पुणे, : राज्य उत्पादन शुल्क विभागाकडून अवैध मद्यनिर्मिती, वाहतूक व विक्रीविरुद्ध धायरी व दौंड येथे कारवाई करून एकूण 40 लाख 5 हजार 720 रुपयांचा मुद्देमाल जप्त केला असून एकूण 8 आरोपींना अटक करण्यात आली आहे.

यामध्ये निरीक्षक, राज्य उत्पादन शुल्क, डी विभाग, पुणे यांच्या पथकाने धायरी फाटा, सिंहगड रोड पोलीस स्टेशन हद्दीत संशयित टोयोटा इनोव्हा क्रिस्टा (एमएच 12 व्हीएल 0955) वाहनाची तपासणी केली असता गोवा राज्यातील खालीलप्रमाणे मोठ्या प्रमाणात मद्य आढळून आले. यात मॅकडॉवेल नं. 1 व्हिस्की 180 मिली 288 बाटल्या, रॉयल स्टॅग व्हिस्की 180 मिली 192 बाटल्या, इंपिरियल ब्ल्यू व्हिस्की 180 मिली 240 बाटल्या असा एकूण रु. 24 लाख 4 हजार 160 रुपयांचा मुद्देमाल जप्त करण्यात आला.

घटनास्थळी अमर पुंडलिक बोडरे (रा. सातारा) व चेतन मधुकर बाटे (रा. नऱ्हे, पुणे) यांना अटक करण्यात आली. तपासादरम्यान चेतन बाटे यांच्या घरी छापा टाकून मॅकडॉवेल नं. 1, रॉयल स्टॅग व इंपिरियल ब्ल्यू च्या प्रत्येकी 144 बाटल्या जप्त करण्यात आल्या. तसेच गोवा एड्रिएल क्लासिक व्हिस्की (७५० मिली) ३६ बाटल्या, विविध बनावट बुचे ६०० नग, रिकाम्या बाटल्या १९२ नग व मोबाईल असा एकूण 1 लाख 18 हजार 560 रुपयांचा मुद्देमाल जप्त करण्यात आला.

या फ्लॅटमध्ये राहणारे आरोपी तुषार सुभाष काळाणे (रा. पुरंदर) यांच्या घरातून गोवा राज्‍य निर्मित एड्रिएल क्लासिक व्हिस्की २८४ बाटल्या, बनावट बुचे – ७५० नग व मोबाईल असा एकूण 4 लाख रु. 6 हजार 500 रुपयांचा मुद्देमाल जप्त करण्यात आला.

या कारवाईत एकूण ५ आरोपींना अटक करण्यात आली असून एकूण रु. 29 लाख 92 हजार 220 रुपयांचा मुद्देमाल जप्त करण्यात आला.

दौंड विभागा मार्फत 10 लाख 12 हजार 900 रुपयांचा मुद्देमाल जप्त

दौंड येथील स्वामी चिंचोली येथून इंपिरियल ब्ल्यू व्हिस्कीच्या 480 बाटल्या, रॉयल स्टॅग व्हिस्कीच्या 240 बाटल्या व मोबाईल असा एकूण रुपये 8 लाख 85 हजार 600 रुपयांचा मुद्देमाल जप्त करण्यात आला.

घटनास्थळी वैभव साळुंखे यांना अटक करण्यात आली. त्यांच्या घरातून विविध ब्रँड्सच्या एकूण 432 बाटल्या, बनावट लेबल्स १३‍०० नग असा एकूण 1 लाख 27 हजार 300 रुपयांचा मुद्देमाल जप्त करण्यात आला.
या कारवाईत एकूण 3 आरोपी अटकेत असून एकूण 10 लाख 12 हजार 900 रुपयांचा मुद्देमाल जप्त करण्यात आला.

या प्रकरणांचा पुढील तपास अनुक्रमे निरीक्षक सचिन श्रीवास्तव, डी विभाग, राज्य उत्पादन शुल्क, पुणे व दुय्यम निरीक्षक प्रदीप झुंजरुक, राज्य उत्पादन शुल्क, दौंड विभाग, पुणे हे करीत आहेत.

अवैध मद्यविरोधातील कारवाई पुढेही सुरू राहणार असल्याचे अधीक्षक अतुल कानडे यांनी सांगितले. तसेच अवैध मद्यनिर्मिती, वाहतूक व विक्रीविरुद्ध नियमितपणे कारवाई सुरू राहील. नागरिकांनी कोणतीही माहिती मिळाल्यास खालील क्रमांकावर तात्काळ टोल फ्री क्र. 1800 233 9999 व दूरध्वनी क्र. 020 – 26058633 येथे संपर्क साधावा.

पुणे, दि. 20 ऑक्टोबर :- सैनिक कल्याण विभाग व विभागाच्या अधिपत्याखालील जिल्हा सैनिक कल्याण कार्यालयातील लिपिक टंकलेखक (गट-क) या पदांकरिता फक्त माजी सैनिक उमेदवारांकडून ऑनलाईन पद्धतीने अर्ज मागविण्यात आले आहेत. दिव्यांग उमेदवारांसाठी १ पद असून ४० टक्के अपंगत्व असलेल्या उमेदवारामधून दिव्यांगत्वाच्या प्रकारानुसार कर्तव्ये व जबाबदारीचा विचार करून गुणवत्तेनुसार शिफारस करण्यात येईल.

भरती प्रक्रिया टीसीएस-आयओएन यांचे माध्यमातून होणार आहे. इच्छुकांनी अर्ज ऑनलाईनच करावेत, इतर कोणत्याही प्रकारे अर्ज स्विकारण्यात येणार नाहीत. अर्ज करण्यासाठी उमेदवारांनी www.mahasainik.maharashtra.gov.in या संकेतस्थळास भेट द्यावी. ऑनलाईन अर्ज 26 नोव्हेंबर 2025 रात्री 11.59 वाजेपर्यंत स्विकारले जातील.

या भरतीबाबत सविस्तर माहिती व अटी संकेतस्थळावर उपलब्ध आहेत. ही भरती प्रक्रिया पारदर्शक पद्धतीने राबविण्यात येणार असल्याचे जिल्हा सैनिक कल्याण अधिकारी लेफ्टनंट कर्नल हंगे एस. दै. (नि.) यांनी कळविले आहे.

20 दिवसांपूर्वीच घेतली होती नवीन कार

पुणे- पर्यटनासाठी कोकणात निघालेल्या तरुणांच्या एका ग्रुपवर काळाने घाला घातल्याची अत्यंत दुर्दैवी घटना रायगड जिल्ह्यातील ताम्हिणी घाटात उघडकीस आली आहे. चालकाचे नियंत्रण सुटल्याने ‘थार’ कार 500 फूट खोल दरीत कोसळली. या भीषण अपघातात सहा जणांचा मृत्यू झाल्याचे समोर आले आहे .मिळालेल्या माहितीनुसार, पुण्यातील काही तरुण मंगळवारी रात्री कोकणात फिरायला निघाले होते. मात्र, रात्रीच्या सुमारास ताम्हिणी घाटातील अवघड वळणावर हा अपघात झाला. मंगळवारपासून हे तरुण संपर्कात नसल्याने त्यांच्या नातेवाईकांनी शोधाशोध सुरू केली. मोबाईल लोकेशन तपासले असता, ते रायगड आणि पुणे जिल्ह्याला जोडणाऱ्या ताम्हिणी घाटात असल्याचे निदर्शनास आले. त्यानंतर आज सकाळी स्थानिक रेस्क्यू टीम आणि पोलिसांच्या मदतीने शोध घेतला असता, 500 फूट खोल दरीत चक्काचूर झालेली थार आढळून आली.

हृदयद्रावक बाब म्हणजे, ज्या गाडीचा अपघात झाला ती ‘थार’ कार अवघ्या 20 दिवसांपूर्वीच खरेदी करण्यात आली होती. नवीन गाडीतून फिरण्यासाठी निघालेल्या या तरुणांचा प्रवास अखेरचा ठरला. कारमध्ये एकूण 6 पुरुष प्रवासी होते. चालकाचा गाडीवरील ताबा सुटल्याने कार थेट दरीत कोसळल्याचा प्राथमिक अंदाज वर्तवण्यात येत आहे. अपघातात प्रथम चव्हाण, पुनित शेट्टी, साहील बोटे, महादेव कोळी, ओंकार कोळी, शिवा माने या तरुणांचा मृत्यू झाला असून, हे सर्व पुण्यातील रहिवासी होते. इतर दोघांचा शोध सुरू आहे.

अपघाताची माहिती मिळताच माणगाव पोलिस आणि ‘सह्याद्री वन्यजीव रक्षणार्थ सामाजिक संस्थे’च्या रेस्क्यू टीमने घटनास्थळी धाव घेतली. दरीची खोली जास्त असल्याने ड्रोन कॅमेऱ्याच्या मदतीने परिसराची पाहणी करण्यात आली. आतापर्यंत चार जणांचे मृतदेह आढळून आले असून, दोरखंड आणि क्रेनच्या साहाय्याने ते बाहेर काढण्याचे शर्थीचे प्रयत्न सुरू आहेत.माणगाव पोलिस ठाण्याचे पोलिस निरीक्षक निवृत्ती बोराडे यांनी दिलेल्या माहितीनुसार, “घटनास्थळी पंचनामा करण्यात आला असून मृतांची ओळख पटविण्याचे काम सुरू आहे. अद्याप दोन जण बेपत्ता असल्याने रेस्क्यू टीम त्यांचा कसून शोध घेत आहे.”

सोमवारी (ता.१७) रात्री ११.३० वा. चार चाकी थार गाडीने कोकणात फिरण्यासाठी प्रथम शहाजी चव्हाण (वय-२२,रा. कोंढवे धावडे, पुणे) पुनित सुधारक शेट्टी, (वय-२०, रा. कोपरे गाव, उत्तमनगर, पुणे), साहील साधु बोटे (वय-२४, रा. कोपरे गाव, उत्तमनगर, पुणे) श्री महादेव कोळी (वय-१८, रा. कोपरे गाव, भैरवनाथ नगर, पुणे), ओंकार सुनील कोळी (वय-१८, रा. कोपरे गाव, भैरवनाथ नगर, पुणे,) शिवा अरुण माने (वय-१९, रा. कोपरे गाव,भैरवनाथ नगर, पुणे) हे सर्व सहा युवक निघाले होते. परंतु दुसऱ्या दिवसापासून त्या सर्व युवकांचा कोणताही संपर्क त्यांच्या घरच्यांशी त्यांच्या मित्रांशी तसेच नातेवाकांशी झाला नाही. त्यामुळे चिंतेत पडलेल्या त्या युवकांच्या पालकांनी या घटनेबाबत उत्तमनगर पोलिसांमध्ये तक्रार दाखल केली.

१९ नोव्हेंबरच्या रात्री माणगाव पोलिसांनी ताम्हिणी घाटात शोधमोहीम सुरू केली. तेव्हा एका अवघड वळणावर लोखंडी संरक्षण कठडा तुटलेला आढळला. ड्रोन उड्डाण केल्यानंतर घनदाट झाडीत थार कारचा एक भाग चमकताना दिसला व अपघात निश्चित झाला. रात्र झाल्याने तपास मोहीम थांबवावी लागली; मात्र २० नोव्हेंबर रोजी सकाळी ७.३० पासून पुन्हा मोठ्या प्रमाणात रेस्क्यू ऑपरेशन सुरू करण्यात आले.दुपारी ३.१५ वाजण्याच्या दरम्यान दरीतील झाडा झुडपात विखुरलेल्या अवस्थेत सहाही तरुणांचे मृतदेह मिळाले

ताम्हिणी घाटातील सुरक्षा उपाययोजनांवर प्रश्नचिन्ह

जीर्ण झालेले संरक्षण कठडे, असुरक्षित वळणे, रात्री पुरेशी प्रकाश व्यवस्था नसणे आणि वाहतूक या सर्व बाबींची मोठी पुनर्पडताळणी होण्याची आवश्यकता आहे. ही दुर्घटना ताम्हिणी घाटातील सुरक्षिततेची दयनीय अवस्था उघड करते आणि प्रशासन तसेच हा मार्ग महाराष्ट्र राज्य रस्ते विकास महामंडळाकडे असल्याने या विभागावर मोठे प्रश्न उपस्थित केले जात आहे.

पुणे- जुन्नर तालुक्यातील ओतूर गावात मंगळवारी संध्याकाळी एका सात वर्षीय चिमुकलीवर अमानुष अत्याचार झाल्याची धक्कादायक घटना समोर आली आहे. पीडित मुलगी ऊसतोड मजूर कुटुंबातील असून, तिच्यावर बलात्कार करणारा आरोपी हा देखील त्याच वस्तीतील शेजारीच असल्याने परिसरात प्रचंड संतापाची लाट पसरली आहे. आरोपीचे नाव देवीदास रोहीदास गर्जे (वय अंदाजे ३५) असे असून तोही ऊसतोड कामगार आहे.मिळालेल्या माहितीनुसार, संध्याकाळी मुलगी घराबाहेर खेळत असताना आरोपीने तिला जबरदस्तीने एका निर्जन जागी नेले आणि तिच्यावर अत्याचार केला. मुलगी घाबरून घरी परतल्यानंतर तिने आई-वडिलांना सर्व हकिकत सांगितली. मुलीने आरोपीचे नाव स्पष्टपणे सांगितल्याने पालकांनी तात्काळ ओतूर पोलीस ठाण्यात धाव घेऊन तक्रार दाखल केली.घटनेचं गांभीर्य लक्षात घेऊन ओतूर पोलिसांनी त्वरित कारवाई करत काही तासांच्या आत आरोपी देवीदास गर्जेला अटक केली. पोलीस निरीक्षक संजय साळुंके यांच्या मार्गदर्शनाखाली पोलीस उपनिरीक्षक सचिन शिंदे पुढील तपास करीत आहेत. पीडित बालिकेवर पुण्यातील शासकीय रुग्णालयात तात्काळ उपचार सुरू करण्यात आले असून वैद्यकीय अहवालाची प्रतिक्षा आहे.या घटनेनंतर ऊसतोड कामगारांच्या वस्त्यांमध्ये काही काळ तणावाचे वातावरण निर्माण झाले होते. परिस्थिती नियंत्रणात ठेवण्यासाठी ओतूर पोलिसांनी मोठा फौजफाटा तैनात केला आणि शांतता राखली. या प्रकरणी भा.द.वि. कलम ३७६, ३७६ (२)(एन), तसेच पॉक्सो कायद्याच्या संबंधित कलमांन्वये देविदास गर्जे याच्या विरोधात गुन्हा दाखल करण्यात आला आहे.

पुणे- बेकायदेशीर रित्या भाडेकरूला थेट रस्त्यावर आणणाऱ्या घर मालकाविरोधात आणि त्याला साथ देणाऱ्या सहायक पोलीस निरीक्षकास पोलीस आयुक्तांनी चांगलाच धडा शिकविला आहे

पोलीस ठाण्यात येऊन घराला परस्पर कुलूप लावल्याची तक्रार भाडेकरुने केली असता घरमालकाला असे तुम्हाला करता येणार नाही, हे सांगून त्यांना गुन्हा करण्यापासून परावृत्त केले नाही. त्यामुळे घरमालक आणि सामाजिक कार्यकर्त्या यांनी विनापरवाना घरात शिरुन भाडेकरुचे सामान बाहेर काढून ठेवले . या घटनेत गुन्हा करण्यापासून आरोपींना परावृत्त न करता कर्तव्यामध्ये हलगर्जीपणा करुन बेजबदारपणाचे वर्तन करुन पोलीस दलाची प्रतिमा मलिन होईल, असे कृत्य केल्याने पोलीस आयुक्त अमितेश कुमार यांनी खराडीतील सहायक पोलीस निरीक्षक मुबारक नबीलाल शेख यास निलंबित केले आहे.घरमालक राजकुमार बन्सल व प्रभा करपे यांच्यावर गुन्हा दाखल करण्यात आला आहे .

याबाबतची माहिती अशी, गौरव शिवशंकर लखानी (वय ३५, रा. गेरा पार्क व्हिव आय, साऊथ विंग, खराडी) यांनी खराडी पोलीस ठाण्यात १ नोव्हेंबर रोजी फिर्याद दिली होती. लखानी हे राजकुमार बन्सल (वय ६४, रा. गेरा एमरेल्ड, खराडी) यांच्या मालकीच्या फ्लॅटमध्ये २७ एप्रिल २०२५ पासून भाड्याने रहात होते. १५ सप्टेंबर २०२५ रोजी घरमालक राजकुमार बन्सल यांनी त्यांच्या भावाला एक महिन्याच्या आतमध्ये घरखाली करा, अशी नोटीस दिली होती.त्यावेळी त्यांनी आम्हाला दुसरे घर बघण्याकरीता वेळ द्या, असे सागिंतले होते. तरी सुद्धा त्यांनी ३१ ऑक्टोंबर रोजी फिर्यादी यांना न विचारता व घरात कोणी नसताना त्यांच्या घरास घरमालकाने कुलूप लावल्याचे दिसून आले. घरमालकाविरुद्ध तक्रार देण्यासाठी १ नोव्हेंबर रोजी ते खराडी पोलीस ठाण्यात आले. तेव्हा घरमालक राजकुमार बन्सल व सामाजिक कार्यकर्त्या प्रभा करपे हे त्याठिकाणी उपस्थित होते. त्यांनी दुसरे घर पाहण्याकरीता ८ दिवसांची मुदत मागितली. त्यावेळी आम्ही तुम्हाला मुदत देणार नाही, तुम्ही आताच्या आता घर खाली करा, नाही तर आम्ही तुमचे घरातील सामान बाहेर काढून ठेवू, असे सांगून ते निघून गेले होते. फिर्यादी लखानी हे कामाला निघून गेले. रात्री ८ वाजता घरी गेले, तेव्हा त्यांच्या घरातील सामान हे सोसायटी लिफ्टचे समोर पार्किंगमध्ये ठेवलेले दिसले. विनापरवाना घरात शिरुन घरातील सामान बाहेर काढुन स्वत:चे लॉक लावले.

त्यावरुन खराडी पोलिसांनी घरमालक राजकुमार बन्सल व प्रभा करपे यांच्यावर गुन्हा दाखल करण्यात आला होता. याबाबत वरिष्ठ पोलीस अधिकार्‍यांकडील पत्रावरुन फिर्यादी हे भाड्याने रहात असताना त्यांच्या घरामध्ये विनापरवाना प्रवेश करुन घरामधील साहित्य बाहेर काढले. त्यासाठी तुम्हास हा गुन्हा करण्यापासून आरोपींना परावृत्त करता आले असते, परंतु तुम्ही तसे न करता कर्तव्यामध्ये हलगर्जीपणा करुन बेजबाबदारपणाचे वर्तन करुन पोलीस दलाची प्रतिमा मलिन होईल, असे कृत्य केले आहे, त्यावरुन सहायक पोलीस निरीक्षक मुबारक नबीलाल शेख यांना पोलीस आयुक्त अमितेशकुमार यांनी निलंबित केले आहे.

पुणे : खरा लेखक सर्जनाच्या सर्व शक्यता तपासून पाहतो. बंदिस्त चौकटीत न अडकता विविध विषय हाताळत, सर्वसमावेशक सूत्रे आपल्या साहित्यकृतीतून मांडतो. हे सूत्र स्वीकारत ललिता सबनीस यांनी जीवनाची व्यामिश्रता आणि व्यापकता दर्शवत मानवी स्वभावाच्या अनेक कंगोऱ्यांचे दर्शन आपल्या साहित्यकृतींमधून घडविले आहे, असे गौरवोद्‌गार अखिल भारतीय मराठी साहित्य महामंडळाचे अध्यक्ष प्रा. मिलिंद जोशी यांनी काढले.

संस्कृती प्रकाशनतर्फे ललिता श्रीपाल सबनीस लिखित ‘संसारी शहाणपण, ‘संस्कृतिनिष्ठ नायिका’, ‘लहानपण देगा देवा’ आणि ‘समर्पण’ चार पुस्तकांचे प्रकाशन बुधवारी (दि. १९) झाले. त्या वेळी प्रा. मिलिंद जोशी अध्यक्षपदावरून बोलत होते. प्रसिद्ध उद्योजक कृष्णकुमार गोयल, अखिल भारतीय मराठी साहित्य महामंडळाच्या कार्यवाह सुनिताराजे पवार, कवयित्री अंजली कुलकर्णी, साहित्यिक वि. दा. पिंगळे, अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांची प्रमुख उपस्थिती होती. महाराष्ट्र साहित्य परिषदेच्या माधवराव पटवर्धन सभागृहात कार्यक्रमाचे आयोजन करण्यात आले होते.

प्रा. मिलिंद जोशी पुढे म्हणाले, विविध वाङ्‌मय प्रकारात लेखनप्रयोग करताना ललिता सबनीस यांनी रूढी, परंपरा यांच्यावर पुनर्विचार करणाऱ्या नायिका, स्त्रीवादाची मूल्ये दर्शविणारे संसारी शहाणपण तसेच लैंगिकता आणि नैतिकता या विषयावर थेट भिडण्याचे सामर्थ्य दाखविले आहे.

उत्तम संवेदनशील नागरिक घडावेत या दृष्टीने केलेले प्रयत्न त्यांच्या साहित्यकृतीतून जाणवतात. यातूनच त्यांनी जबाबदार बालसाहित्यकाराची भूमिका उत्तमपणे निभावली आहे. त्यांचे वाङ्‌मयीन विचार सुशिक्षितांना संस्कारित होण्यासाठी मार्गदर्शक आहेत. रंजक तरीही प्रबोधनात्मक आणि मूल्य जपणारे साहित्य माणुसकीचा आवाज बुलंद करणारे आहे.

हा प्रकाशन सोहळा म्हणजे साहित्यिक व साहित्यप्रेमी यांचा आनंद मेळावा आहे, असे सांसून कृष्णकुमार गोयल म्हणाले, डॉ. श्रीपाल सबनीस यांच्या साक्षीने ललिता सबनीस यांनी मराठी साहित्याला नवी दिशा, उर्जा देणाऱ्या साहित्यकृती निर्माण केल्या आहेत. या साहित्यकृती समाजभान जागवतील असा विश्वास आहे.

लेखन प्रवासाविषयी बोलताना ललिता सबनीस म्हणाल्या, साक्षरता पालकत्व, कुटुंब प्रबोधन, नातेसंबंध, महान स्त्रीयांच्या कार्यकर्तृत्वाचा आढावा या साहित्यकृतींमधून घेण्यात आला आहे. त्याचप्रमाणे आनंदाने हसत खेळत, चैतन्याची बाग फुलवत होणारे बालकांचे प्रबोधन यांसह समर्पण आणि त्यागाची भूमिका मांडत विचार करायला लावणारी शोकांतिका या साहित्यकृती वाचकांच्या मनाचा ठाव घेणाऱ्या ठरतील.

‘समर्पण’ या कादंबरीविषयी बोलतानात अंजली कुलकर्णी म्हणाल्या, ललिता सबनीस यांनी सामाजिक मूल्यव्यवस्था, नैतिकता व अनैतिकतेतील द्‌वंद्व, त्याग, समर्पणाची भावना या विषयी वास्तवपूर्ण मांडणी करत उत्तम संवादात्मकतेतून प्रसंग उभे करत वाचनियता जपणारी साहित्यकृती निर्माण केली आहे. तर ‘लहानपण देगा देवा’ या कवितासंग्रहातून मुलांच्या भावविश्र्वाशी तन्मयता साधत सभोवताल, निसर्गविभ्रम, नातेसंबंध यांच्याविषयी प्रसन्न, मोहक तसेच साध्या व सोप्या शब्दात मांडणी केली आहे.

वि. दा. पिंगळे म्हणाले, ‘संसारी शहाणपण’ या साहित्यकृतीतून ललिता सबनीस यांनी सुखी संसाराची गुरुकिल्लीच वाचकांच्या हाती दिली आहे. आजच्या काळातील मोडकळीस आलेली कुटुंब व्यवस्था पुन्हा एकदा एकसंध व्हावी याकरिता हे पुस्तक मार्गदर्शक ठरेल. देशाच्या मातीत जन्मलेल्या स्त्री रत्नांच्या कार्यकर्तृत्वाची थोडक्यात ओळख ‘संस्कृतीनिष्ठ नायिका’ या पुस्तकातून वाचकांसमोर येत आहे.

डॉ. श्रीपाल सबनीस यांनी मनोगत व्यक्त केले तर सुनीताराजे पवार यांनी स्वागतपर प्रास्ताविक केले. सूत्रसंचालन दिनेश फडतरे यांनी केले.

पुणे पेट्रोल डीलर्स असोसिएशनची पोलीस आयुक्त अमितेश. कुमार यांच्याशी महत्त्वपूर्ण बैठक — गुन्हेगारी प्रकरणांवर तात्काळ पोलिस मदतीचे आश्वासन

पुणे, 19 – पुणे पेट्रोल डीलर्स असोसिएशनचे अध्यक्ष अमानुल्ला खान आणि असोसिएशनचे प्रवक्ते अली दारूवाला यांनी पुणे शहराचे पोलीस आयुक्त . अमितेश कुमार यांची आज अत्यंत फलदायी भेट घेतली.

असोसिएशनने शहरातील काही पेट्रोल पंपांवरील वाढत्या गुन्हेगारी घटनांबाबत व सुरक्षा चिंतेबाबत चर्चा केली. पोलीस आयुक्तांनी ही बाब अतिशय गांभीर्याने घेत फक्त पाच मिनिटांत समस्या सोडवण्याची दिशा दाखवली. त्यांनी गुन्हेगारीने बाधित पेट्रोल पंपांना तात्काळ पोलिस मदत उपलब्ध करून देण्याचे स्पष्ट आश्वासन दिले.

सीएनजीच्या कमतरतेमुळे काही पेट्रोल पंपांवर अत्यंत दबाव वाढला असून, प्रभावित पंपांची संपूर्ण यादी पुणे पेट्रोल डीलर्स असोसिएशनकडून तात्काळ पोलीस प्रशासनाला देण्यात येणार आहे.

या सकारात्मक प्रतिसादामुळे, असोसिएशनचे अध्यक्ष श्री. अमानुल्ला खान यांनी तात्काळ प्रभावाने पंप बंद करण्याचा निर्णय मागे घेतला असल्याची माहिती देण्यात आली.

अली दारूवाला, प्रवक्ते, पुणे पेट्रोल पंप डीलर्स असोसिएशन म्हणाले:
“पोलीस आयुक्त अमित कुमार यांनी त्वरित प्रतिसाद देत आमची समस्या हाताळली. त्यांच्या आश्वासनामुळे पेट्रोल पंपाची सुरक्षा आणि कामकाज सुरळीत राहण्यास मोठी मदत मिळणार आहे.”

अजिंक्यपद विजेत्या महावितरण पुणे-बारामती संघाचा श्री. राजेंद्र पवार यांच्या हस्ते गुणगौरव

पुणे, दि. १९ नोव्हेंबर, २०२५- खेळामुळे सांघिक भावना वाढीस लागते तसेच खिलाडू वृत्ती जोपासली जाते. पुढे त्याचा फायदा वीज कर्मचाऱ्यांना दैनंदिन कामे करताना होत असल्याचे प्रतिपादन महावितरणचे संचालक (मानव संसाधन) श्री. राजेंद्र पवार यांनी केले. अमरावती येथे नुकत्याच झालेल्या राज्यस्तरीय क्रीडा स्पर्धेत पुणे-बारामती संघाने अजिंक्यपद मिळविले होते. त्यानिमित्त विजेत्या संघाचा संचालक श्री. राजेंद्र पवार यांच्या हस्ते रास्तापेठ येथील कार्यालयात बुधवारी (दि. १९) गुणगौरव करण्यात आला.

यावेळी उपस्थित खेळाडुंना मार्गदर्शन करताना श्री. राजेंद्र पवार म्हणाले, मागील काही वर्षांपासून महावितरणमधील खेळाचा दर्जा उंचावत चालला आहे. कंपनीत अनेक राष्ट्रीय व आंतरराष्ट्रीय खेळाडू घडत आहेत. या खेळाडुंना लागणाऱ्या सुविधा मध्ये देखील दिवसेंदिवस वाढ केली जात आहे. नवीन भरतीमध्ये देखील अनेक खेळाडू कंपनीत आले आहेत. त्यामुळे पुढील काळात स्पर्धा अधिक वाढेल. यावर्षी ज्यांना बक्षिसे मिळाली नाहीत. त्यांनी अधिक मेहनत घेऊन पुढच्या स्पर्धेत मुसंडी मारावी. सोबतच अजिंक्यपद कायम पुणे-बारामती संघाकडेच राहील यासाठी प्रयत्न करावेत.

व्यासपीठावर प्रादेशिक संचालक श्री. भुजंग खंदारे, पुणेचे मुख्य अभियंता श्री. सुनिल काकडे, बारामतीचे मुख्य अभियंता श्री. धर्मराज पेठकर, अधीक्षक अभियंते श्री. ज्ञानदेव पडळकर, श्री. सिंहाजीराव गायकवाड, श्री. अनिल घोगरे व श्री. संजीव नेहते यांची उपस्थिती होती.

प्रादेशिक संचालक श्री. भुजंग खंदारे म्हणाले, खेळामुळे आयुष्याला एक शिस्त येते. हारणे, जिंकणे हा खेळाचा विषय आहे. पण प्रत्येकाने स्वत:च्या ‘फिटनेस’साठी खेळलेच पाहिजे. महावितरणमध्ये येत्या काळात खेळासाठी स्वतंत्र धोरण आणावे अशी आग्रही मागणीही श्री. खंदारे यांनी केली. तर खेळाडुंनी फक्त तयारी करावी, त्यांना जास्तीत जास्त सुविधा देण्यासाठी कटिबद्ध असल्याची ग्वाही मुख्य अभियंता श्री. सुनिल काकडे व श्री. धर्मराज पेठकर यांनी दिली.

भारताच्या खो-खो संघाचा कर्णधार तथा महावितणचा खेळाडू प्रतिक वायकर, अजय चव्हाण व अनिता कुलकर्णी या खेळाडुंनी प्रातिनिधिक मनोगत व्यक्त केले. पुणे-बारामती संघाच्या विजयासाठी प्रयत्न करणारे उपमुख्य औद्योगिक संबंध अधिकारी श्री. भुपेंद्र वाघमारे व श्री. श्रीकृष्ण वायदंडे यांचाही सत्कार यावेळी करण्यात आला.