सातारा (जिमाका) : जिल्हा परिषदेच्या पुढाकारातून व शेतकऱ्यांच्या सहभागातून सेंद्रीय शेतीला प्रोत्साहन देण्यासाठी ऑरगॅनिक उपक्रमाचा शुभारंभ पंचायत समिती, सातारा येथे नुकताच पालकमंत्री विजय शिवतारे यांच्या हस्ते करण्यात आला.
यावेळी जिल्हा परिषद अध्यक्ष माणिकराव सोनवलकर, मुख्य कार्यकारी अधिकारी नितीन पाटील, जिल्हा अधीक्षक कृषी अधिकारी जितेंद्र शिंदे, आत्माचे प्रकल्प संचालक गणेश घोरपडे, जिल्हा परिषदेचे कृषी विकास अधिकारी चांगदेव बागल, उपाध्यक्ष रवि साळुंखे, पशुसंवर्धन सभापती शिवाजीराव शिंदे, पंचायत समितीचे सभापती कविता चव्हाण, आदी उपस्थित होते.
सेंद्रीय शेतीच्या प्रमाणीकणासाठी नोंदणी केलेल्या उत्पादक शेतकऱ्यांकडील शेतमालाची विक्री महिला बचत गटांमार्फत करण्यात येणार आहे. ही विक्री पंचायत समिती येथील डी.आर.डी.ए.कडील उभारण्यात आलेल्या गाळ्यांमध्ये करण्यात येणार आहे. यामध्ये सेंद्रीय पद्धतीने उत्पादीत केलेला भाजीपाला, गुळ, काकवी, चवळी, गहू, ज्वारी, मोहरी, हरभरा, डाळ, कांदा घेवडा विक्रीसाठी उपलब्ध आहे तसे सेंद्रीय पद्धतीने आवळा ज्यूस, फेस पॅक, शाम्पू, साबण देखील विक्रीसाठी उपलब्ध आहेत.
ऑरगॅनिक उपक्रम पंचायत समिती आवारात सुरु करण्यात आला असून हे विक्री केंद्र आठवड्यातून गुरुवार व रविवार या दोन दिवशी सुरु राहणार आहे. या उपक्रमांतर्गत शेतकऱ्यांच्या शेतावर क्षेत्रीय भेट देणे, शेतकऱ्यांना प्रशिक्षण देणे, सेंद्रीय शेतीचे प्रमाणीकरणासाठी मदत करणे व कृषी विद्यापीठांमध्ये शेतकऱ्यांच्या सहलींचे आयोजन करण्यात येणार आहे.

सातारा (जिमाका) : जिल्हाधिकारी कार्यालयात सद्भावना दिन साजरा करण्यात आला. जिल्हाधिकारी कार्यालयाच्या नियोजन भवनामध्ये आयोजित कार्यक्रमात अपर जिल्हाधिकारी प्रमोद यादव यांनी उपस्थित अधिकारी व कर्मचाऱ्यांना सद्भावना दिनाची प्रतिज्ञा दिली.
मी अशी प्रतिज्ञा करतो/करते की, मी जात, वंश, धर्म, प्रदेश किंवा भाषा विषयक भेद न करता सर्व भारतीय जनतेचे भावनिक ऐक्य आणि सामंजस्य यासाठी काम करीन. मी आणखी अशी प्रतिज्ञा करतो/करते की, आमच्यामधील वैयक्तिक किंवा सामुहिक स्वरुपाचे सर्व प्रकारचे मतभेद मी हिंसाचाराचा अवलंब न करता विचार विनियम करुन व संविधानिक मार्गानी सोडवीन, अशी प्रतिज्ञा यावेळी देण्यात आली.
याप्रसंगी निवासी उपजिल्हाधिकारी संजीव देशमुख, उपजिल्हाधिकारी भारत वाघमारे, तहसीलदार चंद्रशेखर सानप, नेताजी कुंभारे, सविता लष्करे आदींसह जिल्हाधिकारी कार्यालयातील विविध शाखांचे अधिकारी व कर्मचारी उपस्थित होते.

सातारा (जिमाका) : नियोजन विभागाने दिलेल्या मर्यादेनुसार 197.35 कोटीचा प्रारुप आराखडा तयार करुन राज्यस्तरीय बैठकीत सादर केला होता. या बैठकीत चर्चा होवून 58.49 कोटी वाढीव निधी देण्यात आल्याने सातारा जिल्ह्यासाठी सन 2015-16 सर्वसाधारण जिल्हा वार्षिक नियतव्यय 255.84 कोटी रुपये अंतिम करण्यात आल्याची माहिती पालकमंत्री विजय शिवतारे यांनी दिली.
येथील नियोजन भवनामध्ये जिल्हा नियोजन समितीची सभा आज झाली. त्यावेळी पालकमंत्री बोलत होते. या बैठकीस विधान परिषदेचे सभापती रामराजे नाईक-निंबाळकर, जिल्हा परिषदेचे अध्यक्ष माणिकराव सोनवलकर, खासदार श्रीमंत छत्रपती उदयनराजे भोसले, खासदार विजयसिंह मोहिते-पाटील, आमदार सर्वश्री पृथ्वीराज चव्हाण, शशिकांत शिंदे, जयकुमार गोरे, शंभूराज देसाई, आनंदराव पाटील, महादेव जानकर, बाळासाहेब पाटील, श्रीमंत छत्रपती शिवेंद्रसिंहराजे भोसले, दिपक चव्हाण, प्रभाकर घार्गे, जिल्हाधिकारी अश्विन मुद्गल, मुख्य कार्यकारी अधिकारी नितीन पाटील, पोलीस अधीक्षक डॉ. अभिनव देशमुख, अपर जिल्हाधिकारी प्रमोद यादव, जिल्हा नियोजन अधिकारी हणमंत माळी आदी उपस्थित होते.
सभेच्या सुरुवातीला भारताचे माजी राष्ट्रपती दिवंगत ए.पी.जे. अब्दुल कलाम आणि माजी आमदार दिवंगत भाऊसाहेब गुदगे यांना श्रद्धांजली वाहण्यात आली. सभेच्या सुरुवातीलाच सभापती श्री. नाईक-निंबाळकर यांनी राज्यात नव्याने होऊ घातलेल्या 22 जिल्ह्यांबाबत विशेषत: सातारा जिल्ह्यातून प्रस्तावित माणदेश जिल्ह्याबाबत माध्यमातून दाखवल्या जाणाऱ्या बातम्यांबाबत खुलासा करण्याची मागणी केली. यावर पालकमंत्री श्री. शिवतारे म्हणाले, जनमाणसाच्या तसेच आपल्या सर्वांच्या भावना मुख्यमंत्री तसेच मंत्रीमंडळ यांच्यापर्यंत पोहोचविल्या जातील. निकष आणि नियमानुसार तसेच सर्वांना विश्वासात घेतल्याशिवाय कोणतेही पावले उचलली जाणार नाहीत. त्याचबरोबर सातारच्या जिव्हाळ्याचा असणारा वैद्यकीय महाविद्यालय आणि जिहे-कटापूर योजना पूर्ण होणार, अशी माहितीही श्री. शिवतारे यांनी सभागृहात दिली.
श्री. शिवतारे पुढे म्हणाले, नियोजन विभागाने दिलेल्या मर्यादेनुसार 197.35 कोटीचा प्रारुप आराखडा तयार करुन राज्यस्तरीय बैठकीत सादर केला होता. दि.11 फेब्रुवारी 2015 रोजी झालेल्या राज्यस्तरीय बैठकीत या आराखड्यावरील योजनांवर चर्चा होवून 197.35 कोटीच्या आराखड्यात 58.49 कोटी रुपये वाढीव निधी देण्यात आला आहे. याप्रमाणे सन 2015-16 सर्वसाधारण जिल्हा वार्षिक नियतव्यय 255.84 कोटी रुपये अंतिम करण्यात आला आहे.
जिल्हाधिकारी श्री. मुद्गल यांनी सर्वांचे स्वागत करुन प्रास्ताविक केले. सन 2014-15 साठी जिल्ह्यासाठी एकूण 228 कोटी रुपये इतकी अर्थसंकल्पित तरतूद प्राप्त झाली होती. उपलब्ध प्राप्त तरतूदीपैकी 100 टक्के निधी खर्च झालेला आहे. आदिवासी उपयोजना क्षेत्राबाहेरीच क्षेत्राचा माहे मार्च 2015 अखेरच्या खर्चाचा अहवाल सादर केला आहे. सन 2014-15 साठी मंजुर अर्थसंकल्पित तरतूद 124.30 कोटी होती. त्यापैकी रुपये 120.30 म्हणजेच रुपये 97.38 टक्के इतका खर्च झालेला आहे.सन 2014-15 साठी अनुसूचित जाती उपयोजनेंतर्गत 4812 लक्ष रुपये अर्थसंकल्पित तरतुदीपैकी 3909.41 लक्ष रुपये तरतूद प्रत्यक्ष प्राप्त झाली होती. त्यापैकी मार्च 2015 अखेर 3899.21 लक्ष रुपये निधी खर्च करण्यात आलेला आहे. या तीनही उपयोजनांच्या खर्चास आजच्या सभेत मान्यता देण्यात आली.
कास पठार येथे स्थलांतरीत शौचालय सुविधा पुरविणे व रस्ता सुधारणा करणे, ओझर्डे धबधबा विकसीत करणे, महाबळेश्वर येथील पॉईंटच्या स्वच्छतेसाठी प्लॅस्टिक विल्हेवाट मशिन पुरविणे, 332 अंगणवाडी इमारत बांधकामास मान्यता देणे तसेच माण येथे प्राथमिक आरोग्य केंद्र सुरु करण्यास मान्यता देण्यात आली. नाविन्यपूर्ण योजनेमधून जिल्ह्यातील न्यायालयाध्ये सीसीटीव्ही सर्व्हेलन्स यंत्रणा बसविणे आणि पाझर तलाव दुरुस्तीसाठी यंत्रसामुग्री खरेदी करण्यास मान्यता देण्यात आली.
आजच्या या बैठकीला विविध विभागांचे अधिकारी, पदाधिकारी, निमंत्रीत, विशेष निमंत्रीत सदस्य उपस्थित होते.

मुंबई – शिवशाहीर बाबासाहेब पुरंदरे यांना ‘महाराष्ट्र भूषण‘ पुरस्कार देण्यास विरोध करणारी याचिका आज (बुधवार) उच्च न्यायालयाने फेटाळून लावली. तसेच याचिकाकर्त्यांना दहा हजार रुपयांचा दंडही ठोठावण्यात आला आहे.

पुरस्काराबाबत 1 सप्टेंबर 2012 च्या अध्यादेशाचे पालन करण्यात आले नाही, असा आरोप करण्यात आला होता. पुरस्कार जाहीर झालेल्या व्यक्तीने ती कार्यरत असलेल्या क्षेत्रात सेवाभावी वृत्तीने किमान 20 वर्षे विशेष आणि उल्लेखनीय काम करणे बंधनकारक आहे. महाराष्ट्राबाहेरील व्यक्तीलाही पुरस्कार देता यावा यासाठी त्या व्यक्तीचे महाराष्ट्रात किमान 15 वर्षे वास्तव्य असावे अशी अट ठेवण्यात आली आहे. ‘पद्म’ पुरस्कारप्राप्त मान्यवरांना त्यात प्राधान्य देण्याचाही निकष आहे, परंतु बाबासाहेब यापैकी एकाही निकषात बसत नाहीत, असा दावा याचिकाकर्ते पद्माकर कांबळे आणि राहुल पोकळे यांनी केला होता. तो कोर्टाने फेटाळून लावला. बाबासाहेब पुरंदरे यांचे कार्य फार मोठे आहे. त्यांना पुरस्कार नाकारावा असे याचिकाकर्त्यांकडे कोणतेही ठोस पुरावे नाहीत, त्यामुळे याचिकेत तथ्य नाही, असे सांगत कोर्टाने याचिका फेटाळली आणि कोर्टाचा वेळ नाहक वाया घालवला असेही याचिकाकर्त्यांना फटकारले. कोर्टाने याचिकाकर्त्यांना 10 हजार रुपयांचा दंडही ठोठावला.पुरंदरेंच्या वतीने ज्येष्ठ वकील उदय वारुंजीकर यांनी युक्तीवाद केला. तर शेखर जगताप हे याचिकाकर्त्यांचे वकील होते. महाराष्ट्र सरकारच्या वतीने अनिल सिंग यांनी युक्तिवाद केला. त्यांनी सुरुवातीपासून याचिका पब्लिसिटी स्टंट असल्याची भूमिका घेतली होती.पुरस्कार देताना सरकारने डॉ. प्रकाश आमटे, डॉ. हिंमतराव बावस्कर, डॉ. रवींद्र कोल्हे आदी पात्र व्यक्तींना डावलल्याचा अर्जदारांचा आरोप आहे. या याचिकेची सुनावणी न्या. नरेश पाटील व न्या. एस. बी. शुक्रे यांच्यासमोर झाली. नोकरदार पद्माकर कांबळे आणि शेतकरी व व्यावसायिक राहुल पोकळे यांची ही याचिका दाखल केली होती.

पुणे
-पोलिसांनी मंगळवारी मध्यरात्री फिल्म ऐंड टेलिविजन इंस्टिट्यूट ऑफ इंडिया (एफटीआयआय)च्या कॅम्पसमध्ये प्रवेश करून १७ विद्यार्थ्यांपैकी पाच  जणांना अटक केलीत्यानंतर आज  न्यायालालाय्ने पाच विद्यार्थ्यांना जामीन मंजूर केला . पोलिसांनी मध्यरात्री १.१५ वाजता कॅम्पस प्रवेश करत ही कारवाई केली. मोदीजी!!  एफटीआयआयमध्ये शिकणारे विद्यार्थी आहेत,  गुन्हेगार नाहीत, असं राहुल गांधी यांनी म्हटलं आहे. राहुल गांधी यांनी याबाबत ट्विट केलं आहे.दिल्लीचे मुख्यमंत्री अरविंद केजरीवाल यांनीही केंद्र सरकारच्या या कारभाराचा निषेध नोंदवत एफटीआयआयच्या विद्यार्थ्यांना पाठिंबा दिला. महत्वाचं म्हणजे जोवर केंद्र सरकार आपला हट्ट सोडत नाही, तोपर्यंत एफटीआयआयच्या विद्यार्थ्यांनी दिल्लीत येऊन आपल्या अभ्यासाशी निगडीत काम चालू ठेवावं. दिल्ली सरकार त्यांना आवश्यक त्या गोष्टी उपलब्ध करुन देईल, असं केजरीवाल यांनी म्हटलं आहे.
एफटीआयआयचे संचालक प्रशांत पाठराबे यांना त्यांच्या कार्यालयात घेराव घातल्याप्रकरणी आणि सरकारी कामकाजात अडथळा आणल्याप्रकरणी डेक्कन पोलिसांकडून ही कारवाई करण्यात आली आहे. पाठराबे यांनी दिलेल्या तक्रारीत आपल्याला रोखून धरल्याची व सरकारी मालमत्तेच नुकसान केल्याची तक्रार दिली आहे. या तक्रारीवरून डेक्कन पोलिसांनी विकास अर्च, अजयन अडाट, रणजीत नायर, राजू बिश्वास, अश्विन शर्मा, ग्यान गौरव, अमय गोरे, कृतिका पांडे, गोविंद राजू, लेफाथ सुब्बा, शिनी जे. के., विनिता नेगी, यशस्वी शर्मा, अजय यादव, हिमांशू प्रजापती, हरिशंकर नचीमुथ्थू, सचेत चौधरी यांसह इतर पंचवीस विद्यार्थ्यांविरुद्ध गुन्हा दाखल केला आहे.   गुन्हा दाखल करण्यात आलेल्या विद्यार्थ्यांपैकी पाच जणांना अटक करण्यात आली आहे. सोमवारपासून सुरू असलेल्या मूल्यांकन पद्धतीवर विद्यार्थ्यांनी आक्षेप घेतला होता. त्याच्या विचारणेसाठी विद्यार्थ्यांनी संचालकांना घेराव घातला होता.   ज्या विद्यार्थ्यांविरोधात पोलिसात एफआयआर दाखल करण्यात आले आहे यामध्ये तीन मुलींचा देखील समावेश आहे. मात्र मुलींना अटक करण्यात आलेली नाही.

मुंबई- ज्येष्ठ साहित्यिक भालचंद्र नेमाडे हे माझ्या दृष्टीने साहित्य क्षेत्रातले दहशतवादी आहेत तर बाबासाहेब पुरंदरेंना देण्यात येणारा सन्मान योग्य आहे, असे ‘पानिपत‘कार विश्वास पाटील यांनी पत्रकार परिषदेत सांगितले.
बाबासाहेब पुरंदरे यांना ‘महाराष्ट्रभूषण‘ पुरस्कार देण्यावरून विविध नेत्यांनी वक्तव्ये केली आहे. पत्रकार परिषदेत बोलताना विश्वास पाटील म्हणाले, ‘भालचंद्र नेमाडे हे माझ्या दृष्टीने साहित्य क्षेत्रातले दहशतवादी आहेत. नेमाडे शिवछत्रपतींबद्दल बोलतात हाच मोठा विनोद आहे. नेमाडेंनी शिवचरित्रावर, छत्रपतींच्या कार्याबद्दल समोरासमोर येऊन खुलेपणाने बोलावे. नेमाडे यांनी ज्ञानपीठाची शान ठेवावी. त्यांनी आमच्या सोबत खुली चर्चा करावी. ‘बाबासाहेबांनी कधीही स्वतःचा टेंभा मिरवला नाही. ते स्वतःला इतिहासकार नव्हे तर शिवशाहीर संबोधतात. बाबासाहेबांचा सन्मान हा मराठी मातीचा सन्मान आहे. बाबासाहेबांना पुरस्कार मिळू न देणे हा पुरस्काराचा आणि त्यांचा अवमान आहे. मात्र, यावेळी साहित्यिक मुग गिळून बसले आहेत. त्यांनी पुढे येऊन बोलावे. बाबासाहेबांना लक्ष केले जात आहे, बाबासाहेबांना सन्मान मिळू न देणे हे दुर्गप्रेमींचा अवमान आहे. बाबासाहेबांनी मराठ्यांसोबत ब्राह्मण फितुरांचाही उल्लेख केला आहे. जातिभेदाच्या द्वेषातून पुरंदरेंना विरोध करणे ही दुर्दैवी बाब आहे. पुरंदरेंनी हिंदुत्ववादी शिवाजी रंगवले असे म्हणणेही चुकीचे आहे. अमेरिकन लेखक जेम्स लेनच्या लिखाणाला पुरंदरेंची मदत नाही. लेनची गाढवावरून धिंड काढली पाहिजे.‘ असेही पाटील म्हणाले.