मराठीत रहस्यमयी चित्रपट तसे फार कमीच पहायला मिळत असताना रहस्याच्या जोडीला विनोदही…ही हटके कल्पना कशी वाटते…?असाच एक धमाल विनोदाच्या सहाय्याने उत्कंठावर्धक झालेला रहस्यमयी गुंता ‘मर्डर मेस्त्री’ या आगामी चित्रपटाद्वारा प्रेक्षकांना पहायला मिळणार आहे. मराठी चित्रपटसृष्टीत सिनेमॅटोग्राफर म्हणून नावलौकिक मिळवणारे राहुल जाधव यांनी ‘मर्डर मेस्त्री’ या चित्रपटाचे दिग्दर्शन केलं आहे.

विनोदाची उत्तम जाण असलेले अनेककलाकार ‘मर्डर मेस्त्री’ सिनेमाच्या निमित्ताने एकत्र आले आहेत. यातल्या प्रत्येक कलाकराच्या अभिनयाची स्वतःची अशी एक वेगळी शैली आहे. दिलीप प्रभावळकर, वंदना गुप्ते या दोन मात्तबर कलाकारांसोबत हृषिकेश जोशी, विकास कदम, संजय खापरे, कमलाकर सातपुते, देवेंद्र भगत, क्रांती रेडकर, मानसी नाईक या नव्या दमाच्या कलाकारांची फळी या चित्रपटात पाहयला मिळणार आहे. चित्रपटातील निखळ विनोद हरवत चालला आहे. या निखळ विनोदाची अनुभती रसिक-प्रेक्षकांना ‘मर्डर मेस्त्री’ सिनेमा देणार आहे.

‘मर्डर मेस्त्री’ हा सस्पेन्स कॉमेडी चित्रपट आहे. हे सगळेच विनोदवीर आपल्या अचूक टायमिंगने धमाल उडवून देणारे असल्यामुळे एवढी सगळी स्टारकास्ट एकाच चित्रपटात येऊन काय धमाल उडवणार हे पाहणे औत्सुक्याचे ठरणार आहे. रहस्य लपवण्याच्या प्रयत्नात घडणाऱ्या गमती-जमतीना विनोदाची जबरदस्त फोडणी देत निर्माण होणारी गूढता हे या चित्रपटाच वेगळेपण आहे.

दिग्गज कलाकार आणि कुशल तंत्रज्ञांच्या जोडीने उत्कंठता वाढवणारा सस्पेन्स कॉमेडीचा जबरदस्त तडका ‘मर्डर मेस्त्री’ मध्ये पहायला मिळणार आहे. या चित्रपटाची कथा नेहा कामत यांची आहे तर पटकथा व संवाद प्रशांत लोके यांनी लिहिलेत. नाडियादवाला जेननेक्स्ट प्रोडक्शन्स आणि व्हीटीबी एन्टरप्राईझेस यांची संयुक्त निर्मिती असलेला ‘मर्डर मेस्त्री’ हा सिनेमा निर्माते अब्रार नाडियादवाला यांचा पहिलाच मराठी सिनेमा आहे.अब्रार नाडियादवाला आणि वैभव भोर निर्मित‘मर्डर मेस्त्री’ सिनेमातलं सगळ्या विनोदवीरांच विनोदाचं धूमशान… हास्याचे मळे फुलवणारं असणार आहे.

रहस्याला विनोदी तडका देणारा ‘मर्डर मेस्त्री’ हा धमाका चित्रपट येत्या १० जुलैला प्रदर्शित होणार आहे.

(‘ढोल-ताशे’ समीक्षण )

गणपती मंडळांनंतर आता वाढत चाललेलं ढोल-ताशे पथकांचं प्रस्थ आणि राजकारणासाठी पथकांचा होणारा वापर हा विषय तसा वास्तववादी ! हा  वास्तववाद  मांडणारी अनिल सपकाळ यांची उत्तम कथा आणि संवाद   दिग्दर्शक अंकुर काकतकर यांनी ते  चित्रपटाच्या चौकटीमध्ये मांडण्याचा चांगला प्रयत्न ‘ढोल ताशे’ या चित्रपटातून केला आहे. एक वेगळा विषय मांडण्याचा हा प्रयत्न निश्चितच सुरेख आहे पण शेवटाला थोडासा कुठेतरी लेखकच गोंधळेलेला असावा असे वाटणारा शेवट असलेला हा चित्रपट सुरेख संवादा मुळे आणि अभिजित खांडकेकर -जितु जोशी यांच्या उत्तम अभिनयामुळे चांगली रंगत भरतो .. आणि वास्तववादी आपल्या जवळपासच्या घटनांचा विचार करायला लावतो
अमेय कारखानीस (अभिजित खांडकेकर) हा आयटी क्षेत्रातील युवक चित्रपटाच्या केंद्रस्थानी आहे. आई-वडिलांच्या इच्छेखातर ‘आयटी’ क्षेत्राकडे वळलेल्या अमेयला समाजासाठी वेगळं काही तरी करायचं आहे. अमेरिकेतील मंदीचा फटका अमेयला बसतो आणि अचानक त्याची नोकरी जाते. अगदी याच काळामध्ये तो मित्राच्या ढोलताशा पथकाकडे आकर्षित होतो. ढोलताशा पथकामध्ये असणाऱ्या युवकांच्या ऊर्जेचा सकारात्मक वापर करण्याची कल्पना अमेयला सुचते. दुसरीकडे महाराष्ट्राच्या नवनिर्माणाचे स्वप्न पाहिलेला नेता (जितेंद्र जोशी) मुंबईमध्ये ढोलताशा पथकांच्या स्पर्धाचे आयोजन करतो. या स्पर्धेत अमेयचं पथकही सहभागी होतं. मुंबईत झालेल्या या स्पर्धेमध्ये आवाजाच्या मर्यादेचं उल्लंघन झाल्यामुळं जितेंद्र जोशीच्या विरोधकांकडून कोर्टात गुन्हे दाखल होतात. राजकीय स्वार्थापोटी ढोलताशा प‌थकांची नाहक बदनामी होते आहे, या भूमिकेतून अमेय कोर्टात ‘पीआयएल’ दाखल करतो. कोर्टातही अमेयच्याच बाजूने निकाल लागतो आणि युवा आघाडी पक्षाचा प्रमुख जितेंद्र जोशी (आदित्य देशमुख )अमेयला पक्षात येण्याची ऑफर देतो. अमेयची प्रेयसी आणि पत्रकार गोजिरी (हृषिता भट) आणि आई-वडिलांचा विरोध असतानाही जितेंद्र जोशीच्या युवा आघाडीच्या माध्यमांतून अमेय ढोलताशा पथकांच्या राज्यस्तरीय संघटनेचा प्रमुख होतो. त्यानंतर सुरू होतो राजकारणातील खेळ ! पक्षातील प्रवेशानंतर जितेंद्र जोशीला डोईजड होणाऱ्या अमेयला घोटाळ्यात गुंतवण्याचा डाव आखला जातो. नंतरच्या काळात हा संघर्ष आणखी तीव्र होतो. हा सारा संघर्ष ‘ढोल ताशे’ या चित्रपटात दिसतो.
पुण्यातील गणपतीची लक्ष्मी रस्त्यावरील मिरवणूक ,पुण्याचे ढोल ताशा चे शौर्य पथक हे हि पुणेकरांसाठी यात आकर्षण आहेच
प्रदीप वेलणकर, ईला भाटे . हृषिता भट यांचा  अभिनयही चांगलाच आहे  पुण्यातील सुदर्शन च्या शुभांगी दामलेही यात आहेत मोहन दामलेंनी हि न्यायाधीशाची छोटी भूमिका केली आहे पण न्यायाधीशाच्या निर्णयानेच चित्रपट घडतो .  एक लव्ह सॉंग सोडले तर अन्य 2 गाणी उत्तम आहेत काही अर्थ आणि भावना मांडणारी त्यांची चल हि सुरेख आहे   अमेयचा सहकारी ‘ संग्राम ‘हि चांगला रंगविला आहे विद्याधर जोशी तर ग्रेट असतातच बाबुभाई या त्यांच्या भूमिकेला फारसा वाव नसतानाही ते लक्षात राहतात . किरकोळ 3/४ चुका सिनेमात आहेत ज्या काढता आल्या असत्या पण त्यावर उहापोह करण्यासारखे एवढे काही नाही , सिनेमा ग्रेटच आहे

माणसाच्या मनात शिरण्याचा मार्ग पोटातून जातो असं म्हणतात. एखाद्या माणसाला खाण्यातून जिंकलं तर मनाने जिंकणं फारसं कठीण नसतं. खाण्याच्या पद्धतीतून खाणा-याचे नि खिलवणा-याचे संस्कार डोकावतात. म्हणूनच म्हणतात, खाणे हा केवळ उदरभरणाचा उपचार नसून तो एक दक्ष संस्कार आहे. दर बारा कोसावर भाषा बदलते तशी दर कोसावर खाद्यसंस्कृतीही बदलते. महाराष्ट्राची ही वैविध्यपूर्ण खाद्यसंस्कृती केवळ देशभरातच नाही तर जगभरात प्रसिद्ध आहे. महाराष्ट्रीयन खाद्यसंस्कृती जगभरात आपला ठसा उमटवते ती त्याच्या साधेपणामुळे आणि वैविध्यपूर्ण लज्जतीमुळे. महाराष्ट्रात खाद्यसंस्कृतीचा समृद्ध वारसा असूनही आज एकूण धकाधकीच्या जीवनात रोजच्या आहारात जागा घेतलीय ती फास्टफूड किंवा डाएटफूडने.

रोजच्या धावपळीत विविध व्यवधानं सांभाळताना अनेक ताणतणावांना सामोरे जावे लागतेय. याचा आरोग्यावर विपरित परिणाम होतोय आणि त्यामुळे अनेक व्याधींपासून मुक्तता मिळवण्यासाठी आहारसुद्धा संतुलित आणि योग्य पद्धतीचा घेण्याकडे लोकांचा कल वाढतोय. मात्र संतुलित आणि योग्य आहार म्हणजे नेमकं काय हे माहित नसल्यानं आहार संतुलनापेक्षा चुकीचा आहार घेतला जातो आणि आरोग्याची समस्या अधिक बिकट होते. म्हणूनच झी मराठीवर अन्न आणि आरोग्य यांचा सुरेख मिलाफ घालत आम्ही सारे खवय्ये कार्यक्रमात येत्या काही भागांमध्ये विशेष तज्ञमंडळींना पाचारण करण्यात येत आहे. आरोग्याबाबत काही खास सूचना देताना किंवा विविध विषयावर मार्गदर्शन करताना काही विशेष पाककृतींची ओळखही ही तज्ञमंडळी करून देणार आहेत. ६ जुलैला कान-नाक-घसा तज्ञ डॉ. ज्योत्सना जगताप तर ७ जुलैला ज्येष्ठ सौंदर्यतज्ञ माया परांजपे नोकरदार स्रियांनी कमीत कमी वेळेत पोषक आणि संतुलित तसेच सौंदर्य टिकवण्यसाठी काय आहार घ्यावा यासाठी मार्गदर्शन करतील. तसेच ८ जुलैला स्त्रीरोगतज्ञ डॉ. ललिता मायदेव आणि ९ जुलैला मार्गदर्शक सुचित्रा सुर्वे दहावी – बारावी झालेल्या मुलांना व पालकांना मार्गदर्शन करतील. सोमवार ते शनिवार दररोज दुपारी १.३० वाजता झी मराठीवर ‘आम्ही सारे खवय्ये’मध्ये हे विशेषतज्ञ खवय्यांना भेटतील त्यांच्या खास पाककृतींसह.