लातूर – काय खायचं ते खाऊन घ्या, काय प्यायचं ते पिऊन घ्या. हरामाचा माल गरिबांकडे येण्याची हीच वेळ आहे. लक्ष्मीपूजनाअगोदरच लक्ष्मीदर्शनाचा योग आहे. काँग्रेस व राष्ट्रवादीने भ्रष्टाचारातून पैसा कमवला व जमवला असल्याने ते धन जरूर घ्या; पण मतदान भाजपच्या उमेदवारांना करा, असे वक्तव्य केंद्रीय रस्ते विकास मंत्री नितीन गडकरी यांनी निलंगा येथील सभेत केले. सोनिया गांधींवर टीका करताना त्यांची भाषा मात्र घसरली.
गडकरी म्हणाले, शेतक-यांच्या आत्महत्या ही राज्याची ओळख झाली आहे. राज्यावर ३ लाख कोटींचे कर्ज आहे. ७० हजार कोटींचा खर्च होऊन सिंचनाऐवजी मंत्र्यांचे खिसे ओले झाले.सोनिया आयी हे, रोशनी लायी है, असा नारा देणारी सोनियाही गेली व रोशनीही गेली आहे, अशी टीका नितीन गडकरी यांनी या वेळी केली सरकार आणा, राज्य लोडशेडिंगमुक्त करू २४ तास वीज देऊ. खताच्या किमती ५० टक्क्यांनी कमी करू. २५ लाख बेकारांना कौशल्य विकास प्रशिक्षण देऊ, असे आश्वासन गडकरी यांनी दिले.

नवी दिल्ली- पंतप्रधान नरेंद्र मोदी यांचा नुकताच पार पडलेला अमेरिका दौरा अपयशी ठरल्याचे रान विरोधी पक्षांनी उठवले असले, तरी . या दौऱ्यातील अधिकृत सूत्रांनी मात्र मोदी अमेरिकेतील गुंतवणूकदारांना आकर्षित करण्यात कमालीचे यशस्वी ठरले आहेत. या दौऱ्याचे फलित म्हणजे आगामी तीन वर्षात देशात ४१ अब्ज डॉलरची गुंतवणूक होणार आहे.असा दावा केला आहे
साधारणतः नऊ वर्षांपूर्वी (२००५मध्ये) अमेरिकेने मोदी यांचा व्हिसा नाकारला होता. या मुद्यावर अमेरिकेचे अध्यक्ष बराक ओबामा आणि मोदी यांच्यात एका शब्दाचीही चर्चा झाली नाही. किंबहुना कोणत्याही चर्चेत हा विषय पुढेही आला नाही,’ अशी माहिती सरकारी सूत्रांनी दिली. शिवाय मोदी यांची ही भेट दोन्ही देशांतील सर्व समीकरणे बदलवणारी ठरल्याचेही सूत्रांनी स्पष्ट केले. ‘हा दौरा दोन्ही देशांतील द्विपक्षीय संबंध वेगळ्या आणि वरच्या पातळीवर नेऊन ठेवणारा राहिला,’ असेही सूत्रांनी नमूद केले.
मोदींचा हा दौर पार पडल्यानंतर ‘यूएस इंडिया बिझनेस कौन्सिल’ने (यूएसआयबीसी) आगामी तीन वर्षांत अमेरिका भारतात ४१ अब्ज डॉलरची गुंतवणूक करणार असल्याचे जाहीर केले. ‘यूएसआयबीसी’च्या या घोषणेचे ‘फिक्की’नेही स्वागत केले असून, त्यामुळे देशाच्या विकासाला गती आणि प्रोत्साहन मिळणार आहे. तसेच, भारत मॅन्युफॅक्चरिंग हब म्हणून विकसित होण्याकडे हे पहिले पाऊल असल्याचेही ‘फिक्की’ने म्हटले आहे.
अमेरिकेकडून झालेली गुंतवणुकीची घोषणा त्यांच्याकडून अपेक्षित असणाऱ्या गुंतवणुकीच्या केवळ २० टक्केच आहे. केंद्रातील स्थिर सरकार आणि गुजरातप्रमाणेच देशाचा कायापालट घडविण्याची मोदींची असलेली क्षमता अमेरिका जाणून आहे. त्याचमुळे मोदींचे अमेरिकेत जोरदार स्वागत झाले. अनेक उद्योगपती आणि गुंतवणूकदारांनी मोदींची भेट घेतली आणि भारतात गुंतवणुकीची इच्छाही प्रदर्शित केली. ‘यूएसआयबीसी’च्या सदस्यांशी झालेल्या चर्चेत त्यांनी आगामी तीन वर्षांमध्ये ४१ अब्ज डॉलरच्या गुंतवणुकीची मोदींना ग्वाही दिली.
मोदी आणि ओबामा यांच्यात झालेल्या अनौपचारिक गप्पांमध्ये केवळ तंत्रज्ञानावर आधारीत विषय आणि निवडणूक मोहिमांविषयीच चर्चा झाल्याचे सूत्रांचे म्हणणे आहे. दोन्ही दे

सांगली : काँग्रेस-राष्ट्रवादीच्या लुटारू टोळीने राज्याला व देशाला अनेक वर्षांपासून लुटले आहे. छत्रपती शिवाजी महाराजांच्या दूरदृष्टीच्या योजना न राबवणार्‍या राज्य शासनाला शिवाजी महाराजांचे नाव घेण्याचा कोणताही अधिकार नाही, असे प्रतिपादन पंतप्रधान नरेंद्र मोदी यांनी रविवारी येथे केले. गुजरात हा महाराष्ट्राचा छोटा भाऊ असून देशाच्या अखंडता, एकतेसाठी राज्या-राज्यांत फूट पाडणार्‍यांना हद्दपार करा, छत्रपती शिवाजी महाराजांच्या स्वप्नातील महाराष्ट्र निर्माण करण्यासाठी भाजपा उमेदवारांना बहुमताने विजयी करण्याचे आवाहन मोदी यांनी केले.महाराष्ट्रात ही पहिलीच निवडणूक भाजपा स्वतंत्रपणे लढत आहे. त्यामुळे आमची भाजपा-शिवसेना युती तुटली आहे; पण स्व. बाळासाहेब ठाकरे यांच्याबद्दल मला अतिशय आदर, श्रद्धा आहे. बाळासाहेबांनी अतिशय कष्टाने सेनेची स्थापना केली आहे. त्या वेळी अनेकांच्या टीकाही त्यांनी सहन केल्या आहेत. त्यांनी आपले आयुष्य शिवसेनेसाठी सर्मपित केले आहे. त्यांच्या संकल्प शक्तीचा मी आदर करतो. त्यामुळे मी निर्णय घेतला आहे की या निवडणुकीत शिवसेनेवर टीका करणार नाही. त्यांच्यावर टीका न करणे हीच माझी त्यांना आदरांजली ठरेल. मी प्रत्येक गोष्टीत राजकारण आणत नाही. काही तत्त्वे असतात. त्यामुळेच मी शिवसेनेवर टीका करत नाही, असे स्पष्टीकरण या वेळी नरेंद्र मोदी यांनी तासगाव येथील सभेत दिले.

नाशिक / नांदगाव : राज्यात पंतप्रधान नरेंद्र मोदी व राष्ट्रवादी, काँग्रेस यांच्यात आरोप-प्रत्यारोपांच्या फैरी सुरू असताना काँग्रेसनेही मोदींवर जोरदार टीकास्त्र सोडले. मुख्यमंत्रिपदासाठी भाजपकडे चेहरा नसून, मोदींच्या करिष्म्यावरच राज्यातील भाजप अवलंबून असल्याचा आरोप माजी मुख्यमंत्री पृथ्वीराज चव्हाण यांनी करत मोदींच्या कितीही सभा घ्या, तरीही काही फरक पडणार नसल्याचे चव्हाण यांनी सांगितले. स्वबळावर येणार नसल्याने भाजपने युतीची भाषा सुरू केल्याचा आरोपही त्यांनी यावेळी केला.
काँग्रेसच्या प्रचारार्थ माजी मुख्यमंत्री चव्हाण यांच्या आज (दि.५) जिल्ह्यात हरसूल आणि नांदगाव येथे सभा झाल्या. इगतपुरी विधानसभा मतदारसंघाच्या उमेदवार निर्मला गावित यांच्या प्रचारार्थ हरसूल येथे झालेल्या सभेत चव्हाण बोलत होते. मोदींच्या आडून नितीन गडकरी, देवेंद्र फडणवीस मुख्यमंत्रिपदाचे स्वप्न बघत आहे. यांना काय आदिवासी, शेतकर्‍यांचे दु:ख कळणार, असा सवाल उपस्थित करीत मोदींच्या सभा होतील, ते भुरळ पाडतील, यावर राज्यातील भाजप अवंलबून आहे; मात्र मोदींच्या सभांना भुलायला जनता खुळी नाही. स्वबळावर येणार नसल्याची जाणीव झाल्याने गडकरींनी युतीची भाषा सुरू केली आहे. मुंबईचे उद्योग अहमदाबाद येथे नेऊन मुंबईचे महत्त्व कमी करण्याचा मोदींचा डाव असल्याचा आरोप चव्हाण यांनी यावेळी केला. निवडणुकांच्या तोंडावर राष्ट्रवादीने राज्यात राष्ट्रपती राजवट लावून भाजपला अप्रत्यक्ष सत्ता दिली आहे, याचा जाब जनतेने राष्ट्रवादीला विचारावा, असेही चव्हाण यांनी सांगितले. खिचडी सरकार येण्यापेक्षा काँग्रेसला एकहाती सत्ता देण्याचे आवाहन त्यांनी यावेळी केले.
सभेला प्रदेश सरचिटणीस रमेश श्रीखंडे, माजी आ. निर्मला गावित, जिल्हाध्यक्ष राजाराम पानगव्हाणे, जिल्हा परिषदेचे माजी उपाध्यक्ष संपतराव सकाळे आदी उपस्थित होते.

मुंबई – दिल्ली ज्याचे ऐकेल आणि दिल्लीचे ऐकेल असे सरकार दिले तरच महाराष्ट्राचा विकास येईल महाराष्ट्राच्या विकासासाठी दिल्लीत ज्यांचे सरकार आहे, त्या भाजपचेच राज्यातही सरकार निवडून देणे आवश्यक आहे. स्पष्ट बहुमत जनतेने द्यावे. यावेळी थोडेसे चुकलात तर `त्यांना’ जी नशा चढेल त्यात संपूर्ण देश बरबाद होईल असा इशारा पंतप्रधान नरेंद्र मोदी यांनीमुंबईतील सभेतून महाराष्ट्राला दिला.
ज बरदस्तीने घर रिकामे करणे, प्लॉट खाली करणे, गरीबांच्या झोपड्यांवर कब्जा करणे अशा प्रवृत्तींपासून मुंबईकरांना मुक्तता देण्याचे आश्वासन त्यांनी दिले. काँग्रेसचे मित्र केवळ आपल्यावर टीका करण्यात धन्यता मानतात. कदाचित पाच महिन्यांपूर्वीचा अनुभव ते विसरले असावेत. माझ्यावर जेवढी टीका कराल तेवढे सणसणीत उत्तर जनता तुम्हाला देईल, असा इशाराच पंतप्रधान नरेंद्र मोदी यांनी शनिवारी टीकाकारांना दिला.
या राज्यात दरवर्षी ३ हजार ७०० शेतकरी आत्महत्या करीत असताना, गेल्या सरकारमधील कृषी मंत्री काय करीत होते, अशी टीका त्यांनी शरद पवार यांचे नाव न घेता केली. महाराष्ट्र हे उत्तर प्रदेशनंतर सर्वाधिक जातीय दंगे होणारे राज्य असल्याची टीकाही त्यांनी केली. १५ वर्षांत सर्वात जास्त दहशतवादी घटना या राज्यात घडल्या. सर्वात अधिक ​जीवितहानी येथे झाली. मात्र किती गुन्हेगारांना शिक्षा मिळाली. कधी मुख्यमंत्री तर कधी गृहमंत्री बदलून जनतेला न्याय कसा मिळणार, असा सवाल त्यांनी केला.
६० वर्षे राज्य करणारे आपल्याकडे ६० दिवसांचा हिशेब मागत आहेत. मी छोटा माणूस आहे. मी छोट्या माणसांसाठी छोटी-छोटी कामे करीन, असे सांगून देशातील प्रत्येक गरीब नागरिकांसाठी बँकेत खाते उघडण्याच्या कामाचा त्यांनी उल्लेख केला. शून्य पैशात खाते उघडता येणार असून, माझ्या इमानदार पाच कोटी गरीब कुटुंबांनी तीन हजार कोटी रुपये जमा केल्याचे मोदी यांनी सांगितले. कैलास मानसरोवर यात्रेसाठी अत्यंत अवघड मार्गाने जावे लागत असे. चीनच्या राष्ट्रपतींशी बोलून सर्व वयोगटातील यात्रेकरूंना मोटारीने जाता येईल असा मार्ग उपलब्ध करून घेतल्याचे मोदी म्हणाले. देशाला मलेरिया, डेंग्यू आणि टीबीपासून मुक्त करण्यासाठी अमेरिकेबरोबर औैषध संशोधनाचा करार केल्याची माहिती पंतप्रधानांनी दिली.
झोपडीधारकांच्या आयुष्याचे कायापालट करण्याचे आपले स्वप्न आहे. देशाच्या स्वातंत्र्याच्या अमृतमहोत्सवी वर्षात १५ ऑगस्ट २०२२ रोजी प्रत्येक झोपडीधारकाला हक्काचे, राहण्यायोग्य व सर्व नागरी सुविधा असलेले निवास देण्याचा संकल्प मोदी यांनी सोडला. मुंबईत चांगल्या दर्जाची मेट्रो आमचे सरकार आणेल, नवी मुंबईतील एअरपोर्टचे काम मार्गी लावून त्याचे उद्घाटन आमच्या कार्यकाळात होईल. सागरी सेतू पूर्ण करू. खासगीकरणाद्वारे मुंबईतील उपनगरी लोकल सेवा उच्च दर्जाची करू, असा विश्वास त्यांनी व्यक्त केला.
याप्रसंगी केंद्रीय मंत्री नितीन गडकरी, भाजप प्रदेशाध्यक्ष देवेंद्र फडणवीस यांची भाषणे झाली. व्यासपीठावर मुंबईतील ३६ विधानसभा मतदारसंघातील भाजपचे उमेदवार होते.

दसरा मेळाव्याच्या निमित्ताने राष्ट्रीय स्वयंसेवक संघप्रमुखांचे भाषण थेट प्रक्षेपित करून या सरकारने खरा चेहरा दाखविण्यास सुरवात केली आहे. संघप्रमुखांचा कार्यक्रम ज्या दिवशी नागपुरात झाला. त्याच दिवशी नागपूरमध्ये धम्मप्रवर्तन दिनानिमित्त दीक्षाभूमीवर लाखो आंबेडकरी जनता एकत्र आली होती. संघप्रमुखांच्या कार्यक्रमाचे थेट प्रक्षेपण करणाऱ्या केंद्र सरकारला धम्मप्रवर्तन दिनाचे प्रक्षेपण करता आले नाही, यावरून हे सरकार कोणत्या दिशेने आणि विचाराने पुढे जाणार हे वेगळे सांगायला नको. या परिस्थितीत आता अधिक जागृत राहण्याची गरज आहे. समतेच्या विचाराला बांधील राहून महिला व दलितांना शक्ती देणारा पुरोगामी महाराष्ट्र घडवण्यास राष्ट्रवादी कॉंग्रेस बांधील आहे.‘‘ असे प्रतिपादन राष्ट्रवादी कॉंग्रेसचे अध्यक्ष शरद पवार यांनी येथे केले
पुणे शहर, पिंपरी व जिल्ह्यातील पक्षाच्या उमेदवारांच्या प्रचाराचा प्रारंभ आज पवार यांच्या हस्ते झाला. या वेळी पवार बोलत होते. पक्षाचे प्रदेशाध्यक्ष सुनील तटकरे, माजी उपमुख्यमंत्री अजित पवार, पक्षाच्या शहराध्यक्ष वंदना चव्हाण, महापौर दत्ता धनकवडे, पिंपरीच्या महापौर शकुंतला धराडे यांच्यासह राष्ट्रवादी कॉंग्रेसचे नेते व पदाधिकारी उपस्थित होते. पवार यांनी आपल्या भाषणात पंतप्रधान मोदी व भाजपच्या कारभारावर टीका केली. ते म्हणाले, पंतप्रधान नरेंद्र मोदी आणि भारतीय जनता पक्ष यांच्या लोकप्रियतेला ओहोटी लागली आहे. शेतमालाच्या निर्यातीला बंदी घालून या सरकारने शेतकऱ्यांचे संसार उद्‌ध्वस्त करण्याचे काम केले आहे. याच कारणाने उत्तर प्रदेशात झालेल्या पोटनिवडणुकीत तेथील ग्रामीण जनतेने भाजपला त्यांची जागा दाखवून दिली, अशी टीका राष्ट्रवादी कॉंग्रेसचे अध्यक्ष शरद पवार यांनी शनिवारी केली.
‘भाजपच्या विजयात उत्तर प्रदेशचा वाटा मोठा होता. मात्र, लगेचच झालेल्या पोटनिवडणुकीत उत्तर प्रदेशातील नऊपैकी आठ ठिकाणी भाजपला पराभव पत्करावा लागला. एक राजकीय अभ्यासक म्हणून उत्तर प्रदेशचा दौरा केला. या दौऱ्यात तेथील शेतकऱ्यांत या सरकारच्या विरोधातील चीड दिसली. शेतमाल निर्यातीला बंदी घालून शेतकऱ्यांचे मोठे नुकसान केले. त्यातून हजारो शेतकऱ्यांचे संसार उद्‌ध्वस्त झाले.‘‘
शिवसेनेविषयी बोलताना ते म्हणाले, ‘बाळासाहेब ठाकरे यांनी शिवसेनेसारखी स्वाभिमानी संघटना उभी केली. त्यामुळे शिवसेना भाजपपासून वेगळे झाल्याचे समाधान आहे. बाळासाहेब ठाकरे यांचाही भाजपवर कधीही विश्‍वास नव्हता. “कमळाबाई‘ या नावानेच ते भाजपचा नेहमी उल्लेख करीत होते. युती एका बरोबर नजर दुसऱ्या पक्षावर अशी भाजपची कायमची नीती आहे. केंद्रात सत्ता आल्यानंतर या पक्षाकडून लोकांच्या खूप अपेक्षा होत्या. मात्र अल्पावधीतच त्यास ओहोटी लागली आहे.‘‘ कोणताही पक्ष मोठा होण्यासाठी वेळोवेळी पक्षात नव्या पिढीला संधी दिली पाहिजे. 47 वर्षांपूर्वी यशवंतराव चव्हाण यांनी माझ्यासारख्या नवख्या तरुणाला संधी दिली. त्याचप्रमाणे या निवडणुकीच्या निमित्ताने राज्यात अनेक ठिकाणी नव्या चेहऱ्यांना संधी दिली आहे, असे पवार यांनी सांगितले.

आमची मुंबई – शिवसेनेची मुंबई अशा ब्रीदावल्या शिवसेनेचे सरसेनापती बाळासाहेब ठाकरे यांच्या कारकिर्दीतील ;पण ज्या आजतागायत संस्मरणीय मानल्या जात आहेत अशी मुंबई आता कोणाची ? शिवसेनेची कि भाजपाची ? कि अन्य सर्वपक्षीयांची ? असे प्रश्न राजकीय समीक्षकांच्या मनात घोंगावू लागले आहेत .
मुंबईतील 36 पैकी 13 विधानसभा मतदारसंघात गुजराती मतदारांचे वर्चस्व आहे, मुंबईतील सुमारे ३५ लाख गुजराती समाजाच्या लोकसंख्येत १५ लाख मतदार आहेत . भाजप पक्ष आता गुजरातचे अमित शहा आणि नरेंद्र मोदी यांच्या हाती गेल्याचे मानले जाते . आणि भाजप आता शिवसेनेसोबत राहिलेला नाही या पार्श्वभूमीवर या मतदारांना आता भाजप – सेना – मनसे – काँग्रेस – राष्ट्रवादी असे पर्याय खुले आहेत हे सारे एकगठ्ठा मतदान असेल कि यातही विभागणी असेल याकडे आता राजकीय समीक्षकांचे लक्ष लागून राहणार आहे त्यामुळे मुंबई आता बहुमताने कोणी एकटाच राजकीय पक्ष जिंकणार कि मुंबईच विविध पक्षांना सामावून घेणार ?हे आता निवडणुकीच्या निकालानंतरच स्पष्ट होणार आहे . अर्थात कोणत्याही एका किंवा अनेक पक्षाच्या नेतृत्वाखाली मुंबई त विधानसभेचे चित्र झळकले तरी ते संपूर्ण महाराष्ट्राचे प्रतिबिंब असेल असे मानले जात आहे .
मुंबईत एकून विधानसभेचे 36 मतदारसंघ आहेत. 36 जागांवर एकून 520 उमेदवार उभे राहिले आहेत. यात मुंबई शहरात मोडणा-या 10 विधानसभा मतदारसंघात एकून 139 उमेदवार उभे आहेत. तर, मुंबई पश्चिम व पूर्व उपनगरातील 26 जागांवर 381 उमेदवार रिंगणात आहेत. दहिसर, बोरीवली, कांदिवली, चारकोप, मालाड-पश्चिम, गोरेगाव, विलेपार्ले, मुलुंड, घाटकोपर-पूर्व, घाटकोपर-पश्चिम, मलबार हिल, मुंबादेवी, कुलाबा या 13 मतदारसंघात गुजराती मतदार निर्णायंक भूमिका बजावतील
बोरीवलीतून विनोद तावडे (भाजपा), अशोक सूत्राले (काँग्रेस), बलबीर सिंह (राष्ट्रवादी), उत्तमप्रकाश अग्रवाल (शिवसेना) आणि नयन कदम (मनसे) उभे आहेत.
विलेपार्लेमधून काँग्रेसचे आमदार कृष्णा हेगडे, माजी नगरसेवक पराग आळवणी (भाजपा), शशिकांत पाटकर (शिवसेना) आणि सुहास शिंदे (मनसे) हे नशिब अजमावत आहेत.
घाटकोपर-पूर्व मतदारसंघात विद्यमान आमदार प्रकाश मेहता (भाजपा), प्रविण छेड़ा (काँग्रेस), राखी जाधव (राष्ट्रवादी), जगदीश चौधरी (शिवसेना) आणि सतिश नारकर (मनसे) आदी उमेदवार आहेत.
घाटकोपर-पश्चिम मतदारसंघात विद्यमान आमदार राम कदम (भाजपा), सुधीर मोरे (शिवसेना), दिलीप लांडे (मनसे), हारुन खान (राष्ट्रवादी) आणि रामगोविंद यादव (काँग्रेस) मैदानात आहेत.दहिसरमध्ये विद्यमान आमदार विनोद घोसाळकर (शिवसेना), नगरसेविका शीतल म्हात्रे (काँग्रेस), नगरसेविका मनीषा चौधरी (भाजपा), पूर्व महापौर डॉ. शुभा राऊळ (मनसे) आणि हरिश शेट्‌टी (राष्ट्रवादी) निवडणूक लढवित आहेत.
मुंबईतील मराठी मतदारांमध्ये सुरुवातीच्या काळात शिवसेनेबद्दल मोठ्या प्रमाणावर सहानुभूती तयार झाली होती. आजही ही सहानुभूती मोठ्या प्रमाणावर टिकून असली तरी पंतप्रधान नरेंद्र मोदींच्या सभेनंतर काही प्रमाणात तरी मराठी मतदार भाजपकडे वळतील, असे भाजपच्या नेत्यांचे म्हणणे आहे. तसे झाल्यास मराठी मतदार किती मोठ्या संख्येने भाजपकडे वळतात, यावर बरेच गणित अवलंबून असेल. तसेच मराठी मतांमध्ये मनसेचा वाटा राहणारच असल्यामुळे शिवसेनेला एक गठ्ठा मराठी मते पडतील का, असा सवाल भाजपचे नेते करत आहेत. याउलट गुजराती मतदार मात्र एकसंधपणे भाजपच्या बाजूने उभा असल्याचा भाजप नेत्यांचा दावा आहे.
प्रत्येक मतदारसंघात ३० ते ४० टक्के मराठी मतांचा वाटा असल्याने मुंबईतील सर्वत्रच शिवसेना विरुद्ध इतर असाच सामना पाहण्यास मिळू शकतो, असे ज्येष्ठ सेना नेत्यांचे म्हणणे आहे. मोदींच्या कितीही सभा घेतल्या तरी महायुतीत मिठाचा खडा टाकण्याचे काम मोदींचे उजवे हात समजल्या जाणाऱ्या अमित शहा यांनीच केल्यामुळे त्यांच्या आवाहनालाही मराठी मतदार भूलणार नाहीत, असे शिवसेना नेत्यांचे म्हणणे आहे.
दरम्यान युती तुटल्याने मराठी-अमराठी मतांचे विभाजन होईल, असे चित्र उभे केले जात आहे. पण मुंबईसह राज्यातील अमराठीही मोठ्या संख्येने शिवसेनेसोबत आहेत. . महाराष्ट्राचे सरकार दिल्लीतून नाही राज्यातून चालेल, असे शिवसेनेचे नेते आणि प्रवक्ते संजय राऊत यांनी रत्नागिरी मध्ये म्हटले आहे . रत्नागिरीमध्ये झालेल्या शिवसेनेच्या कार्यकर्ता मेळाव्यानंतर ते पत्रकारांशी बोलत होते, भाजपने महाराष्ट्र तोडण्याचे स्वप्न बाळगून युती तोडली आहे. पण त्यांचे हे स्वप्न शिवसेना कधीही पूर्ण होऊ देणार नाही, असे राऊत यांनी सांगितले.
भाजपने युती का तोडली, कोणासाठी तोडली याची उत्तरे महाराष्ट्राला मिळायलाच हवीत. ती जो पर्यंत मिळणार नाहीत, तोपर्यंत पुन्हा युती होणार नाही. २५ वर्षाची जुनी युती तोडणा-यांना आम्ही भांडी घासायला लावू, अशा शब्दात शिवसेनेचे नेते आणि प्रवक्ते संजय राऊत यांनी भाजपला धारेवर धरले.