते तोंडले अशा 3 पॅकेजमध्ये या मार्गाचे बांधकाम करण्यात येत आहे. यापैकी पाटस ते बारामती हा भाग पूर्ण झाला असून इंदापूर ते तोंडले भागाचे काम 96% आणि बारामती ते इंदापूर भागाचे काम 84% पूर्ण झाले आहे. उर्वरित काम प्रगतीपथावर असून लवकरच ते पूर्ण केले जाईल. सदर काम वेळेत पूर्ण करावे, अशी सूचना यावेळी केंद्रीय मंत्री गडकरी यांनी राष्ट्रीय महामार्ग प्राधिकरणच्या अधिकाऱ्यांना केली. तसेच यंदाच्या वारीत वारकऱ्यांना कोणतीही अडचण येणार नाही, अशा पद्धतीने हे काम करण्यात यावे, असेही ते म्हणाले. 

हा महामार्ग बारामती, भिगवण, अकलूज आणि श्रीपूर यांसारख्या भागांना बायपास करून जलद आणि सुरक्षित प्रवासाची सुविधा उपलब्ध करून देतो. संत ज्ञानेश्वर महाराज पालखी मार्गाप्रमाणेच या मार्गावरही स्वतंत्र पदयात्रा मार्ग, आधुनिक पूल, अंडरपास आणि बायपास मार्गांच्या सहाय्याने यात्रा अधिक सुरक्षित आणि वेळेवर होण्यास मदत होणार आहे. या दोन्ही पालखी मार्गांचा विकास केवळ रस्ते बांधकामापुरता मर्यादित नसून, तो एक समग्र विकास मॉडेल म्हणून साकार झाला आहे. पालखी मार्गावर रस्ते बांधकामादरम्यान येणारी झाडे ट्रान्सप्लांट करून त्यांना नवजीवन देण्यात आले आहे, तसेच रस्त्यांच्या दुतर्फा देशी व सावली देणाऱ्या वृक्षांची लागवड करण्यात आली आहे. सदर पालखी मार्गावर पॅकेज क्र. 2 व 3 वर सुमारे 400 वृक्षांचे पुनर्स्थापन (ट्रान्सप्लांटेशन) यशस्वीरीत्या करून त्यांचे संगोपन केले गेले आहे. सुरक्षिततेच्या दृष्टीकोनातून बारामती, निमगाव केतकी, भवानीनगर, बावडा, अकलूज व श्रीपूर/बोरगाव याठिकाणी बायपास रस्ते प्रस्तावित केले आहेत, ज्यामुळे वाहतूक कोंडीचा प्रश्न मिटेल आणि वाहतूक जलद गतीने होईल. 

महामार्गाच्या परिसरातील जलसंधारण क्षमतेत वाढ करण्याच्या उद्देशाने राष्ट्रीय महामार्गालगत असलेल्या जवळपास 25 तलावांचे खोलीकरण करून अतिरिक्त जलसाठी निर्माण करण्यात आला आहे, ज्यामुळे आजूबाजूच्या 25 गावांना याचा फायदा झाला आहे. 

पालखी मार्गासंदर्भात ही माहिती देत असताना दिवंगत नेते अजित पवार यांची आठवण येत असल्याचे केंद्रीय मंत्री गडगरी यांनी सांगितले. अजित पवार यांनी बारामतीच्या बायपासवर कान्हेरी गावाजवळ तलावाचे खोलीकरण करून घेतले होते. यामध्ये महामार्गाच्या कामासाठी जवळपास 2 लाख क्युबिक मटेरियल काढून वापरण्यात आले. पुढे याचे खोलीकरण झाल्यावर तलावाच्या इरिगेशन मधून कॉंक्रीटचा सांडवा तयार करून घेतला, अशी आठवणही त्यांनी सांगितली. पर्यावरणाचा समतोल राखण्याच्या हेतूने हिंगणगडा व कान्हेरी येथे वन्य प्राण्यांसाठी भुयारी मार्ग निर्माण करून वन्य प्राण्यांचे अधिवास जतन केले आहेत. त्यामुळे प्राणी व वाहनांच्या अपघाताला आळा बसला आहे.
गडकरी यांच्या आजच्या भेटीसोबतच त्यांच्या दोनदिवसीय पालखी मार्ग पाहणी दौऱ्याची सांगता झाली.

हडपसरच्या ‘त्या’ रुग्णालयाने बिल जादा लावल्याच्या रागातून केले कृत्य –हडपसर बॉम्ब सदृश घटना दहशतवादी कृत्य नाही:वैयक्तिक वादातून घडला प्रकार, आरोपी शिवाजी राठोड पोलिसांच्या ताब्यात

पुणे- रुग्णालये , वैद्यकीय सेवा हि सेवा राहिली नसून तो धंदा झाला आहे अशी भावना ज्या वेगाने समाजात पसरते आहे याच भावनेतून मांजरी त राहणाऱ्या एका दुकानदाराने कोणतेही स्फोटक नसलेले , डिजिटल घड्याळ वापरून यु ट्युबचा आधार घेत बॉम्ब वाटेल अशी नकली वस्तू बनवून हडपसरच्या रुग्णालयात ठेवली होती असे निष्पन्न झाल्याचे पोलिसांनी म्हटले आहे.हडपसर येथील रुग्णालयात ठेवण्यात आलेली बॉम्ब सदृश वस्तू दहशतवादी कृत्य नसून वैयक्तिक वादातून घडलेला प्रकार आहे, असे पुणे पोलिस आयुक्त अमितेश कुमार यांनी स्पष्ट केले. ही वस्तूची त्याच दिवशी व्कयवस्रथित पाहणी करत ती जणू निकामी करण्यात आली होती.याप्रकरणी पकडलेला आरोपी मूळचा सोलापूरचा रहिवासी असून, हडपसर परिसरातील मांजरी येथे त्याचे शूज आणि कपड्यांचे दुकान आहे. या प्रकरणात पोलिसांनी आतापर्यंत १५ ते १७ जणांची चौकशी केली आहे.

या प्रकरणात पकडलेल्या आरोपी शिवाजी राठोड याच्या घर आणि दुकानाची झडती घेण्यात आली. त्याच्या घरातून घड्याळाचा रिकामा बॉक्स मिळाल्याने आरोपीची ओळख पटली. तांत्रिक तपासानंतर त्याचे लोकेशन नागपूर दिशेने असल्याचे निष्पन्न झाले. हडपसर आणि अकोला येथे पोलिसांनी ऑपरेशन राबवून त्याला नागपूर रेल्वे जंक्शन येथे एटीएसच्या मदतीने ताब्यात घेतले. प्राथमिक तपासात समोर आलेल्या माहितीनुसार, आरोपीनं 10 तारखेला संबंधित रुग्णालयात उपचारासाठी नोंदणी केली होती. उपचारासाठी पैशांची गरज असल्यानं खंडणी उकळण्याच्या उद्देशानं त्याने सुमारे 400 रुपयांचं साहित्य खरेदी करून बॉम्बसदृश वस्तू तयार केली आणि ती रुग्णालयात ठेवली होती.

अमितेश कुमार यांनी दिलेल्या माहितीनुसार, बॉम्ब सदृश वस्तूत कोणतेही स्फोटक नव्हते. आरोपीने ऑनलाइन डिजिटल घड्याळ मागवून ते बॉम्ब असल्याचे भासवले होते. यासाठी त्याने विविध ठिकाणांहून वस्तू गोळा केल्या होत्या, ज्याची सीसीटीव्ही फुटेजद्वारे खातरजमा करण्यात आली आहे. आरोपीने यू ट्यूबवरून बॉम्ब सदृश वस्तू बनवण्याचे प्रशिक्षण घेतले होते.

घटनास्थळावरून फॉरेन्सिक लॅबने काही नमुने घेतले असून, त्याचा अहवाल आल्यानंतर इतर कोणते घटक तिथे होते का, याचा तपास केला जाईल.

दहा मे रोजी आरोपी संबंधित रुग्णालयात गेला होता आणि त्याच्या उपचाराच्या बिलावरून त्याचा वाद झाला होता. त्याने बिलाची रक्कम कमी करण्याची मागणी केली . पुणे पोलीस रुग्णालयांची आणि इतर सार्वजनिक ठिकाणांची सुरक्षा सुनिश्चित करतील, असे आयुक्तांनी सांगितले. पोलिसांच्या तपास यंत्रणा सक्षम असून, कोणत्याही परिस्थितीला तोंड देण्यास समर्थ आहेत.

पुणे.दि.१५: जिल्हा नियोजन समितीच्या ऑनलाइन बैठकीत शिवसेना नेत्या आ.डॉ. नीलम गोऱ्हे यांनी अवकाळी पावसामुळे झालेल्या पिकांच्या नुकसानीचा आढावा घेऊन शेतकऱ्यांना तातडीने मदत देण्याची मागणी केली.
पुण्यातील वाढती वाहतूक कोंडी, नवले पुल तसेच पुणें शहर परिसरातील ब्लॅक स्पॉट्सबाबतही त्यांनी चिंता व्यक्त केली. पर्यटनस्थळी मधमाश्यांच्या हल्ल्यांच्या घटना व अपुऱ्या सुरक्षेच्या पार्श्वभूमीवर “पर्यटन रक्षक” नेमण्याची मागणी त्यांनी केली. तसेच आदिवासी महिला व अत्याचारग्रस्त मुलींसाठी न्यूक्लियस बजेटमधून तात्पुरत्या आर्थिक मदतीची यंत्रणा उभारण्याची सूचना केली.

यावर स्पष्टीकरण देताना, महापालिका आयुक्त नवल किशोर राम यांनी वाहतूक नियंत्रणासाठी स्वतंत्र वॉर्डन पुनश्च नेमण्याची प्रक्रिया सुरू असल्याचे सांगितले. उपमुख्यमंत्री सुनेत्रा पवार यांनी, वाहतूक कोंडी टाळण्यासाठी संबंधित यंत्रणांना समन्वयाने काम करण्याच्या सूचना दिल्या. जिल्हाधिकारी जितेंद्र डुडी यांनी पर्यटनस्थळी सुरक्षा रक्षक नेमणूक व न्यूक्लियस बजेटच्या अंमलबजावणीसाठी कार्यवाही करण्यात येणार असल्याचे स्पष्ट केले.

पुणे-कात्रज कोंढवा येथील भुसंपादन चालू असलेल्या ठिकाणी, महापौर मंजुषा नागपुरे यांनी भेट देऊन येथील रस्त्याच्या कामाची माहिती घेतली.
कात्रज कोंढवा येथील भुसंपादन चालू असलेल्या ठिकाणी, महापौर मंजुषा नागपुरे, व महापालिका आयुक्त नवल किशोर राम यांनी प्रत्यक्ष ठिकाणी जागा पाहणी करून आढावा घेतला. मौजे कात्रज व मौजे कोंढवा येथील कात्रज चौक ते पिसोळीपर्यंत ८४ मीटर विकास योजना रस्त्यापैकी ५० मीटर विकास योजना रस्त्याच्या भूसंपादनाची कार्यवाही शासनामार्फत सुरू होती. दिनांक २७.०४.२०२६ रोजी सुमारे ४१,००० चौ. मी. क्षेत्राचा निवाडा विशेष भूसंपादन अधिकारी क्रमांक १५ पुणे यांचे मार्फत जाहीर झालेला आहे.पुणे महानगरपालिकेने प्रस्तुत भूसंपादनाकरिता सुमारे १९७ कोटी रुपये शासनाकडे जमा केलेली आहे. तदनंतर निवाड्याची व ताबेबाबत पंधरा दिवसांची नोटीस देऊन, दिनांक १४.०५.२०२६ पासून प्रत्यक्ष ताबे घेण्यास सुरुवात केलेली आहे. दिनांक १४.०५.२०२६ व दिनांक १५.०५.२०२६ या दोन दिवसांमध्ये एकूण १०९ मिळकतींपैकी ४८ मिळकती ताब्यात घेण्यात आलेले असून जवळपास २५००० चौ. मी. क्षेत्र पुणे मनपाच्या ताब्यात आलेले आहे. NHAI मार्फत चालू असलेले कात्रज उड्डाणपूल उतरण्यासाठी आवश्यक असलेली जागा आज ताब्यात घेण्यात आलेली असून सदर ठिकाणी पथ विभागामार्फत काम सुरु करण्यात आलेले आहे. यामुळे या उड्डाणपूलाचे काम पूर्ण होण्याचा मार्ग मोकळा झालेला आहे. याप्रसंगीआमदार योगेश टिळेकर, सभागृह नेते गणेश बिडकर, प्रभाग समिती अध्यक्ष रंजना टिळेकर, नगरसेविका अर्चना जगताप, पुजा कदम, अति.महापालिका आयुक्त (विशेष) ओमप्रकाश दिवटे, पथ विभागाचे अधिक्षक अभियंता अजित बांबळे, भुसंपादन अधिकारी श्वेता दारुणकर व इतर संबंधित अधिकारी व कर्मचारी उपस्थित होते.

पुणे, दि. १५ : प्रधानमंत्री इंटर्नशिप योजना (PMIS) अंतर्गत MY Bharat, पुणे यांच्या वतीने २० मे २०२६ रोजी गेट क्रमांक २, महिंद्रा व्हेईकल मॅन्युफॅक्चरर्स लिमिटेड, चाकण येथे इंटर्नशिप शिबिराचे आयोजन करण्यात आले आहे. भारत सरकारच्या कॉर्पोरेट व्यवहार मंत्रालयाच्या पुढाकारातून राबविण्यात येणाऱ्या या योजनेद्वारे युवकांना उद्योग क्षेत्रातील प्रत्यक्ष कामाचा अनुभव आणि रोजगारक्षम कौशल्ये उपलब्ध करून देण्याचा उद्देश आहे.

या शिबिरामध्ये महिंद्रा अँड महिंद्रा लिमिटेडमध्ये बारावी उत्तीर्ण उमेदवारांसाठी ५०० जागा तसेच आयटीआय पात्र उमेदवारांसाठी १० जागा उपलब्ध करण्यात आल्या आहेत. निवड झालेल्या १८ ते २५ वयोगटातील आणि पूर्णवेळ नोकरीत नसलेल्या युवकांना प्रतिमहिना १८ हजार रुपये मानधन तसेच ६ हजार रुपये जॉइनिंग ग्रँट देण्यात येणार आहे. इंटर्नशिपचा कालावधी ६ ते ९ महिन्यांचा राहणार आहे.
पात्र युवकांनी या संधीचा लाभ घ्यावा, असे आवाहन आयोजकांनी केले आहे.

उमेदवारांनी शैक्षणिक प्रमाणपत्रे, बायोडाटा तसेच आधार कार्ड किंवा इतर जन्मतारीख पुरावा सोबत आणणे आवश्यक आहे. सहभागी होण्यासाठी सोबत देण्यात आलेल्या QR कोडद्वारे नोंदणी करावी, असेही कळविण्यात आले आहे.

▪️एल-निनोची पार्श्वभूमी लक्षात घेऊन नियोजन करण्याच्या सूचन

पुणे, दि. १५ : खरीप हंगामाच्या पार्श्वभूमीवर शेतकऱ्यांना खते व बियाण्यांचा पुरेसा आणि वेळेवर पुरवठा उपलब्ध करून देण्यासाठी संबंधित यंत्रणांनी समन्वयाने काम करावे, असे निर्देश उपमुख्यमंत्री तथा पालकमंत्री सुनेत्रा अजित पवार यांनी दिले. बोगस बियाणे व खतांच्या तक्रारींवर गुणवत्ता नियंत्रण विभागामार्फत धडक कारवाई करण्याचे आदेश देतानाच ‘एल-निनो’ची पार्श्वभूमी लक्षात घेऊन नियोजन करण्याच्या सूचनाही त्यांनी दिल्या. विभागीय आयुक्त कार्यालयातील झुंबर हॉल येथे दूरदृश्य प्रणालीद्वारे खरीप हंगाम आढावा बैठक त्यांच्या अध्यक्षतेखाली पार पडली. त्यावेळी त्या बोलत होत्या.

बैठकीला कृषिमंत्री दत्तात्रय भरणे, आमदार नीलमताई गोऱ्हे, दिलीप वळसे पाटील, शरद सोनवणे, राहुल कुल, विजय शिवतारे, शंकर जगताप, सुनील शेळके, बाबासाहेब काळे, ज्ञानेश्वर कटके, शंकर मांडेकर आणि भीमराव तापकीर हे दूरदृश्य प्रणालीद्वारे उपस्थित होते. प्रत्यक्ष बैठकीस जिल्हाधिकारी जितेंद्र डुडी, जिल्हा परिषदेचे मुख्य कार्यकारी अधिकारी गजानन पाटील, जिल्हा अधीक्षक कृषी अधिकारी संजय काचोळे उपस्थित होते.

उपमुख्यमंत्री तथा पालकमंत्री म्हणाल्या, खरीप हंगामात शेतकऱ्यांना कोणतीही अडचण येऊ नये यासाठी कृषी विभागाने निविष्ठा पुरवठा व वितरण प्रक्रियेवर सातत्याने लक्ष ठेवावे. शेतकऱ्यांची फसवणूक करणाऱ्यांविरोधात कठोर भूमिका घेण्यात यावी. नैसर्गिक शेतीचा प्रसार वाढवण्यासाठी कृषी अधिकाऱ्यांनी अधिक प्रभावी जनजागृती व मार्गदर्शन करावे. यंदा ‘एल-निनो’च्या संभाव्य परिणामांचा विचार करून शेतकऱ्यांनी पीक पद्धतीत आवश्यक बदल करावेत, असेही त्यांनी सांगितले.

महिला शेतकऱ्यांसाठी केंद्र शासनाच्या धर्तीवर ‘ड्रोन दीदी’ योजनेप्रमाणे ड्रोन उपलब्ध करून देण्याबाबत सकारात्मक असल्याचे सांगून एकल महिला शेतकऱ्यांना विविध योजनांमध्ये प्राधान्याने सवलती देण्याबाबत शासन स्तरावर सकारात्मक विचार सुरू असल्याचे त्यांनी सांगितले.

गोपीनाथ मुंडे शेतकरी अपघात विमा योजनेतील सुधारणांनुसार कार्यवाही करण्याच्या सूचनाही यावेळी देण्यात आल्या. कडधान्ये, डाळिंब, पेरू, द्राक्ष यांसह विविध पिकांचे नियोजन वेळेत शेतकऱ्यांपर्यंत पोहोचवण्यावर भर देण्याचे निर्देशही त्यांनी दिले.

यावेळी ऍग्री स्टॅक प्रणालीमध्ये जास्तीत जास्त शेतकऱ्यांची नोंदणी करण्याचे आवाहन करण्यात आले. आगामी काळात शेती अधिक निर्यातक्षम व व्यावसायिक बनवण्यासाठी नियोजनबद्ध प्रयत्नांची आवश्यकता असल्याचेही त्यांनी स्पष्ट केले.

जिल्हाधिकारी जितेंद्र डुडी यांनी खरीप हंगामाच्या तयारीचे सादरीकरण केले. यामध्ये युरिया, डीएपी, एमओपी, एमएसपी व एनपीके खतांची पुरेशी उपलब्धता असल्याचे सांगण्यात आले. जिल्ह्यासाठी १ लाख ९४ हजार ५०० मेट्रिक टन खत मंजूर असून, १४ मेअखेर ७६ हजार ७६९ मेट्रिक टन खत उपलब्ध असल्याची माहिती त्यांनी दिली.

खत पुरवठा सुरळीत होण्यासाठी विविध उपाययोजना करण्यात आल्याचे सांगताना त्यांनी नमूद केले की, दि. ७ एप्रिल २०२६ रोजी सर्व खत उत्पादक व वाहतूकदारांची समन्वय बैठक घेण्यात आली. वस्तुनिष्ठ उपलब्धता सुनिश्चित करण्यासाठी दि. १ ते १५ एप्रिल २०२६ या कालावधीत विशेष साठा पडताळणी मोहीम राबविण्यात आली. पॉस प्रणाली व प्रत्यक्ष साठा तपासणीत विसंगती आढळून सुमारे ५ हजार मेट्रिक टन काल्पनिक साठा कमी करण्यात आला.

पॉस प्रणालीवरील साठा अद्ययावत न ठेवणाऱ्या १७ वितरकांवर निलंबनाची कारवाई करण्यात आली असून पॉस प्रणाली हाताळणी, अभिलेख अद्ययावत ठेवणे आदी विषयांवर वितरकांना प्रशिक्षण देण्यात आले. खत विक्रीत लिंकिंगला प्रतिबंध करण्यासाठी प्रत्येक दुकानात जनजागृती फलक लावण्याचे निर्देश देण्यात आले आहेत. तसेच निरीक्षकनिहाय खत नमुने घेण्याचे नियोजन तयार करण्यात आले असून रेक पॉईंटनिहाय निरीक्षकांची नियुक्ती करून पुरवठ्यावर देखरेख वाढविण्यात आली आहे. खत साठा, वितरण व उपलब्धतेवर नियमित नियंत्रण ठेवण्यासाठी समन्वय यंत्रणा सक्रिय करण्यात आल्याची माहितीही त्यांनी दिली.

मागील वर्षातील कामकाजाचा आढावा घेऊन यंदाच्या खरीप हंगामात अधिक प्रभावी अंमलबजावणी करण्याचा विश्वास यावेळी व्यक्त करण्यात आला.

पुणे :
पुणे महानगरपालिकेच्या 2022 मध्ये झालेल्या सरळसेवा भरतीत नोकरीचे आमिष दाखवून सुशिक्षित बेरोजगारांची मोठी आर्थिक फसवणूक करण्यात आल्याचा खळबळजनक प्रकार समोर आला आहे. या प्रकरणी दोषींवर कडक कारवाई करण्यात यावी, या मागणीसाठी आम आदमी पार्टी यांच्या वतीने पुणे महानगरपालिका आयुक्तांना लेखी निवेदन देण्यात आले होते
आम आदमी पार्टीचे युवा आघाडीचे प्रदेशाध्यक्ष रविराज काळे यांनी दिलेल्या निवेदनानुसार, पुणे महानगरपालिकेतील काही विभागांत नोकरी देण्याच्या नावाखाली बोगस भरती आणि आर्थिक गैरव्यवहार झाला असल्याचे कागदपत्रांवरून स्पष्ट होत आहे. राजेंद्र बबनराव खेडेकर, नमिता बनसोडे, शिवानंद बाळासाहेब पाटील यांच्या टोळीने संगनमताने उमेदवारांकडून प्रत्येकी 45 लाख रुपये उकळले असून, त्यांना बनावट नियुक्ती आदेश आणि प्रशिक्षण आदेश दिले आहेत.या सर्व गैरव्यवहारात प्रशासकीय नावाचा गैरवापर या फसवणुकीत पुणे महानगरपालिकेचे तत्कालीन अतिरिक्त आयुक्त रवींद्र बिनवडे यांच्यासह अनेक वरिष्ठ अधिकाऱ्यांची नावे आणि सह्यांचा वापर करून बनावट कागदपत्रे तयार करण्यात आली आहेत.बेरोजगार तरूण नोकरीच्या प्रतीक्षेत असलेल्या अनेक तरुणांची मोठी आर्थिक फसवणूक झाली असून, प्रशासनावरील लोकांचा विश्वास डळमळीत होत आहे.
निष्पक्ष चौकशीची मागणी या संपूर्ण प्रकरणाची स्वतंत्र आणि सखोल चौकशी करून संबंधित दोषींवर फौजदारी गुन्हे दाखल करावेत, अशी मागणी ‘आप’ने केली आहे.या प्रकरणामध्ये अधिकाऱ्यांचा सहभाग तपासावा ? या घोटाळ्यात महापालिकेतील कोणताही अधिकारी किंवा कर्मचारी सहभागी असल्यास त्यांच्यावरही कठोर कारवाई करण्याची आग्रही मागणी आम्ही करत आहोत.
या प्रकरणी लवकरच राज्याचे मुख्यमंत्री देवेंद्र फडणवीस यांची भेट घेऊन हे गंभीर प्रकरण त्यांच्या निदर्शनास आणून देऊन या प्रकरणात आपण लक्ष घालून SIT मार्फत चौकशी करण्याची विनंती करणार आहे.

“हा केवळ आर्थिक गुन्हा नसून प्रशासकीय व्यवस्थेचा गैरवापर करून तरुणांच्या भविष्याशी खेळण्याचा प्रकार आहे. या प्रकरणातील मुख्य सूत्रधारांना तात्काळ अटक होणे गरजेचे आहे.”
— रविराज बबन काळे (प्रदेशाध्यक्ष ,युवा आघाडी आम आदमी पार्टी, महाराष्ट्र राज्य)