पुणे : अभिनव गंधर्व पंडित रघुनाथजी खंडाळकर संगीत कला अकादमी, पुणे यांच्यावतीने शनिवार दि. 3 आणि रविवार दि. 4 मे रोजी अभिजात भारतीय शास्त्रीय संगीतावर आधारित ‘ज्ञानदेव संगीत महोत्सवा’चे आयोजन करण्यात आले आहे.
महोत्सव पर्वती-विद्यानगरी येथील कॉलेज ऑफ इंजीनिअरिंग अँड टेक्नॉलॉजी अँड जी. के. पाटे (वाणी) इन्स्टिट्यूट ऑफ मॅनेजमेंटच्या कै. दादासाहेब केतकर सभागृहात होणार आहे. महोत्सवाची सुरुवात सायंकाळी ५ वाजता होणार आहे.
राजस उपाध्ये यांच्या व्हायोलिन वादनाने शनिवारी (दि. 3) महोत्सवास प्रारंभ होईल. त्यानंतर प्रसिद्ध गायक धनंजय हेगडे यांचे शास्त्रीय गायन होईल. प्रसिद्ध तबलावादक पद्मश्री पंडित विजय घाटे यांचा ‘मेलोडीक रिदम’ हा कार्यक्रम होणार आहे. यात शीतल कोलवलकर (कथक), सुरंजन खंडाळकर (गायन), ओमकार दळवी (पखवाज), अमेय बिचू (संवादिनी), सागर पटोकार (पढंत) यांचा सहभाग असणार आहे.
महोत्सवाच्या दुसऱ्या दिवशी (दि. 4) पंडित रघुनाथ खंडाळकर यांचे शिष्य महेश कंटे आणि शंकर गिरी यांचे सहगायन होईल. त्यानंतर यशवंत वैष्णव यांचे एकल तबलावादन होणार असून त्यांना मिलिंद कुलकर्णी संवादिनी साथ करतील. कै. विप्रदास चंद्रकांत मेणकर (ज्येष्ठ उद्योजक, संगीतप्रेमी) स्मृती पुरस्काराने पद्मश्री पंडित विजय घाटे यांचा गौरव केला जाणार असून पुरस्काराचे वितरण प्रसिद्ध उद्योजक विलास जावडेकर यांच्या हस्ते होणार आहे. या प्रसंगी प्रसिद्ध वैद्य प्रशांत अनंत सुरू यांची प्रमुख उपस्थिती असणार आहे.
महोत्सवाची सांगता विद्यालयाचे संस्थापक अभिनव गंधर्व पंडित रघुनाथ खंडाळकर, त्यांचे पुत्र व शिष्य सुरंजन आणि शुभम खंडाळकर यांच्या ‘कृष्णरंग’ या अनोख्या कार्यक्रमाने होणार आहे. त्यांना अमर ओक (बासरी), अजिंक्य जोशी (तबला), श्रेयस बडवे (निरूपण), पार्थ भूमकर (पखवाज), अमृता ठाकूरदेसाई (की-बोर्ड), विश्वास कळमकर (तालवाद्य) हे साथसंगत करतील. महोत्सवाच्या दोन्ही दिवसाचे निवेदन मंगेश वाघमारे करणार आहेत. कार्यक्रम रसिकांसाठी विनामूल्य असून मोफत प्रवेशिक कार्यक्रम स्थळी मिळणार आहेत..

पुणे:पुणे विभाग, मध्य रेल्वेने प्रवाशांची व रेल्वे मालमत्तेची सुरक्षितता सुनिश्चित करण्यासाठी सध्याच्या काळात नव्याने निर्माण होणाऱ्या सुरक्षेच्या धोक्याच्या पार्श्वभूमीवर सुरक्षा उपाययोजना अधिक बळकट केल्या आहेत. विशेषतः पुणे स्थानकास संवेदनशील स्थानक म्हणून घोषित करण्यात आले असून खालील उपाययोजना राबविण्यात आल्या आहेत.

महत्त्वाच्या उपाययोजना:

• पुणे स्थानकावर संध्याकाळी अतिरिक्त निरीक्षकाची नियुक्ती करण्यात आली आहे.
• वरिष्ठ अधिकाऱ्यांकडून नियमित आकस्मिक तपासणी केली जात आहे.
• सीसीटीव्ही कॅमेऱ्यांवर नियमितपणे बारकाईने लक्ष ठेवले जात आहे.
• जीआरपी अधिकाऱ्यांसोबत समन्वय बैठकांचे आयोजन केले जात आहे.
• श्वान पथकांच्या मदतीने तपासणी करण्यात येत आहे.
• सर्व शिफ्ट इनचार्ज व ड्युटी ऑफिसर्स आणि कर्मचाऱ्यांना त्यांच्या सर्क्युलेटिंग क्षेत्रात शस्त्रासह ड्युटी करण्याच्या सूचना देण्यात आल्या आहेत.
• स्थानक परिसरात अतिरिक्त तपासणी व गस्त वाढविण्यात आली आहे.
• कर्मचाऱ्यांना अगदी कमी कालावधीत सूचना मिळताच तातडीने आवश्यक जागी जमा होण्यासाठी तयार राहण्याचे आदेश देण्यात आले आहेत.
• ताडीवाला रोड, पुणे येथे प्रत्येकी 30 खाटांच्या दोन बरॅक्स तयार करण्यात आल्या आहेत.
• जवळ राहणाऱ्या कर्मचाऱ्यांची यादी DSCR पुणे येथे उपलब्ध करून देण्यात आली आहे.
• त्वरित माहिती प्रसारित करण्यासाठी एक आपत्कालीन व्हॉट्सअॅप ग्रुप तयार करण्यात आला आहे.
• प्रत्येक पाळीत एक अधिकारी व दोन कर्मचारी यांचा सशस्त्र पथक गस्त घालत आहे.
• पुणे विभागातील सुमारे 24 महत्वाच्या गाड्यांमध्ये एस्कॉर्टिंग व्यवस्था आहे.
• निरीक्षक आपल्या कार्यक्षेत्रातील गाड्यांमध्ये गस्त घालत आहेत व स्थितीची देखरेख करत आहेत.
• रात्रीच्या वेळी एक निरीक्षक ड्यूटी स्टेशन कंट्रोल रूमशी समन्वय साधून परिस्थितीवर लक्ष ठेवत आहे.
• साध्या वेशातील विशेष पथके स्थानके व गाड्यांमध्ये माहिती संकलनासाठी तैनात आहेत.
• ‘रेल मदत’ या मंचावर प्राप्त होणाऱ्या तक्रारींची नियमितपणे देखरेख केली जात आहे.
• गुप्तचर माहिती संकलनासाठी SIB युनिटसोबत समन्वय साधला जात आहे.

पुणे विभाग प्रवाशांच्या सुरक्षिततेसाठी सदैव वचनबद्ध असून प्रवाशांना सुरक्षित प्रवासाचा अनुभव देण्यासाठी कटिबद्ध आहे.

पुणे (दि.२८) बारामती आरटीओ मधील भ्रष्टाचार विरुद्ध निषेध करण्यासाठी १ मे पासून उपोषण करण्यात येईल. बहुउद्देशीय वाहतूक चालक मालक माथाडी मंडळ,ऑल इंडिया वाहन चालक मालक महासंघ,अण्णाभाऊ साठे युवा प्रतिष्ठान,वंचित वाहतूक शिखर परिषद महासंघ(भरत),या संघटनांच्या वतीने हे आंदोलन जिल्हाधिकारी कार्यालय व बारामती आरटीओ येथे होणार आहे. अजय मखरे(महाराष्ट्र सचिव),हसन मुलाणी( जिल्हाध्यक्ष),साहिल पवार(जिल्हा उपाध्यक्ष) हे व अन्य सहकारी उपोषण करणार आहेत. यास ज्येष्ठ संघटक आबासाहेब निकाळजे,व डॉ एल जी पांडूळे माजी उपसंपादक.यांचा सक्रीय पाठींबा आहे. असे प्रसिद्धी पत्रकात नमूद करण्यात आले आहे.

पुणे:

समाजात सौहार्द,समजूतदारपणा आणि शांतता वाढवण्याच्या उद्देशाने जमात-ए-इस्लामी हिंद (कॅम्प,पुणे) यांच्या वतीने आयोजित ‘विविधतेतील एकता हीच ताकद’ या विषयावरील सर्वधर्मीय परिसंवाद दि. २७ एप्रिल २०२५ रोजी पुण्यातील ऑर्बिट हॉटेल, आपटे रस्ता, डेक्कन जिमखाना येथे मोठ्या उत्साहात पार पडला.या परिसंवादात विविध धर्मांचे मान्यवर अभ्यासक सहभागी झाले होते.’जमात-ए-इस्लामी हिंद’चे उपाध्यक्ष सलीम इंजिनिअर(नवी दिल्ली),बुद्धिस्ट कल्चर स्टडी सेंटर(पुणे) येथील झेन मास्टर भंते सुदस्सन,व्हीआयटी कॉलेज(पुणे)चे संचालक आणि इस्कॉन पुणेचे उपाध्यक्ष राजेश जालनेकर तसेच इग्नाशियस चर्च (खडकी) चे सहायक पाद्री फादर डेनिस जोसेफ (पुणे डायसिस) यांनी आपले मते मांडली.चर्चेचे संचालन डॉ.सलीम खान(मुंबई) यांनी प्रभावीपणे केले.करीमुद्दीन शेख यांनी प्रास्ताविक केले. 

परिसंवादात धर्मांमधील परस्परसंबंध,ईश्वराच्या संकल्पना,विविधतेतील सौंदर्य,धार्मिक नेत्यांची भूमिका आणि सध्याची सामाजिक आव्हाने यावर सखोल चर्चा झाली.सर्व वक्त्यांनी एकमुखाने विविधतेतील एकतेचे महत्त्व अधोरेखित केले आणि परस्पर सन्मान,संवाद व सहकार्याच्या भूमिकेची गरज प्रतिपादन केली.विविध धर्मीय नागरिक,युवा आणि सामाजिक कार्यकर्ते मोठ्या संख्येने उपस्थित राहिले.पहलगाम हल्ल्यातील मृतांना श्रद्धांजली अर्पण करण्यात आली तसेच हल्ल्याचा निषेध करण्यात आला.कार्यक्रमाची सांगता सर्व धर्मांच्या प्रतिनिधींनी एकतेचा संदेश देत केली.उपस्थितांनी असे उपक्रम अधिक नियमितपणे होण्याची अपेक्षा व्यक्त केली.ज्येष्ठ सामाजिक कार्यकर्ते अन्वर राजन,सुभाष वारे,डॉ.प्रवीण सप्तर्षी,प्रा.रमा सप्तर्षी,संदीप बर्वे,प्रा.नीलम पंडित,इब्राहिम खान आदी उपस्थित होते.

भन्ते सुदसन्न म्हणाले,’आपल्या मनाची अवस्था आणि दैनंदिन कामातून सर्व गोष्टी घडतात.मानवतेसाठी हे कार्य होईल,याची काळजी घेतली पाहिजे.केवळ करुणा व्यक्त करून उपयोग नाही.सलीम इंजिनियर म्हणाले,’ईश्वर सर्वव्यापी,सर्वशक्तिमान आहे.आपण जे काही करतो,त्याची नोंद होत असते,हे लक्षात घेतले पाहिजे.एकता ही ईश्वराची देणगी आहे.अन्याय,भेदभाव नष्ट व्हावेत,हेच धर्माचे उद्दिष्ट असते’.जालनेकर म्हणाले,’सृष्टी तयार करूनही परमेश्वराने स्वतःचे अस्तित्व प्रकट केलेले नाही.प्रेम,स्नेहाची देवाण घेवाण हाच ईश्वरप्राप्तीचा मार्ग आहे.फादर डेनिस जोसेफ म्हणाले,’एकमेकांना समजून घेणे हीच ईश्वराची शिकवण आहे.क्षमाशीलता असणे महत्वाचे आहे’.

पुणे : रंगीबेरंगी फुलांनी सजलेला सभामंडप… शोभिवंत फुलांची आरास…   सुवासिक फुलांनी साकारलेले विविध हार… मोग-याच्या फुलांचा पोशाख आणि गुलाब, झेंडू, चाफा यांसारख्या तब्बल २५ लाख फुलांची सजावट बुधवार पेठेतील लक्ष्मीबाई दगडूशेठ हलवाई दत्तमंदिरात करण्यात आली. वासंतिक पुष्पोत्सवानिमित्त सत्तू अमावस्येला करण्यात येणारी फुलांची आरास पाहण्याकरिता पुणेकरांनी मोठी गर्दी केली.

कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे संस्थापिका लक्ष्मीबाई दगडूशेठ हलवाई यांच्या पुण्यतिथीनिमित्त पुष्पोत्सवाचे आयोजन करण्यात आले. यावेळी दत्तमंदिर ट्रस्टचे अध्यक्ष राजेंद्र बलकवडे, कार्यकारी विश्वस्त अ‍ॅड. प्रताप परदेशी, खजिनदार अ‍ॅड. रजनी उकरंडे, उत्सव प्रमुख सुनिल रुकारी, उत्सव उप प्रमुख अक्षय हलवाई, विश्वस्त महेंद्र पिसाळ, अ‍ॅड. शिवराज कदम जहागिरदार, डॉ. पराग काळकर, युवराज गाडवे आदी उपस्थित होते. चैत्र महिन्यातील विशेष प्रसाद म्हणून कैरीची डाळ, पन्हे वाटप करण्यात आले. हलवाई परिवारातर्फे पारंपरिक लघुरूद्र करण्यात आले. 

पुष्पोत्सवाबाबत माहिती देताना अध्यक्ष राजेंद्र बलकवडे म्हणाले, मंदिरात यंदा २५ लाख फुलांची आरास करण्यात आली आहे. त्यामध्ये १२५ किलो मोगरा, २०० किलो झेंडू, १०० किलो गुलाब, गुलछडी, लिली फुले, ५० हजार चाफा फुले, जाई-जुई आणि पासलीच्या पानांनी पुष्पोत्सवात सजावट करण्यात आली. सरपाले फ्लॉवर्सचे सुभाष सरपाले आणि ५० सहका-यांनी ही आरास साकारली.

श्रीपाद श्रीवल्लभ, नृसिंह सरस्वती, श्रीमत् वासुदेवानंद टेंभेस्वामी महाराज, श्रीमाणिकप्रभू महाराज या दत्तमहाराजांच्या चार अवतारांच्या प्रतिमा आणि कै.लक्ष्मीबाई  आणि दगडूशेठ हलवाई यांच्या प्रतिमा देखील फुलांनी सजविण्यात आल्या आहेत. सोमवार, दि.२८ एप्रिल पर्यंत ही आरास भाविकांना पाहण्यास खुली आहे. 

पुणे : भगवान परशुराम की जय… जय परशुराम.. सियावर रामचंद्र की जय.. जय श्रीराम… च्या जयघोषात आणि ढोल-ताशा, टाळ-मृदूंगाच्या गजरात हिंदूंचे आराध्य दैवत व भगवान विष्णूंचे सहावे अवतार श्री भगवान परशुराम यांच्या जन्मोत्सवानिमित्त मध्य पुण्यात भव्य शोभायात्रा काढण्यात आली. सर्व हिंदू समाजाला सोबत घेऊन ही शोभायात्रा काढण्यात आली असून यामध्ये सर्व जाती बांधव सहभागी झाले होते. 

भगवान परशुराम जन्मोत्सव समिती पुणे च्या वतीने श्री भगवान परशुराम यांच्या जन्मोत्सवानिमित्त केसरी वाडा ते शनिवारवाडा अशी शोभायात्रा काढण्यात आली. केसरीवाडा येथून शोभायात्रेचा प्रारंभ झाला. यावेळी खासदार मेधा कुलकर्णी, राज्याचे उच्च व तंत्र शिक्षण मंत्री चंद्रकांत पाटील, राजेश पांडे, रोहित टिळक, शैलेश टिळक, संदीप खर्डेकर, समितीचे प्रमुख पदाधिकारी भालचंद्र कुलकर्णी, विश्वजीत देशपांडे, मकरंद माणकीकर यांसह चैतन्य जोशी, मनोज पंचारिया, मयुरेश अरगडे, विश्वनाथ भालेराव, श्रीकांत जोशी, श्यामराव कुलकर्णी आदी उपस्थित होते.

शोभायात्रेत अग्रभागी चौघडा रथ त्यापाठोपाठ जगदंब वाद्य पथक, बाल व युवा वारकऱ्यांचे पथक, पारंपरिक वेशातील महिला आणि मुख्य भगवान श्री परशुराम रथ सहभागी झाला होता. ठिकठिकाणी शोभायात्रेचे स्वागत मोठ्या उत्साहात करण्यात आले. संपूर्ण शोभायात्रा मार्गावर रांगोळी व पायघड्या घालण्यात आल्या होत्या. 

मेधा कुलकर्णी म्हणाल्या, हिंदूंनी एक झाले पाहिजे. जातीभेदाच्या भिंती तोडून आपण एकत्र यायला हवे. पहलगाम सारख्या दहशतवादी हल्ल्याच्या पार्श्वभूमीवर प्रत्येकाने सर्तक राहायला हवे. आपल्यातील जाती विसरून आपण हिंदू आहोत हे लक्षात ठेवले पाहिजे. देशासाठी आपण एकत्र येण्याची गरज असल्याचे त्यांनी सांगितले. 

चंद्रकांत पाटील म्हणाले, नुकत्याच झालेल्या दुर्देवी घटनेमुळे आपण एकत्र राहिलो तर सुरक्षित राहू हा भाव सगळ्यांमध्ये येत आहे. जात माना हे कुठेही म्हटलेलं नाही. आपण सगळे एकत्र आलो, तर आपल्याकडे पाहण्याची कोणाचीही हिमंत होणार नाही, असेही ते म्हणाले.   

भगवान परशुराम जन्मोत्सव समिती पुणे च्या अंतर्गत ३० हून अधिक संस्था व संघटना यामध्ये सहभागी झाल्या. त्यामध्ये महाराष्ट्र ब्राह्मण सभा, देवस्था ऋग्वेदी ब्राह्मण शिक्षणोत्तेजक संस्था, शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळ, अखिल भारतीय ब्राह्मण महासंघ, अखिल ब्राह्मण मध्यवर्ती संस्था (नाशिक) पुणे केंद्र, परशुराम हिंदू सेवा संघ, आम्ही सारे ब्राह्मण, ब्राह्मण व्यावसायिक पत्रिका, ब्राह्मण जागृती सेवा संघ, ब्राह्मण महासंघ, ब्राह्मण सेवा संघ वाघोली, याज्ञवल्क्य आश्रम, सर्व शाखीय ब्राह्मण महासंघ पुणे, चित्पावन अस्तित्व संस्था, क-हाडे ब्राह्मण महासंघ/ संघ, महाराष्ट्र चित्पावन संघ, कृष्ण यजुर्वेदी तैतरीय संघ, चित्पावन कट्टा, याज्ञवल्क्य उद्योजक विकास अभियान, अखिल ब्राह्मण संघ, राष्ट्रीय सेवा संघ, पौरोहित्य पुरोहित फाऊंडेशन, विप्र फाऊंडेशन, गौड ब्राह्मण संघ, गौडा सारस्वत ब्राह्मण संघ, चित्पावन मित्र असोसिएशन, श्री राजस्थानी छ:न्याति विप्र मंडल पुणे, विप्र फाऊंडेशन १२ बी झोन पुणे, अखिल भारतीय पेशवा संघटना यांसह अनेक संस्था व संघटनांचा सहभाग होता.

प्रशांत वाघमारे, डॉ शैलेश पुणतांबेकर,प्रविण निकम,राम बांगड यांचा पुरस्काराने गौरव

पुणे – एका चाकावर संसार चालत नाही, कोणतेही वाहन चालत नाही तसे स्वप्नातील शहरही निर्माण होत नाही , प्रशासन व राजकारणी नेत्यांनी या दोहोंनी योग्य पाऊले उचलली तरच चांगली शहरे निर्माण होतात असे मत पुणे महापालिकेचे नगर अभियंता प्रशांत वाघमारे यांनी येथे व्यक्त केले.

पुणे महापालिकेचे नगर अभियंता प्रशांत वाघमारे, डॉ शैलेश पुणतांबेकर, रोशनी फाउंडेशनचे संस्थापक प्रविण निकम, व रक्ताचे नाते या संस्थेचे राम बांगड यांचा पुरस्कार देऊन श्री कोल्हापूरचे महाराज श्री सचिन महाराज काँग्रेसचे ज्येष्ठ नेते उल्हास पवार यांच्या हस्ते गौरव करण्यात आला. अक्कलकोट स्वामीची कृपासिंधू मूर्ती, पुणेरी पगडी, शाल, व पुष्पहार असे या पुरस्काराचे स्वरूप आहे.भवानी पेठेत श्री अक्कलकोट स्वामी समर्थ, ट्रस्ट, पुणे यांच्यातर्फे श्री अक्कलकोट स्वामी समर्थ बाल उद्यानात श्री अक्कलकोट स्वामी समर्थ यांच्या पुण्यतिथी निमित्त आयोजित करण्यात आलेल्या अक्कलकोट स्वामी यांच्या मंदिराच्या 30 व्या वर्धापनदिनानिमित्त सांस्कृतिक महोत्सवाचे उदघाटन उल्हास पवार यांच्या हस्ते झाले. या सांस्कृतिक महोत्सवाचे यंदा 30 वे वर्ष आहे. या सांस्कृतिक महोत्सवाच्या उदघाटनाच्या कार्यक्रमास कोल्हापूरचे प्रसिद्ध महाराज सचिन, काँग्रेसचे ज्येष्ठ नेते मोहन जोशी, माजी नगरसेवक आबा बागुल, माजी नगरसेवक संजय बालगुडे, अविनाश साळवे, डॉ सत्यशिल नाईक, डॉ सतीश देसाई, सुनिल रुकारी, अनिल गाडवे, माजी नगरसेवक सदानंद शेट्टी, गुरुजी तालीम मंडळाचे अध्यक्ष प्रवीणसिंग परदेशीं, रविंद्र माळवदकर,विपीन गुपचूप आदी मान्यवर उपस्थित होते.

सेवाभावी संस्था समाजात सामाजिक कार्य करताना माणसे जोडण्याचे कार्य करतात. या सेवाभावी संस्थामुळे माणुसकी जिवंत आहे. असे मत काँग्रेसचे ज्येष्ठ नेते व सामाजिक कार्यकर्ते श्री उल्हास पवार यांनी यावेळी व्यक्त केले. उल्हास पवार म्हणाले की, सामाजिक संस्था माणसाचे विकास आणि प्रगती डोळ्यासमोर ठेऊन कार्य करतात. मानवधर्म हाच आपला खरा धर्म हे उद्दिष्ट डोळ्यासमोर ठेऊन ते सामाजिक कार्य करतात. म्हणूनच समाजात माणुसकी जिवंत आहे.प्रशांत वाघमारे यांनी आपल्या भाषणात सांगितले की, प्रशासन व राजकारणी नेत्यांनी शहराच्या विकासाला चालना देताना योग्य पाऊले उचलली पाहिजेत. तरच चांगली शहरे निर्माण होतील.या उदघाटनाच्या कार्यक्रमात सत्कारमूर्ती प्रविण निकम, राम बांगड व डॉ शैलेश पुणतांबेकर यांचीही सत्काराला उत्तरे देणारी भाषणे झाली.

या कार्यक्रमात उपस्थित नागरिक व भाविकांचे स्वागत या महोत्सवाच्या संयोजक सौ. प्रियंका किराड सागर यांनी केले. ट्रस्टचे अध्यक्ष व स्वागतोत्सुक वीरेंद्र किराड यांनी प्रास्ताविक केले. विश्वस्त नितीन शहा यांनी उपस्थितांचे आभार मानले. प्राजक्ता जोगळेकर श्रावणे यांनी सूत्रसंचालन केले.