पुणे-खाजगी वाहनांची वर्षानुवर्षे गळचेपी करीत भर गर्दीत स्वतः मात्र निवांत मोकळ्या पहुडलेल्या बाप बीआरटी मार्गावर एका ट्रक ने पहा अशी चढाई केली ….

सोलापूर महामार्गावर भैरोबानाला येथे गणेश मंदिराजवळ शुक्रवारी सकाळी  बी आर टी साठी केलेल्या  दुभाजकावर मालट्रक चढला . या दुभाजकांवर लाल चमकणारी पट्टी नाहीच त्यामुळे हा मालट्रक  अपघाताने बी आर टी  दुभाजकावर चढला . हा मालट्रक सुमारे या दुभाजकावरून बरेच अंतर घासत गेला . या मार्गावरील दुभाजकावर वाहनाचे अपघाताचे प्रमाण दिवसेंदिवस वाढतच आहे .खरे तर हा उखडून सर्व  वाहनांना समान न्याय तत्वाने रस्ता खुला केला पाहिजे .पण इथल्या दुभाजकांना लाल चमकणारे पट्टे,दिवे लावून तरी वाहनांना समजेल अशी व्यवस्था करायला हवी पण … खाजगी वाहनांची काळजी घेणारे पुण्यात जन्माला यायचेत …. तो पर्यंत असेच चालणार ..हा  मालट्रक दुपारी एकच्या सुमारास या महामार्गावरील सर्व वाहतूक थांबवून क्रेनच्या साहाय्याने हटविण्यात आला . यावेळी मोठ्या संख्येने वाहतूक पोलिसानी हा मालट्रक बाजूला करण्यासाठी परिश्रम घेतले . यावेळी सर्व वाहतूक थांबवल्याने या भागात वाहतूक कोंडीचा सामना अनेक वाहन चालकांना करावा लागला . दुपारनंतर वाहतूक सुरळीत झाली .

पुणे : महावितरणकडे सुरक्षा ठेव म्हणून जमा असलेल्या रकमेवरील व्याजापोटी पुणे परिमंडलातील 25 लाख 90 हजार लघुदाब वीजग्राहकांना नियमानुसार 49 कोटी 69 लाख रुपयांचा परतावा देण्यात येत आहे. गेल्या एप्रीलपासून ते जून महिन्यातील वीजदेयकांत ही रक्कम समायोजीत करण्यात येत आहे.

महाराष्ट्र विद्युत नियामक आयोगाच्या निर्देशानुसार सर्व वर्गवारीतील वीजग्राहकांनी महावितरणकडे सुरक्षा ठेव जमा करणे बंधनकारक आहे. या ठेवीवर कालावधीनुसार बँकेच्या बेस रेटनुसार व्याज देण्यात येते. त्यानुसार पुणे परिमंडलातील पुणे व पिंपरी चिंचवड शहर तसेच मंचर, राजगुरुनगर व मुळशी विभागातील लघुदाब वर्गवारीमधील घरगुती 21 लाख 65 हजार वीजग्राहकांना 31 कोटी 93 हजार रुपये, वाणिज्यिक 2 लाख 61 हजार ग्राहकांना 9 कोटी 5 लाख रुपये, औद्योगिक 37,461 ग्राहकांना 5 कोटी 12 लाख रुपये, कृषीपंपधारक 1 लाख 9 हजार ग्राहकांना 2 कोटी 41 लाख रुपये तसेच इतर 18 हजार ग्राहकांना 1 कोटी 18 लाख रुपयांचा परतावा देण्यात येत आहे.

यंदा पुणे परिमंडलात एकूण 5 लाख 14 हजार वीजग्राहकांना 72 कोटी रुपयांची अतिरिक्त सुरक्षा ठेव भरण्यासाठी एप्रिल/ मे महिन्याच्या देयकांसोबत अतिरिक्त सुरक्षा ठेव भरण्यासाठी स्वतंत्र देयक देण्यात आलेले आहे. त्यातील 1 लाख 9 हजार वीजग्राहकांनी 7 कोटी 70 लाख रुपयांचा भरणा केलेला आहे. महाराष्ट्र विद्युत नियामक आयोगाच्या निर्देशानुसार आर्थिक वर्षातील एका महिन्याच्या सरासरी एवढे देयक सुरक्षा ठेव म्हणून जमा करावे लागते. वीजग्राहकांनी मूळ सुरक्षा ठेव याआधी जमा केली असली तरी वीजदर, वीजवापर आणि पर्यायाने देयकांची रक्कम वाढलेली आहे. त्यामुळे मूळ सुरक्षा ठेव आणि गेल्या आर्थिक वर्षातील एका महिन्याचे सरासरी वीजदेयक यातील फरकाच्या रकमेचे देयक अतिरिक्त सुरक्षा ठेव म्हणून ग्राहकांना देण्यात येते. अद्यापही ज्या ग्राहकांनी अतिरिक्त सुरक्षा ठेव भरलेली नाही त्यांनी सुरक्षा ठेव भरावी, असे आवाहन महावितरणने केले आहे. पुणे परिमंडलातील लघुदाब वीजग्राहकांना अतिरिक्त सुरक्षा ठेवीच्या रकमेची माहिती तसेच ऑनलाईन पेमेंटची सोय महावितरणच्या अधिकृत www.mahadiscom.in या संकेतस्थळावर तसेच महावितरणच्या मोबाईल अ‍ॅपवर उपलब्ध करून देण्यात आली आहे.

पुणे : सर्वच क्षेत्रात अग्रेसर असणारे पुणे स्मार्ट नसून ते स्मार्टेस्ट शहर आहे. पुण्याने केलेल्या प्रगतीमुळे  या शहराची भारतात एक वेगळी ओळख निर्माण होत आहे. इस्राईली  तंत्रज्ञानामुळे या शहराचा आणखी वेगाने विकास होण्यास मदत होईल. यासाठी सर्वतोपरी सहकार्य करण्याची तयारी इस्राईलचे राजदूत डॅनिएल कारमॉन यांनी दर्शवली. पुणे भेटीवर आलेल्या इस्राईलच्या शिष्टमंडळाने आज शासकीय विश्रामगृहात पालकमंत्री गिरीश बापट यांची भेट घेतली. या  शिष्टमंडळात डॅनिएल कारमॉन यांच्यासह  इस्राईलचे वाणिज्य राजदूत (कॉंन्सुलेट जनरल) डेव्हिड अकोव इस्त्राईलच्या दिल्ली दुतावासातील राजकीय सल्लागार अदवा विलचिंस्की यांचा सहभाग होता.

या भेटी दरम्यान पालकमंत्री गिरीश बापट यांच्यासह महापौर मुक्ता टिळक,सभागृहनेते श्रीनाथ भिमाले यांनी पुण्याच्या सर्वांगीण विकासाबद्दल या प्रतिनिधी मंडळासोबत विस्तृत चर्चा केली.

श्री. बापट यांनी या प्रतिनिधी मंडळाचे स्वागत करून त्यांना पुण्याच्या सुरु असलेल्या विविध विकास कामांबद्दल माहिती दिली. पीएमआरडीए मार्फत पुण्याचा विकास करण्यात येणार आहे.यामध्ये इस्राईलचे तंत्रज्ञान वापरता आले तर अधिक चांगल्या पद्धतीने हा विकास साधता येईल.  पुण्याला  २४ तास पाणी पुरवठा करण्यात येणार आहे. यासाठी वाढत्या लोकसंख्येचा विचार करता  भविष्यात पाण्याची साठवण करताना अडचणी येणार असून यासाठी प्रगत तंत्रज्ञान वापरावे लागेल.  तसेच शेती विषयक तंत्रज्ञान, तसेच घनकचरा व्यवस्थापन  या विषयात इस्राईल तंत्रज्ञानाची सहाय्य  होईल. तसेच पुणे शैक्षणिक आणि औद्योगिक केंद्र म्हणून ओळखले जात असल्याने या क्षेत्रातही इस्त्राईलच्या ज्ञानाची मदत होईल असे मत व्यक्त केले.

पंतप्रधान नरेंद्र मोदींच्या नेतृत्वाखाली भारताचा झपाट्याने विकास होत आहे. भारतातील प्रमुख शहरात पुण्याचा उल्लेख केला जातो. फक्त शैक्षणिक आणि औद्योगिक क्षेत्रातच नव्हे तर सर्वच क्षेत्रात पुण्याने केलेली प्रगती कौतुकास्पद आहे.पुणे शिक्षणाचे माहेर घर असल्याने शेती, अभियांत्रिकी तसेच औद्यागिक क्षेत्रात नवनवीन संशोधन होत आहेत. या संशोधनात इस्त्राईलचे प्रगत तंत्रज्ञान वापरल्यास निश्चितच चांगले परिणाम दिसतील. असे मत डॅनिएल कारमॉंन यांनी व्यक्त केले.

पंतप्रधान नरेंद्र मोदी पुढील महिन्यात इस्राईल दौऱ्यावर जाणार आहेत यावेळी पाण्याविषयी जनजागृती करण्याचा महत्वपूर्ण करार दोन्ही देशांदरम्यान  करण्यात येणार असल्याची माहिती त्यांनी यावेळी दिली.  त्याचबरोबर  स्टार्ट अप कंपन्यांना मार्गदर्शन तसेच त्यांच्या कौशल्य विकास करण्यासाठी मदत करण्याची ग्वाही देवून त्यांनी श्री. बापट यांना इस्राईल भेटीचे निमंत्रणही दिले.

डेव्हिड अकोव यांनी पाणी टंचाई वर मात करण्यासाठी आमचा पाण्याच्या पुनर्वापरावर जादा भर असल्याचे  सांगितले. त्यामुळे औद्यागिक सांडपाण्याच्या पुनर्वापराबाबत पुण्यात प्रकल्प उभा करण्याची इच्छा व्यक्त केली.

प्रधानमंत्र्यांच्या संकल्पनेतील ‘म्युनिसिपल बॉण्ड मार्केट’चा पाया पुणे महापालिकेने रचला – मुख्यमंत्री

                                  मुंबई, दि. 22 : ‘म्युनिसिपल बॉण्ड मार्केट’ ही प्रधानमंत्री नरेंद्र मोदी यांची संकल्पना पुणे महापालिकेने प्रत्यक्षात आणली आहे. शहरांच्या पायाभुत सुविधांच्या विकासासाठी अशा प्रकारच्या बॉण्ड्‌सच्या माध्यमातुन निधी उभारला जाणार आहे. त्याचा पाया पुणे महापालिकेने रचला आहे. देशातील सर्वोत्तम शहर म्हणून पुण्याचा नावलौकीक राहील, असा विश्वास मुख्यमंत्री देवेंद्र फडणवीस यांनी आज येथे व्यक्त केला.

पुणे महापालिकेचा देशातील पहिला बॉण्ड गुंतवणुकीसाठी खुला करण्याचा शुभारंभ मुंबई शेअर बाजारमधील इंटरनॅशनल कन्व्हेंशन सेंटरमध्ये झाला. त्यावेळी मुख्यमंत्री बोलत होते. व्यासपीठावर केंद्रीय नगरविकास मंत्री व्यंकय्या नायडू, पुण्याचे पालकमंत्री गिरीष बापट, केंद्रीय वित्त राज्यमंत्री अर्जूनराम मेघवाल, राज्याचे सामाजिक न्याय राज्यमंत्री दिलीप कांबळे, पुण्याच्या महापौर मुक्ता टिळक, सेबीचे अध्यक्ष अजय त्यागी, राज्याचे मुख्य सचिव सुमित मल्लिक, स्टेट बँकेच्या अध्यक्ष अरुंधती भट्टाचार्य, मुख्यमंत्र्यांचे अपर मुख्य सचिव प्रविण परदेशी आदी मान्यवर यावेळी उपस्थित होते.

यावेळी मुख्यमंत्री व श्री. नायडू यांच्या हस्ते शेअर बाजाराच्या परंपरेप्रमाणे बेल वाजवून पुणे महापालिकेचा बॉण्ड गुंतवणुकीसाठी खुला करण्यात आला.

यावेळी मुख्यमंत्री म्हणाले की, पुणे महापालिकेसह राज्यासाठी हा ऐतिहासिक क्षण आहे. नागरी प्रशासनाच्या कामात परिवर्तन होताना दिसत आहे. विविध पायाभुत सुविधांच्या विकास प्रकल्पांना वित्तीय पुरवठा करण्यासाठी नवीन साधनांची गरज भासते. अशावेळेस प्रधानमंत्री नरेंद्र मोदी यांनी आवाहन केले की, महापालिकेन स्वत:चा निधी उभारण्यासाठी शेअर बाजारात बॉण्ड आणावेत. या आवाहनाला सकात्मक प्रतिसाद देत 2264 कोटी रुपयांच्या बॉण्ड पुणे महापालिकेने गुंतवणुकीसाठी दाखल केले आहेत. पुणे ही देशातील पहिली महापालिका ठरली असून या बॉण्डच्या माध्यमातून जो निधी उभारला जाईल त्याद्वारे स्मार्ट पुणे शहर निर्माण होईल. पुणेकरांना 24 तास पिण्याचे शुद्ध पाणी, चांगले रस्ते, उत्तम घनकचरा व्यवस्थापन अशा सुविधा निर्माण होण्यास मदत होणार आहे.

दृष्टीकोन बदलून शहर विकासाचे प्रकल्प तयार करावेत आणि कार्यक्षम व पारदर्शक पद्धतीने नागरिकांना सेवा द्यावी. त्याला आधुनिक तंत्रज्ञानाची जोड दिल्यास कार्यक्षमतेत अधिकच भर पडणार आहे. देशात म्युनिसिपल बॉण्ड मार्केट विकसित होत आहे. त्याचा पाया पुणे शहराने रचला याचा अभिमान वाटतो, असे गौरवोद्‌गार मुख्यमंत्र्यांनी यावेळी काढले. राज्यात शहरीकरण वेगाने होत आहे. अशावेळेस नागरिकांना अधिक चांगल्या सोयी देण्यासाठी नागरी प्रशासनात महाराष्ट्र देशामध्ये अग्रेसर राहील, असा विश्वासही मुख्यमंत्र्यांनी यावेळी व्यक्त केला.

येत्या दोन ते तीन वर्षात पुणे शहरामध्ये घनकचऱ्याचे विलगीकरणाचा प्रकल्प राबविण्यात येणार आहे. शहरातील सांडपाण्याचा प्रत्येक थेंबावर प्रक्रिया केली जाईल. मेट्रो आणि सार्वजनिक दळणवळण व्यवस्था अधिक सक्षम करण्यात येत आहे. पुणेकरांना 24 तास पाणी पुरवठा केला जाईल. जलवाहिन्यांसोबत फायबर नेटवर्कचे जाळे निर्माण करण्यात येणार आहे. यामुळे पुणे देशातील सर्वोत्तम शहर म्हणून ओळखले जाईल, असे मुख्यमंत्र्यांनी यावेळी सांगितले.

देशातील स्थानिक स्वराज्य संस्थांनी पुणे मॉडेलचा आदर्श घ्यावा

– केंद्रीय नगरविकास मंत्री व्यंकय्या नायडू

केंद्रीय नगरविकास मंत्री व्यंकय्या नायडू म्हणाले की, आज शेअर बाजारात घंटी वाजवून पुणे महापालिकेचा बॉण्ड गुंतवणुकीसाठी खुला करण्यात आला. या घंटीतून निघालेला नागरी सुधारणेचा प्रतिध्वनी देशभर घुमण्यास मदत होणार आहे. देशातील सर्व स्थानिक स्वराज्य संस्थांनी पुणे मॉडेलचा आदर्श घ्यावा, असे आवाहन करुन श्री. नायडू म्हणाले की, शहरे ही विकासाचे इंजिन आहेत. त्यामुळे नागरिकांचे जीवनमान उंचावण्यासाठी महापालिकांनी महत्त्वपूर्ण प्रकल्प हाती घ्यावेत. केंद्र शासनातर्फे देशभरात शहर विकासाकरीता 4.13 लाख कोटी रुपयांचा निधी वितरीत केला जातो. विकास प्रकल्पांना वित्तीय सहाय मिळाल्यावर त्याची गती निश्चितच वाढेल. शहर विकासाचा आराखडा तयार करताना स्थानिक नागरिकांनी त्यात सहभाग दिला पाहिजे. त्याचबरोबर शहरांनी आणि त्याचे व्यवस्थापन पाहणाऱ्या स्थानिक स्वराज्य संस्थांनी स्वत:चा निधी उभारणे आवश्यक आहे. स्मार्ट सिटीच्या माध्यमातून शहरांच्या सुधारणांवर भर देण्यात येत आहे. जी शहरे अधिक चांगल्या पद्धतीने विकासाची कामे करतील त्यांना प्रोत्साहन म्हणून 20 टक्के निधी देण्यात येईल.

केंद्रीय वित्त राज्यमंत्री श्री. मेघवाल म्हणाले की, 2017 हे वित्तीय सुधारणांचे वर्ष म्हणून ओळखले जाणार आहे. देशातील व्यवहार डिजीटल फ्लॅटफॉर्मवर आले आहे. देशामध्ये 91 लाख नवीन करदात्यांची यामुळे भर पडली आहे.

श्री. बापट म्हणाले की, नगरविकासाच्या क्षेत्रात पुणे महापालिकेने नवीन विक्रम केला आहे. बॉण्डच्या माध्यमातून निधी उभारण्यासाठी महत्त्वपूर्ण पाऊल उचलण्यात आले आहे. पुणे देशातील पहिल्या क्रमाकांचे शहर बनविण्यासाठी प्रयत्न करणार असल्याचे त्यांनी यावेळी सांगितले.

यावेळी श्रीमती भट्टाचार्य, ‘सेबी’चे अध्यक्ष श्री. त्यागी, मुंबई शेअर बाजारचे मुख्य कार्यकारी अधिकारी आशिष चौहान, पुण्याच्या महापौर मुक्ता टिळक यांची भाषणे झाली. पुणे महापालिका आयुक्त कुणाल कुमार यांनी प्रास्ताविक केले.

या बॉण्डच्या माध्यमातून 2264 कोटी रुपये पुणे महापालिका उभारणार असून या द्वारे उभारलेल्या निधीतून 24×7 पिण्याचा पाणी पुरवठ्याचा प्रकल्प सुरु करण्यात येणार आहे. पुढील 30 वर्ष पुणेकरांना शुद्ध, स्वच्छ पाणी यामाध्यमातून उपलब्ध होणार आहे. त्याचबरोबर रस्ते, सांडपाणी प्रकल्प, जलवाहिन्या आदी कामे केली जाणार आहे.

या सोहळ्यास पुणे शहरातील स्थानिक लोकप्रतिनीधी, वरिष्ठ अधिकारी मोठ्या संख्येने उपस्थित होते.

पुणे-वानवडी गावामधील आदेश्वर दादा जैन टेम्पल ट्रस्टचा वर्धापन दिन उत्साहात साजरा करण्यात आला . या वर्धापन दिनानिमित्त विविध धार्मिक कार्यक्रमाचे आयोजन करण्यात आले होते . यामध्ये मंदिरात सकाळी अठरा अभिषेक , देवाचे नवीन पाच ध्वज मंदिराच्या कळसावर चढवून ध्वजारोहण करण्यात आले . त्यानंतर जांभुळकर गार्डनमध्ये स्वामी वात्सल्य म्हणजेच महाप्रसादाचा कार्यक्रम झाला .

यावेळी रशमीन शहा यांनी सांगितले कि , आदेश्वर भगवानजी स्थापना खूप वर्षांपासूनची आहे . या देवळातील देवाची मूर्ती जैन समाजातील संप्रती महाराज यांच्याहस्ते करण्यात आली आहे . त्यांनी अनेक ठिकाणी देवळांची उभारणी केली आहे . मंदिराच्या ठिकाणी पूर्वी वाण्यांची दुकाने मोठ्या प्रमाणात होती  . या भागाला वाण्यांची बोळ म्हणत . त्यामुळे या वाण्यांच्या बोळपासून या भागाला वानवडी असे म्हणू लागले . या मंदिराचे देखरेख गोडीजी पार्श्वनाथ टेम्पल ट्रस्टच्या माध्यमातून होते .

या कार्यक्रमांमध्ये अनिल गांधी , रमेश मणिलाल शहा , रशमीन शहा , जयेश शहा , हेमंत शहा , पंकज शहा , भूपेंद्र शहा व शशिकांत मणियार आदी मान्यवर आणि जैन श्वेतांबर बांधव मोठ्या संख्येने उपस्थित होते .

पुणे- महात्मा गांधी आणि डॉ. बाबासाहेब आंबेडकर यांच्यामध्ये दरी निर्माण करण्याचा प्रयत्न केला जात असल्याबद्दल खंत व्यक्त करून शेतकऱ्यांच्या आत्महत्या हे जागतिकीकरणाचे परिणाम असल्याचे मत ज्येष्ठ समाजवादी नेते भाई वैद्य यांनी येथे व्यक्त केले.माझे वडील आणि एस. एम. जोशी या दोन ‘अण्णां’मुळे मी घडलो, अशी भावना देखील यावेळी वैद्य यांनी व्यक्त केली.

महाराष्ट्र साहित्य कला प्रसारिणी सभा आणि संवाद पुणेतर्फे राष्ट्रवादीचे अध्यक्ष माजी केंद्रीय कृषिमंत्री शरद पवार यांच्या हस्ते ९० व्या वर्षांतील पदार्पणानिमित्त भाई वैद्य यांचा कृतज्ञता सन्मान करण्यात आला. माजी केंद्रीय गृहमंत्री सुशीलकुमार शिंदे, बिहारचे माजी राज्यपाल डॉ. डी. वाय. पाटील, माजी मंत्री बाळासाहेब थोरात, डॉ. पी. डी. पाटील, ज्येष्ठ पत्रकार मधुकर भावे, माजी महापौर अंकुश काकडे, सभेचे अध्यक्ष उद्धव कानडे, सचिन इटकर आणि सुनील महाजन या वेळी उपस्थित होते.

यावेळी शरद पवार म्हणाले ,जनसंघ आणि समाजवादी यांना बरोबर घेऊन स्थापन केलेल्या पुरोगामी लोकशाही दल सरकारमध्ये भाई वैद्य गृहराज्यमंत्री होते. आमचे मंत्रिमंडळ मोठे गमतीचे असले तरी अडीच वर्षांत अनेक महत्त्वाचे निर्णय त्या काळात झाले. गृह खात्याबरोबरच सामान्यांच्या हिताचे धोरणात्मक निर्णय घेतले जातात की नाही याकडे भाईंचा कटाक्ष असायचा. अनेक वर्षे मंत्री राहण्यापेक्षा अल्पकाळच्या मंत्रिपदामध्ये भाईंनी आपल्या कर्तृत्वाचा आणि दृष्टीचा ठसा उमटविला,

ते पुढे म्हणाले ,न आक्रमणाच्या काळात जनतेमध्ये जागृती घडविण्याबरोबरच सामाजिक ऐक्यासाठी महाविद्यालयीन युवकांच्या समितीचे भाई अध्यक्ष होते आणि मी सचिव. माझे सामाजिक कामाचे पहिले पाऊल भाईंच्या नेतृत्वाखालीच पडले, अशी आठवण सांगून पवार म्हणाले, समाजवादी असल्याने त्यांच्या बैठका काकाकुवा मॅन्शनमध्ये चालायच्या, तर आमच्या काँग्रेस भवनमध्ये. एस. एम. जोशी यांचा प्रभाव असलेले भाई तत्त्वाने चालणारे, तर लोकांचे काम करण्यासाठी खुर्चीकडे आमचे लक्ष असायचे. पारदर्शक आणि लोकाभिमुख कारभार कसा करायचा हे भाईंच्या महापौरपदाच्या काळात पुणेकरांनी अनुभवले. राज्याच्या सत्तेमध्ये बदल झाला तेव्हा उत्तमराव पाटील, निहाल अहमद, हशू आडवाणी असे सहकारी होते. आपण कधी मंत्री होऊ हे त्यांना स्वप्नातही वाटले नसते. केंद्र सरकारी कर्मचाऱ्यांना वेतन आयोग लागू झाल्यानंतर राज्य सरकारी कर्मचाऱ्यांचे संप होत असत. आम्ही केंद्राप्रमाणेच वेतन आयोग लागू केल्यामुळे १९७८ पासून राज्यातील कर्मचाऱ्यांचा कधी संप झालेला नाही.

एस. एम. जोशी, ना. ग. गोरे, मधू दंडवते यांच्याबरोबर भाईंनी दीर्घकाळ काम केले. चंद्रशेखर यांच्या ‘भारत जोडो’ यात्रेचे नियोजन भाईंनी केले होते. जगामध्ये समाजवादी विचारांचे पतन झाले असले तरी भाईंची विचारांची निष्ठा ढळली नाही. स्वच्छ, उत्तम चारित्र्य, विविध समाज घटकांविषयी आस्था आणि व्यापक समाजहिताचा निर्णय करणारा नेता म्हणजे भाई वैद्य. उपेक्षितांच्या प्रश्नांची सोडवणूक करण्यासाठी भाईंचे प्रयत्न अविरत सुरू राहतील, अशी भावना पवार यांनी व्यक्त केली.