शिक्षण प्रसारक मंडळी च्या पुढाकाराने आयोजन
पुणे : सर परशुरामभाऊ महाविद्यालयाने प्रशासकीय सेवेत अधिकारी असणाऱ्या आपल्या माजी विद्यार्थ्यांचा मेळावा शनिवार, दिनांक २९ नोव्हेंबर २०२५ रोजी सकाळी ११ वाजता लेडी रमाबाई सभागृहामध्ये आयोजित केला आहे. शिक्षण प्रसारक मंडळीच्या पुढाकारातून हा मेळावा संपन्न होत आहे, अशी माहिती महाविद्यालयाचे प्राचार्य डॉ.अविनाश मोहरील यांनी पत्रकार परिषदेत दिली.

पत्रकार परिषदेला स.प.महाविद्यालय विकास समितीचे अध्यक्ष केशव वझे, महाविद्यालयाचे प्राचार्य डॉ.अविनाश मोहरील आणि डॉ. संज्योत आपटे उपस्थित होते.

शिक्षण प्रसारक मंडळीने मागील वर्षापासून बी.ए, सिव्हिल सर्विसेस हा नवीन अभ्यासक्रम सुरू केला आहे. महाविद्यालयाच्या ऐतिहासिक वारसा सांगणाऱ्या इमारतीचे हे शताब्दी वर्ष आहे. त्याचप्रमाणे केंद्रीय लोकसेवा आयोगाचे ही हे शताब्दी वर्ष आहे. या सर्व गोष्टींचा संगम साधून महाविद्यालयाने हा मेळावा आयोजित केला आहे. सकाळी ११ ते संध्याकाळी ५ वाजेपर्यंत महाविद्यालयाच्या प्रांगणात हा मेळावा असेल.

लेडी रमाबाई सभागृहामध्ये सकाळी ११ वाजता  शिक्षण प्रसारक मंडळीचे अध्यक्ष सदानंद फडके, शिक्षण प्रसारक मंडळीच्या नियामक मंडळाचे अध्यक्ष ॲड.एस.के.जैन, नियामक मंडळाचे उपाध्यक्ष श्रीकृष्ण चितळे, महाविद्यालय विकास समितीचे अध्यक्ष केशव वझे, सचिव डॉ. राधिका इनामदार व शिक्षण प्रसारक मंडळीच्या नियामक मंडळाच्या सर्व सदस्यांच्या उपस्थितीत या मेळाव्याचे उद्घाटन होईल.  

महाविद्यालयाचे प्राचार्य डॉ.अविनाश मोहरील म्हणाले, संसदेचे माजी सदस्य, सिक्कीमचे माजी राज्यपाल, प्रशासकीय सेवेतून निवृत्त झालेले आय.ए.एस अधिकारी व महाविद्यालयाचे ज्येष्ठ माजी विद्यार्थी  श्रीनिवास पाटील यांच्या हस्ते मेळाव्याचे उद्घाटन होईल. या उद्घाटन समारंभात महाविद्यालयाचे माजी विद्यार्थी असणारे असे प्रशासकीय सेवेतील पन्नासहून अधिक अधिकारी सहभागी होतील. या सर्वांचे स्वागत व सत्कार या समारंभात करण्यात येईल.

उद्घाटन समारंभानंतर नागरी सेवेत काम करण्यास इच्छुक असणाऱ्या व त्यासाठी स्पर्धा परीक्षांची तयारी करणाऱ्या महाविद्यालयातील विद्यार्थ्यांच्या विविध गटांमध्ये प्रशासकीय अधिकारी सहभागी होतील. त्यांच्या तेथील व्याख्यानांमधून ते विद्यार्थ्यांना प्रशासकीय सेवेबाबत मार्गदर्शन करतील. महाविद्यालयाचे विद्यार्थी यावेळेस या अधिकाऱ्यांशी थेट संवाद साधतील. या संवादातून सध्याच्या या विद्यार्थ्यांना प्रशासकीय सेवेतील विविध संधींची माहिती मिळेल, ते प्रेरित होतील, राष्ट्रहित,राष्ट्राचा विकास, सामाजिक बांधिलकी यासाठी ते जागरूक होतील, अशी आशा आहे.

यानंतर विद्यार्थ्यांसमवेत हे अधिकारी महाविद्यालयाच्या परिसरात फिरतील. त्यांच्या काळात कार्यरत असणाऱ्या महाविद्यालयाच्या माजी शिक्षकांशी त्यांच्या भेटीगाठी होतील. जुने ऋणानुबंध पुन्हा जागे होतील व या अधिकाऱ्यांच्या महाविद्यालयातील आपल्या स्मृतींना उजाळा मिळेल. महाविद्यालयाशी असणारा त्यांचा अनुबंध घट्ट होईल. यानंतर महाविद्यालयातील कला मंडळाच्या विद्यमान विद्यार्थ्यांच्या सांस्कृतिक कार्यक्रमाने मेळाव्याचा समारोप होईल. मेळाव्यात आय.ए.एस, आय.पी.एस, आय.आर.एस व इतर प्रशासकीय सेवेतील अधिकारी त्याचप्रमाणे महाराष्ट्र शासनाच्या विविध संवर्ग सेवेतील अधिकारी या मेळाव्यात सहभागी होत आहेत.

*स.प. महाविद्यालय इमारतीच्या शताब्दी वर्षात विविध कार्यक्रम
शिक्षण प्रसारक मंडळीने सर परशुरामभाऊ महाविद्यालयाच्या ऐतिहासिक वारसा असणाऱ्या इमारतीच्या या शताब्दी वर्षात विविध कार्यक्रमांचे आयोजन करण्याचे निश्चित केले आहे. राष्ट्र बांधणी व देशाचा विकास, सामाजिक बांधिलकी व सामाजिक कार्यात विद्यार्थ्यांचा सहभाग ही उद्दिष्टे निश्चित करून विविध कार्यक्रमांचे आयोजन शिक्षण प्रसारक मंडळी वर्षभर करणार आहे. नागरी सेवेत अधिकारी असणाऱ्या माजी विद्यार्थ्यांचा मेळावा हा यातील पहिला कार्यक्रम आहे. विद्यार्थ्यांचे भवितव्य घडविण्यासाठी प्रेरणादायी ठरेल.

*संस्था व महाविद्यालयाविषयी
शिक्षण प्रसारक मंडळी ही पुण्यातील एक नामवंत अग्रगण्य शैक्षणिक संस्था आहे. या संस्थेला शंभर वर्षांहून मोठी उज्ज्वल परंपरा आहे. या संस्थेकडून १९१६ मध्ये पुण्यात सर परशुरामभाऊ महाविद्यालयाची स्थापना करण्यात आली. आज हे महाविद्यालय अधिकार प्रदत्त स्वायत्त महाविद्यालय आहे. मोठी परंपरा व वारसा असणाऱ्या या महाविद्यालयाने विद्यार्थ्यांच्या अनेक पिढ्या घडविल्या आहेत. या विद्यार्थ्यांनी शैक्षणिक, सांस्कृतिक, क्रीडा, प्रशासन अशा विविध क्षेत्रांत आपला स्वतंत्र ठसा उमटवला आहे. आज हे विद्यार्थी समाजामध्ये प्रतिष्ठित नागरिक आहेत. आम्ही सर परशुरामभाऊ महाविद्यालयाचे विद्यार्थी आहोत; हे ते अभिमानाने सांगतात. महाविद्यालयाबरोबरचे त्यांचे बंध भक्कम राहिले आहेत. महाविद्यालयातील अनेक कार्यक्रमांमध्ये ते सहभागी होत असतात. मूल्यात्मक शिक्षण, राष्ट्रहित व राष्ट्राचा विकास हे महाविद्यालयाचे नेहमीच धोरण राहिले आहे. उज्ज्वल परंपरा, वर्तमानाचे भान व भविष्याचा वेध घेत हे महाविद्यालय आपली शतकोत्तरी वाटचाल करीत आले आहे.

प्रख्यात निरुपणकार डॉ. धनश्री लेले यांचे मत ; ग्रंथ पारायण दिंडी पुणे च्यावतीने अयोध्या येथे झालेल्या रामरक्षा पठण वर्षपूर्ती निमित्त कार्यक्रमाचे आयोजन
पुणे : रामायण हा प्रभू श्रीरामाच्या जीवनाचा प्रवास नसून, सदाचार, कर्तव्यभावना आणि सत्याच्या मार्गावर चालण्याचा संदेश देणारा जीवनमार्ग आहे. आजच्या काळातील पिढीला रामायण ही फक्त प्रभू श्रीरामाची गोष्ट वाटते. मात्र रामायण म्हणजे केवळ कथा नसून श्रीरामाने आचरणात आणलेला आदर्श मार्ग आहे, असे मत निरुपणकार डॉ. धनश्री लेले यांनी व्यक्त केले.

ग्रंथ पारायण दिंडी पुणे च्यावतीने अयोध्या येथे झालेल्या रामरक्षा पठण वर्षपूर्ती, चातुर्मासातील व्रताची सांगता आणि घरोघरी रामरक्षा स्तोत्र पठाणाच्या संकल्पपूर्ती निमित्त सदाशिव पेठेतील गीता धर्म मंडळ येथे कार्यक्रमाचे आयोजन करण्यात आले. कार्यक्रमाला परिमंडळ १ चे पोलीस उपायुक्त कृषीकेश रावले, रा.स्व.संघ कसबा भाग संघचालक प्रशांत यादव, डाॅ. संजीव डोळे, संस्थेचे विरेंद्र कुंटे, नंदकुमार देव आदी उपस्थित होते. यावेळी देव, देश आणि धर्मासाठी कार्य करणाऱ्या संस्था आणि शालेय संस्थांचा सन्मान करून त्यांना मदतनिधी प्रदान करण्यात आला. श्री यशोधन नागरी सहकारी पतसंस्था पुणे व चौफेर प्रतिष्ठान यांचे सहाय्य लाभले.

डॉ. धनश्री लेले म्हणाल्या, जीवनात वेळेचे खूप महत्व सांगितले आहे. जर आपण ठराविक वेळेनुसार आहार घेतला तर शरीरात जैविक घड्याळे तयार होतात आणि त्या विशिष्ट वेळीच आपल्याला भूक लागते. म्हणून उपासना देखील ठराविक वेळेला केल्यास मनालाही त्या वेळेची सवय लागते आणि उपासनेची भूक निर्माण होते. ज्या वेळेला आपण नियमित उपासना करतो, त्या वेळेला परमेश्वरही आपल्या भक्तीची वाट पाहतो. आपण त्यावेळेला उपासना न केल्यास परमेश्वरच आपल्या नावाने हाक मारतो, असेही त्यांनी सांगितले.

प्रशांत यादव म्हणाले, आपल्या ग्रंथांमध्ये कर्तव्याचा स्पष्ट उपदेश देण्यात आला आहे. देव, देश आणि धर्म ही जीवनशैली प्रत्येकाने मनापासून स्वीकारली पाहिजे आणि ती दैनंदिन व्यवहाराचा भाग झाली पाहिजे. जर प्रत्येकाने या मूल्यांचे पालन केले तर भारताला महासत्ता होण्यापासून जगातील कोणतीही शक्ती रोखू शकत नाही, असेही त्यांनी सांगितले. कृषीकेश रावले म्हणाले, या अशा संस्थांच्या कार्याची प्रेरणा घेवून प्रत्येकाने खारीचा वाटा उचलून काम केले पाहिजे. मी देखील पुणे शहरासाठी काम करताना तुमच्याकडून येणाऱ्या सूचनांचा स्विकार करून काम करीन, असेही त्यांनी सांगितले.

विरेंद्र कुंटे म्हणाले, अयोध्या येथे झालेल्या रामरक्षा पठण वर्षपूर्ती, चातुर्मासातील व्रताची सांगता आणि घरोघरी रामरक्षा स्तोत्र पठाणाच्या संकल्पपूर्ती निमित्त कार्यक्रमाचे आयोजन करण्यात आले. यानिमित्त प्रत्येक घरात रामरक्षा पठण झाले पाहिजे या संकल्पाची पूर्ती झाली असली तरी देखील पुढे देखील ते कार्य असेच सुरू रहावे व जास्तीत जास्त नागरिक या संकल्पात जोडले जावेत असे प्रयत्न करू असेही त्यांनी सांगितले. अलका विंझे यांनी सूत्रसंचालन यांनी केले. विरेंद्र कुंटे यांनी आभार मानले.

पुणे- डिजिटल इंडिया होत असताना पुण्यात काही अधिकारी एकीकडे निवडणूक आयोगाच्या नावाने डिजिटल मिडीयाला विरोध करत आहेत आणि प्रिंट ला पायघड्या घालीत आहेत तर दुसरीकडे मेट्रोने काल अचानक येरवडा मेट्रो स्टेशन वर प्रिंट तिकीट देणे बंद केले आणि डिजिटल म्हणजे मोबाईलवर तुमच्या डिजिटल तिकीट घेण्याचा आग्रह सुरु केला यामुळे अत्यंत साधा मोबाईल असलेल्या एका आजीबाईंची मोठ्ठी पंचाईत झाली पण इथे मात्र मेट्रोने डिजिटल इंडिया चा धोशा लावला आणि तुमच्या मोबाईल वर वॉट्सअ‍ॅपवर २ तिकिटे पाठविल्याचे सांगून त्यांची बोळवण करण्याचा प्रयत्न केला . आज्जीबाई कडे ना whatsaap ना इन्टरनेट , साधा मोबाईल … त्यांनी पेपर तिकीट देण्याची विनंती केली असता, उपस्थित कर्मचारी भूषण शिंदे, रणजीत तावडे, जितेंद्र रामटेके, प्रवीण इंगळे यांनी तिकीट देण्यास नकार देत अवमानकारक वर्तन केले.या घटनेने आम आदमी पार्टीने संताप व्यक्त केला असून …. जिथे प्रिंट तिकीट देणे आवश्यक आहे तिथे असला शहाणपणा चालणार नाही असा इशारा आम आदमी पार्टीने यावेळी दिला

राज्य समन्वयक अमित म्हस्के,शहर उपाध्यक्ष श्रद्धा शेट्टी,शहराध्यक्ष, कामगार आघाडी संजय कोनेसंघटन सह-मंत्री मनोज शेट्टी,युवा आघाडी सचिव ॲड. रवी वडमारे,सदस्य अरुण केदारी यांनी येथे धाव घेतली आणि मेट्रोला सुनावले आहे.

या प्रकरणी ते म्हणाले,दिनांक २४/११/२०२५, सोमवार रोजी सायंकाळी ५ वाजता, पक्षाचे संघटन सहमंत्री मनोज शेट्टी यांच्या आई व आज्जी पुणे मेट्रोने प्रवास करण्यासाठी येरवडा मेट्रो स्टेशन येथे तिकीट काढण्यासाठी गेल्या असता अत्यंत गंभीर अशी घटना घडली.तिकीट काउंटरवर असताना एका महिला कर्मचारीने त्यांच्या मोबाईलवर डिजिटल पद्धतीने वॉट्सअ‍ॅपवर दोन प्रवासी तिकीट डाउनलोड करून दिले.
मात्र संबंधित प्रवासी निरक्षर आणि वयवृद्ध असल्याने त्यांच्याकडे फिचर फोन (साधा मोबाईल) होता व डिजिटल तिकीट वापरणे त्यांना शक्य नव्हते. त्यामुळे पुढील प्रवास कसा करायचा, असा प्रश्न शेट्टी यांनी कर्मचाऱ्यांना विचारला.पेपर तिकीट सुविधा बंद असल्यामुळे हा त्रास निर्माण झाला असून पुणेकरांना डिजिटल तिकीटाच्या नावाखाली होणारा त्रास असह्य आहे.यामुळे आम आदमी पार्टीने पुणेकरांच्या सोयीसाठी आणि विशेषतः वरिष्ठ नागरिक,निरक्षर प्रवासी,फिचर फोन वापरणारे नागरिक आणि ज्यांना हवे त्यांना सर्व मेट्रो स्टेशनवर पेपर तिकीट तात्काळ सुरू करावे.अन्यथा…पेपर तिकीट सुरू न झाल्यास आम आदमी पार्टी च्या वतीने मेट्रो रोको आंदोलन छेडण्यात येईल. असा इशारा दिला आहे.

पुणे दि. 25 : दरवर्षी २६ नोव्हेंबर हा दिवस २०१५ पासून संविधान दिन म्हणून साजरा केला जातो. भारतीय संविधान स्वीकारल्याच्या स्मरणार्थ आणि डॉ. बाबासाहेब आंबेडकर यांच्या अध्यक्षतेखालील मसुदा समितीच्या योगदानाचा गौरव करण्यासाठी हा दिवस विशेषत्वाने पाळला जातो. यावर्षीही २६ नोव्हेंबर रोजी राज्यातील सर्व शाळा मध्ये संविधान दिन साजरा करण्याच्या सूचना श्री. राहुल रेखावार,संचालक, राज्य शैक्षणिक संशोधन व प्रशिक्षण परिषद, पुणे यांनी केल्या आहेत.
२६ नोव्हेंबर संविधान दिनानिमित्त राज्यातील सर्व शाळांनी मूल्यवर्धन कार्यक्रमाशी सुसंगत पुढीलप्रमाणे उपक्रम राबवावेत. यात संविधान प्रभात फेरी, संविधान व्याख्यानमाला- सेमिनार, संविधान विषयक चित्रकला पोसटर स्पर्धा, संविधानावर आधारित प्रश्नमंजुषा, संविधान विषयक पथनाट्य, पोवाडा-गणी सादरीकरण, मानवी साखळी निर्मिती, हस्तकला स्पर्धा आदि स्पर्धात्मक कार्यक्रमाचे आयोजन करण्यात यावेत. तसेच संवैधानिक मूल्यांवर शपथवाचन,संविधान प्रस्तावनेचे वाचन,लोकशाही मूल्यांवरील चित्रकला, निबंध, घोषवाक्य स्पर्धा,संविधान विषयक व्याख्यान, परिसंवाद,न्याय, स्वातंत्र्य, समानता, बंधुता याबाबत चर्चा सत्रे इ. उपक्रम राबवावेत.

अशा उपक्रमांमुळे विद्यार्थ्यांमध्ये नागरिकत्वाची जाणीव, सामाजिक जबाबदारी, सहकार्य, सामाजिक संवेदनशीलता आणि लोकशाही मूल्यांची दृढ स्थापना होईल. परिणामी संविधान दिन हा मूल्याधिष्ठित शिक्षणाचा अनुभव देणारा प्रभावी दिवस ठरेल असे राज्य शैक्षणिक संशोधन व प्रशिक्षण परिषद, यांनी आपल्या परिपत्रकात नमुद केले आहे.

पुणे-पुणे मार्केट यार्डातील शेवग्याची आवक तब्बल 90 टक्क्यांनी घटली आहे. त्यामुळे शेवग्याने चिकनला मागे टाकत बाजारात अक्षरशः धुमाकूळ घातला आहे. सध्या पुण्यात चिकन 220 ते 250 रुपये किलोने मिळतंय, तर शेवगा मात्र 400 ते 500 रुपये किलोने विकला जात आहे.

सोलापूर जिल्ह्यात शेवग्याची मोठ्या प्रमाणात लागवड केली जाते. पण लांबलेला पाऊस व अतिवृष्टीमुळे सोलापूरसह अनेक भागांतील शेवग्यांचे पीक अक्षरशः उद्ध्वस्त झाले आहे. यामुळे शेवग्याचा यंदाचा हंगाम विलंबाने सुरू होण्याची शक्यता आहे. एरवी घाऊक बाजारात दररोज 4 ते 5 हजार किलो शेवग्याची आवक होत असते. पण सोमवारी केवळ 400 ते 500 किलो शेवगा आला. ही अल्पशी आवक केवळ आंध्र प्रदेशातून आली. यामुळे गत आठवड्यात जो शेवगा 140 ते 150 किलो दराने मिळत होता. तो आता थेट 500 रुपयांवर पोहोचला आहे.

घाऊक बाजारात 10 किलो शेवग्याला 3000 चा भाव मिळत आहे. श्री छत्रपती शिवाजी मार्केट यार्ड आडत संघटनेचे माजी अध्यक्ष विलास भुजबळ आणि ज्येष्ठ व्यापारी रामदास काटकर यांनी ही माहिती दिली. मागणीच्या तुलनेत आवक अतिशय कमी झाल्यामुळे ही दरवाढ झाली. उल्लेखनीय बाब म्हणजे मुंबईसह राज्यभरातील दाक्षिणात्य उपहारगृह चालकांकडून सांबार, रसमसाठी शेवग्याला वर्षभर मोठी मागणी असते. दररोज मोठी खरेदी करणारे हे व्यावसायिक आता वाढलेल्या दरामुळे चिंतेत सापडले आहेत.

शेवगा उष्ण असल्यामुळे हिवाळ्याच्या दिवसांत गृहिणींकडून शेवग्याला मोठी मागणी असते. मधुमेह व इतर आजारांसाठीही शेवगा गुणकारी असल्याने त्याचा वापर वाढला आहे. त्यातच आता शेवग्याला सोन्याचा भाव आल्यामुळे ही आरोग्यदायी भाजी आता सर्वसामान्यांच्या ताटातून हद्दपार होण्याची भीती वाढली आहे.

पुणे-औंध रोड, बोपोडी, खडकी स्टेशन परिसरात वाहतुकीच्या अनेक समस्या आहेत. या परिसरातील वाहतुकीचे नियोजन व्यवस्थितपणे केलं जात नाही त्यामुळे भविष्यात हा रस्ता मृत्यूचा सापळा होऊ शकतो. त्यामुळे आपल्या वतीने आपण वाहतूक सुरळीत करावी व लोकांना होणारा त्रास कमी व्हावा यासाठी प्रयत्न करावेत अशी विनंती करणारे पत्र आज राष्ट्रवादी कॉंग्रेस पार्टी शरदचंद्र पवार गटाचे प्रदेश सरचिटणीस व प्रवक्ता सुनील माने यांनी अतिरिक्त पोलीस आयुक्त (वाहतूक) मनोज पाटील यांना दिले . यावेळी राष्ट्रवादी कॉंग्रेस शरदचंद्र पक्षाचे सामाजिक न्याय विभागाचे संघटक शेलार उपस्थित होते.मनोज पाटील यांनी यावेळी अधिकाऱ्यांना सूचना करत याबाबत ठोस उपाय योजना करण्याच्या सूचना केल्या. याच आशयाचे पत्र सोमवारी महापालिकेच्या पथ विभागाचे मुख्य अभियंता अनिरुद्ध पावसकर यांनाही माने यांनी दिले. या पत्राद्वारे त्यांना ही कामे तातडीने हाती घेण्याची विनंती केली.
त्यांनी संबंधीत अधिकाऱ्यांना याबाबत तातडीने दिलेल्या सूचना
१. चंद्रमणी नगर ते खडकी स्टेशनपर्यंत नव्याने रस्ता तयार करणे अतिशय आवश्यक आहे.
२. ⁠पाटील कॅाम्प्लेक्सच्या समोर रस्ता ओलांडण्याची सोय आणि बॅरिकेटींग. तसेच दोन्ही बाजूंना स्पीडब्रेकरची व्यवस्था.
३. ⁠गणेश मंदिर येथे तातडीने स्पीडब्रेकरची दोन्ही बाजूंना सोय करणे.
४. ⁠औंधरोड- सांगवी नवीन पुलाला ॲप्रोच रस्ता तयार करणे
५. ⁠खडकी रेल्वेस्टेशन येथील दुरुस्ती, पार्किंग व्यवस्था आणि सिग्नल
६. ⁠रेल्वेस्टेशनचे नवीन गेट केवळ शंकर मंदिरासमोर खुले करून तेथेच पार्किंग व्यवस्था करणे. आदी मागण्या या निवेदनाद्वारे केल्या.

पुणे दि. 25 : सामाजिक न्याय व विशेष सहाय्य विभागांतर्गत कार्यरत असलेल्या पुणे जिल्ह्यातील ऑनलाईन प्रवेश प्रक्रियेमध्ये ज्या विद्यार्थ्यांना शासकीय वसतिगृहात प्रवेश मिळालेला नाही, अशा विद्यार्थ्यांसाठी डॉ. बाबासाहेब आंबेडकर स्वाधार योजनेचा लाभ देण्यासाठी ऑनलाईन पोर्टलवर ‘Sent Back’ टॅब उपलब्ध करून देण्यात आलेला आहे.

त्याअनुषंगाने पुणे शहर व पिंपरी-चिंचवड शहरातील विद्यार्थी यांनी संबंधित शासकीय वसतिगृहाचे गृहप्रमुख आणि गृहपाल यांच्याशी संपर्क साधावा. तसेच तालुका स्तरावरील विद्यार्थ्यांनी संबंधित तालुक्यातील शासकीय वसतिगृह गृहपालांशी संपर्क करून दिनांक ३० नोव्हेंबर २०२५ पर्यंत ‘Sent Back’ चा पर्याय निवडून डॉ. बाबासाहेब आंबेडकर स्वाधार योजनेचा लाभ घ्यावा, असे आवाहन सहायक आयुक्त विशाल लोंढे यांनी केले आहे.

पुणे दि. 25 : डेहराडून, उत्तराखंड येथे आयोजित २८ व्या अखिल भारतीय वन क्रीडा संमेलन २०२५ मध्ये महाराष्ट्र वन विभागाने उल्लेखनीय यश संपादन केले आहे. महाराष्ट्राने या स्पर्धेत ३१ सुवर्ण, २६ रौप्य आणि २० कांस्य अशी एकूण ७७ पदके जिंकत २८६ गुणांसह देशात चौथे स्थान पटकावले. तसेच राज्यातील १३ क्रीडापटूंनी चौथे स्थान मिळवत भक्कम कामगिरीची नोंद केली.

रायपूरमध्ये पार पडलेल्या २७ व्या AIFSM 2024 मधील ८ व्या स्थानावरून महाराष्ट्राने यंदा थेट ४ थ्या स्थानावर झेप घेतली आहे.

या यशात राज्यातील ४ वन प्रशिक्षण संस्था आणि २ वन अकादमींतील प्रशिक्षणार्थींचा मोलाचा वाटा असून त्यांनी एकूण २७ पदके मिळवली. विविध ट्रॅक आणि फील्ड स्पर्धांमध्ये—धावणे, लांब पल्ला, रिले, मॅरेथॉन, लांब उडी, रेस वॉक, आलाफेक, भारोत्तोलन आणि पॉवरलिफ्टिंग—यामध्ये प्रशिक्षणार्थींनी ९ सुवर्ण, १० रौप्य आणि ८ कांस्य पदके जिंकली.

एकूणच, महाराष्ट्र वन विभागाच्या प्रशिक्षणार्थींच्या या कामगिरीमुळे महाराष्ट्र वन विभाग शिक्षण आणि प्रशिक्षण शाखेतर्फे सर्व विजेत्या खेळाडू, प्रशिक्षक व प्रशिक्षण संस्थांचे अभिनंदन करण्यात आले.

• व्यवस्थापकीय संचालक विजयसिंह देशमुख

पुणे दि. 25 : अण्णासाहेब पाटील आर्थिक मागास विकास महामंडळाचे नवीन पात्रता प्रमाणपत्र (LOI) वितरण तात्पुरते स्थगित असले तरी, इतर सर्व कामकाज सुरळीत सुरू असून लाभार्थ्यांना देण्यात येणारा व्याज परतावा कोणत्याही अडथळ्याविना नियमितपणे वितरित केला जात आहे. सप्टेंबर 2025 अखेर होल्ड किंवा ब्लॉक केलेल्या प्रकरणांव्यतिरिक्त सर्व पात्र लाभार्थ्यांच्या खात्यात व्याज परताव्याची रक्कम जमा करण्यात आली असल्याची माहिती महामंडळाचे व्यवस्थापकीय संचालक विजयसिंह देशमुख यांनी प्रसिद्धीपत्रकाद्वारे दिली.

काही माध्यमांमध्ये महामंडळाचे कामकाज थांबले असल्याच्या प्रसारित बातम्यांवर स्पष्टीकरण देताना महामंडळाने स्पष्ट केले की, नवीन पात्रता प्रमाणपत्र प्रक्रीयेतील काही तांत्रिक कारणांमुळे ही प्रक्रिया तात्पुरती स्थगित करण्यात आली होती. मात्र, व्याज परतावा आणि बँक मंजुरीसंबंधित प्रक्रिया नियमितपणे सुरू आहे.

अशा गैरव्यवहारांना आळा बसावा म्हणून महामंडळाने खाते प्रमाणिकरण( Account Validation) प्रणाली लागू करण्यास सुरुवात केली आहे. एजंटमार्फत दाखल झालेली संशयित प्रकरणे तात्पुरती ब्लॉक करण्यात आली आहेत. अशा लाभार्थ्यांनी आपल्या मूळ कागदपत्रांसह संबंधित जिल्हा समन्वयकांशी संपर्क साधावा. जिल्हा समन्वयकांचे संपर्क क्रमांक www.udyog.mahaswayam.gov.in या संकेतस्थळावर उपलब्ध आहेत. यापुढे नागरी सुविधा केंद्र वगळता, एकाच मोबाईल क्रमांक किंवा लॉगिनद्वारे केवळ एकच अर्ज दाखल करता येईल.

पात्रता प्रमाणपत्र (LOI) प्रक्रियेमध्ये आवश्यक तांत्रिक सुधारणा पूर्ण केल्यानंतर शक्य तितक्या लवकर नवीन पात्रता प्रमाणपत्र वितरण प्रक्रिया सुरू करण्यात येणार असल्याची माहिती व्यवस्थापकीय संचालक यांनी दिली.

पुणे, दि. २५: महाराष्ट्र राज्य परीक्षा परिषदेमार्फत रविवार २३ नोव्हेंबर २०२५ रोजी घेण्यात आलेल्या शिक्षक पात्रता परीक्षेचे नियंत्रण राज्य नियंत्रण कक्ष, जिल्हा नियंत्रण कक्ष, जिल्हा आयोजन व सनियंत्रण समिती कक्षाकडून अतिशय काटेकोरपणे करण्यात आले असून ‘‘टीईटी’ चा पेपर ३ लाखांत! शिक्षकांची टोळीच जेरबंद’ या आशयाच्या वृत्तामध्ये तथ्य नसल्याचे आयुक्त अनुराधा ओक यांनी स्पष्ट केले आहे.

दैनिक लोकमत वृत्तपत्राच्या 24 नोव्हेंबर रोजीच्या अंकात प्रसिद्ध झालेल्या वृत्ताच्या अनुषंगाने परिषदेकडून हे स्पष्टीकरण देण्यात आले आहे. त्यात नमूद करण्यात आले आहे की, महाराष्ट्र राज्य परीक्षा परिषदेत गोपनीयरित्या प्रश्नसंच तयार करून तज्ञांमार्फत स्वतंत्र पाकिटात सीलबंद केले जातात. तयार केलेल्या संचांपैकी यादृच्छिकपणे प्रश्नसंच निवडून गोपनीय मुद्रणालयाकडे दिला जातो. गोपनीय मुद्रणालयामार्फत प्रश्नपत्रिका छापून वर्गखोलीनुसार पाकिटे तयार करून केंद्रनिहाय बॉक्समध्ये सिलबंद पॅकिंग केले जाते. सदर बॉक्सेस सिलबंद गाड्यांमार्फत जिल्हा कस्टडीमध्ये पाठविले जातात. जिल्ह्यांच्या ठिकाणी प्रश्नपत्रिकांची कस्टडी ही शक्यतो जिल्हा कोषागार कार्यालय असते अथवा सी.सी.टी.व्ही. व हत्यारबंद पोलिस बंदोबस्त असलेल्या ठिकाणी असते. गोपनीय मुद्रणालयाकडून आलेल्या प्रश्नपत्रिकांचे बॉक्स हे सिलबंद गाडीतून आले असल्याची व बॉक्सेस व्यवस्थित सिलबंद असल्याची खातरजमा करूनच जिल्हा परीरक्षक व शिक्षणाधिकारी (प्राथमिक) याच्या उपस्थितीत, कस्टडीमध्ये सदर साहित्य घेतले जाते.

परीक्षेच्या दिवशी जिल्हा परीरक्षक व शिक्षणाधिकारी (प्राथमिक) यांच्या उपस्थितीत व्हिडीओ रेकॉर्डिंग (चित्रीकरण) करूनच झोनल ऑफिसरकडे केंद्रनिहाय प्रश्न पत्रिकांचे बॉक्स दिले जातात. झोनल ऑफिसर कस्टडी ते केंद्रावर सदर बॉक्सेस पोहोच करतांना या प्रवासाचेही चित्रिकरण केले जाते. केंद्रावर सदर बॉक्सेस मधून प्रश्नपत्रिकांची ब्लॉक निहाय पाकिटे काढून, ब्लॉकमध्ये सिलबंद पाकिटे वाटली जातात. उमेदवारांच्या, परीक्षार्थीच्या समोर सदर पाकिटे उघडली जातात. याच पद्धतीने या परीक्षेच्यावेळीही कार्यवाही झालेली आहे.

राज्यभरातून कोणत्याही ठिकाणाहून प्रश्नपत्रिकांची गाडी सिलबंद नसल्याबाबत अथवा गोपनीय प्रश्नपत्रिकांचे बॉक्सेस अथवा पाकिटे सिलबंद नसल्याची तक्रार प्राप्त झालेली नाही. अथवा असे निदर्शनास आले नाही. म्हणजेच गोपनीय मुद्रणालय ते परीक्षा केंद्र हा प्रश्नपत्रिकांचा प्रवास अत्यंत काटेकोरपणे झालेला दिसून येत आहे. या कोल्हापूर प्रकरणाच्या पार्श्वभूमीवर महाराष्ट्र राज्य परीक्षा परिषदेचे कामकाज उपरोक्त नमूद कार्यपद्धतीनुसार झाल्याने महाराष्ट्र राज्य परीक्षा परिषदेचा या प्रकरणाशी संबंध नाही, असेही श्रीमती ओक यांनी स्पष्ट केले आहे.

पुणे, दि. २५ : महाराष्ट्र राज्य परीक्षा परिषदेमार्फत घेण्यात येणाऱ्या प्राथमिक (इयत्ता ५ वी) व माध्यमिक (इयत्ता ८ वी) शिष्यवृत्ती परीक्षेच्या तारखेत बदल करण्यात आला असून आता ही परीक्षा २२ फेब्रुवारी २०२६ रोजी राज्यातील सर्व जिल्ह्यांमध्ये एकाच दिवशी घेण्यात येणार आहे.

दिनांक ८ फेब्रुवारी २०२६ रोजी होणाऱ्या केंद्रीय शिक्षक पात्रता परीक्षेला राज्यातील अनेक प्राथमिक व माध्यमिक शिक्षक प्रविष्ठ झालेले असल्याने शिष्यवृत्ती परीक्षेच्या तारखेत बदल करण्यात आला आहे. याची सर्व संबंधितांनी नोंद घ्यावी, असे महाराष्ट्र परीक्षा परिषदेमार्फत कळविण्यात आले आहे.

पुणे : सिद्धगुरुवर श्री सिद्धेश्वर ब्रह्मर्षी गुरुदेव हे तब्बल 68 दिवसांच्या महासाधने नंतर आपले दिव्य आशीर्वाद देण्यासाठी प्रथम पुण्यात येत आहेत. त्यांच्या सिद्धी साधनेच्या महाआशीर्वादाचा लाभ पुणेकरांना मिळावा यासाठी विश्व धर्म चेतना मंच,पुणे, पीसीएमसी परिवार यांच्या वतीने ‘सिद्धी साधनेचा महाआशीर्वाद’ या सोहळ्याचे आयोजन करण्यात आले आहे. हा सोहळा येत्या 29 नोव्हेंबर रोजी शनिवारी सायंकाळी 5 वाजता, वर्धमान सांस्कृतिक केंद्र, गंगाधाम, कोंढवा रोड, बिबवेवाडी, पुणे येथे होणार आहे, अशी माहिती आयोजक उत्तम बाठिया व सुमित चंगेडिया यांनी दिली आहे.

यावेळी सिद्धगुरुवर श्री सिद्धेश्वर ब्रह्मर्षी गुरूदेव यांचे व्याख्यान देखील होणार आहे. या सोहळ्यात सहभागी होण्यासाठी मोफत पासची व्यवस्था करण्यात आली असून ते कार्यक्रमस्थळी (स्वागत कक्ष येथे )दिले जाणार आहेत. या दिव्य सोहळ्याचा जास्तीत जास्त पुणेकरांनी लाभ घ्यावा, असे आवाहन आयोजकांच्या वतीने करण्यात आले.