पुणे : घाबरायला मी काय ब्राम्हण आहे काय ? अशा वक्तव्याचा फटका आता मंत्रिमंडळाच्या फेरबदल -विस्तारात सामाजिक न्याय राज्यमंत्री दिलीप कांबळे यांना बसेल आणि त्यांच्या ऐवजी भारतीय जनता युवा मोर्चाचे प्रदेशाध्यक्ष आणि हडपसरचे आमदार योगेश टिळेकर यांचा संभाव्य मंत्रिमंडळ विस्तारात समावेश होणार असल्याची चर्चा आता सुरू झाली आहे. दरम्यान उद्या होणाऱ्या बैठकीसाठी आज सायंकाळी पालकमंत्री गिरीश बापट मुंबईला रवाना होत असून याप्रकरणी त्यांची मुख्यमंत्र्यांशी चर्चा होण्याची शक्यता वर्तविली जाते आहे .पुण्याच्या राजकीय दृष्टीकोनातून मुख्यमंत्री ,पालकमंत्री आणि महापौर अशी तिन्ही महत्वाची पदे ब्राम्हण समाजाकडे आहेत, कांबळे यांना डच्चू दिला तर मागासवर्गीय समाजावर त्याचा काही परिणाम होईल काय ,याची चाचपणी करणे गरजेचे आहे काय ? या प्रश्नावरही खल होतो आहे .

पुण्यातील भाजपचे ज्येष्ठ कार्यकते आणि आमदार गिरीश बापट व दिलीप कांबळे यांच्याकडे मंत्रिपदे आहेत.शहराला आताच 2 मंत्री आहेत .हडपसर कचरा डेपो प्रकरणी , आणि येवलेवाडी विकास आराखड्याप्रकरणी टिळेकर यांनी महत्वपूर्ण भूमिका निभावली आहे . तर कात्रज कोंढवा रस्त्याच्या रुंदीकरणासाठी देखील ते विशेष मेहनत घेत आहेत .तर दुसरीकडे गेल्या मार्च महिन्यात लातूर येथे दिलीप कांबळे यांनी केलेले वक्तव्य भाजपमधील काही मंडळींनी बरेच मनावर घेतलेले दिसते आहे . या पार्श्वभूमीवर कांबळे यांना आता मंत्रीपदावरून मुक्त केले जाईल असे काहींचे मत आहे . तर टिळेकर यांच्या मंत्रीपदाची चर्चा व्हाटसएप वरून रंगते आहे .पिंपरीतून पूर्वाश्रमीचे राष्ट्रवादीचे आणि आता भाजपचे लक्ष्मण जगताप व महेश लांडगे हे देखील ताकद मिळावी म्हणून मंत्रिपदासाठी प्रयत्नशील आहेत. नव्या चेहऱ्यांचा समावेश करण्याचे फडणवीस यांनी ठरविले असले तरी विद्यमान मंत्रिमंडळातील कोणाला डच्चू देणार ?यावर बरीच समीकरणे असल्याचे बोलले जाते .यापूर्वी पुण्यातून प्रकाश ढेरे , रमेश बागवे,वसंत चव्हाण  दिलीप कांबळे , बाळासाहेब शिवरकर , चंद्रकांत छाजेड ,शशिकांत सुतार  यांनी पुणे शहरातून राज्यमंत्री म्हणून काम केले आहे .  मात्र त्यांना पाच वर्षे मंत्रीपदावर  राहू देण्यात आले नही .. त्यामुळे सध्या मंत्रिमंडळात असलेले गिरीश बापट आणि दिलीप कांबळे यांना सलग पाच वर्षे मंत्रिमंडळात काम करण्याची संधी मिळणार का, याबाबत उत्सुकता आहे.

मुंबई-– शिवसेनेने भाजपा सोबत वाद करू नये असा सल्ला देत ;  केंद्रीय सामाजिक न्याय राज्यमंत्री रामदास आठवले यांनी  गोरगरीब फेरीवाल्यांवर दादागिरी करीत त्यांच्यावर हल्ला करण्यापेक्षा मनसैनिकांनी लष्करात जाऊन सीमेववर  देशाच्या दुष्मनांशी लढावे. गरीब फेरीवाल्यांवर हल्ला झाला तर भीमसैनिक मनसैनिकांना चोख उत्तर देतील असा इशारा  दिला.

एल्फिन्स्टन रोड स्थानकातील पुलावरील चेंगराचेंगरीत २३ जणांचा मृत्यू झाल्यानंतर महाराष्ट नवनिर्माण सेनेचे (मनसे) अध्यक्ष राज ठाकरे यांनी रेल्वे पूल आणि परिसरातील फेरीवाल्यांना हटवण्यासाठी १५ दिवसांची मुदत दिली होती. शनिवारी १५ दिवसांची मुदत संपल्यानंतर मनसेच्या कार्यकर्त्यांनी कुर्ला, ठाणे, घाटकोपर, कल्याण अशा विविध ठिकाणी फेरीवाल्यांना हुसकावून लावले होते.या पार्श्वभूमीवर आज मिरारोड येथील हॉटेल सनशाईन येथे झालेल्या पत्रकार परिषदेत रामदास आठवले बोलत होते. यावेळी रिपाइंचे मिरा भाईंदर जिल्हा अध्यक्ष देवेंद्र शेलेकर, रिपाइंचे राष्ट्रीय सचिव सुरेश बरशिंग, मुंबई अध्यक्ष गौतम सोनवणे, हेमंत रणपिसे, नगरसेविका रुपाली शिंदे, मदन मनवर आदी मान्यवर उपस्थित होते.

आठवले म्हणाले की, फेरीवाल्यांमुळे होणाऱ्या त्रासाबद्दल तक्रार पोलीस आणि प्रशासनाला करता येऊ शकते. त्यांच्यावर प्रशासन कारवाई करेल मात्र मनसेने कायदा हातात घेऊ नये. मनसैनिकांनी गरीब फेरीवाल्यांवर दादागिरी करीत हल्ले करू नये. फेरीवाल्यांवर ज्या मनसैनिकांनी हल्ले केले आहेत. त्यांच्यावर पोलिसांनी कारवाई करावी असे सांगत गरीब फेरीवाल्यांच्या रक्षणासाठी भीमसैनिक आणि आरपीआयचे कार्यकर्ते रस्त्यावर उतरतील असा इशाराही रामदास आठवले यांनी दिला आहे. सामान्य जनतेतील 70 टक्के लोक फेरीवाल्यांकडूनच वस्तू घेतात. सरकारने ही फेरीवाल्यांबद्दल निश्चित धोरण ठरविले पाहिजे. दिल्लीत फेरीवाल्यांना मान्यता आहे. तशीच सन 2014 च्या निवडणुकीत मतदान केलेल्यांच्या झोपड्या पात्र ठरवाव्यात या मागणीप्रमाणेच सन 2014 पर्यंतचे फेरीवाले अधिकृत करण्यात यावे अशी रिपाइंची मागणी असल्याचे रामदास आठवले म्हणाले. भाजपा शिवसेनेने वाद करू नये आगामी निवडणुकांमध्ये भाजपा शिवसेनेने एकत्र येऊन निवडणूक लढावी असा सल्ला रामदास आठवलेंनी दोन्ही पक्षांना दिला. आगामी गुजरात विधानसभा निवडणुकीत भाजपा सोबत रिपब्लिकन पक्षाची युती होणार असून जास्तीत जास्त दलित मतदान भाजपाला मिळवून देण्यासाठी रिपाइं भाजपा सोबत राहील असेही रामदास आठवले यांनी यावेळी सांगितले.