चांदणी चौकातील आपघातातील जखमींसाठी चंद्रकांतदादा सरसावले-जखमींवर उपचाराचा सर्व खर्च उचलून जपली सामाजिक बांधिलकी-कोथरुड मधील भुसारी कॉलनी जवळ पीएमपीच्या बसचे ब्रेक फेल होऊन मोठा अपघात झाला. या अपघातात तीन जण जखमी झाले असून; यांच्यावर उपचारासाठी कोथरुडचे आमदार चंद्रकांतदादा पाटील सरसावले आहेत. जखमींना सह्याद्री रुग्णालयात दाखल करुन त्यांचा उपचाराचा सर्व खर्च उचलून सामाजिक बांधिलकी जपली.अधिक माहितीनुसार, मंगळवारी संध्याकाळी कोथरुड डेपोकडे येणाऱ्या बसचे ब्रेक फेल झाल्याने मोठा अपघात झाला. या अपघातात चार ते पाच वाहनांचे नुकसान झाले, तर तीन जण जखमी झाले. या जखमींना जवळच्या सह्याद्री रुग्णालयात दाखल करण्यात आले.या घटनेची माहिती राज्याचे उच्च व तंत्रशिक्षण आणि संसदीय कार्य मंत्री आणि कोथरुडचे आमदार चंद्रकांतदादा पाटील यांना समजताच; त्यांनी जखमींवर चांगले उपचार करण्याच्या सूचना दिल्या. तसेच, सर्व उपचाराचा खर्च उचलून कुटुंबियांना धीर दिला. ना. पाटील यांच्या संवेदनशीलतेचे कोथरुड मधील नागरिकांकडून कौतुक होत आहे.

पुणे- चांदणी चौकात एक भीषण अपघात घडला. कोथरूडच्या दिशेने येणाऱ्या पीएमपीएल बसचा ब्रेक अचानक फेल झाल्याने बसने वेगाने येत चार ते पाच दुचाकी आणि एका रिक्षाला जोरदार धडक दिली. या धडकेत दोन जण गंभीर जखमी झाले असून, त्यांना तातडीने जवळच्या रुग्णालयात दाखल करण्यात आले आहे.संध्याकाळी सहाच्या सुमारास चांदणीचौकाच्या उतारावरुन कोथरुड डेपोकडे वेगाने निघालेल्या पीएमटी बसने रस्यावर उभ्या असलेल्या रिक्षाला व पाच दुचाकी वाहनांना, व रस्त्यावर उभ्या असलेल्या नागरिकांना धडक देवून हॉटेल खानदेशपाशी थांबली.सुदैवाने या घटनेत जिवीत हानी झाली नाही. जीवावर बेतले होते पण ते पायावर निभावले अशी भावना जखमींनी व्यक्त केली.योगेश सोपान केमसे, (वय-४६), रा. रावेत हे गाडीत हवा भरायला उभे होते तर प्रणव अरुण साळवे, (वय-२८), रा. दौंड हा वनाज मेट्रो स्थानकाकडे पायी निघाला होता. काही कळायच्या आतच बसने त्यांना उडवले. या दोघांच्याही पायाचे हाड मोडले आहे. राजेंद्र वसंत नलावडे, रा. गुलटेकडी यांच्या रिक्षाचे प्रचंड नुकसान झाले. त्यांच्या बोटांना दुखापत झाली आहे. इतर चार जणांना किरकोळ जखमा झाल्या आहेत.

चांदणी चौकातून खाली उतरताना बसचा ब्रेक अचानक निकामी झाला. यामुळे चालकाचे बसवरील नियंत्रण सुटले आणि हा अपघात घडला. धडकेमुळे रस्त्यावर गोंधळाचे वातावरण निर्माण झाले. जखमींमध्ये दुचाकीस्वार आणि रिक्षा चालकाचा समावेश आहे. सुदैवाने, या अपघातात कोणताही जीवितहानी झालेली नाही.

अपघाताची माहिती मिळताच पुणे पोलिसांनी तात्काळ घटनास्थळी धाव घेतली. त्यांनी वाहतूक नियंत्रित करून परिस्थिती हाताळली. पोलिसांनी बसचालकाविरुद्ध गुन्हा दाखल केला असून, अपघाताच्या कारणांचा तपास सुरू आहे. बसच्या तांत्रिक स्थितीचीही तपासणी केली जाणार आहे.चांदणी चौक हा पुण्यातील वर्दळीचा परिसर आहे. येथील रस्त्यांची अवस्था आणि वाहनांच्या देखभालीकडे दुर्लक्ष यामुळे अशा घटना वारंवार घडतात, अशी तक्रार स्थानिक नागरिकांनी केली आहे. पीएमपीएल बसच्या नियमित देखभालीवर प्रश्न उपस्थित होत आहेत.

पुणे –राष्ट्रवादी काँग्रेस पार्टीच्यावतीने यंदाच्या ६५ व्या १ मे महाराष्ट्र दिनानिमित्त आयोजित करण्यात आलेली पश्चिम महाराष्ट्रातून येणारी महाराष्ट्र गौरव मंगल कलश रथयात्रा आज पुणे शहरात दाखल झाली. यावेळी शहर अध्यक्ष दीपक मानकर, कार्याध्यक्ष प्रदीप देशमुख यांच्यासह पदाधिकारी व कार्यकर्त्यांनी या रथयात्रेचे लालमहाल, कसबा पेठ येथे जल्लोषात स्वागत करण्यात आले. महाराष्ट्राच्या प्रत्येक भागातील महापुरुषांच्या वास्तव्याने समृद्ध झालेल्या, त्यांच्या महान कार्यांनी प्रेरित अशा भागांतील माती, विशेष नद्या आणि संगमस्थळांहून आणलेले पाणी या मंगल कलशांमध्ये एकत्रित करण्यात येणार असून १ मे महाराष्ट्र दिनानिमित्त मुंबई येथे आणले जाणार आहे.

महाराष्ट्र गौरव मंगल कलश रथयात्रेचा साने गुरुजी भवन,हडपसर येथून शुभारंभ करण्यात आला. क्रांतीसुर्य महात्मा ज्योतीबा फुले व सावित्री माई फुले यांच्या समता भूमी, गंज पेठ येथील पुतळ्यांना राष्ट्रवादी काँग्रेस पार्टी शहराध्यक्ष दीपक मानकर आणि पदाधिकाऱ्यांनी हार घालून अभिवादन करण्यात आले. त्यांनतर महात्मा फुले पेठ येथून लक्ष्मी रोड मार्गे महाराष्ट्र गौरव मंगल कलश रथयात्रा राजमाता जिजाऊ माँसाहेब व छत्रपती शिवाजी महाराज यांच्या पदस्पर्शाने पावन लालमहाल,कसबा पेठ येथे दाखल झाली. यावेळी पदाधिकाऱ्यांनी “जय भवानी,जय शिवाजी”, “भारत माता की जय”, “छत्रपती शिवाजी महाराज, छत्रपती संभाजी महाराज” यांच्या जयघोषाने परिसर शिवमय झाला होता.
शहराध्यक्ष दीपक मानकर बोलताना म्हणाले, “महाराष्ट्र गौरव मंगल कलशामध्ये लालमहाल, सिंहगड किल्ला,शनिवारवाडा, लहूजी वस्ताद साळवे स्मारक, समता भूमी, सावित्रीबाई फुले पुणे विद्यापीठ येथील माती तसेच इंद्रायणी, मुळा-मुठा संगम येथील पाणी, महात्मा फुले वाडा येथील विहिरीचे पाणी हे टाकण्यात आले आहे.

सदरप्रसंगी राष्ट्रवादी काँग्रेस पार्टी शहराध्यक्ष दीपक मानकर, कार्याध्यक्ष प्रदीप देशमुख, माजी महापौर राजलक्ष्मी भोसले, प्रदेश उपाध्यक्ष सुरेश घुले, प्रदेश सरचिटणीस लतीफ लतीफ तांबोळी, प्रदेश प्रवक्ते महेश शिंदे, माजी विरोधी पक्षनेते दत्ता सागरे, माजी नगरसेवक प्रमोद निम्हण, प्रदीप गायकवाड, बाळासाहेब बोडके, शांतीलाल मिसाळ, पश्चिम महाराष्ट्र युवक अध्यक्ष राकेश कामठे, महेश हांडे,विधानसभा अध्यक्ष हडपसर शंतनू जगदाळे, शिवाजीनगर अभिषेक बोके, महिला अध्यक्ष कसबा सुप्रिया कांबळे,पुणे कॅन्टोन्मेंट नीता गायकवाड,कोथरूड तेजल दुधाणे,शहर सेल अध्यक्ष युवती पूजा झोळे, विद्यार्थी शुभम माताळे, सोशल मिडिया अध्यक्ष शितल मेदने, आयटी सेल मोहन मोरे, राष्ट्रवादी काँग्रेस पार्टी प्रदेश सरचिटणीस मारुती अवरगंड, युवक अंगद माने, शहर सरचिटणीस शितल जौंजाळ, शलाका पाटील, शालिनी जगताप,उदयसिंह मुळीक, उध्वद बडदे,उपाध्यक्ष मिलिंद वालवडकर, डिंपल इंगळे, आनंद तांबे, चिटणीस शाम शेळके, चेतन मोरे,विशाल कांबळे, दिनेश अर्दाळकर, विधानसभा कार्याध्यक्ष पुणे कॅन्टोन्मेंट गोरखनाथ भिकुले, शिवाजीनगर बाळासाहेब आहेर,हडपसर अमर तुपे, पदाधिकारी योगेश वराडे, शहर महिला कार्याध्यक्ष संगीता बराटे, गौरी जाधव, युवक कार्याध्यक्ष मनोज पाचपुते, युवक उपाध्यक्ष गिरीश मानकर, सागर चंदनशिवे, सुरज गायकवाड,युवती कार्याध्यक्ष नम्रता बोंदर, लावण्या शिंदे, सामाजिक न्याय कार्याध्यक्ष विक्रम मोरे,वैद्यकीय मदत कक्ष वंदना साळवी, महिला उपाध्यक्ष मनिषा किराड, पूनम पाटोळे,रोशन कुरेशी, संघटक सचिव प्रीती डोंगरे, चिटणीस सुनिता बडेकर, सांस्कृतिक कार्याध्यक्ष अशोक जाधव, आयटी सेल संजय खंडारे,युवक अध्यक्ष कसबा गजानन लोंढे, श्वेता मिस्त्री, पुणे कॅन्टोन्मेंट प्रसाद चौगुले,विद्यार्थी अध्यक्ष कोथरूड अनिकेत मोकर, विधानसभा उपाध्यक्ष संतोष हत्ते, सुप्रिया साठे यांच्यासह आदी पदाधिकारी उपस्थित होते.

पुणे : भारतीय संगीत प्रसारक मंडळाच्या गांधर्व महाविद्यालय, पुणेच्या 93व्या वर्धापन दिनानिमित्त बुधवारी पंडित विष्णू दिगंबर पलुस्कर स्मृती गुरू गौरव पुरस्कार वितरण समारंभ आयोजित करण्यात आला असून गुरुवार ते शनिवार या कालावधीत सुबद्ध संगीत समारोहाचे आयोजन करण्यात आले आहे.
पंडित विष्णू दिगंबर पलुस्कर स्मृती गुरू गौरव पुरस्कार वितरण समारंभ दि. 30 एप्रिल रोजी सायंकाळी 6 वाजता आयोजित करण्यात आला असून प्रसिद्ध बंदिशकार, शास्त्रीय गायिका व गुरू डॉ. माधुरी डोंगरे यांचा पुरस्काराने गौरव केला जणार आहे, अशी माहिती गांधर्व महाविद्यालय, पुणेचे प्राचार्य पंडित प्रमोद मराठे यांनी निवेदनाद्वारे कळविली आहे. पुरस्कार सोहळ्यानिमित्त डॉ. डोंगरे यांच्या मुलाखातीचा कार्यक्रम आयोजित करण्यात आला असून त्यांच्याशी मंजिरी जोशी संवाद साधणार आहेत. पुरस्काराचे वितरण जीएसटी आयुक्त दिनेश भोयर यांच्या हस्ते होणार आहे. या प्रसंगी पौरवी साठे, रमा कुलकर्णी, गायत्री गोखले, कस्तुरी जोशी यांचे गायन होणार आहे. त्यांना पुष्कर महाजन (तबला), मीनल नांदेडकर (संवादिनी) साथसंगत करणार आहेत. कार्यक्रम सायंकाळी 6 वाजता गांधर्व महाविद्यालयाच्या विष्णू विनायक स्वरमंदिरात होणार आहे.
सुबद्ध संगीत समारोह दि. 1 ते 3 मे या कालावधीत आयोजित करण्यात आला आहे. यात दि. 1 रोजी डॉ. राजश्री महाजनी, स्वानंदी सडोलिकर, धनंजय जोशी यांचे, दि. 2 रोजी हर्षद डोंगरे, श्रुती देशपांडे, रवी फडके यांचे तर दि. 3 रोजी शुभदा देशपांडे, शिल्पा आठल्ये, राधिका ताम्हनकर, सावनी गोगटे यांचे गायन होणार आहे. कलाकारांना अभिजित बारटक्के, हृषिकेश जगताप, संजय करंदीकर (तबला), निलय साळवी, अमेय बिचू, अंशुला मोरे (संवादिनी) साथसंगत करणार आहेत. कार्यक्रम सायंकाळी ६ वाजता गांधर्व महाविद्यालयाच्या विष्णू विनायक स्वरमंदिरात होणार आहे. कार्यक्रम सर्वांसाठी खुला आहे.

पुणे : श्रीमद्‌‍ आद्य शंकराचार्य यांची जन्मकथा आणि त्यांनी केलेले कार्य विशद करत ‌‘अद्वैती सुरावली‌’ या सांगीतिक कार्यक्रमातून आद्य शंकराचार्य यांनी रचलेली संस्कृत भाषेतील अनेक स्तोत्रे अत्यंत सुरेल, रसाळ आणि शुद्ध वाणीत रसिकांना आज अनुभवायला मिळाली.
निमित्त होते पूना गेस्ट हाऊस स्नेह मंच आयोजित ‌‘अद्वैती सुरावली‌’ या विशेष सांगीतिक कार्यक्रमाचे! पूना गेस्ट हाऊस येथे या कार्यक्रमाचे आयोजन करण्यात आले होते. वृंदा शिंगणापूरकर आणि शर्वरी लेले यांनी गायन सेवा सादर केली तर देवेंद्र तुळशीबागवाले (तबला), प्रसाद आपटे (संवादिनी) यांनी समर्पक साथसंगत केली. मीनल तुळशीबागवाले यांनी निरूपण केले.
कार्यक्रमाची सुरुवात श्रीमद्‌‍ आद्य शंकराचार्य यांनी रचलेल्या ‌‘मुदा करात्तमोदकं सदा विमुक्तीसाधकं‌’ या महागणेश पंचरत्न स्तोत्राने करण्यात आली. गुरू महिमा वर्णन करणारे ‌‘शरीरं सुरूपं तथा वा कलत्रं‌’ हे गुरू अष्टक अतिशय प्रभावीपणे सादर केले. ‌‘चिदानंदरूप: शिवोहम्‌‍ शिवोहम्‌‍‌’ हे निर्वाण अष्टक सादर करताना आपल्यातील अहंभाव नाहीसा व्हावा आणि स्व-स्वरूपाची ओळख व्हावी हा अर्थ सहजतेने उलगडला गेला.
सुवर्णमाला स्तुती स्तोत्र सादर करताना भगवान शिवाचे माहात्म्य दर्शविले गेले. श्रीमद्‌‍ आद्य शंकराचार्य यांनी समाजाला शिकवण देताना कर्तव्यात पळवाटा न शोधता वेळ मिळेल तेव्हा देवाचे नाम घ्या असा संदेश दिला. यावर रचित ‌‘भज गोविंदम्‌‍ भज गोविंदम्‌‍,भज गोविंदम्‌‍ मूढमते‌’ हे स्तोत्र सादर करत गोविंदाच्या नामघोषात भाविकांना सामावून घेतले.
अन्नपूर्णा देवीचे महत्त्व विशद करताना श्रीमद्‌‍ आद्य शंकराचार्य यांनी रचलेले अन्नपूर्णा स्तोत्र तसेच लक्ष्मी नरसिंह स्तोत्र सादर केले. भगवान कृष्णाची महती सांगणारे गोविंदाष्टक स्तोत्र सादर करून कार्यक्रमाची सांगता ‌‘अच्युतम्‌‍ केशवम्‌‍ राम नारायणम्‌‍‌’ या अच्युताष्टकाने करण्यात आली. श्रीमद्‌‍ आद्य शंकराचार्य विरचित स्तोत्रांना वृंदा शिंगणापूरकर यांनी स्वरबद्ध केले आहे. या स्तोत्रांच्या माध्यमातून निर्माण झालेले भक्तीरसपूर्ण वातावरण भाविकांना अनोख्या अनुभूतीत घेऊन गेले. किशोर सरपोतदार यांनी प्रास्ताविक केले तर संयोजन अजित कुमठेकर यांनी केले.

पुणे – पुणे महानगरपालिका व महात्मा फुले नवीनीकरणीय उर्जा व पायाभूत प्रौद्योगिकी मार्य.(महाप्रीत) यांच्या संयुक्त विद्यमान पुणे महानगरपालिका हद्दीमध्ये विविध प्रकल्प राबविण्यात येत आहेत या प्रकल्पांचा आढावा मुंबई (बीकेसी) येथील महाप्रीत कार्यालयात मंगळवारी घेण्यात आला . या बैठकीच्या अध्यक्षस्थानी महाराष्ट्र राज्याच्या नगरविकास व सामाजिक न्याय राज्यमंत्री माधुरी मिसाळ होत्या.

या बैठकीस महाप्रीतचे व्यवस्थापकीय संचालक माळी, पुणे महानगरपालिकेचे सिटी इंजिनिअर प्रशांत वाघमारे, उपायुक्त महेश पाटील, विद्युत विभागाच्या मुख्य अभियंता मनीषा सेकटकर, आपत्ती व्यवस्थापन अधिकारी गणेश सोनुने तसेच महाप्रीतचे इतर वरिष्ठ अधिकारी उपस्थित होते.

बैठकीत पुणे महानगरपालिकेच्या हद्दीमध्ये नव्याने समाविष्ट झालेल्या ३२ गावांमधील पायाभूत सुविधा विकास प्रकल्पांचा सविस्तर आढावा घेण्यात आला. यावेळी पुढील महत्त्वाच्या मुद्द्यांवर चर्चा झाली:

विद्युत दिवे एलईडीमध्ये रूपांतर : नव्याने समाविष्ट गावांमध्ये विद्युत पोलवरील जुने दिवे एलईडी तंत्रज्ञानावर आधारित आधुनिक दिव्यांमध्ये बदलण्याचे महत्त्वाकांक्षी काम सुरू असून, एकूण ७०,००० विद्युत दिवे टप्प्याटप्प्याने बदलण्याचे उद्दिष्ट आहे. आतापर्यंत सुमारे ९,००० दिव्यांचे रूपांतर पूर्ण झाले आहे. यामुळे ऊर्जेची बचत होण्याबरोबरच देखभाल खर्चातही मोठी घट होणार आहे.

सौरऊर्जेचा प्रभावी वापर : स्वच्छ ऊर्जेला प्रोत्साहन देण्यासाठी ५० मेगावॅट क्षमतेच्या सौर विद्युत निर्मिती प्रकल्पाच्या अंमलबजावणीवर भर दिला जाणार आहे. हा प्रकल्प पर्यावरणपूरक विकासाच्या दिशेने एक महत्त्वाचे पाऊल ठरणार आहे. याबाबत शासन स्तरावरून प्रकिया सुरू असुन पुढील कालावधीत हा प्रकल्प पुर्ण केला जाणार आहे यासोबतच
इंटरनेट कमांड सेंटर व आपत्ती व्यवस्थापन प्रकल्प : आधुनिक तंत्रज्ञानाच्या साह्याने पुणे शहरात एकात्मिक आदेश व नियंत्रण केंद्र (ICCC) स्थापन करण्यात येणार आहे. सुमारे २८३ कोटी रुपयांच्या या प्रकल्पांतर्गत आपत्ती व्यवस्थापन, वाहतूक नियंत्रण, सार्वजनिक सुरक्षितता, जल व घनकचरा व्यवस्थापन यांसारख्या सेवा एका केंद्रीकृत प्लॅटफॉर्मवर नियंत्रित केल्या जाणार आहेत. यामुळे पुणे शहराचे व्यवस्थापन अधिक वेगवान व कार्यक्षम होणार आहे.

बैठकीत बोलताना राज्यमंत्री माधुरी मिसाळ यांनी उपस्थित अधिकाऱ्यांना कामांची गती वाढवण्यावर भर देण्याचे निर्देश दिले. “प्रकल्पांची गुणवत्ता अबाधित ठेवत, वेळेचे काटेकोर नियोजन करावे व नागरिकांना वेळेत सुविधा मिळाव्यात, यासाठी सर्व संबंधित विभागांनी समन्वय साधून कार्य करावे,” असे आवाहन त्यांनी केले.तसेच, पुणेकरांच्या जीवनमानात सकारात्मक बदल घडविण्यासाठी आणि नव्याने समाविष्ट गावांचा सर्वांगीण विकास साधण्यासाठी शासन कटीबद्ध असल्याचे त्यांनी स्पष्ट केले.महापालिका आणि महाप्रीत यांच्यातील सहकार्यामुळे पुणे शहराचे स्वरूप अधिक विकसित आणि स्मार्ट सिटीच्या दिशेने जलदगतीने पुढे जात आहे, हे या बैठकीतून स्पष्ट झाले.

विदर्भ महेश असोसिएशन आणि फ्रेंड्स ऑफ ट्रायबल सोसायटी यांच्या संयुक्त विद्यमाने व्याख्यान

पुणे : छत्रपती शिवाजी महाराज यांच्या निधनानंतर समर्थ रामदास स्वामी यांनी छत्रपती संभाजी महाराज यांना लिहिलेल्या पत्रात ‘शिवरायांचे आठवावे रूप, शिवरायांचे आठवावा प्रताप श्रीमंतयोगी’ अशा शब्दांत शिवरायांच्या कार्याचे स्मरण ठेवून वाटचाल करण्याचा सल्ला दिला होता. त्याच धर्तीवर आजच्या काळातही छत्रपती शिवाजी महाराज यांच्या विचारांची आणि कार्याची प्रेरणा घेणे अत्यंत आवश्यक आहे. याच प्रेरणेतून उद्याचा बलशाली हिंदुस्तान घडेल, असा विश्वास प.पू. स्वामी श्री गोविंद देव गिरी महाराज यांनी व्यक्त केला.

विदर्भ महेश असोसिएशन, पुणे आणि फ्रेंड्स ऑफ ट्रायबल सोसायटी, पुणे यांच्या संयुक्त विद्यमाने चिंचवड येथील रामकृष्ण मोरे सभागृहात आयोजित ‘छत्रपती शिवाजी महाराज – एक दृष्टा नेता’ या विषयावरील व्याख्यानात स्वामीजींनी आपले विचार मांडले. या प्रसंगी विनीत राठी, वसंत राठी, राधेश्याम गर्ग, मनोज बेहेडे, दिनेश मुंदडा, स्वप्नील काबरा आदी मान्यवर उपस्थित होते. कार्यक्रमात सुरेश सोडानी, जुगलकिशोर पुंगलिया, अजय किशोर लड्ढा, अशोक करवा, राधेश्याम गर्ग आणि जगदीश कदम यांचा सन्मान करण्यात आला.

स्वामी गोविंद देव गिरी महाराज म्हणाले, “रामायण व महाभारत यांतील सदगुणांचे संपूर्ण एकत्रीकरण केले तर त्यातून छत्रपती शिवाजी महाराज यांचे अद्वितीय व्यक्तिमत्त्व निर्माण होते. महाराष्ट्राच्या मातीत छत्रपती शिवाजी महाराजांचा जन्म झाल्याचा अभिमान प्रत्येकाने बाळगावा. तथापि, काही काळापूर्वी पर्यंत छत्रपतींच्या इतिहासाचे अपूर्ण आणि अप्रामाणिक चित्रण झाले होते. आजच्या पिढीसमोर त्यांच्या जीवनाचा खरा इतिहास पोहोचविणे ही काळाची गरज आहे.”

ते  पुढे म्हणाले, “आजच्या तरुणांमध्ये स्वाभिमान जागवणे अत्यावश्यक आहे आणि हे स्वाभिमान छत्रपती शिवाजी महाराज यांच्या प्रेरणेशिवाय जागृत होऊ शकत नाही. म्हणूनच मी रामायणातील प्रभू श्रीराम, महाभारतातील श्रीकृष्ण यांच्या बरोबर छत्रपती शिवाजी महाराज यांच्याही कथा व्यासपीठावर मांडतो. त्यातून आजच्या तरुणांना प्रेरणा मिळते. तरुण पिढीने स्फुरण पावून चांगल्या कार्यासाठी सज्ज व्हावे आणि बलशाली भारत घडवावा, हेच माझेही स्वप्न आहे.”

याच कार्यक्रमाच्या औचित्याने पुणे चॅप्टरचे अध्यक्ष वसंत राठी यांनी आपले नेतृत्व मनोज बेहेडे यांच्याकडे सुपूर्त केले. प.पू. स्वामी श्री गोविंद देव गिरी महाराज यांच्या शुभहस्ते मनोज बेहेडे यांना नेतृत्वाची सूत्रे प्रदान करण्यात आली व त्यांच्या कार्यकाळासाठी शुभेच्छा दिल्या. येथे उल्लेखनीय आहे की, वसंत राठी यांचा कार्यकाळ अत्यंत यशस्वी व ऊर्जावान ठरला. त्यांच्या प्रभावी नेतृत्वाखाली पुणे चॅप्टरने केवळ प्रगतीच साधली नाही, तर १८० शाळांपासून सुरुवात करून ८०० शाळांपर्यंत आपले कार्यक्षेत्र विस्तारले आणि संघटनेला नव्या उंचीवर नेले.

पुणे, दि. २९ एप्रिल २०२५:तळवडे येथे गवताच्या आगीत महावितरणच्या २२ केव्ही व ३३ केव्ही क्षमतेच्या तब्बल ७ वीजवाहिन्या जळाल्या. परिणामी तळवडे पाणीपुरवठा योजनेसह तळवडे एमआयडीसी व इंडस्ट्रीयल परिसरातील सुमारे ४५०० औद्योगिक ग्राहकांचा वीजपुरवठा मंगळवारी (दि. २९) दुपारी ३.४५ सुमारास खंडित झाला. यातील सुमारे १८०० उद्योगांना पर्यायी व्यवस्थेतून वीजपुरवठा सुरु करण्यात आला आहे. तर उर्वरित २७०० उद्योगांसह पाणीपुरवठा योजनेचा वीजपुरवठा रात्री १० वाजेपर्यंत पूर्ववत करण्यात येत आहे. त्यासाठी महावितरणकडून दुरुस्ती काम युद्धपातळीवर सुरु आहे.

दरम्यान, या आगीमुळे देहूगाव, चिंचोली गावातील २५०० घरगुती, व्यावसायिक व औद्योगिक ग्राहकांचा वीजपुरवठा देखील खंडित झाला होता. मात्र पर्यायी व्यवस्थेतून सायंकाळी ६ वाजेपर्यंत या सर्व ग्राहकांचा वीजपुरवठा पूर्ववत करण्यात आला आहे. आगीमुळे वीजपुरवठा खंडित होण्याचा गेल्या २ महिन्यांतील हा नववा प्रकार आहे.

याबाबत माहिती अशी की, तळवडे येथील डोंगरावरील वाळलेल्या गवताला मंगळवारी दुपारच्या सुमारास आग लागली. ही आग सर्वत्र पसरत गेली. डोंगराशेजारी असलेल्या एका ओढ्याच्या कडेपर्यंत ही आग आली. त्याच ठिकाणी असलेल्या महावितरणच्या २२ केव्ही क्षमतेच्या ४ आणि ३३ केव्ही क्षमतेच्या ३ वीजवाहिन्या या आगीत जळाल्या. त्यामुळे तळवडे एमआयडीसी, इंडस्ट्रीयल परिसर तसेच पिंपरी चिंचवड महानगरपालिकेच्या तळवडे पाणीपुरवठा योजनेसह सुमारे ४५०० लघु व उच्चदाब औद्योगिक ग्राहकांचा वीजपुरवठा खंडित झाला. या सर्व परिसराला नियमित वीजपुरवठा करणाऱ्या ४ आणि पर्यायी वीजपुरवठ्यासाठी अतिरिक्त असलेल्या ३ वीजवाहिन्या जळाल्या. त्यामुळे वीजपुरवठ्याची पर्यायी सोय उपलब्ध होऊ शकली नाही. मात्र इतर पर्यायी व्यवस्थेतून सुमारे १८०० औद्योगिक ग्राहकांचा वीजपुरवठा दोन तासांमध्ये टप्प्याटप्प्याने सुरू करण्यात आला.

भोसरी विभागाचे कार्यकारी अभियंता श्री. अतुल देवकर यांनी तीन कंत्राटदार व सहा जॉईंटर यांना  पाचारण करून एकाचवेळी सर्व वीजवाहिन्यांचे दुरुस्ती काम सुरु केले. अतिरिक्त कार्यकारी अभियंता श्री. किरण सरोदे, सहायक अभियंता श्री. ऋषिकेश बनसोडे यांनी घटनास्थळी भेट देऊन या कामाला वेग दिला. आज रात्री १० वाजेपर्यंत दुरुस्तीचे काम पूर्ण होईल. त्यानंतर उर्वरित २७०० औद्योगिक ग्राहकांचा वीजपुरवठा टप्प्याटप्प्याने पूर्ववत करण्यात येणार आहे. 

नागर‍िकांची गैरसोय टाळण्यासाठी महानगर आयुक्त यांचा न‍िर्णय

पुणे (दि.२९) : नागरिकांना आपल्या अडचणी, समस्या थेट वरिष्ठ अधिकाऱ्यांपर्यंत मांडता याव्यात, या अनुषंगाने पुणे महानगर प्रदेश विकास प्राधिकरणाचे सर्व विभागप्रमुख आठवड्यातील दोन दिवस नागरिकांच्या भेटीसाठी पूर्ण वेळ कार्यालयात उपलब्ध असणार आहे. या निर्णयाची गेल्या काही दिवसांपासून पीएमआरडीएमध्ये अंमलबजावणी करण्यात येत असून त्या अनुषंगाने महानगर आयुक्त डॉ. योगेश म्हसे यांनी आदेश काढले आहेत. शासनाच्या १०० दिवसांच्या कृती आराखड्यांतर्गत कार्यालयीन स्तरावर काही न‍िर्णय घेण्यात आले असून नागर‍िकांच्या सोयीसाठी त्यातील हा एक महत्वपुर्ण न‍िर्णय आहे.

पुणे महानगर प्रदेश विकास प्राधिकरण कार्यालयात आपल्या कामानिमित्त अधिकाऱ्यांच्या भेटीसाठी येणाऱ्या नागरिकांची गैरसोय टाळण्यासाठी संबंधित निर्णय घेण्यात आला आहे. तसेच पीएमआरडीए कार्यक्षेत्रातील नागरिक आणि प्रशासकीय अधिकारी यांचा समन्वय राहावा, या उद्देशाने आठवड्यातील पूर्ण दोन दिवस (सोमवार आणि गुरुवार) महानगर आयुक्त यांच्यासह सर्व विभागप्रमुख कार्यालयात नागरिकांच्या भेटीसाठी उपलब्ध राहणार आहे. यामुळे नागरिकांना आपल्या अडचणी, समस्या थेट वरिष्ठ अधिकाऱ्यांपर्यंत मांडण्याची संधी मिळणार आहे.

पीएमआरडीएच्या कार्यक्षेत्रातील विविध विकास कामांच्या अनुषंगाने स्थळ पाहणी तसेच क्षेत्रीय कार्यालयांना भेटी देण्यासाठी बुधवार आणि शुक्रवार निश्चित करण्यात आला आहे. यासह विभागप्रमुखांच्या अध‍िनस्त असलेल्या अधिकारी यांना भेटण्यासाठी मंगळवार, बुधवार आण‍ि शुक्रवारी दुपारी 3 ते 6 वाजेपर्यंत वेळ देण्यात आली आहे. अध‍िकारी कर्मचारी यांच्या जेवनाची वेळ पण निश्चित केली असून ती दुपारी दीड ते दोन असणार आहे. पीएमआरडीएमध्ये येणाऱ्या नागरिकांनी अधिकाऱ्यांशी संवाद साधण्यासाठी सोमवार किंवा गुरुवारी कार्यालयास भेट द्यावी, असे आवाहन पीएमआरडीएतर्फे करण्यात आले आहे.

संपर्कासाठी आकुर्डी कार्यालयाचा नंबर : ०२० – २७१६६०००
संपर्कासाठी औंध कार्यालयाचा नंबर : ०२० – २९९९१२७७

पुणे, दि. 29: नागरिकांनी आपल्या परिसरात अनधिकृत संस्था सुरु असल्यास जिल्हा महिला व बालविकास अधिकारी किंवा चाईल्ड हेल्पलाईन टोल फ्री क्रमांक १०९८ वर संपर्क साधावे; असे आवाहन महिला व बालविकास आयुक्त नयना गुंडे यांनी केले आहे.

पुणे जिल्ह्यातील आळंदी आणि ठाणे जिल्ह्यातील खडवली येथे बेकायदेशिर बालगृह, वसतीगृह आणि अनाथाश्रम चालविले जात असल्याचे प्रकार समोर आले आहेत, या संस्थामध्ये बालकांना डांबून ठेवले जात असून त्याचे शारिरीक व मानसिक व लैंगिक शोषण होत असल्याच्या घटना उघडकीस आल्या आहेत. याबाबींचा विचार करता बालकांवरील अपराधांना प्रतिबंध करण्यासाठी सहकार्य करावे, असे आवाहन करण्यात येत आहे.

याबाबी बालन्याय (मुलांचे काळजी व संरक्षण) अधिनियम २०१५ आणि सुधारित अधिनियम २०२१ तसेच महाराष्ट्र राज्य बालन्याय (मुलांचे काळजी व संरक्षण) नियम २०१८ मधील तरतुदींचे उल्लघंन करणाऱ्या आहेत. या कायद्यानुसार मान्यता, नोंदणी प्रमाणपत्र नसलेल्या संस्था चालविणाऱ्या व्यक्तीस एक वर्षाचा कारावास आणि एक लाख रुपये किंवा त्याहुन अधिक दंडाची तरतूद आहे. असे जिल्हा महिला व बाल विकास अधिकारी मनिषा बिरारीस यांनी प्रसिद्धी पत्रकान्वये कळविले आहे.