पुणे– शेती व्‍यवसाय फायदेशीर व्‍हावा, यासाठी शासन प्रयत्‍नशीलअसून शेतक-यांच्‍या आत्‍महत्‍या रोखण्‍यासाठी रेशीम शेती  प्रभावी  उपाय ठरेल, असा विश्‍वास व्‍यक्‍त करुन महाराष्‍ट्र हे रेशीम व्‍यवसायात देशात एक क्रमांकावर आणण्यासाठी  प्रयत्न करावा, असे आवाहन पणन व वस्‍त्रोद्योग मंत्री सुभाष देशमुख यांनी केले.

            महारेशीम अभियान 2018 च्‍या राज्‍यस्‍तरीय पुरस्‍कार वितरण समारंभात ते बोलत होते. यशवंतराव चव्‍हाण विकास प्रशासन प्रबोधिनी (यशदा) मध्‍ये आयोजित कार्यक्रमास  वस्‍त्रोद्योगचे अपर मुख्‍य सचिव उज्‍ज्‍वल उके, रेशीम संचालनालयाचे संचालक संजय मीणा, बाबासाहेब आंबेडकर संशोधन व प्रशिक्षण संस्थेचे (बार्टी)  महासंचालक कैलास कणसे आदी उपस्थित होते.

            सहकार व वस्‍त्रोद्योग मंत्री श्री. देशमुख म्‍हणाले,  मराठवाडा आणि विदर्भ हे विभाग आर्थिकदृष्‍टया मागासलेले आहेत. या भागातील बागायती क्षेत्र कमी आहे, शेतीचे उत्‍पादन कमी आहे,  मालाला भाव, कर्जपुरवठा  अशा अडचणींवर मात करत शेती केली जाते. रेशीम व्‍यवसाय हा फायदेशीर ठरणारा असून शेतक-यांच्‍या आत्‍महत्‍येवर तो प्रभावी उपाय ठरेल.  मराठवाडा आणि विदर्भ हे केंद्रबिंदू मानून या भागात रेशीम उद्योग वाढीसाठी प्रयत्‍न व्‍हावेत. बार्टीच्‍या समतादूतांच्‍या मदतीने रेशीम व्‍यवसायाची माहिती शेवटच्‍या शेतक-यापर्यंत  पोहोचवण्‍यास मदत झाल्‍याचा गौरवपूर्ण उल्‍लेख करुन श्री. देशमुख यांनी रेशीम व्‍यवसायात महाराष्‍ट्र हे देशातील एक क्रमांकाचे राज्‍य बनवण्‍यासाठी प्रयत्‍न करण्‍याचे आवाहन केले. गतवर्षीचे उद्दिष्‍ट पूर्ण झाल्‍याबद्दल अभिनंदन करुन यंदा 30 हजार एकर रेशीमलागवडीचे उद्दिष्‍ट डोळ्यासमोर ठेवून ते साध्‍य करण्‍याचेही त्‍यांनी आवाहन केले.

            बार्टीचे  महासंचालक कैलास कणसे यांनी बार्टीच्‍या समतादूतांच्‍या माध्‍यमातून रेशीम संचालनालयाशी जोडले गेल्‍याचे नमूद करुन शेतक-यांच्‍या जीवनात सकारात्‍मक बदल घडवण्‍यात यश मिळत असल्याचे सांगितले.  देशात रेशीम उद्योगात महाराष्‍ट्र एक क्रमांकावर आणण्‍यासाठी सहकार्य करु, असेही ते म्‍हणाले.

            वस्‍त्रोद्योगचे अपर मुख्‍य सचिव उज्‍ज्‍वल उके यांनी सर्व अधिकारी, कर्मचारी आणि समतादूतांच्‍या एकत्रित समन्‍वयाने रेशीम लागवडीचे उद्दिष्‍ट साध्‍य झाल्‍याचे सांगितले. भविष्‍यातही याच उत्‍साहाने उद्दिष्‍टपूर्ती होईल, असा विश्‍वास त्‍यांनी व्‍यक्‍त केला.

            सहकार मंत्री देशमुख यांच्‍या हस्‍ते राज्‍यातील सर्वोत्‍तम प्रादेशिक  विभागाचा पुरस्‍कार औरंगाबादचे सहायक संचालक दिलीप हाके यांनी तर राज्‍यस्‍तरीय सर्वोत्‍कृष्‍ट जिल्‍हा पुरस्‍कार औरंगाबादचे रेशीम विकास अधिकारी बी. के. सातदिवे यांनी स्‍वीकारला. याशिवाय पुणे प्रादेशिक रेशीम कार्यालयाचे सहायक संचालक डॉ. कविता देशपांडे,  बार्टीच्‍या प्रकल्‍प संचालक प्रज्ञा वाघमारे, औरंगाबादचे क्षेत्र सहायक एम.पी.साळुंखे,समतादूत श्‍याम गंगाधर, हिंगोलीचे  रेशीम विकास अधिकारी  जी. एस. ढावरे,अमरावतीचे सहायकसंचालक एम.बी. ढवळे यांचाही पुरस्‍कार देऊन  गौरव करण्‍यात आला.

            रेशीम संचालनालयाचे संचालक संजय मीणा यांनी  आभार प्रदर्शन केले. ते म्‍हणाले, समतादूतांनी रेशीम शेतीविषयी शेतक-यांमध्‍ये जागृती निर्माण केली. रेशीमसंचालनालयाच्‍या अधिकारी-कर्मचारी रेशीम शेतीचे उद्दिष्‍टपूर्ण करुन उच्‍चांक साधतील, अशी खात्री व्‍यक्‍त केली.   कार्यक्रमाचे सूत्रसंचालन जिल्‍हा रेशीम अधिकारी गणेश राठोड आणि अजय मोहिते यांनी केले.

पुणे: विश्‍वशांती केंद्र (आळंदी), माईर्स एमआयटी व विश्‍वशांती संगीत कला अकादमी, राजबाग, पुणे यांच्यातर्फे शनिवार, दि. ३० व रविवार, दि. ३१ डिसेंबर २०१७ रोजी सायंकाळी ५.१५ ते रात्री ९.३० वाजेपर्यंत विश्‍वराज बंधारा, विश्‍वशांती गुरुकुल, राजबाग, लोणी काळभोर,पुणे येथे ‘एमआयटी सांस्कृतिक संध्या’ संगीत महोत्सवाचे आयोजन करण्यात आले आहे.
दोन दिवस रंगणार्‍या या ‘एमआयटी सांस्कृतिक संध्या’ संगीत महोत्सवाचे उद्घाटन शनिवार, दि. ३० डिसेंबर २०१७ रोजी सायंकाळी ५.१५ वाजता थोर समाजसेवक मा. श्री.अण्णा हजारे हे उद्घाटक व प्रमुख पाहुणे म्हणून उपस्थित राहणार आहेत. या समारंभात मध्यप्रदेश सरकारच्या तानसेन सन्मानाचे मानकरी पंडित उल्हास कशाळकर यांचा विशेष सत्कार होणार आहे.
अत्यंत निसर्गरम्य व सुंदर अशा परिसरात होणार्‍या या संगीत महोत्सवामध्ये आंतरराष्ट्रीय कीर्तीचे पखवाज वादक पंडित उध्दवबापू आपेगावकर (शिंदे), शास्त्रीय संगीत गायक श्री. समीहन कशाळकर, सुप्रसिद्ध गायिका सौ. शुभांगी मुळे, सुप्रसिध्द गायक श्री. सुरंजन खंडाळकर, सुप्रसिध्द व्हायोलिनवादक श्री.तेजस उपाध्ये आणि सुप्रसिद्ध गायिका श्रीमती गोदावरीताई मुंडे हे आपली कला सादर करतील. दि. ३१ डिसेंबर २०१७ रोजी विश्‍वशांती संगीत कला अकादमीचे शिक्षक व विद्यार्थीदेखील आपली कला सादर करणार आहेत. या कार्यक्रमाची सुरुवात शहनाई वादनाने होईल.
भारतीय संस्कृती व परंपरेनुसार चैत्र शुध्द प्रतिपदा ‘गुढी पाडवा’ हाच खर्‍या अर्थाने नववर्ष दिन म्हणून ओळखला जातो. तथापि, ३१ डिसेंबरचा दिवस हा नववर्ष दिनाची पूर्वसंध्या म्हणून वेगळ्याच पाश्‍चात्य स्वरूपातील जल्लोषात सर्व भारतात व जगातही साजरा केला जातो. परंतु, विश्‍वशांती केंद्र (आळंदी), माईर्स एमआयटी, पुणे आणि विश्‍वशांती संगीत कला अकादमी, पुणे या संस्थेच्या माध्यमातून आपल्या संपूर्ण समाजामध्ये व विशेष करून तरूण वर्गाच्या मनामध्ये ‘स्वधर्म, स्वाभिमान व स्वत्व’ जागवून खर्‍या अर्थाने ‘भारतीय अस्मिता’ जागविण्याचा संस्थेचा एक विनम्र प्रयत्न आहे. ‘एमआयटी सांस्कृतिक संध्येच्या’ कार्यक्रमातून ‘संगीताच्या साधनेतून ईश्‍वर दर्शन व शांत रसाची अनुभूती’ देणारा एक आगळावेगळा अलौकिक आविष्कार सर्व जाणकार रसिकांना मंत्रमुग्ध करेल.

विश्‍वशांती गुरुकुल येथील विश्‍वराज बंधार्‍याच्या विस्तीर्ण जलाशयात उभारलेल्या मंदिरस्वरूपी श्री महासरस्वती, श्री महालक्ष्मी व श्री महाजलदेवता या तीन विशेष मंचांवरून शांतरसाची अनुभूती देणारा ‘एमआयटी सांस्कृतिक संध्या’ हा विशेष कार्यक्रम दरवर्षी ३० व ३१ डिसेंबर रोजी मोठ्या उत्साहात साजरा केला जातो.
दि. १ जानेवारी २०१८ रोजी सुरू होणार्‍या नव्या वर्षाची ही अभिनव सुरूवात भारतीय संस्कृतीला अनुसरून नामवंत, तसेच तरुण गायक व संगीतकार यांच्या सादरीकरणातून होणार आहे. एमआयटी सांस्कृतिक संध्येचा समारोप दि. ३१ डिसेंबरच्या मध्यरात्री, त्याग व समर्पणाचे प्रतीक असलेल्या यज्ञकुंडामध्ये काम, क्रोध, लोभ, मोह, मद व मत्सर, विकार, विकृती व विकल्पासारख्या दुर्गुणांची आहुती देऊन, स्वत:चे आणि संपूर्ण समाजाचे पुढील २०१८ हे वर्ष अत्यंत सुखाने, समाधानाने व शांततेने पार पडावे यासाठी प्रार्थना करून संकल्प सोडला जाईल.
या सांस्कृतिक संध्येच्या कार्यक्रमात सहभागी होऊन नाद-ब्रह्म-स्वरूपी ‘संगीताच्या साधनेतून ईश्‍वर दर्शन व शांतरसाची अनुभूती’ घ्यावयाची असेल, त्यांनी या कार्यक्रमात सहभागी व्हावे, असे विनम्र आवाहन संयोजकांतर्फे करण्यात आले आहे.

पुणे : सर्वसामान्यांसाठी केंद्र आणि राज्य सरकार दर दोन महिन्यांनी विविध योजना जाहीर करते या योजनांचा लाभ मिळवून देण्यासाठी कार्यकर्त्यांनी प्रयत्न करावेत असे आवाहन पालकमंत्री गिरीश बापट यांनी केले. भाजप कसबा मतदार संघाच्या वतीने येथील सरस्वती विद्यामंदिर येथे माजी पंतप्रधान अटलबिहारी वाजपेयी यांच्या वाढदिवसानिमित्त संजय गांधी निराधार योजनेतील तसेच श्रावण बाळ योजनेतील पात्र लाभार्थांना आदेश पत्राचे वाटप करण्यात आले यावेळी ते बोलत होते. 

 या कार्यक्रमाला तहसीलदार अर्चना यादव,शहराध्यक्ष योगेश गोगावले, नगरसेवक महेश लडकत,दीपक पोटे,संजय गांधी निराधार योजना कमिटीचे भारत निजामपुरकर, अशा शिंदे, मुक्ता माने, क्रांती खांडेर, बापू नाईक, छगन बुलाखे, वैशाली नाईक आदी उपस्थित होते.

 यावेळी बोलताना मंत्री बापट म्हणाले, जनतेने मोठ्या विश्वासाने भारतीय जनता पक्षाला केंद्रात, राज्यात त्याचप्रमाणे महानगरपालिकेतही निवडून दिले. आता लोकांना आपल्याकडून अपेक्षा आहेत. त्यांची पूर्तता करणे हे आपले कर्त्यव्य आहे. सर्व सामान्यांसाठी केंद्र आणि राज्यसरकारच्या अनेक चांगल्या योजना आहेत. पण दुर्देवाने या योजना सामान्यांना माहिती होत नाहीत. त्यामुळे भारतीय जनता पक्षाच्या कार्यकर्त्यांनी अधिक वेळ देऊन या योजना सर्व सामान्यापर्यंत पोहचवल्या पाहिजेत.प्रत्येक कार्यकर्त्याने किमान 10 लाभार्थी तयार केले तर किमान 20 हजार लाभार्त्यांना आपण पुढील वर्षीपर्यंत लाभ मिळवून देऊ शकतो.

 आज देशाचे माजी पंतप्रधान अटल बिहारी वाजपेयी यांचा वाढदिवस आहे. त्यांनी आपल्या कामाच्या जोरावर कार्यकर्त्यांच्या मनात एक वेगळे स्थान निर्माण केले आहे. त्यामुळे आज त्यांच्या वाढदिवसा निमित्त पुढच्यावर्षी 20 हजार लाभार्त्यांचा मेळावा घेण्याचा संकल्प करूया. असे आवाहनही त्यांनी यावेळी केले.

जेजुरी ( प्रतिनिधी ) – लग्नातल्या उखाण्यांची ठसक….मनोरंजनासाठी गाणी…गप्पा…...चिमुरड्यांचे नृत्य   ओसंडून वाहणारा तरुणी आणि महिलांचा उत्साह…, ग्रुप बनविण्याच्या स्पर्धेतील महिलांची चढाओढ, याबरोबरच फुगे फोडणे त्यामधून अनेक महिलांनी चढलेली गुणांची शिडी आणि अखेरच्या संगीत खुर्चीच्या सामन्यात एकमेकींना दिलेली जोरदार टक्कर..,अशा विविध खेळांचा आनंद घेत कोथळे येथील आझाद चौक येथे पैठणीचा खेळ रंगला. प्रसिद्ध शिवव्याख्याते निलेश जगताप यांच्या वाढदिवसानिमित्त खेळ पैठणीच्या कार्यक्रमाचे आयोजन करण्यात आले होते.या वेळी एकापेक्षा एक रंगलेल्या या बहारदार स्पर्धेत सहभागी होऊन यशाचे शिखर गाठत महिलांनी पैठणीचा मान मिळविला. या वेळी जेजुरी नगरपरिषदेच्या नगराध्यक्षा वीणा सोनवणे, मार्तंड देव संस्थानचे प्रमुख विश्वस्त राजकुमार लोढा , संदीप जगताप , शिवराज झगडे ,पंकज निकुडे , जेजुरी पोलीस स्टेशनचे पोलीस निरीक्षक हाके साहेब , भारतीय जनता पक्षाचे आर.एन.जगताप ,नगरसेवक योगेश जगताप , नगरसेवक गणेश जगताप ,हेमंत सोनवणे, दिवेकर साहेब ,प्रा.केशव काकडे, नीरा कृषी उत्पन्न बाजार समितीचे संचालक धनंजय भोईटे, दिलीप जगताप , वाल्मिक जगताप, राहुल भोसले, प्रकाश महाराज जगताप , दत्ताआबा भोईटे , विश्वास जगताप आणि विविध मान्यवर उपस्थित होते. शिवव्याख्याते निलेश जगताप यांनी उपस्थित सर्वांचे स्वागत केले .  अखेरपर्यंत रंगलेल्या ‘खेळपैठणीच्या’ या कार्यक्रमात महिलांनी उत्स्फूर्त प्रतिसाद नोंदविला. कोथळे पंचक्रोशीमधील शेकडो  महिला या कार्यक्रमात मोठ्या संख्येने सहभागी झाल्या होत्या.कार्यक्रमाची सुरुवात खुमासदार उखाणे घेत झाली. एकापेक्षा एक बहारदार उखाण्यांचा जणू रंगमंचावर पाऊसच पडला. याप्रसंगी हा खेळ खेळतानादेखील महिलांचा उत्स्फूर्त उत्साह पाहायला मिळाला. स्वाती कडूच्या निवेदनाणे, रितेश साळवेच्या कवितांनी आणि अनिकेत हुंबरेच्या गाण्यांनी कार्यक्रमात रंगत आणली.

याबरोबरच फुगे फोडणे ,स्ट्रोच्या माध्यमातून बोल घेऊन जाने  हे मनोरंजनात्मक खेळदेखील या वेळी घेण्यात आले. त्यानंतर आयोजित अखेरचा संगीत खुर्चीचा सामना जोरदार रंगला. संगीत खुर्चीचा सामना पाहताना सर्वांच्या मनात धस्स झाले होते. मात्र, झालेल्या सर्व स्पर्धांमध्ये मिळविलेल्या यशाप्रमाणे संगीत खुर्चीमध्येही यश मिळवत वंदना जगताप, राणी गुरव , ज्योती जगताप , सुरेखा जगताप ,शारदा जगताप यांनी मानाची पैठणी पटकावली. उल्का भोईटे ,संगीता जगताप, सविता शिळमकर ,राजश्री जगताप यांच्या हस्ते विजेत्या महिलांना पैठणी देण्यात आली . पैठणीच्या खेळात सहभागी झालेल्या सर्व महिलांना आणी तरुणींना आकर्षक भेटवस्तू देण्यात आली तसेच चिमूकल्याना सुद्धा यावेळी भेटवस्तू देण्यात आल्या. कार्यक्रमाचे आयोजन संदीप जगताप, आकाश शिळमकर , प्रतिक वखरे, तुषार काकडे , आकाश लेंडे, , ऋषिकेश काकडे ,विजय जगताप , शुभम साबळे आदींनी केले , सूत्रसंचालन दत्तात्रय भोईटे यांनी तर आभार संदीप जगताप यांनी मानले.