पुणे : ‌‘यशोगाथा संघर्षाची‌’ हे डॉ. टी. टी. पाटील यांचे आत्मकथनपर पुस्तक म्हणजे त्यांच्या आयुष्याची शिदोरी असून सफलतेची यशोगाथा आहे. पुस्तक वाचनातून उर्मी मिळते. ‌‘माणसात गुंतवणूक करा‌’, ‌‘जे कराल त्यावर नितांत प्रेम करा‌’ आणि ‌‘तुम्ही स्वत:च एक ब्रँड आहात‌’ हे त्यांचे विचार आयुष्यातील वाटचालीत प्रत्येकाला उपयोगी ठरणार आहेत, असे प्रतिपादन जमाबंदी आयुक्त व संचालक, भूमी अभिलेख (नि.) डॉ. सुहास दिवसे यांनी केले.
खान्देश सुपुत्र डॉ. टी. टी. पाटील लिखित ‌‘यशोगाथा संघर्षाची‌’ या आत्मकथनपर पुस्तकाचा प्रकाशन सोहळा साफा बँक्वेट हॉल, बालेवाडी हायस्ट्रीट येथे आयोजित करण्यात आला होता. त्या वेळी डॉ. दिवसे अध्यक्षपदावरून बोलत होते. पुस्तकाचे प्रकाशन लोकमतचे समूह संपादक विजय बाविस्कर, बीव्हीजी उद्योग समूहाचे अध्यक्ष हणमंतराव गायकवाड, जे. एल. आर. उद्योग समूहाचे संचालक गोविंद पाटील, महाराष्ट्र आर्थिक विकास महामंडळाचे उपाध्यक्ष सचिन ईटकर, महात्मा फुले कृषी विद्यापीठाचे माजी कुलगुरू डॉ. योगेंद्र नेरकर, राष्ट्रपती पुरस्कारप्राप्त प्राचार्य (नि.) डॉ. सुरेश सावंत, रिचफिल्ड फर्टीलायझर्स प्रा. लि.चे अध्यक्ष व कार्यकारी संचालक डॉ. स्वप्नील बच्छाव, प्रकाशिका सिंधूबाई टी. पाटील, डॉ. पद्मश्री पाटील यांच्या उपस्थितीत झाले.
डॉ. दिवसे पुढे म्हणाले, आदिवासी भागातील एक हुशार विद्यार्थी ते यशस्वी व्यावसायिक हा डॉ. टी. टी. पाटील यांचा प्रवास प्रेरणादायी आहे. ज्या ज्या व्यक्ती हे पुस्तक वाचतील त्यांचे आयुष्य निश्चित बदलेल.
विजय बाविस्कर म्हणाले, माणसे उगीचच मोठी होत नाहीत. प्रत्येकाचे आयुष्य संघर्षमय असते; पण आयुष्य सुंदरही असते हे डॉ. टी. टी. पाटील यांनी कृतीतून दाखवून दिले आहे. सिंधूताई पाटील आणि कुटुंबियांनी डॉ. टी. टी. पाटील यांचे स्वप्न पूर्ण केल्याचे आवर्जून नमूद करून बाविस्कर पुढे म्हणाले, ‌‘यशोगाथा संघर्षाची‌’ हे पुस्तक वाचून शेकडो उद्योजक तयार झाले तर ती डॉ. पाटील यांना खरी भावांजली असणार आहे.
डॉ. टी. टी. पाटील यांच्या पत्नी सिंधूताई पाटील प्रकाशक या नात्याने बोलताना म्हणाल्या डॉ. पाटील यांनी आयुष्यभर कष्ट केले. त्यांच्या हयातीत पुस्तकाचे प्रकाशन करायचे होते, पण तसे काही झाले नाही. त्यांची पुस्तक प्रकाशन करण्याची इच्छा मात्र पूर्ण केली आहे.
हणमंतराव गायकवाड म्हणाले, पुस्तक वाचताना असे वाटते की, पुस्तक आपल्याशी बोलतेच आहे. वेगळ्या वाटेने जाऊन दीपस्तंभासारखी कामे करणाऱ्या काही व्यक्ती असतात. डॉ. पाटील यांची आत्मकथा वाचल्यास दीपस्तंभासारख्या अनेक व्यक्ती निर्माण होतील.
सचिन ईटकर म्हणाले, डॉ. पाटील यांचा संघर्ष प्रेरणादायी असून त्यांनी उद्यमशीलता विकसित केली आहे. ग्रामीण भागात उद्योजकांची संख्या वाढेल तेव्हाच विकसित भारताचे स्वप्न साकार होऊ शकणार आहे.
ग्रामीण भागातही गुणवत्ता असते हा मुद्दा अधोरेखित करून योगेंद्र नेरकर म्हणाले, डॉ. पाटील यांनी विद्यार्थीदशेपासून लढा दिला असून जिंकलाही आहे. उद्योग क्षेत्रात येऊ पाहण्याऱ्यांसाठी हे पुस्तक गुरुकिल्ली आहे.
सुरेश सावंत म्हणाले, डॉ. टी. टी. पाटील यांची आत्मकथा एकलव्याची आठवण करून देणारी आहे. ही एका व्यक्तीची आत्मकथा नाही तर खान्देशी लोकजीवनाचे दर्शन यातून घडत आहे. त्यांना चाकोरीबद्ध जगणे मान्य नव्हते. त्यांच्या कार्यातून समृद्ध, बहुआयामी व्यक्तीमत्त्वाचे दर्शन घडते. डॉ. पाटील यांची जीवनगाथा अभ्यासक्रमामध्ये असावी अशी अपेक्षाही त्यांनी व्यक्त केली.
डॉ. संदीप बच्छाव यांनी डॉ. टी. टी. पाटील यांचा जीवनप्रवास कथन केला तर डॉ. पद्मश्री पाटील यांनी पुस्तकाचा प्रवास उलगडला.
मान्यवरांचे स्वागत डॉ. संदीप बच्छाव, पंकज पाटील, प्रतिभा बच्छाव, संदीप पाटील यांनी केले. सूत्रसंचालन मिलिंद कुलकर्णी यांनी केले.

पुणे: महाराष्ट्र शासनाच्या वतीने शिवछत्रपती क्रीडा राज्य पुरस्कारांचे नुकतेच वितरण झाले. यामध्ये पुण्याच्या जिनेश शीतल सत्यन नानल याने महाराष्ट्राच्या क्रीडा इतिहासात आपले नाव सुवर्णाक्षरांनी कोरले आहे. इनलाईन फ्रीस्टाईल स्केटिंग या क्रीडा प्रकारात उल्लेखनीय कामगिरी केल्याबद्दल जिनेशला ‘शिवछत्रपती क्रीडा राज्य पुरस्कार २०२३-२४’ प्रदान करण्यात आला आहे. हा पुरस्कार महाराष्ट्र शासनाचा अतिशय मानाचा व प्रतिष्ठेचा क्रीडा पुरस्कार आहे. हा पुरस्कार मिळाल्याबद्दल जिनेशचे कुटुंबीय व स्नेहीजनांच्या वतीने त्याचा विशेष सत्कार करण्यात आला. यावेळी जिनेशची आई डॉ. शीतल सत्यन नानल,  वडील डॉ. सत्यन नानल, डॉ. इकबाल सय्यद, मामा विशाल खटोड (जैन), केतन नानल, क्रिश खटोड, विजय बाजी आदी उपस्थित होते.

जिनेशने गेल्या दहा वर्षांपासून प्रशिक्षक अशुतोष जगताप यांच्या मार्गदर्शनाखाली सातत्यपूर्ण सराव व कठोर परिश्रम करत भारतीय स्केटिंग विश्वात आपले वेगळे स्थान निर्माण केले आहे. नुकत्याच झालेल्या हॉंगकॉंगमधील वर्ल्ड गेम्स सिरीजमध्ये जिनेशने एक रौप्य आणि एक कांस्य पदक पटकावले. आंतरराष्ट्रीय ऑलिंपिक समितीच्या अधिपत्याखाली होणाऱ्या या स्पर्धा जागतिक दर्जाच्या खेळाडूंसाठी गौरवाचे व्यासपीठ मानल्या जातात आणि जिनेशने त्यात आपले कौशल्य सिद्ध केले आहे. चीन येथे ऑगस्टमध्ये होणाऱ्या जागतिक स्पर्धेसाठी जिनेशची निवड झाली आहे.

चीनमध्ये झालेल्या आशियाई क्रीडा स्पर्धांमध्ये जिनेशने भारताचे प्रतिनिधित्वही केले आहे. देशांतर्गत पातळीवर त्याने सलग पाचवेळा राष्ट्रीय विजेतेपद पटकविले असून, स्केटिंगमध्ये जिनेश भारतात पहिल्या,  तर जगात सातव्या क्रमांकावर आहे. आई शीतल व वडील सत्यन नानल हे दोघेही व्यवसायाने डॉक्टर असून, गेल्या २० वर्षांपासून वैद्यकीय क्षेत्रात कार्यरत आहेत.

आई शीतल म्हणाल्या, ‘मैदानाबरोबरच जिनेशचा शैक्षणिक क्षेत्रातही उल्लेखनीय सहभाग आहे. सध्या तो एमआयटी विश्वशांती विद्यापीठामध्ये संगणक अभियांत्रिकीच्या तिसऱ्या वर्षात शिकत आहे. क्रीडा व अभ्यासात केलेल्या उत्कृष्ट कामगिरीबद्दल त्याने शिष्यवृत्तीही मिळवली आहे. त्याच्यातील कौशल्याला चिकाटीची जोड, योग्य मार्गदर्शन मिळाले. आई-वडील म्हणून त्याच्या कामगिरीचे, यशाचे कौतुक आहे.”

प्रशिक्षक अशुतोष जगताप म्हणाले, “जिनेशच्या यशस्वी प्रवासामागे त्याची अनेक वर्षांची कठोर मेहनत, एकाग्रता, संयम आणि सातत्यपूर्ण प्रयत्न आहेत. नेहमी स्वतःच्या मर्यादा ओलांडत यशाची नवी शिखरे पादाक्रांत करणारा जिनेश युवा स्केटर्ससाठी आदर्श ठरला आहे. हा पुरस्कार केवळ त्याचाच नव्हे, तर संपूर्ण भारतीय स्केटिंग क्षेत्रासाठी अभिमानाचा क्षण आहे.”

बालेवाडीतील श्री शिवछत्रपती क्रीडा संकुलात महाराष्ट्राचे राज्यपाल सी. पी. राधाकृष्णन व मुख्यमंत्री देवेंद्र फडणवीस यांच्या हस्ते, तसेच उपमुख्यमंत्री एकनाथ शिंदे आणि अजित पवार यांच्या उपस्थितीत हा पुरस्कार स्वीकारणे आनंदाची बाब आहे. भारताचे प्रतिनिधित्व करणे ही अभिमानाची गोष्ट आहे. माझ्या या प्रवासात आई-वडील, प्रशिक्षक यांचे मोलाचे योगदान आहे. मला सातत्याने प्रोत्साहन दिल्यामुळेच यशस्वी कामगिरी करता आली. येणाऱ्या काळात ऑलिंपिकमध्ये भारतासाठी पदक जिंकायचे आहे.

– जिनेश शीतल सत्यन नानल, स्केटिंगपटू

पुणे (दि.२) : पुणे महानगर प्रदेश‍ विकास प्राधिकरण हद्दीतील अनधिकृत होर्डिंगवर पथकाच्या माध्‍यमातून कारवाई करण्यात येत आहे. हवेली तालुक्यात लोणी काळभोरमध्‍ये नुकतीच तीन ठिकाणी अनधिकृत होर्डिंग काढण्यात आले.

लोणी काळभोरमधील या कारवाईमुळे होर्डींगधारक, ॲडव्हरटायझिंग कंपनी यांनी धसका घेतला असून प्राधिकरणाच्या विकास परवानगीकडे अंतिम चलणे भरत आहे. यासह काही होर्डींग संबंध‍ितांनी स्वत:हून काढून घेतले. अवकाळी पाऊस, वादळी वारे आदीमुळे अशा होर्डींगपासून धोका निर्माण होण्याची शक्यता नाकारता येत नाही. त्यामुळे संबंध‍ितांनी वर्दळीच्या व रहदारीच्या ठिकाणाचे धोकादायक, मर्यादेपेक्षा उंचीचे, दुबार संरचना होर्डिंग काढून घ्यावेत. तसेच होर्डींगधारकांनी अनधिकृत होर्डींगला परवानगी घेण्यात यावी, अन्यथा पीएमआरडीएच्या माध्‍यमातून एकतर्फी निष्कासन कारवाई करण्यात येईल. याची नोंद घ्यावी, असे आवाहन प्राधिकरणाच्या सह आयुक्त डॉ. दिप्ती सुर्यवंशी-पाटील यांनी केले आहे.

संबंधित कारवाई महानगर आयुक्त डॉ. योगेश म्हसे, अतिरिक्त महानगर आयुक्त दिपक सिंगला, पोलिस अधिक्षक तथा दक्षता अधिकारी अमोल तांबे, सह आयुक्त डॉ. दिप्ती सुर्यवंशी-पाटील यांच्या मार्गदर्शनाखाली सुरु आहे. कारवाईवेळी उपजिल्हाधिकारी प्रमोद कुदळे, तहसीलदार रविंद्र रांजणे, तहसीलदार सच‍िन म्हस्के, पोलिस निरीक्षक महेशकुमार सरतापे, शाखा अभियंता विष्णू आवाड, शरद खोमणे, प्रणव डेंगळे, तेजस मदने यांच्यासह स्थानिक बंदोबस्त तैनात होता.

अनधिकृत बांधकामांवर कारवाईचा बडगा
गेल्या काही द‍िवसापासून पीएमआरडीएच्या माध्‍यमातून अनधिकृत बांधकामांवर कारवाई सुरु आहे. यात बुधवारी वाघोलीतील (ता.हवेली) चालू बांधकामावर तसेच बावधनमधील (ता. मुळशी) बकाजी कॉर्नर ते स्मशान भूमीपर्यंत रस्त्याच्या दुर्तफा अतिक्रमणे काढण्यात आली. यात ३९ पत्राशेड, आरसीसी कट्टा, कंपाऊंड वॉल व टपरी आदी स्ट्रक्चर्स जमीनदोस्त करण्यात आली. यामुळे रस्त्यावरील वाहतुक कोंडी कमी होण्यास मदत होणार आहे.

पुण्यातील लोहगाव-खराडी या दोन्ही परिसरांना जोडणाऱ्या अवघ्या तीनशे मीटरच्या रस्त्यासाठी आमदार बापू पठारे यांनी संतप्त होत आमरण उपोषण छेडलं आहे. रस्त्याचे काम जोपर्यंत होत नाही तोपर्यत आमरण उपोषण सुरु राहणार असे पठारे यांनी म्हटलं आहे.आज सकाळी दहा वाजल्यापासून बापू पठारे हे त्यांचे काही कार्यकर्ते आणि स्थानिकांसोबत या तीनशे मीटर रस्त्याजवळ आंदोलनाला बसले आहेत. या रस्त्याबाबत तक्रार करायला गेलं की या विभागाचे अधिकारी बघू, करू असं म्हणतात पण आता जोपर्यंत या रस्त्याचे डांबरीकरण होत नाही, तोपर्यंत मी असाच बसून राहणार असा पावित्र्य पठारे यांनी घेतला आहे. उपोषणासंदर्भात पठारे यांनी सोशल मीडियावर पोस्ट करत माहिती दिली आहे.

लोहगाव-वाघोली रस्त्याला जोडणाऱ्या फॉरेस्ट पार्क, गोठण ओढा मार्गे जाणाऱ्या रस्त्यावरील केवळ ३०० मीटर अंतराचा रस्ता गेल्या अनेक वर्षांपासून प्रलंबित आहे. नागरिक, विद्यार्थी, ज्येष्ठ नागरिक आणि रुग्णवाहिकांना दररोज या रस्त्याच्या अपूर्णतेमुळे मोठ्या अडचणींना सामोरे जावे लागत आहे.वारंवार निवेदने, मागण्या आणि पाठपुरावा करूनही पुणे महानगरपालिकेने दुर्लक्ष केल्यामुळे आता मी या भागाचा लोकप्रतिनिधी म्हणून आज सकाळी ८.३० वाजता त्याच लोहगाव येथील ३०० मीटर रस्त्यावर आमरण उपोषण सुरू करण्याचा निर्णय घेतला आहे. असं पठारे यांनी पोस्टमध्ये म्हटलं आहे.

पुणे-पुण्यातील विश्रामबाग पोलिस ठाण्यात पोलीस फौजदार विराज गावडेंवर बलात्काराचा गुन्हा दाखल झाला आहे. या प्रकरणाची हकीकत मोठी रंजक आणि समाजाच्या डोळ्यात अंजन घालणारी ठरू शकेल अशी असल्याचे सध्या तरी दिसते आहे पीडित तरुणीने विश्रामबाग पोलिस ठाण्यात या फौजदारा विरोधात फिर्याद दिली आहे. तिने दिलेल्या तक्रारीनुसार , पोलिस उपनिरीक्षक विराज गावडे (वय ३२, रा. गोखळी, ता. फलटण, जि. सातारा), त्याचा भाऊ कुणाल गावडे तसेच वडील गजानन गावडे यांच्याविरुद्ध गुन्हा दाखल करण्यात आला आहे.सहायक पोलिस आयुक्त अनुजा देशमाने पुढील तपास करत आहेत.

याबाबत पोलिसांनी दिलेल्या माहितीनुसार, आरोपी पोलिस उपनिरीक्षक विराज गावडे हा पुण्यात पूर्वी स्पर्धा परीक्षेची तयारी करत होता. २०२० मध्ये त्याची पीडित तरुणी सोबत ओळख निर्माण होऊन त्यांच्यात प्रेमसंबंध निर्माण झाले. दोघांनी नोंदणी पद्धतीने विवाह देखील केला.परंतु ही बाब त्याने कुटुंबीय, मित्रांपासून लपवली. पीडित तरुणीला पत्नीप्रमाणे दर्जा दिला नाही. तरुणीने याबाबत त्याच्याकडे विचारणा केली त्यावेळी कुटुंबीयांना विवाहाबद्दलची माहिती देतो, असे सांगून विराज याने तरुणीकडून वेळोवेळी विविध कारणे सांगत १० ते १२ लाख रुपये घेतले आणि तिच्याशी शारीरिक संबंध ठेवले.

दरम्यान, विराज याची पोलिस उपनिरीक्षकपदी निवड झाली. पीडित तरुणीने त्यानंतर त्याच्याकडे लग्न झाल्याचे घरी सांग अशी विचारणा केली. कुटुंबीयांशी ओळख करुन दे, अशी विनंती तिने केली. त्यावेळी त्याने टाळाटाळ सुरू केली. ‘माझे कुटुंबीय माझ्याशी स्थळ पाहत आहेत. तू खालच्या जातीची आहे. आपला विवाह कुटुंबीय मान्य करणार नाही. माझा विचार सोडून दे’, असे त्याने तिला सांगितले. त्याने तरुणीला भेटण्यास टाळाटाळ सुरू केली. त्याचे वडील गजानन आणि भाऊ कुणाल यांनी देखील यासाठी त्याला साथ दिली. मला वडिलांच्या जागेवर चंद्रपूर येथे नोकरी मिळणार होती. विराजच्या सल्ल्यामुळे मी नोकरी नाकारली. आज मला नोकरीही नाही, तसेच विराजने माझी फसवणूक केली. मला धमकावून गर्भपात केला, असे पीडित तरुणीने तक्रारीत सांगितले आहे.

पुणे-द पिनॅकल ग्रुप व द नेचर मुकाईवाडी पुरस्कृत मास्टर्स कप 2025क्रिकेट स्पर्धेत 56 माजी अव्वल महाराष्ट्रातील खेळाडूंनी आपला सहभाग नोंदवला आहे. ही स्पर्धा पीवायसी हिंदू जिमखाना क्रिकेट मैदानावर 3 व 4 मे 2025रोजी रंगणार आहे.

स्पर्धेत संजय कोंढाळकर इलेव्हन, रियाज बागवान इलेव्हन, श्रीकांत जाधव इलेव्हन, श्रीकांत कल्याणी इलेव्हन, शंतनू सुगवेकर इलेव्हन आणि विनायक द्रविड इलेव्हन हे सहा संघ आपले कौशल्य पणाला लावणार आहेत.

स्पर्धेतील सहभागी संघामध्ये महाराष्ट्राचे प्रतिनिधित्व केलेल्या खेळाडूंमध्ये शंतनू सुगवेकर, प्रसाद प्रधान, श्रीकांत कल्याणी, संजय कोंढाळकर, नितीन फडतरे, रणजित खिरीड, कौस्तुभ कदम, मृगांक राठी, करण थापा, सत्येन लांडे, रियाज बागवान, इंद्रजीत कामतेकर, अजय चव्हाण, संजय झरेकर, सुधीर देवदास, जयदीप नरसे, चंदन गंगावणे, विजय संगम, श्रीकांत जाधव, प्रसाद कानडे, कौशिक आफळे, सुनंदन लेले, शाम ओक, अनिल वाल्हेकर, रूपक मुळ्ये, प्रभाकर मोरे, राहुल कानडे, अमेय श्रीखंडे, हेमंत आठले, गिरीश कुलकर्णी, अजय नलावडे, नितीन सामल, नितीन हार्डीकर, रोहित खडकीकर, मंगेश वैद्य, विशाल मेहता, पराग चितळे, सुभाष रांजणे, आनंद दळवी, विनायक द्रविड, निरंजन गोडबोले, प्रशांत खराडे, पराग शहाणे, अपूर्व साने, मंदार दळवी, गजानन राडकर, राजेंद्र मनोहर यांचा समावेश आहे.

स्पर्धेचे सामने साखळी व बाद पद्धतीने खेळविण्यात येणार आहे. स्पर्धेतील सामने प्रत्येकी 10 षटकाचे असणार असून सामन्यात विकेट पडल्यास संघाच्या धावसंख्येतून प्रत्येक विकेट मागे 5धावा वजा करण्यात येणार आहेत. स्पर्धेतील विजेत्या संघाला करंडक व 50 हजार रुपये, तर उपविजेत्या संघाला करंडक व 35 हजार रुपये अशी पारितोषिके देण्यात येणार आहेत.याशिवाय सर्वोत्कृष्ट फलंदाज, गोलंदाज, यष्टिरक्षक, क्षेत्ररक्षक यांना प्रत्येकी 10 हजार रुपये व करंडक आणि मालिकावीर खेळाडूला करंडक व 15 हजार रुपये अशी पारितोषिके देण्यात येणार आहेत. सामनावीर खेळाडूला करंडक व 5 हजार रुपये अशी पारितोषिके देण्यात येणार आहेत. स्पर्धेच्या यशस्वी संयोजनासाठी संयोजन समिती स्थापन करण्यात आली असून यामध्ये मनीष साबडे, आशुतोष सोमण, विनायक द्रविड व इंद्रजीत कामतेकर यांचा समावेश आहे.

दशक्रिया विधी च्या “काक स्पर्शात” ही “कबुतरांचे” अतिक्रमण…
वनविभाग व पक्षी तज्ञाशी बोलून कबुतरांच्या “कलिंग” बाबत निर्णय घ्यावा

पुणे-महापालिकेने पुढाकार घेऊन कबुतरांना खाद्य टाकणाऱ्यांवर दंडात्मक कारवाई चे आदेश दिलेत पण पुण्यात वाढलेला कबुतरांचा उच्छाद मात्र थांबविण्यासाठी नजीकच्या काळात गांभीर्याने विचार करावा असे भाजपा प्रवक्ते संदीप खर्डेकर यांनी म्हटले आहे

खर्डेकर म्हणाले कि,’वैकुंठ स्मशानभूमीत परिचितांच्या दशक्रिया विधी साठी गेलो असता एक अत्यंत अस्वस्थ करणारे दृश्य बघावयास मिळाले.
दहाव्या च्या वेळी मयत व्यक्ती चे नातेवाईक विधी केल्यानंतर पिंडदान करतात व त्या व्यक्तीस प्रिय असे खाद्य पदार्थ तेथे ठेवले जातात. येथे पिंडीला काकस्पर्श झाल्यास मयत व्यक्ती ने अथवा पितृपक्षात पूर्वजांनी अन्नाचे ग्रहण केले असे मानले जाते.कावळा हा पूर्वजांचे प्रतीक मानला जातो.
मात्र मानवी जीवनात सर्वत्र अतिक्रमण केलेल्या कबुतरांच्या झुंडी या ठिकाणी दिसून आल्या व ज्याप्रमाणे विविध सोसायटीत किंवा सार्वजनिक ठिकाणी कबुतरांनी उच्छाद मांडलाय व त्यांनी चिमणी सारखे पक्षी हुसकावून लावलेत त्याचप्रमाणे येथे ही त्यांनी झुंडीने आक्रमण केले असून कावळ्याच्या हक्कावर अतिक्रमण केल्याचे दिसून येते.येथे कावळ्यांना हुसकावून कबुतर पिंडासह खाद्य पदार्थावर ताव मारताना दिसून आले.
ज्याप्रमाणे पुणे मनपाने पुढाकार घेऊन कबुतरांना खाद्य टाकणाऱ्यांवर दंडात्मक कारवाई चे आदेश दिलेत त्याच धर्तीवर आता वनविभाग व पक्षी तज्ञ यांच्याशी चर्चा करून कबुतरांच्या कलिंग बाबत निर्णय घ्यावा अशी आग्रही मागणी करत आहे.
“कलिंग” म्हणजे जनावरांच्या एखाद्या कळपातील तो कळप फार मोठा होऊ नये म्हणून काही जनावरे मारणे.कबुतर हा संरक्षित पक्षी / प्राणी नसल्याने याबाबत गांभीर्याने विचार करावा अन्यथा नजिकच्या काळात सर्वत्र कबुतरांचा उच्छाद दिसून येईल.

पुणे-‘खासदार जनसंपर्क सेवा अभियाना’च्या दुसऱ्या टप्प्याचा प्रारंभ आज कोथरूड विधानसभा मतदारसंघातून करण्यात आला. कोथरूड विधानसभा मतदारसंघातील नागरिकांसाठी आयोजित केलेल्या या अभियानाच्या प्रारंभी पहलगाम येथे मृत्युमुखी पडलेल्या निष्पाप नागरिकांना श्रद्धांजली अर्पण करण्यात आली. एरंडवणे येथील पंडित दीनदयाल उपाध्याय विद्या मंदिर येथे झालेल्या या अभियानाला कोथरूडकरांनी उत्तम प्रतिसाद दिला. राज्याचे उच्च व तंत्र शिक्षण मंत्री चंद्रकांतदादा पाटील यांनी या उपक्रमात पूर्णवेळ उपस्थित राहून सक्रिय सहभाग नोंदवला.

वैयक्तिक प्रश्न, नागरी समस्या, सोसायट्यांचे विषय, अपेक्षित विकासकामे आणि विविध प्रलंबित विषय या संदर्भात नागरिकांनी भेटी घेतल्या. नागरिकांकडून आलेले प्रश्न सोडवण्यासंदर्भात संबंधित विभागाच्या अधिकाऱ्यांना सूचित करत तातडीने कामे मार्गी लावण्याच्या निर्देशही दिले.

‘आपले काम होईल’, या भावनेने येणाऱ्या नागरिकांची संख्या मोठी असल्याने निश्चितच या उपक्रमाचे समाधानही मोठे आहे. एक लोकप्रतिनिधी म्हणून थेट सामान्य नागरिकांशी संवाद साधून त्यांचे प्रश्न मार्गी लावल्यानंतर नागरिकांचा येणारा प्रतिसादही निश्चितच तितकाच आनंद देतो असे मत केंद्रीय राज्यमंत्री खासदार मुरलीधर मोहोळ यांनी व्यक्त केले.

महाराष्ट्रातील डबल इंजिन सरकार आपल्या समस्यांचे नक्की निराकरण करेल या विश्वासातूनच मोठ्या प्रमाणावर नागरिक अशा अभियानात सहभागी होत आहेत आणि त्यांच्या अडचणींचे निराकरण करून घेत आहेत असे मत उच्च शिक्षण मंत्री चंद्रकांत दादा पाटील यांनी व्यक्त के

यावेळी विविध शासकीय योजनांचे तसेच कागदपत्रे-दाखल्यांसंदर्भातील स्टॉलची उभारण्यात आले होते. महसूल, पोलीस प्रशासन, महापालिका, महावितरण यांसह शासनाच्या विविध विभागांचे वरिष्ठ अधिकारी यात सहभागी झाले होते.

यावेळी भाजपचे शहराध्यक्ष धीरज घाटे, प्रदेश उपाध्यक्ष राजेश पांडे यांच्यासह शहर पदाधिकारी, कोथरुड विधानसभा मतदारसंघातील तिन्ही मंडलांचे पदाधिकारी, माजीनगरसेवक यांच्यासह कार्यकर्ते मोठ्या संख्येने उपस्थित होते.

नागरिकांच्या छोट्या छोट्या समस्या असतात परंतु त्या सोडवायच्या कशा हा त्यांच्यासमोर प्रश्न असतो.
या वेळी कोथरूड भागातील १५०० नागरिकांनी आपल्या समस्या मांडल्या. सदर समस्यांचे निराकरण त्वरित करण्यात येणार असून त्यासाठी सर्व प्रकारच्या सरकारी यंत्रणांचे सहकार्य घेण्यात आले.जे प्रश्न तातडीने सोडवणे शक्य होते ते या अभियानात लगेच सोडवले जाऊन तशा सूचना संबंधित अधिकाऱ्यांना दिल्या गेल्या.इतर प्रश्न व समस्या सोडवण्यासाठी आवश्यक ती कार्यवाही करून लवकरात लवकर त्यांचे निराकरण करावे यासाठी देखील संबंधित सर्व विभागांना व अधिकाऱ्यांना सूचना देण्यात आल्या

पुणे-गुन्हे शाखेच्या अंमली पदार्थ विराेधी पथकाचे पाेलिस निरीक्षक सुर्दशन गायकवाड, सहाय्यक पाेलिस निरीक्षक नितीनकुमार नाईक व पथक हे शहरात गस्त घालत असताना, पुणे रेल्वे स्टेशन गेटसमाेर त्यांना दाेन संशयित व्यक्ती मिळून आल्या. त्यांना ताब्यात घेऊन सखाेल चाैकशी करत त्यांची अंगझडती घेतली असता त्यांच्याजवळ सहा लाख २४ हजार रुपये किंमतीचा ३० किलाे गांजा हा अंमली पदार्थ मिळून अाला अाहे.

याप्रकरणी पप्पु चक्रधर देवरी (वय- ३२,रा. कलंड, ता.रसलपुर, जि.जसपुर, अाेरिसा) व चंदन सुभाष कुंवर (१९,रा. जगतपुर, जि.कटक, अाेरिसा) यांना अटक करण्यात अाली अाहे. त्यांच्या विराेधात बंडगार्डन पालीस ठाण्यात एनडीपीसी अॅक्टनुसार गुन्हा दाखल करण्यात अाला अाहे. चाैकशीत त्यांचा तिसरा साथीदाराचे नाव निष्पन्न झाल्याने दिपक बहिरा ऊर्फ बलिया (रा. भुवनेश्वर, अाेडिसा) याचे विराेधात देखील गुन्हा दाखल करण्यात अाला असून त्याच्याकडून अाराेपींनी गांजा विक्रीस अाणला अाहे. ते नेमके पुण्यात काेणास अंमली पदार्थाची विक्री करण्यासाठी अाले हाेते. त्यांचे अन्य साथीदार काेण अाहे याबाबत पाेलीस पुढील चाैकशी करत अाहे.

दुसऱ्या घटनेत अंमली पदार्थ पथक दाेनचे पथक खडकी पाेलीस स्टेशनचे हद्दीत पेट्राेलिंग करत असताना, त्यांना नॅशनल टुर्स अॅण्ड ट्रॅव्हल्स वाकडवेडी , एसटी स्टॅण्ड जवळ खडकी याठिकाणी सार्वजनिक रस्त्यावर एक संशयित व्यक्ती अल्पवयीन मुलासाेबत मिळून अाला. त्याच्या जवळील सामानाची चाैकशी करुन तपासणी केली ैसता त्यात सात लाख चार हजार रुपये किंमतीचे ३४ किलाे गांजा मिळून अाला अाहे. याप्रकरणी राकेश रुपसिंग पावरा (वय- २५,रा. शिरपुर, दापचेपाडा, धुळे ) याला अटक करण्यात अाली असून त्याच्या साेबतचा १७ वर्षीय धुळे येथील विधीसंघर्षिीत मुलास ताब्यात घेण्यात अाले. त्यांच्या विराेधात खडकी पाेलीस ठाण्यात अंमली पदार्थ विराेधी कायद्यानुसार गुन्हा दाखल करण्यात अाला अाहे.

वाकड परिसरातील कावेरीनगर भाजी मंडई जवळ वाकड पाेलीसांनी एक संशयित तरुणाला ताब्यात घेतले अाहे. त्याच्या ताब्यातून एक लाख ५५ हजार रुपये किंमतीचा ११०० ग्रॅम गांंजा हा अंमली पदार्थ जप्त करण्यात अाला अाहे. सदर अंमली पदार्थ हा अनाधिकाराने, बेकायदेशीररित्या विक्री करिता कब्जात बाळगल्याने अाराेपी अभिषेक सिध्दराम माैसलगी (वय- २१,रा. लक्ष्मणनगर, थेरगाव,पुणे, मु.रा. तिरुमालनिवास, गुलबर्गा, कर्नाटक) याला अटक करण्यात अाली अाहे. त्याच्या विराेधात पाेलीस शिपाई समाधान तुकाराम कांबळे (वय- २९) यांनी वाकड पाेलीस ठाण्यात एनडीपीएस अॅक्टनुसार गुन्हा दाखल केला अाहे.