पुणे-पुणे स्टेशन येथील पीएमपीएलच्या एका महिला वाहकाला डेपाे मॅनेजरने शरीरसुखाची मागणी केली. सदर महिला शरीरसुख देत नसल्याने डेपाे मॅनेजर याने तिचा वारंवार मानसिक व शारिरिक त्रास देत अपमानास्पद वागणूक दिली. याबाबत महिलेने वरिष्ठांकडे तक्रार करुनही दखल घेतली जात नसल्याने तिने डेपाे मॅनेजर संजय कुसाळकर यांच्या केबीन मध्ये अंगावर पेट्रोल आेतून घेत आत्महत्येचा प्रयत्न केल्याचा धक्कादायक प्रकार घडला आहे

याप्रकरणानंतर संबंधित ३३ वर्षीय महिलेने आरोपी विरोधात समर्थ पोलिस ठाण्यात तक्रार दाखल केली आहे. त्यानुसार आरोपी सुनील धाेडीभाऊ भालेकर (वय- ४४, रा.चऱ्हाेली,पुणे), सुनील कुसाळकर याच्यावर गुन्हा दाखल करण्यात आला आहे. सदर महिला पीएमपीएमएल मध्ये वाहक पदावर काम करत असून सन २०१८ पासून ती कार्यरत आहे. सध्ये पुणे स्टेशन आगार मध्ये ती काम करत आहे. सदर ठिकाणी सुनील भालेकर हा पुणे स्टेशन आगार मध्ये कामास असल्याने तिच्या आेळखीचा आहे. परंतु ताे महिलेचा पाठलाग करुन त्रास देत असल्याने याबाबत महिलेने बंडगार्डन पोलिसात तक्रार दाखल केली हाेती. त्यानंतर सदरची केस मागे घण्यासाठी भालेकर याने महिलेस मारहाण करुन शिवीगाळ करत धमकी दिली. त्यामुळे त्याची महिलेच्या तक्रारीनुसार खातेनिहाय चौकशी हाेऊन त्याची बदली न.ता.वा.डी डेपाेला करण्यात आली.

त्यानंतर महिलेने डेपाे मॅनेजर संजय कुसाळकर यांचेकडून हाेत असलेल्या त्रासाबाबत बंडगार्डन पोलिस ठाण्यात अर्ज दिला हाेता. त्याअनुषंगाने तिला बंडगार्डन पोलिस स्टेशनला बाेलवले असता ती दाेन मित्रांसाेबत गेली हाेती. त्यावेळी एका हॉटेल मध्ये ती जेवणास गेली असता, भालेकर याने तिचा पाठलाग केला. ‘कुसाळकर आमचा बाप आहे, कसा गुन्हा दाखल करताे ते बघुन घेताे’ असे बाेलुन त्याने तिला डाेळा मारुन तेथून निघून गेला. सदरचा प्रकार सार्वजनिक ठिकाणी केल्यामुळे महिलेच्या मनास लज्जा उत्पन्न झाली. तिने याबाबत पोलिसांकडे तक्रार दिली. तसेच याबाबत राज्य महिला आयोगाकडे देखील तक्रार दिली. त्यामुळे कुसाळकर याने महिलेस निलंबित केले. महिला शरीर सुख देत नसल्याने संजय कुसाळकर त्रास देत असल्याने त्याच्या कार्यालयात जाऊन महिलेने अंगावर पेट्रोल आेतून गोंधळ घातल्यावर याबाबत वरिष्ठांना जाग येऊन आरोपींवर गुन्हा दाखल करण्यात आला आहे.

मुंबई: संत तुकाराम महाराजांचे ऐतिहासिक ‘आजोळ’ असलेल्या श्री क्षेत्र लोहगाव येथे भव्य स्मारक आणि पर्यटनस्थळ उभारण्याची मागणी उपमुख्यमंत्री अजित पवार यांच्याकडे केली. त्यांनी सकारात्मक प्रतिसाद दिला असून, लवकरच यासंदर्भातील कार्यवाही पूर्ण केली जाईल, असे आश्वासन दिले आहे.

श्री क्षेत्र लोहगाव हे संत तुकाराम महाराजांच्या वास्तव्याने पावन झालेले ठिकाण असून, आषाढी व कार्तिकी एकादशीसह विविध धार्मिक उत्सवांमध्ये येथे मोठ्या संख्येने भाविक भेट देतात. या पार्श्वभूमीवर हरणतळे लगत असलेल्या शासकीय जागेत संत तुकाराम महाराजांचे भव्य स्मारक आणि पर्यटनस्थळ उभारण्यात यावे, अशी मागणी करण्यात आली आहे.

स्मारकाच्या उभारणीमुळे भाविकांसाठी अधिक चांगल्या सुविधा उपलब्ध होतील, तसेच या स्थळाची ओळख तीर्थक्षेत्र म्हणून अधिक दृढ होईल. यासह, राज्यभरातील भाविक आणि पर्यटकांना येथे येण्यास प्रवृत्त करता येईल. विशेष म्हणजे श्री क्षेत्र लोहगाव गावास ‘क’ वर्ग तीर्थक्षेत्राचा दर्जा प्राप्त झाला असल्याने, या स्मारकाच्या माध्यमातून संत तुकाराम महाराजांचा वारसा उजळण्यास आणि नव्या पिढीपर्यंत पोहोचवण्यास मदत होईल.

या महत्त्वपूर्ण मागणीवर उपमुख्यमंत्री अजितदादा पवार यांनी सकारात्मक प्रतिसाद देत, लवकरच आवश्यक पावले उचलण्याचे आश्वासन दिले आहे. त्यामुळे लोहगाव येथे भव्य स्मारक आणि पर्यटनस्थळ उभारणीचा मार्ग सुकर होण्याची शक्यता आहे, असे आमदार पठारे यांनी सांगितले.

मुंबई: पुणे महानगरपालिका हद्दीतील थकीत मिळकतधारकांना दिलासा देण्यासाठी ‘अभय योजना’ लागू करण्याची मागणी राज्य शासनाकडे करण्यात आली आहे. राज्याचे उपमुख्यमंत्री आणि पुणे जिल्ह्याचे पालकमंत्री मा. अजित पवार यांची मुंबई येथे भेट घेऊन या मागणीसंदर्भात आमदार बापुसाहेब पठारे यांच्यातर्फे निवेदन सादर करण्यात आले.

मुंबई येथे काल (दि. २५) आमदार बापूसाहेब पठारे यांनी उपमुख्यमंत्री अजित पवार यांची मंत्रालयात भेट घेतली. भेटीदरम्यान, पुणे महापालिका हद्दीतील थकित मिळकतधारकांसाठी अभय योजना लागू करण्यासंदर्भात विस्तृत चर्चा झाली. अजित पवार यांनी संबंधित मागण्यांना सकारात्मक प्रतिसाद दिल्याचे समजते.

पुणे महानगरपालिका हद्दीतील मिळकतधारकांनी गेल्या अनेक वर्षापासून विविध कारणांमुळे मिळकतकर भरला नाही, त्यामुळे त्यांच्यावर मोठ्या प्रमाणात व्याज व दंड आकारला जात आहे. त्यामुळे थकबाकीची रक्कम मोठ्या प्रमाणावर थकीत असून नागरिक ती भरण्यास तयार नसल्याचे निदर्शनास येत आहे. यामुळे महापालिकेला कर संकलन करण्यास अडचणी निर्माण होत आहे. या करामुळे थकीत मिळकतधारक नागरिकांचे मोठे आर्थिक नुकसान होवू शकते. त्यामुळे थकीत करदात्याला न्याय देण्यासंबंधी शासनाने ‘अभय योजना’ आणल्यास गोर- गरीब नागरिक संबंधित योजनेच्या माध्यमातून मिळकत कर भरतील व त्यामुळे महापालिकेलाही जास्तीत- जास्त कर संकलन प्राप्त होण्यास मदत होईल असे, असे निवेदनात स्पष्ट करण्यात आले आहे.

“या संदर्भात उपमुख्यमंत्री अजित पवार यांच्याशी सविस्तर आणि सकारात्मक चर्चा झाली असून, लवकरच या मागणीवर योग्य पाऊल उचलले जातील, असे आश्वासन त्यांनी दिले. तसेच, या मागणीचे निवेदन मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनाही सुपूर्द करण्यात आले आहे. त्यामुळे लवकरच या योजनेला राज्य शासनाची मंजुरी मिळण्याची अपेक्षा आहे” असे आमदार पठारे म्हणाले.

भल्या भल्या राजकीय नेत्यांना जमले नाही ते अधिकाऱ्यांनी करून दाखविले …

शहरातील बहुचचित कात्रज चौकातील संजय गुगळे यांच्या मालकीच्या जागेचे भुसंपादन होण्यासाठी माजी अतिरिक्त आयुक्त विकास ढाकणे, शहर अभियंता प्रशांत वाघमारे, पथ विभाग प्रमुख अनिरूध्द पावसकर , भुसंपादन विभागाच्या उपायुक्त प्रतिभा पाटील यांनी विशेष प्रयत्न केले. गुगळे यांच्या ४० गुंठासाठी जागेचे भुसंपादन करण्यात आले. त्यासाठी जागा मालकांला २१ कोटी ५७ लाख ६० हजार रूपये देण्यात आले.

पुणे- राजकीय सुंदोपसुंदी त अडकवीला गेलेला कात्रज – कोंढवा रस्त्याच्या प्रारंभाच्या चौकातला भूसंपादनाचा प्रश्न महापालिकेच्या प्रशसकीय कारकिर्दीत अखेरीस मार्गी लागला . आज हि जागा महापालिकेने गुगळे नामक मालकाला योग्य मोबदला देऊन ताब्यात घेतली आता कात्रजच्या मुख्य चौकातील वाहतूक बऱ्याच अंशी सुरळीत होण्यास या मुळे मार्ग मोकळा होणार आहे.

वर्षानुवर्ष म्हणजे जवळ जवळ तब्बल २८ वर्षापासून प्रलंबित असलेल्या कात्रज मुख्य चौकामध्ये वाहतुकीस अडथळा ठरत असलेल्या स.नं.१/२ ब (पैकी) येथील ६०० मीटर डी.पी. रस्त्याने बाधित मिळकतीचे भूसंपादन कायद्यान्वये ताब्यात घेण्याची कार्यवाही महापालीका आयुक्त डॉ.राजेन्द्र भोसले व अतिरिक्त महापालिका आयुक्त पृथ्वीराज बी.पी यांचे मार्गदर्शनाखाली
भूसंपादन व व्यवस्थापन विभागाच्या उपआयुक्त श्रीमती प्रतिभा पाटील, उपअभियंता दिंगबर बीगर, शाखा अभियता रुपाली ढगे, आरेखक संतोष शिंदे तसेच मा. विशेष भूमि संपादन अधिकारी क्र १६ पुणे हर्षद घुले व अजिक्य पाटील यांच्या अथक प्रयत्नामुळे आज दिनांक २५/०२/२०२५ रोजी पूर्ण करण्यात आली आहे.
सदरची मुख्य चौकातील जागा पुणे मनपाच्या ताब्यात आल्यामुळे कात्रज – कोंढवा या मुख्य रस्त्यावरील तसेच कात्रज मुख्य चौकातील वाहतुकीचा प्रश्न सुटण्यास मदत होणार आहे.महापालिकेच्या अनेक मुख्य सभेत या प्रश्नावरून रणकंदन पेटत असत . पण आता प्रशासकीय कारकिर्दीत हा प्रश्न सुटल्याने इथल्या राजकीय सुंदोपसुंदीचा मुखवटा देखील चाणाक्ष नागरिकांच्या समोर आला आहे.

पुणे-केंद्रीय मंत्री मुरलीधर मोहोळ यांच्या कार्यकर्त्याला मारहाण केल्याप्रकरणी गुंड गजा मारणेच्या अडचणीत वाढ झाली आहे. पोलिसांना शरण आल्यानंतर गजानन मारणेला आज पुण्यातील शिवाजीनगर कोर्टासमोर हजर करण्यात आलं आहे. 3 मार्चपर्यंत गजानन मारणेला पोलीस कोठडी कोर्टाकडून सुनावण्यात आली आहे.

गजानन मारणेला पुण्यातील शिवाजीनगर कोर्टासमोर हजर करण्यात आला आहे. यावेळी मारणेच्या वकिलांनी जोरदार युक्तीवाद केला. यावेळी त्यांनी पोलिसांवर हल्लाबोल केला. माझ्या क्लाइंटला खाली मांडी घालून बसवलं आणि फोटो व्हायरल केला. हा अत्यंत बालिशपणा आहे. फरार आरोपी हजर होतं नाही म्हणून यांना पकडण्यात आलं आहे. पोलिसांनी प्रेशर मध्ये येऊन काम केलं आहे. या प्रकरणात 307 कलम कसं काय लागू होऊ शकतं? काल पर्यंतच्या रिमांड कॉपीमध्ये असा उल्लेख केला आहे की, ए त्या माणसाला मारा असं कुठेही नाहीये. नाकावर फ्रॅक्चर असल्यावर 307 कलम कसं लागू होऊ शकतं. या वातावरणात माझ्या क्लाइंटला कसं अडकवण्यात येईल याचा प्रयत्न केला आहे, असा युक्तीवाद मारणेच्या वकिलांनी केला आहे.

मी रिट पेटिशन देखील दाखल करणार आहे. तोंडावर काळा कपडा बांधून नेण्यात येतं, खाली बसवून फोटो व्हायरल करण्यात येतो. पोलिसांकडे कुठलाही पुरावा नाही. गजा मारणे हा शुगर पेशंट आहे. पोलिसांनी फोटो व्हायरल केला, चेहऱ्याला न झाकता फोटो व्हायरल करण्यात आला आहे, अशी तक्रार गजा मारणेच्या वकिलाची कोर्टाकडे केली आहे.

सहाय्यक पोलीस आयुक्त गुन्हे शाखा गणेश इंगळे यांनी दिलेल्या माहितीनुसार, गजा मारणेविरोधात 28 गुन्हे दाखल आहेत. सखोल तपास करण्यासाठी कस्टडी असणं अत्यंत महत्वाची आहे. सीसीटीव्ही CCTV फुटेज आहे, त्याचाही सखोल तपास करायचा आहे असही इंगळे यावेळी म्हणाले.

अण्णाभाऊंच्या सहवासात” पुस्तकाचे प्रकाशन

पुणे २५ फेब्रुवारी: लोकशाहीर अण्णाभाऊ साठे स्मारक संस्था आणि दलित स्वयंसेवक संघातर्फे आचार्य रतनलाल सोनग्रा लिखित अण्णाभाऊंच्या सहवासात या पुस्तकाचे प्रकाशन अण्णाभाऊंचे मित्र सुप्रसिद्ध चित्रकार नाथ वैराळ यांच्या पत्नी सौ. कुसमताई वैराळ यांच्या हस्ते करण्यात आले. या नगरपालिकेत सफाई कामगार होत्या.
या प्रसंगी साहित्य सम्मेलनाचे माजी अध्यक्ष डॉ. लक्ष्मीकांत देशमुख, बिहारच्या भागलपूर विद्यापीठाचे माजी अधिष्ठाता साहित्यिक लखनलाल सिंह आरोही, दलित स्वयंसेवक संघाचे अध्यक्ष दादासाहेब सोनावणे व शाहिर जाधव हे उपस्थित होते.
आपल्या अध्यक्षिय भाषणात डॉ. लक्ष्मीकांत देशमुख म्हणाले,”अण्णाभाऊ साठे यांनी भारतातील प्रगतीशिल साहित्य परंपरेचे ओळख करून देऊन प्रेमचंद पासून तर शाहीर लुधियानी पर्यंत या लेखकांनी पुरोगामी विचारांची क्रांती साहित्यात केली आहे. लोकशाहीर अण्णाभाऊ साठे हे देखिल याच परंपरेचे जागतिक कीर्तीचे महत्वाचे सहित्यीक होते. त्यांच्या कादंबर्‍या आणि कथा वेगवेगळ्या भाषेत अनुवाद झाले आहे.”
आचार्य रतनलाल सोनग्रा म्हणाले,”संयुक्त महाराष्ट्राच्या चळवळीपासून माझ्या त्यांच्याशी संबध आला. त्यांचा कलापथकांचे पप्रययोग आणि प्रसार अहमदनगरजिल्ह्यात करण्यात माझा सहभाग होता. फकीरा चित्रपटाच्या वेळी अकोला गावात मी आणि माझे सहकारी संपूर्णपणे अण्णाभाऊंच्या बरोबर होतो. चित्रकार एकनाथ वैराळ अगदी शेवटच्या दिवसापर्यंत अण्णाभाऊंच्या बरोबर होते. शेवटचा टाटा करीत अण्णाभाऊंनी जो निरोप घेतला तो देखील त्यांनी या पुस्तकात मांडला आहे.”
हे पुस्तक दलित सेवक संघाचे अध्यक्ष आणि मातंग समाजाचे ज्येष्ठ कार्यकर्त मा. दादासाहेब सोनावणे यांना अर्पण करण्यात आले आहे. या कार्यक्रमाचे सूत्रसंचालन नटश्रेष्ठ कुमार अहेर यांनी केले.
भारतीय संविधानाचे प्रास्ताविक वाचन करून या कार्यक्रमाचा प्रारंभ झाल.
या कार्यक्रमात शाहीर जाधव, शाहीर गायकवाड, लेखिका सुमा लोंढे, चार्लीन चापलीनची भूमिका करणारे आयुष्यमान वनप्रभ, बौद्ध नेते अशोक प्रियदर्शी, सौ. सुशील सोनग्रा, आदी उपस्थित होते.

महाराष्ट्र राज्य कुस्तीगीर संघाच्या वतीने जिल्हा कुस्तीगीर तालीम संघ पुणे यांच्या सहकार्याने व पै. ओंकार कंद युवा फाऊंडेशन, श्री प्रदीपदादा कंद युवा मंच यांच्या वतीने वरिष्ठ ग्रीको रोमन राज्यस्तरीय अजिंक्यपद महाराष्ट्र केसरी कुस्ती स्पर्धा
पुणे : वाइल्ड कार्डद्वारे प्रवेश देण्यात आलेल्या शिवरामदादा तालीमचा मल्ल शुभम सिदनाळेने महाराष्ट्र राज्य कुस्तीगीर संघाच्या वतीने आयोजित पहिल्या वरिष्ठ ग्रिको रोमन राज्यस्तरीय महाराष्ट्र केसरी कुस्ती स्पर्धेचे विजेतेपद पटकावले.

लोणीकंद येथील हिंद केसरी मैदानात ही दोन दिवसीय स्पर्धा झाली. जिल्हा कुस्तीगीर तालीम संघ, पुणे यांच्या सहकार्याने व पै. ओंकार कंद युवा फाउंडेशन, श्री प्रदीपदादा कंद युवा मंच यांच्या वतीने या स्पर्धेचे आयोजन करण्यात आले होते. 
स्पर्धेच्या पारितोषिक वितरण प्रसंगी आमदार ज्ञानेश्वर कटके, पुणे जिल्हा बँक संचालक प्रदीप कंद, महाराष्ट्र राज्य कुस्तीगीर संघ कार्याध्यक्ष संदीप भोंडवे , सरचिटणीस योगेश दोडके, उपाध्यक्ष विलास कथुरे, सुनिल देशमुख , नामदेव बडरे , मेघराज कटके, नवनाथ घुले, पांडुरंग खानेकर, हनुमंत कंद, निळोबा कंद , सुधीर शिंदे, निलेश झुरुंगे, सोहम शिंदे. स्वप्निल कंद, सागर शिंदे उपस्थित होते. स्पर्धा आयोजक ओंकार कंद यांच्या शुभहस्ते चांदिची गदा प्रदान करण्यात आली .

या स्पर्धेत सहा महानगरपालिका व ३६ जिल्हे असे एकूण ४२ जिल्हा कुस्तीगीर संघ सहभागी झाले होते.  

ग्रिको रोमन महाराष्ट्र केसरी किताबी लढत (१३० किलो वजनी गट) चंद्रपूरचा शुभम सिदनाळे आणि कोल्हापूरचा राष्ट्रीय पदक विजेता रोहन रंडे यांच्यात झाली. सुरुवातीला दोन्ही मल्लांनी एकमेकांचा अंदाज घेत खेळ केला. यानंतर दोन्ही मल्लांनी वेळकाढूपणा केला. यातच रोहनने हाप्ते डाव टाकला. त्याने शुभमची पकड करण्याचा प्रयत्न केला. मात्र, भरभक्कम ताकदीच्या शुभमने त्याचा हा डाव हाणून पाडला. त्याने रोहनला कुस्ती झोनच्या बाहेर ढकलून दोन गुणांची वसुली केली. यानंतर शुभमने हाप्ते डाव टाकून रोहनची मजबूत पकड करून चार गुण वसूल केले. यानंतर शुभमने पकड थोडीही सैल न होऊ देता रोहनला चीतपट करून महाराष्ट्र केसरी किताब आणि चांदीची गदा उंचावली.

निकाल (पहिले तीन क्रमांक) – ५५ किलो – जयंत शेडगे (सातारा), सोहेल शेख (रायगड), अजय निंबाळकर (सोलापूर), संकेत पाटील (कोल्हापूर). ६० किलो – ज्ञानेश्वर देसाई (कोल्हापूर), प्रवीण हरनावळ (पुणे जिल्हा), प्रवीण शिंदे (सातारा), हितेश सोनवणे (चंद्रपूर). ६३ किलो – पार्थ कंधारे (पुणे शहर), यशराज जाधव (सातारा), अनुज सारवान (अमरावती), संतोष सरगर (सोलापूर जिल्हा). ६७ किलो – माउली टिपगुडे (कोल्हापूर जिल्हा), उत्सव चौधरी (ठाणे जिल्हा), भालचंद्र कुंभार (पुणे शहर), मकरंद चव्हाण (छत्रपती संभाजीनगर). ७२ किलो – वैष्णव आडकर (पुणे शहर), योगेश चंदेल (छत्रपती संभाजीनगर), अमृत रेडकर (कोल्हापूर जिल्हा), बापू कोळेकर (सांगली). 
७७ किलो – मंगेश कोळी (पुणे शहर), सुशांत पालवे (सातारा), स्वरूप चौगुले (कोल्हापूर जिल्हा), हर्षवर्धन पाटील (मुंबई शहर). ८२ किलो – ओंकार पाटील (कोल्हापूर शहर), अनिकेत जाधव (मुंबई शहर), विवेक चौगुले (कोल्हापूर), आशुतोष भोंडवे (पुणे जिल्हा). ८७ किलो – दर्शन चव्हाण (कोल्हापूर शहर), अभिषेक गडदे (पुणे शहर), विनय पुजारी (कोल्हापूर जिल्हा), करण घनवट (छत्रपती संभाजीनगर). ९७ किलो – बालाजी मेटकरी (मुंबई शहर), उदय शेळके (सोलापूर), विकास मोरे (नाशिक), योगिराज नागरगोजे (लातूर). १३० किलो – शुभम सिदनाळे (चंद्रपूर), रोहन रंडे (कोल्हापूर), अथर्व चव्हाण (जालना), सुशांत तांबुळकर (नागपूर).

 पुणे नागरी सहकारी बँक्स् असोसिएशन लि., पुणे (महाराष्ट्र) तर्फे आयोजन : केंद्रीय मंत्री मुरलीधर मोहोळ, सहकार आयुक्त दीपक तावरे यांची उपस्थिती ; महाराष्ट्रातील ३५० बँकांच्या प्रतिनिधींचा  सहभाग
पुणे : पुणे नागरी सहकारी बँक असोसिएशन लि., पुणे (महाराष्ट्र) च्या वतीने आंतरराष्ट्रीय सहकार वर्षानिमित्त ‘सहकारी बँकांसाठी कृत्रिम बुद्धिमत्ता- एक गेम चेंजर’ या विषयावर राज्यस्तरीय परिषदेचे आयोजन करण्यात आले आहे. शुक्रवार, दिनांक २८ फेब्रुवारी रोजी सकाळी ९ ते सायंकाळी ६ यावेळेत हॉटेल शेरेटन ग्रँड, पुणे येथे ही परिषद होणार आहे. महाराष्ट्रातील विविध भागातील ३५० बँकांच्या प्रतिनिधींचा सहभाग या परिषदेमध्ये असणार आहे, अशी माहिती पुणे नागरी सहकारी बँक्स असोसिएशनचे अध्यक्ष अ‍ॅड. सुभाष मोहिते यांनी पत्रकार परिषदेत दिली.

पत्रकार परिषदेला संचालक विजय ढेरे, रमेश वाणी, बाळकृष्ण उंदरे, मुख्य कार्यकारी अधिकारी चंद्रकांत शेळके आदी उपस्थित होते. राज्यस्तरीय परिषदेचे उद्घाटन सहकार व नागरी विमान वाहतूक राज्यमंत्री मुरलीधर मोहोळ यांच्या हस्ते होणार आहे. यावेळी सहकारी संस्था महाराष्ट्र राज्याचे सहकार आयुक्त व निबंधक दीपक तावरे उपस्थित राहणार आहेत.  

परिषदेत पहिल्या सत्रात आयटी सल्लागार मिलिंद आंबेकर, संगणक तज्ञ श्वेता ढमाळ, कॉसमॉस बँकेचे जतीन सातपुते, रुबीस्केपचे संस्थापक डॉ. प्रशांत पानसरे, टीजेएसबी बँकेचे उपसरव्यवस्थापक हरप्रीत छाब्रा हे सहकारी बँकांचे डिजिटल परिवर्तन या विषयावर बोलणार आहेत.

तर दुस-या सत्रात ‘सायबर सुरक्षेमध्ये कृत्रिम बुद्धिमत्तेचा वापर’ या विषयावर पुणे पीपल्स बँकेचे कैलास पवार, कॉसमॉस बँकेच्या आरती ढोले, बीएफएसआय च्या संचालिका अनिता श्रेयकर, विश्वगुरू इन्फोटेकचे मुख्य कार्यकारी अधिकारी राजेंद्र गांगर्डे, सायबरतज्ञ अ‍ॅड. आशिष सोनवणे यांचे सादरीकरण होणार आहे. ‘सहकारी बँकांमध्ये नातेसंबंध व्यवस्थापनासाठी तंत्रज्ञानाचा प्रभावी वापर’ या विषयावर भारतीय रिझर्व बँकेचे डॉ. अजित कुमार मार्गदर्शन करणार आहेत.

परिषदेच्या तिस-या सत्रात ‘नफा वाढीसाठी क्षमता विकास’ या विषयावर बिग कॅथलिस्टचे विक्रांत पोंक्षे, पुणे नागरी सहकारी बँक्स असोसिएशनचे अध्यक्ष अ‍ॅड. सुभाष मोहिते, कॉसमॉस बँकेचे उपाध्यक्ष सीए यशवंत कासार, टीजेएसबी बँकेचे अध्यक्ष शरद गांगल, जनता सहकारी बँकेचे माजी मुख्य कार्यकारी अधिकारी जयंत काकतकर मार्गदर्शन करणार आहेत.

अ‍ॅड. सुभाष मोहिते म्हणाले, आज सायबर गुन्ह्यांचे प्रमाण वाढत असून, ग्राहकांची फसवणूक केली जात आहे. अशा परिस्थितीत कृत्रिम बुद्धिमत्ता हे बँकिंग क्षेत्रासाठी परिवर्तनकारी तंत्रज्ञान ठरत आहे. सुरक्षित व्यवहार, वैयक्तिक सेवा आणि कार्यक्षम बँकिंग यासाठी कृत्रिम बुद्धिमत्तेचा प्रभावी वापर आवश्यक आहे. डिजिटलायझेशन, कृत्रिम बुद्धिमत्ता, आणि सायबर सुरक्षा यांचा समतोल राखून बँकांनी व्यवसाय वाढवण्याची गरज आहे. या पार्श्वभूमीवर, सहकारी बँकांचे डिजिटल परिवर्तन, सायबर सुरक्षेतील कृत्रिम बुद्धिमत्तेचा वापर आणि नफा वाढीसाठी क्षमता विकास या विषयांवर तज्ज्ञांचे मार्गदर्शन मिळावे, यासाठी असोसिएशनने या परिषदेत विशेष सत्रांचे आयोजन केले आहे.

ही परिषद सहकारी बँकांना आधुनिक तंत्रज्ञान आत्मसात करून अधिक सक्षम आणि सुरक्षित बनण्यास मदत करेल. सातारा, कोल्हापूर, सांगली, सोलापूर, नांदेड, अकोला, जळगाव, अहमदनगर , धुळे, बीड, नाशिक, रत्नागिरी, महाड, रायगड, संभाजी नगर, अहिल्यानगर, मुंबई, ठाणे, नागपूर  या भागातून बँकांचे प्रतिनिधी परिषदेत सहभागी होणार आहेत.

पुणे-मित्राच्या मदतीने पतीचा खून केल्यानंतर राजस्थान येथून पसार झालेल्या महिलेला व तिच्या मित्राला बंडगार्डन पोलिसांनी पुणे स्टेशन भागातून अटक केली. राजस्थानमधील पाली जिल्ह्यातील सोजत सिटी या गावात (दि.२०) ही घटना घडली होती. घटनेनंतर दोघेही पसार झाले होते.

सुखीदेवी कमलेश मेवाड (३०, रा. सोजत सिटी, राजस्थान), अशोक काळुराम राठोड (२५, रा. सोजत सिटी, राजस्थान) अशी अटक करण्यात आलेल्यांची नावे आहेत. तर, कमलेश जेठाराम मेवाड असे खून झालेल्याचे नाव आहे. याबाबत जेठाराम मेवाड यांनी सोजत सिटी पोलीस ठाण्यात फिर्याद दिली आहे.

फिर्यादी जेठाराम यांचा मुलगा कमलेश हा काही दिवसांपासून बेपत्ता होता. २० तारखेला एका शेतामध्ये त्याचा मृतदेह आढळून आला. दाखल गुन्ह्याच्या तपासात हा खून कमलेश याची पत्नी सुखीदेवी व तिचा मित्र अशोक यांनी संगणमताने केल्याची माहिती सोजत सिटी पोलिसांना मिळाली. तेव्हापासून ते आरोपींचा शोध घेत होते. दरम्यान, खून प्रकरणातील आरोपी महिला व तिचा मित्र हे पुणे स्टेशन भागात असल्याची माहिती बंडगार्डन पोलिसांना मिळाली. त्यानूसार पथकाने स्टेशनजवळील जयप्रकाश गार्डन येथून दोघांना ताब्यात घेतले. त्यांच्याकडे केलेल्या तपासात त्यांनी गुन्हा केल्याची कबूली दिली.

परिमंडळ दोनच्या पोलीस उपायुक्त स्मार्तना पाटील, सहायक आयुक्त दिपक निकम, वरिष्ठ निरीक्षक रविंद्र गायकवाड यांच्या मार्गदर्शनाखाली उपनिरीक्षक स्वप्निल लोहार, प्रदीप शितोळे, सारस साळवी, ज्ञानेश्वर बडे, ज्ञानेश्वर गायकवाड यांच्यासह पथकाने ही कामगिरी केली.