प्रशासनाच्या चोख नियोजनामुळे उत्साहाचे वातावरण

नाशिक : सिंहस्थ कुंभमेळ्याच्या दुसऱ्या पर्वणीसाठी जमलेल्या लाखो भाविकांच्या साक्षीने आखाड्यांच्या महंतानी मोठ्या उत्साहात शाही स्नान केले. अतिशय शांततेत व उत्साही वातावरणात दुसऱ्या पर्वणीतील शाहीस्नान रविवारी सकाळी पार पडले.

सकाळी सहा वाजता साधुग्राममधून निघालेल्या शाही मिरवणुकीची सांगता रामकुंडावरील शाही स्नानाने झाली. तिन्ही आखड्याच्या साधु महंतांनी लाखो लोकांच्या साक्षीने रामकुंडावर स्नान केले. अखिल भारतीय श्री पंच निर्मोही अनी आखाड्याच्या महंतांचे प्रथम रामकुंडावर आगमन झाले. तेथे त्यांचे स्वागत नाशिकचे पालकमंत्री तथा कुंभमेळा मंत्री गिरीश महाजन, सहकार राज्यमंत्री दादाजी भुसे आदींनी केले. गोदावरीच्या दोन्ही तीरावर लाखो भाविकांनी हा शाही सोहळा पाहण्यासाठी उपस्थिती लावली होती. निर्मोही आखाड्याच्या शाही स्नानानंतर श्री पंच दिगंबर आखाडा व अखिल भारतीय श्री पंच निर्वाणी आखाड्याच्या खालशांनी शाही स्नान केले.

शाही पर्वणीबरोबरच अमावास्या आल्यामुळे देशभराबरोबरच जगभरातून मोठ्या संख्येने भाविकांनी गोदातीरी स्नानासाठी गर्दी केली होती. रामकुंड बरोबरच लक्ष्मीनारायण घाट, रोकडोबा मैदान, टाळकुटेश्वर याबरोबरच गोदातीरावरील इतरही घाटांवर भाविकांनी लाखोंच्या संख्येने स्नानाचा आनंद लुटला. प्रौढांबरोबरच तरुणांचाही या शाही सोहळ्यासाठी मोठ्या प्रमाणात सहभाग होता. शाही मार्गावरुन मोठ्या थाटात आलेल्या आखाड्याच्या महंतांनी गोदावरीचे पूजन करून स्नान केले. त्यांच्या शाही स्नानानंतर सर्वसामान्य नागरिकांसाठी घाट मोकळे करण्यात आले होते. त्यामुळे भाविकांची गोदावरीच्या पवित्र पाण्यात डुबकी मारण्यासाठी गोदावरीच्या दोन्ही तीरावर झुंबड उडली होती.

शाही मार्गावर तसेच रामकुंडावर पोलीस प्रशासनाने केलेल्या शिस्तबद्ध नियोजनामुळे शाही स्नान मोठ्या उत्साहात पार पडले. तसेच आरोग्य सेवेची तत्काळ उपलब्धता, स्वच्छता कर्मचाऱ्यांनी तातडीने केलेली स्वच्छता यामुळे शाही सोहळा आणखीनच खास झाला. प्रशासनाच्या नियोजनावर पालकमंत्री गिरीष महाजन स्वतः देखरेख ठेवत होते. साधु महंतांच्या शाहीस्नानानंतर पालकमंत्री श्री. महाजन यांनीही पवित्र स्नान केले.

नाशिक : सिंहस्थ कुंभमेळ्यांतर्गत दुसऱ्या पर्वणीच्या दिवशी रामकुंड येथील माध्यम केंद्रास विभागीय आयुक्त एकनाथ डवले यांनी भेट देत पत्रकारांशी संवाद साधला. श्री. डवले यांनी माध्यम केंद्राची पाहणी करीत समाधान व्यक्त केले.

माहिती व जनसंपर्क महासंचालनालयाच्या जिल्हा माहिती कार्यालय, नाशिक यांच्यातर्फे रामकुंड, साधूग्राम आणि त्र्यंबकेश्वर येथे माध्यम केंद्रे कार्यान्वित करण्यात आली आहेत. रामकुंड येथील माध्यम केंद्र श्री खिमजी भगवानदास आरोग्य भवन, सरदार चौक, नाशिक येथे कालपासून कार्यरत आहे. या केंद्राचे कामकाज 24 तास सुरू आहे. आज सकाळपासूनच पत्रकार बांधवांनी माध्यम केंद्रास भेट देत इंटरनेट, ई- मेल, फॅक्स, सोशल मीडिया या अत्याधुनिक साधनांचा लाभ घेतला.

या पार्श्वभूमीवर श्री. डवले यांनी माध्यम केंद्रात पत्रकारांशी संवाद साधला. माध्यम केंद्राचा आम्हाला लाभच झाला, असे पत्रकारांनी सगितले. पर्वणी कालावधीत भक्तांना सोयी पुविण्याचा राज्य शासनाने आटोकाट प्रयत्न केले आहेत. भक्तांना कमीत कमी पायी चालता यावे म्हणून फेरनियोजन केले. त्यामुळे त्यांना विनाप्रयास पवित्र स्नान करता आले, असेही पत्रकारांनी आवर्जून ‍नमूद केले.

नाशिक- त्र्यंबकेश्वर येथे सर्वांच्या समन्वयातून कुंभमेळा यशस्वी होईल, असे आयुक्त श्री. डवले यांनी सांगितले. यावेळी माहिती उपसंचालक सतीश लळीत, जिल्हा माहिती अधिकारी डॉ. किरण मोघे, राजेंद्र सरग (जिल्हा माहिती अधिकारी, अहमदनगर), डॉ. राजू पाटोदकर (जिल्हा माहिती अधिकारी, रायगड), रणजितसिंह राजपूत (जिल्हा माहिती अधिकारी, धुळे व नंदुरबार), दिलीप गवळी (जिल्हा माहिती अधिकारी, नांदेड), विलास बोडके, नंदकुमार वाघमारे, किरण वाघ, जगन्नाथ पाटील आदी यावेळी उपस्थित होते.

त्र्यंबकेश्वर : सिंहस्थ कुंभमेळ्याच्या दुसऱ्या पर्वणीचे शाही स्नान त्र्यंबकेश्वर येथे मोठ्या उत्साहात संपन्न झाले. ध्वज, पताका, शंखनाद आणि ‘हर हर महादेव’ च्या नामघोषात विविध आखाड्यांच्या साधू-महंतांनी मिरवणूकीद्वारे कुशावर्त येथे येऊन शाही स्नान केले. देश-विदेशातून आलेल्या लाखो भाविकांनी त्र्यंबकेश्वर येथे येऊन शाही स्नानाची कुंभमेळ्यातील दुसरी पर्वणी साधली.

शाही स्नानाप्रसंगी कुंभमेळा मंत्री तथा नाशिक जिल्ह्याचे पालकमंत्री गिरीष महाजन, सहकार राज्यमंत्री दादाजी भुसे, नगराध्यक्ष अनघा फडके, जिल्हाधिकारी दीपेंद्रसिंह कुशवाह, मेळा अधिकारी महेश पाटील, मुख्याधिकारी निवृत्ती नागरे यांनी कुशावर्त परिसरात उपस्थित राहून प्रत्यक्ष नियोजनावर लक्ष ठेवले. आखाड्यांच्या शाही स्नानासाठी विविध सोयी-सुविधांचे नियोजन केले. विशेष पोलीस महानिरीक्षक जे. जे. सिंह, पोलीस अधीक्षक संजय मोहिते, सहायक पोलीस अधीक्षक डॉ. प्रवीण मुंडे यांच्या मार्गदर्शनाखाली त्र्यंबकेश्वर शहरात चोख बंदोबस्त ठेवण्यात आला.

त्र्यंबकेश्वर शहरात शनिवारी सकाळपासूनच देश-विदेशातील भाविक शाही स्नानासाठी दाखल झाले होते. दिवसभरात लाखो भाविकांनी कुशावर्तात स्नान केले. रविवारी पहाटे तीन वाजल्यापासूनच त्र्यंबकेश्वर शहरातून विविध आखाड्यांच्या साधू-महंतांनी शाहीस्नानासाठी कुशावर्त कुंडाकडे सवाद्य मिरवणुकीसह प्रयाण केले. शाही मिरवणूक मार्गावर ठिकठिकाणी रांगोळ्या घालून आणि पुष्प सजावट करण्यात आली होती. साधू-महंतांच्या दर्शनासाठी भाविक रस्त्याच्या दुतर्फा उभे होते.

‘हर हर महादेव’ आणि ‘बम बम भोले’ चा गजर करत विविध आखाड्यांच्या शाही मिरवणुका कुशावर्ताकडे दाखल झाल्या. प्रशासनाचे योग्य नियोजन आणि पोलीसांचा चोख बंदोबस्त यामुळे निर्धारित वेळेत सर्व आखाड्यांचे शाही स्नान पार पडले. प्रशासनामार्फत कुशावर्त परिसरात शाही स्नानासाठी विविध सोयी-सुविधा उपलब्ध करण्यात आल्या होत्या. मिरवणुकांचे येण्याचे आणि परत जाण्याचे मार्ग वेगवेगळे असल्याने कुठल्याही प्रकारचा गोंधळ न होता शाही स्नान शांततेत पार पडले.

कुशावर्त परिसरात मुद्रित आणि इलेक्ट्रॉनिक्स माध्यमांना वार्तांकनासाठी स्वतंत्र व्यवस्था करण्यात आली होती. कुशावर्ताच्या समोर उभारण्यात आलेल्या टेहळणी टॉवरमार्फत परिसराच्या सुरक्षा व्यवस्थेवर पोलीस बारकाईने लक्ष ठेवून होते. कुशावर्तमध्ये शनिवारी मध्यरात्री बारा वाजेपर्यंत सर्वसामान्य भाविकांनी स्नान केले. त्यानंतर पहाटे विविध आखाड्यांच्या शाही स्नानास प्रारंभ झाला.

शाहीस्नानाचा पहिला मान तपोनिधी पंचायती निरंजनी आखाड्याला मिळाला. पहाटे 3.20 वाजता या आखाड्याची मिरवणूक निघाली. महंत आशिषगिरीजी महाराजांनी स्नान करुन शाहीस्नान पर्वणीचा प्रारंभ केला. त्यानंतर तपोनिधी पंचायती आनंद आखाडा, शंभु पंचदशनाम जुना आखाडा, पंचायती दशनाम आवाहन आखाडा, श्री पंच अग्नी आखाडा, महानिर्वाणि आखाडा, पंचायती अटल आखाडा, पंचायती बडा उदासीन आखाडा, पंचायती नवा उदासिन आखाडा आणि पंचायती निर्मल आखाडा यांनीही भाविकांसह शाहीस्नानाची पर्वणी साधली.

पहाटे सुरु झालेले विविध आखाड्यांचे शाही स्नान सकाळपर्यंत सुरु होते. त्यानंतर दुपारी 12 वाजेपासून सर्वसामान्य भाविकांनी स्नानासाठी कुशावर्तावर गर्दी केली. दिवसभर लाखो भाविकांनी आजच्या या शाहीस्नानाचा लाभ घेतला. प्रारंभी शंकराचार्य स्वामी स्वरुपानंद सरस्वती यांनी कुशावर्तात स्नान केले. दरम्यान, आजच्या या शाहीस्नानाच्या दिवशी मध्य प्रदेशचे कुंभमेळा मंत्री कैलाश विजयवर्गीय यांच्यासह विविध मान्यवरांनी त्र्यंबकेश्वर येथे भेट दिली.

अमरावती : विभागीय अधिस्वीकृती समितीच्या बैठकीत अध्यक्षपदी अनिल अग्रवाल यांची आज सर्वानुमते निवड करण्यात आली.

प्रसार माध्यमांशी संबंधित व्यक्तींना अधिस्वीकृती पत्र देण्यासंबंधी दिनांक 13 ऑगस्ट 2015 रोजीच्या शासन निर्णयानुसार राज्य अधिस्वीकृती समिती व विभागीय अधिस्वीकृती समिती स्थापन करण्याचे आदेश शासनाने दिले होते. त्याअनुषंगाने विभागीय माहिती कार्यालय येथे उपसंचालक(माहिती) मोहन राठोड यांच्या अध्यक्षतेखाली अमरावती विभागीय अधिस्वीकृती समिती अध्यक्ष निवडीसाठी बैठकीचे आयोजन करण्यात आले होते.

बैठकीस समितीचे सदस्य शौकतअली मीर साहेब, प्रदीप देशपांडे, संजय शेंडे, गिरीश शेरेकर तसेच जिल्हा माहिती अधिकारी सुरेश काचावार, सहायक संचालक अशोक खडसे व माहिती सहाय्यक विजय राऊत आदी उपस्थित होते.

प्रारंभी श्री. राठोड यांनी सर्व सदस्यांचे पुष्पगुच्छ देऊन स्वागत केले. बैठकीचे आयोजन अध्यक्ष निवडीसाठी करण्यात आल्याचे त्यांनी सांगितले. यावेळी सदस्य संजय शेंडे यांनी अध्यक्षपदासाठी अनिल अग्रवाल यांचे नाव सुचविले त्यास सदस्य शौकतअली मीर साहेब यांनी अनुमोदन दिले. यानंतर सर्व सहमतीने अध्यक्ष म्हणून अनिल अग्रवाल यांची निवड करण्यात आल्याचे सदस्य सचिव मोहन राठोड यांनी जाहीर केले. अनिल अग्रवाल हे दैनिक अमरावती मंडल वृत्तपत्राचे संपाद‍क आहेत. बैठकीनंतर जिल्हा माहिती अधिकारी सुरेश काचावार यांनी उपस्थित समिती सदस्यांचे आभार मानले.

मुंबई : हज यात्रेसाठी मुंबई येथून जाणाऱ्या पहिल्या विमानाला अल्पसंख्याक विकास मंत्री एकनाथराव खडसे यांनी हिरवा झेंडा दाखविला. गुरुवार पहाटे पाचच्या सुमारास छत्रपती शिवाजी आंतरराष्ट्रीय विमानतळावर महाराष्ट्र हज कमिटीच्या माध्यमातून हा कार्यक्रम झाला. हज यात्रेसाठी निघालेल्या 340 यात्रेकरुंना धार्मिक ग्रंथ व पुष्पगुच्छ देऊन श्री.खडसे यांनी शुभेच्छा दिल्या.

यावेळी महाराष्ट्र राज्य हज समितीचे अध्यक्ष इब्राहिम शेख, ऊर्दू अकादमीचे कार्याध्यक्ष रौफ खान, माजी मंत्री नसीम खान, अल्पसंख्याक आयोगाचे अध्यक्ष मोहम्मद हुसेन खान ऊर्फ अमीर खान, अल्पसंख्याक विभागाच्या सह सचिव अैनुल अत्तार आदी उपस्थित होते.

हज यात्रेसाठी जाणे हे प्रत्येक मुस्लीम बांधवाचे स्वप्न असते. त्यांचे हे स्वप्न पूर्ण होत असल्याबद्दल मी त्यांना शुभेच्छा देतो. राज्यातील दुष्काळी परिस्थितीचे निर्मुलन व्हावे आणि देशात सुख, शांती नांदावी यासाठी प्रार्थना करण्याचे आवाहनही श्री.खडसे यांनी यावेळी यात्रेकरुंना केले.

मुंबई : पावसाने ओढ दिल्याने होरपळणाऱ्या महाराष्ट्राला गेल्या काही दिवसांपासून झालेल्या पावसाने मोठा दिलासा दिला आहे. महाराष्ट्राचे भविष्य बदलण्याची ताकद असलेल्या जलयुक्त शिवार अभियानांतर्गत झालेल्या मोठ्या प्रमाणावरील कामांमुळे शेततळी, बंधारे भरण्यास सुरूवात झाली आहे. त्यामुळे बळीराजा सुखावला असून जलाशयांमुळे भूजल पातळी वाढण्यात मदत होणार आहे. भविष्यातील पाणी व चाऱ्याचा प्रश्न सुटण्यास यामुळे निश्चितच मदत होणार आहे.

“मराठवाड्यावर पावसाने कृपा केल्याने मी निसर्गाचे आभार मानतो. असाच दिलासा संपूर्ण राज्याला मिळू दे अशी प्रार्थना करतो. जलयुक्त शिवार अभियानांतर्गत बांधलेली शेततळी आणि बंधारे पावसाच्या पाण्याने भरले. ही समाधानाची बाब आहे. ही योजना शाश्वत सिंचनाचा मार्ग निश्चितपणे प्रशस्त करेल”, असे मुख्यमंत्री देवेंद्र फडणवीस यांनी समाधान व्यक्त केले आहे. जपान दौऱ्यावर असतानाही राज्यातील परिस्थितीचा ते सातत्याने आढावा घेत आहेत.

यंदा पुरेसा पाऊस न पडल्याने राज्यात टंचाईसदृश्य परिस्थिती निर्माण झाली होती. यामुळे शेतकरी व प्रशासनाने पाणी व चारा टंचाईबाबत उपाययोजना करण्यास सुरूवात केली होती. मात्र तीन दिवस पावसाने सतत हजेरी लावल्याने जलयुक्त शिवार अभियानांतर्गत केलेल्या बांधबंदिस्ती, नाला खोलीकरण, ओढ्यांचे सरळीकरण व खोलीकरण यासारख्या कामांमुळे तीनच दिवसात या ठिकाणी पाणी झुळूझुळू लागले आहे. याबरोबरच विहिरींच्या पाणी पातळीत वाढ होऊ लागली आहे. या अभियानाच्या पहिल्याच वर्षी राज्यात सुमारे 6 हजार गावात एक लाखांहून अधिक कामे झाली आहेत. प्रचंड प्रमाणात लोकसहभाग हे अभियानाचे अनन्यसाधारण वैशिष्ट्य ठरले आहे. नुकत्याच झालेल्या पावसामुळे हे अभियान यशस्वितेच्या मार्गावर आहे.

लातूर जिल्ह्यात अगदी काही दिवस पुरेल एवढाच पाणीसाठा राहिला होता. मांजरा धरणात केवळ 1.3 दशलक्ष घनमीटर (द.ल.घ.मी.) पाणी उरले होते. या पावसामुळे ते 3 द.ल.घ.मी. झाले आहे. निम्न तेरणा धरणातून निलंगा शहराला पाणीपुरवठा होतो. तिथे 2 द.ल.घ.मी. पर्यंत पाणी उरले हाते. या पावसामुळे ते 5 द.ल.घ.मी. एवढे झाले आहे. आता शहराला तीन महिने पाणी पुरेल एवढा साठा उपलब्ध झाला आहे. येत्या काही दिवसात असाच पाऊस पडण्याची शक्यता हवामान खात्याने वर्तविली आहे. जलयुक्त शिवार योजनेंतर्गत जेथे कामे झाली आहेत, तेथे पाण्याचा साठा दिसू लागला आहे. पावसाने ओढ दिल्याने पेरण्या उशिरा झाल्या होत्या. हा पाऊस रब्बी पिकांसाठीही उपयुक्त ठरेल, असे आशादायी चित्र निर्माण झाले आहे.

परभणी जिल्ह्यात प्रत्येक तालुक्यात सरासरी 50 मि.मी. पाऊस पडला. जलयुक्त शिवार अंतर्गत तयार झालेल्या साठवणूक नाला, बंधारे यात पाणी साठले आहे. या जिल्ह्यात जमिनीची धूप मोठ्या प्रमाणात झालेली असल्यामुळे पावसाचे पाणी जास्त जिरले आहे. कापूस, सोयाबीन तसेच रब्बीतील पिकाला या पावसाचा फायदा होणार आहे. जायगाव, भारसवाडा, झरी, कौडगाव ता. गंगाखेड, चारठाणा या गावात पिण्याच्या पाण्याचा प्रश्न आता राहणार नाही.

उस्मानाबाद जिल्ह्यात तीन दिवस सतत चांगला पाऊस पडला असल्याने सरासरी 36 मि.मी. एवढी पावसाची नोंद झाली आहे. कळंब, खर्डा या गावांना टँकरने पाणी देण्याबाबतची मागणी होती. मात्र आता त्याची आवश्यकता राहणार नाही. शेतकऱ्यांमध्ये समाधानाचे वातावरण असून जलयुक्त शिवारातील पाणी साठ्यांमध्येही वाढ झाली आहे.

बीडमधील लघु व मध्यम प्रकल्पातील धरणांमध्ये समाधानकारक पाऊस पडल्याने पाणी साठू लागले आहे. टँकरची संख्या कमी झाली आहे. पाटोदा, गेवराई येथील टँकर बंद करण्यात आले आहेत. या जिल्ह्यात जलयुक्त शिवार अभियानांतर्गत 4 हजार कामे हाती घेण्यात आली असून पाणीसाठ्यात वाढ झाली आहे.

नांदेड जिल्ह्यात पिण्याच्या पाण्याची टंचाई कमी झाली आहे. जलयुक्त शिवार योजनेअंतर्गत पाण्याची पातळी वाढली आहे. मुख्यमंत्री देवेंद्र फडणवीस यांनी या जिल्ह्यातील लोहा तालुक्यातील खांबेगाव, आंबेसावंगी या जिल्ह्यांना भेट दिली असता त्यावेळी येथील पाणीसाठे कोरडे होते. आता गावातही पाणीसाठा पुरेशा प्रमाणात झाला आहे. विहिरी, नाला यात पाणी भरु लागले आहे. चारा टंचाई जाणवणार नाही असे चित्र निर्माण झाले आहे. येथे जलयुक्त शिवार योजनेंतर्गत 3 हजार 121 कामे पूर्ण झाली असून 457 कामे प्रगतीपथावर आहेत. याशिवाय यापुर्वीच 1 हजार विहिरींच्या पुनर्भरणाचे कामही झाले आहे.

हिंगोली जिल्ह्यात सरासरी 46 टक्के पाऊस पडल्याने पुरेसा पाणीसाठा निर्माण झाला आहे. पुढचे 10 दिवस असाच पाऊस पडत राहिल्यास जमिनीतील पाण्याचे पुनर्भरण होऊन रब्बी पिकास त्याचा फायदा मिळणार आहे. जलयुक्त शिवार योजनेंतर्गत 33 सिमेंट नाला बांधणीचे काम झाले असून समाधानकारक पाणी साठा दिसून येत आहे.