नवी दिल्ली – सर्व विरोधी पक्षांची एकजूट ठेवण्याचे प्रयत्न करणारी शरद पवार यांची पहिली बैठक संपन्न झाली
राष्ट्रवादी काँग्रेस पार्टीचे राष्ट्रीय अध्यक्ष श्री. शरद पवार यांच्या दिल्ली येथील ६ जनपथ या निवासस्थानी आज राष्ट्रीय पातळीवरील विरोधी पक्षांनी एकत्र येऊन देशातील सद्य परिस्थितीतील विविध समस्यांवर विचारविमर्श केला. वाढती बेरोजगारी, महिलांवरील वाढते अत्याचार यांसारखे अनेक प्रश्न ऐरणीवर आणण्याबाबत या सर्व विरोधी दलांचे एकमत झाले. तसेच श्री. शरद पवार यांच्या पुढाकाराने झालेल्या या बैठकीत विरोधी पक्षांची एकत्रित फळी सामूहिक प्रयत्नांद्वारे अधिक सक्षम राष्ट्रनिर्मितीच्या कार्यासाठी कटिबद्ध राहील व समाजाच्या सर्व घटकांना सामावून घेऊन त्यांच्या प्रगतीसाठी नियोजनपूर्वक एकत्र येईल असा संकल्प ठरवला गेला. या बैठकीला जम्मू-काश्मीर नॅशनल कॉन्फरन्सचे नेते डॉ. फारुख अब्दुल्ला, समाजवादी पक्षाचे नेते मुलायम सिंह यादव, पश्चिम बंगालच्या मुख्यमंत्री ममता बॅनर्जी, जदयूचे अध्यक्ष शरद यादव हे हजर होते. दिल्लीचे मुख्यमंत्री व आम आदमी पार्टीचे नेते अरविंद केजरीवाल यांनीही श्री. पवार यांना फोन करून या विरोधकांच्या फळीत सामील होण्याची इच्छा असल्याची भावना व्यक्त केली. परंतु त्यांच्या पूर्वनिर्धारित कार्यक्रमामुळे ते या बैठकीला येऊ शकले नाहीत. या बैठकीला राष्ट्रवादी काँग्रेसच्या ज्येष्ठ नेत्यांपैकी खासदार सुप्रिया सुळे, तारिक अन्वर, महंमद फैजल तसेच प्रफुल पटेल उपस्थित होते.

नवी दिल्ली- धर्मनिरपेक्ष सरकार साठी काँग्रेस बरोबर हातमिळवणी केलेले शरद पवार आता त्यांच्या दृष्टीने नेहमीच जातीयवादी असलेल्या भाजपा सह काँग्रेस लाही बाजूला सारून या दोन्ही पक्षांच्या विरोधात अन्य राजकीय पक्षांची एकजूट होते काय याची नवी चाचपणी करीत असल्याचे वृत्त आहे  . गोंधळ आणि गदारोळात संसदेचे पावसाळी अधिवेशन गुरफटले असतानाच राष्ट्रवादीचे अध्यक्ष शरद पवार यांच्या राजनीतीने वेग घेतला आहे. तृणमूल काँग्रेसच्या सर्वेसर्वा ममता बॅनर्जी मंगळवारी दिल्लीत आल्या असल्याने हीच संधी साधून  गैरभाजप, गैरकाँग्रेस पक्षांची मोट बांधण्याचे प्रयत्न त्यांनी सुरू केले आहेत. याच प्रयत्नाचा भाग म्हणून बुधवारी सायंकाळी पवार यांच्या निवासस्थानी तिसऱ्या आघाडीची चाचपणी होणार असून ममता बॅनर्जी यावेळी उपस्थित राहणार आहेत.पवार आणि ममता यांच्या उपस्थितीत होणाऱ्या या बैठकीला जनता दल युनायटेडचे अध्यक्ष शरद यादव आणि के. सी. त्यागी, समाजवादी पक्षाचे नेते मुलायमसिंह यादव किंवा रामगोपाल यादव, तृणमूल काँग्रेसचे सुदीप बंडोपाध्याय आणि डेरेक ओब्रायन आणि दिल्लीचे मुख्यमंत्री अरविंद केजरीवाल उपस्थित राहण्याची शक्यता आहे. या पक्षांचे लोकसभेत ५१, तर राज्यसभेत ४५ सदस्य आहेत. गैरभाजप-गैरकाँग्रेस आघाडीची चाचपणी करण्याची कल्पना पवार यांनी मांडल्यानंतर ज्येष्ठ नेत्याच्या नात्याने आपणच त्यात पुढाकार घेऊन आपल्या निवासस्थानी तशी बैठक बोलवावी, अशी सूचना ममतांनी केली. त्यानुसार पवार यांच्या ६ जनपथ येथे बुधवारी सायंकाळी सहा वाजता ही बैठक होणार आहे. तत्पूर्वी, सायंकाळी ४ वाजता ममता पंतप्रधान मोदींसोबत चर्चा करणार आहेत.
गेल्या चार दशकांपासून राजकारणात असलेल्या ममतांना दिल्लीच्या राजकीय वर्तुळात प्रथमच एवढा प्रतिसाद लाभत आहे. आपल्या तीन दिवसांच्या दौऱ्यासाठी ममतांचे आगमन झाल्यानंतर संसद भवनात त्यांच्या समर्थकांनी स्वागतपर घोषणा दिल्या. संसदेत प्रवेश केल्यानंतर ममता शेवटपर्यंत व्यस्त होत्या. संसदेच्या सेंट्रल हॉलमध्ये तृणमूल काँग्रेसचे सर्व ३४ खासदार त्यांची प्रतीक्षा करीत होते. त्यांच्यासोबत तसेच अन्य पक्षांच्या नेत्यांशी संवाद साधल्यानंतर ममता संसद भवनाच्या तळमजल्यावर मिळालेल्या पक्षाच्या नव्या कार्यालयात विविध नेत्यांशी भेटीगाठी घेण्यात व्यस्त झाल्या.

जिजामातेचे चारित्र्यहनन करणाऱ्यांना पाठीशी घालण्याची नीती आमची नाही-जितेंद्र आव्हाड

ठाणे -शिवशाहीर बाबासाहेब पुरंदरे यांच्यावरून राष्ट्रवादी आणि मनसे असा वादंग निर्माण होवू पाहतो आहे . काल मनसेचे राज ठाकरे यांनी पुरंदरे यांच्यावरून ‘जाणता राजा ‘ शरद पवार आणि ठाण्यातली वळवळ असे संबोधत  जितेंद्र आव्हाड यांच्यावर आपल्या भाषणातून निशाना  साधला होता . याबद्दल …
जिजामातेचे चारित्र्यहनन करणाऱ्यांना पाठीशी घालण्याची नीती आमची नाही , प्रबोधनकार ठाकरे यांनी लिहीलेले शिवचरित्र आमच्या मनाला भावले. त्यांनी लिहीलेले शिवचरित्र वाचून माझ्यासारखे कार्यकर्ते घडले. पुरोगामी महाराष्ट्रात आम्ही प्रबोधनकार ठाकरे यांचे विचार पुढे घेवून जात आहोत. पण राज ठाकरे पुरंदरेच्या मागे जाताना प्रबोधनकार ठाकरेंचा वारसा विसरत असल्याचा टोला राष्ट्रवादी काँग्रेसचे आमदार जितेंद्र आव्हाड यांनी राज ठाकरे यांना लगावला आहे.
राज ठाकरे यांनी काल ठाण्यात झालेल्या भाषणात आव्हाड यांच्यावर अप्रत्यक्ष टीका केली होती. त्याला आव्हाड यांनी उत्तर दिले आहे. पुरंदरेंच्या पुस्तकात महाराष्ट्राची अस्मिता असलेल्या राष्ट्रमाता जिजामातेचे चारित्र्यहनन केले आहे. चुकीचा इतिहास मांडण्याचे प्रयत्न पुरंदरेंच्या पुस्तकात करण्यात आला आहे. आम्ही त्याला विरोध करायचा नाही का असा प्रश्नही आव्हाड यांनी उपस्थित केला.
राज ठाकरे यांनी बाबासाहेब पुरंदरेंचा इतिहास वाचण्यापेक्षा वेळ काढून आजोबा प्रबोधनकार ठाकरेंनी लिहिलेला इतिहास वाचावा, असा सल्ला जितेंद्र आव्हाड यांनी राज ठाकरेंना दिला आहे. पुरंदरेच्या पुस्तकाचा राज ठाकरेंवर प्रभाव पडतोय व त्यांना प्रबोधनकार ठाकरेंच्या वारशाचा विसर पडतोय हा महाराष्ट्रासाठी दुर्दैवी योग असल्याची टीकाही अाव्हाड यांनी यावेळी केली.
-दरम्यान

काल राज ठाकरे यांनी भाजप -राष्ट्रवादी- एम आय एम चे ओ वे सी यांच्या सह न्यायाधीशांवरही टीप्पणी केली होती
‘आजच्या सरकारला या देशात निवडणुकांच्या तोंडावर दंगली घडवायच्या आहेत. यासाठी याकूबच्या फाशीच्या तमाशा बनवला गेला. हे सर्व मतांचे उद्योग आहेत. पण खबरदार, जर या महाराष्ट्रात काही वेडेवाकडे घडवण्याचा प्रयत्न केलात तर राज ठाकरेंशी गाठ आहे. रस्त्यावर बाहेर काढून फोडून काढीन,’ अशा शब्दांत मनसे प्रमुख राज ठाकरे यांनी साेमवारी भाजपच्या केंद्र व राज्यातील सरकारवर जोरदार हल्लाबोल करत कित्येक महिन्यांचे ‘मौन’ सोडले. उद्धव ठाकरेंशी भेट, महाराष्ट्र भूषण पुरस्काराचे राजकारण, याकूबची फाशी, नरेंद्र मोदींचे मौन आणि न्यायालयांची भूमिका अशा विविध विषयांवर त्यांनी परखड मते मांडली.विधानसभा निवडणुकांच्या निकालापासून शांत असलेल्या राज ठाकरेंनी साेमवारी ठाण्यातील कार्यकर्ता मेळाव्यात राज्यातील राजकीय परिस्थितीवर परखड भाष्य केले. भाषणाच्या सुरुवातीलाच त्यांनी उद्धव ठाकरे आणि आपल्या भेटींबद्दलच्या कथित बातम्यांबद्दल खुलासा केला. ‘इंदूरचे भय्यू महाराज यांच्या आमंत्रणावरून आपण तिकडे गेलो होतो, असा तर्क लावत भेटीच्या या बातम्या पुरवल्या गेल्या,’ असे सांगताना भाजपला घाबरवण्यासाठी शिवसेनेनेच या बातम्या पसरवल्याचा अप्रत्यक्ष आराेप राज ठाकरे यांनी केला.
देवेंद्र फडणवीस चांगला माणूस असल्याचे काैतुक करतानाच त्यांच्या सरकारवर मात्र ठाकरेंनी हल्लाबाेल केला. या सरकारच्या येण्याने राज्यात काही फारसा बदल झाला नसल्याचे त्यांनी नमूद केले. ‘शेतकरी आत्महत्या, सिंचन, टोल, दुष्काळ हे जुनेच प्रश्न आजही कायम आहेत,’ हे सांगतानाच ‘या सरकारची इतक्या लवकर भांडाफोड होईल वाटले नव्हते’, असा चिमटा काढत राज यांनी तावडे आणि पंकजा मुंडे या मंत्र्यांनाही लक्ष्य केले. राज्य सरकारच्या एका खात्यात कर्मचाऱ्यांच्या बदल्यांसाठी शंभर कोटींची लाच खाल्ल्याचा आरोपही त्यांनी केला. ‘मन की बात करणारे मोदी आता शांत का?’ असा सवाल करत राज यांनी मोदी आणि शहा या भाजपच्या सर्वोच्च नेत्यांवरही शरसंधान केले.
राष्ट्रवादीमुळेच जातीयवाद वाढला
शिवशाहीर बाबासाहेब पुरंदरेंच्या महाराष्ट्र भूषण पुरस्कारावरून चाललेल्या राजकारणाचा निषेध करत राज ठाकरे यांनी जितेंद्र अाव्हाड आणि शरद पवार यांच्यावरही टीका केली. ‘राष्ट्रवादी नावाचा पक्ष जेव्हापासून जन्माला आला तेव्हापासून राज्यात जातीयवादाचे विष पसरू लागले अाहे,’ असा थेट आराेप करत राज ठाकरे यांनी ‘एमअायएम’चे अाेवेसी बंधूंनाही लक्ष्य केले.
जे काँग्रेस केले तेच भाजपही करतेय
परप्रांतीयांच्या नावावर बांगलादेशी नागरिकांना राज्यात प्रवेश दिला जात आहे. या सगळ्यांना पोसण्याचे काम भाजप करत अाहे. खोटी आधार कार्डे वाटताना मनसे कार्यकर्त्यांनी भाजपच्या एका कार्यकर्त्याला पकडल्याची माहिती राज ठाकरे यांनी दिली. पूर्वी जे काँग्रेस करायची, तेच आता हे पार्टी विथ डिफरन्स म्हणणारे भाजपवाले करताहेत, असा हल्लाबोल त्यांनी केला.
मांसाहार झेपत नसेल तर करू नका
मांसाहाराच्या मुद्द्यावरून राज यांनी गुजराती समाजावर शरसंधान केले. ‘मांसाहार आपल्याला नाही झेपत तर गप्प बसा, पण मांसाहार करणाऱ्यांना विरोध करणे ही दहशत मुंबईत खपवून घेतली जाणार नाही,’ असा इशारा त्यांनी दिला.
न्यायालयाच्या भूमिकेवरही टीका
‘न्यायालये एरवी न्यायासाठी सुट्यांची कारणे देतात अाणि याकूब मेमनसाठी पहाटे तीन वाजता न्यायालये उघडतात, हे दुर्दैवी अाहे,’ हे सांगतानाच महेश भट, सलमान, नसिरुद्दीन शहा, राम जेठमलानी यांनीही याकूबच्या फाशीसंदर्भात घेतलेल्या भूमिकेवर राज यांनी नाराजी व्यक्त केली. याकूबच्या केसला २२ वर्षे आणि गणपती मंडपांच्या केसेस मात्र एका फटक्यात निकाली काढल्या जातात,’ याकडेही लक्ष वेधले.