लोणीकंद येथे रंगणार ग्रीको रोमन महाराष्ट्र केसरी स्पर्धा : दिनांक २२ आणि २३ फेब्रुवारी रोजी स्पर्धा

महाराष्ट्र राज्य कुस्तीगीर संघाच्या वतीने जिल्हा कुस्तीगीर तालीम संघ पुणे यांच्या सहकार्याने व पै. ओंकार कंद युवा फाऊंडेशन, श्री प्रदीपदादा कंद युवा मंच यांच्या वतीने आयोजन

पुणे : महाराष्ट्र राज्य कुस्तीगीर संघाच्या वतीने पहिल्या वरिष्ठ ग्रीको रोमन राज्यस्तरीय अजिंक्यपद महाराष्ट्र केसरी कुस्ती स्पर्धेचे आयोजन करण्यात आले आहे. दिनांक २२ आणि २३ फेब्रुवारी रोजी लोणीकंद मधील हिंद केसरी मैदान येथे ही स्पर्धा होणार आहे. जिल्हा कुस्तीगीर तालीम संघ पुणे यांच्या सहकार्याने व पै. ओंकार कंद युवा फाऊंडेशन, श्री प्रदीपदादा कंद युवा मंच यांच्या वतीने स्पर्धेचे आयोजन करण्यात आले आहे. या स्पर्धेत ३७५ पेक्षा अधिक कुस्तीपटू ग्रीको रोमन महाराष्ट्र केसरी किताबासाठी लढणार आहेत, अशी माहिती महाराष्ट्र राज्य कुस्तीगीर संघाचे कार्याध्यक्ष संदीप भोंडवे आणि सरचिटणीस योगेश दोडके यांनी पत्रकार परिषदेत दिली.

यावेळी महाराष्ट्र राज्य कुस्तीगीर संघाचे उपाध्यक्ष विलास कथुरे, स्पर्धेचे स्वागताध्यक्ष पुणे जिल्हा बँकेचे संचालक प्रदीप कंद व स्पर्धेचे आयोजक भाजपा युवा नेते ओंकार हनुमंत कंद, पुणे जिल्हा कुस्तीगीर संघाचे अध्यक्ष मेघराज कटके उपस्थित होते. स्पर्धेचे उद्घाटन राज्यमंत्री मेघना बोर्डीकर, आमदार राहुल कुल, कुस्तीगीर संघाचे अध्यक्ष रामदास तडस व सरचिटणीस योगेश दोडके यांच्या हस्ते करण्यात येणार आहे.

संदीप भोंडवे म्हणाले, या राज्यस्तरीय कुस्ती स्पर्धेत महाराष्ट्र राज्य कुस्तीगीर संघाची मान्यता असलेले ६ महानगरपालिका व ३६ जिल्हा असे एकूण ४२ जिल्हा कुस्तीगीर संघ सहभागी होणार आहेत. एकूण १० वजनगटामध्ये ३७५ ते ४०० कुस्तीगीर स्पर्धेत सहभागी होणार आहेत. या स्पर्धेसाठी ३० तांत्रिक अधिकारी ( पंच ) निवडण्यात आले असून ग्रीको रोमन महाराष्ट्र केसरी किताबासाठी ८७ ते १३० किलो हा वजनगट निश्चित करण्यात आलेला आहे

प्रदीप कंद म्हणाले, स्पर्धेचा बक्षीस वितरण समारंभ केंद्रीय मंत्री मुरलीधर मोहोळ, उच्च व तंत्र शिक्षण मंत्री चंद्रकांत पाटील, क्रीडामंत्री दत्तामामा भरणे, नामदार जयकुमार गोरे, आमदार ज्ञानेश्वर कटके व आमदार बापूसाहेब पठारे यांच्या हस्ते होणार आहे. ग्रीको रोमन महाराष्ट्र केसरी विजेत्या मल्लास चांदीची गदा देण्यात येणार आहे.

ओंकार हनुंमत कंद म्हणाले, स्पर्धा पहायला येणारे कुस्ती शौकीन, कुस्तीपटू, तांत्रिक अधिकारी यांच्या दृष्टीने योग्य व्यवस्थापन करण्यात आले आहे. कुस्तीपटूंना सर्व आवश्यक सुविधा यावेळी देण्यात येतील. महाराष्ट्र केसरी विजेत्यास चांदीची गदा व रोख बक्षीस तसेच इतर वजनीगटांसाठी देखील आकर्षक बक्षिसे देण्यात येणार आहेत.

पुणे : मराठी राजभाषा दिन आणि स्वातंत्र्यवीर सावरकर यांच्या पुण्यतिथीचे औचित्य साधून ‌‘सावरकर ते शिरवाडकर‌’ या विशेष कार्यक्रमाचे आयोजन करण्यात आले आहे. मराठी भाषेला वैभव प्राप्त करून देणाऱ्या अनमोल रत्नांचा माहिती व तंत्रज्ञान, सांस्कृतिक कार्यमंत्री आशिष शेलार यांच्या हस्ते या प्रसंगी सन्मान केला जाणार आहे.
पुणे पुस्तक महोत्सव आयोजित आणि संवाद, पुणेची निर्मित गीत-संगीत, अभिवाचन, कविता, पोवाडा यांचा समावेश असलेला कार्यक्रम बुधवार, दि. 26 फेब्रुवारी 2025 रोजी सायंकाळी 5:30 वाजता बालगंधर्व रंगमंदिर येथे आयोजित करण्यात आला आहे. या प्रसंगी उच्च व तंत्रशिक्षण मंत्री चंद्रकांत पाटील यांची प्रमुख उपस्थिती असणार आहे, अशी माहिती पुणे पुस्तक महोत्सवाचे मुख्य संयोजक राजेश पांडे आणि संवाद, पुणेचे सुनील महाजन यांनी निवेदनाद्वारे कळविली आहे.
कार्यक्रमाची संकल्पना संवाद, पुणेचे सुनील महाजन यांची असून सूत्रधार निकिता मोघे आहेत. संहिता लेखन आणि निवेदन अक्षय वाटवे यांचे असून चैत्राली अभ्यंकर, संजीव मेहेंदळे, सुजित सोमण गीते सादर करणार आहेत. केदार परांजपे (की-बोर्ड), दिप्ती कुलकर्णी (संवादिनी), राजू जावळकर (तबला), उद्धव कुंभार (ताल वाद्य) साथसंगत करणार आहेत.
मराठी भाषेला वैभव प्राप्त करून देणारे ज्येष्ठ कवी, लेखक फ. मुं. शिंदे, अखिल भारतीय मराठी साहित्य संमेलनाचे माजी अध्यक्ष डॉ. सदानंद मोरे, डॉ. श्रीपाल सबनीस, लक्ष्मीकांत देशमुख, भारत सासणे, डॉ. रवींद्र शोभणे यांचा माहिती व तंत्रज्ञान, सांस्कृतिक कार्य मंत्री आशिष शेलार यांच्या हस्ते गौरव केला जाणार आहे.
कार्यक्रम सर्वांसाठी खुला आहे.

पुणे, ता. २१: “पुणे शहर वेगाने विकसित होण्यासह सर्वच दिशांनी विस्तारत आहे. त्यामुळे नगरनियोजनासोबत शहरातील बांधकामांचे, सार्वजनिक तसेच खासगी आस्थापनांचे डिझाईन अतिशय महत्त्वाचे आहे. शहर नियोजन आणि डिझाईन या संदर्भातील प्रयत्नांना राज्य सरकार पाठिंबा देईल,” असे प्रतिपादन राज्याच्या नगरविकास राज्यमंत्री माधुरी मिसाळ यांनी केले.

आर्किटेक्चर, एन्व्हायर्नमेंट, इंटेरियर डिझाईन, टाऊन प्लॅनिंग व अर्बन डिझाईन क्षेत्रात कार्यरत पुण्यातील व्हीके ग्रुपच्या वतीने ५१ व्या वर्षपूर्तीनिमित्त आयोजित ‘व्हीकलेक्टिव्ह-बिल्डिंग द सिटी वि कॉल होम’ या तीन दिवसीय प्रदर्शनाचे उद्घाटन माधुरी मिसाळ यांच्या हस्ते झाले. घोले रस्त्यावरील पंडित जवाहरलाल नेहरू सांस्कृतिक केंद्रात झालेल्या कार्यक्रमात आमदार सिद्धार्थ शिरोळे, व्हीके ग्रुपचे संस्थापक विश्वास कुलकर्णी, व्यवस्थापकीय संचालक ऋषिकेश कुलकर्णी, अनघा परांजपे-पुरोहित, अपूर्वा कुलकर्णी आदी मान्यवर उपस्थित होते.
उद्घाटनप्रसंगी मगरपट्टा सिटी कॉर्पोरेशनचे प्रतीक मगर, डेक्कन एज्युकेशन सोसायटीचे अध्यक्ष प्रमोद रावत, पीएनजी ज्वेलर्सचे व्यवस्थापकीय संचालक सौरभ गाडगीळ, सवाई गंधर्व महोत्सवाचे संचालक मुकुंद संगोराम व केपीआयटी कमिन्सचे रवी पंडित यांना ‘लीडर्स ऑफ चेंज’ने सन्मानित करण्यात आले. राजा रवी वर्मा आर्ट गॅलरीत व्हीके ग्रुपने गेल्या ५० वर्षांत साकारलेल्या आकर्षक, नाविन्यपूर्ण व वास्तुकलेच्या डिझाईन्स व प्रकल्पाच्या संग्रहाचे प्रदर्शन पाहण्याची संधी पुणेकरांना यानिमित्ताने मिळणार आहे.
माधुरी मिसाळ म्हणाल्या, “पुण्याची परंपरा मोठी आणि अभिमानास्पद आहे. मात्र, आधुनिक काळात पुणे शहराचे नव्याने नियोजन करण्याची आवश्यकता आहे. त्यासाठी डिझाईनचे महत्त्व आहे. सर्व दिशांनी सतत वेगाने विस्तारणारे आपले शहर वाहतुकीच्या समस्येनेही ग्रासले आहे. शहराचा विस्तार होताना बांधकाम, नियोजन आणि डिझाईन, यांचा विचार प्राधान्याने झाला पाहिजे. शहराचे काही क्लस्टर विभाजन करणे आवश्यक आहे. त्यातून शहराचे सौंदर्य टिकून राहण्यास साह्य मिळेल, असा मार्ग आर्किटेक्ट असोसिएशन आणि अन्य घटकांनी मिळून काढला पाहिजे.”
“व्हीके ग्रुपच्या माध्यमातून गेली ५० वर्षे सातत्याने पुण्यासह इतरत्रही उत्तम दर्जाच्या इमारती, आरेखन, पर्यावरणपूरक बांधकामे असे कार्य सातत्याने सुरू आहे. सलग पाच दशके असे योगदान देणे, ही महत्त्वाची बाब असून, त्यासाठी व्हीके ग्रुप अभिनंदनास पात्र आहे. आज इथे सन्मानित विविध क्षेत्रातील मान्यवर पुणेकरांचे ‘कलेक्शन’ सादर केले आहे. पुण्याच्या सर्वांगीण विकासात त्यांचे योगदान मोलाचे राहिले आहे,” अशा शब्दात माधुरी मिसाळ यांनी कौतुक केले.
‘पुणे हे सर्व क्षेत्रांत अतुलनीय भरारी घेणाऱ्या प्रतिभावंतांचे शहर आहे. पुणेकरांनीच शहर आणि शहराचे कर्तृत्व वाढवले व उंचावले आहे,’ असे मुकुंद संगोराम यांनी, तर ‘सध्या नियोजन बाजूला ठेवून अफाट एफएसआय दिला जात असल्याने शहराचे मूळ सौंदर्य आणि आटोपशीरपणा नष्ट झाला असून, शहराची चुकीच्या पद्धतीने होणारी वाढ थांबवण्याबाबत विचार करावा, असे प्रमोद रावत यांनी नमूद केले. अपूर्वा कुलकर्णी यांनी मानपत्रांचे वाचन केले. विजय साने यांनी प्रास्ताविक केले. मीनल पाटील यांनी सूत्रसंचालन केले

भविष्यातील शहरांवर चर्चा
‘बिल्डिंग द सिटी ऑफ टुमारो’ या विषयावरील चर्चासत्र कार्यक्रमाच्या उत्तरार्धात झाले. त्यामध्ये ‘क्रेडाई’चे अध्यक्ष रणजित नाईकनवरे, इंडियन इन्स्टिट्यूट ऑफ आर्किटेक्ट्सच्या पुणे चॅप्टरचे चेअरमन विकास अचलकर, पर्सिस्टंट सिस्टीम्सचे मुख्य प्रशासकीय अधिकारी जयंत कोंडे, एमसीसीआयएच्या कार्यकारी मंडळाचे सदस्य विवेक साधले, ब्रिक्सच्या संस्थापिका पूजा मिसाळ, व्हीके ग्रुपचे व्यवस्थापकीय संचालक आर्कि. हृषीकेश कुलकर्णी सहभागी झाले होते.

नामदार चंद्रकांतदादा पाटील यांचे पाणीपुरवठा विभागाच्या अधिकाऱ्यांना निर्देश

पुणे-कोथरुड विधानसभा मतदारसंघातील समान पाणी पुरवठा योजनेची कामे जलदगतीने पूर्ण करावीत, असे निर्देश नामदार चंद्रकांतदादा पाटील यांनी आज दिले. तसेच, पाणी गळती रोखण्यासाठी उपाययोजना करण्याच्या सूचनाही त्यांनी यावेळी दिल्या.

कोथरूड विधानसभा मतदारसंघातील पाणीपुरवठ्याचा आढावा नामदार चंद्रकांतदादा पाटील यांनी आज घेतला. या बैठकीला पाणीपुरवठा विभागाचे मुख्य अभियंता नंदकिशोर जगताप, अधिक्षक अभियंता श्रीकांत वायदंडे, प्रसन्नराघव जोशी, कार्यकारी अभियंता विनोद क्षीरसागर, उप अभियंता प्रशांत कदम, कनिष्ठ अभियंता गणेश काकडे उपस्थित होते.

बैठकीच्या सुरुवातीला पाणीपुरवठा विभागाच्या अधिकाऱ्यांनी समान पाणीपुरवठा योजनेअंतर्गत पुणे आणि कोथरूड विधानसभा मतदारसंघातील कामाबाबतचा सविस्तर तपशील नामदार चंद्रकांतदादा पाटील यांच्या समोर मांडला. समान पाणीपुरवठा प्रकल्प अंतर्गत पुणे शहरात १४१ झोन निश्चित केले असून त्यातील कोथरूड विधानसभा मतदारसंघात एकूण १७ झोन आहेत. प्रत्येक झोन मध्ये अस्तित्वातील GSR अथवा प्रस्तावित ESR/ GSR (पाण्याच्या टाक्यांमधून) झोनसाठी पाणीपुरवठा प्रस्तावित आहे. अस्तित्वातील वितरण नलिका व आवश्यकतेनुसार नवीन जलवाहिन्या टाकून नागरिकांना पाणीपुरवठा करण्याचे नियोजन आहे, असल्याची माहिती अधिकाऱ्यांनी नामदार पाटील यांना दिली.

तसेच, कोथरूड मतदारसंघातील १७ झोनमधील अस्तित्वातील नवीन पाण्याच्या टाक्यांपैकी १६ टाक्यांचे काम पूर्ण झाले असून; आयडियल कॉलनी टाकीच्या जागेबाबत लॉ कॉलेज, पुणे महानगरपालिका यांच्यामध्ये जागेबाबत न्यायालयीन वाद सुरू आहे. त्यामुळे पाण्याचे टाकीचे काम अपूर्ण असल्याची बाब निदर्शनास आणून दिली.त्यावर सदर सर्व कामे जलदगतीने पूर्ण करावीत; तसेच आयडियल कॉलनीच्या टाकीचा प्रश्न सामोपचाराने सर्वांना विश्वासात घेऊन मार्गी लावावा, अशा सूचना दिल्या.

समान पाणीपुरवठा योजनेअंतर्गत कोथरुड मधील १७ झोन मध्ये २८३९७ इतके AMR मीटर बसविणे प्रस्तावित असून २३२०९ AMR मीटर बसवण्यात आले असून उर्वरित सुमारे ५००० AMR मीटर बसवण्याचे काम सुरू आहे. सदर कामामुळे पाण्याच्या गळतीचे प्रमाण पूर्वीपेक्षा कमी झाले असून २०% पर्यंत कमी करण्यासाठी आवश्यक कामे सुरु आहेत, अशी माहिती ही अधिकाऱ्यांनी नामदार पाटील यांना दिली.

त्यावर नामदार पाटील यांनी समाधान व्यक्त केले. तसेच, पुणे शहराची वाढती लोकसंख्या आणि पाण्याची मागणी पाहता, खडकवासला मधून पाणीपुरवठा होणे शक्य नाही. त्यामुळे पुणेकरांसाठी मुळशी धरणातून पाणीपुरवठा करण्याचा प्रस्ताव विचाराधीन असून; त्यावर लवकरच मार्ग निघेल, असा विश्वास व्यक्त केला.

पुणे-कोथरूड मधील भाजपचा कार्यकर्ता देवेंद्र पुरुषोत्तम जोग (वय ३३, रा. कोथरूड) याला गजा मारणे टोळीकडून मारहाण झाल्यावर त्याबाबत माध्यमांमधून पडसाद उमटताच आज केंद्रीय मंत्री मुरलीधर मोहोळ पोलिसांवर प्रचंड संतापलेले दिसले . म्हणाले तेच तेच १० वेळा सांगायचे काय ? समजत नसेल तर आम्ही आमच्या पद्धतीने पाहू …

शिवजयंती च्या दिवशीं कोथरूड मध्ये देवेंद्र पुरुषोत्तम जोग (वय ३३, रा. कोथरूड) असे टोळक्याच्या मारहाणीत गंभीर जखमी झालेल्या तरुणाचे नाव आहे. या प्रकरणी कोथरूड पोलिस ठाण्यात तीन जणांवर गुन्हा दाखल करण्यात आला आहे. ही घटना बुधवारी सायंकाळी साडेचार ते पावणेपाचच्या सुमारास कोथरूडमधील भेलकेनगर चौक येथे घडली.त्यानंतर पोलिसांनी माध्यमांना याबाबत माहिती देण्यास टाळाटाळ केल्याने माध्यमांनी या प्रकरणी दिलेल्या वृत्तातून केंद्रीय मंत्री मोहोळ यांच्या कार्यकर्त्याला मारणे टोळीकडून मारहाण झाल्याचे वृत्त वेगाने सोशल मीडियातून पसरले आणि आज मोहोळ स्वतः माध्यमांपुढे आले आणि त्यांनी सांगितले .. देवेंद्र जोग हा माझ्या कार्यालयात काम करत नाही मात्र तो भाजपचा कार्यकर्ता आहे . पोलिसांना वारंवार सांगायचे काय ? पुण्यातील गुन्हेगारीला त्यांनी आला घातला पाहिजे . नेमके मोहोळ काय म्हणाले ते ऐका त्यांच्याच शब्दात

पुणे- आय टी अभियंता असलेल्या भाजपा कार्यकर्त्याला मारहाण करणाऱ्या गजा मारणे टोळीतील तिघांना न्यायालयाने 24 फेब्रु. पर्यंत पोलीस कोठडी सुनावली आहे.

ओम तिर्थराम धर्मजिज्ञासू Om Tirtharam Dharmajigyasu (वय ३५,रा. शिंदे चाळ, शास्त्रीनगर, कोथरुड), किरण कोंडिबा पडवळ Kiran Kondiba Padwal (वय ३१, रा. शेख चाळ, शास्त्रीनगर, कोथरुड), अमोल विनायक तापकीर Amol Vinayak Tapkir (वय ३५, रा. लालाबहादूर शास्त्री कॉलनी, शास्त्रीनगर, कोथरुड) अशी अटक केलेल्यांची नावे आहेत. हा प्रकार कोथरुडमधील भेलकेनगर चौकात १९ फेब्रुवारी रोजी दुपारी साडेचार वाजण्याच्या सुमारास घडला होता. पोलिसांनी या तिघांना २० फेब्रुवारी रोजी रात्री ८ वाजता अटक केली. त्यांचा चौथा साथीदार बाब्या ऊर्फ श्रीकांत संभाजी पवार (Babya Alias Shrikant Sambhaji Pawar हा फरार आहे. फरार बाब्या पवार याच्याविरुद्ध खुन, खुनाचा प्रयत्न, खंडणी, मारामारी असे कोथरुड, भारती विद्यापीठ, पौड, अलंकार पोलीस ठाण्यात ९ गुन्हे दाखल आहेत.

त्यापैकी ४ गुन्ह्यामध्ये त्याची निर्दोष सुटका झाली आहे. अमोल तापकीर याच्याविरुद्ध कोथरुड, भारती विद्यापीठ पोलीस ठाण्यात खुनाचा प्रयत्न, खंडणी, दरोड्याच्या तयारीत, मारामारी असे ६ गुन्हे दाखल आहेत. त्यातील एका गुन्ह्यात त्याची निर्दोष मुक्तता झाली आहे.किरण पडवळ याच्याविरुद्ध खुनाचा प्रयत्न, खंडणी, आर्म अ‍ॅक्ट खाली ४ गुन्हे दाखल आहेत. ओम धर्मजिज्ञासू याच्याविरुद्ध खुनाचा प्रयत्न, खंडणी, अपहरण करुन खंडणी मागणे, मारामारी असे चार गुन्हे दाखल असून त्यातील एका गुन्ह्यात निर्दोष सुटका झाली आहे.

याबाबत देवेंद्र जोग (कोथरुड) यांनी कोथरुड पोलिसांकडे फिर्याद दिली आहे. जोग हे दुचाकीवरुन जात असताना रस्त्यावर लोकांची गर्दी असल्याने ते थांबले होते. त्यावेळी पांढरा शर्ट घातलेला एक जण त्यांना म्हणाला की, काय रे गाडी हळु चालविता येत नाही़ धक्का मारतो का. त्यावर ते म्हणाले, दादा मी तुम्हाला धक्का दिला नाही, असे बोलत असताच त्यांच्यातील दुसरा पिवळा शर्ट परिधान केलेल्याने त्यांच्या कानाखाली व तोडांवर बुक्का मारला. त्यामुळे नाकातून रक्तस्त्राव होऊ लागला. त्यामुळे दुचाकीवरुन खाली पडल्याने खरचटले. त्यानंतर ३ ते ४ जणांनी त्यांना लाथाबुक्क्यांनी मारहाण करण्यास सुरुवात केली. ते मारहाण करीत असतानाच एकाने कमरेचा पट्टा काढून मारहाण केल्याने त्यांना मुका मार लागला. त्यानंतर मारहाण करणारे गुजरात कॉलनीच्या दिशेने दुचाकीवरुन पळून गेले.

पोलिसांनी आज तिघांना न्यायालयात हजर केले. यावेळी पोलिसांनी न्यायालयात सांगितले की, आरोपी हे रेकॉर्डवरील गुन्हेगार आहेत. त्यांच्या गुन्हेगारी प्रवृत्तीमुळे समाजामध्ये दहशत असल्याने त्यांच्याविरुद्ध साक्षीदार होण्यास अगर तक्रार देण्यास नागरिक समोर येत नसल्यामुळे या गुन्ह्याचा सखोल तपास करण्यासाठी आरोपी पोलीस कोठडी रिमांडमध्ये असणे अत्यंत आवश्यक आहे.

फिर्यादी यांच्या जिवितास धोका उत्पन्न होईल, अशा पद्धतीने जिवे ठार मारण्याचे उद्देशाने कृती केली आहे, तरी आरोपींनी जीवे ठार मारण्याची कृती ही नेमके कोणत्या कारणासाठी केली आहे, याबाबत प्रत्यक्षात आरोपींना विश्वासात घेऊन तपास करणे आवश्यक आहे. गुन्हा करण्याकरीता आरोपींना कोणी चिथवणी दिली आहे तसेच या गुन्ह्यात इतर कोणाचा प्रत्यक्ष, अप्रत्यक्ष सहभाग आहे का याबाबत आरोपींकडे तपास करायचा आहे.

यातील फरार आरोपी बाब्या पवार याचा ठावठिकाणाबाबत अटक आरोपीकडे चौकशी करुन त्याला अटक करायची आहे. फिर्यादी यांना मारहाण केलेले हत्यार (कमरेचा पट्टा) जप्त करायचा आहे. मोटारसायकली जप्त करायचे आहे. गुन्ह्याचे तपास पुरावे कामी रक्त नमुने काढून घेणे बाकी आहे, गुन्हा करताना परिधान केलेले कपडे जप्त करायचे आहे. या गुन्ह्यात अन्य कोणाचा सहभाग आहे का याचा तपास करायचा असे पोलिसांनी सांगितले.

आरोपींच्या वतीने अ‍ॅड. विजयसिंह ठोंबरे यांनी युक्तीवाद करताना सांगितले की, सुरवातीला किरकोळ मारहाणीचा गुन्हा दाखल असताना जाणीवपूर्वक जीवे मारण्याचा प्रयत्नाचा गुन्हा दाखल करणे योग्य नाही. अशा प्रकारे खोटे गुन्हे दाखल होणार असतील तर मुंबई उच्च न्यायालयात दाद मागणार आहोत. त्यानंतर न्यायालयाने तिघांना २४ फेब्रुवारीपर्यंत पोलीस कोठडी सुनावली.

पुणे-केंद्रीय मंत्री मोहोळांच्या कार्यकर्त्याला मारणे टोळीकडून मारहाण झाल्याच्या वृत्ताने राजकीय आणि शासकीय वर्तुळात जोरदार चर्चा उसळली आहे. या प्रकरणी केंद्रीय राज्यमंत्र्यांच्या कार्यकर्त्याला मारहाण करणाऱ्या गजा मारणेच्या टोळीतील गुंडांची नावे समजू नये यासाठी पोलिसांचा आटापिटा सुरु असल्याचे स्पष्ट झाले आहे.
केंद्रीय राज्यमंत्री यांच्या जवळच्या कार्यकर्त्याला भर चौकात भर दुपारी मारहाण होते. पोलीस गुन्हा तर दाखल करतात. पण, गजा मारणेच्या गुंडाची नावे मीडियामध्ये येणार नाही, यासाठी धडपड करताना दिसतात. त्यामुळे पुण्यात पोलिसांचे नेमके काय चालले आहे.ते दबावाखाली आहेत कि जर पोलिसांवरच अन्याय होत असेल, तर आपला कोणी वाली आहे की नाही, असा प्रश्न पुणेकरांना आता पडला तर नवल वाटणार नाही.

पोलिसाला बेदम मारहाण झाल्याप्रकरणी पोलीस आयुक्त अमितेश कुमार यांनी खरडपट्टी काढल्यानंतर तीन दिवसांनी खुनाचा प्रयत्न केल्याचा गुन्हा चतु:श्रृंगी पोलिसांना दाखल करुन आरोपींना नाईलाजाने अटक करावी लागली. हे प्रकरण ताजे असतानाच छत्रपती शिवाजी महाराज यांच्या जयंतीच्या दिवशी कोथरुडमध्ये IT इंजिनिअरला भर दुपारी शेकडो लोकांच्या समोर बेदम मारहाण झाली. हा प्रकार कोथरुडमधील तसेच शहरातील सर्व महत्वांच्या भाजपच्या पदाधिकार्‍यांपर्यंत पोहचला. त्यामुळे कोथरुड पोलिसांनी मारहाणीचा गुन्हा तर दाखल करुन घेतला. पण मारहाण करणारे हे गजा मारणे यांच्या टोळीतील आहेत, हे लक्षात आल्यावर पोलिसांची धावपळ सुरु झाली. ही माहिती मीडियापर्यंत पोहचल्यावर वरिष्ठ पोलीस निरीक्षक संदिप देशमाने यांच्यासह पोलीस अधिकार्‍यांना पत्रकारांचे फोन सुरु झाले. परंतु, कोथरुडमधील पोलीस अधिकारी पत्रकारांना टाळाटाळ करु लागल्याचे चित्र समोर आले आहे. ज्याला मारहाण झाली तो आपल्या कार्यालयात कामाला नाही मात्र भाजपचा कार्यकर्ता असल्याचे मोहोळ यांनी म्हटले आहे.

पुणे दि. 21 : महासंचालनालय राष्ट्रीय छात्र सेना येथे माजी सैनिक कनिष्ठ आयोग अधिकारी आणि हवालदार यांना कंत्राटीपद्धतीने प्रशिक्षक कर्मचारी म्हणून नियुक्त करण्यात येणार आहे. अधिक माहिती https://nis.bisag-n.gov.in/downlosds-public या संकेतस्थळावर भेट द्यावी. ऑनलाईन अर्ज सादर करण्याची अंतिम तारीख 13 मार्च 2025 आहे, अशी माहिती असे लेफ्टनंट कर्नल हंगे स. दै. (नि.), जिल्हा सैनिक कल्याण अधिकारी यांनी प्रसिद्धी पत्रकान्वये दिली आहे.

चिकन खाण्यास हरकत नाही-पशुसंवर्धन आयुक्त डॉ. प्रवीणकुमार देवरे यांचे नागरिकांना आवाहन : पावसाळा ऋतुत कॉलरा सारखे आजार दुषित अन्न पाण्यामुळे होतात तसेच कंम्पायलोबॅक्टर जेजूनाय जिवाणू आजारास कारणीभूत ठरू शकतात. कच्चे अर्धवट शिजवलेल्या मासांतून हा जिवाणूचा प्रसार होतो. यासाठी पाणी उकलून तसेच ब्लीचिंग पावडरची योग्य मात्रेत प्रक्रिया करुनच पिण्यास वापरावे. भाज्या व मांस स्वच्छ करुन व पुर्ण शिजवूनच सेवन करण्यात यावे. हा आजार संसर्गजन्य नसल्यामुळे घाबरण्याचे कारण नाही, व्यवस्थित शिजवलेले चिकन खाल्ल्यास या जिवाणूचा संसर्ग होत नाही. त्यामुळे चिकन खाण्यास हरकत नाही-पशुसंवर्धन आयुक्त डॉ. प्रवीणकुमार देवरे

पुणे, दि. २१ : कुक्कुट पक्ष्यांचा ‘गुलियन बॅरे सिंड्रोम’ या आजाराच्या प्रादुर्भावाशी संबंध असण्याची शक्यता पडताळून पाहण्याच्या केंद्र व राज्य शासनाच्या निर्देशानुसार खडकवासला धरणाच्या नजिकच्या लोकवस्त्यांमधील कुक्कुट पक्ष्यांचे क्लोॲकल स्वॅब नमुने, विष्ठा नमुने, पाण्याचे नमुने संकलित करुन नॅशनल इन्स्टीट्यूट ऑफ व्हायरॉलॉजी, पुणे या संस्थेस परिक्षणासाठी सादर करुन तपासणीची कार्यवाही सुरु असल्याची माहिती पशुसंवर्धन आयुक्त डॉ. प्रवीणकुमार देवरे यांनी प्रसिद्धी पत्रकाद्वारे कळविले आहे.

पुणे शहराजवळील खडकवासला धरणाच्या नजिकच्या लोकवस्त्यांमध्ये गुलियन बॅरे सिंड्रोम या आजाराच्या प्रादुर्भावाच्या पार्श्वभूमीवर या आजारास कारणीभूत घटकांमध्ये कुक्कुट पक्ष्याचा समावेश असल्याची तसेच दुषित पाण्यातून हा आजार पसरत असल्याची शक्यता वर्तविण्यात येत होती.
पशुसंवर्धन विभागाच्या पथकाने बाधीत क्षेत्रालगत पाण्याचे मुख्य स्रोत असलेल्या खडकवासला धरणाच्या भागातील ११ कुक्कुट प्रक्षेत्राना भेट दिली. या प्रक्षेत्रामध्ये वेंकटेश्वरा समुहाचे ६ अंडी देण्यासाठी कुक्कुट पक्षी संगोपन करणारे प्रक्षेत्र आणि ५ व्यक्तिगत मांसल कुक्कुट पालन प्रक्षेत्र आहेत. वेंकटेश्वरा समुहाचे कुक्कुट पालन प्रक्षेत्रावर जैवसुरक्षा पालन करण्यात येत असल्याचे निदर्शनास आले व त्यापैकी दोन प्रक्षेत्रासाठी पक्ष्यांद्वारे उत्सर्जित मैला प्रक्रिया व्यवस्था आहे. इतर प्रक्षेत्रावर मैला साठवण व्यवस्था आहे. सदर पक्ष्यांचा मैला शेतीसाठी खत म्हणून विक्री करण्यात येतो.
व्यक्तिगत कुक्कुट पालकांच्या ५ प्रक्षेत्रावर गादी पध्दतीने मांसल कुक्कुट पालन करण्यात येत आहे. या प्रक्षेत्रावर साधारणत: ४५ दिवसात बॅच विक्रीस तयार होते. पक्षी विकी नंतर पक्षीघरातील तुस-गादीची विक्री शेतीसाठी खत म्हणून करण्यात येते. पथकास या प्रक्षेत्रांच्या पासून उत्सर्जित सांडपाणी नजीकच्या पाण्याच्या स्त्रोतात मिसळत नसल्याचे आढळून आले आहे.
नॅशनल इन्स्टीट्यूट ऑफ व्हायरॉलॉजी, पुणे या संस्थेकडून प्राप्त झालेल्या तपासणी अहवालानुसार एकूण नमुन्यांपैकी १०६ क्लोॲकल स्वॅब ८९ व कुक्कुट विष्ठा १७ तसेच नमुने (९ प्रक्षेत्रावरील २ कुक्कुट विष्ठा आणि २२ क्लॉॲकल स्वॅब नमुने) कंम्पायलोबॅक्टर जेजूनाय या जिवाणूसाठी होकारात्मक आलेले आहेत. एका प्रक्षेत्रावरील ५ नमुने नोरोव्हायरससाठी होकारात्मक आलेले आहेत.

नॅशनल व्हायरॉलॉजी संस्थेने कुक्कुट प्रक्षेत्रावरील २९ पाणी नमुने तपासले असून त्यापैकी २६ पाणी नमुने कंम्पायलोबॅक्टर जेजूनाय अस्तित्व नकारार्थी आहे आणि उर्वरित ३ नमुने तपासणी सुरु आहे.
कुक्कुट प्रक्षेत्र धारकांनी जैवसुरक्षा सुनिश्चित करावी. व्यक्तिगत स्वच्छता आणि प्रक्षेत्राचे नियमितपणे निर्जंतुकीकरण करावे. कोणतेही कुक्कुट पक्षी उत्सर्जने पाणवठ्यात जाणार नाही याची दक्षता घ्यावी अशा सूचना पशुसंवर्धन विभागाने दिल्या आहेत.

कुक्कुट पक्ष्यांच्या आतड्यांमध्ये कंम्पायलो बॅक्टर जेजूनाय हा सामान्यत: अस्तित्वात असणारा जिवाणू आहे. तसेच हा जिवाणू इतर प्राणी व मानवांतही आढळतो. ही शास्त्रोक्त माहिती आहे. परिक्षेत्रातील कुक्कुट प्रक्षेत्रावरील सांडपाणी अथवा विष्ठा नजीकच्या पाणी स्त्रोतात मिसळले नसल्याने काही दूरचित्रवाहिन्या या आजाराचा कुक्कुट पक्ष्यांपासून पसरत असल्याच्या चुकीच्या बातम्या देत आहेत. यामुळे कुक्कुट पालकांच्या व्यवसायावर विपरीत परिणाम झाला असून नागरिकांमध्ये देखील संभ्रम निर्माण होत आहे.