• खासदार जनसंपर्क सेवा अभियानाला उत्स्फूर्त प्रतिसाद
• राज्यमंत्री माधुरी मिसाळही अभियानात सहभागी

पुणे

पुण्याचे खासदार आणि केंद्रीय मंत्री मुरलीधर मोहोळ यांच्या खासदार जनसंपर्क सेवा अभियानाच्या पाचव्या टप्प्याला पर्वती विधानसभा मतदारसंघातील नागरिकांचा उत्स्फूर्त प्रतिसाद मिळाला. वैयक्तिक कामे, नागरी समस्या, सार्वजनिक आणि नव्या कल्पनांसह सहाशेहून अधिक नागरिक थेट केंद्रीय मंत्री मोहोळ यांना भेटले. राज्याच्या राज्यमंत्री माधुरी मिसाळ यांचीही या उपक्रमास पूर्णवेळ उपस्थिती होती.

नागरिकांचे प्रश्न समजून घेता यावेत आणि ते वेळेत सुटावेत यासाठी खासदार मोहोळ यांनी खासदार जनसंपर्क सेवा अभियान अर्थात जनता दरबार कोथरुड विधानसभा मतदारसंघातून सुरु केला. त्यानंतर कसबा, कॅन्टोन्मेंट, शिवाजीनगर विधानसभा मतदारसंघातही हा उपक्रम राबविण्यात आला. पर्वती विधानसभा मतदारसंघात झालेला हा पाचवी टप्पा होता. नागरिकांचे प्रश्न समजून घेण्यासह शासनाच्या विविध योजनांचे स्टॅाल्स, आधार कार्ड संदर्भातील स्टॅाल्सही यावेळी उपलब्ध करुन देण्यात आले. दर महिन्याच्या शेवटच्या रविवारी हा उपक्रम राबविला जातो.या संदर्भात अधिक माहिती देताना केंद्रीय मोहोळ म्हणाले, ‘पर्वतीच्या अभियानात ६०० पेक्षा अधिक नागरिकांनी टोकन घेत भेट घेतली. थेट नागरिकांना भेटताना नागरिकांसह मलाही मिळणारे समाधान मोठे आहे. भेंडीमध्ये विशेषतः वैयक्तिक कामे आणि नागरी प्रश्न सांगण्यावर नागरिकांचा कल दिसला. जे विषय लगेचच सुटू शकतील अशा कामांसंदर्भातील सूचना संबंधित अधिकाऱ्यांना केल्या आहेत. तसेच दीर्घकालीन कामांसंदर्भातही अधिकाऱ्यांना कालबद्ध कार्यक्रम आखण्यासंदर्भात सूचित केले’

टोकन व्यवस्थेमुळे प्रत्येकाला मिळते भेटण्याची संधी !–खासदार जनसंपर्क सेवा अभियानांतर्गत खा. मोहोळ यांची भेट घेण्यासाठी सुरुवातीला टोकन द्वारे नोंदणी करुन घेतली जाते. त्या टोकनच्या क्रमांकद्वारे नागरिकांना थेट भेटण्याची संधी मिळते. शिवाय भेटासाठी किती कालावधी लागू शकतो याचा अंदाजही नागरिकांना येतो. या टोकन प्रक्रियेमुळे अभियानात सहभाग घेण्याची प्रक्रिया सुलभ झाली आहे.

; व्हीलचेअर रेसमधे १०० दिव्यांगांचा सहभाग
पुणे: “प्रयत्नांची पराकाष्ठा, मनातील जिद्द आणि सकारात्मक दृष्टी तुम्हाला यशाच्या मार्गावर घेऊन जाते. जीवनात येणाऱ्या संकटाना आत्मविश्वासाने सामोरे जात प्रामाणिक प्रयत्न केल्यास हमखास यश मिळते,” असे मत माईंड पॉवर ट्रेनर व लेखक डॉ. दत्ता कोहिनकर यांनी व्यक्त केले. एनेबलर चॅरिटेबल ट्रस्ट आणि ‘सक्षम’च्या वतीने प्रथमच व्हीलचेअरवरील दिव्यांग महिला व पुरुष यांच्यासाठी ‘व्हीलचेअर रेस’चे आयोजन केले होते.
एस. पी. कॉलेजच्या मैदानावर या स्पर्धा झाल्या. एकूण १०० दिव्यांग बंधू-भगिनींनी या स्पर्धेत सहभाग घेतला. या स्पर्धा चार गटात झाल्या. स्पर्धक, पालक मिळून २५० जण उपस्थित होते. स्पर्धेचे संपूर्ण आयोजन सीमा दाबके, अमोल शिनगारे, अशोक बोत्रे, संतोष गायकवाड, अभिजित पोवार, निलेश कांबळे, रामा चलवादी, प्रकाश शेलार, अनंत माखे, कासीम शेख, सोहेल मुलानी यांनी केले. अशोक नांगरे, रवींद्र जोशी, प्रशांत पडदे, सेवा चव्हाण, आकाश कासूर्डे यांनी पंच म्हणून काम केले. ‘एमआयटी’च्या नेकी क्लबचे सभासदांनी स्वयंसेवक म्हणून काम केले.
सामान्य दिव्यांग पुरुष गटात अण्णासाहेब वाघमारे (प्रथम), दिपक बेंडाले (द्वितीय), युवराज अहिरे (तृतीय), महिला गटात पद्मा परभणे (प्रथम), वैशाली इंगवले (द्वितीय), भाग्यश्री मोरे (तृतीय), दिव्यांग खेळाडू पुरुष गटात सदाशिव शिंदे (प्रथम), रोहन ढमाले (द्वितीय), सोमनाथ जाधव (तृतीय), महिला दिव्यांग खेळाडू गटात भाग्यश्री मझीरे (प्रथम), रेखा पडवळ (द्वितीय) व तृप्ती चोरडिया (तृतीय) यांनी पारितोषिके मिळवली. प्रथम क्रमांकास ५००० रुपये, द्वितीय क्रमांकास ३००० रुपये, तृतीय क्रमांकास २००० रुपये व सर्वांना ट्रॉफी देऊन गौरवण्यात आले.  सहभागी सर्व स्पर्धकांना प्रशस्तीपत्रक देण्यात आले.
स्पर्धेचे उद्घाटन लायन्स क्लबचे माजी प्रांतपाल लायन राजकुमार राठोड यांच्या हस्ते झाले. दिव्यांग विभाग प्रमुख सीमा दाबके, एनेबलर चॅरिटेबल ट्रस्टचे संस्थापक अध्यक्ष अमोल शिनगारे, स्वाती मोहोळ, सुनील पटवर्धन, दिपीका खिंवसरा, दिपक लोया उपस्थित होते. बक्षिस वितरण माजी नगरसेविका मोनिका मोहोळ, संदीप खर्डेकर यांच्या हस्ते झाले. प्रसंगी मुरलीधर कचरे, अमित बराटे, उदय जगताप, महेश करंदीकर, केतकी कुलकर्णी, बाजीराव पारगे, शिवाजी भेगडे उपस्थित होते.
दिव्यांगांना समाजाच्या मुख्य प्रवाहात आणून त्यांना प्रेरणा देणारे उपक्रम सातत्याने घेतले पाहिजेत, असे लायन राजकुमार राठोड म्हणाले. स्पर्धेत सहभाग घेतला म्हणजे स्पर्धा जिंकल्यासारखी आहे. यश, अपयश येत-जात राहते. त्याचा फार विचार न करता प्रयत्न करावेत, असे मोनिका मुरलीधर मोहोळ यांनी सांगितले. स्वतःला दिव्यांग समजून मागे राहू नका. अशा उपक्रमात एकत्र या. तुमच्या चेहऱ्यावरचा आनंद म्हणजेच उपक्रम यशस्वी झाल्याचे समाधान आहे, अशी भावना संदीप खर्डेकर यांनी व्यक्त केली.

श्री गजानन महाराज सेवाधारी न्यास पुणे च्यावतीने श्री गजानन महाराज (शेगांव)  प्रकट दिन  उत्सवाचे आयोजन ः ह.भ.प अभय नलगे व सहकाऱ्यांचा सांगितीक कार्यक्रम संपन्न
पुणे ः पांडुरंग ध्यानी पांडुरंग मनी, जागृती स्वप्नी पांडुरंग… सदनी श्री गजानन आले, आज माझे घर मंदिर झाले… खेळ मांडियेला वाळवंटी घाई, नाचती वैष्णव भाई रे… अशा भक्तीगीतांच्या भावपूर्ण सादरीकरणाने श्री गजानन महाराज (शेगांव) प्रकट दिन उत्साहात साजरा झाला.

श्री गजानन महाराज सेवाधारी न्यास पुणे यांच्यावतीने श्री गजानन महाराज शेगाव  १४७ व्या  प्रकट दिनानिमित्त उत्सव  सोहळ्याचे आयोजन करण्यात आले होते. उत्सवानिमित्त भक्ती संगीत कार्यक्रमाचे आयोजन करण्यात आले. यावेळी ह.भ.प. अभय नलगे, कल्याणी शेटे, रेखा मानवतकर यांनी भक्तीगीतांचे सादरीकरण केले. तर प्रसाद भांडवलकर (तबला ), राजेंद्र महाराज बधे (मृदुंग), अश्विनी शेळगे ( टाळ) यांनी साथसंगत केली. एमआयटी महाविद्यालयाचे व्हाईस चान्सलर डाॅ.मिलिंद पांडे आणि संजय जोशी सह प्रा. शुभलक्ष्मी जोशी यांच्या हस्ते  लघुरुद्र अभिषेक संपन्न झाला.

कार्यक्रमाची सुरुवात ओंकार प्रधान रूप गणेशाचे… या गणेश वंदनेने झाली. त्यानंतर आळंदी हे गाव पुण्यभूमी ठाव दैवताचे नाव सिद्धेश्वर… खेळ मांडियेला वाळवंटी घाई, नाचती वैष्णव भाई रे… या गीतांनी कार्यक्रमाचा पूर्वार्ध  भक्तीमय झाला. 
मदन कस्तुरे म्हणाले, श्री गजानन महाराज यांच्या प्रकट दिनानिमित्त संस्थेच्या वतीने उत्सवाचे आयोजन करण्यात येते. उत्सवाची सुरुवात लघुरुद्र अभिषेकाने झाली. त्यानंतर श्री गजानन विजय ग्रंथातील प्रथम अध्यायाचे वाचन करण्यात आले. तसेच यावेळी श्री गजानन महाराज यांची उपासना करण्यात आली. उत्सवात संत साहित्यावरील व्याख्यान संपन्न झाले. तसेच उत्सवा दरम्यान भक्तांसाठी महाप्रसादाचे देखील आयोजन करण्यात आले होते, असेही त्यांनी सांगितले.

आरोग्य, शिक्षण, कृषी, जेंडर अशा महत्त्वाच्या सगळ्या विभागांच्या तोंडाला काळे फासणारे बजेट 
पुणे(प्रतिनिधी): संविधान प्रत्येक नागरिकाला सन्मानाने जगण्याचा हक्क बहाल करते त्याचबरोबर राज्य आणि केंद्र यांनाही काही कर्तव्य बजावायला सांगते. मात्र केंद्रीय बजेट २०२५-२६ संविधानाच्या या मूल्यांचे उल्लंघन करणारे आहे. आरोग्य, शिक्षण, कृषी, जेंडर, अल्पसंख्याक, दलित-आदिवासी अशा सर्व महत्त्वाच्या विभागांच्या तोंडाला काळे फासणारे हे बजेट असल्याचे अर्थतज्ज्ञ आणि सामाजिक कार्यकर्ते नीरज जैन यांनी परखडपणे मांडले. लोकायत, ज्ञानभरती प्रतिष्ठान आणि अलर्ट आयोजित केंद्रीय बीजेच्या २०२५: बजेटने जनतेला काय दिले व काय नेले या बजेट विश्लेषण व्याख्यानात ते बोलत होते. कोणत्याही देशाचा विकास मोजायचा झाल्यास जनता केंद्रस्थानी असते. मात्र भारताच्या बाबतीत विचार केल्यास दरडोई भारताची अर्थव्यवस्था १४० व्या स्थानावर असून अर्थमंत्र्यांनी बजेट सादर केले तेव्हा त्या भाषणात भाषणात म्हणतात की जागतिक अर्थव्यवस्था मंदावत असताना भारताची अर्थव्यवस्था मात्र वेगाने वाढत आहे. येत्या दोन वर्षात ५ ट्रिलियन डॉलर आणि पुढील काही वर्षात १० ट्रिलियन डॉलरपर्यंत पोहोचेल. मात्र त्यांच्या भाषणात आणि बजेटमध्येही कुठेच अत्यंत ज्वलंत प्रश्न असलेल्या बेरोजगारी, गरिबी यावर कोणतीच चर्चा नाही. गुजरातमध्ये फेब्रुवारी २०२४ मध्ये तृतीय श्रेणीच्या पदासाठी  १२५८ जागांसाठी ५.५ लाख उमेदवारांनी अर्ज केले होते, त्यात डबल ग्रॅज्युएट, इंजिनियर झालेल्यांचाही समावेश होता. अन्न अनुदानात ७४% टक्के कपात केली आहे. खतं, गॅस अनुदानात २०१४-१५ च्या तुलनेत ५० टक्के कपात केली आहे. ५० टक्के लोकसंख्या आजही शेतीवर अवलंबून असताना शेतीवरील अनुदानात एकूण बजेटच्या केवळ २.९ टक्के तरतूद म्हणजे गेल्या सहा वर्षात २७ % कपात केली आहे. खतांवरील अनुदानात गेल्या ३ वर्षात ४८%कपात केली आहे. परिणामी २०१४ ते २०२२ दरम्यान १ लाख शेतकरी-शेतमजुरांनी आत्महत्या केल्या आहेत. अभिजात सरकारी शाळा जसं की नवोदय, केंद्रीय, पीएम श्री शाळा यांच्यावरील २८% बजेट जाहीर केले आहे जेव्हा वास्तवात सामान्य कुटुंबातील मुलं सरकारी शाळामंध्ये जातात, म्हणजेच २०१४-२०१४ च्या तुलनेत सामान्य सरकारी शालेय शिक्षणावरील बजेटमध्ये ४८% कपात केली आहे. महाविद्यालयीन शिक्षणात नवीन शैक्षणिक पॉलिसीअंतर्गत ७०% महाविद्यालये खाजगीच्या वाटेवर, १५ वर्षात सर्व महाविद्यालये स्वायत्त होतील म्हणजे साहजिकच फीमध्ये भरमसाठ वाढ होणार परिणामी सामान्य कुटुंबातील मुलं शिक्षणातून बाहेर पडणार, त्यांच्यासाठी कौशल्यावर आधारित अभ्यासक्रम सरकार रेटू पहात आहे, म्हणजे पुन्हा एकदा देशात बारा बलुतेदारी आणून देशाला मध्ययुगात नेऊ पहात आहे. आरोग्य बजेटमध्ये तर भारत १८९ देशांमध्ये १७९ व्या स्थानावर आहे. यावरूनच समजेल की आरोग्य विभागाचे काय होतंय. अंगणवाडी बजेटमध्ये ३३ टक्के कपात केली असून मातृवंदना योजनेत केवळ २५ टक्के मातांना आर्थिक साहाय्य मिळणार, मध्यान भोजन योजनेत ३२टक्के कपात केली आहे. स्त्रियांबाबतीतले जेंडर बजेट जे अत्यंत महत्त्वाचे आहे, त्यात स्त्रियांच्या सुरक्षेच्या नावाखाली अनेक योजना आहेत, प्रत्यक्षात केवळ त्यांच्या जाहिरातींवर एकूण जेंडर बजेटच्या ७०% खर्च केला आहे, स्त्रियांसाठी अत्यंत असुरक्षित देश असं जगभरात  भारताचं नाव आहे. अनुसूचित जातींसाठी केवळ ३.३ टक्के, आदिवासींसाठी २.६ टक्के, अल्पसंख्याकांसाठी ०.७ टक्के तरतूद केली असून पुन्हा एकदा देश केवळ श्रीमंत आणि अतिश्रीमंतांसाठी चळवळ जात असल्याचे ठळकपणे दिसत असून रस्ते- वंदे भारत सारख्या खाजगी रेल्वेसाठी अनुदानाची खैरात दिली आहे. त्याचवेळी जगभरातले अनेक देश श्रीमंत-अतिश्रीमंतांवर ७०% कर लावून अनुदानाच्या तरतुदी करत असताना भारत मात्र सामान्य गरीब-मध्यमवर्गीयांवर जीएसटी सारखे कर लावत आहे. बजेटमधल्या तरतुदी-अनुदान वाढवायचे असेल तर जगभरातल्या देशांकडून शिकून श्रीमंत-अतिश्रीमंतांवरील दरवर्षी रु. ५/६ लाख कोटी करमाफी दिली जात ती दिली नाही तसेच दरवर्षी २०/२५ लाख कोटी (व्याजासहित)कर्जमाफी दिली नाही तर हा सर्व जमा होणार पैसा जनतेवर खर्च करता येईल. बेरोजगारी-गरिबी-शिक्षण-आरोग्य-शेतीतील वाढ सर्व अपेक्षितरित्या होऊ शकेल, हे बजेटच्या तरतुदींवरील उपायही त्यांनी शेवटी सांगितले. हे जर सर्व होऊ शकले तर संविधानातील मूल्यांनुसार प्रत्येक व्यक्तीला सन्मानाने जगता येईल आणि तेच एका देशाचे ध्येय असू शकते, असेही जैन शेवटी म्हणाले.

: श्री वृद्धेश्वर सिद्धेश्वर महाशिवरात्र संगीत महोत्सवात ‘रंग उषेचे’ कार्यक्रम संपन्न
पुणे:  संगीताच्या माध्यमातून मी अनेक देवी देवतांची गाणी गायली. संगीताद्वारे एक प्रकारे ईश्वर सेवा माझ्या हातून घडली. संगीत हे आमच्या घराण्याच्या मुळामध्येच असून माझ्यासाठी संगीत साधना ही ईश्वर साधना आहे, असे मत ज्येष्ठ गायिका उषा मंगेशकर यांनी व्यक्त केले. 
शिवाजीनगर मधील श्री वृद्धेश्वर सिद्धेश्वर मंदिर देवस्थान ट्रस्ट तर्फे आयोजित करण्यात आलेल्या महाशिवरात्र संगीत महोत्सवात  ‘रंग उषेचे’  या कार्यक्रमात सिद्धार्थ बेंद्रे यांनी उषा मंगेशकर यांची मुलाखत घेतली, त्यावेळी त्या बोलत होत्या. ट्रस्टचे अध्यक्ष हनुमंत बहिरट पाटील, सचिव सुधीर दुर्गे, खजिनदार शशिकांत भोसले, विश्वस्त महेश दुर्गे, संजय सातपुते यावेळी उपस्थित होते. डाॅ.आसावरी पाटणकर आणि शिष्या यांचा कथ्थक नृत्याचा कार्यक्रम महोत्सवात सादर झाला.  
उषा मंगेशकर म्हणाल्या, लता मंगेशकर यांच्या इतका महान गायक आणि विनम्र व्यक्ती मी आतापर्यंत पाहिली नाही ‘ओम नमोजी आद्या’ हे गाणे गाण्यापूर्वी लतादीदी यांनी हे गाणे तुम्ही कशाप्रकारे गाता हे मला शिकवा अशी विनंती केली यातूनच त्यांचा विनम्रपणा दिसतो. त्यांच्यातील साधेपणा आणि विनम्रपणा मी आयुष्यभर माझ्या मध्ये जपण्याचा प्रयत्न केला.
मंगेशकर घराणे हे मंगेशी देवाला म्हणजेच भगवान शंकराला आराध्य मानते. वृद्धेश्वर सिद्धेश्वर महोत्सवाच्या माध्यमातून मी माझ्या संगीताद्वारे भगवान शंकराच्या चरणी सेवा अर्पण करत आहे ही संधी मला दिल्याबद्दल मी देवस्थानची आभारी आहे, अशी भावना ही उषा मंगेशकर यांनी यावेळी व्यक्त केले.
मुलाखती दरम्यान श्री रामचंद्र कृपाळू, ओम नमोजी आद्या वेद प्रतिपाद्या, माझी रेणुका माऊली कल्पवृक्षाची सावली, आम्ही ठाकरं ठाकरं या रानाची पाखरं, निसर्ग राजा ऐक सांगते, झुळझुळ वाहे पुण्याजळाचे निर्झर हो अशा विविध प्रकारच्या गाण्यांच्या सुरेल सादरीकरणाने कलाकारांनी रसिकांना मंत्रमुग्ध केले. उषा मंगेशकर यांच्या सह चंद्रशेखर महामुनी आणि नेहा चिपळूणकर यांनीही गाणी गायली.

गांधर्व महाविद्यालय, पुणेतर्फे गुरू गौरव, संगीत गौरव, संगतकार पुरस्करांचे वितरण

पुणे : कलाकार हा कधीच पैशांसाठी, पुरस्कारासाठी किंवा प्रतिष्ठेसाठी कलेचे सादरीकरण करत नसतो. स्वत:ला आनंद मिळावा, तो आनंद इतरांनाही देता यावा यासाठी त्याचा प्रयत्न असतो. रसिकांची दाद म्हणजेच आशीर्वाद, अशा भावना कलाकारांच्या असतात. पुरस्काराने कलाकारांची जबाबदारी वाढते, असे भावोद्गार प्रसिद्ध गायक पंडित विनायक तोरवी काढले.
गांधर्व महाविद्यालय, पुणेतर्फे गुरू गौरव, संगीत गौरव आणि संगतकार पुरस्कार वितरण सोहळा आयोजित करण्यात आला होता. महाविद्यालयाच्या विष्णू विनायक स्वरमंदिरात आयोजित कार्यक्रमात पंडित विष्णू दिगंबर पलुस्कर गुरू गौरव पुरस्काराने सुप्रसिद्ध गायक पंडित विनायक तोरवी (बंगळुरू), पंडित विनायक बुवा पटवर्धन संगीत गौरव पुरस्काराने ज्येष्ठ संवादिनी वादक डॉ. अरविंद थत्ते (पुणे), पंडित चंद्रकांत कामत संगतकार पुरस्काराने तबला वादक पंडित रवींद्र यावगल (बंगळुरू) तर पंडित तुळशीदास बोरकर संगतकार पुरस्कराने संवादिनी वादक पंडित अजय जोगळेकर (मुंबई) आणि पंडित विनय मिश्रा (दिल्ली) यांना सन्मानित करण्यात आले. या वेळी सत्काराला उत्तर देताना पंडित तोरवी बोलत होते. पुरस्काराचे वितरण एअर मार्शल (निवृत्त) भूषण गोखले यांच्या हस्ते झाले. महाविद्यालयाचे प्राचार्य पंडित प्रमोद मराठे, उपप्राचार्या परिणिता मराठे उपस्थित होते. संगीत गौरव व गुरू गौरव पुरस्काराने सन्मानित कलाकारांना 21 हजार रुपये तर संगतकार पुरस्कारप्राप्त कलाकारांना 10 हजार रुपये पुरस्काराच्या रूपाने देण्यात आले. गांधर्व महाविद्यालयाचे प्राचार्य पंडित प्रमोद मराठे यांनी प्रास्ताविकात पुरस्कारामागील संकल्पना विशद केली.
ज्येष्ठ संवादिनी वादक डॉ. अरविंद थत्ते म्हणाले, कलेच्या क्षेत्रात माझ्याकडून जे कार्य झाले आहे त्याचे श्रेय माझे आई-वडील, गुरुजन, माझे शिष्य आणि रसिक या सगळ्यांचे आहे. पंडित विनायकबुवा पटवर्धन यांच्या नावाचा पुरस्कार मिळणे ही दडपण येणारी गोष्ट आहे. हा पुरस्कार माझ्या गुरू मालिनीताई राजुरकर आणि गुरुस्थानी असलेल्या कलाकारांना समर्पित करतो.
भूषण गोखले म्हणाले, गांधर्व महाविद्यालयाला मोठा इतिहास असून ते स्वरमंदिरच आहे. महाविद्यालयातील गुरूकुल पद्धत ही एक उत्तम शिक्षणपद्धती आहे. ते पुढे म्हणाले, ज्याचे पाय कायम जमिनीवर असतात त्या व्यक्ती आयुष्यात कायम मोठ्या उंचीवर पोहोचतात. पुरस्कार मिळालेले सर्व कलाकार आपआपल्या क्षेत्रात इतक्या उंचीवर असूनही अतिशय नम्र आहेत. त्यामुळे ते त्यांच्या शिष्यांसमोर आदर्श आहेत.
यावेळी पंडित विनय मिश्रा यांच्या सुरेल एकल संवादिनी वादनाने उपस्थितांना मंत्रमुग्ध केले. आशय कुलकर्णी यांनी तबला साथ केली. पंडित रवींद्र यावगल याचे एकल तबला वादन झाले. त्यांना अभिषेक शिनकर यांनी संवादिनीची साथ केली. दिली. पंडित विनायक तोरवी यांच्या दमदार अशा गायनाने कार्यक्रमाची सांगता झाली. त्यांना पंडित रवींद्र यावगल (तबला), पंडित विनय मिश्रा (संवादिनी) समर्पक साथसंगत केली. मंजिरी धामणकर यांनी सूत्रसंचालन केले.

पुणे :पैसे घेऊनही वेळेवर फ्लॅटचा ताबा न देणारे, बनावट कागदपत्रे बनवून जागांवर अतिक्रमण करणार्‍या बांधकाम व्यावसायिकांवर एमपीआयडी नुसार करवाई करण्यात येणार असल्याचे पोलीस आयुक्त अमितेश कुमार यांनी सांगितले.

पोलीस आयुक्त अमितेशकुमार यांनी सांगितले की बनावट कागदपत्रे तयार करुन जमिनीवर अतिक्रमण केल्याबाबत तक्रार आल्यास पोलीस उपायुक्त, सहायक पोलीस आयुक्त यांनी प्रत्यक्ष जागेवर जाऊन पाहणी करण्याचे आदेश दिले आहेत. जागेच्या मालकीचा मुद्दा हा दिवाणी दावा आहे. पोलीस निवाडा करणार नाही़ तर पोलीस जागेचा ताबा कोणाकडे होता, हे पाहून ती स्थिती कायम ठेवण्याचा प्रयत्न करेल.

महारेराच्या टाईम लाईन नुसार फ्लॅटचा ताबा देण्याबाबतचे उल्लंघन केले असेल तर फ्लॅट घेण्यासाठी ग्राहकाने दिलेली रक्कम ही गुंतवणूक केल्याचे मानून संबंधितांवर एमपीआयडीनुसार कारवाई करण्यात येणार आहे. बांधकाम व्यावसायिकांकडून होणार्‍या फसवणुकीबाबत नुकतीच क्रीडाईसोबत बैठक घेण्यात आली असून त्यातून काय मार्ग काढता येईल, हे पाहिले जाणार असल्याचे पोलीस आयुक्त अमितेश कुमार यांनी सांगितले.

माजी मंत्री तानाजी सावंत यांच्या पुत्राच्या अपहरणावरुन विचारलेल्या प्रश्नाबाबत पोलीस आयुक्त अमितेश कुमार म्हणाले की, अपहरण, मिसिंग याकडे संवेदनशीलपणे पहाण्यास सांगण्यात आले आहे. सावंत प्रकरणात पोलिसांकडे जेव्हा अपहरणाची तक्रार आली तेव्हा, पोलीस तातडीने सतर्क झाले. तो अपहरणाचा प्रकार नव्हता, हे नंतर पुढे आले. पण, विमान भारताच्या हद्दीबाहेर गेले असते तर ते पुन्हा परत मागे आणणे अवघड गेले होते. मुलींच्या मिसिंगबाबत अनेकदा आपण स्वत: रस्त्यावर उतरुन शोध घेतला आहे. पोलिसांना कोणी वापरुन घेऊ शकणार नाही. पोलीस ठाण्यात कोणी आका, काका नाही. गुन्हा केला असेल तर त्याला कोणी वाचवू शकणार नाही.

गेल्या वर्षभरात खेळाडुव्यतिरिक्त कोणालाही नवीन शस्त्र परवाने देण्यात आले नाही. गरजेशिवाय तसेच ज्यांचे गुन्हेगारी रेकॉर्ड आहे व ज्यांनी नुतनीकरण केले नाही, अशा ३०० जणांचे शस्त्र परवाने रद्द केले आहेत. याशिवाय ४०० जणांना शोकॉज नोटीस देण्यात आल्या आहेत.

पोलिसांना राजकीय, गुंडांचा दबाव नाही़ तर दबाव आहे तो जनतेचा, असे पोलीस आयुक्तांनी सांगितले. शहरातील वातावरण चांगले असावे, ही जनतेची अपेक्षा आहे. त्यांच्या विश्वासाला तडा जाऊ नये, याचा दबाव पोलिसांवर आहे.

पुणे-वेगवेगळया गुन्हयात काेयत्याचा वापर पुणे शहरात गुन्हेगार सातत्याने करत असून त्याच्यावर निर्बंध आणण्यात पोलिसांना अपयश येत आहे. अशाचप्रकारे रविवारी मध्यरात्री पुण्यातील काेथरुड परिसरातील शास्त्रीनगर मध्ये दत्त मंदिराजवळ पुर्ववैमनस्यातून एका तरुणावर गाेळीबार करुन नंतर त्याचा तलवार , सत्तुर व काेयत्याचा वापर करुन निघृण खून टाेळक्याने केल्याचा प्रकार घडला आहे. पोलिसांनी घटनास्थळ येथून तलवार , सत्तुर आणि गावठी पिस्तूल जप्त केले आहे.

गाैरव अविनाश थाेरात (वय- 22) असे खून झालेल्या तरुणाचे नाव आहे. याप्रकरणी काेथरुड पोलिस ठाण्यात सागर वसंत कसबे (वय- 47) यांनी आराेपी विराेधात फिर्याद दाखल केली आहे. त्यानुसार लखन शिाेळे (वय- 27), दिनेश भालेराव (27), साहिल वाकडे (25), साेहेल सय्यद (24), राकेश सावंत (24), अनिकेत उमाप (22) व बंडया नागटिळक (18) यांच्यासह इतर आराेपींवर खुनाचा गुन्हा दाखल करण्यात आल आहे.

पोलिसांनी दिलेल्या माहितीनुसार, मयत गाैरव थाेरात हा त्याच्या मित्रांसाेबत शास्त्रीनगर मधील दत्त मंदिरजवळ गप्पा मारत रविवारी मध्यरात्री बसला हाेता. त्यावेळी आराेपींचे टाेळके त्याठिकाणी आले, आराेपी साेहेल सय्यद याने जुन्या भांडण्याच्या कारणावरुन गाैरव याच्या दिशेने गाेळी झाडली परंतु ती गाेळी त्यास लागली नाही. त्यानंतर आराेपींनी काेयता व तलवारीने गौरव याच्या डोके, मान , पोट, पायावर वार करुन त्यांचा खून केला. त्यानंतर आरोपी पसार झाले असून त्यांचा शोध पोलीस पथके घेत आहे.याप्रकरणी पुढील तपास काेथरुड पोलिस करत आहे

पुणे, 24 फेब्रुवारी 2025: पुण्यातील लोकप्रिय युवा सामाजिक कार्यकर्ते आणि माजी नगरसेवक सनी विनायक निम्हण यांच्या वाढदिवसानिमित्त सोमेश्वर फाउंडेशनच्या वतीने “सुपर सनी विक” या क्रीडा महोत्स वा अंतर्गत आयोजित पुणे ट्वीन सिटी मॅरेथॉन रन फॉर अमृतकाल स्पर्धेत विशाल बनसोडे, राणी मुचांडी, धुळदेव घागरे, रविना गायकवाड यांनी आपापल्या गटात अव्वल क्रमांक पटकावत विजेतेपद संपादन केले.

स्पर्धेत एकूण 25,783 धावपटूंनी आपला सहभाग नोंदवला होता. पुणे व पिंपरी चिंचवड शहरास जोडणारी, व्यसनमुक्तीचा संदेश देणारी पुणे ट्वीन सिटी मॅरेथॉन, रन फॉर अमृतकाल स्पर्धेचे आयोजन पुणे जिल्हा हौशी ॲथलेटिक संघटनेच्या मान्यतेने व सहकार्याने करण्यात आले होते. स्पर्धेत 21किलोमीटर मुलांच्या गटात विशाल बनसोडेने 01:05:24सेकंद वेळ नोंदवत विजेतेपद पटकावले. तर, रामेश्वर मुंजाल (01:08:29से) याने दुसरा आणि बबलू चव्हाण(01:11:12से) याने तिसरा क्रमांक पटकावला. मुलींच्या गटात राणी मुचांडी हीने 01:22:03 सेकंद वेळ नोंदवत पहिला क्रमांक पटकावला. तर, शितल तांबे(01:26:23से) हीने दुसरा आणि संगीता पी (01:33:57से) हीने तिसरा क्रमांक पटकावला.

10 किलोमीटर मुलांच्या गटात धुळदेव घागरेने 29 मिनिटे 21सेकंद वेळ नोंदवत प्रथम क्रमांक पटकावला. तर, अतुल बर्डे (29:24से) व दाजी हुबले (30:43से) यांनी अनुक्रमे दुसरे व तिसरे स्थान पटकावले. मुलींच्या गटात रविना गायकवाडने 35 मिनिटे 58सेकंद वेळ नोंदवत विजेतेपद पटकावले.

ही मॅरेथॉन स्पर्धा २१ किमी, १० किमी, ५ किमी आणि ३ किमी प्रकारात पार पडली. म्हाळुंगे – बालेवाडी येथील श्री शिवछत्रपती क्रीडा संकुलमध्ये पहाटे ५ वाजता सुरू झाली. स्पर्धेतील विजेत्यांना करंडक व ५,५५,५५५ रुपयांची पारितोषिक देण्यात आली. स्पर्धेचे पारितोषिक वितरण आमदार सिद्धार्थ शिरोळे, सोमेश्वर फाउंडेशनच्या संचालिका स्वाती निम्हण, माजी नगरसेवक सनी निम्हण, मधुरा निम्हण, पीसीएमसीचे नगरसेवक अमित गावंडे, एव्हरेस्टर किशोर धनकुडे, एअर व्हाइस मार्शल नितीन वैद्य(निवृत्त), महाबळेश्वर देशपांडे यांच्या हस्ते करण्यात आले. यावेळी रेस डायरेक्टर यश रायकर आदी मान्यवर उपस्थित होते.

निकाल: प्रथम, द्वितीय व तृतीय यानुसार:
21किमी:
मुले: 1.विशाल बनसोडे(01:05:24से), 2.रामेश्वर मुंजाल (01:08:29से), 3.बबलू चव्हाण(01:11:12से);
मुली: 1. राणी मुचांडी(01:22:03से), 2. शितल तांबे(01:26:23से), 3.संगीता पी (01:33:57से);

10किमी:
मुले: 1. धुळदेव घागरे (29:21से), 2.अतुल बर्डे (29:24से), 3.दाजी हुबले (30:43से);
मुली: 1.रविना गायकवाड(35:58से), 2.मानसी यादव(39:19से), 3.अंजू (47:10से).

पुणे- देवेंद्र जोग या मोहोळांच्या कार्यकर्त्याला मारहाण झाल्यावर केंद्रीय मंत्री असलेल्या मोहोळांनी पोलिसांची खरडपट्टी काढल्यावर पोलिसांनी आता वेगाने हालचाली केल्या असून सराईत गुंड गजा मारणे याला अखेर पुणे पोलिसांनी अटक केली आहे. अजून दोघे फरार असून त्यात एक गजा मारणेचा भाचा असल्याचे सांगण्यात येत आहे

दरम्यान भाजप पदाधिकाऱ्याला केलेल्या मारहाण प्रकरणी ही कारवाई करण्यात आली आहे. याआधी पुणे पोलिस आयुक्तांकडून टोळीतील चौघांवर मकोका अंतर्गत कारवाई गजा मारणेसह चौघांवर मकोका अंतर्गत कारवाई करण्यात आली होती. ज्या गुन्हेगारी टोळ्या शहरात सक्रिय समोर येतील त्यांच्यावर कडक कारवाई करण्यात येत आहे, अशी माहिती पोलिस आयुक्त अमितेशकुमार यांनी दिली आहे.

पोलिस आयुक्त अमितेशकुमार पुढे बोलताना म्हणाले की, कोणी कायदा हातात घेतला तर ते खपवून घेतले जाणार नाही. ही संपूर्ण टोळी पोलिस नेस्तनाबूत करू. या टोळीच्या दहशतीला बळी न पडता नागरिकांनी तक्रार करण्यासाठी पुढे यावे, असे आवाहन त्यांनी केले आहे. तसेच शहरात कोणती कोयता टोळी सक्रिय नाही असेही त्यांनी म्हटले आहे.

भारतीय जनता पक्षाचा पुणे येथील कार्यकर्ता देवेंद्र जोग यांना झालेल्या मारहाणीच्या घटनेनंतर केंद्रीय मंत्री मुरलीधर मोहोळ यांनी त्यांच्या निवासस्थानी भेट दिली आहे. या वेळी मुरलीधर मोहोळ यांनी पोलिस आयुक्तांना या प्रकरणात कठोर कारवाई करण्याच्या सूचनाही केल्या आहेत. देवेंद्र सारख्या तरुणाला मारहाण होते, हे कदापि सहन होणार नसल्याचे मोहोळ यांनी म्हटले आहे.

कोथरूड परिसरात गाडीचा धक्का लागल्याने जाब विचारल्यामुळे एका तरुणाला चार जणांनी बेदम मारहाण केली होती. 19 फेब्रुवारी रोजी कोथरूड परिसरातील छत्रपती शिवाजी महाराज पुतळ्यापासून मिरवणूक निघाली होती, त्यावेळी मिरवणुकीच्या दरम्यान चार जणांनी बाईकवरून जाणाऱ्या देवेंद्र जोग यांना कट मारला. देवेंद्र जोग यांच्याशी त्या चार जणांची वादविवाद झाला आणि या वादेचे रुपांतर मारहाणीत झाले. या प्रकरणी कोथरूड पोलिसांनी चौघांविरुद्ध कलम 307 अंतर्गत गुन्हा दाखल केला आहे.

कोथरूड पोलिसांनी तीन आरोपींना अटक केली आहे, तर चौथा आरोपी बाबू पवार फरार आहे. बाबू पवार हा कुख्यात गुंड गजानन मारणेचा भाचा असल्याचे सांगण्यात आले आहे. या प्रकरणात आरोपी म्हणून अमोल विनायक तापकीर, ओम तीर्थराम धर्म जिज्ञासू, किरण कोंडीबा पडवळ, आणि बाबू पवार यांचे नावे समोर आले आहेत.

गजा मारणेवर 37 वर्षात तब्बल 28 गुन्हे; पोलिसांच्या माहिती नुसार मारणे टोळीत 72 गुंड सक्रीय गुंड ! खुन, खुनाचा प्रयत्न, गर्दी मारामारी, खंडणी मागण्याच्या गुन्ह्यांचा समावेश
पुणे शहरातील कुख्यात गुंड गजा ऊर्फ गजानन पंढरीनाथ मारणे (वय ५७) याच्यावर गेल्या ३७ वर्षात तब्बल २८ गुन्हे दाखल आहेत. त्याचबरोबर त्याला दोनदा तडीपार करण्यात आले होते. तसेच मोक्काची कारवाई करण्यात आली होती. तळोजा कारागृहातून सुटका झाल्यानंतर त्याच्या समर्थकांनी मुंबई -पुणे एक्सप्रेस हायवेवर त्याची आलीशान मोटारीतून भव्य मिरवणुक काढली होती. या मिरवणुकीद्वारे त्याने जणू पोलिसांनाच शह दिल्याचे मानले गेले. त्यामुळे पुणे शहर, पिंपरी चिंचवंड पोलीस आणि ग्रामीण पोलिसांनी त्याच्यासह समर्थकांवर वेगवेगळ्या पोलीस ठाण्यात गुन्हे दाखल केले होते. त्यामुळे तो फरार झाला होता. पुणे ग्रामीण पोलिसांनी त्याला सातारा जिल्ह्यात पकडले. त्याला एमपीडीए खाली एक वर्ष स्थानबद्ध केले होते. त्यानंतर पोलिसांनी या रॅलीत सहभागी असलेल्या ५० वर गाड्या जप्त केल्या होत्या. आता पोलीस या मारहाणीच्या वेळी ताफ्यामध्ये सहभागी असलेल्या कार व दुचाकी यांचा सीसीटीव्हीमार्फत शोध घेऊन त्या जप्त करण्याची कारवाई करणार आहेत. पोलिसांच्या माहिती नुसार गजा मारणे टोळीत 72 सक्रीय गुंड आहेत.
मुळशी तालुक्यातील मुळचा गजा मारणे हा कोथरुडमधील शास्त्रीनगर येथे राहण्यास आला. १९८८ साल संपत असताना त्याच्यावर मारामारीचा पहिला गुन्हा डेक्कन पोलीस ठाण्यात दाखल झाला होता. त्यानंतर १९९० मध्ये डेक्कन पोलीस ठाण्यात मारामारीचे दोन तर समर्थ पोलीस ठाण्यात खुनाचा प्रयत्न केल्याचा गुन्हा दाखल झाला होता. १९९१ मध्ये दोन मारामारीचे गुन्हे डेक्कन पोलीस ठाण्यात दाखल झाले होते. त्यामुळे त्याला १९९१ मध्ये २ वर्षांसाठी तडीपार करण्यात आले होते. त्यानंतर तीन चार वर्ष शांततेत गेली. कोथरुड पोलीस ठाण्यात १९९६ मध्ये खुनाचा प्रयत्न केल्याचा गुन्हा दाखल झाला होता. त्याची गुन्हेगारी वाढत असल्याने त्याच्याकडून २००८ मध्ये १ वर्षाचा बाँड घेण्यात आला होता. तरीही त्याचे गुन्हे करणे सुरुच असल्याने २०१२ मध्ये पुन्हा एक वर्ष तडीपार करण्यात आले. प्रत्येक गुन्हा दाखल झाल्यानंतर त्याच्यावर ११० प्रमाणे प्रतिबंधात्मक कारवाई करण्यात आली होती.
गजा मारणे याच्यावर आतापर्यंत डेक्कन, कोथरुड, सासवड, दत्तवाडी, पौड, कामोठा, शिरगाव, हिंजवडी, भारती विद्यापीठ पोलीस ठाणे अशा वेगवेगळ्या पोलीस ठाण्यात २८ गुन्हे दाखल आहेत. त्याविरुद्ध ३१ जुलै २०२४ रोजी शेवटची चॅप्टर केस करण्यात आली होती.
मुळचा मुळशी तालुक्यातील राहणारा असल्याने गजा मारणेने मुळशीतील जमीन विक्रीमध्ये लक्ष घातले. तेथील जमिनीचे व्यवहार हे आपल्यामार्फतच व्हावेत, यासाठी त्याने शेतकर्‍यांवर दहशत निर्माण केली.
गजा मारणे याने आपली टोळी निर्माण केल्याने त्याची कोथरुड परिसरात मोठी दहशत आहे. त्यातूनच त्याने अनेक राजकीय नेत्यांना हस्तेपरहस्ते मदत करण्याचा प्रयत्न केला. त्याने राजकीय पाठिंबा मिळविण्याचा प्रयत्न केला.
अनेक जण गजा मारणे याची घरी जाऊन भेट घेत असतात. उपमुख्यमंत्री अजित पवार यांचे पुत्र पार्थ यांनीही काही महिन्यांपूर्वी गजा मारणे याची घरी जाऊन भेट घेतली. त्याची मोठी चर्चा झाली होती. लोकसभा निवडणुकीनंतर खासदार निलेश लंके यांनी भेट घेतली होती.
राजकारणात सक्रीय होण्यासाठी त्याने अनेकदा प्रयत्न केले. त्यासाठी आपली ओळख गुंड, दादा याऐवजी महाराज म्हणवून तो घेऊ लागला होता. परंतु, एखादे प्रकरण होते आणि त्यातून त्याची गुंड, टोळीप्रमुख म्हणून प्रतिमा पुन्हा समोर येते.
तळोजा कारागृह ते पुणे अशी काढलेल्या रॅलीमुळे गजा मारणे याचे नाव राज्यात सर्वत्र झाले. या रॅलीमध्ये सहभागी गाड्या पोलिसांनी जप्त केल्या होत्या.
त्याचप्रमाणे शिवजयंतीच्या दिवशी सिटी प्राईड कोथरुड येथे गजा मारणे व त्याच्या टोळीतील सदस्य चित्रपट पाहण्यास गेले होते. तेथून त्याच्या गाड्याचा ताफा कोथरुडमधील भेलकेनगर चौकात येऊन थांबला होता. त्यावेळी पुढे जाण्याचा प्रयत्न देवेंद्र जोग यांनी केला. या किरकोळ कारणावरुन गजा मारणे टोळीतील गुंडांनी बेदम मारहाण केली. आता पोलीस या मारहाणीच्या वेळी ताफ्यामध्ये सहभागी असलेल्या कार व दुचाकी यांचा सीसीटीव्हीमार्फत शोध घेऊन त्या जप्त करण्याची कारवाई करणार आहेत.

पोलीस ठाण्यात झाला स्वाधीन, २८ वा गुन्हा
कोथरुड येथील आय टी इंजिनिअरला मारहाण केल्याप्रकरणी पोलीस आयुक्त अमितेशकुमार यांनी अतिशय कडक भूमिका घेतल्यानंतर गजा मारणे व रुपेश मारणे यांना त्या गुन्ह्यात पोलिसांनी आरोपी केले़ त्यानंतर गजा मारणे हा स्वत: पोलीस ठाण्यात हजर झाला़ पोलिसांनी त्याला अटक करण्याची कारवाई सुरु केली आहे़ त्याच्यावरील हा २८ वा गुन्हा आहे़गजा मारणे व त्याच्या टोळीतील २७ जणांवर कारवाई करणाऱ त्यांची मालमत्ता जप्तीसाठी प्रयत्न सुरु असल्याची माहिती पोलीस आयुक्त अमितेशकुमार यांनी आज वार्तालाप कार्यक्रमात दिली होती़ त्यानंतर काही तासात गजा मारणे हा स्वत: पोलीस ठाण्यात हजर झाला आहे़ त्याच्याविरुद्ध १९८८ पासून एकूण २७ गुन्हे दाखल आहेत़ त्याच्यावर दोनदा तडीपाराची कारवाई करण्यात आली असून एकदा स्थानबद्ध केले आहे़ अशा प्रकारे त्याच्यावर १२ वेळा वेगवेगळी प्रतिबंधात्मक कारवाई केली आहे.