अहिल्यानगरचे काँग्रेस जिल्हाध्यक्ष सचिन गुजर यांच्या अपहरण प्रकरणी काँग्रेसचे श्रीरामपूरमध्ये दिवसभर ठिय्या आंदोलन,

प्रदेशाध्यक्ष हर्षवर्धन सपकाळांनी श्रीरामपूरला जाऊन गुजर यांची विचारपूस केली, पोलीस ठाण्यात जाऊन पोलिसांना विचारला जाब.

मुंबई, दि. २६ नोव्हेंबर २०२५
मुख्यमंत्री देवेंद्र फडणवीस यांचा कारभार औरंगजेब व नथुरामसारखा थंड डोक्याने कारस्थाने करणारा आहे. फडणवीस हे केवळ दरिंदे (क्रूर) नाहीत तर आता ते लोकशाही, माणुसकी, संस्कृती व भारताच्या संविधानाला फाशी देत आहेत. देवेंद्र फडणवीस हे लोकशाही आणि महाराष्ट्र धर्माला फासावर लटकणारे जल्लाद आहेत, असा घणाघाती हल्लाबोल महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केला आहे.

अहिल्यानगरचे काँग्रेस जिल्हाध्यक्ष सचिन गुजर यांना भाजपच्या गुंडांनी अपहरण करून मारहाण करत जीवे मारण्याचा प्रयत्न केला. याविरोधात काँग्रेस पक्षाने दिवसभर ठिय्या दिला. प्रदेशाध्यक्ष सपकाळ यांनी तातडीने श्रीरामपूरला भेट दिली आणि स्थानिक आमदार हेमंत ओगले यांच्यासह जिल्हा पोलीस अधिक्षकांची भेट घेतली. यावेळी श्रीरामपूरचे आमदार हेमंत ओगले, नगराध्यक्ष पदाचे उमेदवार करण ससाणे उपस्थित होते.

हर्षवर्धन सपकाळ यांनी, पोलीस हे कुणाच्या दबावाखाली काम करीत आहेत? दडपशाही करणाऱ्या स्थानिक गुंडांना पोलीस कुणाच्या आशिर्वादाने पाठीशी घालत आहेत, असा जाब विचारत पोलिसांची आणि स्थानिक गुंडांना पाठीशी घालणाऱ्यांची दडपशाही खपवून घेणार नाही असा सज्जड दम दिला. त्यानंतर काँग्रेस प्रदेशाध्यक्ष सपकाळ यांनी दिवसभर ठिय्या आंदोलनात सहभागी झालेल्या काँग्रेस कार्यकर्ते आणि पदाधिकाऱ्यांशी संवाद साधला. शेवटी संविधानाच्या प्रास्ताविकेचे वाचन करून संविधान रक्षणाची शपथ घेतली.
यावेळी माजी सभापती बाबासाहेब दिघे, कृषी उत्पन्न बाजार समितीचे सभापती सुधीर नवले, जिल्हा काँग्रेस चे उपाध्यक्ष ज्ञानेश्वर मुरकुटे पंचायत समितीचे माजी सभापती वंदनाताई मुरकुटे तसेच अन्य पदाधिकारी उपस्थित होते.

संविधान दिनानिमित्त टिळक भवन येथे डॉ. आनंद तेलतुंबडे यांचे ‘प्रजासत्ताक: आभास का वास्तव’ विषयावर व्याख्यान.

मुंबई, दि. २६ नोव्हेंबर २०२५.

नरेंद्र मोदी यांच्या नेतृत्वाखाली २०१४ साली केंद्रात भाजपाचे सरकार आल्यानंतर मोदी यांनी (पीएमओ) पंतप्रधान कार्यालय हे सर्वात शक्तीशाली केंद्र निर्माण केले. याच्या माध्यमातूनच सर्व निर्णय घेतले जात असून मंत्रीमंडळ व संसद यांचे महत्व कमी केले आहे. सरकार विरोधातील आवाज दडपण्यासाठी नरेंद्र मोदींकडून सीबीआय, ईडी, आयकर, एनआयए या अस्त्रांचा गैरवापर केला जात आहे, असा गंभीर आरोप सुप्रसिद्ध घटनातज्ज्ञ व विचारवंत डॉ. आनंद तेलतुंबडे यांनी केला आहे.

संविधान दिनानिमित्त प्रदेश काँग्रेसचे कार्यालय टिळक भवन येथे सुप्रसिद्ध घटना तज्ज्ञ व विचारवंत डॉ. आनंद तेलतुंबडे यांचे, प्रजासत्ताक आभास का वास्तव, या विषयावर व्याखान झाले. या कार्यक्रमाचे अध्यक्ष ज्येष्ठ पत्रकार, माजी खासदार पद्मश्री कुमार केतकर, प्रदेश काँग्रेसचे सरचिटणीस राजन भोसले, ॲड. भाऊसाहेब आजबे, ॲड. संदेश कोंडविलकर यांच्यासह काँग्रेस पदाधिकारी व कार्यकर्ते उपस्थित होते.

तेलतुंबडे पुढे म्हणाले की, भारत कसा असायला पाहिजे हे संविधानाच्या प्रास्ताविकेत सांगितले आहे, तसा भारत आपण कधी पाहिला आहे का? संविधान आभास उरला आहे असे का वाटते, असा प्रश्न उपस्थित करून मोदींनी मागील ११ वर्षात संविधान, सर्व कायदे, नियम व स्वायत्त संस्था यांना कसे गुंडाळून टाकले आहे ते सांगितले. सध्या मंत्री वा सचिवाला काहीही महत्व राहिलेले नाही. सचिवाला पीएमओमधून निर्णय घेतल्याचे सांगितले जाते. मंत्र्यांना निर्णय घेण्याचे अधिकारच ठेवले नाहीत. पीएमओ आधीही होतेच पण मोदींनी सर्व शक्ती पीएमओकडे घेतली आहे. सीबीआय, एनआयए, ईडी, आयकर, निवडणूक आयोग या सर्व अस्त्राचा वापर नरेंद्र मोदी प्रभावीपणे करत आहेत. याच अस्त्रांच्या मदतीने मोदी विरोधी पक्ष व सरकारविरोधात आवाज उठवणाऱ्या प्रत्येकाची गळचेपी करतात. आज देशात विरोधकांना जागाच ठेवलेली नाही.

स्वायत्त संस्थांमधील पद नियुक्ती वा बढतीचे अधिकारही पीएमओच्या हातात घेतलेले आहेत. निवडणूक आयुक्त नियुक्तीचा अधिकारही मोदींनी आपल्याच हाती घेतला, त्यासाठी कायद्यात बदल करण्यात आला. प्रशासनाने सत्ताधारी पक्षाशी निष्ठावान राहिले पाहिजे नाहीतर त्यांना त्याचे परिणाम भोगावे लागतीत अशी परिस्थिती निर्माण केलेली आहे. ११ वर्षात पंतप्रधान मोदी यांनी एकही पत्रकार परिषदेत घेतली नाही हे जगातील एकमेव उदाहरण आहे. ते फक्त मन की बात करतात. देशात सध्या अघोषीत आणीबाणी सुरु आहे. देशाचा संपूर्ण ढांचाच मोदींनी गुंडाळून ठेवला असून मागील ११ वर्षात जे झाले त्यातून आता देशाची घडी पुन्हा बसवता येईल असे वाटत नाही असे आनंद तेलतुंबडे म्हणाले..

ज्येष्ठ पत्रकार माजी खासदार कुमार केतकर यावेळी म्हणाले की, भारताच्या राज्यघटनेची निर्मीती होत होती त्यावेळची देशातील व आंतरराष्ट्रीय परिस्थिती ही अत्यंत वेगळी व आव्हानात्मक होती. १९४६ साली राज्यघटना समिती स्थापना झाली, १९४७ साली देशाला स्वातंत्र्य मिळाले, १९४८ साली महात्मा गांधी यांची हत्या झाली. आणि त्याच वेळी आंतराराष्ट्रीय पातळीवर शीत युद्ध सुरु झाले होते. या पार्श्वभूमीवर राज्यघटना बनली आहे. भारताला स्वातंत्र्य मिळाले तरी ते त्यांना जास्त काळ टिकवता येणार नाही अशी चर्चा आंतरराष्ट्रीय स्तरावर केली जात होती. यातूनच भारतात अनेक राज्य निर्माण होतील असे म्हटले जात होते. भारताचे अनेक तुकडे व्हावेत ही ब्रिटीशांची इच्छा होती. स्वातंत्र्य देताना ते संस्थानांना परत देऊ असा प्रवाह ब्रिटनमध्ये त्यावेळी होता.
१९६७ साली सात राज्यात काँग्रेस विरोधी पक्षांची सरकारे आली त्यावेळीही भारताचे तुकडे करण्याचा सीआयएचा डाव होता. २०१४ च्या निवडणुकीत काँग्रेस पुन्हा सत्तेत येऊ नये यासाठी काही शक्तींनी डावपेच खेळले गेले. २०१९ ला काँग्रेस २०६ जागावरून २०२४ साली थेट ४४ वर कसा काय आली? सीआयए व मोसाद या संस्था यामागे असल्याचा दावा कुमार केतकर यांनी केला. त्यांना अनुकुल असणारे सरकार भारतात आणायचे होते. २०२४ साली भाजपाला अपेक्षित जागा मिळाल्या नाहीत. त्यावेळी पार्लमेंटरी पार्टी बैठक झाली नाही, मोदींची नेता निवड झाली नाही. एनडीएची बैठक झाली असे दाखवले व मोदींचा शपथविधी उरकण्यात आला. आता देशात जे सुरु आहे त्याचा बोलविता धनी हा कोणी बाहरेचा आहे असेही कुमार केतकर म्हणाले.

वणी, यवतमाळ–नगरपालिका निवडणुकांच्या पार्श्वभूमीवर लाडकी बहीण योजनेवर उपमुख्यमंत्री एकनाथ शिंदे यांनी या आपला हक्क सांगत आक्रमक भूमिका घेतली आहे. मी मुख्यमंत्री असताना लाडकी बहीण योजना सुरू केली. ही योजना माझ्या नेतृत्वाखालील महायुती सरकारचा निर्णय होता. अनेक अडथळे आले, विरोधही झाला, पण आम्ही ठाम होतो. कितीही टीका झाली, कितीही अडथळे आले तरी लाडकी बहीण योजना बंद होणार नाही, असे शिंदे यांनी स्पष्ट केले.

महायुतीतील पक्षच काही ठिकाणी एकमेकांविरोधात लढत असल्याने लाडक्या बहिणींचे मत कोणाकडे वळणार, याकडे सर्वांचे लक्ष लागले आहे. त्यातच शिंदे यांनी केलेले हे विधान म्हणजे लाडकी बहीण योजनेचे श्रेय कोणाचे? या राजकीय वादात भर टाकणारे ठरत आहे. राज्यातील महिला मतदार हेच पुढील निवडणुकांचे गेमचेंजर ठरणार असल्याचे सर्व पक्षांना ठाऊक असल्याने, या योजनेभोवती प्रचंड राजकीय धुमाकूळ सुरू आहे.

राज्यात निवडणुकीचे वातावरण दिवसेंदिवस तापत चालले आहे. 2 डिसेंबर रोजी अनेक नगरपालिकांच्या निवडणुका होणार असून त्यासाठी सर्व पक्षांनी मोर्चेबांधणी जोरात सुरू केली आहे. विधानसभा निवडणुकीत मोठ्या प्रमाणावर महिला मतदारांनी लाडकी बहीण योजनेमुळे महायुती सरकारला पाठिंबा दिला होता. परिणामी सत्ता मिळवण्यात महिलांच्या मतांची मोठी भूमिका ठरली. त्यामुळे आता होणाऱ्या नगरपालिकांच्या निवडणुकांमध्येही लाडक्या बहिणी कोणत्या पक्षाच्या बाजूने मतदान करणार, याकडे राज्याचे राजकीय लक्ष लागले आहे. त्यातच स्थानिक राजकीय समीकरणांमुळे महायुतीतील मित्रपक्ष एकमेकांविरोधात उभे राहत असल्याने महिलांचे मत नेमके कुठे जाईल? हा मोठा प्रश्न निर्माण झाला आहे.

मुख्यमंत्रीपद भूषवलेल्या उपमुख्यमंत्री एकनाथ शिंदे यांनी या प्रश्नाचे उत्तर देत आपली भूमिका स्पष्ट केली. ते म्हणाले की, लाडकी बहीण योजना ही मी मुख्यमंत्री होतो तेव्हा सुरू केली. महायुती सरकार म्हणून आम्ही टीममध्ये मिळून हा निर्णय घेतला होता. या योजनेला राजकारणात किती विरोध, अडथळे आले, किती टीका झाली, हे सर्वज्ञात आहे. परंतु जनतेला, विशेषतः महिलांना आर्थिक आधार देण्यासाठी ही योजना सुरू ठेवण्याचा निर्णय सरकारने घेतला असून ही योजना बंद होणारच नाही, असे त्यांनी ठामपणे सांगितले. या विधानातून शिंदे यांनी महिलांच्या मतांची दिशा स्पष्ट करण्याचा प्रयत्न केला पाहिजे, अशी चर्चा राजकीय वर्तुळात रंगली आहे.

विदर्भातील प्रचारसभांमध्ये मोठा उत्साह असल्याची माहितीही एकनाथ शिंदेंनी दिली. त्यांनी सांगितले की, प्रत्येक सभेत महिलांची प्रचंड उपस्थिती दिसत आहे. लाडक्या बहिणींचा उत्साह आणि विश्वास पाहून शिवसेनेच्या उमेदवारांना निश्चितच फायदा होईल, असा त्यांचा दावा आहे. तरुणांपासून ते ज्येष्ठ महिलांपर्यंत विविध वयोगटातील मतदार प्रचारात सक्रियपणे सहभाग घेत आहेत. यावरून स्थानिक नागरिकांचा विकासावर आधारित मतदानाचा कल अधिक जाणवतो, असे शिंदेंचे म्हणणे आहे.

शिंदे पुढे म्हणाले की, विकास हा आमचा मुख्य अजेंडा आहे. मी मुख्यमंत्री असताना ज्या नगरपालिकांमध्ये शिवसेनेचे नगराध्यक्ष नव्हते, तिथेही विकासकामांसाठी निधी दिला. पाणीपुरवठा, गटार व्यवस्था, रस्ते, मैदानं, उद्यानं, आरोग्य सुविधा अशा सर्व मूलभूत सोयीसुविधा उपलब्ध करण्यासाठी राज्य सरकारने निधीची कमतरता भासू दिली नाही. राजकारणापेक्षा जनतेचा प्रश्न महत्वाचा, अशी भूमिका त्यांनी पुन्हा अधोरेखित केली. त्यामुळे आता लोक कोणत्या पक्षावर विश्वास ठेवतात आणि विकासाच्या मुद्द्यावर कोण विजयी ठरणार, हे निकालानंतर स्पष्ट होईल.

नगरपालिका निवडणुकांमध्ये महिलांचे मतांचे गणित नेहमीच निर्णायक ठरते. पण या वेळी परिस्थिती थोडी वेगळी आहे. कारण महायुतीतच असलेले वेगवेगळे पक्ष स्थानिक पातळीवर स्वतंत्र लढत असल्याने महिलांना कोणाला मतदान करायचे? हा प्रश्न पडला आहे. पण सरकारने दिलेला लाभ, आर्थिक मदत आणि भविष्याच्या आशा या गोष्टी महिलांच्या मतांवर परिणाम करणार हे निश्चित. त्यामुळे आता 2 डिसेंबर रोजी महिलांचा कल कोणत्या दिशेला झुकतो, यावर अनेक नगरपालिकांचे भविष्य ठरणार आहे आणि त्याकडे संपूर्ण राज्याचे लक्ष आहे.

भाजपच्या राजवटीत संविधान दिन साजरा करणे गुन्हा, संविधान रक्षणासाठी लढत राहू: झीनत शबरीन.

मुंबई, दि. २५ नोव्हेंबर

भाजपच्या राजवटीत संविधान दिन साजरा करणे आणि संविधानाची प्रस्तावना वाचणे हा गुन्हा ठरला आहे. आज संपूर्ण भारत संविधान दिन साजरा करत असताना मुंबई युवक काँग्रेसच्या पदाधिकाऱ्यांना संविधानाची प्रस्तावना वाचण्यापासून पोलिसांनी रोखले व ताब्यात घेतले, हा लोकशाही मूल्यांवरचा थेट हल्ला आहे. संविधान आणि लोकशाहीचा आवाज दाबण्याचा प्रत्येक प्रयत्न एकत्रितपणे हाणून पाडू, असे मुंबई युवक काँग्रेस अध्यक्ष झीनत शबरीन यांनी म्हटले आहे.

लोकसभेतील विरोधी पक्षनेते राहुल गांधी यांनी वोटचोरी विरोधात बोलू नये म्हणून सार्वजनिक पत्र लिहून त्यांचा आवाज दडपण्याचा प्रयत्न करणा-या २७२ सेवानिवृत्त IAS, IPS, IRS अधिका-यांपैकी एक अधिकारी ए. के. गौतम यांच्या मुंबईतील निवासस्थानासमोर संविधान दिनानिमित्त मुंबई युवक काँग्रेस संविधानाच्या उद्देशिकेचे वाचन करून त्यांना संविधानिक मूल्यांची आठवण करून देणार होते पण पोलिसांनी दडपशाही करून लोकशाहीचा गळा घोटला आहे. भाजपा सरकारने पोलिसांच्या मदतीने केलेला हा प्रकार निषेधार्ह असून लोकशाही व संविधानाच्या रक्षणासाठी काँग्रेसचा हा लढा सुरुच राहिल असे झीनत शबरीन यांनी सांगितले.

युवक काँग्रेसच्या पदाधिकाऱ्यांना पोलिसांनी मरीन ड्राईव्ह येथून ताब्यात घेऊन आझाद मैदान येथे घेऊन गेले. युवक काँग्रेसच्या पदाधिकाऱ्यांनी आझाद मैदान येथे व संविधान निर्माते डॉ. बाबासाहेब आंबेडकर यांच्या मंत्रालया जवळच्या पुतळ्यासमोर संविधानाच्या प्रस्ताविकेचे वाचन केले.

देवेंद्र फडणवीसांच्या बगलबच्यांनी संविधान दिनी अहिल्यानगरमध्ये लोकशाहीचा खून पाडला, भाजपाची ठोकशाही सहन करणार नाही: हर्षवर्धन सपकाळ

सत्ताधारी भाजपाचा निवडणुकीत नंगानाच, देवेंद्र फडणवीसजी, भाजपाच्या गुंडांना आवारा, सत्तेचा माज उतरायला वेळ लागत नाही.

ऐन निवडणुकीत काँग्रेसच्या अहिल्यानगर जिल्हाध्यक्षाचे अपहरण व मारहाणीच्या घटनेचा तीव्र धिक्कार व निषेध.

मुंबई, दि. २६ नोव्हेंबर २०२५

अहिल्यानगर जिल्ह्याचे काँग्रेस जिल्हाध्यक्ष सचिन गुजर यांचे अपहरण करून मारहाण करण्यात आलेली घटना अत्यंत गंभीर व निषेधार्ह आहे. आज संविधान दिनाच्या दिवशी भाजपने सकाळी सकाळी लोकशाहीची हत्या केली आहे. २६-११ च्या दिवशी पाकिस्तानी दहशतवाद्यांनी भारतावर हल्ला केला होता तोच मुहूर्त साधून अहिल्यानगर जिल्ह्यात मुख्यमंत्री देवेंद्र फडणवीसांच्या बगलबच्यांनी लोकशाहीचा खून पाडला आहे. ऐन निवडणुकीत एका राष्ट्रीय पक्षाच्या जिल्हाध्यक्षाला अपहरण करून मारहाण होते, हे काँग्रेस पक्ष कदापि सहन करणार नाही, असा इशारा महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केला आहे.

यासंदर्भात भाजपा व मुख्यमंत्री देवेंद्र फडणवीस यांचा खरपूर समाचार घेत काँग्रेस प्रदेशाध्यक्ष हर्षवर्धन सपकाळ पुढे म्हणाले की, नगर जिल्ह्यात घडलेली ही घटना अत्यंत निषेधार्ह व गंभीर आहेच परंतु महाराष्ट्रात लोकशाही अस्तित्वात आहे की नाही ? असा प्रश्न उपस्थित करणारी आहे. भाजपा सरकारने आपले कारनामे दाखवायला सुरुवात केली आहे. नगरमध्ये झालेली ही काही पहिलीच घटना नाही. नगरपालिकेची निवडणूक लढवू इच्छिणाऱ्या काँग्रेसच्या दोघांना याआधी रात्री अटक करून कस्टडीत टाकण्यात आले, त्यांना मारहाण करण्यात आली, त्यानंतर पोलीसांनी त्यांच्या गाडीतून या दोघांना भाजपाचा माजी खासदार सुजय विखे पाटील व मंत्री राधाकृष्ण विखे पाटील यांच्याकडे घेऊन गेले, त्यांना दमदाटी करण्यात आली, हा सर्व प्रकार चित्रपटात दाखवतात तसा आहे.

मुख्यमंत्री देवेंद्र फडणवीस यांचा कारभार औरंगजेबा सारखा आहे, त्यांची मोडस ऑपरेंडी नथुराम गोडसे सारखी थंड डोक्यानी हत्या करणारी आहे आणि फडणवीसांना दरिंदा म्हटले, त्याच्या त्यांना व त्यांच्या बगलबच्च्यांना मिरच्या झोंबल्या. पण आम्ही जे बोललो ते योग्यच होते ही अहिल्यानगरच्या घटनेने ते पुन्हा एकदा दाखवूनही दिले आहे. भाजपाला लोकशाही व संविधान मान्य नसून ठोकशाही सुरु केली आहे. विरोधी पक्षाने निवडणूका लढवायच्या की नाही, असा प्रश्न या घटनेवरून उपस्थित होत आहे. देवेंद्र फडणवीस यांनी आपल्या गुंड बगलबच्यांना आवर घालावा, सत्तेचा माज उतरायला वेळ लागत नाही, असेही काँग्रेस प्रदेशाध्यक्ष हर्षवर्धन सपकाळ म्हणाले.

तुम्ही बॉम्बेचे नाव मुंबई केले नाही हे फार चांगले केले, केंद्रीय मंत्र्याच्या विधानावर संताप – राज ठाकरे म्हणाले मराठी माणसा आता तरी तुला कळायला हव , जागा हो …

मुंबई – केंद्रीय विज्ञान-तंत्रज्ञान मंत्री डॉ. जितेंद्र सिंग यांनी मुंबईत आयआयटीच्या कार्यक्रमात बोलताना, ‘आयआयटीच्या नावातील बाँबे तसंच ठेवलं त्याचं मुंबई केलं नाही, हे चांगलं झालं असं विधान केलं’. जितेंद्र सिंग यांचं विधान हे सरकारच्या मानसिकतेचं एक प्रतीक आहे असं स्पष्ट दिसतंय.या मंत्र्याने केलेले हे विधान आपल्या बॉसला खुश करण्यासाठी केलाय आणि बॉस ला मुंबई महाराष्ट्रापास्य्न तोडून गुजरातला जोडायची असल्याने हे विधान केलय ,आता तरी मराठी माणसाला हे कळायला हवे असे राज ठाकरे यांनी म्हटले आहे.
आयआयटी मुंबईच्या कार्यक्रमात केंद्रीय विज्ञान-तंत्रज्ञान मंत्री डॉ. जितेंद्र सिंह यांनी केलेल्या विधानामुळे मोठा वाद निर्माण झाला आहे. त्यांनी आयआयटीच्या नावात बॉम्बे हे नाव तसेच राहिले, त्याचे मुंबई झाले नाही हे चांगले झाले, असा उल्लेख केला. या एका वाक्याने मराठी जनतेमध्ये नाराजीचा सूर उमटला आहे. मुंबईचे नाव मराठी इतिहास, मराठी संस्कृती आणि या भूमीच्या मूळ देवी मुंबाशी जोडलेले आहे. त्यामुळे मुंबईऐवजी बॉम्बेचा आग्रह व्यक्त करणे ही महाराष्ट्राच्या अभिमानावर घाला असल्याची भावना राजकीय वर्तुळात व्यक्त होत आहे.

या वादाला उत्तर देत मनसेप्रमुख राज ठाकरे यांनी थेट प्रहार केला आहे. त्यांनी सोशल मीडियावरून भाजप नेतृत्वावर आणि केंद्रीय मंत्र्यांवर जोरदार टीका केली. राज ठाकरे म्हणाले की, जितेंद्र सिंह यांचं विधान हे केंद्र सरकारच्या मानसिकतेचं दर्शन घडवतं. मुंबई जी मराठी माणसाची आहे, तिला महाराष्ट्रापासून वेगळी करण्याचा डाव आजही शिजतोय. त्यांनी इशारा दिला की काही शक्ती मुंबई व आजूबाजूचा एमएमआर परिसर गुजरातमध्ये जोडण्याचे प्रयत्न करत आहेत. केंद्र सरकारने अलीकडेच चंदीगडचा मुद्दा उचलून धरण्याची आठवण देत राज ठाकरे यांनी मराठी लोकांना सतर्क राहण्याचे आवाहन केले.

राज ठाकरे यांनी जितेंद्र सिंह यांच्या मूळ प्रदेशाचा उल्लेख करत म्हणाले, त्यांचा मुंबईशी, महाराष्ट्राशी काहीही संबंध नाही. तरीही ते येऊन मुंबईच्या नावावर भाष्य करतात. फक्त दिल्लीतील नेतृत्वाची मर्जी ठेवण्यासाठी ही वक्तव्ये केली जातात. त्यांनी केंद्रावर आरोप केला की मुंबई नेहमीच डोळ्यात खुपते, कारण ही महाराष्ट्राची आर्थिक राजधानी असून इथे मराठी ओळख दृढ आहे. सुरुवातीपासूनच काही जण मुंबईला महाराष्ट्रापासून वेगळे करण्याचा प्रयत्न करत आले आहेत. परंतु महाराष्ट्रातील जनतेने तो प्रत्येकवेळी हाणून पाडला आहे. मुंबई ही मराठी माणसाचीच आहे, आणि राहणार, हे त्यांनी ठामपणे स्पष्ट केले.
आयआयटीप्रमाणेच अनेक राष्ट्रीय संस्थांच्या नावात बॉम्बे, मद्रास अशी जुनी नावे कायम आहेत. मात्र, मुंबईच्या नावाचा संदर्भ आल्यानंतर नेहमीच राजकीय वादंग निर्माण होतो. मराठी ओळख, भाषा आणि सांस्कृतिक वारसा जपण्यासाठी हा संघर्ष कायम आहे. त्यामुळे या विधानाने महाराष्ट्रातील मराठी जनतेला जणू पुन्हा एकदा सज्जतेचा इशारा मिळाला आहे. मुंबई आपलीच आहे आणि राहील, हे संदेश अनेकांनी दिला आहे. आता केंद्र सरकार व भाजप यांची पुढील भूमिका काय असते हे पाहणे उत्सुकतेचे ठरेल.

राज ठाकरे यांनी केलेले आवाहन वाचा….

केंद्रीय विज्ञान-तंत्रज्ञान मंत्री डॉ. जितेंद्र सिंग यांनी मुंबईत आयआयटीच्या कार्यक्रमात बोलताना, ‘आयआयटीच्या नावातील बाँबे तसंच ठेवलं त्याचं मुंबई केलं नाही, हे चांगलं झालं असं विधान केलं’. जितेंद्र सिंग यांचं विधान हे सरकारच्या मानसिकतेचं एक प्रतीक आहे असं स्पष्ट दिसतंय.

आणि ही मानसिकता काय आहे ? तर मुंबई जी मराठी माणसाची होतीच , तिला महाराष्ट्रापासून पासून वेगळं करण्याचा डाव मराठी नेत्यांनी आणि जनतेने उधळून लावला. आणि आपली मराठी मुंबई महाराष्ट्रातच राहिली. त्याबद्दलची गेली अनेक दशकं यांच्या पोटात साचलेली मळमळ पुन्हा एकदा बाहेर ओकायला सुरुवात केली आहे !
खरंतर जितेंद्र सिंग यांचा मुंबईशी काही संबंध नाही, ना महाराष्ट्राशी, ना गुजरातशी. ते येतात जम्मूमधून.. पण आपल्या शीर्ष नेतृत्वाच्या मनात काय चाललं आहे ते ओळखून तसं बोलून शाबासकी मिळवणे हाच त्यांचा उद्देश आहे.

या निमित्ताने फक्त मुंबई नाही तर आता एमएमआर परिसरात राहणाऱ्या तमाम मराठी जनांना माझं आवाहन आहे की, आता तरी डोळे उघडा. यांना ‘मुंबई’ हे नाव खटकतं कारण हे नाव आपल्या मुंबा आईच्या म्हणजे मुंबईची जी मूळची देवी आहे तिच्या नावावरून हे नाव घेतलं आहे. त्या देवीची सगळी लेकरं म्हणजे इथे पिढ्यानपिढ्या राहणारी मराठी माणसं. तुम्ही आणि तुमचं शहर यांना खुपतंय.

आज केंद्र सरकारने तिकडे चंदिगढ शहर पंजाबच्या हातातून काढून घ्यायचा प्रयत्न केला. त्याला सर्वपक्षीय विरोध झाला म्हणून त्यांनी माघार घेतली, पण ती तात्कालिक माघार आहे. असाच काहीतरी डाव मुंबईच्या बाबतीत १००% शिजत असणार. ‘मुंबई’ नको ‘बाँबे’च हवं यातून हळूच हे शहर ताब्यात घेण्याचा प्रयत्न नक्की सुरु आहे. आधी मुंबई आणि मग संपूर्ण एमएमआर परिसर ताब्यात घेऊन तो गुजरातला जोडण्याचा प्रयत्न सुरु आहे ! तेंव्हा मराठी माणसा जागा हो. इथे आधीच केंद्रीय हस्तक उद्योगपती इत्यादींनी काय काय ताब्यात घ्यायला सुरु केलं आहे हे आपण रोज पाहतो आहोतच !

आतातरी मराठी माणसांना हे कळायला हवं !
राज ठाकरे ।