मुंबई, – शिवसेना प्रमुख बाळासाहेब ठाकरे यांची प्रकृती स्थिर नसताना उद्धव ठाकरेंच्या दबावामुळे मृत्युपत्रावर बाळासाहेबांची जबरदस्तीने स्वाक्षरी घेतल्याचा दावा जयदेव यांनी केल्यानंतर त्यांच्या संपत्ती बाबतच्या खटल्यात अनोळखी व्यक्तीची लूडबूड सुरु असल्याचे खुद्द मुंबई उच्च न्यायालयानेच म्हटले त्यामुळे या खटल्याला आता वेगळेच वळण लागत असल्याचे चिन्ह आहे . अज्ञात व्यक्तीकडून प्रत्येक सुनावणीनंतर नोंदवलेल्या पुराव्यांची मागणी होत असल्याचे सांगत न्यायालयाने बुधवारी नाराजी व्यक्त केली आहे.
उद्धव ठाकरे आणि जयदेव ठाकरे यांच्यात बाळासाहेब ठाकरे यांच्या संपत्तीवरून वाद सुरु आहेत. या खटल्यातील सुनावणीनंतर अनोळखी व्यक्ती चेंबरमध्ये येऊन नोंदवलेल्या पुराव्यांची प्रत मागत असल्याचे न्यायमूर्ती गौतम पटेल यांनी बुधवारी सुनावणीदरम्यान सांगितले.
जयदेव ठाकरे यांनी बाळासाहेब ठाकरे यांच्या मृत्यूपत्राला उच्च न्यायालयात आव्हान दिले आहे. न्यायमूर्ती गौतम पटेल यांच्यासमोर या खटल्याची सुनावणी सुरू आहे. न्यायमूर्ती पटेल यांनी बुधवारी जयदेव ठाकरे यांच्या वकील सीमा सरनाईक आणि उद्धव ठाकरे यांचे वकील राजेश शाह यांना सांगितले की, “एका अज्ञात व्यक्तीने माझ्या चेंबरमध्ये येऊन या प्रकरणात नोंदवलेल्या पुराव्यांची प्रत मागितली आहे. हा अज्ञात व्यक्ती ४ वेळा माझ्या चेंबरमध्ये आला. सरनाईक यांच्या ऑफिसमधील असल्याचे सांगत त्याने पुरावे मागितले. तो नक्की कोण आहे आणि पुरावे मागण्यामागे त्याचा काय उद्देश आहे, याची मला कल्पना नाही. परंतु हे प्रकरण थांबायला हवे, असे न्यायमूर्ती पटेल म्हणाले.”
त्यानंतर जयदेव यांच्या वकील सरनाईक आणि उद्धव यांचे वकील शाह यांना या अनोळखी व्यक्तीचा शोध घेण्याचे निर्देश त्यांनी दिले आहेत. वकिलांनी त्यांच्या ज्युनिअर्सच्या नावे पत्र लिहून हे पुरावे गोळा करण्यासाठी कोण आले होते, याचा शोध घ्यावा असे म्हटले आहे. तर ओळखपत्र दाखवल्याशिवाय ज्युनिअर वकिलांच्या हाती कोणतेही पुरावे सोपवू नये, असे वकिलांनी सुचवले आहे.
या खटल्यात २००७ पासून बाळासाहेबांवर उपचार करणाऱ्या डॉ. जलील पारकर यांचा जबाब न्यायालयाने नोंदवला आहे. उच्च न्यायालय ३० जून रोजी शिवसेना नेते अनिल परब यांचा जबाब नोंदवणार आहे. १३ डिसेंबर २०११ रोजी बनवलेल्या बाळासाहेबांच्या मृत्युपत्रात माझ्या नावावर फार कमी संपत्ती ठेवल्याचा आरोप करत जयदेव ठाकरे यांनी उच्च न्यायालयात धाव घेतली आहे. बाळासाहेबांची प्रकृती स्थिर नसताना उद्धव ठाकरेंच्या दबावामुळे मृत्युपत्रावर बाळासाहेबांची जबरदस्तीने स्वाक्षरी घेतल्याचा दावा जयदेव यांनी केला आहे

नवी दिल्ली- आम आदमी पक्षाचे (आप) कायदामंत्री जितेंद्रसिंह तोमर यांना बनावट पदवी प्रकरणी अटक झाली असताना माजी कायदामंत्री सोमनाथ भारती एका नव्या वादात सापडले आहेत. सोमनाथ भारती यांच्याविरोधात त्यांची पत्नी लिपिता भारती यांनी महिला आयोगाकडे कौटुंबिक हिंसाचाराची तक्रार दाखल केली आहे. याप्रकरणी सोमनाथ भारती यांना महिला आयोगाने नोटीस पाठविली आहे.
‘मला वेगळे व्हायचे आहे. आपल्याला २०१० पासून बेदम मारहाण केली जात आहे. मी हे शब्दांत सांगू शकत नाही’, असे लिपिता भारती यांनी महिला आयोगाकडे दिलेल्या तक्रारीत म्हटले आहे. पतीला घटस्फोट देऊन आपल्याला मुलांसोबत सन्मानपूर्वक जीवन जगण्याचे असल्याचेही लिपिता भारती यांनी म्हटले आहे. याप्रकरणी सोमनाथ भारती यांना महिला आयोगाने नोटीस पाठवली असून २६जूनपर्यंत त्यांना हजर होण्यास सांगितले आहे.
दिल्ली महिला आयोगाच्या अध्यक्षा बरखा सिंह यांनी सांगितले की, लिपिका भारती या प्रचंड घाबरल्या आहेत. पती सोमनाथ भारती यांनी त्यांना मारहाण केली आहे. शिविगाळ केली आहे. एवढेच नव्हे पतीने त्यांना जिवे मारण्याची धमकी दिली आहे. या प्रकरणी सोमनाथ भारती यांना नोटीस बजावून त्यांना २६ जूनला बोलवण्यात आले आहे.

पाटना – कुठे आहेत अच्छे दिन ? सामान्य माणसाला अच्छे दिन तर जवळपास हि दिसेनात … जमिनी काबीज करणारे , आणि शेतकऱ्यांच्या आत्महत्या झाकून ठेवणारे हे सरकार आहे असे सांगत आज येथे राष्ट्रवादीचे अध्यक्ष शरद पवार यांनी नरेंद्र मोदी सरकारला टिकेचे  लक्ष्य केले

राष्ट्रवादी काँग्रेस पार्टीच्या पाटणा येथील राष्ट्रीय अधिवेशनाचा आज दुसरा दिवस होता. सकाळीच राष्ट्रीय अध्यक्ष शरद पवार यांच्या हस्ते पक्षाच्या वर्धापनदिनानिमित्ताने ध्वजारोहण करण्यात आले. पक्षाच्या अध्यक्षपदी श्री. शरद पवार यांची फेरनिवडही आज करण्यात आली. पक्षाचे केंद्रीय निवडणूक अधिकारी टी. पी. पिथाम्बरन मास्टर यांनी तशी घोषणा केली. त्यानंतर देशभरातून अधिवेशनासाठी आलेल्या प्रतिनिधींना पक्षाध्यक्ष शरद पवार यांच्यासह अन्य नेत्यांनी मार्गदर्शन केले…

काय म्हणाले शरद पवार ते वाचा त्यांच्याच शब्दात …
राष्ट्रवादी काँग्रेसच्या सहाव्या राष्ट्रीय अधिवेशनाला उपस्थित असणाऱ्या सर्वांचे स्वागत आणि अभिनंदन करतो. या अधिवेशनाची सुरुवात करताना आर. आर. पाटील, जे आपल्या पक्षातील निष्ठावान आणि मोठा जनाधार असलेले नेते होते त्यांचे स्मरण करतो. महाराष्ट्र तसेच देशात एनसीपी या पक्षाला मजबूत करण्यातील आर. आर. पाटील यांचे योगदान कधीच विसरता येणार नाही.
भारताच्या स्वातंत्र्य चळवळीत पाटणा आणि बिहारची भूमिका सगळ्यांना ज्ञात आहेच. भारताचे पहिले राष्ट्रपती राजेंद्र प्रसाद हे बिहारचे सुपुत्र होते. लोकनायक जयप्रकाश बाबू यांचे वास्तव्य पाटण्यामध्येच होते. बिहारच्या राजकारणात पक्ष असो वा विपक्ष… वरिष्ठ नेते जयप्रकाश बाबू यांचे शिष्य सर्व देशाच्या राजकारणात महत्त्वाची भूमिका बजावत आहेत. देशात सगळ्यात जास्त प्रमाणात तरुणवर्ग असल्याने आज जगात भारताला अधिक महत्त्व आहे. बिहारच्या एकूण लोकसंख्येपेक्षा ५८ टक्के लोकसंख्या ही १८ ते २५ या वयोगटातील आहे. देशाच्या इतर राज्यांत इतक्या प्रमाणात युवक नाहीत. त्यामुळे भविष्यात देशाच्या विकासात बिहारची भूमिका ही निश्चितच महत्त्वाची राहणार आहे. बिहारमधील तरुण पिढीसोबत संवाद आणि संपर्क वाढविण्याच्या दृष्टिकोनातून याठिकाणी राष्ट्रीय अधिवेशन आयोजित करण्यात आले.
राष्ट्रवादी काँग्रेसची स्थापना युवा, महिला, अल्पसंख्याक, समाजातील दुर्लक्षित घटक दलित तसेच आदिवासी समाजाच्या रक्षणासाठी आणि विकासासाठी झाली आहे, याचा मला आवर्जून उल्लेख करावासा वाटतो. देशाच्या मतदारांनी आपल्याला विरोधी पक्षाची नवीन जबाबदारी दिली आहे. गेली १० वर्षे केंद्रात आणि १५ वर्ष महाराष्ट्रात सत्तेत राहिल्यानंतर आता विरोधी पक्षाची भूमिका आपल्याला पार पाडायची आहे. गेल्या वर्षभरात आपण सक्षमपणे विरोधी पक्षाची भूमिका पार पाडली. सरकारने जनतेच्या हितासाठी जे निर्णय घेतले, त्यांचे आम्ही स्वागत केले. परंतु जे निर्णय लोकांच्या हिताविरोधात घेतले गेले, त्यांना कडाडून विरोध राष्ट्रवादी काँग्रेस पार्टीने केला आणि भविष्यातही हा पक्ष तो करत राहील. अच्छे दिन आयेंगे असं सांगितलं, पण सामान्य माणसाच्या जवळपास कुठेही अच्छे दिन आलेले नाहीत.
मी शेतकऱ्याचा मुलगा आहे. मी स्वत: शेतकरी आहे, तुमच्या सगळ्यांच्या पाठिंब्यामुळेच केंद्रात कृषिमंत्री होतो. त्यामुळे शेतकरी, गाव आणि शेती यांना माझ्या राजकारणात नेहमीच प्राधान्य राहील. सध्या साखर, दूध या व्यवसायात खूप चिंता आहे. सरकारने ठरवून दिलेला एफआरपी दर देणं साखर कारखान्यांना शक्य नाही कारण विक्री दराची तफावत ८०० रुपये प्रतिक्विंटल आहे. अशा परिस्थितीत साखर उद्योगाचं अस्तित्व टिकवणं कठीण आहे. देशाचे पंतप्रधान मन की बात करतात. पण कधीही सामान्य लोकांचे हाल त्यांना सांगितले नाहीत. वर्षाच्या सुरुवातीच्या ३५ दिवसांत फक्त मराठवाड्यातच ९३ शेतकऱ्यांनी आत्महत्या केली, याची त्यांना माहिती नाही का? शेतकऱ्यांच्या आत्महत्यांच्या आकडेवारीत फेरफार करून, आत्महत्या केलेले शेतकरी नव्हते हे दाखविण्याचा प्रयत्न सरकार करते आहे. देश आज कृषी संकटात असताना, शेतकऱ्यांच्या आत्महत्या होत असताना शेती वाचवणं म्हणजे देश वाचविण्यासारखंच आहे हे मोदी सरकारला मान्य नाही.
हरियाणा, महाराष्ट्र निवडणुकीपुरता भाजप गप्प राहिला. या निवडणुकीत यश प्राप्त केल्यानंतर देशहिताच्या नावाखाली लोकांच्या परवानगीशिवाय त्यांच्या जमिनी काबीज करण्याचं षड्यंत्र हे सरकार करतंय. देशातील प्रत्येक शेतकरी भूमी अधिग्रहण कायद्याच्या विरोधात आहे. त्यामुळे या कायद्याला विरोध राजकाऱणातून होतोय, असं म्हणणं हे दुर्दैवाचं आणि घातक आहे. लोकसभेत भूमी अधिग्रहण कायदा संमत झाला पण राज्यसभेत भाजपची बहुसंख्या नसल्याने, ते बिल पार्लमेंटरी जॉइंट कमिटीकडे पाठवण्यात आलंय. हा कायदा शेतकऱ्यांच्या विरोधात असून, जर कायदा पारित केला तर देशातील शेतकरी रस्त्यावर उतरून आंदोलन करतील.
देशातील न्यायव्यवस्था हा सध्या चिंतेचा विषय झाला आहे. लाखो खटले न्यायालयात प्रलंबित आहेत. वर्षोनुवर्षे लोकांना न्याय मिळण्याची प्रतीक्षा करावी लागतेय. एका अहवालानुसार देशातील ३ कोटींवर लोक असे आहेत की, ज्यांच्या खटल्यांचे निकाल अजूनही लागले नाहीत. ही गंभीर परिस्थिती आहे. लवकरात लवकर ही परिस्थिती बदलणं गरजेचं आहे.
गाव आणि शहर यांच्यातील असंतुलन हा देखील मुद्दा आहे. स्मार्ट शहरं उभारतानाच गावांची स्थितीही चांगली असायला हवी. पंतप्रधानांची स्मार्ट सिटी संकल्पना चांगली आहे, मात्र शहरांसोबत गावंही स्मार्ट बनायला हवीत. गावाची उपेक्षा करून स्मार्ट शहर बनविण्याला आम्ही विरोध करू.
घरवापसी, लव जिहाद यासारखे अनुचित प्रकार देशात घडत आहेत. आपसात द्वेष निर्माण केला जातो आहे. पण सर्वधर्मसमभावायाशिवाय भारताचा विकास शक्य नाही.
महाराष्ट्रात आघाडी न झाल्याने दोन्ही पक्षांचं नुकसान झालं. महिला आरक्षण विधेयक संसदेत पारित व्हायला हवं. नाही तर महिला कधीही पुढे येऊ शकणार नाहीत. अंधश्रद्धा ही समाजाच्या विकासासाठी बाधक आहे. बिहारची जनता देशाची परिस्थिती पाहून सांप्रदायिक शक्तींना दूर ठेवण्यासाठी निश्चितच बदल करेल असा मला विश्वास आहे.

पुणे: महाराष्ट्रात इतर राज्यातील म्हणजे परप्रांतीयांचे मतदार संघ नको , महाराष्ट्रात राहणाऱ्या परप्रांतीय नागरिकांनी मराठी मातीशी एकरूप होवून राहावे असे पुन्हा एकदा मनसे चे अध्यक्ष राज ठाकरे यांनी स्पष्ट केले

पंजाबचे मुख्यमंत्री प्रकाशसिंह बादल यांना पुण्यामध्ये संतनामदेव पुरस्काराने सन्मानित करण्यात आलं. त्यावेळी राज ठाकरे बोलत होते.  मुख्यमंत्री देवेंद्र फडणवीस ,पुण्याचे पालकमंत्री गिरीश बापट आणि राज ठाकरे हे यांनी या सोहळ्याला उपस्थिती लावली होती.

राज ठाकरे यांनी यावेळी छोटेखानी भाषण केले “पंजाबचे मुख्यमंत्री प्रकाशसिंह बादल यांच्याबद्दल खूप ऐकून होतो मात्र, आज प्रत्यक्ष त्यांना भेटून फार आनंद झाला. आज त्यांना भेटल्यानंतर सगळ्यात आधी त्यांच्या पाया पडलो. आज राजकारणात अशी फार कमी लोकं आहेत.” असं म्हणत मनसे अध्यक्ष राज ठाकरे यांनी प्रकाशसिंह बादल यांच्यावर कौतुकाचा वर्षाव केला

.ते पुढे म्हणाले “मी कुठे तोडाफोडी करायला आलो आहे? माझं म्हणणं इतकंच आहे की, समोरच्या राज्याने आम्हाला मान द्यावा, आम्हीही त्यांना योग्य तो मान नक्कीच देऊ. शीख बांधव जिथेही राहिले त्यांनी कधीही कुठे आपला मतदारसंघ निर्माण केलेला नाही. या मातीशी एकरुप व्हा. एवढंच आमचं म्हणणं आहे. मराठी बांधवांनी देखील कधी असं केलं नाही. इतर राज्यातील लोकांनीही तसंच राहावं.” असं म्हणत राज ठाकरेंनी पुन्हा परप्रांतियांच्या मुद्द्याला हात घातला.” ‘इथं जमलेल्या शिख बांधवांना मी मराठीच म्हणतो. आणि पावसाळाच्या तोंडावर महाराष्ट्रात बादल येणं हा योगायोगच म्हणावा लागेल. या निमित्ताने महाराष्ट्रातील दुष्काळ दूर व्हावा हीच इच्छा.’ अशी कोटीही राज ठाकरेंनी केली. घुमान येथे होत पार पडलेल्या साहित्य संमलेनासाठी राज ठाकरे यांनाही निमंत्रण देण्यात आलं होतं. त्यावर बोलताना राज ठाकरेंनी साहित्य-समंलेनातील होणाऱ्या वादांवरही टीप्पणी केली. “आधीच साहित्य संमेलनात वाद-विवाद असतात. पुन्हा मी जाऊन आणखी वाद नको आणि तशीही माझी तब्येत बरी नव्हतीच.. खरोखरच बरी नव्हती बरं का… म्हणून मी ‘गप गुमान’ घरी बसून राहिलो.

महाराष्ट्र आणि पंजाबचं नातं हे संत नामदेवांपासूनचं आहे. इतक्या जुन्या नात्याचा धागा हा दिवसेंदिवस घट्ट होत आहे. घुमान साहित्य संमेलनात पंजाबचे मुख्यमंत्री प्रकाशसिंह बादल यांनी जी व्यवस्था केली, त्यामुळे महाराष्ट्र-पंजाब आणखी जवळ आला आहे, अशी भावना यावेळी  मुख्यमंत्री देवेंद्र फडणवीस यांनी व्यक्त केली.याशिवाय देशासाठी मराठे आणि शीखांनी मोठा लढा उभारला होता. या दोन्ही राज्यांचं देशासाठी कार्य अद्वितीय आहे, असंही फडणवीस म्हणाले.

संत नामदेव पुरस्कारासाठी माझी निवड केली, त्यामुळे मी आभारी आहे. आजचा दिवस माझ्यासाठी खूपच भाग्याचा आहे, अशी प्रतिक्रिया पंजाबचे मुख्यमंत्री प्रकाशसिंह बादल यांनी व्यक्त केली.महाराष्ट्र आणि पंजाबचं प्रेमाचं, जिव्हाळ्याचं नातं आहे. ते आणखी घट्ट झालं आहे. मी महाराष्ट्राकडून खूप काही शिकलो, असं बादल म्हणाले.