पुणे, दि. २५: महाराष्ट्र राज्य परीक्षा परिषदेमार्फत रविवार २३ नोव्हेंबर २०२५ रोजी घेण्यात आलेल्या शिक्षक पात्रता परीक्षेचे नियंत्रण राज्य नियंत्रण कक्ष, जिल्हा नियंत्रण कक्ष, जिल्हा आयोजन व सनियंत्रण समिती कक्षाकडून अतिशय काटेकोरपणे करण्यात आले असून ‘‘टीईटी’ चा पेपर ३ लाखांत! शिक्षकांची टोळीच जेरबंद’ या आशयाच्या वृत्तामध्ये तथ्य नसल्याचे आयुक्त अनुराधा ओक यांनी स्पष्ट केले आहे.

दैनिक लोकमत वृत्तपत्राच्या 24 नोव्हेंबर रोजीच्या अंकात प्रसिद्ध झालेल्या वृत्ताच्या अनुषंगाने परिषदेकडून हे स्पष्टीकरण देण्यात आले आहे. त्यात नमूद करण्यात आले आहे की, महाराष्ट्र राज्य परीक्षा परिषदेत गोपनीयरित्या प्रश्नसंच तयार करून तज्ञांमार्फत स्वतंत्र पाकिटात सीलबंद केले जातात. तयार केलेल्या संचांपैकी यादृच्छिकपणे प्रश्नसंच निवडून गोपनीय मुद्रणालयाकडे दिला जातो. गोपनीय मुद्रणालयामार्फत प्रश्नपत्रिका छापून वर्गखोलीनुसार पाकिटे तयार करून केंद्रनिहाय बॉक्समध्ये सिलबंद पॅकिंग केले जाते. सदर बॉक्सेस सिलबंद गाड्यांमार्फत जिल्हा कस्टडीमध्ये पाठविले जातात. जिल्ह्यांच्या ठिकाणी प्रश्नपत्रिकांची कस्टडी ही शक्यतो जिल्हा कोषागार कार्यालय असते अथवा सी.सी.टी.व्ही. व हत्यारबंद पोलिस बंदोबस्त असलेल्या ठिकाणी असते. गोपनीय मुद्रणालयाकडून आलेल्या प्रश्नपत्रिकांचे बॉक्स हे सिलबंद गाडीतून आले असल्याची व बॉक्सेस व्यवस्थित सिलबंद असल्याची खातरजमा करूनच जिल्हा परीरक्षक व शिक्षणाधिकारी (प्राथमिक) याच्या उपस्थितीत, कस्टडीमध्ये सदर साहित्य घेतले जाते.

परीक्षेच्या दिवशी जिल्हा परीरक्षक व शिक्षणाधिकारी (प्राथमिक) यांच्या उपस्थितीत व्हिडीओ रेकॉर्डिंग (चित्रीकरण) करूनच झोनल ऑफिसरकडे केंद्रनिहाय प्रश्न पत्रिकांचे बॉक्स दिले जातात. झोनल ऑफिसर कस्टडी ते केंद्रावर सदर बॉक्सेस पोहोच करतांना या प्रवासाचेही चित्रिकरण केले जाते. केंद्रावर सदर बॉक्सेस मधून प्रश्नपत्रिकांची ब्लॉक निहाय पाकिटे काढून, ब्लॉकमध्ये सिलबंद पाकिटे वाटली जातात. उमेदवारांच्या, परीक्षार्थीच्या समोर सदर पाकिटे उघडली जातात. याच पद्धतीने या परीक्षेच्यावेळीही कार्यवाही झालेली आहे.

राज्यभरातून कोणत्याही ठिकाणाहून प्रश्नपत्रिकांची गाडी सिलबंद नसल्याबाबत अथवा गोपनीय प्रश्नपत्रिकांचे बॉक्सेस अथवा पाकिटे सिलबंद नसल्याची तक्रार प्राप्त झालेली नाही. अथवा असे निदर्शनास आले नाही. म्हणजेच गोपनीय मुद्रणालय ते परीक्षा केंद्र हा प्रश्नपत्रिकांचा प्रवास अत्यंत काटेकोरपणे झालेला दिसून येत आहे. या कोल्हापूर प्रकरणाच्या पार्श्वभूमीवर महाराष्ट्र राज्य परीक्षा परिषदेचे कामकाज उपरोक्त नमूद कार्यपद्धतीनुसार झाल्याने महाराष्ट्र राज्य परीक्षा परिषदेचा या प्रकरणाशी संबंध नाही, असेही श्रीमती ओक यांनी स्पष्ट केले आहे.

पुणे, दि. २५ : महाराष्ट्र राज्य परीक्षा परिषदेमार्फत घेण्यात येणाऱ्या प्राथमिक (इयत्ता ५ वी) व माध्यमिक (इयत्ता ८ वी) शिष्यवृत्ती परीक्षेच्या तारखेत बदल करण्यात आला असून आता ही परीक्षा २२ फेब्रुवारी २०२६ रोजी राज्यातील सर्व जिल्ह्यांमध्ये एकाच दिवशी घेण्यात येणार आहे.

दिनांक ८ फेब्रुवारी २०२६ रोजी होणाऱ्या केंद्रीय शिक्षक पात्रता परीक्षेला राज्यातील अनेक प्राथमिक व माध्यमिक शिक्षक प्रविष्ठ झालेले असल्याने शिष्यवृत्ती परीक्षेच्या तारखेत बदल करण्यात आला आहे. याची सर्व संबंधितांनी नोंद घ्यावी, असे महाराष्ट्र परीक्षा परिषदेमार्फत कळविण्यात आले आहे.

पुणे : सिद्धगुरुवर श्री सिद्धेश्वर ब्रह्मर्षी गुरुदेव हे तब्बल 68 दिवसांच्या महासाधने नंतर आपले दिव्य आशीर्वाद देण्यासाठी प्रथम पुण्यात येत आहेत. त्यांच्या सिद्धी साधनेच्या महाआशीर्वादाचा लाभ पुणेकरांना मिळावा यासाठी विश्व धर्म चेतना मंच,पुणे, पीसीएमसी परिवार यांच्या वतीने ‘सिद्धी साधनेचा महाआशीर्वाद’ या सोहळ्याचे आयोजन करण्यात आले आहे. हा सोहळा येत्या 29 नोव्हेंबर रोजी शनिवारी सायंकाळी 5 वाजता, वर्धमान सांस्कृतिक केंद्र, गंगाधाम, कोंढवा रोड, बिबवेवाडी, पुणे येथे होणार आहे, अशी माहिती आयोजक उत्तम बाठिया व सुमित चंगेडिया यांनी दिली आहे.

यावेळी सिद्धगुरुवर श्री सिद्धेश्वर ब्रह्मर्षी गुरूदेव यांचे व्याख्यान देखील होणार आहे. या सोहळ्यात सहभागी होण्यासाठी मोफत पासची व्यवस्था करण्यात आली असून ते कार्यक्रमस्थळी (स्वागत कक्ष येथे )दिले जाणार आहेत. या दिव्य सोहळ्याचा जास्तीत जास्त पुणेकरांनी लाभ घ्यावा, असे आवाहन आयोजकांच्या वतीने करण्यात आले.

साहित्यप्रेमी भगिनी मंडळाच्या हीरक महोत्सवी वर्षाची होणार सांगता

पुणे : स्त्रियांच्या साहित्यावर सातत्याने अभ्यास करणारी साहित्यिक व सांस्कृतिक संस्था असा लौकिक संपादन केलेल्या साहित्यप्रेमी भगिनी मंडळ या संस्थेच्या हीरक महोत्सवी वर्षाची सांगता 41व्या स्त्री साहित्य संमेलनाने होत आहे. संमेलन रविवार, दि. 30 नोव्हेंबर 2025 रोजी पुण्यात आयोजित करण्यात आले आहे. संमेलनाचे अध्यक्षस्थान हिंदी साहित्य अकादमी पुरस्काराने सन्मानित प्रसिद्ध कवयित्री, समीक्षक, विचारवंत डॉ. सविता सिंह भूषविणार आहेत.

संमेलन सकाळी 9 ते सायंकाळी 5 या कालावधीत मराठा चेंबर ऑफ कॉमर्स ॲण्ड इंडस्ट्रीज, टिळक रोड येथे आयोजित करण्यात आले आहे, अशी माहिती साहित्यप्रेमी भगिनी मंडळाच्या, ज्येष्ठ कवयित्री अध्यक्ष अंजली कुलकर्णी व कार्यवाह शलाका माटे यांनी निवेदनाद्वारे कळविली आहे.

संमेलनाचे उद्घाटन मराठवाडा मित्र मंडळ संस्थेचे कार्याध्यक्ष प्राचार्य भाऊसाहेब जाधव यांच्या हस्ते होणार असून ज्येष्ठ अनुवादक डॉ. उमा कुलकर्णी यांची प्रमुख उपस्थिती असणार आहे. साहित्य अकादमी पुरस्कारप्राप्त लेखिकांच्या कलाकृतींचा रसास्वाद मांडणाऱ्या ‌‘सप्तधारा‌’ या ग्रंथाचे प्रकाशन साहित्यप्रेमी भगिनी मंडळाचा संशोधन विभाग व संस्कृती प्रकाशन यांच्या संयुक्त विद्यमाने होणार आहे. या वेळी ज्येष्ठ लेखिकांचे प्रातिनिधीक सत्कार तसेच वार्षिक पुरस्कारांचे वितरण होणार आहे.

दुसऱ्या सत्रात प्राचार्य डॉ. हे. वि. इनामदार यांच्या जन्मशताब्दीनिमित्त ‌‘कृत्रिम बुद्धिमत्ता आणि मानवी जीवन‌’ या विषयावर परिसंवाद आयोजित करण्यात आला असून यात डॉ. दीपक शिकारपूर आणि डॉ. सुजाता महाजन यांचा सहभाग असणार आहे. त्यांच्याशी डॉ. प्रांजली देशपांडे संवाद साधणार आहेत.

प्रबंध एकादशी समिती पुरस्कृत डॉ. ह. वि. सरदेसाई पुरस्काराने प्रा. डॉ. आशालता कांबळे यांना गौरविले जाणार आहे.

तिसऱ्या सत्रात ज्येष्ठ साहित्यप्रेमी भगिनींचा सत्कार करण्यात येणार आहे. त्यांनतर ज्येष्ठ लेखक, अभिनेते अभिराम भडकमकर यांच्या मुलाखतीचा कार्यक्रम आयोजित करण्यात आला असून त्यांच्याशी शैला मुकुंद संवाद साधणार आहेत.

‌‘गोष्टीवेल्हाळ तात्या‌’ या कार्यक्रमात ज्येष्ठ लेखक व्यंकटेश माडगुळकर यांच्या कथांचे अभिवाचन अक्षय वाटवे आणि सहकारी करणार आहेत. संमेलनाच्या समारोप समारंभास डॉ. कीर्ती मुळीक असणार आहेत.

संमेलन सर्वांसाठी खुले आहे.

डॉ. सविता सिंह यांच्याविषयी ..

डॉ. सविता सिंह यांनी दिल्ली विद्यापीठातून राज्यशास्त्रात एम.ए., एम.फिल., पी. एच.डी. केली आहे. मॉन्ट्रियाल (कॅनडा) येथील मॅकगिल विद्यापीठात त्यांनी साडेचार वर्षे संशोधन आणि अध्यापनाचे काम केले. ‌‘भारतात आधुनिकतेचा विमर्श‌’ हा त्यांच्या संशोधनाचा विषय होता. सध्या त्या इंदिरा गांधी राष्ट्रीय मुक्त विद्यापीठात प्रोफेसर आणि स्कूल ऑफ जेंडर अँड डेव्हलपमेंट स्टडीजच्या संस्थापक संचालक म्हणून कार्यरत आहेत. अमेरिकेच्या आंतरराष्ट्रीय हर्बर्ट मारक्यूस सोसायटीच्या संचालक मंडळाच्या सदस्या आणि को-चेअर आहेत.

प्रकाशित कविता संग्रह : अपने जैसा जीवन, नींद थी और रात थी, स्वप्न समय, खोई चीज़ों का शोक.

द्विभाषिक काव्यसंग्रह : रोविंग टुगेदर (इंग्रजी-हिंदी) आणि ज स्वी ला मेजों दे जेत्वाल (फ्रेंच-हिंदी).

राजकीय तत्त्वज्ञानाच्या क्षेत्रात रियलिटी अँड इट्स डेप्थ : ए कन्वर्सेशन बिटवीन सविता सिंह अँड रॉय भास्कर प्रकाशित.

आधुनिकता, भारतीय राजकीय सिद्धांत आणि भारतातील नारीवाद अशा विषयांवर तीन मोठ्या प्रकल्पांवर त्यांचे काम सुरू आहे.

पुरस्कार : हिंदी अकादमी आणि रजा फाउंडेशन व्यतिरिक्त महादेवी वर्मा पुरस्कार. युनिस डी सूजा अवॉर्ड आणि केदार सन्मान.

दी प्रोफेशनल रिअल्टर्स ऑफ पुणे (प्रॉप) वेल्फेअर असोसिशनच्याअध्यक्षपदी उदयन माने; सचिवपदी मनीष दीडमिसे

पुणे: बांधकाम क्षेत्रातील व्यावसायिकांच्या हितासाठी कार्यरत दी प्रोफेशनल रिअल्टर्स ऑफ पुणे (प्रॉप) वेल्फेअर असोसिएशनच्या अध्यक्षपदी उदयन माने, उपाध्यक्षपदी तनुज नगरानी व नीरज सिंग, सचिवपदी मनीष दीडमिसे, तर खजिनदारपदी मुरली रमणी यांची निवड झाली आहे. २०२५-२०२७ या कालावधीसाठी ‘प्रॉप’च्या नव्या कार्यकारिणीची निवड नुकतीच करण्यात आली.

नवीन कार्यकारिणीमध्ये संचालक म्हणून ऍड. महेश यादव (प्रॉप ग्रोथ), दिनेश राठी (प्रशिक्षण व मेंटरशिप सर्कल्स), विक्रम मलिक (बिझनेस एक्स्चेंज व क्रॉस सेल), सारंग मद्रेवार (क्रीडा व सांस्कृतिक कार्यक्रम), रवींद्र यादव (डिजिटल, पीआर व मीडिया) आणि प्रीत कोहली (इव्हेंट्स, एंगेजमेंट व नेटवर्किंग) यांची नियुक्ती झाली. मावळते अध्यक्ष दर्शन चावला, संस्थापक अध्यक्ष किशन मिलानी, खालिद मेनन सल्लागार मंडळात, तर ‘एनएआर इंडिया’चे चेअरमन रवी वर्मा मार्गदर्शक म्हणून कार्यरत राहतील.

उदयन माने म्हणाले, “पुणे आणि पिंपरी-चिंचवड परिसरातील रिअल इस्टेट व्यावसायिकांचे प्रतिनिधित्व करणारी ‘प्रॉप’ ही संस्था नॅशनल असोसिएशन ऑफ रिअल्टर्स-इंडियाशी संलग्नित आहे. पुणे हे बांधकाम क्षेत्रात झपाट्याने प्रगती करत असलेले शहर आहे. त्यामुळे रिअल इस्टेट व्यावसायिकांसाठी प्रशिक्षण कार्यक्रम, प्रमाणित सदस्यांची डायरी आणि घर खरेदी-विक्री प्रक्रियेत ग्राहकांना योग्य मार्गदर्शन मिळण्यासाठी जनजागृती सत्रांचा समावेश आहे. या उपक्रमामुळे विकसक, कायदा विशेषज्ञ आणि नियामक यांच्यातील समन्वय अधिक मजबूत होईल.”

‘प्रॉप’चे सर्व सदस्य ‘रेरा’ नोंदणीकृत असून त्यांनी ‘रेरा’ परीक्षाही उत्तीर्ण केली आहे. हे सर्व सदस्य विविध शहरांत रिअल इस्टेट सेवा देण्यास सक्षम आहेत. राष्ट्रीय व आंतरराष्ट्रीय स्तरावर सातत्याने मिळणाऱ्या प्रशिक्षणामुळे सदस्यांना जागतिक सर्वोत्तम पद्धतींची ओळख होते. तसेच ‘नरडेको’ आणि ‘क्रेडाई’ यांच्याशी असलेल्या द्विपक्षीय संलग्नतेमुळे उद्योगातील समन्वय आणि धोरणात्मक संवाद अधिक मजबूत झाला आहे, असेही उदयन माने यांनी नमूद केले.

‘प्रॉप’चे स्वतःचे प्रशिक्षण केंद्र असून, इंडियन इन्स्टिट्यूट ऑफ रिअल इस्टेटमार्फत (आयआयआरई) सदस्यांसाठी विशेष कौशल्य-वृद्धी कार्यक्रम राबवले जातात. ग्राहकांच्या तक्रारींचे वेळेवर व सुबद्ध निराकरण करण्यासाठी ‘प्रॉप’ने स्वतंत्र तक्रार निवारण यंत्रणा देखील विकसित केली आहे. पारदर्शक व्यवहार, माहितीपूर्ण ग्राहक व प्रशिक्षित रिअल इस्टेट सल्लागार तयार करण्यासह ग्राहकांचा विश्वास दृढ करणे हे आमचे प्रमुख उद्दिष्ट आहे,” असे दर्शन चावला यांनी सांगितले.

‘त्रिवेणी‌’ मैफलीतून साधला सुमधुर संगीत योग

ऋत्विक फाऊंडेशनतर्फे विशेष सांगीतिक मैफलीचे आयोजन

पुणे : हार्मोनिमय वादनातून साकारलेले नादमधुर सूर, रूद्र वीणेतून निर्मित झालेले धीरगंभीर स्वर आणि नादमाधुर्य दर्शविणारे बासरीचे सुमधुर गुंजन यातून एका अनोख्या संगीत योगाची पर्वणी रसिकांना मिळाली.

ऋत्विक फाऊंडेशन फॉर परफॉर्मिंग आर्टस्‌‍आयोजित ‌‘त्रिवेणी‌’ या विशेष सांगीतिक कार्यक्रमात हार्मोनियम वादक मिलिंद वासुदेव, भारतातील पहिल्या रुद्र वीणा वादक ज्योती हेगडे यांच्यासह प्रसिद्ध बासरी वादक पंडित राजेंद्र कुलकर्णी यांची सांगीतिक मैफल रंगली. ऋत्विक फाऊंडेशन फॉर परफॉर्मिंग आर्टस्‌‍ येथे या अनोख्या मैफलीचे आयोजन करण्यात आले होते.

मिलिंद वासुदेव यांनी हार्मोनियम वादनातून मधुवंती रागाचे माधुर्य साकारताना सुरुवातीस धृपद अंगाने आलाप, जोड आलाप आणि जोड झाला सादर करत मध्यलय रूपकमधील एक गत तसेच मध्यलय तीन तालातील एक गत घेऊन अतिद्रुत तीन तालामध्ये झाला सादर केला. या सादरीकरणात पारंपरिक पद्धतीची वाट न चोखाळता मिलिंद वासुदेव यांनी धामा या वाद्याबरोबर जोड आलाप आणि जोड झालाचे सादरीकरण रसिकांना विशेष भावले. त्यांना आशय कुलकर्णी (धामा आणि तबला), स्वरा किरपेकर (तानपुरा), नचिकेत हरिदास (स्वरमंडल) यांनी समर्पक साथसंगत केली.

भारतीय शास्त्रीय संगीत क्षेत्रातील पहिल्या रुद्र वीणा वादक म्हणून ख्याती प्राप्त विदुषी ज्योती हेगडे यांनी रुद्र वीणा या प्राचीन वाद्याचे वैशिष्ट्य सांगून वादनाची सुरुवात राग यमनने केली. त्यानंतर दुर्गा सादर केला. रुद्र वीणेतून साकारणाऱ्या धृपद शैलीच्या सूरांशी तादात्म्य होताना रसिकांना अद्‌भुत ध्यानावस्थेची अनुभूती आली. ज्योती हेगडे यांनी वीणा वादनाची सांगता चौतालमधील बंदिशीने केली. अनुजा बोरुडे-शिंदे यांनी पखवाजवर दमदार साथ करत मैफलीत रंग भरले.

विख्यात बासरी वादक पंडित राजेंद्र कुलकर्णी यांनी आपल्या बासरी वादनाची सुरुवात राग बागेश्रीने केली. सुरुवातीस पखवाजच्या साथीने त्यांनी तंत्रकारी अंगाने सुरेल बासरी वादन केले तर तबल्याच्या साथीने वादन करताना पंडित राजेंद्र कुलकर्णी यांनी गायकी अंगाने बासरी वादन करून दोन्ही शैलींवरील प्रभुत्व दर्शविले. बागेश्री रागाचे सौंदर्य उलगडताना पंडित राजेंद्र कुलकर्णी यांनी बडे गुलाम अली खान यांचे वैशिष्ट्य दर्शविणाऱ्या जागांचे मोहक दर्शन घडविले. कार्यक्रमाची सांगता करताना पंडित पन्नालाल घोष यांनी आपल्या बासरी वादनातून अजरामर केलेल्या बंदिशीचे स्वर्गीय स्वर पंडित राजेंद्र कुलकर्णी यांच्या बासरीतून प्रभावीपणे उमटले. ऋषिकेश जगताप (तबला), मोहित पुराणकर (बासरी), ऋग्वेद जगताप (पखवाज) यांनी आपल्या प्रभावी साथीतून मैफल उत्तरोत्तर रंगवत नेली.

रसिकांनी या तिनही वादकांना भरभरून दाद देत मैफलीचा स्वराविष्कार अनुभवला.

कलाकारांचे स्वागत ऋत्विक फाऊंडेशन फॉर परफॉर्मिंग आर्टस्‌च्या संचालिका चेतना कडले यांनी तर कार्यक्रमाचे सूत्रसंचालन अरविंद देशपांडे यांनी केले.

पुणे : मित्राचे लग्न असताना मोबाईल टॉवरच्या कॉन्ट्रॅक्टचे पैसे द्यावे, यासाठी त्याचे घरातून अपहण करुन दोन पिस्तुलं काढून त्याच्या डोक्याला लावून ‘‘तुला कोणत्या पिस्टलमधून गोळी घालू,’’ अशी धमकी देणार्‍या रेकॉर्डवरील गुन्हेगार श्र्वेतांग निकाळजे याला पकडून भारती विद्यापीठ पोलिसांनी त्यांच्याकडून २ पिस्टल जप्त केले आहेत.

श्र्वेतांग भास्कर निकाळजे (वय ३७, रा. भीमनगर, मंगळवार पेठ) आणि ओम संजय गायकवाड (वय २६, रा. मंगळवार पेठ) अशी अटक केलेल्यांची नावे आहेत़.श्र्वेतांग निकाळजे याची मंगळवार पेठ, तसेच भारती विद्यापीठ भागात दहशत आहे. खून, खुनाचा प्रयत्न, बेकायदा पिस्तुल बाळगणे, दहशत माजविणे असे गंभीर स्वरुपाचे गुन्हे निकाळजे याच्याविरुद्ध फरासखाना, भारती विद्यापीठ पोलीस ठाण्यात दाखल आहेत. येरवडा कारागृहात काही वर्षांपूर्वी निकाळजे आणि साथीदारांनी सांगलीतील एका गुंडावर हल्ला केला होता. या घटनेत गुंड गंभीर जखमी झाला होता. शिवाजीनगर न्यायालयासमोर निकाळजे आणि साथीदारांनी एका साक्षीदारावर पिस्तुलातून गोळीबार केला होता.

याबाबत शिवा धनराज मुत्याळ (वय ३१, रा. धाबाडी, आंबेगाव) यांनी भारती विद्यापीठ पोलीस ठाण्यात फिर्याद दिली होती. फिर्यादी यांचा सिंहगड कॉलेज परिसरात स्टॉल असून त्यांनी व निकाळजे यांनी एअरटेल कंपनीचे टॉवरचे कॉन्ट्रॅक्ट घेतले होते. त्याचे पैसे द्यावेत, यासाठी शिवा मुत्याळ याचे लग्न असताना दोन साथीदारांच्या मदतीने श्र्वेतांग निकाळजे याने ८ नोव्हेबर रोजी रात्री पावणे बारा वाजता त्याचे अपहरण केले होते. भोर रोडवर उतरुन त्याच्याकडील दोन पिस्टल काढून ते फिर्यादीच्या डोक्यावर लावून ‘‘तुला कोणत्या पिस्टलमधून गोळी घालू,’’ अशी धमकी दिली होती. इतर दोघा साथीदारांनी ‘तू भाऊचे ऐकत नाहीस तुझ्या डोक्यात कोयता टाकतो,’ अशी धमकी दिली होती. त्यांच्या तावडीतून ते पळून गेल्याच्या रागातून त्या तिघांनी त्यांना शिवाजीनगर येथे गाठून मारहाण करुन पिस्टल लावून धमकाविले होते. याबाबतचा गुन्हा भारती विद्यापीठ पोलीस ठाण्यात दाखल झाला होता.

या गुन्ह्यातील आरोपींचा शोध घेत असताना पोलीस अंमलदार महेश बारवकर, मंगेश पवार, मंगेश गायकवाड, किरण साबळे, अभिनय चौधरी यांच्याकडून प्राप्त झालेल्या माहितीवरुन पोलिसांनी श्र्वेतांग निकाळजे आणि ओम गायकवाड यांना अटक केली. त्यांच्याकडे अधिक तपास केल्यावर निकाळजे याच्याकडून २ पिस्टल व गुन्ह्यात वापरलेली कार असा एकूण ६ लाखांचा माल जप्त करण्यात आला आहे.

ही कामगिरी अपर पोलीस आयुक्त मनोज पाटील, पोलीस उपायुक्त मिलिंद मोहिते, सहायक पोलीस आयुक्त राहुल आवारे यांच्या मार्गदर्शनाखाली वरिष्ठ पोलीस निरीक्षक राहुल खिलारे यांच्या सुचनेप्रमाणे पोलीस उपनिरीक्षक निलेश मोकाशी, पोलीस अंमलदार महेश बारवकर, मंगेश पवार, सचिन सरपाले, मंगेश गायकवाड, किरण साबळे, मितेश चोरमोले, अभिनय चौधरी, सागर बोरगे, निलेश खैरमोडे, तुकाराम सुतार व संदीप आगळे यांनी केली आहे.